سمسرة ودلالة
05-18-2012 02:03 PM

سلام يا الحبان في كل مكان وجمعتكم مباركة إن شاء الله جميعا.

سمسرة ودلالة

أسماء الجنيد
[email protected]
ـــــــــــ

إنتو فاكرين هسه السودان ده عنده حكومة زي باقي البلود بي رئيس ووزراء وغيره في سدة الحكم وبتحكم في البلد ؟
لا والله. ديل سماسرة ملقطين بعناية فائقة وتجار داخلين من يومهم على طمع!
23 سنة وساستنا ماعندهم سياسة ولا اهداف ولا بعرفوا حتى معنى الدبلوماسية ، ناس شعارهم الرجالة والحلقمة ولوي الضراع , شهاداتهم الملافظ الشوارعية وشغل الحقارة ، خبرتهم الشحدة وقطع النصيب ،والأكل الحرام وذل المواطن الغلبان, وآخرتها قوة عين ،، وحكمتهم في الدنيا الزارعنا غير الله يجي يقلعنا !! حصادهم في ال 23 سنة سرقة بالجملة وفي وضح النهار ، موت بالجملة وأمام عيون كل العالم ، جوع ومرض وفقر , هجرة وشتات أفواج أفواج ! الناس البرة البلد ضعف اكتر من الجوة البلد ناس قفلوا بيوتهم وسافروا ، وقدر الفضل من القاعدين المرضانين ديل قسموهم , وبقية القسمة في الطريق، الله يستر على جنوب كردفان والنيل الأزرق ودار فور!!!! , فصّلوا السودان زي العرّاقي والسروال ، حتى العرّاقي ده كل يد ختوها في بلد وماشين على باقي القماش الهردوه ونشفوهو وشرطوا باقي الطرقة البالية الفضلت منو !!وبعد ده لا شبعوا لا قنعوا ولا عينهم انكسرت حتى بعدما الفضائح بقت في الجرائد ومصورة بي وثائق وأدلة دامغة!! يخجلوا كيف وليه ؟ إذا كان الواحد فيهم يسرح ويمرح في حق المواطن وسط رفاقته 23 سنة، شايف عمايلهم ومشاركهم في الخراب والدمار ومتورط معاهم من رأسو لي ساسو!
وأخرتها لما الواحد فيهم يتنزنق يجرى على الإعلام مشمر جلالبيتو ويبدأ يفكفك في الكضب والنفاق الما بغبا على طفل في الإبتدائي ..!! ودايرين الناس تنسى الفات ويصدقوا إنه هو الحمل الوديع وإنه كان مغشوش وإنه واقف ليهم في حلقهم وإنهم الحرامية ، وهو المسلم الوحيد المرق من كفار قريش !!! عجبي ,
الروايات المخجلة دي بداها والي القضارف جاي مشمر ومكشر انيابه كأنه اسد الله البمرق الحقيقة ولو على رقبتو سيف!! وقبال مسلسلوا ما يمشي الإرشيف ، لحقوا شيخ الدبلوماسية كرتي..
جاي بعد 23 خريف لامن حفظ معلقات الإنقاذ وشعاراته البرددها كل لحظه وعلى مسمع ومرأى من الإعلام العربي والعالمي جاى يمثل علينا كالعادة! لكن المره دى بى توب الحمل الوديع الذى لا ناقة له ولا جمل ولا يدرى الجمل بما حمل فتح عينيه هسى لقى الحاصل دا قدامو!!!

من زماااااااااااان كنتوا وين ؟ إكتشفتوا الحقيقة المرة دي هسسسسسسه؟ والا كنتوا نائمين وصحيتوا يادوب ؟ جيتوا بعدما شاركتوا فى كل البلاوى السقطت حال البلد ، جايين الليلة تقدلوا في ثياب الواعظين!!
وشيخ كرتي قدس الله له سره قال مستنكر عبارات رئيسه ورفاقتوا المعلمين الله من الملافظ المحترمة. يا دوووب سمعتها يا الدبلوماسي يا الفهمو قاسي ؟؟؟

ارحمونا يا ناس الله يفتح عليكم ، كفاكم ضحك علينا واستفزاز ، كفاية استخفاف بى عقلية المواطن ، المواطن دا مفروض تعملوا ليه تمثال او نصب تذكارى لانو قدر اتحملكم كل السنين الفاتت دى ، ماتجوا فى النهاية تستعبطوه كمان !!!

لكن بينى وبينكم اللوم عليه لانو هو الخلاكم تطلعوا ليهو فوق راسو وتدلدلوا رجليكم وفى النهاية تطلعوا ليه لسانكم ، فهل استمرأ المواطن هذا الذل والهوان ؟؟؟؟


متاوقة :
الله يرحم زمن البطولات والتضحيات
يمهل ولا يهمل


تعليقات 13 | إهداء 1 | زيارات 3077

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#368360 [ساميه]
0.00/5 (0 صوت)

05-19-2012 08:56 PM
هوى يابت اسكتى كفا .. نحنا شعب حمااااااااااال للاسيه .. لكن وقت يقوم بيشبع الطير والحديه ... كفاكى ولا ازيد


#368071 [فتح الرحمن السر]
0.00/5 (0 صوت)

05-19-2012 02:44 PM
الي المعلقين مطبلي الإنقاذ , ابو كرنك وابو الخير وإبراهيم الكدرو, إنتو التلاتة شخصية واحدة لابسة طرحة حريم وبتكتب من تحت الكي بورد, عليكم الله ما بتخجلوا ؟ إنت يا المسمي نفسك ود الكدرو , ناس الكدرو رجال وما بتكلموا في الضلام , خليك راجل واكتب زي بت الجنيد البتحس بي معاناة اهلها حتى ولو كانت في اوربا ولا امريكا,قالت كلمتها وبي إسمها ورسمها, لا خجلت لا أتضارت زيك , بعدين إنت منو البتحدد لي الكاتبة تكتب شنو؟ وإنت التاني ابو الخير قال ! علي الطلاق الخير ولا بعرفك ولا شبهك , إنت الحريم احسن منك, شنو سوي ليك حنة وافركي ليك بامية, عالم عقولها خاوية وملانة حقد واحد في الإتنين يا إما إنت راجل اصلا خائب ، ولآ واحدة من الحاقدات على نجاح بت الجنيد وعقلها اصغر من ضفرها,وفي الحالتين ما بتوقفوا مسيرتها, امشوا إنتوا شوفوا ليكم حاجة تنفعكم ..

التحية لكي شاعرتنا الرقيقة سوما بت الجنيد سيري وعين الله ترعاك يا بتنا العزيزة , دعواتنا ربنا يحفظك وأسرتك ويردكم لينا سالمين يا رب العالمين , وما تشتغلي بالجهلاء ديل ولا تقيفي في حروفهم الساقطة ادبيا وفكريا وحتى إملائيا ,,


#367926 [هدهد]
0.00/5 (0 صوت)

05-19-2012 12:54 PM
كلامك فى التنك يا بت الجنيد والبخجلوا ماتوا زمان وياحليل زمن رجال الدين والوطن هذا زمان التجار الوزراء اصحاب الاعمال والله لم نر فى العالم وزراء يتاجرون ويزاحمون التجار فى السوف الا فى عهد \دولة بنى كوز هذه . سياسة التمكين دى لسع ماانتهت والله شنوا ؟ طيب متين يشبع هؤلاء القوم ويبطلوا اللغف والسرقه هذه .


#367537 [Abu Al Khair]
2.00/5 (1 صوت)

05-19-2012 05:21 AM
مأساة السودان في المعارضة أكثر من نظام البشير
كل مسطح يجي يقول أنا معارض
يا اسما عليك الله قومي لفي ، امشي ارسمي ليك حنا ولا اطبخي ليك بامية مفروكة
الكلام دا مسطح ولايسقط حكومة
انعمي بهولندا واشربي حليب نيدو الاصلي في بلده احسن ليك من الكلام الركيك دا


#367323 [ابوكرنك]
2.00/5 (1 صوت)

05-18-2012 09:11 PM
لك التحية الاخ ابراهيم الكدرو اضم صوتي لصوتك كلام مية المية . ويا بنت الجنيد متاوقة انشاءالله يكونوا ادوكي الجواز . ماتكوني واقفة في صف الاعانة.


#367259 [ابراهيم الكدرو]
5.00/5 (1 صوت)

05-18-2012 06:45 PM
واضح إنك يابت الجنيد ماقاعدة معانا في البلد دي وبتكتبي نظام تسلية ماأكتر. حقو تكتبي لينا عن آخر صيحات موضة صيف 2012 في أوربا وحاتقضو الصيف وين؟


#367252 [خربشوف]
0.00/5 (0 صوت)

05-18-2012 06:31 PM
بلد رخوه بلد ام فكو .. والمكضب اشاهد حديثهم فى القنوات .. كل العالم زعلان مننا قالوا
ضيعتوا بلدكم بى تهوراتكم


#367200 [الصادق الهواري]
0.00/5 (0 صوت)

05-18-2012 05:11 PM
جمعتك مباركة يا بت الجنيد .. وكلامكم في التنك .. بس هم قعدين يضحكوا علي أنفسهم وليس علينا ...والله شافع الروضة ما يصدقهم ولو ما خفت أكون زيهم كان قلت شافع الحضانة ما يصدقهم .. بلا يخمهم


#367166 [سمر]
5.00/5 (1 صوت)

05-18-2012 04:18 PM
العياذ بالله ربنا ابتلانا بناقصى عقل ودين ومصابين بمركب نقص وجنون عظمة.. والعاقل العندو شوية وطنية محسوب ضدهم..ولا يغير الله ما بقوم حتى يغيروا ما بانفسهم ..
و كفى بهم قوله سبحانه وتعالى :
(سنستدرجهم من حيث لا يعلمون)
(و نمدهم فى طغيانهم يعمهون)
(انما نملى لهم ليزدادوا اثما)
صدق الله العظيم .


#367155 [الصليحابي]
0.00/5 (0 صوت)

05-18-2012 04:01 PM
الله لا كسبهم ، ربنا ينتقم منهم ، ربنا يذلهم زي ما اذل القذافي وجماعتو .... وشكرا لك بنيتي على هذا المقال الجميل ..


#367138 [hdareer]
0.00/5 (0 صوت)

05-18-2012 03:45 PM
شاعرتنا الجميلة بت الجنيد
كيفما كنتم يول عليكم.ازمتنا ازمة عقل ولن يستقيم الظل والعود اعوج .


#367132 [ابراهيم1£2]
0.00/5 (0 صوت)

05-18-2012 03:37 PM
من يهن يسهل الهوان عليه وما لجرح بميت إيلام ،، انت يا اختى بتنفخى فى قربة مقدودة
يا أمة غدت الذئاب تسوسها غرقت سفينتها فأين رئيسها. ... دخلوا جهنم فخاف من ابليسهم ابليسها
هبى هبى يا رياح التحرير هبى


#367085 [الخالدي]
0.00/5 (0 صوت)

05-18-2012 02:37 PM
بردتي علينا سخانه اليوم /داهيه تاخدهم


ردود على الخالدي
United States [mohammed] 05-18-2012 09:37 PM
انت يازول ساكت ماتنضم عربي ولا دي لغة السودان الجديد بتاع عرمان والحلو ومناوي كلام عربي بحروف انجليزية وين اتتاتورك السودان

United States [Zoul sakiit] 05-18-2012 05:16 PM
Afarim Alaik ya bit alginaid


أسماء الجنيد
أسماء الجنيد

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة