جابت ليها غياب
05-30-2012 03:51 PM

جابت ليها غياب

الفاتح يوسف جبرا

مؤخراً قمت بكتابة مقالين يخصان (الشرطة) المقال الأول بعنوان (نبلغ لمنو يعني؟) سوف نأتي إليه في نهاية هذا المقال أما المقال الثاني فهو بعنوان (نحنا ناقصين) سردت فيه تجربتي عند قيامي بفتح بلاغ فقدان لبعض الأغراض وقد تساءلت في المقال عن (السر) في عدم وجود مكان يجلس فيه المواطن (في كل مكاتب بلاغات السودان) ريثما يأتي دوره لتسجيل بيانات بلاغه خاصة أن هنالك مرضى وكبار سن لا يستطيعون الوقوف لا سيما إن كان أمام الشرطي عدد من البلاغات !
كما تساءلت عن السبب في سؤالي عن (قبيلتي) ذلك السؤال الذي لم أجد له أي مبررات (زول عاوز يفتح بلاغ قبيلتو دخلها شنو؟) وكما ذكرت في ذلك المقال فإن هذا السؤال يؤطر للإنتماء القبلي البغيض على حساب الإنتماء الوطني !

العبدلله كان يظن زليس كل الظن إثم بأن النقطتين اللتين أثارهما واضحات ومنطقيات وكده لكن يبدو أنو أخواننا في الشرطة (عندهم رأي تاني) تعالوا معي أيها القراء الكرام لنقرأ (الرأي التاني) في توضيح المكتب الصحفي للشرطة حيث يقول التوضيح :
بالإشارة لما ورد بصحيفتكم بتاريخ 10/5/2012م في عمود الأستاذ /الفاتح جبرا تحت عنوان (نحنا ناقصين) حول بلاغه بموجب عريضة من النيابة نوضح الأتي :
نشير إلى أن كاتب العمود إدعى عدم توفير كراسي بمكتب البلاغات في حين أن المكتب عبارة عن كاونتر للبلاغات والإجراءآت به محدودة وسريعة وليس هنالك مساحة لوضع كراسي للجلوس ، وسؤالنا له عن القبيلة يقع ضمن البيانات بالإستمارة ويعني أشياء كثيرة للشرطة لأغراض التحري غابت عن الكاتب وهذا ما لزم توضيحة ولكم الشكر !

لقد لفت إنتباهى إستخدام كلمة (إدعى) فالإدعاء قد يكون حقاً وقد يكون باطلا .. إذ جاء في لسان العرب – الجزء الخامس (حرف الدال) – دعا : (ادعيت الشيء : زعمته لي حقا كان أو باطلا كقول الله – عز وجل – في سورة الملك( : وقيل هذا الذي كنتم به تدعون ) !
فما قاله العبدلله بخصوص عدم وجود كراسي بمكتب البلاغات ليس إدعاء بل هو حقيقة ماثلة لكن يبدو أن (أولادنا) في المكتب الصحفي للشرطة (عجبتهم الكلمة وكده !)
أما تبريرهم لعدم وجود الكراسي فقد إستدعى هذا التبرير أن يقوم العبدلله بتركيب (الفهامة) ليفهم إن كان عدم وجود الكراسي (لمحدودية وسرعة الإجراءآت) أم (لعدم وجود مساحة لوضع الكراسي) كما جاء في التوضيح أعلاه ؟ فالسببان مختلفان تماماً ، إن كانت المسالة لسرعة الإجراءآت فإن إجراءآت فتح بلاغ لا يمكن أبداً تكون أسرع من مسالة شراء الكهرباء من مكاتب (الجمرة الخبيثة) ومع ذلك توجد هنالك صفوف ! لذلك فمن الممكن أن تاتي لكاونتر البلاغات عدد من البلاغات في وقت واحد وفي هذه الحاله ماذا يفعل من كان مثلنا مصاب بعدد من (أمراض الشيخوخة) ولا يستطيع الوقوف؟ العبدلله يري أنه ليس هنالك مطلقاً ما يبرر عدم وجود (كنبة) إو كرسي كرسيين بمكاتب البلاغات للعجزة والمرضى وكبار السن فهذه مسألة إنسانية بحتة وهامة وضرورية !

ونأتي للنقطة التانية في التوضيح وهي مسألة (قبيلتك شنو؟) وقد كان رد المكتب الصحفي للشرطة بأن السؤال عن القبيلة يعني أشياء كثيرة للشرطة لأغراض التحري وقد غابت عن الكاتب ! … (كمان جابت ليها غياب) !
بالعربي كده الإخوة في الشرطة يقولون للعبدلله (العرفك شغل الشرطة شنو؟) السؤال عن (القبيلة) ده سؤال مهم في مرحلة التحري وبيعني حاجات كتيرة وده كلام (غايب عليك) !

وبما أن المكتب الصحفي للشرطة مطالب بالرد على مقالنا الأول (نبلغ لمنو يعني؟) الذي أشرت له في صدر هذا المقال والذي يحكى عن تجاوزات مالية بمكاتب السجل المدني والجوازات تتمثل في مبالغ تستلمها (الشرطة) من المواطنين دون أعطائهم أى إيصال فنرجو من الإخوة والأبناء في المكتب الصحفي عند الرد (الذي طال أمده) أن يتضمن برضو قصة القبيلة الغابت عن الكاتب دي ويذكروا لينا (حاجة وااااحدة بس) من الأشياء الكثيرة التى تعنيها !

كسرة:

حينما سأل القاضي البطل علي عبداللطيف في تلك المحاكمة الشهيرة عن قبيلته: أجاب قائلاً أنا سوداني ورفض ان يذكر قبيلته .. هسه القبيلة بقت (تعني حاجات كتيرة) .. يبدو أننا موعودون بمستقبل (من غير ملامح) !!

كسرة ثابتة :
أخبار خط هيثرو شنو(ووووو)؟


تعليقات 33 | إهداء 0 | زيارات 12327



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


التعليقات
#381128 [محمد نور]
2.88/5 (6 صوت)

06-01-2012 07:41 PM
ياجماعة مافى داعى تزعلو ناس الشرطة عشان ما يفكوها ليكم ذى المصرين بعدين انتا القاعد ليها شنو مش بارك الله فيهم الدخلوك


#381081 [مدرّس أكلت حقه النقابة]
3.12/5 (11 صوت)

06-01-2012 05:52 PM
حينما تغيب العدالة والحريّة ويستشرى الفساد والظلم
يشعر الإنسان أنه يعيش في غابة ، فيفكر أولاً في ( عشيرته التي تؤيه)
ف (مجتمع) الغابة هو عبارة عن تكتّلات كلّ (قطيع) في مواجهة القطيع الآخر
وذلك بسبب غياب القانون الملزم للجميع ( وهي الحالة ـ للأسف ـ يعيشها المجتمع
السوداني اليوم في ظلّ ( بل هجير )هذة الحكومة المجنونة )


#380854 [سيد الحاره]
3.51/5 (10 صوت)

06-01-2012 12:20 PM
ها ناس سلام عليكم.مالكم انتو كلكم زعلانيييين بلحيل من موضوع القبيله دا.آآآآآآي لازم الشرطه تعرف القبيله انتو عارفين ليه؟طيب اقولكم:
أولا:السودان اساسا يتكون من عشاير وقبايل كتيره معروفه في كل جهاته.وبعد ان اختلط الحابل بالنابل لم تكن معروفه بالضبط الان.
ثانيا:السودان كان بي خيرو وكل زول نازح_شارد_مقطوع_جايع بجي بخش البلد وبعيش.لكن الحال اتغير وعايزين نعرف الناس ديل هسي وين لعمل بعض التدابير.
ثالثا:هذه الشرائح الوافده الذكرناها في ثانيا هي الان عامله فيها سودانيه ولها حقوق ومطالب وبتفتح في الجبهات القتاليه الان.
خامسا:بعد انفصال الجنوب هناك محور هام لابد من تحديده وهو موضوع الهويه السودانيه وهذا لايتأتى الا بحصر ومعرفة الراهن القبلي الحالي ومؤثراته على موضوع الهويه.
يعني بس دي مختطفات بسيطه لا الحصر في موضوع سؤال القبيله.
ياجماعه ماممكن بس اي حاجه كدا الا نشرحها ساعدونا شويه بالفهم.بالذات امثال الصحفيين العاملين فيها منقطنهنا ديل. ولا شنو يا جبرا؟


#380502 [أبوديدى]
2.74/5 (12 صوت)

05-31-2012 07:58 PM
بمناسبة القبلية والتى
طفحت إلى سطح مجتمعنا فى عهدالوثنية
هذا جاء إلى حلتنا ناس
(اللغم الوطنى) حسب نطق إبنتى له وعند التحرى تحفظت على سؤالين هما ماهى الديانه وماهى قبيلتك؟!
سألت الضابط عن المغزى من هذين السؤالين؟!
رد بنفس رد مكتبهم الإعلامى وكأنما إستفزازه
السؤال وبإستخفاف وتعالى وعنجهيه وبكامل
المعرفه والإدراك .
مشكلتهم إنهم يعتقدون
أويتوهمون أن الحديد
المعلق على أكتافهم
أكسبهم غير السلطة والجاه حبةفهم ووعى
وهم لايعلمون أنهم تركوا
الوعى والفهم منذ دخولهم كلية الرباط والربط والتربيط!!


#380466 [أبوديدى]
3.10/5 (10 صوت)

05-31-2012 07:01 PM
عزيزنا الإستاذالفاتح
أسئلتك مشروعه ومنطقيه
لكن للأسف لمن توجهها؟!
زمان أيام الزمن الجميل
كان لدى الشرطة شعار
محترم (لأنوالشرطة ذاتها
محترمه) وهوالشرطه فى
خدمةالشعب!
الآن تحول الشعارإلى الشرطة فى خدمةالسلطه
ولأنك (العبدلله) لاتنتمى
للسلطه شئ طبيعى أن
تجدمثل هذا الوضع.
لو تطورموضوع بلاغك
معهم وفقدت أشياء مقيمه لديهم هم أكثرمنك! كان دفعت دم قلبك حتى
تعثرعليها وكل افراد الشعب يعرف ذلك ولاأعتقد كشخص حصيف
مثلك لايعلم بذلك حمتك
خفيفه كمايقولون عندما
إضطررت للجوءإليهم
الشرطه الآن جهازفساد
وجهاز قمعى ويمكن أن
تصاب بالرعب وإنت بين
أياديهم . الكيزان حولوا
هذا الجهازالخدمى/الوطن
الذى يحفظ الأمان ويبعث
بالطمأنيه إلى المواطن
إلى جهاز تابع لهم يحفظ
أمنهم وأصبح أقرب فى
سلوكه إلى جهازأمن!!‏
مع خالص التقدير..‏‎ ‎


#380439 [حليم-براغ]
2.77/5 (7 صوت)

05-31-2012 05:48 PM
الأستاذ تقبل التحية
المشكلة يا أستاذ جبرا مش قبيلتك المشكلة قبيلتك + إنت معانا ولا مامعانا, لأنو الناس ديل مش كل أولاد قبيلتهم معاهم , المهم أعمل حسابك ؟؟؟ ذي الدكتور العمل (إنترفيو) أول سؤال طلبوه منه إنو يقول ليهم العشرة المبشرين بالجنة...شغلانية تجنن , وربك يهون.


#380407 [AMEIR]
2.90/5 (7 صوت)

05-31-2012 04:51 PM
عزيزي جبره نحن جيل ولد في زمن المحن البوليس السوداني لم تكن سمعته فوق الشبهات في كل العهود بس في زمن الفهلوه انعدام المحاسبه برطعو براحتهم لانهم ماسكين زلات كثيره علي الكيزان اصحاب السلطه و يتعاملو معنا بمبداء الشعب في خدمة الشرطة غايتو انت الا تقطعها في حنانك مغايس ناسك ديل


#380336 [سوداني]
3.25/5 (6 صوت)

05-31-2012 03:06 PM
اسواء انجازات النظام علي الاطلاق رضيتم ام ابيتم هي التفرقة العنصرية والقبليه التي نعيشها نحن في هذا الذمان والاسواء من كدا انوا في وزارت بعينها لايدخلها ودحلال كدا الابس مقفوله لي اربعه قبايل والغريب قبائل موجوده ضمن القبائل الاخري يعني مامنزلين من المساء ولاجاين بي وحي الاهي والله يقول في محكم تنزيله (خيركم عنالله اتقاكم). صدق الله العظيم هذا زمانك يااااااااااااااااااااااااااامهازل فامرحيييييييييييييييييييييييي.


#380284 [كوكادام]
3.50/5 (5 صوت)

05-31-2012 01:53 PM
صدقت نحن دخلنا في زمن من غير ملامح ..نهاره احرف وليله اجرب..كملت وعلى قول الشماشة كتمت.


#380271 [الغاضبة]
3.54/5 (6 صوت)

05-31-2012 01:42 PM
يبدو أننا موعودون بمستقبل (من غير ملامح) !!



للأسف استاذنا ماضينا وحاضرنا ومستقبلنا كلو من غير ملامح.... الله يجيب الملامح


#380216 [JAMAL]
3.25/5 (5 صوت)

05-31-2012 12:45 PM
انا على يقين ان حال هذا البلد لن ينصلح ما لم ينصلح حال الشرطة فالشرطة عندنا مقدسه وبلاويها لاتحصى ولن ولن يعترفوا فهم اول من تجاوز القانون الا ترى اى سياراتهم بالنمرة القديمة وكما الموباي لانه شرطة والله يكون فى عونا وعونك يا استاذ


#380035 [علي كمونية]
3.54/5 (7 صوت)

05-31-2012 10:00 AM
يا استاذ جبرة خلينا من القبيلة ومكتب البلاغات ، ليه ما تكتب عن فساد الشرطة والرشاوي ، أي زول ما يقدر يعمل أي شغلانة عند الشرطة الا لما يدفع ، أمبارح أنا جايي من أمدرمان للخرطوم بتاعين الحركة دفعوني مرتين عشرة الف في كل مرة لأنه عربيتي ما مرخصة ، وحكومة السجم والرماد عارفة انه الشرطة فاسدة وساكتة لأنه ناس الشرطة بعرفوا الجبهجية وما بتوقفوا معاهم ، وأي زول شغال في الشرطة حتى لو كان عسكري ساي تلقاهو مروق وشبعان ، أفتح لينا ملف الرشاوي يا استاذ وخليك من الكرسي في مكتب البلاغات ، ولو شعرت بالتعب في مكتب البلاغات ممكن تصنقر في الواطة لما يجيك الدور


#379981 [الحسن فاروق]
3.35/5 (6 صوت)

05-31-2012 09:29 AM
القبيلة فى هذه الحالة تعنى حاجات سلبية لايود البيان الصحفى ذكرها, فهى قد تعنى لو الكان المدعى ضده من قبيلة المتحرى فأنسى الموضوع, ولو كان مثلا مثلا من القبايل التى تؤيد الإنقاذ بشكل جماعى كما نشاهد فى التلفزيون فلا داعى للإحراج, أما لو كانت من الفبايل المتمردة فالويل والثبور وهكذا تزر الوازرة عندنا وزر الأخرى, وهكذا ننحدر نحو الهاوية حتى ننتهى لمعارك عبس وذبيان


#379931 [مسمار جحا]
3.50/5 (5 صوت)

05-31-2012 08:40 AM
يعني الجماعة بيقولوا هي لله هي لله و في نفس الوقت يسألون عن القبيلة

اذا هي للقبيلة و ليست لله


#379889 [زازووق]
3.13/5 (5 صوت)

05-31-2012 07:29 AM
الشرطة دى باظت من زمن نميرى


#379830 [3310]
3.50/5 (5 صوت)

05-31-2012 01:43 AM
أظنك ما من النوكيايب يا جبرة لكن بعد التعليقات دي فهمت الحاصل من سؤال القبيلة ..
انا في رأيي يتم تغيير قبايل الناس حسب المهنة مثلا وتسمع الجزاراب والخضاراب.. ما (حميد) عليه رحمة الله قال الجا من الجبل والجا من الجريف كل الناس اهل والمعم أهل قربهم العمل وكل الناس هناك ما بتخبر زعل.. تزعل من منو وتزعل في شنو وتعرف يا صبي ي ي ي ي ي ي ي ي .. تعرف يا صبي .. يوم باسم النبي .. يسرقك الغبي .. تعرف يا ص ص ص ص ص ص صبي ي ي ي ي ي ي

او حسب الموبايل المحممول وتسمع العاشقاب والنوكياب والبلاكاب (بيري) والبلاكاب (تيري)
او حسب الحاجة المميزة اضان كبيرة واو لسن سلط وتسمع الاضاناب واللساناب والشعراب ..
الخ المسرحاب
العاطلاب
المغترباب


وي يي الراكوباب..

عشان نطلع من حتة العنصرية والشتايم والمؤامرات والدسائس...

دعوة الى كل الما طلعو رقم وطني
اي زول يكتب قبيلتو من القبايل المفضلة كويس؟؟؟؟
اذا بقيت من القبيل المامفضلة (ما عند الله هناك اتقاكم ) بقصد عند البيقول هي لله


#379803 [radona-d]
3.75/5 (5 صوت)

05-31-2012 12:03 AM
سانصب نفسي قاضيا بين الاستاذ جبرة والشرطة نبلغ لمنو يعني وموضوع القبيلة
اولا : الشرطة شانها شان بقية اجهزة الدولة المواطن بالنسبة لها البقرة الحلوب وذلك الساذج الذي يعاني من الامية بنسبة تفوق ال76% .. وهذا عرف سائد لدى كل اجهزة الدولة .. جبايات ..جبايات .. وهكذا الدولة اصبحت دستوريين تنؤ عن حملهم ميزانية الدولة وشرطة ومحليات ينؤ عن حملهم المواطن الذي انهكه الجوع والمرض بل والخوف احيانا .. لذلك فان شكوى الاستاذ جبرة قد شطبت لانه لايسمح بالشكوى ضد الشرطة والقضاء والجيش .. اشتكي لله يااستاذ جبرة .. انتهى
اما موضوع القبيلة : ساحكي لك يااستاذ جبرة : في يوم من سالف العصر والاوان كان يعمل معنا خادم منزلي من دينكا نوك ( ابيي) وفي ذات مساء اجتمع بعض الاصدقاء بمنزلنا وكان كل واحد يذكر بانه من القبيلة الفلانية وانهم عرب ومن قبيلة قريش والبعض نسب نفسه الى سيدنا العباس ...وسيدنا علي بن ابي طالب .. خالد بن الوليد .. وفجاة سال احدهم ذلك الخادم عن اسمه وقبيلته فرد عليه با اسمه ودالحكيم ود رسول الله .. اراد ان يقطع ذلك الخادم دابر الموضوع بان ابوه كان حكيم ( اعلى مهنة) اما الشرف فقد فاق كل الموجودين نسبا بان نسب نفسه الى الرسول صلى الله عليه وسلم جهلا وظلبا للرفعة والمكانة التي لاتضايهيها مكانه ..
الحكم ياستاذ جبرة لو سالك تاني شرطي من قبيلتك قول لهم ارناؤوطي .. وخليه يلف صينيية .. ما تزعل .. والسؤال هل سالك من فصيلة الدم؟


#379742 [سودانى عديل]
3.54/5 (6 صوت)

05-30-2012 10:28 PM
الله يفتح عليك يالفاتح جبره يا فاكهة الراكوبه ام قصب اخضر


#379740 [المهجوم شديد]
2.75/5 (5 صوت)

05-30-2012 10:25 PM
قلت لي يا أستاذ قالو ليك (إدعي كاتب العمود) !! يعني إنتا بتكضب وده .. طيب وين الكراسي؟ حكمتو بالغة يا أستاذ .. ده مكتب صحفي شنو الما بعرفوا عربي ديل !!والله أنا لو منهم كا كان تجرأت ورديت عليك


#379705 [عبد ألله]
2.50/5 (5 صوت)

05-30-2012 09:41 PM
توضيح المكتب الصحفي للشرطة قال: (ويعني أشياء كثيرة للشرطة لأغراض التحري غابت عن الكاتب )
يا أستاذ الفاتح ألم تسمع بالمثل الذي يقول (الثعلب يعرف أشياء كثيرة والقنفذ يعرف شيئاً واحداً كبيراً)
أظن ناس الشرطة هم الثعلب


#379692 [عصمتووف]
3.07/5 (8 صوت)

05-30-2012 09:25 PM
* لو تم رفع الحصانة عن ظايط اكرر ظابط القتل والسحل الذي قتل عوضية بنزعم ان الدنيا فيها شوووووية خير **** اخلاق جهادية مربط الحمير لا تتوقع منهم خير هؤلاء الاجرام يجري في عروقهم كانفاسهم شهيق وزفير يخرج من بين سبيليهم ياكلونه ويشربونه لكن الله موجود عليهم بتذكر قوته وهو اكبر منهم ولا ات ساعة الندم
دنيا فرندقس القعونجة تركب الفرس


#379670 [ود الجزيره]
2.60/5 (11 صوت)

05-30-2012 08:56 PM
والله فعلا انت غايبه عليك!! انت مفتكر انو الاصرار على كتابه القبيله بدون سبب؟!! يعنى عايز ناس الشرطه يتعاملوا مع الشايقى والغرباوى بالتساوى؟! شوف ياعمنا جبره معلومه القبيله دى مهمه عندنا خااااالس!!ولاهميتها صممنا نظام الرقم الوطنى بعدم حفظ البيانات اذا لم يتم ذكر القبيله!! لماذا؟ لان هذه المعلومات مهمه للتحرى وكمان فى اصدار الاحكام القضائيه.البلد دى ياسى جبره اسيادها معروفيين!! التضامن النيلى (شوايقه دناقله محس وجعليين). فمثلا :انت عايز انو لو صدر امر قبض على محسى والمشتكى عربى جزيره نقوم بتنفيذ امر القبض؟؟!! ياخى اخجل شويه!! ربنا ذاتو ماخلق الناس متساويه انت عايزنا نساوى بينا؟برضو كمان ياعمنا جبره المعلومات دى بيتم تبادلها مع الخال الرئاسى الطيب مصطفى !! وهو بدورهو بباصيها لمن يهمه الامر (جهاز الامن والمؤسسات.....) لانو كمان مامكن نوظف الناس بدون نعرف قبايلهم!! اسى ياجبره اخر دفعه مهندسيين تم تعينهم فى التصنيع الحربى (شوايقه ودناقله بس) هل كنا حنعرف قبايلهم لولا هذا النظام الدقيق؟؟!!


ردود على ود الجزيره
United States [musap] 06-12-2012 08:26 AM
حرام عليك لما تقارن بين القبايل كدا انا شايقى والغرابة اخوانا واهلنا واصحابنا ويشكلون قوة كبيرة فى الشرطة نفسها رجاء لاتذرى احدا من قبائل السودان ومناطقه فكلنا سودانين وكلنا اهل البلد

United States [عاصم عيسى] 05-31-2012 02:01 PM
شكرا لك ود الجزيرة.. جيت من الأخر.. بس اكتب وقربت اتقيأ. أطرش يعني. الرحمة على بلد اسمه السودان.


#379663 [عبد الرحمن]
3.54/5 (9 صوت)

05-30-2012 08:47 PM
يا أستاذ القبية مهمةلعمل الشرطةن عشان لو قلت رباطابي الشرطي يعرف مدى المساخة وسرعة الرد عندك، و لو قلت دينكاوي يكون عايز يعرف المقعدك هنا شنو و هل انت دينكا نقوك واللا بور، و لو قلت جعلي يستفزك ليعرف درجة الانفعال البتخليك تحلف بالطلاق، و لو قلت محسي يكون عايز يعرف إذا كنت حتقول ليه "إطلع من دورك"، و إذا قلت منصوري يكون عايز يعرف رأيك في صلاح عبد الله و بالتالي في الإنقاذ، و إذا قلت شايقي يكون عايز يعرف مدى الدهاء و الغتاتة في إجاباتك، و إذا قلت مسيري يكون عايز يعرفك من الحمر واللا الزرق، و إذا قلت فوراوي يكون عايز يعرفك من الذين فقدوا أهلهم بالكوم و اللا بالقطاعي، و لو قلت بديري يكون عايز يعرفك دهمسي و اللا مهمش شاكت، و لو قلت زغاوي يكون عايز يعرفك من أهل الجسارة و اللا التجارة، و إذا قلت حلاوي يكون عايز يعرف عبد القادر ود حبوبة يبقى ليك شنو، و هكذا و هكذا و هكذا. برضه يا أستاذ تقول لي السؤال عن القبيلة ما ليه لزوم؟


#379646 [wedhamid]
3.13/5 (7 صوت)

05-30-2012 08:10 PM
الأخ جبرا ....و الله منطق هؤلاء هو منطق العاجز و فى نفس الوقت المكابر و ليتهم لم يردوا عليك و آثروا الصمت كعادتهم فى حالات كثيره .....يا أخى ديل يقتلوا المواطن عمدا و بإصرار و لا سائل لهم و لا حساب ( لكى لا يكون كلامى رمى التهم جزافا أذكرك بحادثة عوضيه فى الديوم الشرقيه و شهداء كجبار الذين إغتيلوا بدم بارد وشهداء بورسودان و كهل جبل الأولياء) و دغمسة للمصيبه و تغطيه للجرم بنفس هذا المنطق.....و الله إنى لأتعجب ماذا دهى رجالات الشرطة و هم جزء من تكويننا المجتمعى و هم مننا و إخوتنا و إبنى و أخى و صهرى .....فتصورا المواطن عدو لهم .... وتوهموا عداوات معه؟؟؟؟لاحظ سلوك أى شرطى مع المواطن متى ما إقتربت منه لأى سبب...تراه يتحفز و ينتصب و يستعد للعدوان مكشرا وجهه....... و الله أتمنى من عودة الصفاء والوئام بين المواطن والشرطى( و شعارات الشرطة فى خدمة الشعب و جمعيات أصدقاء الشرطه و يا بوليس يا ابن العم ماهيتك كم و رطل السكر بقى بى كم ؟؟) كما كان دوما والله يلعن الكان السبب.....


#379619 [صاحي]
3.00/5 (8 صوت)

05-30-2012 07:17 PM
ان تذهب لمكتب من مكاتب الشرطة فأنك ستعامل معاملة متهم سواء كنت شاكيا او طالبا لشهادة جنسية او جواز سفر او بطاقة شخصية معاملة لا مثيل لها في كل مكاتب الدنيا استجواب بطريقة فظة باللسان ودفر باليدين وزح كده وماشي وين يازول واشياء من هذا القبيل واتحدى اي مخلوق ينكر هذه المعاملة .
البني آدم في كل الدنيا معزز مكرم ففتح البلاغ حق وواجب على الشرطة بذل كل ما تستطيع اعطاء المواطن ما يستحقه من اهتمام واشعاره بأنهم في خدمته وليس لاذلاله . الوثائق الثبوتية حق اصيل للمواطن يناله بكل احترام وتقدير في كل اصقاع الدنيا الا في هذ البلد الأمين حيث يبدأ بالصفوف في هجير الشمس اللافح والاستجواب والاذلال اللفظي والبدني من شاكلة زح كده واطلع بره وغيرهاهذا بالاضافة للرسوم الباهظة لتلك الوثائق داخل وخارج الاستمارات المالية المعروفه باورنيك 15 اما الكراسي يا استاذ جبرة فهي رفاهية لايستحقها المواطن فهو كما ذكرت يعامل كمتهم برئ حتى تثبت ادانته وادانته تأتي اذا ما بدر منه أي رد فعل لتلك المعاملة الفظة فهو في هذه الحالة مدان مدان بموجب القانون اعتراض موظف اثناء تأدية واجبه وعينك ما تشوف الا النور كما قال عادل امام


ردود على صاحي
United States [wad madani] 05-31-2012 10:02 AM
والله ماقلت الا الحق ومصداقا لكلامك كنت بعمل فى تاشيرة خروج بدفع فى الرسوم تقريبا 47 جنيه
اديتو 50 جنيه ما رد الباقى افتكرت بحسن نيه انو ما عندو فكة وكده وسلمت الجواز وانتظرت يرجع لى الباقى فقام بنهرة يازول الموقفك شنو ؟ قلت عندى باقى عندك فقام غير الموضوع على طول انتوا فاكرننا ايه عشان بنتعامل معاكم بادب وغير الموضوع تماما لغاية وتدخل الضابط ووقف فى صف المحصل او العسكرى وانا بدورى صعدت الموضوع لغاية ما اخدت ثلاثة جنيهى .


#379602 [huwidah]
3.54/5 (8 صوت)

05-30-2012 06:45 PM
الجد جبرة..
لا زلنا نحفظ عن ظهر قلب محاكمة علي عبد اللطيف كما ورد في كتب المطالعة...
ماهي قبيلتك...
الجواب سوداني...
الي اي قبيلة تنتمي..
انا لا انتمي الي هذه القبيلة او تلك..انا سوداني...
حكمت عليك المحمكة بالسجن لمدة عامين...
ان السجن لا يزيديدني الا ايمانا بحق بلدي في الحرية والكرامة..
انك سليط اللسان..لست بسليط اللسان ولكني ادافع....
رفعت الجلسة...
واقتيد علي عبد اللطيف*يرحمه الله- الي السجن..
وخلده التاريخ...
الي ان اتي عبد الباسط سبدرات ولينافق من بيده الامر ..محا وشطب وازال كل الكتب التي نهلنا منها..ادعي ان الانجليز قصدوا النبي محمد بقولهم طه القرشي مريض اي ان محمد او طه اسم النبي ونسي وتناسي وهو من النيل الابيض ان كل او معظم اهالي المنطقة اسماؤهم اما طه او القرشي..والدليل ان اول شهيد في اكتوبر اسمهو القرشي..لكنه النفاق..
ناسيا ومتناسيا ان ما درسناه سيبقي في عقولنا والي الابد...
وذهب هو-سبدرات- وباذن الله من نافقهم الي مذبلة التاريخ وستبقي ذكري البطل الشهيد علي عبد اللطيف وطه القرشي والقرشي خالدة علي مر العصور....


#379585 [جنى الوزين]
2.88/5 (5 صوت)

05-30-2012 06:08 PM
باعوا اولاد القبايل يا استاذ الفاتح ..شفت القبيلة مهمة كيف


#379580 [الزول الكان سَمِحْ]
2.97/5 (9 صوت)

05-30-2012 06:02 PM
ياأستاذ

بالله بدل ماتفقع مرارتك وإنتا رجل كبير فى السن ويعانى من أمراض الشيخوخةإشترى ليك كرسى متحرك
وبعدين سؤالك عن قبيلتك دى عشان يرجعوا للسجلات يقارنوا بين جنسيتك الحقيقية وبطاقتك الشخصية عشان يطلعوا ليك الرقم الوطنى وكدا!!!


ردود على الزول الكان سَمِحْ
United States [ود البطانه] 05-31-2012 05:41 AM
انت عكس اسمك القديم


#379547 [قمرالانبياء]
3.00/5 (9 صوت)

05-30-2012 05:13 PM
(إن كانت المسالة لسرعة الإجراءآت فإن إجراءآت فتح بلاغ لا يمكن أبداً تكون أسرع من مسالة شراء الكهرباء من مكاتب (الجمرة الخبيثة) ومع ذلك توجد هنالك صفوف !) رد بليغ وعجيب ولكن يا استاذى المواطن السودانى ليس له قيمة عندهم ..وكعادتهم تاخذهم العزة بالاثم ويكابرون وينفون وقوعهم فى الخطا حتى لو تطلب الامر ان يكذبو ويردو مثل هذا الرد الطفولى ز


#379523 [البعاتي]
3.13/5 (7 صوت)

05-30-2012 04:53 PM
يبلع جب جب جب ولي خصيمو جد لي


#379511 [معاشى]
2.97/5 (9 صوت)

05-30-2012 04:38 PM
يكفى ادعاءهم على انفسهم والاقرار بالادانة قولهم بسرعة الاجراءات و محدودية المساحة ..

صار عليهم قوله تعالى :( اخذته العزة بالاثم )


الفاتح يوسف جبرا
الفاتح يوسف جبرا

مساحة اعلانية

تقييم
4.86/10 (17 صوت)




الرئيسة |المقالات |الأخبار |الصور |الفيديو |راسلنا | للأعلى


صحيفة الراكوبة السودانية... راكوبة الأغاني السودانية، في رحاب الراكوبه ستجد السودان بمختلف مناطقه وعاداته وموروثاته خلال أقسام منتدياته المتعددة مثل المنتدى العام، العنقريب، المدائح ومنتدى التلاوة الذي يحتوي على تلاوة للشيوخ: صديق أحمد حمدون , عوض عمر , الفاتح محمد عثمان الزبير , محمد عبدالكريم , نورين محمد صديق , عبداللطيف العوض , صلاح الدين الطاهر سعد , الزين محمد أحمد الزين , وأحمد محمد طاهر. إلى جانب هذا هنالك منتدى مخصص للمدائح النبوية، هنالك المادح: الامين احمد قرشى وعلى الشاعر , الشيخ مصطفي محي الدين ابوكساوي , أولاد حاج الماحي , عبدالله محمد عثمان الحبر , اسماعيل محمد علي , السماني أحمد عالم , الجيلي الصافي , خالد محجوب (الصحافة) , علي المبارك , حاج التوم من الله , عبدالعزيز قورتي , ثنائي الصحوة , فيحاء محمد علي , الجيلى الشيخ , نبوية الملاك , عبدالعظيم الفاضل , عاصم الطيب , فرقة عقد الجلاد , سيف الجامعة , عثمان محمد علي , المدائح النبوية , فرقة الكوثر. علماً بأن المشاركات والآراء المنشورة في منتديات الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2014 alrakoba.net - All rights reserved

صحيفة الراكوبة