فتاوى هايفة
09-22-2010 01:04 PM

ساخر سبيل

فتاوى هايفة

الفاتح يوسف جبرا

بينما كنت أجلس على جهاز الكمبيوتر (كعادتى) فوجئت بأم الأولاد وهى تصيح فى قائلة :

- شنو يا راجل قاعد تصفق فوق إيدينك وتتحوقل !

هنا إنتبهت لنفسى فأنا قد كنت بالفعل أتحوقل وأصفق يداً بيد على خبر قرأته على أحد المواقع بالإنترنت يقول بأن لجنة الإفتاء التابعة للأمانه العامه لهيئة كبار العلماء السعودية قد أفتت بعدم جواز تقديم (باقات الورد والزهور) للمرضى عند زيارتهم وإليكم سادتى نص الفتوى :

(ليس من هدى المسلمين على مر القرون إهداء الزهور الطبيعيه او المصنوعه للمرضى فى المستشفيات او غيرها وإنما هذه عادة وافدة من بلاد الكفرنقلها بعض المتأثرين بهم من ضعفاء الإيمان والحقيقه ان هذه الزهور لا تنفع المزور بل هى محض تقليد وتشبه بالكفارلا غير وفيها ايضا إنفاق للمال فى غير مستحقه وخشية مما تجد إليه من الإعتقاد الفاسد بهذه الزهورمن انها اسباب الشفاء .وبناءا على ذلك فلا يجوز التعامل بالزهور على الوجه المذكور بيعا او شراء او إهداء والمشروع فى زيارة المرضى هو الدعاء لهم بالعافيه وإدخال الأمل فى نفوسهم وتعليمهم ما يحتاجون إليه حال مرضهم كما دلت على ذلك سنة النبى صلى الله عليه وسلم.وبالله التوفيق.وصلى الله على نبينا محمد وآله وصحبه وسلم )

إنتهى نص الفتوى ولعلكم أعزائى القراء الآن تصفقون يداً بيد وتتحوقلون كما فعلت وتتعجبون من علماء هذه الأمة الذين ما زالوا يعيشون فى العصر (الفقهى الحجرى) ويقومون بتقسيم العالم (الذى أصبح قرية) إلى دارين هما دار السلم ودار الحرب وإلى فسطاطين فسطاط الإسلام وفسطاط الكفر ويتعاملون بطريقة كل ما هو آت من فسطاط الكفار فهو حرام على الرغم من ركوبهم (الكاديلاك) وتحدثهم بالموبايل وبث برامجهم الدينية عبر الأقمار الصناعية وتنقلهم (بالأيربص) !

لابد سادتى أننا فى ازمة عقليه فعلية تدل عليها مثل هذه الفتاوى التى تبدع فى إستنباط كل ما هو شاذ وغريب وغير مبرر ولا يمثل مشكلة حقيقية تعانى منها الشعوب وتحتاج فيها إلى رأى الدين والعلماء من أجل مواجهتها والخروج منها ، إنها والله قمة العجز والهروب من مواجهه الأزمات التى تمر بها الشعوب الإسلامية والأخطار التى تحدق بها من (الخارج) والأزمات التى تكتنفها من (الداخل) .

هكذا وبهذه السهولة يتم وضع كل من يهدى زهوراً لمريض كنوع من المجاملة الرقيقة أو يقوم ببيع هذه الورود والزهورفاعلا للحرام ومتشبهاً بالكفار وذلك كحكم وفتوى نهائية لا تقبل الطعن أو الإستئناف .

ولعله من العجب العجاب أن يتعلل من قام بإصدار هذه الفتوى بان ذلك يعد إهداراً لمال المسلمين فى غير مكانه ووجهته الصحيحه وكأنى بمال المسلمين فى (ديار الإسلام) ينفق فى مكانه ووجهته التى ينبغى أن ينفق فيها وان الزكاه تنفق فى مصارفها وأن الصدقات توزع فيما ينبغى أن توزع فيه وأن الحكومات (رابطة الحجر على البطن) وأن بيت مال المسلمين (تراجع حساباته على داير المليم) ولم يتبق غير (قروش الورد والزهور دى) حتى تصرف فى وجهتها الصحيحة ...

إن مشكلة أمثال هؤلاء العلماء الذين أدمنوا الإفتاء فى مثل هذه الأمور (الهائفة) أنهم لو لم يفعلوا ذلك لما سمع لهم صوتاً ولا حساً ولا خبراً فهم لا يستطيعون الإفتاء حول الأمور (الهامة) التى تمس حياة شعوبهم الغلبانة كإسداء النصح للحكام وإرشادهم إن زاغوا عن طريق الحق ومثل هذه المسائل (البتجيب هواء) أها يعنى يقعدوا ساكت؟.

إن من أسباب تفاقم المشكلات والأزمات فى البلدان الإسلامية هو غياب الدور الفاعل لرجال الدين فى الحياة اليومية وتغاضيهم عن مناصحة الحكام والجهر برأى (الدين) فى الأمور (التى تستحق) وإكتفائهم بمثل هذا النوع من الفتاوى (الهايفة) التى تكاثرت فى الآونة الأخيرة كفتوى (إرضاع الكبير) وغيرها لدرجة أن هنالك فتوى أفتاها مؤخراً أستاذ الفقه السعودى المعروف الشيخ عبدالعزيز الفوزان بإباحة (التصفيق) لأن البعض قد أفتى بحرمته وعلى كده يمكنكم من الآن التصفيق (بقلب قوى) للعبة الحلوة وكده !



كسرة :

قالت لى زوجتى بعد أن قرأت عليها الخبر:

- دى ناس مرتاحة ساااكت .. زهور شنو؟ وورود شنو؟ الناس هنا كان لقت حق تذكرة الدخول للمستشفى ما خلت حاجة !


تعليقات 19 | إهداء 1 | زيارات 3974

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#34824 [abood]
0.00/5 (0 صوت)

10-15-2010 06:48 PM
لك التحية استاذ الفاتح على هذا الموضوع ولك ان تعلم ان تباين الاراء حول هذا الموضوع يدل على نجاح عمودك وانا بكل صراحة اؤيدك في كل ما قلته وايضا اؤيد من قال ان هذه اللجنة تجيب على كل الأسئلة التي تطرح لها لكن بالله عليكم هل شراء الورود للمرضى حرام وفيه تقليد للغرب.!!! ان كل ما يصنعه الغرب نقوم نحن بالاستفادة منه ايا كان من الطائرات والسيارات وخلافه ولو كان قصة التقليد مشكلة كان لسه الناس بتركب الجمال والحصين في الترحال يا سبحان الله انا اتحدى الناس الانتقدوا هذا المقال او حتى فقهاء السلاطين هؤلاء الذين حرموا الورد بكونوا لابسين اقمشة جاية من الغرب!!!


#27506 [ فقيري]
0.00/5 (0 صوت)

09-27-2010 12:28 PM
الاستاذ جبره كتاباتك الساخره جميله جدا وانا شخصيا اجد فيها كثير من المتعه,أما وانك بديت تتلب حيطة الدين وتترزق بالسخريه من العلماء,فلا نرضي..فأنت لا تستطيع السخريه من حتة عسكري في الشارع الا من وراء قلمك خوفا من بطشه,لكن يسهل عليك العلماء,فأحذر..وقل اللهم لا تجعل في قلوبنا غل للذين أمنوا..فالصحابه كانو يسألون الله أن يرزقهم الملح(ياهو حق الطعام زااااتو) برضو هايفين ياهايف أنت؟
يا الفاتح يا أخوي أكل عيش, ماعندنا مشكله..اترزق مامشكله..الحياه صعبه,صااااح..وواصل (الأرقزه) بتاعتك دي,لكن الله يرضي عليك وعليك الله نحنا ماناقصين نفاق..أبعد عن الدين والعلماء لأنك ماااقدر محاربة الله..ويا موت زر ان الحياة رخيصة


#26933 [عبدالله الكاهلي]
0.00/5 (0 صوت)

09-25-2010 08:05 PM
نحن نحترم كتاباتك الساخرة .
لكن الان جئتنا بكلام غريب , هل انت عالم دين ولا مفتي ولا شنو .
انا عارف انو لجنة الافتاء بفتو في كل صغيرة وكبيرة . يعني انت تسال وهم يجيبو مافي حاجة اسمها امور هايفة
يعني انت لمن تسال عالم دين عن حاجة عايزو يقول ليك دي امور تافهة ما بنتكلم عنها ولا احسن يجيبك بما اتاه الله من علم .
احترم نفسك ولا تتكلم في العلماء وخليك في كتاباتك التي اشتهرت بها وعرفناك بها
لانو دا بقلل من شانك وانا صراحة
احتقرتك اليوم مع اني كنت محترمك كتير .


ردود على عبدالله الكاهلي
Saudi Arabia [حامدابوعبدالمجيد] 09-25-2010 08:56 PM
السلام عليكم ورحمة الله اخى عبدالله
الكاتب شرح بالتفصيل فتوى ووصفها بالهايفة لم يتعرض الى عالم دين فى شخصه اما فتاوى من نوع التدخين فى رمضان وارضاع الكبير ودم الباعوضه بامانة لاتسوى الحبر الذى كتبت به
بعدين احتكار الدين ممنوع منو القال ليك الساخر ده الفاتح مابعرف فيهو الدين ده حاجه علشان يسخر ليك بس ويخلى الدين
اسالك بالله ماسمعت بى فتاوى زى حقت مفتى الازهر فى منع الحجاب والنقاب فى فرنسا ومصر ذاتها خلى ده سمعت لمن حسنى رسل لمتولى الشعراوى فى حفل كان فيه رقص عارى الشعراوى قبل وجهه للخلف الريس رسل ليهو قال ليهو اتعدل ياشيخ رد عليهو برضو انا اللى حاتعدل ياريس
فى مفتى اسمو مفتى السلطان يعنى بيشتغل بالريموت كنترول نعمل بى فتواه شنو زى ده وهسع ارفع معاى النداء ده للشيخ القرضاوى السافر افغانستان علشان يمنع تكسيراصنام كبيره وتاريخيةمن قبل طالبان لاحظ اصنام وفيها خلاف شديد دينى اتحداك يطلع لينا فتوى بقبول قطر بيع الخمور اذا وافقو ليها بتنظيم كاس العالم تحدى شنو اذا كان وزير خارجيتها بصيف ويتعالج ونقاهة فى تل ابيب ماسمعنا القرضاوى فى الجزيرة دى اتكلم عنها وهنا مابنقول اى شئ علشان رجال دين لكن نقول الله يهديهم ويوحد كلمتهم على الصحيح والعديل دوغرى
ختاما احترامك لى جبرا رجعو فى محلو بيستحقو الرجل


#26409 [أبو العلاء]
0.00/5 (0 صوت)

09-23-2010 09:24 PM
من تحدث في غير فنه أتى بالعجائب


#26223 [ود ناصر]
0.00/5 (0 صوت)

09-23-2010 12:54 PM
ياأستاذ جبرة كما قال من سبقني أرجو منك صادقاً ان لاتكتب في هذا المجال وخليك في سخريتك أحسن لأنو ده مجال إنت ماك قدرو
وتذكر أن القلم أمانة .
ولاتكتب بيدك غير شئ يسرك يوم القيامة أن تراه


#26216 [ود أمبعلو]
0.00/5 (0 صوت)

09-23-2010 12:40 PM
حاول علق بشكل مهذب


#26143 [samir ali almadani]
0.00/5 (0 صوت)

09-23-2010 09:04 AM
يا جبرا تعرف تقول الزهور والوردى الشتلوها جوه قلبى عشان حبيبى تذكاره ديمه عندى ..

تعرف نحن السودانيين شعب حضارى جداً ودايماً تلقانا فى صالات الوصول فى مطارات العالم نحمل باقات الزهور فى انتظار حبايبنا القادمين ,,, اوعند زياراتنا لمستشفيات الولاده خاصة والمستشفيات عامة ودى طبعاً لها آثارها الطيبة فى النفوس ... لكن عندنا واحد اخونا سودانى اصيل كان منوم فى المستشفى فى أبوظبى التى جاءها زائراً وعندما عاودته وجدته فى حالة من الغضب الشديد وهو يقول لى ناسكم ديل قايلنى تمثال الجندى المجهول كل واحد جايينى شايل ليه قش شجر ,, مايجيبوا لى حاجة فيها فايدة .;)


#26118 [شمالي]
0.00/5 (0 صوت)

09-23-2010 03:39 AM
يا عثمان
عطفاً على قولك: ما يدريك ان العلماء لا يتحدثون الى الحكام و ينصحوهم ؟ ام يجب ان يفعلوا ذلك في مؤتمرات صحفية ؟
فقط مجرد سؤال:
ما الشيء الذي تنزل رحمة بالعباد من جراء مناصحة العلماء للسلاطين حسب علمك؟
أرجو أن تضع في علمك أن البشير ذات نفسو سفه رأي هيئة علماء المسلمين حينما أفتت بعدم سفره للدوحة


#26094 [محمد الماحي]
0.00/5 (0 صوت)

09-23-2010 12:06 AM
ياأخي الفاتح الان في العيد الوطني اكبر شوراع الرياض موزينة بالورود والزهور بملايين الريالات عجبا


#26081 [م شكري]
0.00/5 (0 صوت)

09-22-2010 11:09 PM
يا جبرا
لو بس عاينت في الفتاوى الصادرة من اللجنة دي حا تلقى أنهم ما تركو شاردة ولا واردة من تعاملات الناس, إلا أفتوا فيها,
و بعدين الدين مافيهوا حاجات هايفة وحاجات كبيرة, كل علم يكتم العالم ربنا يسألو منو يوم القيامة.
والعالم مامحتاج يوريك كلما ينصح للسلطان أنو ماشي ينصح ليهو
وفي الحديث الرسول عليه الصلاة والسلام : من أراد أن ينصح لذي سلطان فلا يبدها علانية
يعني تتكلم معاهو يا جبرا على جنب كده بدون ما تنشر الموضوع كده
والعلماء في اللجنة الدائمة بالمملكة العربية السعودية عادي بيفصل من أعضاءها لإنهم ينصحون للسلطان, مش زي ما إنتا فاكر, وياريت قبل ما تتكلم فيهم تاني تعرف عنهم شوية.
يعني في بعضهم مات وماعنده غير بيت مأجر وكم سرير وجلسة أرضية
ومنهم الغني أيضا.
و يا (شيخنا) ممكن بالله تورينا رايك في الفتاوي دي لو سمحت:
- نهى رسول الله صلى الله عليه وسم عن تربية الكلاب إلا كلب حراسة وخارج المنزل
- الملائكة لا تدخل بيتا فيه كلب ولا صورة. (تحريم تعليق الصور في المنازل)
- نهى رسول الله صلى الله عليه وسم أن يقال للمتزوج بالرفاء و البنين (بيت مال وعيال)
و بالنسبة للزهور فالمقصود أن أي ذريعة قد تؤدي للإفتتان أو التقليد الأعمى قد أغلق بابها الشرع
و أخيرا من تحدث في غير فنه أتى بالعجائب


#26073 [حامدابوعبدالمجيد]
0.00/5 (0 صوت)

09-22-2010 09:44 PM
فاتحنا الساخر تحايا ليك
تعرف اى مقال بلم ملوك الريحه ودهن العود والفتاوى مش الهايفة هايفة وصفراء كمان بكيفنى للاخر الشايلين الاباريق والبخور كتار خلاص وكمان البشتتو الكوره يعنى واحد يطلع فتوى بانو الاضراب حرام ويسكت عن موضوع مشروع الجزيرة والتعاقد مع المصريين قيمة فتواه كم بالدولار وقع ليكم حملة الاباريق الفارغه يعنى الزول وصف الفتوى تحديدا بالهايفة واكتر من هايفة تعرفو الناس البيطلعو الفتوى الزى دى تلقاهو من ساسو لى راسو كل خدماته مجلوبة من بلاد الكفر حتى البمبرس بتاع اطفاله لماذا البمبرس حلال والزهور حرام تانى دايرين ترجعونا للمودودى والفكر بتاع العصر الحجرى اجيب ليكم البشير لابس الزهور دى هسع تصنو زى ماسكت القرضاوى عن موضوع الخمور فى كاس العالم لو قطر حتستضيفو زى مااستضافت القرضاوى واتحداه يطلع فتوى فى الموضوع قال زهور قال
.........تصبحوا على وطن


#26029 [طارق الطاهر]
0.00/5 (0 صوت)

09-22-2010 06:13 PM
أخي جبرا
عشان نظل نحبك ابتعد عن جانب الدين لأنه ليس مجالك
خليك في مقالاتك الساخرة وتظل كاتبنا المفضل وإذا ما عندك شيء تقولو بلاش تكتب
لأن كما قال من سبقني : كلمة هايفة ما تتناسب مع كلمة فتاوى
من افتى خطا يحاسبه الله أن قصد وان اجتهد ولم يصب فيغفر الله له


#26028 [ودالحوش]
0.00/5 (0 صوت)

09-22-2010 06:09 PM
صاحب التعليق الأول : لم يحالفك الحظ فى التعليق أو لم تفهم ما رمى إليه صاحب المقال .. هؤلاء علماء سلطان بفتون فى الزهور ولا يفتون فى كبائر الأمور أين فتواهم والقواعد العسكرية تنطلق من أمامهم لضرب إخوتنا فى العراق وأفغانستان ؟
والله إن حديث الاستاذ حق وما دونه باطل ياهذا


#26018 [سودانى ون]
0.00/5 (0 صوت)

09-22-2010 05:51 PM
الأستاذ المحترم/ الفاتح عليك أن تحترم أى فتوى دينية تصدر عن أى علم مسلم وليس الاستهزاء والتقليل من شأنها والاسلام دين متكامل وقد قال سيدنا أبوبكر حينما اشتدت الفتن على دولة المدينة والمرتدين والروم يتربصون بهم والله لو منعونى عقال بعير كانو يؤدونه لحاربتهم عليه..............وأنت الآن تطلق التنظيرات من خلف حاسوبك وجنب زوجتك ولا تدرى ماهى الخلفية التى صدرت بموجبها هذه الفتوى ..............وأخيرا فان دار الاسلام موجود ودار الكفر موجود وأى أحد يعلم ذلك حتى وان حاولت تمييع الأمر


#26007 [عثمان]
0.00/5 (0 صوت)

09-22-2010 05:12 PM
لعل من علل الزمن ان أي أحد يمكن ان يتحول ببساطة الى مفتي أو عالم.. خذ مثلا هذا المقال, الرجل توقف عن اضحاك الناس و نصب نفسهو عالما بما يجب الافتاء به و ما لا يجب !!! لا اعرف ماذا سيقول إذا علم ان الصحابى قال ان النبي عليه الصلاة والسلام حدثهم عن أي شيء حتى الخراء !!! ثم ما يدريك ان العلماء لا يتحدثون الى الحكام و ينصحوهم ؟ ام يجب ان يفعلوا ذلك في مؤتمرات صحفية ؟ و العجب الاكبر ان يدعي غيابهم أو سكوتهم عن مشاكل الناس اليومية !! و الله لا يكاد امر الى و اجتهدوا فيه و عملوا على اسداء النصح فيه, علم من علم و جهل من جهل.. ثم ان الفتوى تكون لي أحد سأل و رأى ان امر ما مهم بالنسبة له و ليس هايف كما تدعي, فاجتهد العالم و افتى حتى و ان زلل, و ان من شر الامور تتبع زلل العلماء.. أتعجب جدا من الكاتب استخدام كلمة هايف, و هل هناك اهيف من يتناطح رجلان راشيدان سويان في حنة عواطف ايهما وضعها قبل الاخر !!!


#25995 [عمر ]
0.00/5 (0 صوت)

09-22-2010 04:21 PM
استاذي
خليهم يكتروا من فتاويهم الغريبة والهايفة دي لحدي ما الناس تتجاوزهم وما تستعم ليهم ويكده يكون الشعوب الاسلامي تخلصت من احد قيود تخلفها


#25993 [عبد الله]
0.00/5 (0 صوت)

09-22-2010 04:20 PM
ليس لك من العلم ما يحمله ظفر هيئة كبار العلماء


#25921 [كتكوت]
0.00/5 (0 صوت)

09-22-2010 01:34 PM
هسع عليك الله فى زول شغال بى فتواهم دى ياعمك الناس جاااااااااااارية ورا لقمة العيش والعصر ذااتو اتغير . شنو الغنا حرام والسجاير والتمباك حرام وماعرف ايييييه

هل كل العلماء المسلمين متفقين على الفتوى دى !!!!!!

انا بفتكر انو اى فتوى ماتصدر الا بعد الاتفاق عليها من قبل كل العلماء المسلمين !! انت عارف دا معناهو شنو معناهو انو الى يوم يبعثون ما حتكون فى اى فتوى كان تحليل او تحريم والناس حتكون عايشة حياته مبسوووووووووووووطة


#25919 [عاطف]
0.00/5 (0 صوت)

09-22-2010 01:26 PM
يعنى انت عايز الناس دى تشترى الزهور وين القروش الحيشترو بيها الزهور انت ماعارف انو الفتوى دى من اجل المواطن الغلبان ال ماعندو حق الزهور عشان مايتحرج مع الناس الشايلا زهور وورود فى المستشفيات وين دفاعك للمواطن الغلبان


الفاتح يوسف جبرا
الفاتح يوسف جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة