ما عرفين حاجة
05-28-2012 11:20 AM

ما عرفين حاجة

الفاتح جبرا
[email protected]

بينما كان أستاذ عوض ناظر مدرسة غرب الحارات للأساس ينام هو وزوجته الحاجة علوية فى حوش منزله الملاصق للمدرسة فى ذلك المساء الصيفى الساخن إستمعا لصوت هادر أفاقا على إثره من النوم ، تراءى لهما جسم لامع يدور فى حركة حلزونيه داخل ميدان المدرسة الفسيح .. سرعان ما هدأت سرعه الجسم وهو يتوسط الميدان وينزل عموديا ناثرأ حوله كمية من الغبار الذى ما إن إنقشعت سحابته حتى إتسعت حدقتا عينيهما ووقفا يتأملان المنظر .. الجسم مخروطى الشكل تحيط بدايرته السفلية نوافذ دائرية صغيرة لامعة .. يفتح نصف الأسطوانة العلوى ويخرج منه كائن ضئيل الجسم بعض الشئ ... حوالى مئة متر فقط كانت تفصل بين هذا الجسم والمكان الذى يقف فيه استاذ عوض وزوجته علوية .. الكائن يتجه نحوهما :
- (فى خوف وهو يتابع الكائن) : إنتي شايفة يا علوية المصيبه الجايه علينا دى ؟
كان طول الكائن القادم نحوهما حوالى متر واحد وجهه مثلث الشكل ويضع فى قمه رأسه شئ يشبه إلى حد بعيد هوائى التلفزيون
- (قالها بصوت يشبه صوت الانسان الآلى) : السلام عليكم
- وعليكم السلااام ... (في خوف) ألأخو من وين ؟
-أنا من كوكب المريخ .. أنا مساعد قائد هذه المركبة أما القائد فهو بالداخل
- وجايين هنا تعملو شنو ؟ ما لقيتو إلا الحته دى !
- لقد جئنا لدراسة كوكب الأرض !
- لكن تخلوا كوكب الأرض ده كلو وما تختارو إلا البلد دى؟ والله شقاوتكم شقاوة غايتو !
- جئنا إلى هنا بعد أن قمنا بدراسة أوضحت بأنكم شعب ذو تاريخ وحضارة !
- كدى خلينا من التاريخ والحضارة .. المصيبه اللابسا فى راسك دى شنو ؟
- بصوتة الآلى : هذا جهاز أضعه لأعرف به لغتكم وأيضا لأخاطبكم به !
هنا تفتح المركبة فينزل قائدها والذى هو صورة طبق الأصل من مساعده والذي بلدرهما قائلاً :
- الخارطة التى معنا وكذلك قاعدة البيانات الموجوده على المركبة تقول أنكما تسكنان فى عاصمة البلاد هل ذلك صحيح ؟
- نعم بالحيل
- إذن لماذا هذا الظلام الدامس ؟
- دى قصة طوييييييييييييييلة
- هل تمت طباعتها
- طباعت شنو؟ دى قصة ما بتتطبع بتتعاش بس ..
- إذن هل تستطيع أن تحكيها لنا حتى نتعرف على سر أصراركم على التواجد والعيش فى الظلام ؟
- لا أنحنا مش القاعدين نصر إنو نتواجد ونعيش فى الظلام .. ديل هم !
- هم مين ؟
- المسئولين !
- هل يخاف مسئولوكم من الضوء !
- والله من ناحيت بيخافو منو فهم بيخافو ..ويحبوا ليك العتمة موووت لكن دى ما المشكلة؟
- وأين تكمن المشكلة إذن ؟ هنالك لدينا فى المريخ إذا كانت هنالك مشكلة فلابد أن تكون مسبباتها معروفه !
-هنا فى هذه البلاد إذا كانت لدينا مشكلة فلابد أن تكون مسبباتها (مألوفة) !
- (علوية تهمس للأستاذ عوض) : هسه لو قلنا ليهم المويه ذاتا بتقطع سلوك راسهم دي بتضرب؟
- حسب ما لدينا فى إحداثيات الخريطه التى معنا فإن هذا المبنى هو مدرسة للتعلم ؟ هل يقطع التيار الكهربائى أيضا من المدارس ؟
- إنتا جاي من مريخ العرضة جنوب وللا شنو؟ الكهرباء بتقطع من المستشفيات محل الناس بتعمل عمليات تقول ليا المدارس؟!
يصعد الأستاذ عوض والحاجة علوية إلى المركبة بعد أن طلبا منهما ذلك وذلك لعمل جولة حول البلاد للتعرف عليها ، أقلعت المركبة بصورة عموديه وهى تنفث عنها كمية من الغبار والأتربه :
- لا تخف أستاذ عوض فنحن سوف نحلق على أرتفاع عال حتى لا يرانا الرادار ؟
- عندنا هنا كان عاوز الرادار ما يشوفك تطير (منخفض) !
- لكن الطيران المنخفض يري بالعين المجرده مما يسهل تعقبنا !
- غايتو ده كلام وزير دفاعنا !
- (وهو ينظر إلى شاشة أمامه) : ما هذا المصنع الذي مكتوب على لافتته (صافات) ؟
- هذا مصتع لتصنيع الطائرات؟
- أتصنعون الطائرات وليس لديكم نظم رادار متطورة؟هذا شئ غريب؟
- غريب الشويه دى ؟ والله تبارينا تدخل التجاني الماحي (بتاع المريخ طبعن) !
- (وهو ينظر حيث أراض جرداء تملأ الشاشة) : ماذا تأكلون ؟
- نأكل مما نزرع!
- وماذا تزرعون وكل هذه الأراضى جرداء !
- (مساعد القائد) : إنهم يزرعون .. ألم تر تلك اللافتة المكتوب عليها (مشروع سندس الزراعي) ! ما هى المحاصيل التى ينتجها هذا المشروع الضخم ؟
- كان قلت ليكم حاجه بتقولو سكان الأرض ديل عورا !
- كيف؟ ماذا تعنى ؟
- المشروع ده ليهو 22 سنه لحدت هسه ما طلع ليهو ليمونة وااااحده !
- يبدو أن الليمون يأخذ وقتاً طويلاً على كوكب الأرض حتى يثمر
- لا .. المشروعات هى البتاخد وكت طويل حتى تبدأ
- لدينا فى كوكب المريخ المشروع لا يأخذ من الوقت كثيرا
- لكن إنتو فى كوكب المريخ عندكم (تماسيح) ذى العندنا ديل .. !

كسرة:
ناس كوكب المريخ ديل ما عارفين حاجة ساكت !

كسرة ثابتة :
أخبار خط هيثرو شنو(ووووو)؟





تعليقات 31 | إهداء 5 | زيارات 8638

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#378874 [أبوديدى]
0.00/5 (0 صوت)

05-30-2012 04:34 AM
مبااااالغه...
ياريت ياإستاذ الفاتح تعمل حلقةتانيه تنزل الزول الفاهم ده وتركب
وزيرالدفاع معاهم أشان
نشوف الجقلبه حقتوا
أو تتعطل مركبتهم ونشوف تصرفهم كيف وهم فى ضيافة أهل الإنقاذ ؟! بس الخوف مايبقوا مؤتمر وطنى وساعتها يصبحون مثل مريخ العرضه!!! ودمت


#378805 [محمد]
0.00/5 (0 صوت)

05-30-2012 12:06 AM
تسلم يا استاذ الفاتح لا كسر الله قلمك


#378676 [noor]
0.00/5 (0 صوت)

05-29-2012 08:09 PM
ا*جبراو*صي*عوض*وعلوية*المرة*الجاية*يقولو*لناس*المريخ*يجوا*اثناء*الخريف*وبعده*ويطلعوا*سوا*في*جولة*يشوفوا*المجاري*ا*لطبيعية*والاوساخ*و*البرك*الراكدة*بس*يوصوهم*يجيبوا*معاهم*ناموسيات*وكمان*يفرجوهم*علي*بعض*المساكن*ف*المجاري*يمكن*الفكرة*تعجبهم*ويطبقوها*عندهم*واهم*من*كده*يجيبوا*مهندس*معماري*يشوف*العمارات*بتقع*ليه*وكمان*عالم*رياضيات*نخصص*ليه*جائزة*كبيرة*كم*شوال*سكر*معدوم*وغالي*كده*نديه*معادلة*المرتب*اذا*كان*الواحد*بياخد*مرتب*500*جنيه*وعنده*5اطفال*يصرف*علي*الاكل*والشرب*والكهرباء*والمدارس*ورسومها*والجامعات*والموية*وايجار*العداد*واللبن*والمواصلات*وامه*وبنات**اخته*ا*ليتيمات*والمجاملات*وسيد*الدكان*ونسيبته*ساكنه*معاه**ويسال*كمان*الجماعة*المتزوجين*3و4و5احيانا*بيجيبوا*القروش*دي*من*وين*وما*ينسو*يسالوا*المراجع*العام*من*تقاريره*يمكن*يساعده*في*حل*شفراته*الاهم*من*كده*يعرفوا*منهم*هل*يمكن*ان*يقسموا*المريخ*لكوكبين*وكمان*ما*ينسو*يسالوهم*هل*رئيسهم*بيرقص*كمان*عشان*نعرف*ود*ينهم*شنو*وهل*عندهم*عدالة*ناجزة*زينا*كده*والعقاب*في*حال*الفساد*هل*بيرساوا*المذ*نب*السودان*لقضاء*العقوبه*ولا*جول*ولا*قوة*الا*بالله*العلي*العظيم**


#378502 [البشير على نافع الجاز الفللى]
4.50/5 (2 صوت)

05-29-2012 04:18 PM
خط هيثرو خطفو ناس يثرو منهم ثورى وحا (يرثو) منو(روث) على فراش وثير


#378417 [فتاة من المريخ]
3.94/5 (5 صوت)

05-29-2012 03:18 PM
استاذ جبرا 000لفت نظرنا فى زيارة سابقة لكوكبكم ان المجال الوحيد الذى تتفقون فيه علينا هو العمارة 00 لديكم قصورا فى بعض المناطق افخم من قصورنا على المريخ000وحاولنا معرفة مايدور داخلها فوجدناها تكتظ بنساء بدينات مثنى وثلاث ورباع ورجال بدناء ايضا00ولاحظنا ايضا ان الرجال البدناء اذا دخل الليل يسرعون لتناول حبوب زرقاء اللون وبعدها تصيبهم حالة من الارتباك والحرج يهرولون من امام النساء البدينات كانهم يهربون او يخافون من شئ ما000استاذ جبرا لماذا ياخذ هؤلاء الرجال الحبوب الزرقاء ؟؟هل هى لعلاج مشكلة البدانة اولعلاج مشكلة الانجاب؟؟ولماذا يتناولها الرجال فقط؟؟؟


#378380 [زول محبط شديد]
4.07/5 (5 صوت)

05-29-2012 02:49 PM
والله ابدا ماقصرت . هذا هو واقعنا المر الذي نعيشه بكل تفاصيله الاليمة. لك التحية والتقدير,,,


#378338 [salah]
3.94/5 (5 صوت)

05-29-2012 02:21 PM
ياخى دى حاجة تبكّى بالجد !!!!


#377769 [بت بانت]
4.07/5 (5 صوت)

05-29-2012 12:29 AM
كسرة جديدة :اخبار الردار شنو؟


ردود على بت بانت
United States [سوداني] 05-29-2012 03:14 PM
شنو(ووووووو)


#377765 [محمد نصر]
4.19/5 (6 صوت)

05-29-2012 12:25 AM
الله يخليك لينا يااستاذ جبرا انت الوحيد البتفتح شهيتنا في القراءة وتضرب العالم بالتحس دي في الوتر الحساس لكن لاحياه لمن تنادي .اشوف الواو السادس قرب ومافي فائدة الله يعينا


#377572 [صصصصصصصصصصص]
2.50/5 (3 صوت)

05-28-2012 07:10 PM
لسع جو راجعين؟؟


#377556 [Prof]
4.32/5 (5 صوت)

05-28-2012 06:52 PM
خيال واسع وخصب، لكن فحوى القصة اقرب الى الواقع.
مزيدا من الإبداع يااستاذ جبرا.


#377542 [وحيد]
4.19/5 (16 صوت)

05-28-2012 06:26 PM
بعد جولة قصيرة طلب قائد المركبة من استاذ عوض السماح بزيارة منزله على ان يواصلوا الجولة لاحقا، وافق عوض و زوجته و رجعت المركبة الى المنزل، و بمجرد دخولهم رجعت الكهرباء فرح استاذ عوض و جرت علوية كالمجنون لتشغيل الموتور لعل الماء يعمل، اندهش المريخيون حين عرفوا السبب و سالوا هل تعانون من مشكلة مياه و خرائطنا تشير الى ان عاصمتكم تقع بين ثلاثة من اكبر الانهار و وجود مياه جوفية بمكيات كبيرة؟ اجابه استاذ عوض بحسرة" نعم الله يجازي الكان السبب" دخل المريخيون الى الصالون و هم يحكون رؤوسهم من الدهشة. كان التلفزيون يعمل اذ ان استاذ عوض نسيه شغال حين قطعت الكهرباء، جلس المريخيون في مواجهة التلفزيون الذي كان يذيع نشرة الاخبار و ينقل لقطات من خطاب الرئيس، الذي كان ينعرط و يكورك و قد احمرت عيناه و هو يلوح بعصا، انكمش المريخيون و هم يراقبون المشهد و سالوا " هل تحتفلون باليوم العالمي لمرضى الفصام" لم يجب استاذ عوض و استمر عرض الاخبار و في المشهد التالي كان الرئيس يرقص و يضحك ببلاهة و يهز كرشه و ساقيه المقوستين لا تكادان تحملانه، ضحك المريخيان و لكزا استاذ عوض " يا خي ما تقول لينا دا برنامج " افركا قوت تالنت". و تابعا العرض بتلذذ، تغير المشهد و عرض التلفزيون مشهدا لمساعد رئيس الجمهورية النافع و هو يخطب امام مجموعة من الناس، تابع المريخيان المشهد ثم فجأة سالا استاذ عوض ، لم نستطع فهم الكلمات التي يتكلمها هذا الرجل، هل تتكلمون لغة غير العربية؟ اجاب عوض " هذه كلمات من اللهجات المحلية ، اخرج قائد المركبة جهازا يشبه الايباد موصل مع مايك وضعه اما التلفاز .. و بعد انتهاء حديث مساعد الرئيس نظر المريخي الى الجهاز و ضغط على احد الازرار و نظر فيه لبرهة و فجاة التفت الى استاذ عوض و وجهه متغير و خاطبه " يخسي عليكم بالله دا مستوى دا"؟؟


ردود على وحيد
United States [زول محبط شديد] 05-29-2012 02:53 PM
ماك هين ياوحيد تميت الناقصه ..................

United States [فلونة] 05-29-2012 09:34 AM
ما بااااااااااااااالغت عديل يا وحيد زمانك.بالله واصل

United States [حيدر الامين] 05-28-2012 10:45 PM
إنت وحيدسيف ولا وحيدجبرا

United States [abu albanat] 05-28-2012 08:13 PM
خطييييييييييييييييييير ياوحيد يديك العافية مبدع والله


#377540 [البعاتي]
4.19/5 (6 صوت)

05-28-2012 06:15 PM
الرادارات قروشها ركبو بيها طبلة لود وزير المالية
ياخي هم ما فاضييييييييييين من السف والقرش
قال شنو هي لله هي لله
قوم بوووووووووووووول


#377530 [huwidah]
4.07/5 (9 صوت)

05-28-2012 05:59 PM
غايتو حسادة منك يا استاذ جبرة...فيها ايه لو وديتم شافو عمارات وزارة الدفاع..واجزخانات وزارة الدفاع..وباخرة وزارة الدفاع..ومستشفيات وزارة الدفاع وعمارات وزارة الداخلية وجامعات وزارة الداخليةومستشفيات وزارة الداخلية..ودي كوووولها من مال وزير الدفاع الخاص...وبنات افكاره يلقي وين الوقت عشان يعمل رادارات..سيادته شغال ليكم وزير تربية وصحة وهلم جرا
وبالمرة تعرج بهم الي مجلس الوزراء ليشاهدوا كيف يجتمع 99 وزيرا في بلد مظلم..
لنا الله


ردود على huwidah
United States [زول محبط شديد] 05-29-2012 04:35 PM
نسيت رادارات وزير الدفاع الحرامي ..... مش طلعت لينا ماسورة ومصدية كمان؟؟؟؟؟؟؟؟؟؟؟؟


#377513 [سمير]
3.50/5 (3 صوت)

05-28-2012 05:23 PM
مصداقا لما ذكره الأخ (أبو بكر) أطرح هذا السؤال : لماذا يسمح الأمن والرقابة القبلية والبعدية المتشددة على الصحف والصحفيين والتي أوقفت عددا من الكتاب مثل حيدر المكاشفي وزهير السراج وغيرهم ومنعت بعض المقالات من النشر.. لماذا لم يلتفتوا لمقالات الكاتب الفاتح جبرا الذي يسخر فيها من النظام ومن عمايله القذرة ولماذا يغضون الطرف عنه ولا يوقفونه عن الكتابة أو حتى يمنعون له مقالا واحدا من النشر؟!! أقول قولي هذا راجيا أن لا يحدث ذلك وإلا حرمنا من الاستمتاع بمقالات الفاتح جبرا التي يسخر فيها من هذا النظام الغاشم الفاسد.


ردود على سمير
United States [متفائل جدا] 05-29-2012 02:23 AM
يقول الصيادون لا تضيق على الفريسة فى ركن ضيق حتى لا يحدث ما لا يحمد عقباه بل دع لها مجال للمناورة مع تضييق الخناق عليها.. و البركة فى فاكهة الصحافة الساخرة جبرا فهو ما تبقى لنا حتى ننفس عما بداخلنا من ضيم وغبينة.. والا حدث الانفجار ..

United States [أبوالكل] 05-28-2012 08:01 PM
كان قبضوهم تتكلموا وكان خلوهم تتكلموا !!!!!!!!


#377455 [ubedallawd]
5.00/5 (1 صوت)

05-28-2012 04:16 PM
هههههههههههههه
ممتاز ياالفاتح اوفيت وماقصرت لخصت الحكاية في تقديري ابدعت في سرد ماعملوة هولاء بالبلاد والعباد
كسرة
الرادار تاني


#377431 [الزول الكان سَمِحْ]
5.00/5 (1 صوت)

05-28-2012 03:47 PM
طبعن يا أخوان...اليومين دى ناس مكافحة ( الصنف) قيمين قومة صاح...السؤال المحيرنى (أنا) الفاتح ده بلقاها وين البتخلى الزول يشوف ناس كوكب المريخ بالليل دى!!!


ردود على الزول الكان سَمِحْ
United States [أدروب همد] 05-28-2012 07:34 PM
يأخ دا بجيب صلاح قوش من أديس (طبعا فتح ليه مكتب تصدير وإستيراد للبتاع ).


#377417 [زول اغبش]
5.00/5 (2 صوت)

05-28-2012 03:30 PM
جبرا..نحن لا عندنا رادارات ل مستشفيات لامدارس ...عندنا كمية مبالغة من التماسيح..رايك شنو نصدر لينا تماسيح بدل الدكاترة والنبق وأهو نطلع لينا بقرشين حلوين ونرتاح من التماسيح دي...بلدنا عدمت الرجال ياجدعااان


#377407 [ما قلنا ليك]
5.00/5 (1 صوت)

05-28-2012 03:26 PM
شديدة والله .. دي من حسن كابوس بتاع أنا ماشي السوق ؟


ردود على ما قلنا ليك
United States [كلك كلو] 05-29-2012 01:35 AM
دي وارد جوبا ... الظاهر الجماعة بتاعين كل القوة جوبا جوه وصلوا خلاص وجابوا الخيرات من هناك.


#377370 [Wyoming]
5.00/5 (2 صوت)

05-28-2012 02:52 PM
لك التحية يا أستاذي الفاضل
بالله أنت بتقصد اي مريخ مريخنا ولا مريخهم...والله ده كان أنا كان وديتو القصر الجمهوري عديل واقول للزول ابو متر ده بالله شيل عمر وديهو لاهي


#377334 [ابوساجد]
5.00/5 (1 صوت)

05-28-2012 01:58 PM
جامدة دي قوية والله.
انت زاتك حيرتنا نحن خليهم ناس المريخ الجاين من كوكب تاني...


#377324 [عوض محمد احمد]
4.50/5 (2 صوت)

05-28-2012 01:48 PM
الاخ الفاتح اسعدالله اوقاتك والقراء الكرام - ناس المريخ او القمر ماعندهم حتى ورل خليك من تماسيح اما العندنا ديل ديل التمساع يبلعوه بدون مويه والتمساح مسكبن البيمثل عليه الجماعه العندنا -
الشى الماقادر افهمه لى يوم الليله - خليك من موضوع اسرائيل تضرب بى مزاج وتقدل راجعه ومافى زول يقوليهم ياخوانا الكلام ده عيب نحن ماقدركم وعمتكم امريكا اذا حاجه ماشفتوها بتوريكم ليها ونحن عارفنهم فبتننا بمئات السنين علميا وعسكريا والشى الغريب ماعندهم لا تماسيح لولا حتى ورل- ياخوى الغاتح دحيم مش غريب عشرات السيارات تدخل مطار الفاشر وتدمر الطائرات الحربيه وتعتقل الطيارين ولا حس ولاخبر ومافى زول قال هو الحاصل شنو - وبعدين اكتر من ثلاثمائه سياره تقطع الصحراء من اقصى الغرب وما وقفها الا النيل الابيض والشى الغريب ان الوزراء دفاع على داخليه قاعدين دى كانت تشيل الحكومه كلها مع ان عندنا اكبر عدد من الوزراء ونوابهم يفوق عدد كل وزراء قارتى افريقيا واستراليا وجزء من اسيا -
الاخ الفاتح سمعت اى اخبار عن خط هيثرو او شركة الاقطان او 50 الف الفادنى او تاس الاوقاف اوناس الحج حتى الحج لهفهه وتقول تماسيح - ياخوى جماعتنا ديل لو ودوهم شواطى استراليا الفيها اخطر اسماك القرش او الحوت القاتل لهربت هذه الخلوقات الخطره خوفا من فنائها - الله يعين شعبنا الصابر ده اذا كان باقى ليه رمق


#377320 [حمدان البجيب الشاي]
4.38/5 (4 صوت)

05-28-2012 01:44 PM
اها يا خوانا فكرة الجريدة الساعاتية مافي زول قال عليها حاجة
و زي ما شايفين هسع المقال ده فيهو كسرتين و الشهر الجاي الكسرة الثابتة حا تزيد واو
و غايتو انا بطلب من جبرة يثبت لينا كسرة جديدة عن بورسودان
وواحدة عن الماعارف هو زاتو شنو داك و حا تلقو انو فكرة الجريدة دي هي الحل


لكن بلله يا جبرة ناس المريخ ديل كان مشو شرق شوية و شافو السفن و الطيارات القدر الهقلة ديك كان قالو شنو غايتو ربنا قدر و لطف انهم اخدو في طيرانهم خط النيل الأبيض ولا كانت فضيحتنا بجلاجل لو شافو اعمال واحد بس من تماسيحنا


#377309 [ودالجزيره سكر]
5.00/5 (2 صوت)

05-28-2012 01:31 PM
الشكر لهذا الكاتب لانه بعرف افضح اصحاب الدوله الرساليه والمشروع الماحضرى وانا لوكنت معهم اوده محل الفلل الرئاسيه ومزارع الوزراء المستشارين


#377289 [الصابري]
4.44/5 (5 صوت)

05-28-2012 01:07 PM
ناظر المدرسة غلطان كان يوديهم يشوفوا وزير الدفاع شوف العين عشان نسمع رأيهم فيه ونسمع رأيه هو في المركبات الفضائية ونعرف من وين بتجي وكيف تفلت من شبكة رادارات السودان


#377276 [ابو بكر]
5.00/5 (2 صوت)

05-28-2012 12:56 PM
شاهدت مرة في إحدى القنوات لقاء مع الكاتبين الساخرين الفاتح جبرا وآخر اسمه جعفر (أبو الجعافر).. كتب أبو الجعافر مرة عن سجنه في كوبر وكان معه المرحوم خالد الكد وسماه خالد الكيك (تشبيه غاية في السخف) المهم أبو الجعافر بعد ذلك هاجر إلى الخليج وأصاب مالاً هناك ونسي أيام الفلس والشيوعية والدفاع عن الطبقة العاملة والمسحوقة التي كانوا يدعون الدفاع عنها نسي ذلك كله وصار إلى العكس تماما فهو الآن يستنكف حتى السكن في الأحياء الشعبية لدرجة أنه نصح زميله أو صديقه المرحوم وردي بألا يسكن في الأحياء الشعبية كالحاج يوسف وما أشبه ثم قرأت له مقالا ذكر فيه أنه يمتلك منزلا في حي كافوري مجاورًا للرئيس البشير وإخوانه (اللصوص) وناس حوش ود بانقا؟!!! شئ عجيب وسبحان مغير الأحوال.. أما الاستاذ جبرا فقد اتبع في نقد النظام طريقة روائية قصصية خيالية ناعمة وهو يعلم أن النظام أول الراضين عن طريقته هذه ويشجعه على المضي فيها فهنيئا للسيد جبرا الفوز برضاء الكيزان اللصوص.


ردود على ابو بكر
United States [hassan] 05-29-2012 10:20 PM
صدقت يا ابوبكر السيد جبرا يعمل بمباركة الكيزان بل وعندهم وهو يأخذ اجرا عن ذلك جزاء الها الشعب وتخديرهم والتنفيس عنهم وياخذنا الى قضايا انصرافية بعيدا عن الثورة وعدل النظام بتغيير البشير وبقية الاراجوزات القابعة على سدة الحكم. جبرة ما هو الا مورفيين لسلب الشعب الارادة وجعله مدمن على امثال جبرا المأجور. وان كان حديثي خطأ لاثبت بالدليل كم يقبض من الكيزان ومن من ؟ وكيف؟

United States [baboy] 05-28-2012 03:50 PM
you Abu baker be objective.....stupid

United States [المهجوم خالس] 05-28-2012 03:21 PM
فهنيئا للسيد جبرا الفوز برضاء الكيزان اللصوص ؟


يا رااااجل قول كلام تاني

United States [ودتكو] 05-28-2012 02:34 PM
هسه الجاب ابوالجعافر هنا شنو ؟ وبعدين تعال هنا مالك ومال الشيوعية ؟ ابوالجعافر من اشهر الكتاب الاقليمين وله قراء وشعبية وكونو يكون عندو بيت فى كافورى ماعيب لانو قضى عمرو كله فى الغربة وهذا حصادة .. لكن السؤال هل اختلس من مال الشعب وبنى به هذا البيت ؟ عالم مابتخجلش


#377231 [سلام]
5.00/5 (1 صوت)

05-28-2012 12:08 PM
تطور ملحوظ ..في التكتيك المنودرامي


#377227 [فتخر]
5.00/5 (1 صوت)

05-28-2012 12:05 PM
ناس المريخ ديل


ردود على فتخر
United States [زعلان] 05-28-2012 01:47 PM
تخيل يا فتخر فعلا ناس المريخ ما عارفين انو حا ينطردو بالمحكمة و يجدعو ليهم عفشهم في الشارع


#377225 [saara]
5.00/5 (1 صوت)

05-28-2012 12:03 PM
يا الفاتح جبرا انا عندي 6 فدان في مشروع سندس دا
حق الايجار للموسم الزراعي الواحد 40 جنيه * 6 فدادين=240 جنيه
رايك شنو بس؟


#377217 [azhari]
4.88/5 (5 صوت)

05-28-2012 12:00 PM
والله يا ااستاذنا مش ناس المريخ الما عارفين حاجة وبس!!!!!!!!!! نحن برضنا ما عارفين ولا ناقشين اى حاجة.... بالله فكرة المريخ دى جاتك كيف ههههههههههه الله يجازى محنك ويديك العافية يا ارقى زول يا اجمل زول .. ربنا يحفظك استاذنا بجد بتخلينا نحس بكلامك الرااقى دة وبتطلع الهوا السخن بس بطريقتك


#377205 [هجو]
4.88/5 (6 صوت)

05-28-2012 11:54 AM
قويه ياجبره


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة