المقالات
السياسة
ارشيف مقالات سياسية
التحية لأم درمان الباسله ولجامعة الخرطوم قلعة التحدى والصمود
التحية لأم درمان الباسله ولجامعة الخرطوم قلعة التحدى والصمود
06-21-2012 01:28 AM

التحية لأم درمان الباسله ولجامعة الخرطوم قلعة التحدى والصمود

تاج السر حسين
[email protected]

ظللنا نكتب عن (أم درمان) على نحو خاص وباهتمام زائد وفى شوق وحب .. وذاك لم يكن انحيازا عشوائيا سببه شرف الأنتماء لأهلها – لا سكانها - أو تعصبا عنصريا لقبيلة من قبائلها كما يظن البعض معذورين، وأنما تقديرا لتاريخ تلك المدينه الباسله فى مواجهة الطغاة، ومعرفة بأنها تضم فى احشائها كافة قبائل السودان من اقصى الشمال لأقصى الجنوب ومن اقصى الغرب لأقصى الشرق، حتى اصبحت (ام درمان) تمثل ملخصا للسودان كله دون انتقاص للمدن الأخرى الأقدم منها تأسيسا وعراقة.
بل ضمت ام درمان جاليات من دول أخرى شوام ومصريين وهنود ومنحتهم (جنسيتها) وأكسبتهم ثقافتها وقيمها وكرمها وحنيتها وتسامحها.
ولذلك اقترحت ذات مرة فى أحدى مقالاتى،أن تدرس (الجميعه العامه للأمم المتحده) والمنظمات الدوليه ذات الصله، ثقافة هذه المدينه والأستفاده منها فلى حل المشاكل والنزاعات فى دول تعانى من الطائفيه والتمييز العنصرى بين مواطنيها.
فى وقت أبى فيه لئام النظام الفاسد المتغطرس الغبى، أن يحتفظ الأنسان (الجنوبى) وهو سودانى اصيل بجنسية وطنه الأم!!!
أم درمان .. الباسله عرفت بصبرها وأحتمالها لتفاهات وسقاطات الحكام الفاسدين والمستبدين دون أن تؤيدهم أو تدين لهم بالطاعة والولاء، حفاظا على أمن الوطن والمواطنين وأستقرارهم، لكن حينما يفيض الكيل فتنفض وتثور فذاك يعنى أن السودان كله يغلى كالمرجل غضبا وينتفض ويثور وعلى الحاكم الطاغيه المستبد أن يجهز نفسه للسجن أو المنفى.
ولو لم تكن ام درمان تستحق ذلك التقدير لما كتب فيها الشاعر (عبدالمنعم عبد الحى) قصيدته الرائعه (أنا أم درمان) التى يقول فيها:
أنا امدرمان تأمل في ربوعي
أنا السودان تمثل في نجوعي
أنا ابن الشمال سكنته قلبي
على ابن الجنوب ضميت ضلوعي

أنا امدرمان سلوا النيلين عني
وعن عزمات فتاى عند التجني
فخير بنيك يا سودان مني
سلو الحادي سلوا الشادي المغني

أنا امدرمان اذا ما قلت اعني
فما نيل المطالب بالتمني
تجيش النفس بالامال لكن
ولكن .. هذه لما لا تدعني

أنا امدرمان مضى أمسي بنحسي
غدا وفتاى يحطم قيد حبسي
واخرج للملاء في ثوب عرسي
وابسم بعدما قد طال عبسي
وأعلن والفضاء يعلن همسي
واهتف و الورى يعرف حسي
فيا سودان اذا ما النفس هانت
أقدم للفداء روحي ونفسي
أكرر هذه المربع واشعر بالأسى والاسف والحسره:
أنا امدرمان تأمل في ربوعي
أنا السودان تمثل في نجوعي
أنا ابن الشمال سكنته قلبي
على ابن الجنوب ضميت ضلوعي
ولو لم تكن أم درمان تستحق تلك المكانه لما كتب فيها شاعر (عازه) الرائع (خليل فرح) القادم من أقصى الشمال قصيدته مودعا أحيائها فى طريقه للعلاج فى مصر:-
ماهو عارف قدمه المفارق

يا محط آمالي السلام

في سموم الصيف لاح له بارق

لم يزل يرتاد المشارق

كان مع الأحباب نجمه شارق

ماله والأفلاك في الظلام

يا دهر أهوالك تسارق

منها كم كم شابت مفارق

ما علينا الفات كله فارق

رقنا وله نعيد الملام

من حطامك أنا غصني وارق

في شن أبقيت للطوارق

غير قليبا في همومه غارق

ولسانا برده الكلام

ويح قلبي الما انفك خافق

فارق ام درمان باكي شافق

يا أم قبايل ما فيك منافق

سقي أرضك صوب الغمام

يا بلادي كم فيك حاذق

غير الهك ما أم رازق

من شعاره دخول المأزق

يتفاني وشرفك تمام

مسرح الغزلان في الحدايق

والشوارع الغر والمضايق

قول لي كيف أمسيت دمت رايق

دام بهاك مشمول بالنظان

مجلس اللذات في النمارق

والترف لا زال وصفه خارق

ضاري حسك فاح جانا مارق

وله قاطعو الريح ما هو لام

في يمين النيل حيث سابق

كنا فوق أعراف السوابق

الضريح الفاح طيبه عابق

السلام يا المهدي الامام

أين مني الودعته شاهق

باكي ناهد لسه مراهق

عيني ما بتشوف الا شاهق

أين وجه البدر التمام

أين مني الفي زهوه باسق

في شبابه نقي من مفاسق

بين ثيابه البيض المناسق

حولك اشبه رتل الحمام

يا بريد الجو فوقي حالق

ميل علي الروح ليها خالق

عدت سالم قول وأنت عالق

مقرن النيلين كيلو كام

الحبايب لفتوا الخلايق

بيني وبينهم قطعوا العلايق

ان دلال ان تيه كله لا يق

نحن ما مجينا الخصام

يا جميل يا نور الشقايق

أملأ كأسك واصبر دقايق

مجلسك مفهوم شوفه رايق

عقده ناقص زول ولا تام

من فتيح للخور للمغالق

من علايل ابروف للمزالق

قدله يا مولاي خافي حالق

بالطريق الشاقه الترام

ما يئسنا الخير عوده سايق

الحي يعود ان أتي دونه عايق

الي يوم اللقا وانت رايق

السلام يا وطني السلام
مكررا كذلك ابياته ومتأملا لها:
فارق ام درمان باكي شافق

يا أم قبايل ما فيك منافق

لذلك ولكلما تقدم وغيره من اسباب، لم استغرب انتفاضة (ام درمان) الباسله بألأمس بعد صبر طويل والتى تناقلتها وكالات الأنباء والفضائيات وشبكات التواصل الأجتماعى وأعقبتها فى اليوم الثانى هبة (جامعة الخرطوم) قلعة الصمود وجامعة ألأحرار التى أنكسر امام ابوابها الشامخه صلف أعتى الطغاة والمستبدين، وظلت تقود الركب وتقدم الشهداء فى كافة الملاحم السودانيه.
فاذا كان ألأمر كذلك فى السابق كيف يكون الحال اذا لاحت فى افق النضال الوطنى السودانى روافد أخرى ظلت تنازل النظام الفاسد وتهزمه، تمثلت فى حركات التحرر الدارفوريه التى اصبحت ترفع شعارات قوميه ووحدويه تستحق الأحترام والتقدير، وتمثلت فى قوى الشباب الحديثه ومنظمات المجتمع المدنى الفاعله .. وتمثلت فى مشروع الحركه الشعبيه غير المستنسخ من الخارج ( السودان الجديد)، بالطبع لا ننسى مساهمات قوى الأحزاب الوطنيه (القديمه) يسارها ويمينها التى لم تتخل عن شعبها ولم تتنازل عن انحيازها لمطالبه، حتى لو كانت بعض تلك القيادات تمارس السباحه عكس التيار وتحن لماض لن يعود الا ما فيه من جمال.
آخر كلام:-
• القناة التى تستحق أن تحمل اسم (أم درمان) لا (امدرمان) وهذا خطأ شنيع، يجب أن تنحاز للشعب وللثوار، حيث لا يعقل أن تكون فى السودان أكثر من 6 قنوات رسميه وخاصه كلها تنقل وجهة نظر النظام الفاسد والحاكم المستبد وأزلامه وأرزقيته وأحتفالات مليشيايته وكتائبه التى هى شكل من اشكال تنظيم (القاعده) الأرهابى.
• الا تستحى تلك القنوات من الفضائيات المصريه المستقله التى ظلت تنقل رأى الشعب المصرى حتى خلال فترة (مبارك) التى كان فيها أمن الدوله كاتما على انفاس المصريين؟؟
• ازلام النظام الفاسد و(نافع) ورئيسه (البشير) وأتباعهم ومن معهم من منافقين وأرزقيه، تحدوا واستبعدوا خروج الجماهير فى مظاهرات، فمالهم الآن يقمعون تلك المظاهرات التى اندلعت بهذا العنف، ان كانوا يريدون أن يعرفوا وزنهم وحجمهم فى الشارع السودانى؟؟
• لا بديل لأسقاط النظام لكى يتحسن الأقتصاد ثانى يوم من اسقاطه، ولكى يلتئم شمل الوطن كله، ولكى تعود العلاقه بيننا وبين اخواننا فى الجنوب الى افضل حال، ولكى تزدهر التجاره من والى الجنوب دون تهديد بقتل أو سجن، ولكى ينعم المواطن السودانى فى الشطرين بألأمن والأستقرار والحريه والديمقراطيه وأحترام حقوق الأنسان.
• الديمقراطيه هى الحل والدوله المدنيه هى الحل والمواطنه المتساويه هى الحل.


تعليقات 10 | إهداء 0 | زيارات 3697

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#399719 [ود الحاجة]
0.00/5 (0 صوت)

06-21-2012 06:08 PM
يا جماعة : الخرطوم نفسها بنت أمدرمان فلولا أمدرمان لما كانت الخرطوم


#399622 [المتحفز]
0.00/5 (0 صوت)

06-21-2012 04:33 PM
كلماتك الرائعة فى حقنا نحن الامدرمانين قلادة شرف نعتز بها كثيراً سوف ترى منا فى القريب العاجل ما يثلج صدرك (راياتناعالية ومابتميل وطبولنا هادر حرب عديل)
انا ام درمان اناالطابية المقابلةالاذعة انا العندي ضدالكيزان مناعة
انا التاريخ وانا الهوية وانا الاعرق من بغداد والسالمية
انا السيف والنيل والعلم والبندقية وانا عبداللطيف شهيدالعزة السودانية
اما بخصوص الاخ جركان فاضى ( الجواب واضح من عنوانه)الرجاء عدم صرف النشطاء عن الهدف الاساسي واستفزاز اهلك الامدرمانين بمثل هذا الحديث(ام درمان بصراحة كان دورها الوطنى طيلة عهد الانقاذ مخيبا للامال.فما هو عدد الشهداء الذين قدمتهم طيلة هذه الفترة؟.اما عن علماء امدرمان فدونك الحبر يوسف نورالدائم.)
اولاً هنالك عدة محاولات عسكرية جل من قاموا بها هم ابناء ام درمان، حركةرمضان قام بها الشهيد الكدرو (بيت المال) والنقيب طيار (اكرم) الملازمين والقائمة تطول بعدها العقيد طيار السر عوض الله الموردة وبعدها العميد عمر النقر (الدفاع الجوي) الموردة وحتى الشهيد مجدي(دولار) ابن ام درمان
وبخصوص علماء الدين السادة الادارسة احفاد سيد الخلق بالموردة والشيخ قريب الله (الطيار)بس اوع تفتكروا طيار فى الجيش ده ولى من اولياء الله معروف من كراماته الطيران، وحواره قنديل وقصته الشهيرة عند سماعه لاغنية (ياليل ابقى لي شاهد) لكن ما قلت لى الاخ من وين؟


ردود على المتحفز
United States [عمرابي] 06-21-2012 05:50 PM
الشهيد طيار. اسامة خشم الموس

المتحفز يمين شكلك فييييي امدرمان المــــــــــوردة

و طلعت من الموردة حتريحني للدين عشان الناس الجاية لوتري تعرف انو كمان اولاد قلبة

بيعرفو خط بعض

والله مش لو جبت كيبورت يا كيس فاضي.... اقصد جركان فاضي انت


#399323 [Not That Way]
0.00/5 (0 صوت)

06-21-2012 12:49 PM
Rise Up Up Up


#399140 [جركان فاضى]
5.00/5 (1 صوت)

06-21-2012 10:48 AM
الاخ تاج السر لقد ظلت جامعة الخرطوم على مدى اسبوع تخرج فى مظاهرات هادرة اقلقت منام النظام. والسؤال:ماهو الدعم الذى قدمته امدرمان لثوار هذه الجامعة؟لاشئ قدمته لذلك فان الربط بين نضال جامعة الخرطوم وامدرمان غير صحيح ومن العيب ركوب امجاد دون دفع ثمنها.فلم يسقط شهيد واحد من امدرمان على مدى حكم الانقاذ الذى امتد 24 سنة.


ردود على جركان فاضى
United States [عمرابي] 06-21-2012 01:38 PM
جامعة الاهلية دي فى اللعوتة ؟

التقانة ؟؟؟؟

احياء الثورات الوادي و الشنقيطي

سوق امدرمان !!


انت يا زول هوي ... امدرمان دي كاتلة ليك زول ؟؟؟؟



#399139 [عمرابي]
5.00/5 (2 صوت)

06-21-2012 10:47 AM
قدله يا مولاي خافي حالق

و الزول بيحلق و بيطوف حافي في الحرم والله شكسبير ما يقدر يوصل شعور ذي دا

قداسة ما بعدها قداسة


آسف امكن المقام و الموضع عن الاحتجاجات و مظاهرات ابناء بلادي الشرفاء و بنات مهيرة و بنونة و عزة

بس والله ما حبيت شي في حياتي ذي حبي لي امدرمان و قدر ما تجي سيرتة والله الدموع تجري و العبرة تخنق


ردود على عمرابي
United States [المتحفز] 06-23-2012 04:25 PM
عمرابى حبيبنا ابواللمين قال(ما هو باين من العيون)نحن لحمك ودمك نحن قلب قليبة ذاتوه كماعاهدناكم دئماالان دقت ساعة العمل السلام لكل القراقير هنالك وعلى راسهم الدكتور مولانا...


#399110 [جركان فاضى]
0.00/5 (0 صوت)

06-21-2012 10:23 AM
ولك ان تعلم اخى تاج السر ان جميع شعراء الحقيبة (ما عدا سيد عبدالعزيز)ليسوا من مواليد امدرمان وقد اتوا لهذه المدينة بشعرهم وفنهم وادبهم وعلمهم فلما ماتوا مات كل شئ.وولد الشعر فى شندى والبطانة ومات فى امدرمان وانا اقول هذا الكلام كمواطن امدرمانى.


ردود على جركان فاضى
United States [عمرابي] 06-21-2012 12:50 PM
انجبت أم درمان الشاعر عمر البنا في عام 1900
الشاعر ابو صلاح او صالح عبد السيد بحى الموردة امدرمان عام 1890
الشاعر سيد عبد العزيز حي العرب امدرمان
الشاعر عبدالرحمن الريح حي العرب امدرمان
محمود ابراهيم فلاح من مواليد ام درمان حي البوستة عام 1923م
محمد بشير عتيق ...من مواليد حي ابو روف..بمدينة امدر امان
الشاعر محمد على عبد الله ( الأمى ) ( 1908-1988 ) حي الركابية امدرمان
عبيد عبدالرحمن 1908 – 1986م ولد الشاعر المبدع عبيد عبدالرحمن بحي العرب بأمدرمان
ابراهيم العبادي من مواليد امدرمان 1894

الحديث عن امدرمان يحلو وذو شجون
فهي الطيبة ..هي الالفة.. والمودة ..هي البشاشة.. هي الاصل والتاريخ
هي القديم والحديث وتمازجهما ..هي تسكننا وتعيش فينا .. هي كل ماذكرت
هي ام الدرر والرجال ونعجز ان نوفيها حقها .

والكثير والكثير من الابداع والمبدعيين فى بلادى من امدرمان وان اجمل ماسمعت من القول عن حب ام درمان للغر باء وفى اكرمهم ماقالة الشاعر الامدرمانى العبادى حيث قال فى كرم ام درمان امدرمان القامت بجهلة ادت الغريب وابت اهلها فان كنت من ام درمان فستفهم القولة دى بحق وحقيقة

و خليل فرح الما من امدرمان قدس امدرمان من قدسية الحرم تعتقد لية ؟ ؟ ؟ ؟ ؟


#399099 [جركان فاضى]
5.00/5 (1 صوت)

06-21-2012 10:18 AM
الاخ تاج السر التحية الطيبة.ليس النضال ان تاتى باناشيد وطنية عملها الاجداد بل النضال بالعرق والدم. وام درمان بصراحة كان دورها الوطنى طيلة عهد الانقاذ مخيبا للامال.فما هو عدد الشهداء الذين قدمتهم طيلة هذه الفترة؟.اما عن علماء امدرمان فدونك الحبر يوسف نورالدائم.


ردود على جركان فاضى
United States [الموردة حضارة] 06-21-2012 04:37 PM
كلماتك الرائعة فى حقنا نحن الامدرمانين قلادة شرف نعتز بها كثيراً سوف ترى منا فى القريب العاجل ما يثلج صدرك (راياتناعالية ومابتميل وطبولنا هادر حرب عديل)
انا ام درمان اناالطابية المقابلةالاذعة انا العندي ضدالكيزان مناعة
انا التاريخ وانا الهوية وانا الاعرق من بغداد والسالمية
انا السيف والنيل والعلم والبندقية وانا عبداللطيف شهيدالعزة السودانية
اما بخصوص الاخ جركان فاضى ( الجواب واضح من عنوانه)الرجاء عدم صرف النشطاء عن الهدف الاساسي واستفزاز اهلك الامدرمانين بمثل هذا الحديث(ام درمان بصراحة كان دورها الوطنى طيلة عهد الانقاذ مخيبا للامال.فما هو عدد الشهداء الذين قدمتهم طيلة هذه الفترة؟.اما عن علماء امدرمان فدونك الحبر يوسف نورالدائم.)
اولاً هنالك عدة محاولات عسكرية جل من قاموا بها هم ابناء ام درمان، حركةرمضان قام بها الشهيد الكدرو (بيت المال) والنقيب طيار (اكرم) الملازمين والقائمة تطول بعدها العقيد طيار السر عوض الله الموردة وبعدها العميد عمر النقر (الدفاع الجوي) الموردة وحتى الشهيد مجدي(دولار) ابن ام درمان
وبخصوص علماء الدين السادة الادارسة احفاد سيد الخلق بالموردة والشيخ قريب الله (الطيار)بس اوع تفتكروا طيار فى الجيش ده ولى من اولياء الله معروف من كراماته الطيران، وحواره قنديل وقصته الشهيرة عند سماعه لاغنية (ياليل ابقى لي شاهد) لكن ما قلت لى الاخ من وين؟

United States [عمرابي] 06-21-2012 01:35 PM
جامعة الخرطوم لها التحية و الاجلال في كل ضروب الحياة الاكاديمية و الثقافية و الاجتماعية

لكن يجب ان لانبخس للناس اشياءهم و نحن لسنا فى مزاودة للوطنية لكن من العيب علينا ان ننسي ما تقدمة و بصورة دورية جامعة امدرمان الاهلية من شهداء و مناضلين

اما فيما يخص العلماء يكفي امدرمان فخرا ان مزكرة الحقوق التي نال بها السودان استقلالة وتدرس حتى اليوم في بريطانيا هي مقدمة من السيد اسماعيل الازهري

بعدين صراحة يا سيدي العزيز اشعر فى نبرة كلامك محاولة التقليل من امدرمان و من وطينة امدرمان

لكن امدرمان التاريخ لو ما عارف

امدرمان الحيشان التلاتة يا اخوي

امدرمان الثقافة
امدرمان الرياضة
امدرمان الاستقلال
امدرمان كرري
امدرمان المزيج الاجتماعي .. لمت الاجنبي لو قبطي لو يهودي لو تركي لو مصري
امدرمان التاريخ .. ولو ما عارف شوف متين تاسيسة عصر العنج القبل الفونج
امدرمان الازهري ... عبد الله خليل ... نميري .... التجاني يوسف بشير ...

ولو قصدك بعد 89 يكفينا فخرا انة لايوجد فى الانقاذ امدرماني


#399087 [المشتهي الكمونية]
5.00/5 (2 صوت)

06-21-2012 10:11 AM
أشهدوا يا قوم وأكتبوا على لساني - أنا المواطن الفقير الغلبان الذي يحلم بصحن من الكمونية ، هذا ليس مزاح أو سخرية فأنا لم أذق اللحم خلال فترة طيلة سوى مرة أو مرتين في مناسبات - المهم أنني قررت قرارا لا رجعة فيه أنه في حال نجاح الثورة ، وستنجح بإذن الله - قررت أن أقطع لسان المدعو نافع المشهور بأبو العفين ، تذكروا كلامي هذا ، سوف أقطع لسانه من لقاليقه ، هذا اللسان القذر لن ينطق بعد نجاح الثورة ، وفي حال كان أبو العفين يواجه اتهامات يمكن أن تقوده الى المشنقة فسوف يذهب الى المشنقة بلا لسان ،،، أنا أعرف أين أجده وسوف أقطع لسانه ، سوف أقطعه وأقدمه هدية لمتحف التاريخ الطبيعي ليتذكر الشعب السوداني على مر التاريخ أن لسان من أساء لشعبه موجود بمتحف التاريخ


ردود على المشتهي الكمونية
United States [جركان فاضى] 06-21-2012 11:37 AM
على طريقة الثوار الليبيين عندما قبضوا على سيف الاسلام القذافى فاول ما فعلوه هو قطع اصابعه الثلاثة التى امتدت على الشعب الليبى بالوعيد


#398994 [ابوسالف نصر عبدالكريم]
5.00/5 (1 صوت)

06-21-2012 09:12 AM
صدقت يا اخى ما فى طريقة الا اسقاط هذا النظام المتهالك


تاج السر حسين
تاج السر حسين

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة