فن التدبير في الواقع المرير
06-16-2012 10:17 PM

فن التدبير في الواقع المرير

ألفاتح جبرا
[email protected]

عزيزي المواطن مهدود الدخل .. أو بالأصح (معدوم) الدخل .. لا عليك أن صار كيلو الطماطم 15 جنيه أو البصلة الوااحدة 2 جنيه او كيلو اللحم بي 40 جنيه .. أو الليمونة بي جنيه ..لا عيك إن إرتفعت أسعار السلع الأساسية والما أساسية (كمان) فهنالك الكثير من الحلول والابتكارات التي عكف العبدلله على وضعها وتقديمها لك في كتاب بعنوان ( فن التدبير في الواقع المرير) ها أنذا أقتطف لكم بعضاً منها وأؤكد لكم أن من شأنها أن تعينكم على البقاء أحياء (حتي اليوم الثامن من الشهر) والباقي (إتصرفو وكده) !.

(1) التوم :
التجهيز : يتم دق الثوم ناعماً ووضعه داخل علبة مصمته لعدة أيام
طريقة الإستخدام : تفتخ علبة الثوم أمام فوهة (الحلة) لتنداح منها رائحته على الملاح مباشرة
تحذير : يجب أن تكون العلبه موجهة لفوهة الحلة بدرجة حاده حتي لا يندلق الثوم داخل الحلة والميزانية تبوظ
تنبية : بعد الإستخدام تأكد من أقفال العلبة بشكل محكم حتى لا يتسرب (غاز الثوم) من العلبة
وتكون الطبخة الجاية من غير توم !

(2) البصل :
التجهيز : يتم إزالة طبقة خارجية وااااحده عن البصلة ، بإستخدام إبرة وخيط قم بإدخال الإبرة في منتصف البصلة واجعل الخيط يتدلي منها ، قم بعمل خرم صغير في منتصف غطاء الحلة
طريقة الإستخدام : إدخل طرف الخيط داخل الخرم الذى في غطاء الحلة ثم أعقده لتصبح البصلة متدلية داخل الحلة ثم قم بقفل الحلة بإحكام حتى تتسبك رائحة البصلة مع محتويات الحلة .
تحذير : تأكد من أن البصلة المتدلية لا تلامس محتويات الحلة حتي لا (تتهربد) مع المحتويات وحقك يروح
تنبية : بعد إكتمال الطهي تأكد من فك الخيط ووضع البصلة داخل علبة وتأكد من أقفالها جيداً حتى تتمكن من استخدامها طوال الشهر .

معجون الاسنان (3)

- أمسك المعجون باليد اليسري بعد أن تقوم بفتحة
-أمسك الفرشاة بيدك اليمنى
-قم بتمرير رأس الفرشاة على فتحة صباع المعجون لمدة 20 ثانية
-(تسوك على بركة الله)
- تنبيه ؛ لا تنسي أن تغسل الفرشاة بعد الإستخدام للتخلص من بقايا المعجون (ههههه) !!

(4) الأحذية :

- قم بإحضار (جوز) من قارورة مياه معدنية فارغة (موبايل) للذين يرتدون مقاس 39-41 أو(فاميلي سايز) لمن مقاساتهم أكبر
- قم بواسطة المقص بقطع الجزء المسلوب الذي يلي رأس القارورة
- قم بقطع القارورة طولياً إلى نصفين متساويين على مقاسك
- أقلب نص القارورة المفتوح إلى أعلى ثم ضع رجلك داخلها بعد ربطها بخيط قوى ويلا أكسح على بركة الله
- لو الواطة سخنت يمكنك وضع (قطعة قماش قديم) كأرضية تحت الرجل مباشرة وكان المسألة (سخنت أكتر) يمكنك رش بعض الماء عليه للتبريد وكده !

تحذير :

تأكد من وضع الحذاء في مكان آمن عند دخولك إلى المسجد حتى لا يسرق !

