المقالات
السياسة
ارشيف مقالات سياسية
خربشات على جدار الواقع المايل..منع من النشر..
خربشات على جدار الواقع المايل..منع من النشر..
05-08-2012 03:31 PM

خربشات على جدار الواقع المايل..منع من النشر..

الهادي النعيم يس
[email protected]

الرسالة منعت الرقابة صحيفة الجريدة من نشر ثلاثة زوايا(الراي الساخر)لنادر التوم و(كباية شاهي)لشاهيناز ابوزيد و(خربشات على جدار الواقع المايل)للهادي النعيم..بملف تيارات السبت الماضي...!!لا املك الا (الاندهاش)..ونشر (خربشاتي) الممنوعة من النشر...!
كما انني اطالب ب(إعادة) الاحتفال باليوم العالمي للصحافة بتحكيم (اجنبي) ونزيه..لطالما فشل الحكم(الوطني) الذي يبدو انه لايملك غير (الكرت الاحمر)...والا سنصرخ بان(الت...عتيم) فااااشل..

(خربشات على جدار الواقع المايل)..للهادي النعيم..

#دخلة:

ما تفرحي (ساكت) يا زولة.. لا انتي اخيرة و لا اولى..
حبيت قبالك (اطناشر) ......عيني بغيرك مشغولة..

#قصص قصيرة جدا(ق.ق.ج) :

(1)
*يدعى(الطيب)...إعتلى (المنبر) مجادلاً...(فإنفصل) عن واقعه دون ان (ينتبه) لذلك...!
(2)
تجول في كل الوزارات فكان وزيراً للإستثمارثم أصبح وزيراً للمالية..ثم وزيراً للتجارة..ثم النفط..
قرروا (ايقافه) عن العمل التنفيذي فعينوه وزيراً (للاوقاف)..رلم يتوقف..
فابتكروا وزارة(حسن الخاتمة) وعينوه وزيراً لها. ..فمات (شهيداً) في حادث حركة..

(3)
*جمعت بينهما علاقة حب لفترة طويلة(شئ تلفونات وشئ هدايا وشئ بكاء..(وحجات تانية حامياني))..
بعد فترة تقدم ابن خالتها(المغترب) طالبا يديها(الاتنين)....اخبرت حبيبها بالامر..
فأجابها: والله الظروف بقت..وانا كنت ...,لكن الزول دا كويس ما ترفضيهو انا بعرفو من زماان...
ولم يكن يدري بأنها ايضاً وافقت من زمااااااااااااان...اوي كمان.
(4)
* جاءهم الخبر بأن ابنهم الوحيد استشهد في الجنوب..إمتلأ الصيوان بالمعزيين..كالعادة حضر(الجماعة) معهم (شيلة الشهيد) لإقامة (عرس الشهيد)..هللوا وكبروا...خاطبهم(وزير العريس) مبشراً بأنه قد رأى الشهيد في الجنة مع الصديقين..وزع البلح(والشربات) على كل الاهل والجيران والمعارف..ليس ذلك فحسب..بل ان الشهيد نفسه شرب من (شرباته) عندما عاد مساء ذلك اليوم.. ..واخبرهم بانه كان(خالط) في (حدائق الشهداء)..!

# خربشة شديدة:

*مافينا زول حاليا بتكلم عن الانتخابات الجاية.ولما تقرب ما حيكون في زول ما بتكلم عنها......شعب (موسمي) بشكل.....!

* صلاح قوش....مالك مجافي الناس عايش براااااااااااااك في (غرفة)..؟؟؟؟؟

*طاعني دايما بي وراء وقاصد محبتي تخسرا...وحفلاتنا كلها وراء وراء ..بعد دا كلو يقولوا ليك ارمي قدام وراء مأمن..انتو التأمين داغيرو ولا شنو..؟

*بلد عجيبة والله..لافي زول بقول( إحم)في الشارع لا (دستور) في البرلمان...!

*الشبه بين المعارضة السودانية وجامعة الدول العربية انها تحدد ..ترتب.تجند(من اجندة)..تجتمع..تناقش.. تشجب..تطالب..تقرر ثم تنفض..!

*عايز لي مدير يقفل (جامعة) الدول العربية دي..ما الامام المهدي قفلت..سنار قفلت..الخرطوم قفلت..الفرق شنو يعني..؟!جامعاتنا فيها عنف (طلابي) وجامعة الدول العربية(كان) فيها عنف(قذافي)..!

# قوالات:
الحكومة:السودان لن يتأثر بالازمة المالية( العالمية).
الشعب: سمِح..!
بعد شهرين..الحكومة: ارتفاع اسعار السلع في السودان ناتج عن ارتفاع(عالمي),وليس في السودان فقط.
الشعب: والله..!!!!
الحكومة:ميزانية السودان لن تتأثر بإنفصال الجنوب.
الشعب:مبروك والله ..الله يزيد البركة..
بعد ساعتين من اعلان الانفصال..وزير المالية: سنتخذ (حزمة) من الإجراءات لمجابهة (عجز) الميزانية بسبب الانفصال..
الشعب: (الكضب) حدو قصيييييييير..

#مرقة :

ونِس بنيات النضِم وما تكمل إحساس الكلام..
السبت القادم نلتقي..دمتم....



تعليقات 6 | إهداء 0 | زيارات 2654

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#359668 [دعاك]
0.00/5 (0 صوت)

05-10-2012 01:59 AM
قصة مشابة ولد والى نهر النيل (القابو مشى يجاهد فى هجليج)طلع يعمل ساونة(الاختشوماتو)


#359463 [ابوحديد]
0.00/5 (0 صوت)

05-09-2012 07:36 PM
يا ود النعيم أنعم الله عليك ويغطيك من شبك أولاد الحرام
أضحكتني حتى سالت أدمعي ! وشر البلية ما يضحك !
قلت لي الشهيد كان وين ؟


#358606 [كلوكلو]
1.00/5 (1 صوت)

05-09-2012 12:09 AM
السبت خربشات أسبوع كامل ولا خربشات السب فقط؟


#358602 [محمد نور]
0.00/5 (0 صوت)

05-09-2012 12:02 AM
الناس دى جبناء عشان كدا فى خوف شديد


#358297 [ود الريس]
5.00/5 (1 صوت)

05-08-2012 03:58 PM
اسي ياخوانا ده كلام بمنعوه من النشر ...ماكل الناس عارفة الحاصل ده ....لكن نقول شنو ....الناس ديل ياابو النعيم ماعايزين اي وجع راس ....مافايقين عايزين يلملموا اطرافهم ...وانت عارف يا ابو النعيم انو الايام دي استقالات وزراء ومشاكل وقرارات مجلس ام؟؟؟؟؟
وهلمجر كما يقول الامام الصادق المهمدي ....المهم انت لما يمنعوك من النشر انشر لينا هنا نحنا بنقرا وبنعلق ونؤيد عدم النشر نحن لسناكوزراء حسن الخاتمة ...
مقالك والله والله والله مافيه شيء يتعيب ومافيهو شيء يمنعه ان يمنع من النشر ..الا لسبب واحد انت (زول صحفي ) تاعب الحكومة والحكومة ماناقصة ...في الايام دي ...
لذلك عليك الله وصية تانية انشر وخليننا ننشر ....


#358292 [zahi]
0.00/5 (0 صوت)

05-08-2012 03:55 PM
ابداااااااااااااااااااااااع


الهادي النعيم يس
الهادي النعيم يس

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة