أخير نسكت
06-06-2012 11:16 AM

أخير نسكت

الفاتح جبرا
[email protected]

تحدثت صحف الأمس عن الحيرة التي ضربت مواطني مدينة ود مدني أمس حيث عاشت يومها كله تتبادل الأسئلة عن هوية الطائرة التي حلقت في سماء المدينة قبل أن تهبط بميدان يلعب فيه بعض الصبية الكرة بحي (عووضة) وكانت دهشة الجمهور حين هبط طاقم الطائرة و(ركبوا ركشة) غاصت بهم داخل المدينة قبل أن تعود بهم (ذات الركشة) إلى طائرتهم والتي أقلعت مرة أخري (وكأنو ما حصلت حاجة) !
العبد لله وضع الخبر كما هو في موقعه على الفيس بوك www.facebook.com/alfatihgabra وإليكم بعضاً من تعليقات القراء :
• يكون المعلم قطع سير الأبنص وماشي يجيب (سفة) وجاي ... شيلو الصبر
• الميدان ده آخر محطة والبيت لى جوه فركبوا ركشة ... عادي يا شباب
• الجماعة ديل كانوا قاعدين الصباح في الحامية يفطروا قامت الشطة الخدرا نقصت فقالوا يمشوا يجازفوها من سوق مدني .. دي فيها حاجة؟
• والله أنا بفتكر إنو الجماعة ديل مشوا يجيبو زيادة .. بس زيادة شنو ... ما عارف !

• عادي يا جماعة الطيارة بتنزل في الواطة عاوزنها يعني تنزل وين ؟ وللا يعني تفضل معلقة في السماء؟
• يكونوا تعبوا من الطيران قالو نتمها ركشات سااااي فما تظلموهم يا جماعة !

• يكونوا بيجربوا في الرادار المنخفض يا ربي؟ا
• إن شاء الله بس الجمهور يكون شال نمرة الطيارة؟
• طبعا دي من ضمن الخطه الخمسيه بتاعتنا تشغيل طيارات ( مواصلات داخليه) بعد ما بقينا دوله نفطيه وبنصنع طيارات وكده !
• يكون ياربي دا (عوض الناظر) ومرتعوضية جابوهم راجعين ناس كوكب المريخ؟
• يكونوا زهجو من القعاد وجاهم وجع ضهر قالو نريح شوية ... النشوف اخرتا معاهم!
• تسعة صباحا دي الواطة كاشفة يعني لو كانت تسعة بالليل نقول احتمال الطيارة تكون (طافية نور) والوقت كمان (صلاة عشاء) بس وين المراقبة بالنظر ؟
• فتحوا عيونكم ديل كباااار عشان تكشفوا كويس وأي زول جنبو خور يعمل حسابو ما يطلع يوم يلقى ليهو غواصة واقفة وفيها مارينز أو قراصنة .
• يعني من المستحيل المواطن السوداني ده يكون نافع بي حاجه؟ وللا يقوم بي واجبو كامل؟ نحنا هسسسه دي في موضوع طيارات اسرائيل دي مش قلنا ليكم استخدمو النظر ؟ مش قلنا ليكم ركزووو كويس ؟ عشان نعرف نتصرف؟ اها يعني هسي نحنا نعرف الطياره دي تابعة لي منو ؟؟ الطيارات كتيره ومسيخه ما في زول شاف نمرتها كم ؟؟ عشان نعرفا ترخيص وين ولا موديلا موديل كم ساي؟ غايتو الما قدرت افهمو والمستغرب ليهو بتاع الركشه ده جا من وين فجأتن ؟ غايتو بتاعين الهيلكوبترات ديل بقو يعملوا ليهم في حركات عجيبه خلاص .. المهم الوصيه الاحنا بنقولا للمواطنين اي زول يشوف ليهو طياره وللا طبق طاير يحاول يعرف لينا اوصاف السواق أو حتى بالعدم شكل (الكمساري) عشان نحدد الجهة ونحتفظ (بحق الرد) .
• الحكاية ومافيها انو الخرطوم بقت زحمة والشوارع ضيقة والعربات كتيرة والناس ديل قررو ا يرفعو الدعم من المحروقات للعربات ( البتمشي (بالواطة ) ويكبوهو كلو كدعم لمحروقات ( الطيارات ) وده كلو عشان يقللو الضغط علي الشوارع وحاتكون تاني المواصلات ( هليكوبترات ) وبي محطات محددة يعني الطيارة تقوم من الموقف الجديد في خط الصحافة وتمشي تعمل كونيكشن في ( نادي الاسرة ) وتقوم تاني وتعمل كونيكشن في ( محطة الغالي ) لحدت ماتصل اخر محطة واللي هي ( الميناء البري ) وطبعا مافي حاجة اسمها ( قرصة) وللا ( نزلني هنا ) والدفع يا شاب قبل ماتركب عشان فوق ماتقول انا طالب وللا نازل قريب (الحنك ده) خلاص انسوهو وممنوع اكل التسالي والنبق والترمس وسف والتدخين وسف التمباك وبرضو تلتزمو بي اماكنكم يعني الحريم قدام والرجال ورا وشماعة ماااااااافي وممنوع فتح الشبابيك وطبعا في ناس بكونو متخوفين من الطيارات دي يعني تكون قديمة ولا مافيها نور وكده لكن احب اطمنكم انو الطيارات دي (منتهية الصلاحية) واهم حاااااااااااااااجة إنو فيها نورين نور طويل ونور قصير والمنشات بتاعتا شغالة (تش) ولساتكها ( تيوبليس ) ومكتوب عليها (هبوط متكرر) ،وطبعا اهم حاجة حاتكون أسعارا مناسبة وفي متناول الجميع وده كلو من اجل المواطن (الصابر) وحكاية(طيارة مدني) دي للمافهمنها انهم عاوزين يعملو ( تستا ) برة العاصمة قبل ماتعمم التجربة داخل العاصمة والمفأجاة انو المشروع ده ح يفتح فرص عمل لأنهم عاوزين 1000 كابتن طيار ( سواق سابقا ) و1000 مضيف ( كمساري سابقا ) وحايعملو ليهم تدريب قبل ماينزلوهم الخط...
• أنا بفتكر السبب الوحيد الممكن يخلي الطيارة دي تنزل في الحتة دي رغم خطورة المسألة إنو الطيار فجأتن سمع صوت (الكتينة) وخاف إنها تنقطع فقام عمل العملة المهببة دي .. وركب الركشة هو وجماعتو ومشوا المنطقة محلات الأسبيرات وجابو الكتينة وجو .. بس للأسف الشديد ما ممكن يكون ده السبب عشان مافي زول شاف الجماعة ديل لمن رجعوا بالركشة قامو (عفرتو) الطيارة (وغيرو الكتينة) ... الناس ديل ركبوا طوااالي وعملوا إقلاع !!!

كسرة :
جابت ليها نزول طيارات في الأحياء السكنية وكمان محل الأولاد بيلعبوا ؟ غايتو أخير نسكت ساكت وكت مافي زول ح يهببو لينا !

كسرة ثابتة :
أخبار خط هيثرو شنو(ووو ووو)؟





تعليقات 46 | إهداء 0 | زيارات 11500

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#386617 [فوّال]
0.00/5 (0 صوت)

06-07-2012 09:14 PM
يا جبرا
ده ما خط هيثروو الكايسين ليهو زاااتو. بعد خصم الزكاة والدعم طبعااما الركشة فهي تكسي المطار


#386472 [الشعب يريد اسقاط النظام]
0.00/5 (0 صوت)

06-07-2012 05:38 PM
يا بروف جبرا طبعا الجماعه النزلوا من الطياره وركبوا الركشه ديل ما شين لهم لفكي عشان اعمل ليهم رتينزا تدعم المحادثات الفي اديس وتحل ليهم هجليج المتشبك فيها سلفا دي وعشان مافي زول افضحهم ما جوا بعرباتهم الفارهه ركبوا ركشه يعني لزوم التمويه وكدي


#386392 [الصادق علي موسي]
0.00/5 (0 صوت)

06-07-2012 03:35 PM
كدا وزير دفاعنا بكون تأكد منرادار النظر ههههههههي لانو الشعب شاف طياره مدني


#386353 [المهدي]
0.00/5 (0 صوت)

06-07-2012 02:40 PM
في وفد رفيع المستوي حيزور مدني وطبعا اكيد للراحة والاستجمام حيزور بيت هناية لذلك جوا اخونا بتاعين الطيارة ومعهم صندوقين واقي ذكري تسلم هاند تو هاند لهناية وبالمناسبة الركشة حقت هناية والسايق الركشة ذاتو هناي....... يعني مهمة رسمية يا شباب


ردود على المهدي
United States [ود مدنى] 06-07-2012 07:19 PM
انت ذاتك هناي


#386091 [ود عويضة]
0.00/5 (0 صوت)

06-07-2012 10:31 AM
يا اخوانا الحكاية بسيطة - الطائرة تابعة للمافيا - وازيدكم علم النزلوا من الطائرة من القبارصة عندهم بضاعة وصلوها لرئيس شورى الجماعة- وهو بدوره سيقوم بتسويقها-انتو قايلين الماتوا فطايس سببهم ايه - ما الهباب دا


#386062 [..]
0.00/5 (0 صوت)

06-07-2012 10:11 AM
l


#386000 [دنقلاوووية والدناقلة يارسول الله]
0.00/5 (0 صوت)

06-07-2012 09:22 AM
اسرائيل بداها ببورسودان...وبعدها مدنى ...والطيارة التالتة فى الخرطوم...اصلو خطتها تلاتية..بس ياربى وييين فى الخرطوم؟؟؟...سجم تجار الاراضى المحوشيين ليهم قطع فى البكان الح يجى يضربو اسرائيل...لانو جماعة ديل بتحاشو ضرب المدنيين...يعنى ح ينشنو على الاراضى والمخططات الفاضية وبعدها سعرو ح يدرب الدلجة...وىىى بوووو


#385946 [شحاته]
0.00/5 (0 صوت)

06-07-2012 08:11 AM
يكون فى واحد عاوز يكبر الرخصه وبعدها يسوق دفار الحكومه


#385925 [صراحة]
5.00/5 (1 صوت)

06-07-2012 07:22 AM
يكون الطيار من مدني وقال أتجدع علي أولاد الحله شويه

لكن البكون أتجدع جد جد بتاع الركشه

طبعاً الميدان أسي بكون أسمه مطار عووضه

لكن دي بتكون عملت جنس كتاحة هههة

أتخيل واحد من الشفع ديل جرا البيت وقال لي أبوه الطيارة نزلت في الميدان وفي ناس نزلو منها ركبو ركشه

والأبو قال دووول في سرو ومسك الشافع جلدو



بالمناسبه انتو الطيارة فيها بوري؟


#385920 [صراحة]
4.50/5 (3 صوت)

06-07-2012 07:00 AM
ما فيها حاجة يا أخوانا

الطيار كان مزنوق

يرشكم من فوق يعني؟


#385873 [أدروب همد]
5.00/5 (1 صوت)

06-07-2012 02:27 AM
يا عم جبرا عليك الله (نفس معاك). البتاع غالي عندنا اليومين ديل ,
الوالي مهمد تاهر إستولي علي تجارة البتاع وغلي الصنف .


#385847 [رادونا]
0.00/5 (0 صوت)

06-07-2012 12:43 AM
الجماعة ديل يكونوا مشوا اخدو ودعماري ورجهوا ده كل تاموضوع


#385814 [أبو جديري]
0.00/5 (0 صوت)

06-06-2012 11:48 PM
السؤال المحيرني مش السوائل التي أحضروها بل: هل الناس الشهود متأكدين إنو الناس الرجعو للطيارة هم زاتم الناس المشوا منها؟ والا حصل تبادل مراكز؟! دي دايرة ليها مراقبة بالنظر!!!!!!!!


#385811 [اللاحس كوعه]
0.00/5 (0 صوت)

06-06-2012 11:46 PM
يعني دايرين الطيارة دي كيف تقدر على زقاقات مدني وبعدين لو كان الامريكان بفتخروا بارمسترونغ اول من مشى على سطح القمر نحن برضه بنفتخر بأول طيار ترك كابينةالطائرة ومباشرة ركب الركشة


#385788 [احمد الحارث]
0.00/5 (0 صوت)

06-06-2012 11:07 PM
واللة يا جبرة يا اخوي اذا كان دة حقيقة فهو راىع واذا خيال فهو اروع وممكن تحصل في السودان بلد هاملة ما عندها وجيع


#385782 [malhory]
0.00/5 (0 صوت)

06-06-2012 11:03 PM
كبرو اللفة


#385697 [Allord]
0.00/5 (0 صوت)

06-06-2012 08:43 PM
الطياره دي من الدماذين ماشه الخرطوم لكن الطيار من مدني .......... قال أتجدع شويه....


#385660 [كلك كلو]
5.00/5 (1 صوت)

06-06-2012 07:41 PM
الله يخارجنا... أنا عمري مافكرت أشيل عصاية في إيدي ولكن في الفترة الأخيرة فكرت وقلت الواحد يشتري كم عكاز كدا وكم سوط عنج لزوم الدفاع عن النفس بس يظهر الحكاية بقت حتى المدافع مابتقضي غرض لأنو الحكاية بقت جوية والواحد لازمو صاروخ ... بالله ياجبرا لو لقيت لي صاروخ في أي سوق حتى لو سكند هاند شوفو لي لأني أنا بعيد من العاصمة وأنتو هناك عندكم الدلالات وكدا فبالله ساعد صاحبك والله أنا بقيت صلاة الفجر مابقدر أمشي ليها من الخوف... غايتو ربك يستر.


#385645 [برانتود]
5.00/5 (1 صوت)

06-06-2012 07:10 PM
ما قالوا جايين بشتروا طعمية لانو واحد فيهم مراته متوحمة


#385630 [مجمد حمد]
0.00/5 (0 صوت)

06-06-2012 06:53 PM
بورسودان مدني الخرطوم جوه


#385629 [يايا كور]
0.00/5 (0 صوت)

06-06-2012 06:53 PM
بعد خلى كسرتك، اخبار خط عوضة شنو


#385568 [بت أمدرمان]
5.00/5 (1 صوت)

06-06-2012 05:45 PM
هههههه الشهر السادس يا عمو جبرة، لكن حقو تحولها ل: أخبار طيارة مدنى شنو؟ ، بس مقدما اقول ليك حتبقى زى 1300 واو كدة


#385507 [ياسر]
5.00/5 (1 صوت)

06-06-2012 04:10 PM
اخير تسكت شنو!!!!!

مواضيع الركوبة اليوم كلها عن الواقى الذكرى
ياريت تدى موضوع الواقى الذكرى او النسائى دا طله


ردود على ياسر
United States [مقهووووووووووووووووووور] 06-06-2012 05:55 PM
وجود الواقي الذكري في السوق دعوة للتعاقد مش كده يا ناس القانون


#385488 [حسون]
5.00/5 (1 صوت)

06-06-2012 03:48 PM
هم الشفع ديل بلعبو فى شارع الطيارات ليه


#385486 [زازووق]
5.00/5 (1 صوت)

06-06-2012 03:42 PM
غاب اب شنب (ابوريالة فى اديس)
ولعب اب ضنب!


ردود على زازووق
United States [لجل فنجلي] 06-06-2012 05:53 PM
غاب ابو ليالة ولعب ابو طيالة انا ما عندي حرف الراء افهموها


#385476 [عسكري متقاعد]
0.00/5 (0 صوت)

06-06-2012 03:30 PM
يا شباب ليه ما مشيتوا وراء الجماعة وعرفتوهم مشوا وين بالركشة
وليه ما سألتوا بتاع الركشة وداهم وين
وهل الناس ديل ولا سود عشان نحدد هويتهم
الفاتح الموضوع ده خيالي من بنات هيثريك اقصد افكارك


#385422 [mathew]
0.00/5 (0 صوت)

06-06-2012 02:17 PM
يا استاذ جبرا عشان ما تسأل عن خط هيثرو أهو فتحو ليك خط مدنى وعقبال القضارف و كسلا ﻷنه خط مدنى العائد بتاعو أكبر من خط هيثرو بعد الدولار أصبح 6 جنيه لأنه ما فى سودانى حيقدر يسافر أنجلترا· بعدين انت ماعارف إنه حكومتنا بقت حكومة تجار بعد ما وقع ليهم العطاء فى 2010. والمواصلات الداخلية حتكون بالركشا فقط بعد زيادة المحروقات.


#385415 [مستاء]
4.50/5 (3 صوت)

06-06-2012 02:12 PM
يا استاذ دي تدريبات للدفاع بالنظر ولا انت ما سمعت وزير الدفاع ز الظاهر الطيارة دي عملية تطبيق لاستراتيجية الدفاع بالنظر وتقوية الرادارات النظرية ليشارك كل الشعب في عملية التدريب


#385410 [mathew]
0.00/5 (0 صوت)

06-06-2012 02:07 PM
يا أستاذ جبرا عشان تبطل تسأل عن خط هيثرو فتحو ليك خط مدنى، مش أحسن من خط هيثرو لأنه ما فى سودانى تانى حيقدر يسافر لإنجلترا بعد ما الدولار بقى بى 6 جنيه، وطبعا إنت ما عارف زى أنا ماعارف إنه حكومتنا أصلها حكومة تجار بعد ما وقع ليهم العطاء فى 2010.


#385408 [سوداني موجوع على الوطن]
5.00/5 (1 صوت)

06-06-2012 02:06 PM
ما أحلى طلاتك يا مستر جبرا ....نطالب بركشات جوية و أمجادات برمائية لحل مشكلة المواصلات السرمدية في العاصمة العطشانة السودانية بقيادة النخبة الأسطورية ...


#385385 [الزول الكان سَمِحْ]
5.00/5 (1 صوت)

06-06-2012 01:42 PM
أستاذ جبرا

يمكن الركشة دى نزلوها بالبراشوت...عشان يقضوا بيها مشوارهم ويرجعوا لى طيارتم.

هى كويس ذاتا ماجات بالليل عشان ماتكون طافية نور وماتتشاف.

وأنا أظن..وليس كل الظن إثم..بأن الجماعة مشوا سلموا رسالة خطية( سرية) لوالى الجزيرة.عشان إنتو ناس الصحافة الأيامات دى لابدين ليهم فى كل صغيرة وكبيرة والواحد فيهم كان (...) يلاقى خبره مالى الصحف والمواقع الإلكترونية..


#385382 [Nader]
0.00/5 (0 صوت)

06-06-2012 01:40 PM
اوعك تقول شى اسكت بس لانه المحترم وزير دفاعنا ما زال يحتفظ بحق الرد وكمان حصريا ،،،،،،،، ارفع راسك انت مش عارف انت ايه ،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،، اخبار مطار الخرطوم الجديد شنوووو


ردود على Nader
United States [دلدوم] 06-06-2012 03:35 PM
محتفظ بحق الرد لمتين


#385350 [ابونصر]
5.00/5 (1 صوت)

06-06-2012 01:07 PM
التحية لك الاستاذ جبرا دائما تضحكنا وتنسينا مصائبا في زمن صارت المصيبة الكبري هم الذين يجلسون علص صدورنا منذ العام 1989 . بلاء ياخذهم من كبيرهم الي صغيرهم


#385346 [شوقى خليل]
5.00/5 (3 صوت)

06-06-2012 01:06 PM
والله ياجبرة ده زمن محن المشروع الحضار نتوقع اى حاجه على قول النكته واحد سأل صديقه

قال ليه أنته الثعلب ده بيلدى ولا بيبيض قال ده اتوقع منو اى حاجه وقيس على زالك

مع مودتى.


#385321 [مكتول هواك]
0.00/5 (0 صوت)

06-06-2012 12:38 PM
والله وبقينا بلد بتصنع طيارات --- اه يابلد ماعندك ............؟


#385319 [متلقي حجج]
4.00/5 (1 صوت)

06-06-2012 12:38 PM
بدون صورة للناس ديل لا يمكن لهذه الرواية أن تصبح خبرا، وهي تذكرني عندما كنا صغارا كانوا يخوفوننا من الذهاب لمناطق الزراعة ليلا وذلك لوجود (أب لمبة)وهو شيطان تعود التجول ليلا حاملا فانوسه (اتخيل شيطان ما قادر يشوف الا بي لمبة).. المهم عندما كبرنا اكتشفنا ان هذه الاشاعات كان يطلقها اصحاب مزارع البطيخ لتخويف (الشباب) من الهجوم على مزارعهم ليلا. بس زي ما قالوا الجماعة أغلب الظن أنها تكون طيارة (رش) والجماعة بيكون دايرين ليهم فول أو صعوط أو يمكن يكونوا قاطعين بنزين (أو أي سوائل أخرى)


ردود على متلقي حجج
United States [3Atel] 06-06-2012 02:40 PM
يا زول "اب لمبة" دة ما عامل لمبتو دى عشان يشوف بيها , دة عاملة عشان الزول البمرق بالليل يباريها ليك لمن يوصلو حلة الجن وعينك ما اشوف الا "الضلفة" والصباح القا روحو راقد لى فى كوشة.


#385308 [حمد]
0.00/5 (0 صوت)

06-06-2012 12:32 PM
ايوا عرفت ليك القصة ..تكون المكنة سخنت خلوها تبرد ..وعشان كدة دورو وطلعو طوالي ..!!!!!


#385304 [ubedallawd]
5.00/5 (2 صوت)

06-06-2012 12:28 PM
هههههههههه واللةعرفناهم ديل من يوم الجمعة افتشو في البصات الداخل والخارجة من مدني وكت مالقو حاجة قالو اشتغلوا طيران ودة كلة عشان ولد اخصائي التخدير القتلوة ناس الالزامية وشنقو في المزرعة


#385282 [ود البلد]
3.50/5 (2 صوت)

06-06-2012 12:11 PM
يا جبرا ياداقس ده ماياهوا الخط البتسال منوا زاااتوا حولهوا ليك من هثروا لعووضه مدنى.

عشان تبطل تانى من الليله الكسره الثابته بتاعتك دى.

لكن عجبتنى جدا التعليق بتاع ناس كوكب المريخ يكونوا رجعوا الناظر عوض وزوجته عوضيه لكوكب الارض تانى دى.


#385272 [abusabeeb]
5.00/5 (5 صوت)

06-06-2012 12:02 PM
الجماعة بعد تعب لقو بتاع الركشة الوصل الجماعة وسالوه وين وديتم قال مشو عبدالحق اشترو تمباك

دي مامشكلة المشكلة انو مادفعو حق المشوار وقالو ليه بنجي يوم الخميس خليك منتظرنا هنا

وخليكم ياناس مدني منتظرين يوم الخميس عشان يمكن تفهو حاجة

حسبنا الله ونعم الوكيل


#385267 [اوطان]
5.00/5 (1 صوت)

06-06-2012 11:58 AM
ياجبرا الجماعه ديل بكونو ناس الفلم الدرامى بتاع تحرير هجليج وقاموا حفزوهم عملوا ليهم ترحيل خاص يعنى عاااااااادى دوله متمكنه وكده


#385258 [fax]
5.00/5 (1 صوت)

06-06-2012 11:53 AM
عرفتوهاكيف طائرة؟ مش ممكن ده يكون صحن طائر واللي ركبوا الركشة هم كائنات من الفضاء مشوا جابوا ليهم فتة فول وكده؟؟؟


#385253 [الحقيقة]
5.00/5 (1 صوت)

06-06-2012 11:49 AM
اخير تسكت لانك ما شفت سواق العقيد البدور العربية ويشغل المكيف وينوم ويفطر ويتونس فيها لحدي المساء ودا والله اخطر من الطيارة دي لانو دا مالنا نحن

انا شفت الكلام دا والدم غلى قي عروقي لكن اسوي شنو اخير اسكت


#385248 [jaaah]
0.00/5 (0 صوت)

06-06-2012 11:45 AM
طيب
هسسسسسسسسسسسسسسسسسسسسسسسسسسسسسس


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة