نصيحة للناخبين في مصر
06-03-2012 08:32 PM

نصيحة للناخبين في مصر ، إياكم وانتخاب مرسي رئيسا..!
عليكم بأحمد شفيق.....اسمعوا الكلام

عمر خليل علي موسي
[email protected]

رسالتي اوجهها اليكم اخوتي في شمال الوادي ....مضمونها باختصار : اياكم ومرشح الاخوان المسلمين رئيسا لكم ..! هذا النداء ليس عشوائيا ولا اعتباطيا انه نابع عن تجربة امتدت الي زهاء الربع قرن من الزمان المر ... وحالنا لا يخفي عليكم فانتم الاقربون وتعلمون ما حل بنا من بؤس وشقاء وفقر وقلة حيلة وحروب وووو.. القائمة تطول .... نصيحتي لكم عليكم بأحمد شفيق وبس... او حتي اعادة حسني مبارك (تاني .. وتعتذروا له) رئيسا او امبراطورا حتي ... بس الاخوان (دولت) ابعدوا عنهم ... ولا تخدعنكم الوعود الانتخابية ولا معسول الكلام (كضب ساكت) بل وَهَم وسراب وخداع وكلام ( خارم بارم ) للاستهلاك الآني وما ان يتمكنوا (عندهم جنس تمكين) فالويل والثبور لكم ...! اسمعوا الكلام نحن (أخوات) .
ان كنتم تودون ان تتفكك بلادكم الي دويلات وتفقدون اجزاء منها للأبد(سينا دي اكيد) فعليكم (بسي) مرسي ...هؤلاء الاخوة يحبون بل يعشقون تقسيم المقسم الي اجزاء ...حتي مديرياتكم ستصبح نحو 30 مديرية وعلي كل مديرية والي (سموه زي ما عايزين) ومساعديه وحكومته ومحافظيه ومعتمديه وبرلمانه ومجالسه اي ما يقارب المائة خمسون دستوريا في كل مديرية يعني ما يقرب من ال 5 ألف دستوري علي مستوي مصر.... ده غير مجلس الشعب المركزي ومجلس المديريات ...(ودولت ) لو ما كلهم من اهل الثقة سيكون 98 % منهم ومن المقربين ... ده غير مخصصاتهم من بيوت وعربات وعلاج بالخارج وسفر بالطائرات الي ابعد مكان تصله الخطوط المصرية (طبعا قبل ما تتباع وتقعدوا علي طيارة واحدة او اتنين ويا حليلو خط هثرو بتاعكم )....! (وخدين بال حضرتكم ؟ ) ...حتدخلوا في حروب مع جيرانكم في الجنوب (نحن يعني) والشرق وتاني مع اسرائيل ...وعلاقاتكم الدوليه مافيش (بح)...كل العالم (حيآطعكم) وأول شي تفقدوه المعونة الامريكية وسينقلب عليكم الاتحاد الاوربي وما حتلقوا دولة تقيف معكم غير الصين وإيران ...! اما الجنيه المصري فدي المعضلة حيفقد قيمته من الاسبوع الاول لحكم مرسي وجماعته ويتهاوي ويصل به التضخم الي الهاوية الاقتصادية السحيقة وتضطر حكومة مرسي بيه الي شطب 3 اصفار امامية حتي يكون برقم فردي واحد (غشه وكده) ، وتتوالي عليه ضربات الدولار واليورو ويسقط جنيهكم صريعا مجندلا.....اما هذه الحالة الآنية من الديمقراطية بعد مبارك فهي بعد مرسي وإخوانه ستكون حلما جميلا مر بخيالكم سرعان ما يزول ، فلا احزاب ولا انتخابات مستقبلا ولا دستور فحكمهم لا يقاس بالفترات فهو مستمر ما استمرت الدنيا (والماعجبو) يشرب من النيل . وحيجرب فيكم مرسي حكومات ذات قاعدة عريضة وأخري بضِلف ضيقة وحكومات تحالف (وائتلافات ليها ابعاد وتجربة وزاد) .
أما صحفكم الثلاث (ههههه آل ثلاث صحف .. بس؟ ) ستصبح بقدرة قادر ثلاثون صحيفة ، شى رقابة فعلية وأخري قبلية ويعملوا ليها مجلس صحافة ونيابة ... معليش 25 صحيفة من الثلاثين لازم تتخصص حكي عن الجرائم وإخبار الفن والرياضة ، بس اياها ان تقترب من الخطوط الحمراء للسياسة او تتحدث عن الريس مرسي وحاشيته . (وشوي... شوي) يستشري الفساد في وزرائكم ومعظم المسئولين وتمتلئ كروش الخاصة وتضمر كروش العامة وتجوعوا.. ويهاجر نحو 20 مليون مصري من 80 مليون موجودين وتدخلوا في شح موارد ومشاريع فاشلة في الزراعة والصناعة وانقطاع في الكهرباء والمياه ورفع الدعم عن البترول وبعدو الخبز البتحبوه اوي والدواء . ده انتو شفتوا حاجه... !
اخوتي القائمة تطول وتطول وهذا قليل من كثير ، فهل بعد كل ذلك ستنتخبون مرسي رئيسا ؟ علما ان اول مشروع سيكون لمرسي وجماعته تقسيم ميدان التحرير خطة اسكانية خاصة ل 5 الف دستوري بالبلاد (كيف دستوري ما عنده قطعه في وسط البلد ما ينفعش) .. ولا تكونوا كالذين بُذِل لهم النُصح بمنعرج اللوى فلم يستبينوا النصح إلا ضحي الغد .. اللهم اني قد بلغتهم فاشهد ....!


تعليقات 5 | إهداء 0 | زيارات 831

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#383828 [حلفاوي]
0.00/5 (0 صوت)

06-05-2012 12:49 AM
المشكله مافي انوا مرسي يفوز وبس

المشكله في انوا يرجم اذناب مبارك المدنيين والعسكريين عشان ما يجقلبوا و يتهبنقوا

يعفرتوا البلد ويتلبوا بالليل

يعني مش بس مطلوب عزل سياسي ... مطلوب رجم سياسي حدي


#383333 [ود الحاجة]
0.00/5 (0 صوت)

06-04-2012 01:23 PM
يا استاذ عمر خليل علي موسي
أنت ومن سار في دربك "تنفخون في قربة مقدودة" فالمصريون لن يستمعوا إليكم و غاية ما ستحصدونه هوكراهية الاخوان لكم اذا وصلوا للرئاسة في مصر و اذا لم يصلوا فلن تكسبوا ود شفيق الذي هو من صنع مبارك.لن يسمع المصريون لكم لمايلي:

1.يعتقد أغلب المصريون أنهم أولى باسداء النصائح لنا و ليس تقبلها منا
2.الطرف الاخر شفيق لا يحظى بودكثير من شباب مصر فلمن سيصوتون و من سيقاطعون
3.بالاضافة الى الاخوان هناك السلفيون
4.يجهل المصريون كثيرا مما يحدث في السودان فكيف ستقنعونهم


#383317 [الكلس ودالبلد]
0.00/5 (0 صوت)

06-04-2012 01:15 PM
اياكم ثم اياكم ترشيح كل من تدثر بالاسلام كذبا وزورا وبهتانا !! انتو ما شايفين الخرم الدخلونا فيه من يدعون بالاسلام !!! العاقل من اتعظ بغيره !! الستم عقلاء يا اهل شمال الوادى !! لديكم الفرصة للتبديل والتغييير !! تعالو شوفو حالنا بقى كيف والله لا يسر عدو ولا صديق !!


#382891 [حلفاوي]
0.00/5 (0 صوت)

06-03-2012 11:24 PM
وعاوزهم يصوتوا لى منو يعني ............. حتى لو كان هناك علاقه بين اخوان السودان واخوان مصر ... فنحن في زمن الحسابات والتكنولوجيا ... وافكار التمانينات دي فالد في سودانك بس ... يعني معقوله اخوان مصر ما شايفين الخوابير اللي كل يوم بتدق في ارداف جماعتك المفرفرين رايح جاي ... ولا اخوان الجزائر والحصل عليهم ... يعني معقوله حيكونوا منطسين في مخهم ويفكروا بالسذاجه والسطاحه بتاعتك دي ... اخوان مصر عملوا للمصريين الفقرا وزوجوا بناتهم ودعموا اسرهم والكلام ده كان في وكت مافيهو امل انتخابات وسياسه وبعد ده جابو ربع والاسلاميين كلهم جابوا 38 يعني فرفره مافي ودي فروقات واضحه ... وبي هناك عندهم ملف اسرائيل والغاز المجاني في حين انو المصري في بلدوا بياخد الانبوبه بي 50 جنيه ...

دوله مدنيه بطيخيه بتاع ايمانيه ... زمان الدنيه عكسها العسكريه ... هسه بقى الاسلاميه ... يعني الاسلاميه صحراويه ولا قرويه ... طبعا ما قصدي جبة جماعتك ديل يا ابو نصيحه

لا لمبارك ولا لشفوقه ... ونعم لمرسي في كف اليد ... يستعدل او يعصر ... وهو ما حيكون اشر من ابو طوارئ وبلطجه

مصر في مرحله تاريخيه ... وربما تعيد صياغة تاريخ المنطقه لو احسنوا ادارة الدفه ... تحت قاسم واحد هو ثقة الجميع ... ان شاء الله


#382792 [KALIFA AHMED]
0.00/5 (0 صوت)

06-03-2012 08:53 PM
نصيحة غالية للأخوة المصاروه!!!! فعلا لو ركب سي مرسي دي ح تكون آخر انتخابات حرة والباقي خج ساكت !!!!!! عليكم ب شفيق وشفيق ياراجل هو الحل ولو ما مصدقين أرفعوا رأسكم جنوبا وبصو لأخوانكم في الوادي وماذا فعل فيهم تنظيم الأخوان اللئيم !!!!! شفيق وبس


عمر خليل علي موسي
مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة