أخبار المقعد شنووو؟
05-09-2012 11:22 AM

ساخر سبيل
9 مايو 2012م

أخبار المقعد شنوو؟

الفاتح جبرا
[email protected]

عندما شغر مقعد السيناتور باراك أوباما فى مقعد الشيوخ الامريكى نائباً عن ولاية ألينوى بعد فوزه بمنصب الرئاسة كأول رئيس أسود فى تاريخ أمريكا، خول القانون للسيد روغوفيتش حاكم الولاية تعيين بديلاً لأوباما ليكمل الفترة المتبقية حتى حلول موعد الأنتخابات القادمة. ولكن قام السيد الحاكم ببيع المقعد لمن يدفع أكثر و قبض الثمن. واذا بالموضوع يتكشف فى ظل الشفافية و حرية الصحافة و يقبض على الحاكم من منزله و أمام أطفاله و يكبل بالأغلال و يقاد الى الأعتقال بانتظار المحاكمة.، وفعلا بعد محاكمة عادلة جدا أستمرت شهورا عدة حكم على الحاكم السابق بالسجن لمدة 15 عاما فى السجن الفدرالى بولاية كولورادو، وذهب الى السجن حبيساً.
بعد أن قرأنا الخبر (بالأمريكي) تعالوا معي - ايها القراء- لنتخيل (النسخة السودانية) منه :
عندما شغر مقعد (فلان الفلاني) بعد إقالته خول القانون للسيد (علان العلاني) تعيين بديلا له ليكمل الفترة المتبقية حتى حلول موعد الأنتخابات ولكن قام السيد (علان العلاني) ببيع المقعد لمن يدفع أكثر و قبض الثمن .. القصة في (أمريكا) إنكشفت لكن هنا عندنا القصة ما ح تنكشف بأخوي وأخوك لانو نحنا عندنا حاجة إسمها (الجريمة المنظمة) أو إن شئت (المتكتكة) .. يعني روغوفيتش بتاعنا ما بيكون براهو كل واحد من حاشيتو بيكون عندو دور في (الشغلانية دى) .. واحد بيتولى قصة الإعلان بأنو في كرسي شاغر وعاوزين نبيعو وكده .. والتاني بيكون مهمتو المفاوضة في السعر .. والتالت إستلام القروش وكده .. لذلك فالمسألة بتكون آخر (تعتيم) ولن تخرج إلى النور إلا بسبب واحد من إتنين .. يا تحصل (دقسة) يا (يختلف اللصان) !
إذا القصة إنكشفت رغم التعتيم واللا شفافية و(الغمتي) وتسربت إلى الصحف التى سارعت بنشر ملابساتها وتحصلت على مستنداتها ح يتم حظر النشر في القضية (طواااالي) بحجة عدم التأثير على العدالة .
بعد أن يتم الحظر سوف يبدأ الجماعة في (لملمة الموضوع) وحتي لا يتساءل سائل (أخبار المقعد شنووو) يتم الإعلان في الصحف عن تشكيل لجنة للتحقيق في الموضوع (نظام محاربة فساد وكده) و بعد سبعة .. تمانية شهور .. سنة.. سنتين كده تعلن اللجنة عن الإنتهاء من مهامها وأنها قد قامت برفع نتيجة التحقيق إلى مفوضية الفساد .
عند إستلامها لملف نتيجة التحقيق تقوم مفوضية الفساد بدورها بإنشاء لجنة لمناقشة نتيجة تحقيق لجنة التحقيق وبعد أن قامت لجنة مناقشة نتيجة تحقيق لجنة التحقيق من الإنتهاء من عملها (بعد كم شهر .. سنة .. سنتين كده) تقوم برفع تقريرها النهائي لوزارة العدل والتى بدورها تقوم بتشكيل لجنة لدراسة نتيجة تحقيق لجنة التحقيق التي قامت بها مفوضية الفساد و(بعد كم شهر .. سنة .. سنتين كده) تتوصل لجنة تحقيق نتيجة التحقيق إلى ضرورة إستدعاء المتهم السيد (علان العلاني) ولكن نسبة لصعوبة تحرك السيد (علان العلاني) فقد رات اللجنة الذهاب لأخذ أقواله بمقابر احمد شرفي !

كسرة :
ونحنا حكينا القصة دي ليه؟...... عشان نعرف قصة (لجان التحقيق) دى آخرتا أيه !

كسرة ثابتة :
أخبار خط هيثرو شنو(ووووو)؟




تعليقات 22 | إهداء 0 | زيارات 6391

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#361235 [Mohd]
0.00/5 (0 صوت)

05-12-2012 08:58 AM
واحد سعودي قالت مشيت السودان قابلت اكثر من الفين نفر وتحدثت معها قال كلهم كذابين وما فيهم صادقين غير نفرين بس والنفرين انا اختار منهم واحد يعني الثاني مثلهم .



انا المستغرب له يا جبرة انه الناس ديل كلهم فاسدين لدرجة انه ابوقناية نفسه فاسد (يعني مافي زول في البلد نزيه)

ووصلت الى قناعة بأنه البلد كلها فسدت ومافضل فيها زول نزيه (في الحكومة والمؤتمر الوطني) ومستعد اقسم على مية مصحف فوق بعضهن بأنه 99.9 من مسئولي الحكومات الولائية والاتحادية ورؤساء الادارات ووكلاء الوزارات بأنهم فاسدين

والناس ديل شغالين بموتوا في القضايا وبقتلوا في الزمن بس

لجنة تحقيق دي لما تحكم وتقول الناس ديل طلع ما عليهم حاجة بعد كم سنة يكونوا الناس نسوا الموضوع وتكون القروش الاتسرقت دي بقت اضعاف مضاعفة حتى لو حكموا بادانتهم واعادتها تكون فقدت قيمتها من ناحيتين من ناحية القيمة النقدية (مقابل الدولار) ومن حيث انهااصبحت تمثل اقل من 10% من الارباح المضاعفة التي ولدتها


#360086 [wadkanan]
0.00/5 (0 صوت)

05-10-2012 01:31 PM
يا حليل زمن كنا بقيف
طابور صباح
واجمل نشيد علم الوطن
لا شلنا هم رغم الضنك
لى حق فطور
لا تعبنا من طول الوقوف
فى صف رغيف
ما مادام بلد واحد صحيح
واقف الف
حاميه كان البرلمان
ما فيه زولا جابو ساى
بلاختيار
كل الحضور معزول عزل
بجرة القلم النضيف
بالاقتراع
و مقاعدو كم شالت رجال
شالو الوطن حدقات عيون
زروق خطب و محجوبا صال
شان الوطن ما شان حزب
كانت مواقفم الكبار
و مقاعدم يا ساخر سبيل
ما بتنجلب فى السوق يمين
لمنتفع او بس عميل
ورغم المحن عاش الوطن
ترجع مقاعد العزه فيه
و اتمنى فيو مقعد وثير
يملاء الغيور وطنى و عفيف
ساخر سبيل
قولو امييييييييييييييييييييييييييييييييييييييييييييييييييييييييين


#359753 [على الطيب]
0.00/5 (0 صوت)

05-10-2012 08:30 AM
وزير المالية قال امس فى برنامج (بالتفصيل)
ببراءة الاطفال عندما سئل عن قفة الملاح ومعيشة الماطن
نحن خصموا مننا مرتب شهر لرد العدوان
ومرتباتنا ما زادت لحد الان!!!


#359579 [عبدالله]
0.00/5 (0 صوت)

05-09-2012 10:50 PM
علييى الطلاق يا جبرة حيرونا معاهم ؟؟؟؟؟؟؟؟؟؟؟


#359459 [ود عويضة]
0.00/5 (0 صوت)

05-09-2012 07:36 PM
يااخونا الفاتح بلاش فزورة لجان التحقيق - احسن ما دخلنا في السياسة الناس ديل بزعلوا منك ، انا عندي ليك اقتراح عاجل قد اجد من قراء الراكوبة من يثنيه، تعلق لينا يوميا على أقوال مأثورة من ( فقه المرحلة ) فمثلا لو قال وزير مالية مخضرم او محترم عليكم بالاستغفار لمواجهة غلاء الاسعار - بماذا نرد عليه بالتكبير ام بالتسبيح ام بالاثنين معا؟ افتينا
واذا قالت امرأة من ىل بدر او مشهود لها بالصلاح من داخل قبة البرلمان ان الناس في العاصمة الطاهرة بتآكل في اليوم وجبة( سخينة) واحدة فقط - ماذا نقول لها بالهنا والشفا ام تقترح على الناس ان يستخدموا (كاتشب) اسلامي ويحمدو الله!!!!


#359411 [ALI]
0.00/5 (0 صوت)

05-09-2012 06:25 PM
و الله يا الفاتح لو لقيت لينا واحدة من اللجان دي بتكون ظرييييييييييفة. ياخ الاجتماع الواحد منها فيهو حوافز تقدّّر بمرتب 1000 شهر.


#359357 [بت أمدرمان]
5.00/5 (2 صوت)

05-09-2012 05:33 PM
يا عمو جبرة أخبار ميدان الحاج يوسف العملوه مدرسة شنوووو؟ شايفة الواوات بقن اربعة


ردود على بت أمدرمان
United States [مبارك] 05-09-2012 10:52 PM
سلامة النظر الواوات خمسة الا تكون اعتبرت واحد (الواو الضكر)!


#359346 [وحيد]
5.00/5 (5 صوت)

05-09-2012 05:23 PM
هؤلاء الامريكان لا يشبهونا في شئ، هم دولة متقدمة و نحن " دولة" حضارية و " رسالية" ، و سلاطين امريكا من "الانجاس" و سلاطينا من " اصحاب الايدي المتوضئة"، و عنهدم شفافية و عندنا " فقه السترة" - تاصيل و كده - كما عندنا قاعدة خلوها مستورة، و عندهم لا يوجد شخص فوق القانون، و عندنا كل المتنفذين فوق القانون و فوق البشر و فوق كل شئ وكلهم عندهم حصانة من كل شئ الا الموت ، و امريكا تجرى فيها انتخابات حرة و نزيهة، و انتخاباتنا مدغمسة و مخجوجة، و رئيس امريكا يتغير كل اربع سنوات و رئيسنا يظل مكنكشا و راقصا الى ان يزوره ملك الموت او تخمه انتفاضة شعبية او يقبض عليه في " ملاوي " التي ليس من حقها منع الرئيس من حصور اجتماعات الاتحاد الافريقي، رئيس امريكا ياتي بالانتخابات و تشيله الانتخابات، و رئيسنا اتى بانقلاب عسكري و الزارعه غير الله الليفلعوا، رئيس امريكا و مسئوليها يخافون من الشعب و من المعارضة و عندنا الشعب و المعارضة "يلحسوا كوعهم" .. في امريكا نوع الخمش دا يعتبر فساد يحاسب عليه القانون، اما عندنا فالخمش جهاد يكافأ فاعله و يحاسب تاركه حسب شريعة الدولة الانقاذية


ردود على وحيد
United States [baba] 05-10-2012 12:38 AM
thanks allah that our beloved president has no kids. alhamdolilah

United States [إبن السودان البار ------] 05-09-2012 11:48 PM
ناس أمريكا بيخافوا من الشعب لأنهم كفرة ؟؟؟ ولصوصنا بيخافوا من الله لأنهم مصلين ولو ما مصدق شوف كبر الغرة الفي جباههم وكمان كبرة كروشهم ؟؟؟ وأخبار حلم الأمام شنو ؟؟؟

United States [nader] 05-09-2012 06:54 PM
والله يا وحيد تحليلك فظيع يس ليه وحيد


#359298 [ubedallawd]
4.50/5 (2 صوت)

05-09-2012 04:34 PM
فعلا لوداير تكتل الموضوع كون لجنة(اللة يرحمك ياشعبنا يابلدنا يا وطناالمنهوب )ال ال جاييين ننقذ البلاد والعباد حرامية كريهييييييييييييييين....


#359105 [وبعدين؟]
3.50/5 (2 صوت)

05-09-2012 01:19 PM
جحا والحمار والملك

نفس القصة ونفس السياسة، لو كان في مفوضية فساد ولا غيرو

حتى يموت الحمار


#359081 [محمد خليل]
5.00/5 (1 صوت)

05-09-2012 01:03 PM
دا يا جبرا اذا لم يسارع البشير و يلقى كل لجان التحقيق بجرة قلم حماية للفساد و المفسدين كما فعل من قبل فى لجنة التحقيق مع مدير سونا و غيرها.


#359069 [wedhamid]
5.00/5 (1 صوت)

05-09-2012 12:50 PM
يا جبرا .....سيبك من الخباثه دى وخليك واضح .....إنت عارف و أنا عارف بإنو فى قانون بينظم ملء شواغر البرلمان كيف...ولكن حكاية بيع الخانه الشاغره دى موضه إنقاذيه يمكن زولك السيد روغوفيتش حاكم ولايةألونوى شفاها من جماعتكم ديل من سفر تقارير لجان إنعدام الشفافيه العالميه الأصلن مصنف السودان تانى الطيش !!! الخانه(المقعد) الشاغره فى المجلس النيابى لولاية الخرطوم هل تم بيعها للست حرم الملياردير صلاح إدريس ؟؟؟ و التى أعلن فقط تعيينها فيها دون ذكر الكيفيه !!رأيك شنو ؟؟؟ أنا شخصيابفتكر فعلا تمت المبايعه كتّيمى خاصة أن بعل النائبه الجديده محنك فى بيع و شراء مش هواة بل محترفى كرة القدم و ذو باع فى الكار ده و الدليل ما بيّنوا أى حيثيات ...ثم صلاح إدريس من أهل رئيس المجلس ود الشيخ مدنى و القرابه لعبت دور..... يعنى كووولووو فساد و محسوبيه يا ظريف ....و بالمناسبه السيد روغوفيتش رحمو بأنو ما غرمو ... وطبعن بعد الخروج من السجن حيستمتع بقروش المقعد داك و المحكمه الأمركيه دى هل ممكن تكون دقست ؟؟ برضو هنا فى إنّه !!!....


#359059 [AMEIR]
5.00/5 (1 صوت)

05-09-2012 12:44 PM
تعرف يا جبرة الحاكم حيقول للمشتري سأدهب الي السجن حبيسا وتتفرجخ في البرلمان نائبا تصفق فارغه ومقدوده طبعا بعد ما يقبض المعلوم بما فيه بدل الحبس ده في الغالب يكون ايام لو حصل ويمكن اعمال فقه السترة خاصه انو الوالي ما بيضمن الفترة التي يحوز فيها علي المنصب


#359057 [عطر الليل]
0.00/5 (0 صوت)

05-09-2012 12:42 PM
دا يا أستاذ حمدو فى بطنو !! لكن وين حيمشو من رب العزة والجلالة صاحب التحقيق والعدالة وزى ماقال الممثل ( أيوة المغتى عند الله مكشوف ) ..


#359050 [بتاع اورنيش]
5.00/5 (1 صوت)

05-09-2012 12:37 PM
غايتو ياجبرا لو انت واخوانا في الراكوبة كان جنينا


#359032 [احمد زاكي الدين]
5.00/5 (4 صوت)

05-09-2012 12:21 PM
لدي حلم .. لدي حلم كما قال مارتن لوثر كنج

يصحي البشير من النوم ويقرر ان السودان للسودانيين ويعتذر للشعب السوداني عن فترة حكمة الفاتت ويجرد نفسة من كل الاموال التي اقتناها خلال فترة الانقاذ ويبيع كل البيوت الفي كافوري والفي عفراءوغيرها وكذلك الاراضي ويرجع القلوس الفي البنوك الي خزينة الدولة وهذا الكلام ينطبق علي كل اعضاء حكومتة الموقرة من وزراء ووزراء دولة وولاة ورجال اعمال وجمال الوالي ويرجع كما كان قبل السلطة بيت كوبر ومزرعة السليت ويعلن انة باقي في رئاستة كفترة انتقالية وخلال هذة الفترة الانتقالية اولا بشوف سودانيون صاح وما اكثرهم بغض النظر عن انتمائهم الحزبي او الديني او القبلي ويعينهم كوزراء بكافة الصلاحيات ليس لهم هم الا السودان ويكون من ضمنهم وزير الوحدة وهذ شغلتة الوحيدة التوحيد بين شمال وجنوب السودان علي ان لايتعدوا {16} وزير صلاحياتهم مطلقة ومرتباتهم محددة ويضع قانون جديد بمرسوم جمهوري ويكون اول مرسوم جمهوري يعني رقم واحد ومحتواة كالاتي1 مرسوم رقم واحد اي شخص داخل جمهورية السودان يقول ان حزب امة او جبهة اسلامة او اتحادي او جعلي شايقي .... تقوم قيامتة الحزب والجنس والدين هو السودان -- ثانيا بقوم بانشاء جهاز يسمي الجهاز المركزي للمحاسبات يعين فية قضاة ومراجعين من الدرجة الاولي لهم كل الصلاحيات في محاسبة اي شخص اقتني في فترة حكومتة الرشيدة واكيد القروش العند ديل حاتريح وزير المالية الجديد كميزانية عن سنتين علي الاقل لانها اكثر من قروش البترول او علي الاصح هي قروش البترول المنهوبة خلال التسع سنوات السابقة يكون مهمة وزير الزراعة اهم وزير وخلال موسم واحد يكون السودان اخضر ترجع مجانية التعليم ويرجع التعليم كما كان ويكون المعلم زي زمان شخص محترم ويكون من اعلي الرواتب .. المستشفيات الحكومية اجود من المستشفيات الخاصة من ناحية النظافة و العلاج ومجانيتة يلغي جهاز الامن تماما ويستعاض عنة بافراد من الشرطة النظيفين جدا هم الوطن فوق همهم لاننا لا نحتاج لأمن فالدولة في امان ومافي حاجة الرئيس والوزراء يخافون عليها { ايقاف كل العاملين الحاليين بتلفزوين السودان وجلد كل منهم مائة جدة وعمر الجزلي 500 سوط } الاقفال الفوري لصحيفة الانتباهة والطيب مصطفي واسحاق فضل الله ينفوا من السودان او يصلبوا بداعي الفتنة التي ادت الي الانفصال وارجو ان يتحقق الحلم
لو الرئيس مابقدر علي كدا يفرتق وخلاص كفاية


ردود على احمد زاكي الدين
United States [متوكل] 05-09-2012 02:50 PM
أضغاثُ أحلام .

كل الكيزان في حالة سايكلوجية تسمى الأنكار و التبرير ( يمدهم في طغيانهم يعمهون ) , أن لحظة واحدة يجلسونها بصدق و نكران ذات و تجرد كفيلة (لا كقرد ) بأن تجعلهم يغتسلوا ( ثلاثون مرة ) و يتوبوا توبة نصوح و يعتكفوا في المساجد لبقية عمرهم وعسى أن يتوب الله عليهم .

United States [مستاء] 05-09-2012 02:14 PM
قوم من النوم يا شيخ الظهر جاء


#359027 [ابومازن]
0.00/5 (0 صوت)

05-09-2012 12:18 PM
اخبار لجان التحقيق شنو في احداث بورتسودان وسوبا وعماره الرباط والمناصير والاعوج والعيلفون ووووووخط هيثرو اخبارو شنو


#359016 [sudani-online]
5.00/5 (3 صوت)

05-09-2012 12:11 PM
..وعلان العلانى لو ما مشى مقابر أحمد شرفى بيكون أخد استراحة محارب وبعد داك يتعين وزير العدل(ذاتووووو).............


#359001 [صابر]
5.00/5 (1 صوت)

05-09-2012 12:03 PM
الفاتح يا اخوي
ياخي مالك علينا فاقع رمراتنا من اول الصباح بتخيلاتك العجيبة دي ..
أنا عندي اقتراح انه نعينك وزير مفوض لشئون اللجان المنبثقة عشان نشوف انبثاقاتك حيكون شكلها كيف.
سلمت.


#358994 [منى]
5.00/5 (3 صوت)

05-09-2012 11:58 AM
أخبار أبو قنايه شنوووووووووووووووووووووووووووووووووووووووووووووووووووووووووووووووووووووووووو


#358968 [ماجده]
5.00/5 (1 صوت)

05-09-2012 11:37 AM
حكينا القصه دي ليه عشان نعرف فايده الجنيه في الكراسي المريحه "" زمانك لمن ظهر رجل المال والاعمال (فلان الفلاني """ الحرمو وام اولادو فلانه الفرتكانيه ) وبقي يشتري شرق وغرب بي قروش بن لادن قالو ليه فلان دا مايشتري المشروع الحضاري اها دا المشروع الحضاري زااتو اشتراهو فلان الفلاني بس بي اسم الزوجه فلانه ·


#358961 [مصطفى دنبلاب]
5.00/5 (4 صوت)

05-09-2012 11:33 AM
يبدو اننا وصلنا الى مرحلة من المكر والانحطاط الاخلاقى تفوقنا بها عن ما ندعوهم كفرة وملحدين وفاسقين .. من اين اتى هؤلاء فعلا.


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة