توضيب إجباري
05-14-2012 10:18 AM

ساخر سبيل
14 مايو 2012م

توضيب إجباري !

الفاتح يوسف جبرا
[email protected]

صديقي (كمال) تعاني زوجته من مرض ما إختلف الإطباء في تشخيصه (متعويده داايمن) .. فقرر الذهاب بها إلى الخارج لولا أن (إرتفاع) الدولار الذي أدى إلى (إنخفاض) دخله المحدود وقف حائلاً دون (قصة السفر) التي تحتاج إلى تذاكر .. ومصاريف إعاشة ومستشفي وعلاج وخلافه .
وبينما كان صديقي (كمال) في هذه (الحوسة) أشار إليه أحدهم بالذهاب إلى أحد الأطباء الأخصايين (المعروفين) في أمراض النساء والتوليد بإعتباره زول متمكن ومتميز في هذا المجال وسوف يقوم بالتشخيص السليم ومن ثم المعالجة .
أخذ صديقي عنوان الدكتور الأخصائي )ْْْX) والذي تقع عيادته داخل مستشفى خاص (وسط الخرطوم) وسرعان ما شد إليه الرحال ليقوم بحجز مواعيد لزوجته ، وقف أمام السكرتيرة :
- عاوز أعمل مواعيد لزوجتي عند الدكتور (ْْْْْْْْX)
- والله في الأول لازم تقابل يا دكتور (Y) وللا دكتورة (Z) !
- لكن أنا عاوز أقابل دكتور (X) الأخصائي .. يعني ما أي دكتور تاني عشان الدكاترة التانيين ديل كووولهم مشينا ليهم وما عملو لينا حاجة
مع إنو الكلام واضح وضوح الشمس إلا أن السكرتيرة أصرت بأن ذلك من المستحيل وإنو من غير الممكن أن تتم مقابلة ال]كتور (X) دون الدخول إلى الدكتور (Y) أو الدكتورة (Z) فأذعن صديقي للأمر مكرهاً وما لبث أن قال لها :
- خلاس ممكن أقابل الدكتورة (Z) !
- طيب أدفع لينا 150 ألف رسوم المقابلة
ولما كان صديقي في حاجة ماسة لمقابلة هذا الأخصائي الكبير فقد قام بدفع الرسوم وفعلاً قام بمقابلة الدكتورة وشرح لها حالة زوجته فأمسكت بورقة موصية بمقابلتها للأخضائي (X) ، حمل صديقي الورقة وهو مندهش وذهب إلى السكرتيرة التي ما كان منها إلا أن نظرت إلى الورقة وقامت بتسجيل إسم المريضة بدفتر المواعيد ثم طالبتة بدفع 150 ألفاً (تاااني) والتي أخبرته بأنها رسوم مقابلة الأخصائي (X) !
السؤال الذي يدور في ذهنك الآن عزيزي القارئ هو ما صلة الدكتور (Y) والدكتورة (Z) بالموضوع؟ يعني بالعربي كده مريض عاوز يحجز يقابل أخصائي مش يحجز يحدد المواعيد ويدفع القروش ويدخل يقابلو؟
في الحتة دي بالذات يا عزيزي القارئ أنصحك بتناول (حبوبك) لو كان لديك أي من الأمراض التي تتعلق بالقلب والشرايين وإرتفاع ضغط الدم ...
العبد لله كان يظن وليس كل الظن إثم أن (الإحتيال) و(الإستهبال) له علاقة (عكسية) بالعلم و(الشهادات) وكده لأنو في نظري (لو فضل فيها نظر) أنو العلم (بيصنفر) الزول و(يصقل) فيهو الحتة بتاعت (مكارم الأخلاق) والفضائل والإبتعاد عن كل ما يشين الإنسان ولكن يا عزيزي القارئ يبدو أنه في هذا الزمن الأغبر التعيس قد تغيرت فينا أشياء كثيرة لذلك لا تصيبنك الدهشة إن أخبرتك بأن الدكتور (Y) والدكتورة (Z) اللذان يجب المرور عليهما قبل مقابلة الأخصائي هما (أولاد الأخصائي ذاااتو) !! وأهو لقوا ليهم (شغل) إسمو (أكل أموال الناس بالباطل) وكده !
وبهذا الفهم فإنه يمكن للأسطي (عوض جربوكس) أن يطلب منك مقابله إبنه (عادل أبنص) أولاً ليحدد لك إن كان العطل من (الكهرباء) وللا (البنزين) بعد دفع الرسم المعلوم ومن ثم يحمل الأسطي عوض جربوكس (عدة الشغل) بعد أن (يقبض منك أتعابو) ليذهب مباشرة لتصليح العربية بعد أن تم التشخيص الإبتدائي الما كان ليهو أى لزوم !
كما أن فوزي الجزار ما أن يقوم بقراءة هذا المقال فسوف يسارع بوضع إبنه (حسن طايوقة) خلف التربيزة بعد أن يقوم بزيادة سعر كيلو اللحم (خمسة جنيهات) رسوم توضيب لحم (إجبارية) ! ما القصة كوووولها بقت (توضيب) للشعب السوداني الفضل !

كسرة :
رايكم شنو في المهازل دي يا ناس المجلس الطبي؟ وللا نقوم نعملا ليكم كسرة ثابتة !!

كسرة ثابتة :
أخبار خط هيثرو شنو(ووووو)؟


تعليقات 47 | إهداء 0 | زيارات 8834

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#386706 [الزبير صالح الزبير]
0.00/5 (0 صوت)

06-07-2012 11:47 PM
والله اتلومت يا الفاتح يا اخوي
الموضوع ما عندة علاقة بأكل أموال الناس بالباطل ولا بالحق لا لا لا أبدا الموضوع فات عليك
عوز تعرف الفات عليك
اولا تتفضل تتصل علي
وبريد عليك وليدنا صالح
حا يحدد ليك رقم جوال ترسل ليه فيه رصيد بمائة الف
وبعد داك حا يتصل عليك يديك رقم جوالي الخاص
حا ارد عليك واوريك الفات عليك شنو في الموضوع ده
فهمت ولا دي برضوا فاتت عليك
ودي وتقديري

كسرة
أنا جاي قريب ويمر عليك في الجريدة
بالمناسبة أنا ما قاعد اتعزم الا سمك وعند عوضية سمك تحديدا فاعمل حسابك


#370868 [زهير]
0.00/5 (0 صوت)

05-21-2012 06:00 PM
اذا كان هذا الطبيب وعياله لم يستحوا فلماذا نستحى نحنا من ذكر اسمائهم الرباعية
كسرة. والقبيلة كمان


#364482 [غايتو !!]
0.00/5 (0 صوت)

05-15-2012 06:23 PM
حرام عليكم ما تظلموا مستشفى امبريال و د. سعد الفاضل و ابنه د. خالد سعد الفاضل و ابنته د. سماح سعد الفاضل .. يا جماعة حتى لو حصل كدة يعني شنو ما خلاص كلو رايح كتيرو و قليلو .. خلونا بس نعاين للجزء المليان من الجيب ... أخخخخخخخخخخ


#364125 [هجم النمر]
0.00/5 (0 صوت)

05-15-2012 12:01 PM
والله يا أستاذ لو ما عملتا الحكاية x y z كان يتلتلوك تلتلة العدو واليوم كلو تجري في المحاكم كويس غنك عملتها ليهم جبر يا جبرا


#364051 [سوداني]
0.00/5 (0 صوت)

05-15-2012 11:04 AM
ويقول ليك طبيب خلا الشغل ومشاء الدهب


#364004 [حليم-براغ]
0.00/5 (0 صوت)

05-15-2012 10:35 AM
ده سؤال لأزم يوجه لسعادة وزير الصحة مامون حميدة سوبر ماركت... بعدين ده سؤال ممكن يعمل ليك مشاكل مع ناس الحكومة وتطلع خائن وعدو دين ووطن ياسيد جبرا , أعمل حسابك , أمس إنت ما قريت المواضيع التي يجب عدم التطرق لها ( ده سؤال من ضمن الممنوعات) المهم نصيحتي ليك ماعندك حل إلا الشكوي لله سبحانة وتعالي , وربنا يكفيك ويكفي شعب السودان شر الأمراض, قول إن شاء الله. وتقبل تحياتي.


#363963 [مصطفي]
0.00/5 (0 صوت)

05-15-2012 10:06 AM
تاني لا نحنا ولا السودان بينفع فيه توضيب ولا يحزنون


#363846 [بليل]
5.00/5 (1 صوت)

05-15-2012 07:52 AM
للتاريخ .. رحم الله د. عمر بليل جراح الكلى الشهير فقد ابتدع فكرة الطبيب المساعد فى عيادته الحاصة بعمارة التنمية فى الثمانينيات .. اذ تستقبل عيادته(خمسة) مرضى يوميا نظير خمسة عشر جنيها للمريض .. ومن ثم يبدا المريض فى مقابلة الطبيب المساعد الذى يفتح ملفا للمريض بتسجيل تاريخه المرضى مع اجراء الكشف الروتينى الابتدائى ثم ادخاله لبروفيسور بليل دون دفع رسوم جديدة ..(( فى تلك الايام تتراوح رسوم كبار الاخصائيين بين عشرة الى خمس وعشرون جنيه)) .


#363833 [ام الحسن]
0.00/5 (0 صوت)

05-15-2012 07:18 AM
النظام بتاع z وy ده معمول فى حتت كتيره -بره السودان طبعا- وبكون مهمة الدكاترة ديل مساعدين للاخصائى الكبير ومهمتهم اخذ تاريخ الحالة بدقة وروية عشان اختصرو الزمن للاخصائى الكبير يعنى يدو الخلاصة...بس الفرق يادكتور ان بره السودان المريض بدفع حق الكشف مرة واحدة بس..اذكرت مقولة لراجلى دايما برددها انو السودانيين بحبو يلفحو الحاجة لكن بغلبهم يجيهوها سمح ولازم اختو عليها ختم الجودة بتاعهم...وحكايةختم الجودة دى دايره ليها فهامة لبعض الناس زى الكيزان مثلا


#363763 [إبن السودان البار ==--]
5.00/5 (1 صوت)

05-15-2012 01:40 AM
احد اخوانا الحلفاويين مرت جنازة بجنبه سأل ناس الجنازة المرحوم مات بي شنو ؟؟ قالوا ليه بملاريا ! قال ليهم بسيتة ؟؟؟ فأنت يأخونا جبرا الناس باعت البلد كلها جيت علي الدكتور الأحتال واخد 150 الف زيادة ؟؟؟ ياخي دي بسيتة ؟؟؟ وأخبار حلم الأمام شنو ؟؟؟


ردود على إبن السودان البار ==--
United States [mortada] 05-15-2012 10:49 AM
بن السودان البار الناس الباعو البلد خليهم وين اخلاق الناس انما الامم اخلاقهم فان همو ذهبت اخلاقهم ذهبو...


#363710 [بت ملوك النيل]
0.00/5 (0 صوت)

05-14-2012 11:32 PM
السودانيين انتهوا


#363707 [ضهبان]
5.00/5 (1 صوت)

05-14-2012 11:27 PM
يادوب انا فهمت لماذا اتوا بكبير الموضبين حميدة وزيرا للصحة.. والجنس للجنس رحمة ..

و الما عاجبوا يسجل فى انتظار احمد شرفى ..


#363663 [مبارك شنيبو]
0.00/5 (0 صوت)

05-14-2012 10:02 PM
نفس الدكتورحضرت موقف مع صديق لى بعد ضاقت به الدنيا بما رحبت قرر الذهاب اليه , وكانت مشكلة زوجتة عدم الانجاب بعد الفحوصات قرر لهم (طفل انابيب) سألة زوج المريضة كم تكلف . قال ليهو 10 مليون جنية صاحبي اندهش جدا وقالة شاملة كل شئ يعني الولادة والتنويم والمراجعة . بكل عنجهيه قال ليهو حتي السماية !!! ويضحك بضحكة باردة , هؤلاء نصابين وجزارين درجة اولي اسال الله انلا يبارك لهم حتي هذا الوقت بكونوا زادوها(تيمان)


#363602 [حسن]
0.00/5 (0 صوت)

05-14-2012 07:47 PM
الاستاذ جبره

في الزمن الحالي أصبح الطب استثمار ..... وأهو برضو الراجل خسر في أولاده وعلمهم طب
يعني لاز م يشوف ليهم مكان عشان يكسب ما خسره في تعليمهم!!!!!

وأخبار الخط شنوووووووووووووو؟؟؟


#363591 [فيصل]
5.00/5 (1 صوت)

05-14-2012 07:28 PM
انت خليك من ده كله . هسي العيادات اللي انت شايفه دي عيادات بني ادميين . انا بس داير أعرف المسؤؤل منها منو ؟ بيوت قديمة من التركية السابقة عاملنها لينا عيادات . رائحتها كريهة تنبعث من مراحيضها السطحية الروائح الكريهة . كراسي غير وثيرة بعوض لا تلفزيون لا كولر للماء . متسخة وغير مرتبةسكرتيرة انت قاعد منتظر تقابل الدكتور الاختصاصي x تتفاجأ بعد دخولك بمقابلة الدكتورة غير الاختصاصية s


#363540 [zoul]
5.00/5 (1 صوت)

05-14-2012 06:33 PM
عشان ما يكون كلام ساكت مليان اثارة خلي صاحبك يجرب ويشتكي للجهات المختصة ومنها المجلس الطبي وغيره عشان تثبت الحقائق وياخد كل زول حقه لأن المقال فيه تعميم وعشان الناس تعرف X وY وZ ديل منو وما تخش تجربة زي دي معاهم


#363497 [اللمبك]
5.00/5 (2 صوت)

05-14-2012 05:49 PM
اللهم نسالك اللطف فى مصابنا.. ولا تحوجنا لهؤلاء العصابات الرائعة فى فن الاحتيال..ولاحول ولاقوة الابالله..والحمدلله..واستغفر الله..و....أحييييييييى انا....ووووووووب ...وووووووب..وكر علينا..


#363417 [waheed]
5.00/5 (1 صوت)

05-14-2012 04:13 PM
شوف يا عزيزي: اهم " مميزات" الانقاذ هي تخانة الجلد و الغتاتة و قوة العين - في الباطل طبعا - ..كل انواع الموبقات ترتكب بقوة عين غريبة جدا و اي كلام فيها يقابل بالبرود الشديد كانه ما حاصل شئ.. حسي كسرتك بتاعت خط هيثرو في زول من الجماعة ديل جاب ليها خبر؟ بعض الناس اتعلمت من الانقاذ تخانة الجلد و عدم الاحساس، تفتكر زي الدكتور دا ممكن بكره يجي يعتذر للشعب السوداني و يخلي البعمل فيه؟ و تفتكر المجلس الطبي ممكن يعمل حاجة و لا الوزارة و او النقابة او اي جسم هلامي من دي؟ البلد بقت مراكز قوى و قطط سمان و الفساد اصبح دولة و كله بيحمي بعض و كل واحد ماسك للتانيين و ساكت ليهم عشان يمشي اموره و المسالة مسالة مافيا من المصالح و كلها على حساب الشعب الفضل. و كمية القذارة و الفساد في العهد الانقاذي محتاجة لطوفان عشان يخمها ينضفها.... اشتغلوا معانا عشان يجي الطوفان دا


#363401 [الامير]
5.00/5 (1 صوت)

05-14-2012 03:49 PM
والله كان عملت مية كسرة ما فى زول شغال بيك الشغلة

كسرة

اخبار التوضيب شنو


#363340 [ود المك]
5.00/5 (1 صوت)

05-14-2012 02:46 PM
بالله عليك يا جبره خلص الناس من الزي ديل ، في كل مجالات الحياة في سوداننا الحبيب ، ولمح اكتر في المقال علي الاقل ، يخجلوا شوية لو بخجلووعيد لينا المقال ده بكرة وبعده 7 ايام متتاليه عسى ولعل يكون في واحد من المسئولين عن الصحه باقي ليه شوية ضمير حته بس ويتحرك


#363321 [ود الحاجة]
5.00/5 (1 صوت)

05-14-2012 02:28 PM
الناس على دين حكوماتهم


#363320 [دلدوم]
0.00/5 (0 صوت)

05-14-2012 02:28 PM
مين القال انه اغية ولدنا طه سليمان بتاعة عوض دكام دى اغيه هابطه دى راكزه اكتر من غنا رواد الفنانين واليكم احد مقاطعها ( يا حليلو زمان الطبيب انسان ) ويا حليلك يا عوض دكام


#363295 [ubedallawd]
5.00/5 (1 صوت)

05-14-2012 02:12 PM
لاحولة ولاقوة الا باللة العلي العظيم
صحي القلم مابزيل بلم البلد دا كلك سوءات هولاء الحاكمين وهذة هي الافرازات التي ....... وماخفي اعظم ويامواطن قال ليك هاك القابة دي


#363258 [الحسن فاروق]
5.00/5 (2 صوت)

05-14-2012 01:46 PM
جامعة مشهورة ومعروفة قضيت معهم سنتين خدمة وإستقلت وطلبت شهادة خدمة عن الفترة التى قضيتها معهم وهو حق منصوص عليه فى قانون العمل, رفض السكرتير الأكاديمى إعطائى الشهادة وطلب منى إحضار سيرة ذاتية, رجعت لعميد الكلية ليساعد فى إخرج الشهادة من بين براثن السكرتير وكان رد العميد (ماهو أصلو جديد والراجل مختص وداير يرتب أمور الشهادات الفالتة دى), حسبى الله ونعم الوكيل


#363246 [الشايقى]
5.00/5 (2 صوت)

05-14-2012 01:34 PM
ماتقول ياجبره دى مستشفى امبريال والدكتور الفاضل وبتو سعاد وولدو الماعارف اسمو شنو ..عشان الناس تعرف حاجه


ردود على الشايقى
United States [سمبلة] 05-14-2012 09:52 PM
والله يا الشايقي الرد ما عليك لكن علي ابو ، طيب لو الامر فيه حسن ادارة وقت للسيد البروفيسور علشان وقته الثمين ما يضيع في حالات احتمال كبير مامحتاجة له اصلا ، في الحالة دي بيعين دكتور مبدئ ولكن يدفع له من جيبه الخاص وليس علي حساب المواطن الغلبان ، ياخي الفنيين في السوق لما تمشي تصلح حاجة بيقولوا لك تدفع لنا حق كشف علي الجهاز لو بيتصلح بنخصم حق الكشف ولو ما بنصلحه بيروح حق الكشف وبيكون عادة مبلغ ضئيل جدا وده بيكون حفاظا علي وقتهم ، لكن لان الاخلاق اخذت مسار عكسي مع العلم في سوداننا تتوقع اي حاجة ، وكمان الحاجة المهمة اللي اكتشفتها ان معظم الجامعات بتدرس الطلبة اساليب الاستهبال والاحتيال والاونطجية مع العلم من خلال ما تمارسه الجامعات معهم من استهبال واحتيال واونطة علي الطلبة ،

United States [سوداني مهموم] 05-14-2012 07:03 PM
اوعا د.الفاضل بتاع الكلي؟ لو هو ماغريبة عليهو لانو تمساح عشاري

United States [Abu] 05-14-2012 06:21 PM
والله صدقت اظنه الدكتور المقصود وانا عندي تجربه شخصيه بس للأمانة الموضوع فيه جانب خفي ارجو التريث قبل الحكم علي الناس لان دكتور سعد لو عايز تقابلوا هو مباشرة حا تنتظر شهر لانو مزحوم وكده أنا شخصيا ما شايف الموضوع يستحق


#363238 [سودانى]
5.00/5 (1 صوت)

05-14-2012 01:25 PM
اللهم عليك بالكيزان اكلين اموال الشعب بالباطل وباسم الدين والدين عنهم بئ هذه الشرزمه بئ براه الذئب من دم ابن يعقوب


#363236 [المصران الاعور]
5.00/5 (1 صوت)

05-14-2012 01:24 PM
الامر محول لهيئة علماء السلطان ( اقصد علماء المسلمين) لمعرفة رأى الدين !
منتهى الاستنكاح


#363225 [حمدان البجيب الشاي]
0.00/5 (0 صوت)

05-14-2012 01:18 PM
طيب يا جبرة شوف دي

لو نادي بقولو رياضي عريق متعرق في العراقة زي نادي المريخ
يقوم يأجر ليهو بيت في الخرطوم عشان فال شنو يعملوهو مقر للمكتب التنفيذي للنادي عشان شغل السمسرةبتاع نس اللجنة حار في الخرطوم احر من امدرمان و كده هسع انت كان لقيت ليك مقر جنبك في امدرمان مش احسن ليك فهم كانو شطار و اهو حاجة باسم النادي و كده و لو داير تقابل اي زول من ناس اللجنة اياها ما حا تلقاهو في المكتب ده
المهم ما موضوعنا مسألت اجروهو ليه دي فهي متروكة لفطنتكم
هسع كان قلت ليك انو نادي المريخ ده البقولو عليهو عريق و متعرق ده انو ما دافع ايجار البيت ده لغاية هسع لمدة حداشر شهر احد عشر شهرا و هذا النادي المتجزر في العروق ما هي العراقة الا تكون عراقي ساكت حداشر شهر و ما دعته كل هذه العراقة ان يسدد ما عليه من اجار متأخر و متعسر
عليك الله مش حقو يدخلوهو سجن امدرمان
انت يا جبرة قايل اكل اموال الناس بالباطل ده عند الناس المتعلمين و لا عند الدكاترة و ما تقول لي فلان الدشليونير و لا غيرو ما نحن عرفنا انهم جابوها من وين و كان ما عارف بقولها ليك ديل يا جبرة جابوها من الناس بالباطل يعني زي سيد البيت دة قاعد ممغص و قروشو يتفشخر بيها البسوى و الما بسوى
يا جبرة اكل اموال الناس بالباطل اصبحت ثقافة هذا الزمن الرديئ الزمن الفاسد
و اوعك تقول لي محاكم و لا قضايا و انت تكون سمعت عن البيت الاخلتو المحكمة قبل كم شهر كده و كان مؤجر داخلية للبنات في امدرمان و قامت الشرطة بكل همة منفذة قرار المحكمة و قامت مجدعة البنات و عفشن في الشارع لكن لما يكون نادي عريق زي ده تقوم القضية تاخد ليها لغاية هسعخمسة شهور و ما زال العرض مستمراو ما زال الليل طفلا يحبو
و تعال شوف ليك جنس لعب في المحكمة و صدقني لو النادي الغريق ده بذل واحد على مية من المجهود الببذل فيهو عشان يتلاعب بالقضية كان لي هسع شال بطولة العالم طبعا لو مسكو التدريب لمستشارهم البهلواني
و حقيقة و الله كان تابعت جنس ده حا يبقى موضوعك كلو كسرات و ما حا تلقى مكان لاي موضوع داير تكتبو و لا انت ما تسوي ليك جريدة براك تعمل فيها سطاشر صفحة الا شوية كدة تكتب فيها ساخر سبيل بتاعتك دي و طبعا فطنتكم كافية لملئ السطاشر صفحة الباقية بالكسرات و خليها بخط دقاق عشان تشيل
و دمت لكسراتك


ردود على حمدان البجيب الشاي
United States [الشايقى] 05-14-2012 04:29 PM
الناس فى شنو والحسانيه فى شنو ؟ اسه انت قريت المقال ده كويس ولا ساى داير تحشر المريخ
ولا انت تكون سيد البيت ولا حايدوك عموله ؟ولا شنو؟


#363201 [ادروب]
5.00/5 (1 صوت)

05-14-2012 01:03 PM
طوالي بعد ما اعالجة المراء بنط ليهو جوا البيت وبقلع الميئة وخمسين قلع وبوريهوا تاني لوا عملا بقلع المبلغ كلوا وياخذ دقه كاربه


#363187 [سعد]
5.00/5 (2 صوت)

05-14-2012 12:55 PM
ياهو دا السودان العاجبو يقعد والماعاجبو يشوف له بلد تانى وهو سعد الفاضل براه دى بلد بقت صلطه وكمان صلطه معفنه


#363167 [opti]
5.00/5 (1 صوت)

05-14-2012 12:45 PM
يا استاذ قديما قالوا: اذا كان رب البيت بالدف ضارب..
اذا كان الوزير زااات نفسو بستثمر في دم الناس و عندو 50 مستشفي و جامعة (الجامعة دي عشان يخرج انصاف متعلمين انصاف مستثمرين يتمرنوا في مستشفياتو و يبقوا مستثمرين بدوام كامل)
زي الديك تور الهلفوت المشغل معاهو اتنين هلافيت اكتر منو عشان يمصوا دم الشعب الفضل


ردود على opti
United States [ود البيت] 05-14-2012 08:05 PM
واذا كان رب البيت راقص؟!


#363150 [امين الشريف]
5.00/5 (4 صوت)

05-14-2012 12:33 PM
بكل اسف اصبحت ثقافة السرقة والفساد والنصب والاحتيال وكل اموال الناس بالباطل من (الثوابت الوطنية) التي لا يختلف عليها اثنان ...

المجلس الطبي اللي وجهت ليهو السؤال يا جبرة لو سالت من اعضائه ربما تجد هذا الطبيب(X) من ضمنهم .

فقدنا الوطن والاخلاق والثورة لذا هذا هو حصادنا .. حتى الطبيب الانسان اصبح في عداد المفسدين .


#363127 [ابوكرنك]
5.00/5 (1 صوت)

05-14-2012 12:19 PM
والله يا استاذ جبرا صحبك دا احمدالله ما قالوا ليهو الشبكة طاشة .والجاتك في مالك سامحتك الناس كل همها في القروش مافي مهنة ولا احترام مهنة .


#363122 [سودانى وبس]
5.00/5 (1 صوت)

05-14-2012 12:17 PM
مرت بى حادثة مشابهة قبل 4 سنوات..ذهبت مع الوالد لمقابلة البروفيسور( X)فى عيادته داخل المستشفى الخاص, إذا بنا نتفاجأ بمقابلة دكتور (Y) وعندما طالبنا بمقابلة البروفيسور, قالوا إنو أساسا هو بيجى عند الضرورة القسوى فقط. وأستخدم إسمو للترويج للمستشفى الخاص وكدة. قلنا ليهم طيب ماتشيلوا إسمو من العيادة حتى لا تختلط الامور وتتحاسبوا بعدين يوم الحساب.


#363069 [Wyoming]
5.00/5 (1 صوت)

05-14-2012 11:29 AM
لك التحية يا استاذ جبره والله فعلا رفعت الضغط عندنا والظاهر انو الموضوع بتاع النصب بواسطةذي القربي حيطول والمجلس الطبي اللع يلعنة ما فاضي ومما مسك الحرامي وزير الصحة اصبحت امور الصحة في مرض وعله دائمة...الله يكون في عون الشعب


#363062 [Mohamed]
5.00/5 (2 صوت)

05-14-2012 11:23 AM
يا ضيعة بني الانسان في بلاد السودان فى عهد كلاب بنو كيزان!


#363028 [jinja]
5.00/5 (1 صوت)

05-14-2012 11:03 AM
فيك البركة يا أستاذ .. تفتكر لو عملتها كسرة ثابتة ليوم القيامة , الجماعة ديل حيهتموا؟يا أخي ديل مات فيهم الاحساس بكل شئ , بما في ذلك الاحساس بانسانية وادمية المواطن السوداني. أن تتم استباحتنا من فبل الأطباء , وهم المظلومون والمضطهدون من قبل النظام مثلنا , فهذا مما يؤسف له شديد الأسف.. ليس لنا الا أن نردد مع ثوار سوريا: يا الله يا الله مالنا غيرك يا الله.


#363022 [كايلتود]
5.00/5 (1 صوت)

05-14-2012 11:00 AM
ياهو ده السودان !!!!!! عجبي !


#363012 [الصابري]
3.00/5 (5 صوت)

05-14-2012 10:51 AM
غايتو في زمن الانقاذ دا شفنا المحن, أحيانا أتمنى أن أكون أجنبياً وأعيش وسط السودانيين لأضحك باخر ما لدي من قدرة (ضحكية) من هذه المفارقات والابتكارات الانقاذية العجيبة لمرمطة هذا الشعب وتدجينه ثم استعباده وتسخيره ليظل يلهث طول اليوم ثم يسلم ما يقبضه صافياً لأسياده الكيزان. ثم أنبأتني نفسي انني لا أستطيع الضحك حتى لو كنت أجنبياً فما يحدث (يحنن الكافر) نفسه كما يقولون بل حتى أسوأ أنواع اليهود وأكثرهم جشعاً لا يمكن أن ترد بخاطره أفكار الكيزان لامتصاص عرق هذا الشعب.
(الكوز أسوأ من اليهودي بالاف المرات) حقيقة لا تقبل الشك.


#362993 [عثمان]
4.88/5 (6 صوت)

05-14-2012 10:42 AM
سعد الفاضل و ابنو خالد والبت ما عارف اسمها والمستشفي امبريال.. والله اعلم..
اللهم ارفع عنا البلي يا رب


ردود على عثمان
United States [قرفان] 05-14-2012 10:45 PM
د. سعد الفاضل اولادو خالد و سماح

United States [Welli] 05-14-2012 12:41 PM
تقريبا ده المقصود يا عثمان.
الغريبة إنو ما اظن انو محتاج قروش بعد ده, الا يكون داير يؤمن مستقبل الأولاد,هاهاهاهاها


#362978 [ahmed]
5.00/5 (1 صوت)

05-14-2012 10:33 AM
نطالب من المجلس الطبى التحقيق فى ذلك فورا


ردود على ahmed
United States [Modh] 05-15-2012 08:43 AM
تطالب منو ياخوي ؟

انت لست في دولة العدل حتى تطالب انت في دولة الظلم والاستبداد

دولة الجهوية والعنصرية

دولة اكل مال الناس بالباطل

دولة الفساد وارتكاب الكبائر والموبقات


دولة السحت

ليس لديك حل سوى ان ترفعك يديك للملك الجبار

United States [امين الشريف] 05-14-2012 12:35 PM
تطالب منو ؟؟؟؟؟

عشان يعمل شنو ؟؟؟؟؟

يا طيبتك اخوي احمد وطيبة شعب السودان !!!!!


الفاتح يوسف جبرا
 الفاتح يوسف جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة