عوووك يا ابومروة
05-10-2012 10:21 AM

المواطن قال الرووووب

عباس عمر
[email protected]

السكر زايد..الدقيق زايد..الخميرة مافي..اللحم غالي..الصابون زايد..الصلصة زايدة..سعر الليلة بكرة اضربوا في اتنين..وخليك ضارب..طوااالي..وناس الحكومة قالوا لو لقيتو التجار ديل زادوا حاجة..اضربوا لينا..رقمنا في شوال السكر..والله يا حليلو شوال السكر الرميتوها فيهو..
:
التجار يقولوا والله المشكلة ما مننا من الموزع.. والموزع..يقول مامننا من..المصنع و المصنع..يقول ما مننا من الدولار المرتفع ووزير المالية يسألوه يقول والله ما بقدر اتحكم في الاسعار لكن بضمن ليكم السلع قاعدة..طيب انتا قاعد..والسلع قاعدة..وانتا ما بتقدر تتحكم في الاسعار..المقعدك شنو ؟
:
ناس البرلمان قالوا لي وزير المالية : ياخ المليون بقت ما بتملي قفة الملاح..نحنا نقوم نقول ليهم..ومين البصرف مليون..؟..شكلو الشعب السوداني دا مشترك مع جورج قرداحي في من سيربح المليون..وشكلو كلوووووووو ربح الجائزة..؟
:
اها وقالوا ليكم بطاقة تموينية..تاني..سكر علي صابون علي صلصة علي بصل مكادة زاتو..خلاص جانا الزمن القديم..زمن الشاي بالتمر..زي ترجمة الافلام الاجنبية..تشاهد الصورة..تفوتك الترجمة..تشرب جغمة شاي..تلحقا بي تمرة..
:
ولله يا جماعة البرلمان دا..العضوة الوحيدة الفيهو الكويسة..سعاد سخينة..هي الوحيدة الحاسا بي الشعب المكلوم..الشعب البقى يبكي (بالدمعة) (الثخينة)..طبعا أ.سعاد عرفت انو مافي (دمعة)..ولا قراصة..والحياة بقت (سخيييييييينة) بس..
:
هو ياريت لو الزيادة بقت علي السكر بس.. الخضار كلو..زايد..لحدي اصغر ليموناية..ياخ حتى الليمون..؟؟ والله صحي قام اتعزز الليمون..
:
والله يا ناس المواطن قال الرووووووووووووب..دا ما كلام دا فعل..لانو مشى الدكان وجاب ليهو رووب وكب عليهو حبة ملح علي حبة شطة..وياهو فطورو..والما مصدقني يسأل سعاد الفاتح..بتاعت السخينة..
:
والخبز وما ادارك ما الخبز..المقولة بتقول..ليس بالخبز وحده يحيا الانسان..والخميرة بتقول..ليس بالدقيق وحده يصنع الخبز..الخميرة كمان زاد سعرا..وقالوا اختفت في ظروف غامضة..لكن لو سألوني بقول ليهم..الخميرة دي اختفت لأنو وزير المالية ..وزير (حقوا تحمدوا الله)..كلامو ووشوا يقطع الخميرة من السوق..
:
الازمة لحقت ليك حتى المغتربين.. مغترب عايز يبني..السنة الاولي نزل السيخ..الاسمنت زاد..انتظر شوية..الطوب زاد..وشوية الرملة..والخرصانة..والتراب..المغترب دا يااااااااادابوا عرف انو (تراب) الوطن غااااااااالي..؟
:
غايتو المواطن السوداني بقى زي المسطول القابل صاحبو..مع انهم كل يوم بتقابلوا..واحد فيهم رافق القزاز..التاني قال ليهو..انتا مالك رافع (سعرك) كدا..قال ليهو..هو شنوا لما رافع سعرو الايام دي..؟
:
الشعب السوداني والله بس تاني تغني ليهوانصاف مدني : ما ساهل ما شوية..غلبني كتر عليا.
:
كسرة : بي موية..
كان المواطن يقول (عووووووووك يا ابو مروة)..لما الفيضان يداهموا..والبحر يكون زايد..هسع المواطن بيقول (عووووووووووك)..والاسعار زايدة..والحال ضاقت..والبحر جوا المواطن زايد..وزي ما قالت سعاد الفاتح( خلوا بالكم الشعب دا ما هين يسكت يسكت ولما ينفجر..الله يستر)




تعليقات 4 | إهداء 1 | زيارات 1553

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#360305 [ابوصابر]
2.54/5 (6 صوت)

05-10-2012 05:57 PM
مقال في الصميم لكن داير يشرحوا بالعربي البسيط لي وزير المالية لانوا بيتسائل كيف الناس ماقادرة تاكل


#360241 [hanankokoabas]
2.47/5 (6 صوت)

05-10-2012 04:29 PM
سعاد سخينة حلوة منك


#360201 [noor]
2.19/5 (6 صوت)

05-10-2012 03:39 PM
السودان الحزين


#360061 [السنهوري]
2.41/5 (6 صوت)

05-10-2012 01:06 PM
(كلامو ووشوا يقطع الخميرة من السوق) والله دي بالغة فيها


عباس عمر
عباس عمر

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة