خنقوها وصقيرها نام !!!!
05-14-2012 12:10 PM

سلام الأعزاء قرآء الراكوبة في كل مكان ,, لكم التحايا والتقدير

خنقوها وصقيرها نام

أسماء الجنيد


الحرب القامت دي آخر الأوراق الخاسرة في إيد الإنقاذ، واتعمدوا يقوموها مش حبا في الوطن والوطنية،ولا في تراب الوطن ،،، ولاهجليج اصبحت بين ليلة وضحاها ترابها غالي !لكن الفتنة الأكبر من القتل هي سبب حربهم الخسرانة قبل ما تبدأ.الخسارة في دايرين يشغلوا الشعب بي شغلانة تانية وهم لسه متشعبطين في كراسي السلطة رغم إنه خلاص اللمة اتفرتقت وبقت آئلة للسقوط في اي لحظة ، لكن مكابرة منهم ساي، بعدما تاجروا بالدين ودورهم أنكشف ، قالوا نتاجر بالوطنية ، وعارفين السوداني حمش وبتشيلوا الهاشمية من أول وهلة. عملوا فيها مناضلين ومستعدين يقرشوا الزلط في هجليج لكن باقي الأراضي المحتلة وقبال هجليج زاتها إن عزموهم في حفلة بي رقيص ما بقدروا يعتبوها!!
الوطنية لا تتجزأ والوطن ياهو الوطن , ترابو غالي وناسو عزاز ، مافي جزء غالي وجزء رخيص.
و لو جينا للحق والحقانية الجد جد , الأراضي المغتصبة فعلا ومن عدو غريب هي اراضينا في الفشقة وحلايب وشلاتين .كل المناطق دي أحتلت في زمن الإنقاذ وعينك يا شعب , مافي زول قال بغم !!! والبقول بغم يلحسوه كوعو.
وكمان بعد الإحتلال والقلع نص النهار بقت فيها هدايا للعدو المحتل .شيء خرفان وشيء أبقار بالألوف، والشعب جيعان ومرضان وقرفان . وآخرتها فدادين ارض ساااااااااي يسرحوا ويمرحوا فيها زي ما دايرين ! ده غير ابواب البلد الفتحوها ضلفتين للمصاروة يدخلوها بي مزاج وهم آمنين ، وكمان في المطار عملوا ليهم كاونتر براهم يستقبل المصريين فقط, عشان ما يتعبوا ويتمرمطوا و يقيفوا في الصفوف مع الألوف من ابناء الشعب سيد البلد زاتو !!! و بدل ما نقلع من العدو حقنا المنهوب، نكافؤ ونصفق ليهو كمان ونكرم ناسوا!! في حين إنه شعبنا مهان في بلده كمان !!! في حقارة اكتر من كده ؟؟؟؟
لو وقفتكم وهبتكم الهبيتوها دي وصلاتكم البتتحلفوا تصلوها في كاودا وهجليج وغيرها ، كان سويتوها في الشرق كان كل العالم وقف معاكم لكن في هجليج غنيتو العجب أمو ، وفي الشرق لبدتوا فد لبده والبلد زى ما بقولوا خنقوها وصقيرها نام !!!
لا نرضى ولن نقبل التفريط في شبر واحد من اراضينا وضد إغتصاب اي شبر من أرض الوطن, لكن خليكم حقانيين ورجال حارة ، وعرضتكم واحدة وصلاتكم في كل شبر مغتصب.

متاوقة
ـــــــــــــــ

صلاة الغائب عليك يا حلايب


تعليقات 14 | إهداء 1 | زيارات 2581

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#364519 [ابو أحمد]
0.00/5 (0 صوت)

05-15-2012 07:13 PM
يا بت الجنيد انت عسل عديل مالك ومال السياسة ما بتشبهك تفكري لو اتغير النظام حاتبقي هنري كلنتون . الزيك انت تكون قاعده في البيت والخدم يخدمو فيها بالمناسبة انت مرتبطة ولا علي قيد الحياة انا جاهز .


#364328 [مدحت عروة]
0.00/5 (0 صوت)

05-15-2012 03:09 PM
اؤيد اى حرف كتبتيه فى هذا المقال !!! وانا من زمان بقول ان ناس الانقاذ رجالتهم فقط على السودانيين لكنهم منبطحين قدام اولاد الرقاصات وناس لولا الحبشية وبنى قريظة والغرب!!! انهم عار على السودان والاسلام!!!! حتى كيزان مصر اولاد رقاصات بدرجة وزير!!!!


#364080 [yass]
0.00/5 (0 صوت)

05-15-2012 11:32 AM
الشئ البيفقع المراره.,انو اللحوم السودانية في مصر بي (مراراتها) ارخص من اللحوم عندنا هنا في السودان...يا رب بهم وبكل من يدور في فلكهم, عجل بالنصر وبالفرج.


#364076 [ابوكرنك]
0.00/5 (0 صوت)

05-15-2012 11:28 AM
يا بنت الجنيد بالله عليك ما تبشتيني الاغاني السودانية . من اين لك بهذه المعلومات انا كنت في مطار الخرطوم قبل شهر ما شفت كاونتر خاص لمصرين . انت مالك ومال المصرين عندك عقدة معاهم
ولا شنو فكينا من المصرين وشفي ليك موضوع تاني مواضيعك فارغة


ردود على ابوكرنك
United States [محمد العوض] 05-15-2012 05:42 PM
كضابة كضب ويمكن هى من الشلو العايشة فى مصر واللى بتعرفهم كويس


#363453 [ابوعمر]
0.00/5 (0 صوت)

05-14-2012 04:58 PM
كاونتر للمصريين فى المطار دى ما مقنولة ولا مبلوعة!!!!!!!!!!!!!!!!!!!


#363388 [ساميه]
0.00/5 (0 صوت)

05-14-2012 03:40 PM
تسلمى من كل بلاء يا اسماء ليتهم يعوا بان الشعب دا حدق وعرف كل الاعيبهم ج..اءتهم داهيه تاخدهم


#363343 [zoul]
0.00/5 (0 صوت)

05-14-2012 02:48 PM
وكمان في المطار عملوا ليهم كاونتر براهم يستقبل المصريين فقط, عشان ما يتعبوا ويتمرمطوا و يقيفوا في الصفوف مع الألوف من ابناء الشعب سيد البلد زاتو !!! وكما نديهم ضأن وماشية وابل لاقرش لاتعريفة والكيلو عندنا بالشئ الفلاني ونديهم كمان اراضي زراعية عشان يسثمروها او يأجروها هم حرين علي كيفهم بس كان عرفنا السبب كان حيبطل العجب


#363330 [مرضي]
0.00/5 (0 صوت)

05-14-2012 02:33 PM
والله كلامك تمام التمام الله يديك العافية ويطول عمرك.. البشوف صورتك يعمل حسابه ويقول دي أكيد من اخوانا أبناء النيل (حبايبنا المحتلين حلايبنا) وبعد مايقرأ كلامك يلقاك أشـجع وأرجل من الراقص عمر البشير وكيزانه الـ (مخ ن ث ي ن) شكرا.


#363302 [الرفاعي عبدالعاطي حجر]
0.00/5 (0 صوت)

05-14-2012 02:15 PM
ما قل ودل كلام في التنك استاذ اسماء وهي آخر الصلوات في حضن النفاق ... وصلاة الغائب على الفشقة .


#363263 [بابكر]
0.00/5 (0 صوت)

05-14-2012 01:49 PM
اولا حمدلله علي عودتك ثانيا نتمني من الكيزان ان يجيشوا الجيوش ويسوقوا المجاهدين والدبابين لتحرير حلايب وشلاتين والفشقه وبعدها الشعب يحاسبهم علي الدمار الاقتصادي والاخلاقي في الحياة السودانية.


#363255 [ubedallawd]
0.00/5 (0 صوت)

05-14-2012 01:44 PM
كلام مليان قريبا وداعا للكيزان وجوع وافقار الشعب


#363224 [عزيزة بت ضحــوي]
0.00/5 (0 صوت)

05-14-2012 01:16 PM
فعـــلا يا أختي

صلاة الغائب عليك يا حلايب

طبعا هي لله لا للجاه ولا للسطان.


أسماء الجنيد
أسماء الجنيد

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة