رفع الدعم عن الفساد
06-02-2012 10:31 AM

رفع الدعم عن الفساد

الفاتح جبرا
[email protected]

تقول الحكاية : أنه في غابر الزمان كان هنالك حاكم يحكم أحد شعوب (اليونان) ولما كبر هذا الحاكم في السن وداهمه المرض وأصبح لا ينفع معه زيت سمسم ولا قرض أحس بقرب نهايته فطلب من الحراس أن يأتوه بعبايته ثم أن يأتوا له بابنه الوحيد وهو شاب عنيد لاشك أنه سيخلفه في حكم الدولة لأنه بذلك أولى !
ولما مثل إبنه بين يديه قال له : يا بني اني أحس بنهايتي الأليمة وسأوصيك بوصية عظيمة يجب عليك أن تنفذها بالحذافير مهما سوف يصير وهي أن وجدت نفسك يوما في زنقة شديدة لأن دولتك أفلست وبقت على الحديدة فاذهب إلى تلك المغارة المظلمة خلف القصر وذلك بعد وقت العصر فستجد بها حبلا مربوطا إلى السقف خذه دون دوران أو لف واشنق نفسك دون خوف أو رعب لترتاح من محاسبة الشعب ، وما كاد الحاكم ينتهي من الوصية (على طريقة الأفلام الهندية) حتى أغمض عينيه ومات.
وما أن تولى (الوارث الوحيد) الحكم وأصبح ذا مكانة حتى تحلقت حوله البطانة، من وزراء ووجهاء ومستشارين وكمان بعض رجال الدين (اليوناني طبعن) فأخذوا يبعثرون الثروة ويبددونها غير عابئين دون أن يرف لهم جفن أو عين حيث أقاموا الفلل والعمارات وإمتطوا الفاره من العربات وأكتنزوا الدنانير ومختلف العملات التي أبانتها بالصدفة بعض السرقات، يلغفون دون أن تطالهم يد العدالة وهم مطمئنون إنو مافيش (إقاله) يفعلون كل ذلك ببرودة دم لأنو عارفين مافيش زول ح يسالهم (تلت التلاته كم) ، فما لبثت فضائح الفساد قد أضحت داوية مما جعل (خزنة الدولة) تصبح خاوية ، وأصبح الوارث الجديد (مزنوق شديد) ، وهنا تذكر وصية أبيه الحاكم الحكيم فقال مخاطباً نفسه في تسليم (لابد من النهاية بعد أن جاطت الحكاية) لابد أن أشنق نفسي وأستريح وأتخارج من هذا الموقف القبيح ، فذهب صاحبنا في الحال إلى المغارة ليشنق نفسه حسب الوصية فقام بدخول المغارة المظلمة في جدية ، فوجد الحبل متدليا من الأعلى مما يوكد أنها طريقة موت سهلة، فما كان منه إلا أن أغرورغت عيناه بالدموع حيث لا مجال هنالك إلى الرجوع ، فلف الحبل على رقبته ثم دفع بنفسه في الهواء في منظر يبعث على الرثاء، ولكن ما أن تدلي الحبل ونظر إلى الخلف حتي وجد النقود تنهال عليه من السقف ، بينما رنين الذهب يصم الآذان في منظر تقشعر له الأبدان ، ثم وجد تفسه مستلقياً أسفل المغارة وإلى جانبه ورقه في شكل رسالة كتبها له أبوه الحاكم يقول فيها يا بني هذه نصف ثروتي كنت قد خبأتها لك لهذه اللحظة بالتحديد عشان عارف رجالك شغالين تبديد، فعد إلى رشدك واضرب بيد من حديد على كل من يحاول أن (يلغف) من هذه الثروة من جديد ، حتى لا تصل إلى ما وصلت إليه الآن من (فلس) عشان تاني ما تتزنق وتدق لينا (جرس) !
إنتهت قصة الحاكم اليوناني .. طيب نحنا جبنا القصة دي ليه؟ حقيقة مش عشان نعرف قيمة الجنيه لكن علشان نشوف آخرالحكومة دي ايه ؟ فقد قررت أن تدخل مغارة (رفع الدعم) المخيفة بعد أن عدمت الخزنة (التعريفة)، فتلف الحبل على رقبتها دون عناء ثم تدفع نفسها في الهواء وما أن تقوم بذلك في إقتدار حتي ينهال عليها الجنيه والدولار، كما جاء في حكاية الملك اليوناني الماعاوزين نكررا تاااني !
ولكن أمنا الحكومة ما أن لفت حول رقبتها حبل (رفع الدعم) حتي اصابتها الحيرة والغم فبدلاً من أن تنهال عليها أوراق النقود والذهب أصبحت في موقف صعب إذ إنهالت عليها (هتافات المواطنين) وهم يصرخون في أنين، لتجد نفسها مستلقية أسفل المغارة وإلى جانبها ورقه في شكل رسالة كتب عليها (إنتو قايلين الشعب ده عندو ريالة) !!

كسرة :
عاوزين النصيحة ؟ دخول مغارة (رفع الدعم عن المحروقات) دي مخيفة ، عشان كده أحسن ليكم أدخلوا مغارة (رفع الدعم عن الفساد) لو أصلو الموضوع جاد ، فالقروش المنهوبة ممكن تصلح الميزانية بدون ما تدخلو الشعب في أذيه، وأبدو لينا بي خط هيثرو العاملين منو طناش في وكت المرضي بيشتروا الحقن والقطن والشاش !

كسرة ثابتة :
أخبار خط هيثرو شنو(ووو ووو) !


تعليقات 37 | إهداء 4 | زيارات 8007

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#392574 [طيفور]
0.00/5 (0 صوت)

06-14-2012 01:49 PM
انتو عارفين ناس الحكومة حيتخارجو من المنظر ده كيف ح يبعوا ابيي وهجليج فى اديس ابا


#383084 [Mohd]
0.00/5 (0 صوت)

06-04-2012 09:40 AM
دا حااااار ودا حرم ما بنكوي به

اتحسب هذه الحكومة ان الله غافل عما يعملون ؟


هذا ما كسبته ايديهم فليستعدوا للعذاب الآخروي وعذاب القبر

وليستعدوا لمنكر ونكير

ولينتظرونا يوم الموقف العظيم لنتعلق برقابهم ونقتص منهم امام العادل الجبار

هم ومن ناصرهم وايدهم وحماهم ولنراهم في جهنم

امين يا رب


#382938 [علاءالدين سعيد]
0.00/5 (0 صوت)

06-04-2012 01:07 AM
كلام فى المليان ..واصل كفاحك
والشعب يريد تغير المفسدين يا جبرا لانو الحال يغنى عن السؤال وبالطريقه دى حنفقد الوطن كله والله المستعان


#382800 [أبو إبراهيم]
0.00/5 (0 صوت)

06-03-2012 09:07 PM
بارك الله فيك ومتعك بالصحة والعافية مقال رائع بمعنى الكلمة


#382702 [ابوبسملة الجعلى]
0.00/5 (0 صوت)

06-03-2012 06:02 PM
يديك العافية الرائع جبرة وأتمنى ان نختصر ونعجّل بالثورة التى تأخرت اكثر ممايجب حتى لانشهد زوال وطن اسمه السودان حسبنا الله عليم ونعم الوكيل


#382599 [عوض محمد احمد]
0.00/5 (0 صوت)

06-03-2012 03:52 PM
الاخ الفاتح اسعد الله اوقاتك حكاية رفع الدعم عن المحروقات حاتكون القشه الكسرت ضهر البعير - الحل واضح يرجعوا الاموال المنهوبه سواء ان كانت فى مليزيا اواندونيسيا او الصين او جبل على او فى عمارات وفلل دبى او حتى فى كافورى او المجاهدين - وبشوفوا ناس الاقطان والحج والفادنى المالك السابق لصنوق الزكاة - او زول مشروع سندس مارى بخط هيثرو - ان متاكد لو رجع النص الناس ديل ماحايحتاجوا لرفع الدعم - ولو المساله كركبت ماحتلقى زول قاعد عشان تسالو - خليها على الله


#382585 [ثعلبه]
0.00/5 (0 صوت)

06-03-2012 03:32 PM
اكيد ياجبره اليوناني مازي التيواني لانو انساني .
الانسان كائن يعيش ويتعايش


#382561 [سامر المدنى]
0.00/5 (0 صوت)

06-03-2012 03:08 PM
والله العظيم انت فايق وكلامك رايق وكله حقايق بدون مجاملة لكن انقر فى زول بيوريك خبر خط هيثرووووو,,, وووووك


#382504 [ابوالجعران]
0.00/5 (0 صوت)

06-03-2012 02:22 PM
اخونا جبره بيحلم برفع الدعم عن الفساد وهو يعلم تماما ان الفساد والتمكين هي سياسه انقازيه واسترتيجيه حكوميه للمؤتمر الوطني ومن وصيايا الدكتور المخطط لثوره الانقاذد. حسن عبدالله الترابي ( عليكم بالثروه والسلطه اذا فقد احدهما تبعه الاخر ) ومن سابع المستحيلات التخلي عن هذه الاستراتيجيه وقد اثبتت نجاحها علي مدي اكثر من عقدين رغم الضغوط الخارجيه من فبركات الجنائيه كما انها قضت علي الاحزاب الكرتونيه والساحه خاليه للمؤتمرجيه ونحن ما ضون علي هذه الاستراتيجيه واللي عاوز وظيفه وعاوز يعيش يجينا في المؤتمر الوطني ولكن اللي عاوز السلطه يلحس كوعه التمكين مستمر والانقاذ ح تستمر وليس هناك فساد بشهاده القائد الملهم رئسنا الهمام اسد افريقيا الدرغام


#382483 [شهاب ثاقب]
4.50/5 (2 صوت)

06-03-2012 02:08 PM
متعك الله بالعافية ياراجل يامحترم في زمن إنعدمت في الرجالة في السودان وساس البلد
مجموعة من أشباه الرجال والمعوقين نفيسا وفكريا ...........لك كل الأماني الطيبة


#382072 [حلفاوي]
3.75/5 (5 صوت)

06-02-2012 11:46 PM
اليوناني زول انساني
لما انغمس ... في الفلس ... ركب درب اللحس ... بدون جرس

كان قدرت يا حكواتي تقنع الديك ... ليك علينا نرص ليك ونديك
مغاره تحت بنك سويسرا المركزي ... وبى تكييف مركزي
عشان المحروقات ... ماتولع الفروقات

بس والله يا حكواتي ... عشان مجهود ما عندك من حكاياتي
ممكن نجيب اولاد الخود وهاتي ... يحضروا ليك ويعملوا تسلياتي
بي جميع اللغاتي ... يمكن وربك يعلم يتذكروك في القرن الاتي

كسره كده منو الصمم المغاره ام دهب

كسره ثابته الابو ده كان حرامي برضو ولا بحب ولدوا شديييييد ؟؟؟


ردود على حلفاوي
United States [حلفاوي] 06-03-2012 11:41 PM
يا جعلي ... الله يديك العافيه ويزيدك غيره ... انا ما كوز واعوذ بالله من ريحة الكوزنه وان عفنها ليشم من مسيرة كذا وكذا ... بس قصدي انوا القصه دي ما حتقدم ولا حتاخر لانها ناعمه شويه ... ويمكن الكيزان ناس ارزل الحلفاوين والشوايقه والجعليين لو لو لو اتلفتوا ليها ... يدوها اولادهم يتسلوا بيها ... لو بيفهموا عربي او يوناني طبعا الاولاد

جبره بيضرب في الضل ... ولما يجي الكلام على ناس المهدي والميرغني والقصص القديمه بيشوت شلوت على الطاير

ودمت بخير

United States [ابوبسملة الجعلى] 06-03-2012 06:08 PM
حلفاوى كوز ؟؟؟ عيب كدة بس كدة بس ! نحن معوّلين علي النوبة وجبال النوبة ودارفور والشرق لكن الله ينتقم من هذه الحكومة الخائنة كونت نفسها وحمت حماها باراذل القبائل اراذل الحلفاويين وكذا الشوايقة والجعليين والنوبة والغرب والشرق وعذبت الاحرار وزادت عذابهم ولكن مهما يطول الليل فسينجلى قريبا فانتظرونا


#381987 [زوله كده]
5.00/5 (1 صوت)

06-02-2012 09:10 PM
والله الليله دى قوووووويه عديله يا خبره شكلها بمناسبه الواو السادسه (كل واو وانت بخير )ونتمنى انها تكون الاخيره ويورونا اخبار خط هيثرو شنوووووو....

والله ولا شهرزاد فى زمانه(بالجد انت مشروع قصصى رائع نتمنى لك التوفيق)....

والشعب ان ما عندو رياله ما كان الحراميه ديل باقين ليهو فى رقبته لليله.......


#381902 [صاحي الصاحي]
5.00/5 (1 صوت)

06-02-2012 07:01 PM
والسؤال المهم هو أصلاً كيف سمحوا ليك بكتابة هذا المقال . لانو في صحفي مسكين أبدى رأيه في حديث للرئيس على قناة فضائية وبسببها اعتقل واتبهدل . حاجة تحير


#381901 [البشير كان رئيسي!!!]
5.00/5 (1 صوت)

06-02-2012 06:59 PM
و الله يا استاذ جبرة المطلوب ابسط من الشنق بالحبال و كدة.... بس يمشي لناس اوكامبو و كدة


#381888 [radona-d]
0.00/5 (0 صوت)

06-02-2012 06:32 PM
بالله يااستاذ جبرة تحكي لينا زي الحكايات دي طوالي لكن ما تجيب لينا طاري الحكومة وزيادة اسعار الوقود لانك بي كدة حتطلعنا من روح المرح الذي عشناه في القصة
اما الحكومة سترفع الدعم عن الهواء بعد المحروقات
تفتكر ده اخر حزام يربطه المواطن على بطنه يااستاذ جبرة


#381833 [الزول الكان سَمِحْ]
0.00/5 (0 صوت)

06-02-2012 05:00 PM
وآآآآآآآآآآآو

ياربى دى تكون منها؟؟؟ شكيتك يا جبرا


#381817 [sahi]
4.75/5 (3 صوت)

06-02-2012 04:48 PM
لو يتذكر الناس ان وزير المالية طلع قبل فترة وقال ان هناك قروش تقيلة جدا جاتو دون ان يذكر مصدرها ولكن الناس عرفت ان دي القروش السرقوها الحرامية الفي السلطة واودعوها بنوك ماليزيا وسويسرا وغيرها والحرامية ديل تبرعوا بيها كسلفة مستردة بعد ان سمعوا كلام عوض الجاز بأن هناك 180 الف برميل بترول سيبدأ في تصديرها نهاية هذا العام ولكن بعد ان تأكد لهم بأن عوض الجاز بيخرف كما يقول المصريين رجعوا في كلامهم وشالوا قروشهم او ما يفترض انها تكون قروشهم وعشان كده الحكومة لجأت لرفع الدعم المرفوع اصلا ومش كده وبس قررت ان يتم التبرع لدعم القوات المسلحة بمرتب شهر لكل العاملين المرفوع عنهم الدعم يعني ميتة وخراب ديار اكان عجبكم والماعاجبوا يلحس كوعو


#381787 [ود الطيب]
0.00/5 (0 صوت)

06-02-2012 04:22 PM
(إنتو قايلين الشعب ده عندو ريالة) !!


أخبار خط هيثرو شنو(ووو ووو) !



وزراء لهم ريالة تسيل و وزراء لهم ريالة تسيل كلما شافت جنيه او دولار
وزراء لهم ريالة تسيل كلما جاء تشكيل وزارى جديد (قديم )


ردود على ود الطيب
United States [ابوبكر] 06-02-2012 05:56 PM
ووزاء ريالتهم سايلة خلقه ..


#381744 [المغتاظ]
0.00/5 (0 صوت)

06-02-2012 03:39 PM
ارى هذه الايام عملية تلميع شديد لقائد متحرك هجليج في جميع القنوات شي خطب وشى شعر وشي شهادات وامكن كمان في افلام على شاكلة افلام العبور المصرية, مش يمكن ده يكون الوريث اللحا يدخل المغارة بس حايلقى كمية من الحبال كافية لوضع النهاية لكل الشعب الفضل , اما الورقة فمكتوب بها عبارة واحدة ستدفع المواطنين نحو الحبال بشجاعة واقدام تحت نغمات دخلوها وصقيرها حام
(العبارة هي اهلا بكم في الجمهورية التصحيحية الثالثة للاولى والثانية والممهدة للجمهورية الرابعة المطبقة لشرع الله بدون دغمسة ,بس سرقة المال العام دي ادونا فرصة شوية لتطبيق حدها)


#381735 [bit baladi]
0.00/5 (0 صوت)

06-02-2012 03:26 PM
,والله ياستاذي الفاضل ليست لدي شيء اقول سواء ان اسال الله ان ينعم عليك وعلي امثالك بالصحة واالعافية وننتظر منكم المزيدوبلدانا كلها قضايا والحمدلله ةالرجاء اصبح فيكم عل رسائلكم هذه تكون سبيل هدايةوتذكرة


#381733 [عشميق القسيبة]
5.00/5 (1 صوت)

06-02-2012 03:25 PM
والله يا استاذ الفاتح الجماعة ديل كلامك ده لا بجيب لا بودى معاهم احسن عمودك ده تنادى فيهو بالانتفاضة وصدقنى هى الحل وقصة بديل مافى ده كذبة من الحكومة نفسها والسودان بى رجالوا الشرفاء الاوفياء الامناء والرصاص لن يسنينا


#381670 [Allord]
0.00/5 (0 صوت)

06-02-2012 02:28 PM
وزير النقل : طائرات سودانير (6) معطلة و(4) فقط عاملة
June 1, 2012
(الصحافة)


#381627 [3Atel]
0.00/5 (0 صوت)

06-02-2012 01:31 PM
اهههههههها دة شهر ستة عشان كدة عداد "الواوت" عمل ستة .ما تعمل لينا واوات برضو للبنزين الاكان سنة 89 ب 3 جنيه واسى ماشى على ال12000جنيه يعنى لازم تبدا ب12 واو. وكل شهر داير ليك واوين زيادة.


#381622 [khalid maaroof]
0.00/5 (0 صوت)

06-02-2012 01:25 PM
يا جبرة ديل خيارين احلاهما مر واحد حار والتاني ما بندار
لكن لوقلبك سدها اعمل الدايروووووو


#381615 [yasin]
0.00/5 (0 صوت)

06-02-2012 01:16 PM
طيب دا خلاء لي ولدو بعض من المال
المصيبه ديل ماعملو حساب لي بكره
بعدين ووالله يااستاذ جبره ... الدوله هي التي تصرف
الوقود بكميات خرافيه ... شوف عدد العربات الحكوميه كم ...
واضرب في 10 لتر في اليوم لكل عربيه...



كسره اخيره.....
اقترح رفع الدعم عن كل عربات الحكومه
وشوفو الحيحصل ايه....
*


#381575 [مكتول هواك]
0.00/5 (0 صوت)

06-02-2012 12:24 PM
جظييـــــــــــم يا استاذ


#381559 [jinja]
0.00/5 (0 صوت)

06-02-2012 12:05 PM
جننتهم جن والله يا دكتور .. يجننهم الله أكان جننونا.ديل الكلام ما بجيب فيهم خبر , لكن ليهم يوم وما حيطول ان شاء الله.


#381552 [المهجوم]
0.00/5 (0 صوت)

06-02-2012 11:58 AM
جبره ياخبرة .. شايفين الواوات بقت ستة !! والجماعة عاملين رايحين هههههههه


#381522 [كلك كلو]
0.00/5 (0 صوت)

06-02-2012 11:31 AM
مبروك الواو السادس ياجبرا.


#381518 [أحمد عمر]
0.00/5 (0 صوت)

06-02-2012 11:30 AM
ولكن لم تخبرنا يا هذا هل كان الوارث الوحيد للعدالة طريد؟ وهل كان له اخوان أطلق يدهم في مال ألله بعد أن استتب له السلطان؟ ومهما يكن نحمد له الشجاعة إذ لم يقل أفدي نفسي بألف مجاعة ومجاعة, وهو أشجع من السلطان الراقص التعيس الذي فضل أن يهلك شعبه ولا يسلم كديس.


#381513 [المغتاظ]
0.00/5 (0 صوت)

06-02-2012 11:27 AM
ياجماعة الايام دي شايف لي تلميع شديد لقائد متحرك هجليج وتكريم ووثبة ثانية وكلام وخطب وشعر وشهادات وامكن افلام قريباكأفلام الغبور المصرية,مش امكن يكون هو اللحايكون وريث الحكم الجاي اللحايدخل المغارة ليجد بدل الحبل الواحد حبال تكفي لتعليق واراحة كل الشعب الفضل اما الرسالة فمكتوب فيها اهلا بكم في الجمهورية الثالثة التصحيحية للاولى والثانية والتمهيدية للرابعة .....واله انتو شايفين حاجة ثانية.


#381504 [ودالبلد الأصلى-كان أسمو السودان]
0.00/5 (0 صوت)

06-02-2012 11:20 AM
ورونالد درب المغارة بى وين يمكن الجماعة ديل بيستهبلوا وما دايرين يربطوا الحبل كويس عشان نساعدهم !


#381502 [ابويحيى]
5.00/5 (3 صوت)

06-02-2012 11:20 AM
أنا لو فى مكان البشير اول شىء اعمله وانا هنا أشير بما اشارت به السيده ام سلمه زوجة الرسول صلى الله عليه وسلم عندما رفض الصحابه التحلل من العمره بعد رفض اهل مكهالسماح لهم بالدخول وعقد اتفاق صلح الحديبه واشارت اليه كما هو معروف فى القصه ان يبدأ بنفسه وحلق شعره ومن ثم اقتدى به الاخرون اى على البشير ان يتخذ من الرسول (ص) فدوه( مع الفارق الزمانى والمكانى والحدث )اى أن يجمع ما لدى ال البشير من ثروه هو ووداد وعباس شقيقة وبفية اخوته ومن ثم على الثعلب الماكر المتعافى ان يكون اول الفاعلين بعد البشير ومن ثم كرتى ومصطفى اسماعيل ونافع وابن اوى على عثمان وطبيب الاسنان والله ياجبره القائمة طويله طويله وشيطانك المختص فى الاقتصاد فعلا اوحى لك بحل لمشاكل اهل السودان لانه هو نفس الشيطان الذى ساعدهم واوحى لهم بجمعها فالان يقول لهم انا برىء مما فعلتم لانكم طلعتم اشطر منى وماكنت الحكايه بالمليارات دى وكمان بالدولار وانا حاسبها بالسودانى وحا تاخذونى فى داهيه ومحاكم جنائيه فى عرش الجان بالقطب الشممالى وعارفين اصلى من نار كمان اعذب بالماء البارد عقابا لى لان ذلك من اختصاصات اعمال شيطان حسنى مبارك واحمد عزت وعلاء وجمال 0


#381467 [جدو]
0.00/5 (0 صوت)

06-02-2012 10:49 AM
والله شعار حلو وجميل وومكن نقتبس منو شعار اخر (رفع الفلل والعماير عن النهابيين) شعارات الثورة باذن الله...............شكرا عمنا جبرة وجبر الله خاطر


الفاتح يوسف جبرا
الفاتح يوسف جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة