علماء زرَّات
05-07-2012 10:30 AM

ساخر سبيل

علماء زرَّات

الفاتح جبرا
[email protected]

لوالدي رحمة الله عليه كلمة يرددها بإستمرار كل ما كانت تشغل ذهنه قضية أو مشكلة ما .. والكلمة هي (وبعدين) .. فكنت كلما رايته يقوم بتكرار هذه الكلمة أعلم انه يواجه مشكلة ما .. وأنه (مزرور) في أمر ما ومضيق عليه الخناق فيه مما حدا به للتخفيف عن نفسه بهذه الكلمة (وبعدين؟) كأنه يفتح حواراً بينه وبين نفسه لكيفيه الخروج من تلك (الزرَّة) !

الايام دي وجدت نفسي أردد ذات الكلمة بين كل فينة واخري (وبعدين) ليس لانني مزرور وكده بل لأنني اعتقد بأن البلد كووولها (مزرورة) ويتوقع لها بان تمر (بزرّات) في كثير من الاصعدة .. طيب (وبعدين؟) العبد لله يقترح إيفاد المسئولين لتلقي دورات مكثفة في (علم الزرَّه) وهو علم يعني بدراسة كيفية مواجهة (الزرَّات) والتعامل معها ومحاولة الخروج منها باقل الخسائر ولعمري فإن هذا العلم له فائدة كبرى تعود على مسئولينا الذين دايما ما تجهجههم (الزرَّات) وتجعلهم يلقون على مسامعنا عندما يواجهونها ما يمكن تصنيفه بكل سهوله بانه (كلام الطير في الباقير) !

بعد تبحره في علم الزرّة ونيله لقب (عالم زرَّات) سيتمكن وزير ماليتنا التعامل مع الزرَّة (الإقتصادية الحاصلة) فهل هنالك زرَّة أكتر من أن يتم رفع الدعم عن المحروقات لترتفع نيران الأسعار اكثر مما هو عليه الآن في ظل إرتفاع متواصل للدولار مقابل العملة المحلية (الما معروف حدو وين ده) !

وبعد نيله لزمالة جمعية علماء الزرَّات العالمية سوف يستطيع وزير دفاعنا التعامل مع أى (زرَّات) تتعرض لها حدودنا مع (العدو) بعد أن تم فتح جبهات قتال في عديد من المناطق مما يتطلب جهداً متواصلاً وحراسة مشددة وعين لا تنام ؟

أما وزيرة الرعاية الإجتماعية فبعد تخصصها في (علم الزرَّات الإجتماعي) فسوف تستطيع بكل سهولة التعامل مع (الزرَّات الراجياها) عندما تصل نسبة اعداد المتسولين إلى عشرين متسولاً لكل شارة مرور واربعبن أمام كل صيدلية هذا غير (زرَّات) التعامل مع إزدياد وتنامي اعداد المشردين والمشردات الذين أصبح من المالوف أن تراهم في أي مكان بعد أن كانوا بس (قدام السينمات) !

وزير الصحة المنشغل بإستثماراته العديدة وأعباء منصبه الرسمي عليه ان (يفضي روحو شويه) (ويهرع) لتلقي جرعة مكثفة من (علم الزرَّات) إذ انه سيواجه إذا إستمر الحال كما هو عليه لزرَّات منيلة بنيلة حينما يصل الامر (حتة) ان تتم مطالبة المريض في المستشفيات الحكومية بإحضار (الدكتور) بعد أن كان يقوم بإحضار الحقن والشاش والدواء !

أما وزير الداخليه فالعبدلله يعتقد بأنه لابد له من تلقي (دورة حتمية) في (الزرّات الأمنية) فكل المؤشرات تقول أن أعداد الوافدين قد أصبح يقارب (وافد لكل مواطن) وفي ظل حدود فاتحه (ساااكت) ووجود هؤلاء الوافدين (سارحين ومارحين) من غير تسجيل او أوراق ثبوتية او حصر يجعلهم قنبلة قابلة للإنفجار لابد لمن يتصدى لها أن يكون متفقهاً في التعامل مع مثل هذه الزرّات الأمنية والتي ستقع إن إستمر التعامل مع هذا الأمر الخطير بالطناش الشايفنو ده !

كل الوزراء والمسئولين في ظل هذا الوضع الذي نعيشه والذي تصلح عن التعبير عنه مقولة والدي رحمة الله عليه (وبعدين) مطلوب منهم أن يصبحوا (علماء زرّات) إذ يبدو أننا مقبلون على مستقبل من غير ملامح لو ما الناس خلت البتعمل فيهو ده وفتحت عيونا وتبنت خطة إصلاح عاجلة قبل (الزرَّات) ما تحصل وكده !

كسرة :
ليس في كل (زرَّة) تسلم الجرة !

كسرة ثابتة :
أخبار خط هيثرو شنو(ووووو)؟


تعليقات 33 | إهداء 1 | زيارات 7668

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#358483 [احمد]
3.19/5 (5 صوت)

05-08-2012 08:25 PM
ياابو الهول تعليق لقطة وشامل


#358251 [ALI]
3.32/5 (5 صوت)

05-08-2012 03:30 PM
عارف يا الفاتح أي زول من الوزراء الذكرتهم ديل ممكن يكون عنده العذر المقبول للزرّة
1) وزير المالية : عااااااادي >> إذا كان العالم كللللللو اتزرّ و اقتصاده ضربته كارثة بقت علي انا لكن ما مشكلة انا الوضع تحت السيطرة.
2) وزير الدفاع: بعد ما العمارة البنيتا زمان لناس الرباط (الشرطة) وقعت، قلت ابني لي ناس الجيش مباني كتيييييرة، و بعدين يعني انت ما تبقى محبّكة شديد ما تخاف الناس دي انشاء الله مابجوا تاني و كان جوا ما بياكلوكم و ما بسو ليكم شي و كان اكلوكم انشاء الله ما تنفعوهم. برضو الوضع تحت السيطرة.
3) وزيرة الرعاية: حقو تكلمي الإدارة العامة للمرور تقلع إشارات المرور، و لا تقفلي الصيدليات و السنيمات.
4) وزير الصحة: الزول ده قالو قبّل على الطلبة بتاعنو يقلع منهام موبايلاتهم، الله في انت ما تخافي انشاء الله ما بتجيكم عوجة.
أما وزير الداخلية فممكن يقول ليك: احنا عاوزين نحذو حذو ماليزيا لمن ادت الصينيين الجو بلدها حق تقرير المصير و اهي سنغافورة قامت على رقاب الشعب الماليزي فيها كلمة ...
قلت لي هيثرووووو


#358007 [د.هيثم مشرف]
3.82/5 (6 صوت)

05-08-2012 12:04 PM
أمانة ما إنزرينا نحنا يا أخوي!!وزير الداخلية حقنا "أثيوبى"و وزير الدفاع حقنا بدل ما يشترى سلاح قعد يبنى فى عمارات..و وزير الصحة ولاية الخرطوم"بتاع الزيتونة"التاس سموهو "أزيتونا" نلقها نحنا مِن مِنو و لا مِن مِنو؟!


#357755 [fatmon]
2.19/5 (5 صوت)

05-08-2012 07:23 AM
شر البلية ما يضحك
أضحكتنا بعد أن إفتكرنا إننا نسينا الضحك


#357715 [kamal]
3.94/5 (6 صوت)

05-08-2012 03:35 AM
لكن ما اعتقد انه الجماعة ديل محتاجين لي دورات تدريبية في الظراط , الناس ديل بظرطو كويس بس البلد ضيقة , هو البحصل ده مش حال بلد ماسكنها ناس بظرطو و بس ؟؟ وبالمناسبة انا ما كنت شايف في داعي للتشفير و تقول (زرات) هي اصلا بايظة بايظة


#357677 [إبن السودان البار -------]
2.25/5 (4 صوت)

05-08-2012 12:59 AM
الأستاذ جبرة بلدنا عايزة علماء زرات كبار وفاهمين؟؟؟ مش علماء ظراط لأنه عندنا منهم كثر وريحتهم فايحة مالية البلد وعلي رأسهم عبد الرحيم حمدي ؟؟؟ واخبار حلم الأمام شنو ؟؟؟


#357641 [مزرور]
5.00/5 (2 صوت)

05-08-2012 12:19 AM
ديل صاروا بروفات فى علم الزرات فقد اكتشفوا بان حل معضلة الزرة بتوليد اختها الاخرى ..

وكان الله فى عوننا الزرتنا لا تفوت من الحلق لا تتبلع ..


#357610 [شحاته]
5.00/5 (3 صوت)

05-07-2012 11:32 PM
الاستاذ جبرا تحياتى بس المشكله يا جبرا يا اخوى الناس ديل ما فاشلين مشكلتهم لما يمشو للدراسه حيخضعوا لمعاينات من ضمن المعاينا ت دى خضوعهم لجهاز الزروميتر والجهاز ده لقياس درجه الزره لانه وفقا للجهاز ده لو لقى المسؤول زرتو شديده وما ليها حل واثرها على المواطنين طبعا بكون على درجه ريختر فلو تجاوزت الزره 75% زروميتر 5,5 ريختر على شعبو حيستبعدوه من الكورس وبالتالى لايوجد حل لتك الزره فمثلا لو لقيهو مزرر فى تهمه اباده جماعيه مثلا دى يحلوها كيف؟ اكيد حيقولوا ليه باى باى


#357604 [جحا]
5.00/5 (1 صوت)

05-07-2012 11:20 PM
وعلم الظراط


#357550 [ام الحاج]
5.00/5 (2 صوت)

05-07-2012 10:28 PM
تحياتي لك استاذجبرة فعلا هي زرة التي نحن مزرورنيهاولكن ديل بيعتبرو نفسهم علماء ذرات اما الزرات دي خليها للشعب الفضل مزرور في الاكل وايجار البيت والسكر وتعليم العيال وفي النوم الذي انقلب لسهر من كثرة التفكير والزرة


#357497 [كلوكلو]
5.00/5 (2 صوت)

05-07-2012 08:51 PM
برضو ممكن وزراء التوالي ياخدو كورس زرات تهميش عشان يحدوا من عملية الفنجطة والإستقالات الماشية في البلد اليومين ديل.


#357479 [اللمبك]
5.00/5 (3 صوت)

05-07-2012 08:25 PM
اضيف للسادة الوزراء المبجلين ان يعملوا الدورة كل شهر...؟؟؟ طبيعى ؟؟؟ مع كل مرتب يعنى (عشان ماتفهمونى صاح)...؟؟؟؟؟


#357472 [بت ابوها]
5.00/5 (1 صوت)

05-07-2012 08:15 PM
يا استاذ ديل الراجياهم ما زرات ...الراجيهم زرقات....وهناك فرق بين علم الزرات وعلم الزرقات وهو كالفرق بين الفيزياء والماس


#357455 [ulv]
5.00/5 (1 صوت)

05-07-2012 07:44 PM
و بعدين !!!!!!!!!!!!


#357453 [KALIFA AHMED]
4.00/5 (1 صوت)

05-07-2012 07:37 PM
وبعدبن........البفكنا من علماء الزرات (الغير مشددة الزاء او قول مدغمة في شكل ظاء) ديل شنو أمثال بروف الإفكوليجي مختار الأصم ومن دار في فلكه !!!!


#357448 [صراحة]
5.00/5 (4 صوت)

05-07-2012 07:27 PM
بشبش ذره كلب في طاحونه والكهربه قاطعه

غايتو زي ذره بشبش دي مافي أكعب منها


في حال أي سيناريو بشبش رايح
سبحان الله لكن يمهل ولا يهمل



دي اسمها دعوه المظلوم

يكون واحد مسكين كان فاتح بيت كبير بي وظيفه و ساتر أسره بشبش ج من هناك جدعو صالح عام

والاسره أتفرتقت وكل زول بقي في دوله

والأولاد سابو القرايه وشاغالين

والأبو من شدة شوقو لي ولدو يكون دعا وقال حسبنا الله ونعم الوكيل فيك

وربنا يورينا فيكم يوم يا سفله

بشبش بي قروشو الكتيره دي ممكن اشتري أي حاجة في الدنيا الا الحريه

سبحان الله

وأكعب حاجة بشبش ما يقدر يقول وبعدين

لانه بعدين دي المشكله ذاته


#357412 [انور]
0.00/5 (0 صوت)

05-07-2012 06:25 PM
اهو ده الكلام الهادف اهه وبعدين


#357284 [ubedallawd]
5.00/5 (1 صوت)

05-07-2012 04:24 PM
لك الود يا ابوالفتوح والتحية لك علي عمودك ومابة من كلام دسم خفة وسرعة وتعبير عن مايخص المواطن والطعن في الفيل
كسرة اولي انت الزرات في اي دولة والجامعة اسم شنو ؟ وبعدين معاك السفر برة اكون مكلف دولالالالالالالالالالالار ودي وبعدين قالو الفي والدك بقالدك)
كسرة اخبار الزراااااات شنو؟


#357183 [wadkanan]
5.00/5 (3 صوت)

05-07-2012 02:36 PM
والله يالفاتح اخوى المزرزرين ديل نحن بس الناس البتقول فيهم ديل اخر ما يحتاجو ليو هو علم الزرزره مادام الماكل حق الناس مابزرزر و القام بى نمره اربعه و بنى عماره فى السوق العربى و اهلو كان ساكنين جالوص مافى زول زرزرو !!!!!!!!!!!!!! و الناس دى ما عندها زمن زاتو لجنس كورساتك دى ديل دايرين كورس فى اقصر طريق لبلع اكبر كميه من مال الشعب الجيعان و دايرين دوره فى تموييت الضمير الكامل دون التاثير على عضلات الفك لزوم البلع و كده و معهد لتعليم فنون التطبيل لفارغ الاقاويل و كده يا شيخنا اما المحتاجين لكورسات الزرزره دى نحن الشعب السودانى الفضل المزرزر من كل جهه من قروش فطور الشفع لى حق الايجار لبتاع اللبن ولى دين حامد المغلبك بالتلفونات وهلم جرا


#357166 [Mustafa]
5.00/5 (2 صوت)

05-07-2012 02:20 PM
نسيت الريس يا عمو جبرة


#357163 [abuali]
5.00/5 (1 صوت)

05-07-2012 02:17 PM
يا استاذ الزرة البتتكلم عنها دى فالصو ساى. ديل لا بعرفو الزرة و لا عمرهم شافوها و اى حاجة عندهم ليها حل لأنها فى النهاية بتقع فوق راس الشعب المسكين المزرور الحقيقى.


#357157 [ابن السودان حافى]
5.00/5 (5 صوت)

05-07-2012 02:11 PM
الله يمتعك بالصحه يا استاذ جبره لأنك انت فاكهة الراكوبه واتمنى ان تكتب عمودك هذا كل يوم مع احترامى لبقية الكتاب فهم على شاكلتك ، كل مواضيعك التى تكتب عنها تلامس حياة المواطن السودانى البسيط . الحيكومه لو جمعت عمودك هذا ساخر سبيل وطبعنه منذ مجيئها قبل 23 سنه ودرسته بالجامعات يمكن ان يحل مشاكل بلدنا الكثيره دى .


#357141 [كاكوم]
5.00/5 (4 صوت)

05-07-2012 01:54 PM
ومن هو المزرور ( زرّة كلب فى طاحونة ؟؟ ) واى انواع الدورات ينفع مع هذا ؟


#357101 [منكوب]
5.00/5 (1 صوت)

05-07-2012 01:10 PM
حلوة تشديدالراء فى زرات


#357093 [مالم بهوشي]
0.00/5 (0 صوت)

05-07-2012 01:02 PM
اضف الى ذلك علم الضرات و علم الحشرات


ردود على مالم بهوشي
United States [ابو جاكومه] 05-07-2012 02:18 PM
اضف الى ذلك علم عدم الاعتراف بالتنوع الثقافي والعرقي والديني
كسرة؟
انتو ناس المشروع الحضاري ربنا مطول في اعمارهم دي عشان يعذبونا ويفروقنا ولا كيف؟


#357084 [ود عويضة]
0.00/5 (0 صوت)

05-07-2012 12:52 PM
صحح معلوماتك - ما اسمها زرة - اسمها زنقة - ووزير المالية ما مزرور من الميزانية - لكن زانقنوا الولاة - وبالرغم من انه طوح باثنين - وما خايف من الباقي - بس الدوحة عاملة ليه قلق
كسرة ؟
كم (الدولار)


#357008 [Wyoming]
0.00/5 (0 صوت)

05-07-2012 11:57 AM
يعلن معهد النشفان علي اقامة الدورات الاتية للوزراء والروؤساء
علم الزرات
علم الزوقان
علم السرقان (من سرقات)
علم الاضراب (من الضرائب)
علم السوهان
وعلم البلعان
علم المضغان (من مضغ)
كورس واحد بي 10 مليون
اتنين كورس بي 9 مليون
تلاتة كورسات بي 7 مليون
ولو عاوز تأخد الكورسات كلها بي 20 مليون
الفرصة محدودة
وعلي الراقبين الاتصال بي الدكتور بلعمو ود البالع
يبداء الكورس يوم كده كدة وينتهي يوم كده كده سنة كدة


#356992 [مراد حماد]
5.00/5 (1 صوت)

05-07-2012 11:38 AM
يا الفاتح حروف الكلمة دي كلها قابلة للتحريف ونت عارف و أنا عارف والقاضي عارف!


ردود على مراد حماد
United States [شامبيون] 05-07-2012 07:43 PM
وبعد الدراسات يجينا الواحد عالم زراط سورى اقصد زرات


#356967 [ابو الهول]
5.00/5 (2 صوت)

05-07-2012 11:18 AM
كسرة ثابتة :
أخبار خط هيثرو شنو(ووووو)؟
شايفك دايا تسأل عن الخط دا ..انت بتطقع بعيد مالك ؟ماتشوف خطوطنا الداخلية ..خليك من خطوطن ..ما تسالنا :"السودان اب مليون ميل وينو؟"احكي ليك قصة الكديسةالاتهموها بانها اكلت كيلو اللحم حق المسطول ..لمن وزنها وقال لي مرتو :لوعرفنا انو ده كيلو اللحمة ..امال الكديسة وين ؟ "...وتيب لو عرفنا انو الجنوب اخد حقو في السودان وبي نفس الاسم ..امال باقي السودان ويييين ؟؟ ما تقوول ..مالك اتبكمتا...
..وانا برضو ابوي لما واحد يتزرا ويقول "بعدين !!" كان بيرد عليهو ويقول ليهو :"عوض جادين ...شات الاتنين"......هههههههههه وشر البلية ما يضحك ..اللهم اجعلو محمدخير ....ههههههيع


#356958 [متحسر على المليون ميل]
5.00/5 (3 صوت)

05-07-2012 11:12 AM
اخونا جبرا وصلتنى بعض المعلومات تقول الاتى ....
دولة ليبيا طلبة دكاترة وصيادلة وخريجى مختبرات طبية على ان تكون المرتبات كلاتى ...
الدكتور 8 الف دولار
الصيدلى 6 الف دولار
المختبرات 4 الف دولار لحدى هنى مافى اى مشكلة المشكلة وين طيب
المشكلة ياسيدى وزارة الصحة(الســـــودانية) احتجة على المبالغ دى وقالو دى مبالغ كبير على السودانين نقصوها ووزارة الصحة الليبية وافقة على طول واعادة النظر فىى المرتبات كلأتى ..
حتى اكون دقيق انا عارف ناس مختبرات ادوهم الف ونص دولار فقط
شوفو بلاهى عليكم الله ديل لا برحمو ولا بخلو رحمة الله تنزل
ارجوك يااستاذ وارجوك رجاء خاص ياجبرا ابحث فى الموضوع دا


ردود على متحسر على المليون ميل
United States [عبد الواحد المستغرب اشد الاستغراب!!] 05-07-2012 01:31 PM
اخونا المتحسر انت باين عليك حاسب (مليونك) بالقديم !!كده ادى الخريطه طله واحسبها صح وبعدين تعال اعرض قضيتك !!وقضيتك لا يمكن النظر قيها لان الاسم مزور من اساسه!!وجبرا ما بقدر يشترك معاك فى قضية تزوير مكتملة اركانها وبنيانها!!وقضيتك حتى الان مقبوله شكلا لتوفر حسن النيه لكن مرفوضه موضوعا لوجود شك فى الاسم وكون ان الاسم للاب غير كافى لقبول الدعوه لحين تعديل الاسم بالوجه الصحيح !! وإتحداك لو قدرة تعرف الرقم الصحيح لمساحة السودان الان 00رفعة الجلسه!!0


#356947 [وليد العمدة]
5.00/5 (3 صوت)

05-07-2012 11:01 AM
وبعدين يا جبرة مع الرئيس الما عندو كلمة ثابتة ده مرة اقول نتفاوض ومرة اقول ما دايرين نقعد الا نحرر جوبا

كسرة:-
اخبار ابيي شنوووو؟


#356932 [وحيد]
5.00/5 (4 صوت)

05-07-2012 10:55 AM
الاقتراح وجيه و لكنه غير عملي، و ذلك بسبب كثرة عدد الوزراء و المسعولين و الدستوريين الذين تبلغ اعدادهم الالاف و كلهم يواجه " زرات" كثيرة فيما يليه... اذا ارسلنا كل هؤلاء لحضورات دورات في علم الزرات فسيصبح الامر مكلفاو الدورات ذاتا تبقى زرة جيدية.. خاصة ان ال turn over اصبح في ازدياد وسط المسعولين و الدستوريين، و الى يقال و والي يستقيل و وزير يقال و زير يستقيل .. الاقتراح ان تفتح جامعة او كلية متخصصة في علم الزرات حتى يؤمها هذا العدد المهول من المزرورين!


#356924 [ودالحاج]
5.00/5 (1 صوت)

05-07-2012 10:51 AM
نعم علم الزرات وعلم الذرات وعلم آخر تعرفونه ؟؟؟؟؟؟؟؟


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة