يا خلف الله ما حيرتنا
06-09-2012 10:32 AM

يا خلف الله ما حيرتنا

الفاتج جبرا
[email protected]

تقول الطرفة المتداولة والتي حدثت وقائعها إبان الحكم (المايوي) أنه قد صدرت أوامر لحراس بوابات ميناء بورتسودان لتشديد الحراسة نسبة لسرقة عدد من (القندرانات) من داخل (حوش الجمارك) ، بعد إنتهاء عمله جاء (أدروب) طالع عبر البوابة وهو يحمل داخل جيبه (حقة سعوط) مانعة فإستوقفه الحارس قائلاً :
- يا زول أقيف وطلع الفي جيبك ده فقام (أدروب) بإخراج الحقة وأخد ليهو سفة مدنكلة ثم خاطب الحارس متهكماً :
- حقّه تشيف .. قندراني ما تشيف .
العبدلله يعتقد إعتقاداً راسخاً أننا ما وصلنا إلى ما نحن عليه وفيه من فقر ومسغبة وهوان وضيق لم يكن إلا بفعل تغاضي بعض مسئولينا (إن لم يكن كل) عن جسام الأمور ورؤيتهم وإنشغالهم وإلتفاتهم إلى صغارها !
ومن هؤلاء المسئولين النائب البرلماني دفع الله حسب الرسول والذي كنا قبل أسابيع قد أفردنا له مقالاً بعنوان (جابت ليها إستحياء) عندما صرح لأحدي الصحف بإنو (متزوج تلاته) وإنو أى راجل بلغ الستين من عمرو وماسك في مرا واحده حقو يستحي !! كما أردف قائلا في ذات الحوار (الراجل مصمم لأكتر من مرا واحدة) !
لنترك مسألة (التصميم دي) والإستحياء جانبا فقد تناولناهما في ذلك المقال المذكور إذ أن ما دفع العبدلله أن يعمل (كلاكيت تاني مرة) للنائب دفع الله حسب الرسول هو طلب الاحاطة الذي تقدم به العضو المحترم لوزير الصحة حول (جمعيات تنظيم الأسرة وسياسة إستخدام الواقي الذكري) والذي يعد مثالاً (لنكتة أدروب) حيث لا يري ممثل الشعب وحارس مكتسباته والمدافع عن حقوقه السيد دفع الله (قندراني الفقر والمسغبة) وما آل إليه حال المواطنين من بؤس وضياع جراء السياسات الإقتصادية المتهورة كما لم ير سعادته (قندراني الفساد) الذي عم البر والبحر و(الجو) الأقطان والتقاوى والحج والعمرة والأوقاف وصندوق تشغيل الخريجين وغير ذلك من فساد يزكم الأنوف ، كما أنه لم ير (قندراني) اختراق اسرائيل لأجواء السودان مرة بعد أخرى والطيارات البقت تدخل وتمرق سااااكت وقتلها للمواطنين الأبرياء والتى تكررت لخمس مرات، كما لم ير (قندراني) إضراب أساتذة جامعة الخرطوم عن العمل الذين لم يحصلوا على استحقاقاتهم المالية ، كما أنه لم ير أيضاً (قندراني) الاعتصام المفتوح عن الدراسة لطلاب الطب بجامعة التقانة والذي يهدد مستقبلهم ! كما أنه لم ير أيضاً (قندراني) إنعدام توفر الدم والصفائح والأدوية الكيميائية لأطفال السرطان ، كما أنه لم ير (قندراني) العطش الذي هدد ويهدد كثير من أحياء العاصمة بسبب القطوعات غير المعروفة ! كما أنه لم ير وهو عضو لجنة العلاقات الخارجية (قندراني) محادثات أديس وقضايا اقتسام النفط والحدود والجنسية كما لم ير أيضاً إحتلال أراضينا فى حلايب وشلاتين وأبورماد ورأس حدربة !
نعم عزيزي القارئ – النائب دفع الله حسب الله – لم ير كل هذا (الكنفوي) من (القندرانات) ولم يطالب بصفته عضوا برلمانياً بمثول أي مسئول من (القندرانات) التي سردناها أعلاه لكنة لحكمة يعلمها الله رأي (الحقة) اقصد (الواقي الذكري) وما يشكله من تهديد لأمن وسلامة وإستقرار هذه الأمة وليست عزيزي القارئ هذه هي المرة التى (يشيف) فيها (دفع الله) الحقة وما (يشيف) القندراني وعشان ما أكون زول بيتكلم ساكت إليكم بعض هذه (الحقق) التي تمكن (دفع الله) من رؤيتها بعد أن عددنا (القندرانيات) التي لم يراها :
• الختان الفرعوني حيث تبنى الدفاع عنه كما شدد على ضرورة ايقاف الورش والندوات التي تنادي بعدم ختان الاناث (!)
• دعا الي ايقاف بث برنامج اغاني واغاني الذي تبثه قناة النيل الأزرق في رمضان.
• ناشد الشركات الكبري بسحب صور النساء من الشوارع الرئيسة والاعلان للسلع والبضائع المختلفة بطريقة اسلامية (!)
• نصح الشباب بضرورة اكمال نصف الدين والتعدد في الزيجات التي تخرجهم من الفقر الي الغني (شباب مين يا عم الظاهر إنتا مش عايش معانا)؟
• قاد من داخل البرلمان حملة منع دخول المغنية المصرية شيرين للبلاد وهو يحمل ملصق الحفلة داخل البرلمان موزعًا إياه بين النواب حيث طالب بإقالة الوزير الذي سمح بإقامة الحفل، وكل الجهات التي منحت تراخيص إقامة الحفل (!)
• أوضح بان المغني زرياب كان سببا في سقوط الاندلس وكوكب الشرق ام كلثوم كانت سببا في هزيمة المصريين امام اليهود (تحليل عسكري فني وكده)!
• تصدى لمحاولة ايقاف شركة دى كى تى لمنعها من استعمال جهاز شفط الأجنة الميتة فى المستشفيات وخاصة مستشفى بحرى..الشركة وكما صرح وزير الصحة لها عقد مع وزارة الصحة وتمارس نشاطها بمهنية عالية بشهادة الوزير.

عزيزي القارئ إذا تتبعت مسيرة النائب البرلماني (دفع الله) بل ومعظم النواب تجدها دائما تشوف (الحقة) لكنها لا تري (القندران) وده شئ طبيعي فالبرلمان برلمان (حكومة) عشان كده الناس (مظلومة) !


كسرة:
يا دفع الله ما حيرتنا (واقي ذكري) تشيف خط هيثرو (ما تشيف) !

كسرة ثابتة :
أخبار خط هيثرةو شنو(ووو ووو)؟




تعليقات 49 | إهداء 0 | زيارات 11996

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#391860 [كوكى]
0.00/5 (0 صوت)

06-13-2012 04:47 PM
الزول ده تفكيروا كله من الصره و داون

قال الراجل مصمم لاكتر من مره

هو لو فى رجال كان انتو بتكونوا قاعدين لحد هسه


#389069 [Asim]
0.00/5 (0 صوت)

06-10-2012 10:29 PM
يا جبرة , الناس ديل عايشين في كوكب غير الكوكب العايشين فيهو نحنا .


#389011 [ali murtey]
0.00/5 (0 صوت)

06-10-2012 08:46 PM
اخبار كنز حلفا شنووووووووووو


#388986 [دايخ فى زمن بايخ]
0.00/5 (0 صوت)

06-10-2012 07:56 PM
هنالك مثل في غرب السودان يقول: (دبره في مورو جيبو حمار اكوه) والدبره هي عباره عن اصابه كبيره او جرح بالغ يصيب عادة ظهر الحمير وعلاجها الكى بالنار والمورو هو الاسد.يعنى (الدبره) دى يا(جبره) قاعده فى ضهر الاسد لكن الحينكوي بالنار هو الحمار مع انو الحمار ده ما عندو (دبره).
كمان النائب ده جابه حامضه عديل كده شايف الناس ديل بلهطو وبسرقو ويجى فى الاخير يقول الواقى الذكرى بحل جزء من مشكله السودان الاقتصاديه .
حسبي الله ونعم الوكيل


#388692 [ابو واصل]
0.00/5 (0 صوت)

06-10-2012 01:37 PM
لقد اسمعت ان ناديت حيا
ولكن لاحياة لمن تنادي

مثل هذا النائب لا ينتمي للبشريةإلا بشكله الخارجي ناهيك عن الانسانيةالتي ابعد ما يكون عنها


#388677 [ubedallawd]
5.00/5 (1 صوت)

06-10-2012 01:14 PM
ههههههههههههههه
يااتاذنا جبرة هذا الراجل لايري الا قندرانات الواقي الذكري وختان الاناث وزواج الشباب واللة انا اخشي اكون من الجماعة المسترين بلباس الدين وعايسين عوسهم
يادفع اللة ماحيرتنا انت قندران الاوقاف وعقدها السري ماتشوف؟


#388614 [ود البلد دى!!!!!!!!!!!!!!!]
0.00/5 (0 صوت)

06-10-2012 12:24 PM
الله عليك يا استاذنا... دة اسمو .ز ضرب فى المليان,, والله قبل اسبوع او اكتر,,, علقت على مقال بخصوص هذا النائب واتذكر اننى قلت له .... لو راجل وود رجال صح... قول للحكومة فى فساد وفى محسوبيه وفى اقصاء للاخر وانو معظم الوزراء مفروض يمشو بيوتهم... هو مش نائب وعامل فيها وطنى وتفتيحة وكدة... يلا ما يمكسك العصاية من النص ويكمل دورو للاخر .. لانو ممثل الشعب والقوى الامين وكدة... تعرف يا ابو جبرة.ز جنس ديل زاتهم الموديننا التوج وما بعييييييييييد يودونا الخور وعما قرريب.ز لانهم بخلو الفيل وبطعنو فى ضلو..


اهنيك استاذى الفاح انت الاوحد الذى تطرق وبعنف فى دهاليز حياتنا ولا تخاف.


#388611 [معتز]
0.00/5 (0 صوت)

06-10-2012 12:21 PM
يا الفاتح يا اخوي الشعب السوداني كلو بفى زي دفع الله ده على طول الخط عاملين نايميين البتصحيهم ما عرفنا !!!!


#388600 [سودانى مستاء جدا من النائب الفحل]
0.00/5 (0 صوت)

06-10-2012 12:09 PM
والله يا استاذنا جبرة دايما دايما بتجينى فى جرح, إذا دى كانت عينة النوّاب المرزوعين فى البرلمان وقال بيمثلوا الشعب السودانى...هل تفتكر لسة مفروض علينا نحتفظ بالأمل فى تغيير بلدنا للأحسن؟ والله أنا خايف أولاد أولادى ما يحضروا اليوم دة, كلامك كلو صاح لكن هل من مستجيب؟ يعنى أولياء الأمر ديل ما بيقروا جرايد ولا شنو؟ بينى وبينك...يكون ماخدين مواضيعك كنوع من التسلية وهنا المصيبة الأعظم. حسبى الله ونعم الوكيل...خسارة والله نكون بالتخلف ده.


#388517 [بت ام الحسن]
0.00/5 (0 صوت)

06-10-2012 11:18 AM
وبستوردو كمان فى الكندمات واجهزة الشفط فى ظروف البلد كان شافت الدولار فيها ح تشوفو قدر الطشت...اشفطكم الله من على وجه البسيطة انشاء الله


#388503 [ام الحسن]
0.00/5 (0 صوت)

06-10-2012 11:07 AM
دفع الله ده بنطبق عليهو المثل البقول الطويل جهلو وااا شقاوة اهلو...اهلو الكيزان طبعن


#388481 [رضوان الصادق]
0.00/5 (0 صوت)

06-10-2012 10:48 AM
والله نخاف بكره البر لمان حقهم يسن قانون زي الصين كم نخلف ياخي غاتو ناس ماعندهم اي فهم
(الصادق) قدانا في التلفزيون في العادات الضاره (هم العادات الضارة الزاتا


#388461 [jaaah]
0.00/5 (0 صوت)

06-10-2012 10:34 AM
من فكر في ذكره الله نكره


#388412 [Heron]
0.00/5 (0 صوت)

06-10-2012 10:01 AM
يا ناس والله البلد خربت خلاص .


#388304 [الجـعـلى البعـدى يـومـو خنـق]
0.00/5 (0 صوت)

06-10-2012 07:42 AM
يا خلف ألله ود عمنا (جبرا) ما أضحكتنا وأفرحتنا.. سؤال عاجل ..هل زوجه (واحده) تكفى؟ برغم(التصميم)السودانى فنحنُ من أهل المخافه(فإن خفتم ألا تعدلوا فواحدة).. واحد قال لى ساخراً (كيزان) البلد دى يحبون فى كِتاب ألله إثنتين سورتى ( النساء) و (الدخان) .. أو كـمـا قـال ...


* قِيل لأعرابى من لم يتزوج بإثنتين لم يذق (حلاوة) العيش فتزوج بإثنتين وندم أشد الندم فأنشد يقول ..

* تزوجت من فرط جهلى بما يشقى به زوج إثنتين
* فقلت اصير بينهما خروفاً أُنعـُم بين اكرم نعجتين
فصرتً كنعجةٍِ تُضحى وتُمسى تُداول بين (أخبث) ذِئبتين
رضا هذى يُهيّج سخط هذى فما أعرى من إحدى السُّخطتين
وألقى فى المعيشةِ كُلَّ ضُـرَّ كذاك الضُّرُّ بين الضُرّتين .. أو كـمـا قـال ...


* الجـعـلى البعـدى يـومـو خنـق .. شكراً لجبرا ..


#388277 [KHIDER]
0.00/5 (0 صوت)

06-10-2012 05:29 AM
ايام حكم نميرى حكم على ادروب حكم جاير بالسجن والغرامة والجلد ادروب قال للقاضى أنت ما تعرف أنا أقول ليك اول الجلد مانقدر ميلاريا عندنا غرامة انت تعرف الحالة اليوم فطور ما فطرنا قاطعه القاضى وقال ليه طيب السجن كيف معاك رد ادروب اها برا نحن ما فيقين عندنا زراعة
يا خونا جبرا العضو دفع ثلاثى كما سماه HAMID وأنا اسميه دفع رباعى 3 نسوان + عربية برادو وكليهم يمتطى بيعرض فى دلوكة براه ومنتشى ما ديل الأقزام البيحكموننا وقيس على ذلك


#388217 [خليل محمود]
0.00/5 (0 صوت)

06-10-2012 01:23 AM
اذا كان البشير وهو رأس الدولة يتكلم ويصرح بتصريحات مثل اطفال الروضة فكيف يكون من معه


#388213 [majnoon Nada Algalaa]
0.00/5 (0 صوت)

06-10-2012 01:15 AM
This man has always talking in trivial things turning blind eye on what is priority and pressing ' I remember weeks ago he said the uncircumcised girl are fetid ( meaning that their sexual organs are extremely of unpleasant smell) . I am really surprised is this man sane , if so what he used to say is like adolescent lad . I wish somebody of his parliament bring him to reason . ( Poor my country which has been plagued by those mentally perverted people )


#388212 [خليل محمود]
0.00/5 (0 صوت)

06-10-2012 01:15 AM
لقد اوفيت وكفيت فبارك الله فيك لقد اصبح سياسة الحقة هذه سمة سائدة في السودان ونسأل الله ان يعيد السودان الي سابق عهده قبل انقاذه


#388203 [الشفت]
0.00/5 (0 صوت)

06-10-2012 12:55 AM
خايف البت الصغيرة المعرسه تعمل علاقة مع شاب وتستخدم الواقي خاصة انها في الجامعة كان عندها جكس وكدة الا نفتو يعني


#388200 [hamid]
0.00/5 (0 صوت)

06-10-2012 12:46 AM
نحن الأدروبات سنقوم برفع ضد المدعو الأستاذ الفاتح لأنه شبهناا بالسيد دفع ثلاثي حسب الظروف و سنطالب بتعويض يساوي ثمن خط هيثرو زائدا مجمل تكاليف مباني وزارة الدفاع لأننا مجموعة. فالسيد دفع ثلاثي يأتي لينام في البرلمان لمشغولياته الكثيرة ليلاً و يستيقظ مذعورا أثناء الجلسات و ليثبت صحوته و إنتباهه يتحدث عن ما كان يحدث في أحلامه


#388195 [صباع أمير]
0.00/5 (0 صوت)

06-10-2012 12:37 AM
راااااااااااااااااااااااااااااااااااااائع ..


#388188 [mohammad saad]
0.00/5 (0 صوت)

06-10-2012 12:23 AM
المصري قال لأبوه "يا بوي شرفني" أبوه قال له "لما يموت الي بيعرفني"


#388164 [عادل ابراهيم]
0.00/5 (0 صوت)

06-09-2012 11:37 PM
يا جيرة ما امتعتنا خط هيثروا ناقص. واو.
أنا زاتي ما عارف عن خط هيثرو كتير لكن شيفت ناقص واو


#388105 [Allord]
0.00/5 (0 صوت)

06-09-2012 10:09 PM
عند أهلنا مثل بيقول ( ألماسكنه من قلقاته ما بجابد )وشكله نائبنا ممسوك ياأستاذ..............


#388034 [moro]
0.00/5 (0 صوت)

06-09-2012 07:42 PM
الهم لا نسألك رد القضاء ولكن نسالك اللطف فيه


#388003 [radona-d]
0.00/5 (0 صوت)

06-09-2012 06:51 PM
هو حكاية خط هيثرو دي شنو
ثم هي ذاتها وين سودانير
افترض انه رجعوا ليك خط هيثرو تمشيهو بشنو


#387981 [ربش]
5.00/5 (1 صوت)

06-09-2012 06:19 PM
ديل خليناهم لي الله ... بالسرطان الليهري بدنم و يصيبهم في العصب و الشوف .


#387954 [بت الخرطوم]
3.25/5 (3 صوت)

06-09-2012 05:27 PM
كدا يا أستاذنا جبرا عشان ما نظلم الزول دا ساى نسأل ناس الدائرة الريف الغربى امدرمان(فتاشة وما حولها)عن انجازاته فى الدائرة عسى ولعل نجد ما يشفع ليهو من اعمال تخلينا نغض البصر عن شطخاته الفقعت مررتنا ورفعت ضغطنا وموتتنا دماغيا اها يا اخوتى بالراكوبة فرع الريف الغربى فتاشة وما حولها ادونا ابداعاته فى الدائرة انشاءالله لو شجيرة تذكركم بالاشجار الثمانية الكذب والخدع والنفاق والفساد والسرقة والفتاوى المضروبة والشهادات المزورة والزواج العرفى والمسيار وما أخفى اعظم كسسسسسسسسسسسسسسسسسسسسسسسسسرة اخبار دعم الراداد شنو


#387923 [زازووق]
4.94/5 (5 صوت)

06-09-2012 04:49 PM
هجليج تشيف هلايب ما تشيف!!!!!!


ردود على زازووق
United States [بت الداية] 06-10-2012 01:41 AM
هجليج فايدة تشيف .. هلايب فايدة ما تشيف


#387918 [خالد]
0.00/5 (0 صوت)

06-09-2012 04:42 PM
القندراني دة يشوفو بي وين بس الحقة اقصد الكيس هو غرقان فيهو لى اضنينو اللهم لا نسالك رد القضاء لكن نسألك اللطف فية


#387892 [انسان]
0.00/5 (0 صوت)

06-09-2012 04:04 PM
ياابوجبرا برضو صاحبنا اخير من الباقين نايمين قابضين مرتباتم كل شهر يعني الراجل برضو كتر خيرو


#387882 [عوض محمد احمد]
4.50/5 (3 صوت)

06-09-2012 04:00 PM
اخى الفاتح لا ندرى هل نضحك ام نبكى حال بلادنا اذا كان هولاء عينه بسيطه ممن تولى امر قيادة هذه البلاد المغلوبه على امرها - طائرات تدخل وتضرب وتقتل وترجع فى حفظ الله ورعايته ، ولا تكتشف الا بعد ان ترجع الطائرات سالمه غانمه - لا وزير يستقيل ولا يقال - سبحان مقسم الوزارات- خط يتباع وفلوس تنهب ولا احد يقول تلت التلاتهةكم - اما صاحبنا ده زول بتاع فارغه ساكت مالا قيليه موضوع عشان يتداول اسمه عشان بكره يلقاليه وزاره - ودى مابعيده- احسن حاجه واحد ذى ده الناس تتجاهله لانه الحريم فوتن مخه - وربما الفايقره ومجموعة المقويات الاخرى قدمت كهربته ومابعيد بكره تلقاه فى صينيه - ده اذا فضلت صوانى - اما اخبار خط هيثرو والاقطان والحج والاوقاف وووووووووووو فهذه ستدرس للاجيال القادمه - ده اذا فى اجيال قادمه - سلملى على البتنجان وقال حايذيدوا اسعار المحروقات وحاينقصوا عدد الوزراء - لوناقصوا تعال قابلنى


#387869 [أكتر واحد مستغرب]
3.50/5 (3 صوت)

06-09-2012 03:38 PM
اسمو دفع حسب الرسول..
ليهو حق وكل مداخلاتو بين واقي وصورة النساء في الا علانات وحفلة شيرين وختان الاناث وتنظيم الاسرة ومثنى وثلاث وجهاز الشفط اليدوي ونصف الدين ونسف ال...............
الزول يستاهل يبقى {{ وزير داخلية}} :) :)


#387819 [مستاء]
4.94/5 (5 صوت)

06-09-2012 02:50 PM
يا خوي واقي شنو وطمبور شنو نحن دايرين واقي لحركة المعدة الخاوية وناس المجلس ديل خليهم في حالهم ديل نحن علمنا ما حصلهم وبالاحري تدينا لسع ما وصل مراتبهم العليا . الاهم اليومين ديل لقمة العيش اللي نقتاتها في اليوم مرة واحده تتكون من عناصر رخيصة اهم ما فيها الماجي بل هو المستدام فيها خايفين بكره يلتفت عليه واحد من النافذين ويبقي في العلالي نامل من من يخافون الله من التجار التكرم بتوفيره باسعاره ثابته واعداد وفيرة لانو العصرة باين عليه ماشي للزيت عديل والجاي اسوء من الذي مضي . وخليكم من الواقي وجهاز الشفط الداير يشفط يوفر القيمة والداير واقي يوفر القيمة وفي العدم يستعمله لاكثر من مرة بس المعده دي نعمل ليها ايه . استاذنا وانت حكيم زمانك كلمنا عن مراحل تطور الوجبة السودانية بين الانقاذ والاستعمار الانجليزي


#387809 [ATIF]
0.00/5 (0 صوت)

06-09-2012 02:40 PM
صدقوا مره مشيت لصيدليه في مدني والكلام ده في عام 2004 وطلبت منه واقي ذكري فرفض وقال لي اتقي الله , وانا الحمد لله متزوج وعايش بره السودان وكنته عايز الوقي لغرض التنظيم


#387777 [ابويحيى]
0.00/5 (0 صوت)

06-09-2012 01:51 PM
الاستاذ جبر هذه هى شاكلة اهل الانقاذ ومحدودية افكارهم وانمعدام البصر والبصيره اذا كان البشير ومن خلال خطاباته المفتوحه مع الجماهير بهذه العقليه وكذلك نافة وبقية ال 99 حرامى فماذا تتوقع من هؤلائلى النواب فعلى قدر اهل العزم تأتى العزائم 0


#387771 [شحاته]
5.00/5 (4 صوت)

06-09-2012 01:45 PM
الاستاذ الراتئع جبرا بقولوا الفيك بدربو والعليك اتناسا ديل اهلنا فى السودان اما المثل العربى بقول كل اناء بما فيه بنضح الراجل ده يكون رايحه ليه حاجه عشان كده كل اهنمامه بالمسائل التى لها علاقه بالجنس فيبدو انه طايره ليه فى راسه وبيشكل هاجسه الاساسى فى الحياه فرجل بتلك الهواجس قطع شك مريض وجيمرضنا معاه


#387761 [فلانة]
1.00/5 (1 صوت)

06-09-2012 01:38 PM
كلامك عن كل (الحقق) و (القندرانات) صاح، لكن يبدو ما هيج (نحلك) على النائب دا، أنو كلامو كان في اللحم (الحي)، وانت شفت الزول دا قاصدك عديل كدا.. الستين وصلتها، وتاني حاجة ما عندك طريقة (حتى مجرد) تفكير، أو تجيب سيرة عرس علي لسانك .. دا كان يقطعو ليك من لغاليغو .. يعنى معذور في (افرادك) أكثر من عمود للراجل (المخرف) دا !!


#387729 [ود عويضة]
0.00/5 (0 صوت)

06-09-2012 01:01 PM
الراجل جزء من شبكة من الجماعة تروج لمنتجات جنسية بصورة غير مباشرة وهي التي ادخلت في الاسواق الفياغرا المضروبة وقد ادت الى وفاة الكثيرين - ولا استبعد ان تكون هذه الجماعة التي تتدثر بلباس الدين ان تكون جزء من حركة الماسونية العالمية- فافعالهم تدل على ذلك


#387713 [Abu Hadi]
5.00/5 (1 صوت)

06-09-2012 12:43 PM
يا استاذ دفع الله هذا ما عنده شغله ولا يملك نظرة بعيدة المدى فقط نظره قصير المدى (اذا كان في اصلاً) يضحك ويصفق هو ومن معه عند زيادة اسعار السكر ويدافع عن مخصصات الاعضاء ولكنهم لا يرون ان هنالك شخص واحد فقط لا يتناول وجبيتن في اليوم (طبعاً دكوة بالملح) ويتناول هذا في القضايا الاقل !!! وكأنه وصي !! (فقط على الحفلات والواقي الذكري )..

كمان انضمت اليه الدكتور سعاد الفاتح!! اي ضميرها صحى بعد ثلاثة وعشرين عاماً !! سبحان الله .. وهي التي تمرغت في نعمة الداخليات المجانية واكل شبيه بأكل فنادق تسعة نجوم في الجامعة...واولادها ينعمون في الدنيا الفانية بمال الشعب المسكين .. واذا افترضنا انها مسئولة امام الله عن هذا الشعب الطيب فماذا ستقول للخالق عن الثلاثة وعشرين عاماً لم تنطق فيها بحرف؟؟؟
تتحدث عن الداخليات وهم من كانوا وراء الغاء مجانية التعليم والصحة!!!! سبحان ربي ..

ربنا موجود ...


#387656 [أبو ناهد]
4.69/5 (5 صوت)

06-09-2012 11:55 AM
يحلنا الله من ناس دفع الله


#387630 [سامر المدنى]
5.00/5 (2 صوت)

06-09-2012 11:32 AM
اشوووفك بكره فى الموعد,,, والواقى الذكلاى ده كل زول نصيبه قدر كيف ؟ بالقطعة والا بالدستة والا بالصندوق ؟ وهل فى تصديق أو ترخيص بالاستعمال عند اللزوم والا كيف ؟ ياناس شوية شوية علشان نفهمحاجة لأننا ماناقشين حاجة


#387597 [عبدالله]
5.00/5 (4 صوت)

06-09-2012 11:07 AM
وانا معاك يادفع الله ودحسب الرسول نائب دائرة الريف الغربى من ام درمان (فتاشة وما حولها) واقى زكرى تشوف وعطش فتاشة ( وانت متجرعه ) ما تشوف


الفاتج جبرا
الفاتج جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة