دعم الرادار .... تااااني - فيديو -
05-26-2012 11:35 AM

دعم الرادار .... تااااني

الفاتح يوسف جبرا
[email protected]

• 11 فبراير 2009م (حسب تقرير أوردته مجلة التايم) قامت عشرات من الطائرات الإسرائلية المقاتلة والطائرات بدون طيار بالهجوم على قافلة شاحنات بالقرب من الحدود المصرية السودانية وبحسب ما جاء بالتقرير فإن طائرات إف 16 قد قامت بقصف القافلة المكونة من 23 شاحنة في حين قام عدد من طائرات إف 15 بتوفير الغطاء الجوي لها .

• 5 أبريل 2011م قام الطيران الإسرائيلي بقصف عربة (سوناتا) بمنطقة (كدنايب) على بعد 15 كيلو جنوب مدينة بورتسودان وقريباً من المطار مما تسبب في مقتل المواطنين السودانيين (أحمد جبريل) و(عيسى هداب) الذين كانا على متنها وأكدت الخارجية السودانية حينها بأن الهجوم قد تم بواسطة طائرتين إسرائيليتين من نوع أباتشي أمريكية الصنع وأشارت الخارجية حينها بأن الطائرتين قد أطلقتا 16 صاروخاً وقد وجدت على مسرح الحادث ثلاثة صواريخ لم تنفجر وعدداً من كبيراً من القذائف المضادة للدبابات والبشر !

• 15 ديسمبر 2011م قامت إسرائيبل بغارة جوية بإستخدام طائرة حربية إستهدفت 6 سيارات لانكروزر أصابت منها سيارتين مما أدى إلى مقتل 4 مواطنين كانا بداخلهما .

• 18 ديسمبر 2011م (يعني بعد 3 يوم بس) : قامت إحدي الطائرات الإسرائلية بقصف سيارة (بوكس) كان يقودها أحد المواطنين الذين يعملون في التنقيب عن الذهب وقد قتل كل من كان بداخلها .

• 22 مايو 2012م تم تفجير عربة ماركة برادو عند مدخل مدينة بورتسودان مما أدى إلى تحطمها تماما ومقتل قائدها (ناصر عوض الله) وقد أفاد شاهد عيان هو المواطن (شلهمة مضوي أحمد) والذي كان يسير بسيارته خلف (البرادو) بأمتار قليلة بأنه فجأة وبدون مقدمات سمع إنفجاراً ضخماً في السيارة التي أمامه بسبب أجسام إخترقتها من أعلى جعلتها كرة من اللهب !

إذن عزيزي القارئ ها هي إسرائيل تحرز الهدف الخامس في دفاعاتنا الجوية وتصوب بدقة متناهية على عربة برادو موديل 2011م تحمل الرقم (9383ب ح 1) فتحيلها وصاحبها إلى كرة من اللهب ، وأين.. فى (بورتسودان) المدينة التى بها قيادة الدفاع الجوى وهو السلاح الوحيد المناط به المحافظة على الأجواء من الإنتهاكات !

هكذا يا سادتي الأعزاء أصبحنا (ملطشة) تدخل الطائرات المغيرة إلى أراضينا و(تمرق) زى الما حصلت حاجه ! لا رادار (يشوفا) ولا دفاع جوى (يضربا) ولا طيارات (حربية) تتعقبها !!

5 غارات جوية في أوقات متفاوته وعقب كل غارة يتم ذاااات السيناريو :

- بيان من شرطة ولاية البحر الأحمر يوضح الحادث ويؤكد بدء التحريات لكشف ملابساته
- السيد والي البحر الأحمر ورئيس لجنة الأمن بالولاية يصرح بأن لجنة أمن الولاية تتابع إجراءات التحقيق والتحريات في الحادث .
- السيد مدير شرطة الولاية يستعرض البيان الذي أعدته لجنة أمن الولاية حول الحادث ، مبيناً أن الشرطة قد قامت بفتح بلاغ تحت المادة (51) من قانون الإجراءات الجنائية ويؤكد بأن فريقاً تقنياً يضم الفريق خبراء من القوات المسلحة والأدلة الجنائية والمباحث المركزية سوف يصل من الخرطوم لمنابعة الأمر .

- وزير الخارجية يصرح بأن السودان يؤكد (شوفو يؤكد دى) على إحتفاظه بحق الرد على هذا العمل الإجرامى !

لا تسألني عزيزي القارئ عن بقية السيناريو فهذا السيناريو ليست له بقية يعني بالعربي كده (نهايتو هنا) ! فبعد كل ضرية من الضربات (البقت كتيره ومسيخة) يتم ذات السيناريو لدرجة أن السيد وزير خارجيتنا هذه المرة ترك حكاية (نحتفظ بحق الرد) وصرح قائلاً بان أسلوب تنفيذ الضربة يشبه الأسلوب الإسرائيلي الذي تمت به الضربات السابقة (متعودة داااايمن) !
وأنا (أقوقل) لمعرفة عدد هذه (الضربات) شاهدت (فديديو) للسيد وزير الدفاع على موقع (اليوتيوب) وهو يتحدث عقب ضربة (العربة السوناتا) قائلاً (ما معناتو) بأن الضربة تمت حوالي الساعة تمانية مساء والناس في صلاة العشاء ، والطائرة المغيرة (أنوارها مطفية) عشان كده إستغلت الظلام الدامس وكمان الطائرة حلقت في مستوى منخفض لا يمكن لراداراتنا تغطيته !

..


وكأني بالسيد وزير (دفاعنا) وقد أوتي به مدرباً لفريقنا القومي لكرة القدم يقول مصرحاً على أجهزة الإعلام (حارس المرمي بتاعنا ده تعبان في الكرات الأرضية كان شاتوا ليهو أى حاجة بي تحت بتدخل) وهذا لعمري تصريح من شانه ان يستفيد منه الخصم !

كما قلنا في مقال كتبناه عقب الضربة (رقم تلاتة) .. يا جماعة الخير لو ما عندكم (رادارات) أو راداراتنا (موديل قديم) كلمونا عشان الناس ديل إستباحوا أجواءنا وبقوا يدخلوا ويكتلوا ويمرقوا زى ما عايزين وما عارفين القصة دى (آخرها متين؟).. ما مشكلة الشعب عارف إنو (الحكومة) مفلسة والقروش بتاعتا كوووولها صارفاها علينا وعلى (اللى خلفونا) فى التعليم والصحة والعلاج والشنو ما عارف .. عشان كده أنا بقترح على الشعب الفضل (تااااااني) يعمل ليهو صندوق يحل بيهو المشكلة دى عشان ما نبقى (ملطشة) ويسميهو زى ما إقترحنا زمااان (صندوق دعم الرادار) بس يمسكوهو لى زول (قوى وأمين) عشان ما يلحق أمات طه !

كسرة :
تنبيه : لا توجد (ما) في السطر الأخير ..

كسرة ثابتة:
أخبار خط هيثرو شنو(ووووو)؟





تعليقات 51 | إهداء 1 | زيارات 11430


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


التعليقات
#377123 [سودانية متحدتة باسم وزارة الدفاع الاسرائيلية]
3.82/5 (13 صوت)

05-28-2012 09:54 AM
خلاس ماتزعل يا ابوريالة000المرة الجاية بنركب ليك عاكس فى طياراتنا عشان تقدر تشوفا000بس اعفينا من حكاية اللمبات دى لانو طياراتنا شحن وبتصرف معانا000اها يامعلم قطعنا ليك الحجة وما قصرنا معاك


#377122 [سودانية منحدثة باسم وزارة الدفاع الاسرائيلية]
3.22/5 (10 صوت)

05-28-2012 09:53 AM
خلاس ماتزعل يا ابوريالة000المرة الجاية بنركب ليك عاكس فى طياراتنا عشان تقدر تشوفا000بس اعفينا من حكاية اللمبات دى لانو طياراتنا شحن وبتصرف معانا000اها يامعلم قطعنا ليك الحجة وما قصرنا معاك


#377115 [سودانية متحدثة باسم وزارة الدفاع الاسرائيلية]
2.32/5 (10 صوت)

05-28-2012 09:47 AM
خلاس ياابوريالة ماتزعل000المرة الجاية بنركب ليك عاكس فى طياراتنا عشان تقدرو تشوفوها000بس اعذرنا مابنقدر نركب ليك لمبات لانها بتصرف معانالانو طياراتنا دى نظامها شحن000اها يا معلم قصرنا معاك


#377100 [ام الحسن]
3.26/5 (10 صوت)

05-28-2012 09:30 AM
اسرائيل وللمرة الخامسة بترسل نفس الرسالة للكيزان والتى فحواها- شوفو فحواها دى - رحم الله امرء عرف قدر نفسه000لكن الكيزان اغبيا يسو ليهم شنو000وتعريف الغبى فى علم النفس يا استاذ هو الشخص الذى يكرر نفس التجربة عدة مرات وينتظر فى كل مرة ان تكون النتائج مختلفة000وخلى بالك ممكن يستمر فى الغبا بتاع التكرار ده حتى قيام الساعة او تجى داهية تخمو وتريح الناس من غباوتو


#376973 [Abeer]
2.82/5 (11 صوت)

05-28-2012 07:45 AM
هو الزمن العلينا دة يا جبرا فيهو زول أمين؟ ....حسي يا جبرا بيني وبينك انت أمين؟


#376519 [وحيد]
3.74/5 (11 صوت)

05-27-2012 03:31 PM
يا اخوانا رقيص الجمهورية ما بتكلم ليه في المناسبات الكتيرة دي و يرغى و يزبد و يسب و يشتم و يهدد و يتوعد؟ لماذا يعتبر المؤتمر الوطني و رئيسه الراقص و وزير دفاعه " اللمبي" ان انتهاك السيادة الوطنية فقط في جنوب السودان؟ لماذا لا تتوجه " كتائب" المجاهدين و الدبابين شمالا و شرقا، لماذا لا يعلن الاستنفار حين ترفع دولة جارة علمها في ارض سودانية و " تمصرها" حمرة عين عديييل كده؟ لماذا لا يتوجه المجاهدون شرقا حين تحتل دولة جارة اخرى ملايين الافدنة من اخصب اراضينا و لماذا لا يعد المؤتمر العميل ذلك انتهاكا للسيادة الوطنية؟
لماذا لا يعتبر انتهاكا للسيادة الوطنية اعتداء دولة على اراضينا و انساننا بصورة متكررة و حمرة عين برضو؟ لماذا لا يهيج الرئيس و يرقص و يهز صلبه و يشتم حين تقصف ارض بلاده اكثر من خمسة مرات متتابعات و حين تحتل اراضيه شمالا و يصوت من كانوا مواطني السودان في الانتخابات الرئاسية لدولة اخرى باعتبارهم مواطنين في تلك الدولة و ليس مواطنين في دولة الرئيس الراقص؟؟
لماذا يتهم المواطن السوداني بانه عميل و خائن و مخذل و طابور خامس حين يسال عن حلايب و عن الفشقة و عن شلاتين و عن بورتسودان التي اصبحت مستباحة تماما؟؟؟؟؟؟؟؟؟!!!!!!!!!!!!!!


#376482 [عصمتووف]
2.97/5 (10 صوت)

05-27-2012 02:47 PM
الاهم دعم صحن الفول والويكة


#376472 [لؤي العبيد]
3.51/5 (12 صوت)

05-27-2012 02:41 PM
أهبل وزير دفاع يمر على السودان وفشفش كبدنا


#376427 [حمدان البجيب الشاي]
2.57/5 (11 صوت)

05-27-2012 02:00 PM
لقد سبق و عرضت على الأخ جبرة فكرة انشاء صحيفة يومية
و انا الآن بعرض عليكم الفكرة و ارجو مساندتي في اقناع الأخ جبرة بالموضوع
الفكرة هي انشاء صحيفة تحت اسم ساخر سبيل و تكون يومية
طبعا و على حسب القرارات السامية لمجلس الصحافة و المطبوعات آسف اقصد السخافة و المهملات
انو الجريدة تكون من ستاشر صفحة و لو زادت ولا نقصت الله قال بي قولك لمهم ان تفرد الصحيفة مساحة ستاشر صفحة الا شوية كدة عشان اخوكم جبرة يكتب فيها عامودو ده و تنفرد باقي الصفحات عشان يتكتب فيها الكسرات اصلو الكسرات كترت و في كسرات اتنست من عدم اعادتها رغم اهميتها.
الفكرة الجديدة الجاتني و انا طبعا ما صحفي و الحمد لله ما حا اكون عشان كده ما عارف عن ما يسمى بقانون الصحافة اي حاجة و ما اظن انو في صحفي عارف لكن اعتقد انو القانون ده ما ذكر انو ممكن الصحيفة تصدر اكتر من مرة واحدة في اليوم عشان كده انا بشوف انو لو الشتاشر صفحة الا شوية ديل ما كفن طبعا لكثرة الكسرات تقوم الصحيفة تصدر مرتين في اليوم و لو زادت تبقى تلاتة مرات و لو برضو زادت و ده متوقع ممكن حتى لو تصدر كل ساعة و ممكن تسموها صحيفة ساعاتية
بالله راكم شنو؟ مش فكرة تمام و ده لمواكبة التزايد غير المسبوق للأحداث في سودان امة الأمجاد
و تاني كمان ما اظن انو مجلس السخافة حا يكون عندو مانع لو شفنا الحكاية عن منو و اديناهو المعلوم
عليكم الله حاولو معاي نقنع جبرة بالفكرة الجهنمية دي


#376401 [زعلان]
3.32/5 (12 صوت)

05-27-2012 01:25 PM
يا جماعة جبرة ده ما نصيح ولا شنو
تخيلو الزول دة لسة مصدق حكاية اسرائيل دي
و دي بقت مكشوفة
و نصيحة لاخونا جبرة و لكل من يؤمن بوجود اسرائيل في اي واحد من الحوادث المذكورة في المقال و هي محددة بالتواريخ يسترجع انو في التواريخ دي كان في شنو و استخدام اسرائيل فوبيا المقصود منو شنو
و يا جبرة ما تبقى موتمرجي اكتر من الانت عارفهم


#376212 [موجوع]
3.08/5 (11 صوت)

05-27-2012 10:19 AM
سمي المال بهذا الإسم لأنه يمكن أن يميل بأي نفس بشرية للطمع والنهب لأنه قرار والنفس البشرية ضعيفة ...
هناك قصة الرجل المعدم الذي طلب من الرسول ( ص ) أن يدعو له بالغنى فكان له ماأراد فبدأ يتخلف عن صلاة الجماعة حتى تركها نهائياً ..
هذا يحدث في زمن الرسول فما بالك باليوم ...
تجار الدين لم ينهبوا بتروي وتفكير إنما بجشع شديد لأنهم جميعاً ينحدرون من مجتمعات فقيرة
فهم غير مصدقين ويقدمون على المال بنهم شديد وكما نقول في مثلنا ( هم كالسوسة ) لن يكتفوا أبداً ...
من يعتقد أن البشير غير درك للحاصل فهو واهم فكما ورد في مقال اليوم لأحد الكتاب فهو مدرك أن المركب واحد فغرق إي منهم يعني غرق الجميع لذا يستميت في التستر عليهم ...


#376198 [احمد]
2.98/5 (10 صوت)

05-27-2012 10:07 AM
اسرائيل بتجي تضرب الرادار وترجع ما تديمهم فكرة جمع الفلوس ديل بفكرو كيف يصرفوا الفلوس البجمعوها لان فكرة جمعها كلها عندهم وساهله


#376174 [سوداني لا حزبي ولا انفصالي]
2.86/5 (8 صوت)

05-27-2012 09:44 AM
انت يا ابو ريالة وقت بتعرف دة كوووووووولو المقعدك مع الطير ديل شنو
صدق اقنعتنا ووريتنا حاجات كمان
وزير الدفاع يا كدة يا بلاش


#376086 [واحد]
3.13/5 (6 صوت)

05-27-2012 08:20 AM
لم يضحوا بالجنوب من اجل السلام بل ضحوا بالوطن لاقامة الامارة الاسلاميه ذات المرجعيه المختلف عليها


#376055 [زازووق]
3.54/5 (10 صوت)

05-27-2012 07:07 AM
طيب المدفع عند مدخل الميناء خاتينو لى شنو؟؟؟!!!
لى فطور رمضان؟؟؟!!!


#376047 [Amin]
3.00/5 (6 صوت)

05-27-2012 06:11 AM
أهم حاجة (ما) يمسكوه لى زول (قوى وأمين)عشان ما يلحق أمات طه

الناس ديل دخلوا الدنيا من باب الدين وتاهوا فيها
وده الباب البمرقوا منه الناس من الدنيا EXIT!!!!

غايته مصيبتهم كبيرة ....خااالص


#376010 [حليم-براغ]
3.12/5 (8 صوت)

05-27-2012 02:19 AM
الأخ جبرا تقبل التحية.
رمضان بإذن الله علي الأبواب ... وصلاة التراويح أطول من صلاة العشاء ... ورمضان كريم...بعدين بقترح عشان الظلام الدامس ده ...يعملوه ليهم كشافات ضخمة تكون موجهة للسماء ... عشان الطيارة المره الجاية لمه تجي وأنوارها ما مولعة يشوفوهاويتصرفوا بسرعة وبدل الرادار يشدوه ليهم منجانيق عشان يضرب الطيارة ...مع تحياتي لوزير صلاة العشاء والرادار...ونحن علي إنتظار أحر من الجمر لتهديد منسق الدفاع الشعبي بحق الرد لهذا العمل الإجرامي؟؟؟؟ والرد لأزم يكون قاسي عشان اليهود يدادبوه وتاني مايسوه كدي


#375972 [مراقب]
3.00/5 (6 صوت)

05-26-2012 11:40 PM
والله مهزلة لم أتمكن من مشاهدة هذه المهزلة من قبل الليلة لقيت لى وقت لاكن ندمت للأستماع لهذه المغاطة الفريدة التى يتحفنا بيها وزيرنا الهمام والواحد يقول يا سودانا ليك الله !!!!!.


#375970 [radona]
3.00/5 (6 صوت)

05-26-2012 11:38 PM
نيابة عن المجنمع الدولي نشكر حكومةبة السودان على ضبط النفس وظلت حكومة السودان تحتفظ بحق الرد على اسرائيل عدة مرات نتيجة غارات شرق السودان
ولكن للصبر حدود وعليه هذا الانذار الاخير لاسرائيل حتى لاتكرر قصف شرق السودان
وبعد المرة دي سيرد السودان الصاع صاعين
وبعدين ياستاذ الفاتح رادار حيشوشوهو


#375943 [مظفر سيد احمد عثمان]
2.29/5 (9 صوت)

05-26-2012 10:40 PM
استاذنا الفاتح جبرا لك كل التحية والود ، بالمناسبة قصة ضربة العربة البرادو دى تذكرنى افلام توم اند جيرى بس توم ياتو وجيرى ياتو دى متروكة لفطنة القارئ الكريم بس اعرفوا حاجة واحدة نحن قاعدين صقيعة ساااااااااااااااااكت وتحت حماية رب العالمين ونعم بالله ، لاتنتظروا كثيرا من ابوريالة والهنبول الراقص وجوقتهم ان يدركوا المخاطر والازمات التى ادخلونا فيها ، طبعا قرد الطلح لابد ساكت لاتعليق ولا تصريح بخصوص الموضوع (عرفتوه قرد الطلح ياهو المسمى نائب اول) والقصة ومافيها انو تحرق بورتسودان ولا الجنينة ولا حلفا ما مهم بس الا القصر الجمهورى وحى كافورى دا المهم فقط ، الحل بيد الشعب السودانى الفضل ، ماتشوفوا الدبابير والنياشين الحمراء والصفراء الحايمة دى تقولوا عندنا جيش دى مليشيات شبه عسكرية والله مع ارتريا دى ماتعمل حاجة خليكم من اسرائيل ، نحن قاعدين فى الصقيعة ساكت ، الحل الوحيد الثورة والانتفاضة لانهاء هذا المسلسل البائس وانقاذ بلادنا من هذة الانقاذ


#375899 [زهجااااااااااااااااااااااااااااان]
3.82/5 (6 صوت)

05-26-2012 08:59 PM
هو فضل فيها قويا امين (القوى الله)


#375868 [MUSTAF]
3.00/5 (7 صوت)

05-26-2012 07:29 PM
وين السيد الصوارمى ....؟؟؟ المفروض ده شغله وكده .


#375822 [samar]
2.97/5 (6 صوت)

05-26-2012 06:10 PM
الطيارة طافية النور عشان كده ما شافوها طيب هي شافت العربية كيف في الضلام ده وكيف عرفتها ياها المقصودة ومش العربية الوراها ؟ ياخي عليكم الله كفاية استخفافا بعقول الناس والبلاغ الفتحتوا شرطة الولاية مفروض يكون ضد وزير الدفاع شخصيا لأنه عرض وسيظل يعرض امن المواطنين للخطر والعيش في رعب دائم ولأنه عارف هو ووزير الداخلية ان هناك سلاح يهرب عبر السودان لحماس واذا عارفين فتلك مصيبة واذا ماعارفين فالمصيبة اعظم فالبلاغ يفترض يكون ضدهم وبعدين شرطة الولاية لازالت تعتمد على شرطة الخرطوم يعني ما عندهم خبرات وتقول لي حكم ولائي ؟ وبعدين هل هذا يحتاج لخبرات الخرطوم او اسكوتلاند يارد دي حاجة ظاهرة ناس بتهرب سلاح لي منظمة حماس واسرائيل تعمل لحماية مواطنيها من الارهاب مش زي حمايتنا نحن ( امسح اكسح قش )


ردود على samar
United States [أبو أشجان] 05-27-2012 07:27 AM
ياخ االعربية ما مولعة النور ياخ عشان كدا الطيارة شافتا ..
علي الطلاق انا خايف بكرة الطيارات الاسرائلية دي تبداء تضرب مزارعين
الجزيرة فوق حميرهم بحجة انهم بزرعو قنابل و حكومتنا الرشيدة تحتفظ بحق الرد...


#375808 [اللمبك]
2.75/5 (6 صوت)

05-26-2012 05:52 PM
الضربة الجاية وييييييييين...؟؟؟


ردود على اللمبك
United States [اللمبى] 05-26-2012 11:53 PM
فى البرادو السائقها اللمبى وبصحبة بشبش ..


#375780 [مسطول]
3.28/5 (10 صوت)

05-26-2012 05:32 PM
يا جماعة الخير روقوا.. ما زال سعادة الوزير يحتفظ بحق الرد حتى ينطلق لقتال اسرائيل من داخل ابراج القيادة العامة(على شكل مجسم طائرة و سفينة) والتى لها القدرة السحرية لدك تلابيب جوا و بحرا ..


#375778 [o]
2.85/5 (7 صوت)

05-26-2012 05:30 PM
والله لو مال الدنيا حيروح (شمار فى مرقه)..حيقولو لينا ضاع ال(password)..ده لو ما طنشونا ..
*أخبار ال(password)شنووو


#375776 [طاهر محمد]
2.94/5 (7 صوت)

05-26-2012 05:28 PM
قال الطيارة نورها مطفئ بلاهي ده وزير دفاع ؟؟؟؟ والله ثيردباك في تيم هاردلك الاصلاح امدرمان ما ينفع ،،، وزير تحفة هههههههههههههههههههههههههههههه هووووي يا سودانيين كل واحد شغال شغل ما ياهو يشتري ليهو رادار ههههههههههههههههههههههههههههههههههههههههه


#375756 [AMEIR]
2.88/5 (5 صوت)

05-26-2012 05:00 PM
الحل يا جماعه نعمل صندوق مدنكل وندي الحكومه الصرفه الاولي وتحلنا من حجة الرادار دي علي شرط يمسكو
الصندوق لربة منزل لها خبرة في المجال ومايكون لها علاقه بالحزب الخرابة


#375730 [حجر الصاقعة المخوي]
2.94/5 (6 صوت)

05-26-2012 04:19 PM
ومالوه ياجبرا؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


#375703 [البعاتي]
2.85/5 (7 صوت)

05-26-2012 03:42 PM
خط هيثرو لحق آمااااات طه


#375695 [الحقيقة]
2.94/5 (7 صوت)

05-26-2012 03:36 PM
انت لسع من ناس الرادار نحن بنستعمل تكنوجيا الوداعية والرقية الشرعية للدفاع عن الوطن


#375674 [ubedallawd]
3.54/5 (7 صوت)

05-26-2012 02:58 PM
اقترح ليك يا جبرة المرة دي كسرة وارجو ان تجعلها ثابتة
كسرة
اخبار بورتسودان والرادار شنو؟


#375653 [ود الجد]
2.41/5 (6 صوت)

05-26-2012 02:32 PM
الكريم الفاتح جبرا
اتمني ان يتم توجيه ضربات اسرائيل في الاتجاه الصحيح بالمرات القادمة وخاصة علي الناس الورمونا وفشو كبدتنا بدلا من الغلابة التي تقصدهم


ردود على ود الجد
United States [وجع شديد] 05-26-2012 08:17 PM
ومنو القال ليك غلابه؟ غلابه نحن والله


#375647 [salah]
3.79/5 (9 صوت)

05-26-2012 02:19 PM
عليك الله يا استاذ ماتجيب لينا البلا
الناس ديل ما حيصدقوا يلقوا ليهم نقاطة
يقوموااسع يضيفوها لينا فى تجديد الجواز
نحن لسه ما خلصنا من دعم الفضائية والجيش
وهلمجرا


#375621 [مسطووووووووووووووووول]
2.96/5 (7 صوت)

05-26-2012 01:43 PM
يا عمك اللوز دا عوير ولقى النعمة كبير


#375615 [الحقيقة]
3.00/5 (6 صوت)

05-26-2012 01:37 PM
اجازات اولاد حوش بانقا في الخارج هم واهلهم التي تصرف في شهرين بس بتغطي السودان بشبكة مضادات ارضية
لكن انا بفتكر انو اهم هم من الشعب


#375604 [عزوز]
2.97/5 (6 صوت)

05-26-2012 01:28 PM
متوقع شنو انت من ابو ريالة ده ؟


#375593 [عبد الرحمن]
3.13/5 (10 صوت)

05-26-2012 01:10 PM
لاحظوا يا جماعة الخير إنه دفاعنا الجوي الحارس روحه و جوّنا دا موجود في بورتسودان، من دون مدن السودان. لذا أنا أقترح نقله للجنينة أو نيالا أو حتى حلفا مثلا، على الأقل يكون لديهم عذر بأن ضرب بورتسودان دا خارج تغطية رادراتهم.


#375590 [الشايل المنقة]
3.79/5 (14 صوت)

05-26-2012 01:09 PM
...بسيطة,,اذا كانت الرادرات لا تلتقط فى المدار المنخفض ,ممكن يحفروا ليها حفرة ويختوا الرادار داخل الحفر الاربعة فى القبل الاربعة وبكدة شوفو اذا فى طيارة اسرائيلية واحدة جات تضرب تانى ..بس انتو جربوا الطريقة,,,, الارضة جرّبت الحجر...لكن فعلا المشكلة كلها فى الطيار اذا جانا وهو طافى النور ..والله دى مشكلة كبيرة..!!


ردود على الشايل المنقة
United States [سس] 05-27-2012 06:25 AM
اها لو غيرو اللعب وجو بي دبابه يطلعوا في الرادار يكسرو لينا لق لقلق

United States [وارغو الكيشة] 05-26-2012 06:57 PM
رااااااااائع ...

United States [وارغو الكيشة] 05-26-2012 04:22 PM
راااااااااااااائع ...


#375585 [أسامة]
2.76/5 (10 صوت)

05-26-2012 12:59 PM
طريقة الكاتب جبرا في السخرية لا تضير النظام في شئ ويبدو أن النظام يشجع عليها لأنها تلهي الناس عن ما يحدث من سرقة ونهب وكذب وجبن وخسة وكل الصفات الكريهة التي اتصف بها الكيزان وتجعل الناس يضحكون ويرضون بما بما قسمه الله لهم وينتهي الأمر بابتسامة أو ضحكة!!! والدليل على أن النظام يشجع الأخ جبرا على المضي في الكتابة بهذه الطريقة واضح وضوح الشمس وهو (هل سمعتم يوما أو مرة واحدة بمنع مقال للفاتح جبرا من النشر؟ طبعا لا!!).. يجب أن لا يغتر جبرا بما يجد من تشجيع بعض القراء لأن البلد في مرحلة صعبة وحاسـمة لا تحتمل التهريج واللف والدوران.


ردود على أسامة
United States [دنيا دبنقة] 05-26-2012 11:04 PM
ياخي إختشي على دمك الطيارات داخلة ومارقة تضرب ونحنا قاعدين في السهلة والقروش كولها ضربوهاناس الأقطان والألبان والكتان وتقول البلد في مرحلة صعبه وحاسمة لا تحتمل التهريح واللف والدوران والله جبرا ده بيقولا ليكم عدييييل ومازول بتاع لف ودوران الظاهر عليهة مجهجه باكاتكم ربنا يحفظو ويغطيهو..

United States [hassan] 05-26-2012 09:32 PM
والله كلامك صاح بلد عندها سرطان وبيدوها بندول ؟؟ كلهم ادوات نظاموعمك جبرة لو دايرني افتو بفتو وعلي وعلى اعدائي كرهنا الكضب وتخدير الغلابة

United States [سليمان قش] 05-26-2012 03:11 PM
طيب يا اسامة يارب الجدية دلنا علي موقع يتم فيه بيع رادارات ونحن جاهزين حتي بدون صندوق وانشاالله بيمشى جبرا دا ويشتري لينا كم واحد كده


#375583 [مقهووووووووووووووووووور]
3.54/5 (6 صوت)

05-26-2012 12:58 PM
ههههههههههه اي واحد يدعم الرادادا حا يخش النار
دي حكومة ولا هظار


#375581 [ياسين]
2.85/5 (6 صوت)

05-26-2012 12:56 PM
الزول ده قادي جغرافيا وتاريخ وعربي وداخلية ودفاع ده كلو عرفناه
كمان قادي دين وفي الدين في القران قال واعدوا ما استطعتم وسكت رافعا يديه منتشيا بانه
استعان بكلامه سبحانه وتعالى ؟؟؟

الله يرحم سبت دودو وايامو حارسنا وفارسناالحالي بي فوق بي تحت لو شاتوا ليه مرتبة تحت الاضواء الكاشفة خالس خالس تخش ونحن نندعك بعد ما ندعك الجدادة بالدوكة جيعانبن وعرقانين في شان الكماشة القابضة علينا من تلات جيهات والوظراء مرطبين متريحين ومترحينن باذن الله الي حين

تقول لي نعمل ختة نجيب رادارات حديثة والرادار بقى في زمن الاقمار الصناعية زي باب الصنت البكون مقفول والناس داخلة مارقة زي المافي باب - للسادة الشعراء الغنائيين اهدي هذا المطلع
زي المافي باب يحول بينى بينك
ومتنازل من الحق الفني فصرت بالله ؟

تعرف الدول كووولها القال عليها لو كل واحدة جابت ليها فرقاطة وغواصة وتلاتة اربعة حاملات طيارات بورتسودان تمرقا في الجنينة


#375580 [احمد حسن ادم]
2.94/5 (6 صوت)

05-26-2012 12:54 PM
والحل يا حبيبنا الفاتح؟؟


#375572 [ملبوش]
3.79/5 (7 صوت)

05-26-2012 12:40 PM
شكلو يااستاذ امات طه هن البلحقن الحاجات


#375571 [azoz]
3.00/5 (7 صوت)

05-26-2012 12:37 PM
اين نجد هذا القوي الامين اذا وجد اخبرونا والشعب سيشتري 100 رادار موش واحد شرط اساسي العنقاء والفول والخل الوفي اقصد القوي الامين


#375570 [مستاء]
3.54/5 (8 صوت)

05-26-2012 12:35 PM
انت بقيت تفكر للجماعة في كيفية عصرنا لمن نجيب الزيت يا شيخ بكره بتبقي مفتي الانقاذ ولا مستشار للرئيس للشون الدعمية ابشر الاستشارية جاتك . مش عيب عليك علي شان المنصب تتركنا وتمش تفكر للجماعة في دمغة جديدة . دمغة الرادار دي لو اتختت الله يهون والله ما تتشال حتي تنصب في البلد كلها رادارات غير مرئية وتبقي زي دمغة الجريح التي اخدت زمان طويل حتي تشافي الجريح ومات من الملاريا بعد ان قضي من العمر بعد الدمغة 23 سنة . علي العموم الدمغة جاية وحتاخد ليها 23 سنة تانية وفي المحصلة لا رادار يتم تركيبه ولا رادار قديم تتم صيانته بس نحن اللي بيتركب لينا قنابير جديدة

كسراتك الثابتة الكتيرة دي ما فيها انزار مبكر بالضربة القادمة متي واين ؟


#375563 [الرادار بالليل ما بشوف]
3.25/5 (8 صوت)

05-26-2012 12:27 PM
اسلم حل يا أستاذ الفاتح جبرا ووزير الدفاع اعتمد على شاهد العيان المواطن ونسى التقنيات واجهزة الرصد الجوي والمراقبة والمواطن محدود النظر وكدا افضل حاجة يستورودو كمية من الرادارات وكل واحد يدوه رادار في يده علشان يحمي نفسه واسرته واذا التكلفة صعبة خلوها كل جماعة كدا يشتركوا ليهم رادار زي الجهاز بتاع كشف الذهب

ذكرتني قصة حقيقية

في إحدى دول الخليج في الطريق السريع والدنيا ليل دامس كان في نفرين في سيارة والسواق بحب يقود بسرعه مبالغ فيها والشخص المعاه خائف من السرعة القاتلة وقال ليه ياخي سوق براحة علشان الرادار وتحديد السرعـة

صاحبنا السايق قال ليه ما تخاف الرادار بالليل ما بشوف !!!!

اها السؤال ده نوجه لي اللمبي وزير الدفاع صحي الرادار بشوف بالليل ولا ما بشوف


#375557 [بت الخرطوم]
2.83/5 (7 صوت)

05-26-2012 12:19 PM
الاستاذ الرائع ابدأ بالكسرة خطك المشغول بيهو وحكومتك ما شغالة بيهو لحق البرادو اما الهجمات الاسرائيلية عايز السلاح الجوى يعمل شنو يا حليل الجيش السودانى مصنع الرجال راجى لك رجا فى جيش على راسو مهندس فنى (ولسخرية الاقدار فنى فى سلاح الطيران )والناطق باسمو الصوارمى ووزيرخارجيتنا كرتى الله يرحم السودان ويلزم اهله الصبر اما اقتراحك بتاع الصندوق لو بقيت انت الامين القوى نحن على اتم الاستعداد بس تعمل حسابك ما تغدوا بيك اشيلوا الصندوق واتهموك بالفساد واهدار المال العام والحكم الاعدام


#375552 [ودامدرمان]
3.15/5 (7 صوت)

05-26-2012 12:11 PM
كدا الصناديق بتكتر علينا وعشان نسدد حقها الا نخش في صندوق



تخريمة:
هو نحن لسه ح نخش والله جيل دخلونا في حته خليها سااااااااااااااااااي





تضامن جبرا:
اخبار خط هيثرو شنو؟؟


الفاتح يوسف جبرا
الفاتح يوسف جبرا

مساحة اعلانية

تقييم
4.18/10 (19 صوت)




الرئيسة |المقالات |الأخبار |الصور |الفيديو |راسلنا | للأعلى


صحيفة الراكوبة السودانية... راكوبة الأغاني السودانية، في رحاب الراكوبه ستجد السودان بمختلف مناطقه وعاداته وموروثاته خلال أقسام منتدياته المتعددة مثل المنتدى العام، العنقريب، المدائح ومنتدى التلاوة الذي يحتوي على تلاوة للشيوخ: صديق أحمد حمدون , عوض عمر , الفاتح محمد عثمان الزبير , محمد عبدالكريم , نورين محمد صديق , عبداللطيف العوض , صلاح الدين الطاهر سعد , الزين محمد أحمد الزين , وأحمد محمد طاهر. إلى جانب هذا هنالك منتدى مخصص للمدائح النبوية، هنالك المادح: الامين احمد قرشى وعلى الشاعر , الشيخ مصطفي محي الدين ابوكساوي , أولاد حاج الماحي , عبدالله محمد عثمان الحبر , اسماعيل محمد علي , السماني أحمد عالم , الجيلي الصافي , خالد محجوب (الصحافة) , علي المبارك , حاج التوم من الله , عبدالعزيز قورتي , ثنائي الصحوة , فيحاء محمد علي , الجيلى الشيخ , نبوية الملاك , عبدالعظيم الفاضل , عاصم الطيب , فرقة عقد الجلاد , سيف الجامعة , عثمان محمد علي , المدائح النبوية , فرقة الكوثر. علماً بأن المشاركات والآراء المنشورة في منتديات الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2014 alrakoba.net - All rights reserved

صحيفة الراكوبة