(5) السفة

- قم بشراءعدد 2 كيس بلاستك (فاضي) ذي (تخانة) تجعل محتوياته نحتفظ بالرطوبة
- أكتب بقلم الشينى على الأول (الجديد) وعلى ظهر الكيس الثاني (الراجع)
- بعد أن ينتهي مفعول (السفة) قم بدردمتها ووضعها في كيس الراجع ثم تأكد من إقفال الكيس جيداً منعا من دخول الهواء وحتى تحتفظ السفة بحيويتها وموادها (المسرطنة)
- كرر هذه العملية حتى (يكمل) التمباك الذي في الكيس الجديد وعندها قم بإفراغ (التمباك) الذي بداخل كيس (الراجع) في (الكيس الجديد) ! لتبدأ الدورة الثانية فالثالثة وهلم جراً حتي يتحلل (التمباك) إلى عوامله الأوليه وعندها أحتفظ به في حرز أمين فالظروف ما معروفة إحتمال يكون في رفع دعم تااااااني !!

(6) العلاج :

- توجه إلى التيمان وقم شراء الآتي وضعه في صيدليتك العائلية :
- شوية زيت سمسم+حبة قرض+حبة كمون+شوية عسل+شوية حبة سوداء +شوية حرجل
- لا تنس أن تسأل (العشاب) عن طرق الإستعمال والجرعات وبلاش تسألو عن (الأعراض الجانبية) لأنها مش ح تكون أسوأ من النحنا فيهو ده

(7) المواصلات :

- وبمناسبة ﺯﻳﺎﺩﻩ ﺗﻌﺮﻓﻪ ﺍﻟﻤﻮﺍﺻﻼﺕ أرسل لي أحد القراءهذا الإعلان :
تعلن شركة (كداري ولا نقوم سداري) عن وصول حمير جميع المقاسات والموديلات صنعت وصممت لتلائم أجواء السودان وذلك بالمواصفات التالية :

- إقتصادية في إستهلاك الغذاء (قصب برسيم عيش ناشف أبو سبعين أبو مليون أبو أي حاجة في أي حتة)
- مدربة على تفادي الحفر والطبات الماليه البلد
- قوة 10 عجلة (دبل) مقاس 26( ما تخاف بتطلع الكبري عادي)
- دفع رباعي وتعشيقة متعددة المهام (أضان شمال يمين ، إشارات جنب ، ضنب خلف)
تنبيه : توجد إكسسوارات (كاتم صوت) و(بامبرز) عشان بتاعين (النفايات) وكده
أيها المواطن سارع بإقتناء حمارك الآن عشان الجماعة لو شموا الخبر ده ح يمنعوا إستيراد الحمير إلا (موديل السنو) و يعملو رسوم (فرق موديل) وكده

كسرة :
نشتري حمير ليه؟ ما نحنا أهو ما شاء الله حمير (فل أوبشن) وبنتحمل ده كوووولو !!

كسرة ثابتة :
أخبار خط هيثرو شنو(ووو ووو)؟



تعليقات 35 | إهداء 1 | زيارات 11091

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#395927 [رضا الخطيب]
0.00/5 (0 صوت)

06-18-2012 11:26 AM
وحمير ليه يا جبرا ما نركب لينا جمل من الجمال الكثيرة الحايمة في الخرطوم دي


#395599 [radona]
2.00/5 (1 صوت)

06-18-2012 12:02 AM
فكرت في اقتناء حمار بدلا من السيارة (كارته بالمصري) ولكن فشلت دراسة الجدوى نسبة للاتي
غلاء البرسيم وابو70 لارتفاع الدولار بما ان الدخن يعتبر سلعة استفزازية
الخوف من مصايد المرور لعدم الترخيص
عدم موافقة الاسرة ربط الحمار في البيت لعدة اسباب تزرعوا بها
الخوف من الحرامية ادا مشيت مكان اربط الحمار واجي ماالقاه
وللاسف
لااستطيع الانضمام لشركة كداري كمساهم وقاتل الله مرض الرطوبة


#395431 [Allord]
0.00/5 (0 صوت)

06-17-2012 07:16 PM
ده كولو كوم والضلمه دي كوم تاني .. مقطع من حوار لمسرحية شحاد في الخرطوم ... جاء في صحيفة الصحافة العدد 6785 الاحد17 يونيو 2012 (بعد تحديد المتورطين في القضية تحويل بيع خط هيثرو إلي النائب العام) وقالو كمان ان القضية ستحول لقضية جنائية .. يا أستا جبرا جاتك مقنطرة لكن الله يستر من قصة جنائية دي لأنوه مرات بتمنع النشر وكلو الحبل إتملي لكن شوف لينا مباصره للقصة دي .


#395428 [ubedallawd]
0.00/5 (0 صوت)

06-17-2012 07:13 PM
هههههههههههههههههههههههههههههههه
من المفترض ان نبكي طوالللللي من العلينا لكنك اضحكتنا وفشيتنا من الغبن الحاصل علينا مقالك ممتاز وساخر للحد البعيد ..
متعك اللة بالصحة والعافية وابعد شر اولاد الاشرار(الكيزان)







الليلة قالوا اتضحت حكاية خط هيثرو وتحولت الشغلانة الي محاكمة جنائية وقالوا الجماعة منهم وزير الدولة بمجلس الوزراء وتماسيح كبار من المطار وشركات طيران
انت اخبار الحمير شنو؟


#395351 [كرجو]
0.00/5 (0 صوت)

06-17-2012 06:01 PM
0 ان قضية بيع خط هيثرو ستحول الي قضية جنائية للنائب العام بعد ان تم تحديد الضالعين في بيع الخط .
يا ربي تكون لجنة التحكيم المركزيه للاتحاد كرة القدم السوداني متورطه؟
بالله شوف لينا سمسار لخط ميه غرب،،،،


#395305 [عوض محمد احمد]
0.00/5 (0 صوت)

06-17-2012 05:12 PM
لاخ الفاتح اسعد الله اوقاتك ومتعك والشعب السودانى بالصحه والعافيه ، وان كانت هذه معدومه مع قلة الاكل المبنطاق - اسال الله عز وجل ان يخفف على الشعب المغلوب على امره وان يسهل عليه امور اخرته لان امور دنباهه راحت عليه مع الدستوريين من وزرا وولاة ومستسارين ووزراء دوله ومعتمدبن ومستشارين واعضاء برلمان ونواهم واقربائهم - اتمنى الا تضاف رسوم على ساكنى المقابر المتوقع زيادة اعدادهم مع كل رفع دعم - مع انه لم يتبق شى عليه دعم -
مبروك خط هيثرو عرفوا الناس اللطشوه وكونوا ليه لجنه واللجنه حات تموت ورفضوا اعلان اسمائهم عملا ببند الستره - فقه الستره - قال لجنه قال - قابلنى لو رجعت قروشه راحت روحت ابوى عليه رحمة الله


#395292 [بتـاع درداقـــــة]
0.00/5 (0 صوت)

06-17-2012 04:58 PM
شــكلك مرطـــب يا عمـــك تـوم وبــصل ومعجـــون اســنان والناس مـا لاقــــية حــق موية الــفول ومـوية الجــبنة ولـو فى موية زيت


#395162 [سوداني]
0.00/5 (0 صوت)

06-17-2012 03:03 PM
يا عمك انت قديم كده مالك
ما قلنا ليك خط هيثرووو حولناه للمدعي العااااااااااااام.!!!
خلاص تاني ما تشبكناهيثرو خط هيثرو


#395121 [ابره]
0.00/5 (0 صوت)

06-17-2012 02:21 PM
يا الفاتح جبره امسك الكسره الثابته قوي لان الخيوط بدات تظهر


#395030 [احمد السيد]
0.00/5 (0 صوت)

06-17-2012 01:37 PM
06-17-2012 11:20 AM

البرلمان : علوية : اعلنت وزارة النقل عن اكتمال التحقيقات في بيع خط هيثرو، وتحويل الضالعين الي القضاء ،وقال وزير الدولة بوزارة النقل فيصل حماد في اجتماع مع لجنة النقل بالبرلمان ، ان قضية بيع خط هيثرو ستحول الي قضية جنائية للنائب العام بعد ان تم تحديد الضالعين في بيع الخط .
وابلغت مصادر «الصحافة « ان لجنة التحقيق الخاصة بالخط اكتشفت ان هناك سماسرة متورطين في بيع الخط .
وفي السياق نفى وزير الدولة فيصل حماد وجود تكدس للبضائع بميناء بورتسودان واكد ان المشكلة الرئيسية في الميناء تكمن في التعريفة، واشار الي انها تقلل من المنافسة بالميناء .

الصحافة


#394976 [ود عويضــــه]
0.00/5 (0 صوت)

06-17-2012 12:54 PM
كسرة ثابتة :
أخبار خط هيثرو شنو(ووو ووو)؟
ابشر قالوا حولوا اصحابك للقضاء وكمان جابت ليها سماسرة ؟ لكن ما قول معانا (ما بصدقكم)
البرلمان : علوية : اعلنت وزارة النقل عن اكتمال التحقيقات في بيع خط هيثرو، وتحويل الضالعين الي القضاء ،وقال وزير الدولة بوزارة النقل فيصل حماد في اجتماع مع لجنة النقل بالبرلمان ، ان قضية بيع خط هيثرو ستحول الي قضية جنائية للنائب العام بعد ان تم تحديد الضالعين في بيع الخط .
وابلغت مصادر «الصحافة « ان لجنة التحقيق الخاصة بالخط اكتشفت ان هناك سماسرة متورطين في بيع الخط .
الصحافة


#394965 [سامي]
0.00/5 (0 صوت)

06-17-2012 12:49 PM
دكتور البوني يتحاشى الخوض في أي موضوع يعرضه إلى غضب الكيزان لذا فهو يحاول عبثا الجمع بين النقيضين (رضاء القارئ ورضاء الكوز) وهذا مستحيل طبعا وأنت مثله تماما ياأستاذ جبرا بس الفرق بينك وبينه انت دمك خفيف.


ردود على سامي
United States [ضد الكيزان] 06-17-2012 11:02 PM
أستاذ جبرا شوكة حوت في حلق الكيزان وقد تحدث وبجرأة عن كل الفساد الحاصل من الكيزان .. أسمح لي ألا أوافقك الرأي


#394952 [ودالبلد الأصلى-كان أسمو السودان]
0.00/5 (0 صوت)

06-17-2012 12:31 PM
جيناك بالثابتة يا صاحب الكسرة الثابتة( اكتمال التحقيقات في بيع خط هيثرو، وتحويل الضالعين الي القضاء )خبر طازج من طرف الراكوبة!أها أمشوا ودروهو تانى أصلكم ممحوقين!كملتوا الموية الفى البحر! لمن الخطوط الفى الهوا !!!!


#394944 [هندسة]
5.00/5 (1 صوت)

06-17-2012 12:21 PM
فن التدبير في الواقع المرير لجميع الحمير

يا جبرا يعني انتا من زمان شايفنا حمير وداسي علينا وما وريتنا ولا قلتا لينا اهبشوا اضنينكم!!


#394941 [دايخ فى زمن بايخ]
5.00/5 (2 صوت)

06-17-2012 12:17 PM
والله برنامجك الواضعو ده يا جبرا انا شايفو تبزير والمفروض نتغشف اكتر من كده. يعنى مثلا عندك البصل مافى داعى ليهو لانو البصل بقوى النظر ونحن ماعائزين نظرنا يقوى عشان نشوف كفايه الشفناهو وبالنسبه للسواك معجون لي شنو اقرب شجره اقطع منها فرع و(تسوك على بركه الله)
الله يستر(قولو يالطيف)


#394938 [هندسة]
5.00/5 (2 صوت)

06-17-2012 12:16 PM
هنا اتتك كديستك :

دفع رباعي وتعشيقة متعددة المهام (أضان شمال يمين ، إشارات جنب ، ضنب خلف)
تنبيه : توجد إكسسوارات (كاتم صوت) و(بامبرز) عشان بتاعين (النفايات) وكده
أيها المواطن سارع بإقتناء حمارك الآن عشان الجماعة لو شموا الخبر ده ح يمنعوا إستيراد الحمير إلا (موديل السنو) و يعملو رسوم (فرق موديل) وكده


#394934 [ود عويضــــه]
5.00/5 (2 صوت)

06-17-2012 12:12 PM
الكهرباء
إعادة النظر في استخدام الشموع في حفلات الزواج واللمبة ام خويت - وضوء القمر – للمذاكرة بالاستفادة من مادة الودك (شحوم الغنم والبقر وكدا)
في الإنارة والطبخ وتجميل الشعر وهو تطبيق عملى لشعار الابالسة نأكل مما نزرع ونلبس مما نصنع ونستغرب ان يكون حاميها حراميها - ونتعجب من حكمة الله في جعل المشائخ ان يتحولوا بين ليلة وضحاها الى مؤيدين ومباركين للقروض الربوية والى توزيع الواقي الذكري ليس خوفا من الله وانما خوفا من انتشار الايدز بين شباب وشباب المسلمين -
كسرة : من اين جاء هؤلاء ؟؟؟؟ الذين يملكون برنامج إفساد أكثر مما يملك الشيطان


#394915 [الفقير]
5.00/5 (1 صوت)

06-17-2012 11:53 AM
معقوووولة حمير


#394897 [noor]
5.00/5 (2 صوت)

06-17-2012 11:38 AM
Dear Mr Jabra I want to congratulate you very much for your searching for Heathro line this morning I read in the news that the Parliament found those who sold the line . Now you have to go quickly to the Parliament to know the truth and before they run away . Please Jabra leave anything and go to feed us back please I beg you. Thanks


#394795 [برانتود]
0.00/5 (0 صوت)

06-17-2012 10:23 AM
نفسى اشوف مسؤول مسؤول او وزير ماشى برجله لعشرة خطوات..ابنى الصغير سالنى, لمن شاف ولد مسؤول كبير ببكى جو سيارة البرادو ..دا مالو؟؟قلت ليهو يمكن ببكى عشان ما ياكل السيريلاك


#394763 [زازووق]
5.00/5 (1 صوت)

06-17-2012 10:00 AM
حميييير حميييييييييير
انت بغران ولا حااااااسد!!!!؟؟؟؟؟
أهههه هااا أهههه هاااء
وبنهنق كمان!


#394755 [ثائر ضد الفساد]
5.00/5 (1 صوت)

06-17-2012 09:56 AM
الفاتح جبرا وثق لهذا الحكم بالسخرية وسينال جائزتي بعد سقوط الحمير اقصد النظام


#394739 [ابومحمد]
5.00/5 (1 صوت)

06-17-2012 09:42 AM
الله عليك يا استاذ جبره بس نسيت ضمن الادويه لمن يجيم نفاخ يقرو واحد من مقالاتك عشان يفرقو ذينا المره بقت مقاشراك وكده اول ما اجي من الشغل بجرى علي الكمبيوتر المره بتقول لي خلاص جاري علي مقال قشره البخليك تضحك براك ذي المجنون ده والله ده شر البليه ذاااااتو


#394632 [ابوكرنك]
0.00/5 (0 صوت)

06-17-2012 03:18 AM
كلنا حمير ربنا


#394621 [Wadhammad]
5.00/5 (2 صوت)

06-17-2012 02:44 AM
المصيبة جماعتك ديل يكونوا بقروا مقالك دة زينا كدة وبستمتعوا بيهو كمان!
اللهم احفظ اهلنا في السودان من كل سوء واكفهم شر الظالمين
اللهم يسر أمرهم واستر حالهم... برحمتك يا أرحم الراحمين
اللهم من ارادهم بسوء فاجعل الدائرة عليه ... برحمتك يا أرحم الراحمين


#394614 [mo]
5.00/5 (2 صوت)

06-17-2012 02:25 AM
انحنا كان مان ما حمير نسكت 23سنة


#394599 [بلد الَِمحَن]
5.00/5 (3 صوت)

06-17-2012 01:46 AM
اكيد مابتحصل الا في بلد المحن دي .....

الفول :
اذا داير تفطر فول .. كل يوم فولايه .. لحدي اليوم التامن .. وممكن الفولايه الاخيره تخليها تعمل منها بوش كل يوم حتى نهاية الشهر ..


#394596 [رجعونا محل لقيتونا وما تنقذونا]
5.00/5 (1 صوت)

06-17-2012 01:40 AM
والله الليلة يا جبرا بالغتا طلعتنا حميرررررررررررررررر عديييل لالا دى قوووووووووووية

نحن كان ما حمير يسكنوا هم فى العمارات ونسكن نحن محل النفايات اكان ما حمير نلد فى الدايات ويلدو هم فى الراهبات نحن اكان ما حميررر وحميررر يقعدو ديل نا س الطيارة نورا طافى بالليل

يحرسونا ويدافعوا عننا نحن شدة ما حميرررر يسالونا عن قروشنا ويقولوا هم مالكم مال القروش جاى من وين خشمكم عندكم نحن اكان ما حميررر وديراوية كمان ( عارف يا جبرا يعنى شنو حمار ديراوي دا ابلد حمار موجود وحكمة الله موجود عندنا نحن بس)

اقول ليك حاجة يا جبرا ياخى ايوة حمير اها


#394594 [زول]
0.00/5 (0 صوت)

06-17-2012 01:35 AM
إبداع
والله فعلا متحملين
إذا نحن حمير
ده منطق جديد يسجل لك
ههههههههههه


#394585 [دلدوم]
5.00/5 (3 صوت)

06-17-2012 12:59 AM
ممكن تقطصد كمان الواقى بتاع عبدالرسول تفسله وتستعمله مرات عديده عشان تواكب تقشف الحكومه


#394584 [بت أمدرمان]
4.00/5 (3 صوت)

06-17-2012 12:57 AM
يا سلام يا عمو جبرة أنا الليلة حأكون أول معلقة فى الراكوبة، دة إذا ناس الراكوبة فكوا تعليقلى بدرى و كدة يعنى. عندى نصيحة برضو للنسوان لما الواحدة تسرح شعرها ، ما ترمى الشعر الفى المشط ، عشان لما تصلع من عمايل الكيزان ، ترجع لشعرها اللمتو و تشوف ليها صمغ، إن وجد ، و تلصقوا فى صلعتها , أهو الشعر الأسود ينفع فى الصلعة البيضاء.

أها أخبار هليكوبتر مدنى شنوو ؟


#394581 [ابوانوار]
5.00/5 (2 صوت)

06-17-2012 12:44 AM
فعلا نحن حمير شايلين كل هذا الحمل ونطلب المزيد .انفقدت المروْءة والكرامة ورضينا بالذلة والمهانةوبدلا من الموت البطىء مش احسن يكون من خلال رصاصة .


#394558 [azoz]
5.00/5 (7 صوت)

06-16-2012 11:49 PM
سالتك بالله ان تكتب عن مسجد العارف بالله حسن احمد البشير ومتي تمت معرفته بالله ومدي معرفته بالله وكم كلفت معرفته بالله من مال الشعب لبناء المسجد


#394548 [asim]
5.00/5 (2 صوت)

06-16-2012 11:40 PM
خلاصة الكلام دا كلو تكمن في العبارة دي : نشتري حمير ليه؟ ما نحنا أهو ما شاء الله حمير (فل أوبشن) وبنتحمل ده كوووولو !!


#394545 [عصمتووف]
0.00/5 (0 صوت)

06-16-2012 11:35 PM
توجد إكسسوارات (كاتم صوت)

الحتة دي ** منصـــــات اطلاق الصواريخ الغازية يشوفوها كييييييف للاخوه الجنود المرابطيين في ثغر السودان هل تطبق عملية المتاوقة و ام الشم


ردود على عصمتووف
United States [زين الشمال] 06-17-2012 02:39 PM
الاستاذ جبرا..السخرية فن من ضروب النقد الهادف .. ولكن لاحياة لمن تنادي .. طالما الحمير سوف يكون لديهم دور في حل ازمة المواصلات ، يمكن نحن المغتربين نفكر في استثمار الموضوع.


ألفاتح جبرا
ألفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة