الشعب عاوز شنو؟
06-05-2012 06:48 PM

الشعب عاوز شنو؟

عمر الفاروق عبد الله
[email protected]


الرسالة ملً من حكام وحكومة اخدت من وقته الكتير ونحن بطبعنا ملولين بس صابرين ولما صابرين دي كنا شتتنا ناس الانقاذ ديل من عصرن بدري لانه صابرين دي عاوز ليها جكة!

يحكمونا باسم الدين ونحن صابرين .. شعارهم لا لدنيا قد عملنا فنحن للدين فداء احذف لا النافية وشيل الفاء من فنحن وقدمها قبال لدنيا وخت للدين بين قوسين فتصبح نحن لدنيا قد عملنا جونا بشعار ناكل مما نزرع وحولوها لناكل مما نقلع فتكونت شلة من الفاسدين والمفسدين وتجار الدنيا والدين
قالوا لينا جينا نحافظ علي وحدة التراب فكالوا التراب في خشومنا وفرطوا في تلتة وفرتقوا تلتة التاني اما التلت التالت فلو ما لحقناه حنلقي نفسنا برة الشبكة
قدونا بثورة التعليم العالي فاصبحت مخرجاته اخير منها مخرجات الوسطي زمان زمن الزمن السمح!! وبالرد الرد كباري وسد اقولكم كلام عندنا هنا في سلطنة عمان مشاريع عملاقة جبارة تشيد وتقوم وتنتهي فلا حد بيفتح ولا احتفالات تقام ولا رئيسا بيرقص ولا طبالا بيطبل ولا ردن يطمن!!
شتتونا في بلاد الله حد كان متخيل السودانيين تلقاهم مثلا في الاسكا ام بردن يكتكت ولا مهاجرين في استراليا ولا باحثين عن ملجاً ومسكن وتأمين صحي في كندا ولا ضاقت بهم الارض فذهبوا لارض الميعاد هناك في اسرائيل للحد بمطالبتهم لقنصلية في سفارة اسرائيل بدولة الجنوب لرعاية مصالحهم!!

وهسي قرب الاحتفال بعيد الميلاد التالت والعشرون لثورة الانقاذ الفتية فماذا نحن فاعلون وماذا يريد الشعب؟

دايرين حرية كاملة غير منقوصة لكنها حرية مسئولة ودايرين حياة حرة كريمة تتوافر فيها الميمات الآتية:
مشرب .. ملبس .. مسكن .. مشفي .. مدرسة .. مزرعة .. مسنع .. مسرح .. ملعب
عدالة اجتماعية فيها يتساوي كل الناس لا فرق بين اوساغة واوهاج ولا أبونا في الكنيسة ولا عم الحاج إلا بالعمل والإنتاج.
عدالة لا نحد فيها محتاج لزكاة ينام فيها الوالي قرير العين هانيها.
ديمقراطية بيها نتحاور ونتناقش ونقول راينا ونحترم راي غيرنا وبيها نحاسب الفاسد والمفسد والفاشل والمقصر والراشي والمرتشي وكلهم في النار.

انتاج ولا شي غير الانتاج المصانع وقد تعالت مداخنها والمزارع وقد تصاعدت قناديلها والمراعي وقد تمددت اعشابها والشوارع وقد توسعت جوانبها.
دايرين سلام وامان في بلادي سلام في كل ربوع بلادي امان فالتصمت كل المدافع عن الدوي ولتتوقف الراجمات عن القذف والأنتينوف عن الفصف محافظة علي الدم السوداني الغالي في كل مكان.
ليعطي كل ذي حق حقه وكل مهمش دوره فدرالية حقيقية في كل ولاية حاكم وحكومة وبرلمان عن طريق الصندوق ولكل ولاية مشاريعها وآليات التخطيط والتنفيذ بعيدا عن سلطة المركز الذي لا يبقي له دور سوي التنسيق والاشراف والمحافظة علي السيادة الوطنية.
نريد وحدة في تنوع ونغني الذكريات ويا الفي الشروق ليك لحني قال قال ويا الفي غروب ليك شوقنا طال طال ويا في الجنوب حي الشمال وليعد الجنوب عزيزاً مكرما ليعود المليون ميل وطن شامخ.
مادايرين وصي علينا ولا تجار دين ييبعون لنا الدين شعارات وهم ابعد ما يكون عن شعاراته مادايرين كنشكة في الكراسي ولتكن كراسي من حديد لا يقوي الجالس عليها ان يحتمل اكتر من فترة واحدة تنتهي بانتهاء ولاية الرئيس المنتخب والمحاسب بواسطة الشعب ففترة رئاسية واحدة تكفي فنحن شعب نحب التغيير.

فهل نحن علي وعي بكل هذا وهل نحن علي استعداد علي التغيير من اجل هذا ام أنها أضغاث احلام؟؟؟؟؟؟؟




تعليقات 4 | إهداء 0 | زيارات 1005

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#385001 [الجـعـلى البعـدى يـومـو خنـق]
5.00/5 (1 صوت)

06-06-2012 02:05 AM
بسم ألله الرحمن الرحيم

المحترم الأخ عمر الفاروق السلام عليكم .. من ودمدنى السُـنى البارده والماطره ليلاً نُحييكم..

ماذا يُريد الشعب؟ سؤال فضفاض.. فالشعب يُريد إسقاط النظام يا(عُمر) هذا الشعار ظهر فى ربيعنا العربى.. فالازمات التى يشهدها المواطن كشفت عن ضحالة النظام ومايحويه من امراض اجتماعية ونفسية من الصعب أن نقف على عِلله التى اصبحت تُهدد البناء الاجتماعي للمواطن..

* فعندما نسمع كلام (البشير)نجده رجلُ لا يمتلك أىّ شىء من الثقافة والتحضر لا فى التعامل مع شعبهِ ولا فى الكلام الموجه عبر وسائل الإعلام فهو يُطلق عِبارات (لا)تليق بنا.. وكأنه لا يعى مايقوله ويفعله فالرجل يُحاول فى كل الطرق أن يُرضى ارهاصاته النفسية التى تُسَوغُ له(حُكم) شعبه.. يحاول أن يجد له مخرجاً من (لاهاى)..

* والسؤال هنا: ماذا يُريد الشعب؟ وماذا يُريد(البشير) ؟ فالشعب لا يُريد اسقاط النظام بل يحتاج الى من ياخذ بيده ليسقط النظام .. يُريد نظاماً يُوفر فرص العمل لابنائه.. يبني البلد ويطوره.. يزرع البسمة فى عيون الاطفال ويعطِ الامل للشيوخ بان ابنائهم واحفادهم سينعمون بالحياة الآمنة.. يحتاج ان يصحو على انغام الامل لا على صوت الرصاص والمدافع، أن يعيشوا بسلام مع جيرانهم..

الشعب يُريد أن يُحترم وتُحترم أرادته.. ان يكونوا أحراراً فى أراءهم ووجهات نظرهم وفى (راكوبتهم)أن يكتبوا هم تاريخهم أن يكون وطنهم بيتاً كبيراً لهم ولجميع ..أن لايُهَاجروا ويُهِجّروا..أن تكون دمائهم غاليةٌ.. ان يُسافروا الى كل مكان ولا تحجب جوازاتهم وتُصادر أملاكهم.. وأن تحترم خصوصيتهم أن لا تكون الرواتب (هِبةً) ومكرمه من (البشير)ونظامه.. يريد الشعب ان ينعم بثرواته.. أن يكون حراًفى إنتمائه الفكرى ..

اما (البشير) وأعوانه فيُريد شعباً ضعيفاً.. مسلوب الإرادة.. ينظر تحت قدمه..يقول(نعم)دوماً(للشجره) يرضى بكل ما يُرمى له من زاد.. لا يسأل ولايسمع ولا يرى.. ملابسه عسكرية وبيده البندقية ليحمى ويُشاهد الفضائيه السودانيه..

* البشير يُريده أن يؤمن بكل افكاره.. ويصفق له دوماً.. الايادى ممدود بالدعاء له أن يحفظه الله فهو الواهب المعطى.. ولا يتذمر شعبه إذا ضاق به العيش.. وزادت كيلة(العيش)وبقت ب 38ج..

* البشير يُريده أن تعلق صوره فى كل مكان وتمسح باستمرار كى تزداد بريقاً ولمعان قبل مغادرتهالى (لاهاى)فالعداله الدوليه كلامها مقدس.. فالشعب لا يُريد الثورة لغرض الثورة بل يريد تغيير السلوك والنهج الذى إعتاده عليه حُكام الاستبداد فى الديمقراطيات قصيرة الاجل.. لا نُريد إستبدال حاكم بآخر يزداد تُسلطاً بمرور الزمن.. فليس الشعب السودانى بأقل حال من الشعوب العربية التى تُصان حقوق مواطنيها وتُحترم..

* البشير يعرف جيداً انهم مخطئون عندما يسكنون القصور وشعبهم (عارى)أم فكو لا سقف له.. فعلى ماذا نتفق يا(عمر) وماذا يُريد الشعب السودانى.. أفيدونا أفادكم ألله ..


* الجـعـلى البعـدى يـومـو خنـق .. ودمـدنى السٌُــنى .. ألطـيب أهلها ..


#384800 [مستاء]
5.00/5 (2 صوت)

06-05-2012 07:46 PM
الدايره ده في السودان ما بيبقي يا خوي خلاص السودان عليه السلام نحن راجين بس ندفن ونتخارج نشوف لينا ارض تلمنا خلاص البلد لا تصلح ان نفكر فيها لاجيال تانية ممكن تمتد مننا وانت لو عندك خلف شوف ليك هجرة من بدري لوطن تربط لابنائك فيه صلة يعيشوا عليه شكلك عايش في غربة بعيدة من السودان الجماعة باعوا البلد شبر شبر وهم الحين بفكروا يبيعوا الشعب بس ما لاقين سوق صدقني لو الزمن زي زمن الرق وبيع العبيد كان بيع الشعب للامريكان والغربيين ليذهب بهم لحرث الاراضي الزراعية في القارات البعيدة حتي الحلم ده زاته مافي ليه طريقة تنفيذ صدقني انا الحين لو لقيته يكون لي احسن من الحال دي علي الاقل بعد كم سنة كده يتم تحرييرنا ونفكر نجيب جيل يشيل الاسم ويعيش حياة كريمة كما الزنوج في امريكا مستعدين ندفع حريتنا مقابل ان يعيش ابنائنا بكرامة بس دي كحلم ليست بالامكان مع وجود الجماعة ديل ......... مقالك رائع بس يشدنا شد نحو النحيب علي حالنا اليوم وحال البلد . انا السؤال اللي ما لاقي ليه جواب الجماعة ديل ما عندهم نظرة للجيل الجاي منهم هم خليك من نظرتهم لينا ابنائهم واحفادهم ديل بيتركوا ليهم شنو بالسياسات الراهنة دي ولا كلهم زي السيد الرئيس ما عندهم خلف ؟؟؟؟؟؟ علي شان كده ما عليهم بالجيل الجاي يلاقي سودان ولا يلاقي دخان .


ردود على مستاء
United States [ود غرب كردفان] 06-06-2012 06:23 AM
يا مستاء روق المنقة شوية وخليك من الاحباط الزايد دا... اتفاءل والله حيجي يوم تشوف انت براك.. بس ازرع التفاؤل جواك وفي غيرك ...بالشكل دا حتحبط كل الناس البتشوف انها وصلت الي نهاية هذا الظلم


#384785 [مصطفي حسن علي]
0.00/5 (0 صوت)

06-05-2012 07:31 PM
الصح يا استاذ شعارهم (لا لدنيا قد عملنا فنحن للدين فداء) احذف لا النافية وشيل الفاء من فداء حتي تصبح ( لدنيا قد عملنا فتحن للدين داء ) شوهوا الدين الله يهدينا ويهديهم وعبثوا بكل شئ واي شئ مقدور عليه الا افساد الانسان يحتاج لالاف السنين يحليل السمحيين الكرييمين ناس المروءة ده كان زمنا سمح بالحيل خربوه المتأسلميين الله يجازئ الكان السبب


#384757 [برانتود]
0.00/5 (0 صوت)

06-05-2012 07:04 PM
يا ريت ونتمنى ذلك ولكن هيهات طالما هناك اشخاص يهدمون ما يبنيه الاخرون سواء كان فى الحكومة او المعارضة


عمر الفاروق عبد الله
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة