فلست من هين؟
06-23-2012 10:55 AM

فلست من هين؟

الفاتح جبرا
[email protected]

فاجأ الأستاذ علي عثمان (النائب الأول لرئيس الجمهورية)نواب (البرلمان) في جلسته الأخيرة بإخراجه مظروفاً ذهبياً صادر من مجلس الوزراء ليبدأ في فتحه وسط صيحات النواب : (لا لا ما تفتح الظرف) !!
غير ان سيادته ورغم محاولات النواب لإثنائه عن تلاوة ما بداخل الظرف إلا أنه قد أصر على قراءة الورقة التي بداخله والتي حوت تفصيلاً (لمخصصاته الدستورية) الشهرية والتي بلغت 10886 جنيهاً فقط بعد الخصومات !!
والحق يقال أن مخصصات النائب الأول تعد (ولا حاجة) أمام بعض مخصصات بعض المسئولين وكلنا يتذكر (عقد مدير سوق الأوراق المالية) الذى يوازي راتبه (الأساسي) 18 مليون جنيه (بالقديم) أي حوالي ضعف راتب السيد النائب الأول بينما أما بقية (البدلات) تقرأ كالآتي :
• 90 مليون جنية بدل (عيد ضحية)
• 90 مليون بدل إجازة
• 324 مليون بونص (مرتب 18 شهر)
• 76 مليون بدل لبس !
وإذا كان السيد النائب الأول يقوم بتلاوة مخصصاته على الملأ إلا أن هنالك عقودا (سرية) ينص أحد بنودها على أنه لا يحق لأي طرف أن يكشف عن تفاصيلها ، كذلك العقد الموقع بين السيد وزير الإرشاد والأوقاف السابق (أزهري التجاني) وبين الطيب مختار الأمين العام السابق للأوقاف والذي بموجبه كان يتقاضى مبلغ (60) ألف ريال سعودي(بالخارج) و(40) ألف جنيه (بالداخل) وقد تضمن العقد المزايا التالية:
• أربع تذاكر سفر للخارج بدرجة رجال الأعمال نقدًا (لم تحدد محطة الوصول)
• دفع تكلفة الإنترنت للاستعمال (الشخصي) والرسمي
• الإعفاء من ضريبة الدخل الشخصي.
• الإعفاء من الزكاة (أيوه الزكاة الواااحدة دي)
• عربة أو بدل عربة (3) آلاف جنيه شهرياً !
يعني وبدون تضريب (ونطلع بالواحد وشنو شنو) فإن هذا العقد (السري) تساوي مخصصاته أكثر من (عشرين ضعف) مخصصات السيد النائب الأول !
طيب الكلام الفوق ده كلو قلناهو ليه؟
قلناهو عشان نوري إنو التساهل في التعامل مع المال العام هو ما أفضي بالحكومة (للإفلاس) كما صرح بذلك وزير ماليتها الذي أجري عملية لرتق طبلة إذن إبنه بمبلغ 33 ألف دولار من خزينة الدولة !
على مدار سنين طويلة (أستبيح) المال العام بصورة لم يسبق لها مثيل وقد إنعدمت الرقابة والمحاسبة إذ لم نر على مدي أكثر من عشرين عاماً مسئولاً واحداً طالته يد العدالة وقدم للمحاكمة بسبب إستباحته للمال العام !
وبسبب هذا التراخي (المتعمد) إنطلاقاً من (فقه السترة) طال الفساد و(الهبر) أماكن لها قدسيتها كنا نربأ للقائمين عليها الخوض في مستنقع الفساد الآسن كهيئة الحج والعمرة والأوقاف وديوان الزكاة الذي تبرع أمينه العام (السابق) بمبلغ 50 ألف دولار لقناة فضائية قبل ست سنوات فلا قامت القناة ولا قام الديوان بإسترداد المبلغ بينما الفقراء يشكون لطوب الأرض !
العبدلله يعتقد أن العلة لا توجد في مخصصات (النائب الأول) التي تلاها أمام البرلمان والتي لا تصلح أن تكون مؤشراً (لشئ) إنما العلة تكمن في (التهاون) الذي صاحب مسألة المال العام لسنوات طوال لدرجة أن هنالك الكثير من الشركات والمؤسسات الحكومية أصبحت ترفض مراجعة حساباتها بواسطة المراجع العام (عدييييل كده) ومافيش حد بيقول ليها تلت التلاته كم !
هذا غير تلك البدعة التى لم نر مثلها عند الأولين ولا الآخرين وهي (قصة) تجنيب بعض الأموال الحكومية في حسابات خاصة وعدم تبعيتها (لوزارة المالية) مع علم الدولة بذلك ! وهذا لعمري فساد ما بعده فساد وخلط للعام بالخاص يوضح بما لا يدع مجالاً للشك إنو (الدولة ما فلست من هين) !!

كسرة :

- وجه النائب الأول المواطنين إنو (يمدوا رجلينهم قدر لحافهم) ... مش لمن يكون في (لحاف) من اساسو !!

كسرة ثابتة :
أخبار ملف خط هيثرو العند النائب العام شنو(ووو ووو)؟





تعليقات 46 | إهداء 0 | زيارات 10408

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#403272 [وحيد]
0.00/5 (0 صوت)

06-24-2012 11:38 AM
موظف يبلغ راتبه و امتيازاته الوظيفية 400 جنيه جديد مثبتة في شهادة مرتب موثقة يمكن ان يقف امام الناس البرلمان و يقسم قسما مغلظا و هو صادق ان ذلك راتبه. نفس الموظف ينال - مع ذلك الراتب - حوافز و مخصصات تبلغ ثلاثة الف جنيه شهريا ..... ينطبق ذلك على السواد الاعظم من موظفي الحكومة اصحاب الايدي المتوضئة، النائب الاول قدم شهادة المرتب الرسمية و نحن مصدقون، لكن سعادته لم يحدثنا عن المخصصات و الحوافز الاخري التي تبلغ مئات اضعاف ذلك الراتب الهزيل... و سعادته ايضا لم يحدثنا عن الخزينة الضخمة التي تحتوي على اوراق البنكنوت بالرزم الكبيرة و التي تاتي راسا وطازجة من مطبعةالعملة!


#402992 [برانتود]
0.00/5 (0 صوت)

06-24-2012 07:36 AM
بدل ضحية بس مش يغرق بنك بحاله؟؟


#402646 [عبدالله]
5.00/5 (1 صوت)

06-23-2012 10:17 PM
عليى الطلاق حيرونا معاهم -- لكن هل هولاء ياكلون ويتمتعون وينامون كبقية البشر - يعنى لا يحسون بما فعلوا 0 لا اعتقد مهما مات الضمير ؟؟؟؟؟؟؟؟؟؟؟؟؟؟؟؟؟؟؟؟


#402586 [كرونا النسوان دقونا]
5.00/5 (1 صوت)

06-23-2012 09:09 PM
ا شنق الفيل الرئيس يعرس تالته عشان شنو زولك ده ماهندو فى النسوان ده قال ليك بيهبش وبيعصر خروف الضحيه اكتر من وداد-


#402531 [خالي الدسم]
5.00/5 (3 صوت)

06-23-2012 08:12 PM
بدل ضحية 90 مليون

ليه اصلو دا كان بضبح قرنتي ولا شنو


#402491 [ود البلد بالجد]
5.00/5 (1 صوت)

06-23-2012 07:41 PM
يا جبرة ما محنتنا خليها مستورة عمك بتاع 10000 الف ده عنده مستشفى خاص في تركية اي مستشفى عديل يعالج في الترك ويخلى ناس ابكورة وكلتوم مالنا ياجبرة في بلاد الترك متموص


#402477 [ubedallawd]
0.00/5 (0 صوت)

06-23-2012 07:22 PM
اخبار الثورة شنو؟
ألثورة هي الشي الصعب الذي يريحنا من هولاء التماسيح ومن عقوداتهم السرية ومن سر الليل
ياش

عب لهبك ثوريتك انت تلقي مرادك والفي نيتك.


#402430 [محمد]
0.00/5 (0 صوت)

06-23-2012 06:42 PM
انتو قناة الضحي دي من مصارف الزكاة التكانية الدرسونا ليها في الابتدائي (كنا حافظين الآية الكريمة لكن ما عارف لحد أسه الحصل شنو)... (يا ربي يكون غيرو المنهج وغيرو مصارف الزكاة معاهو؟؟؟؟؟؟؟؟؟؟)


#402392 [ابوالجعران]
5.00/5 (1 صوت)

06-23-2012 06:03 PM
ياجبره ما توري الناس ديل مواطن الخلل وان كان هم لهم اذان لا يسمعون بها واعين لايرون بها ولكن من باب الاحتياط فهم الان بدؤ الانتحار البطئ مع استمرار مسلسل الفساد المحمي وموفوضيه حمايه و تقنين الفساد ولا تعشم في محاربه الفساد فهو استراتيجيه متبعه من تاسيس الانقاذ وهي عماد سياسه التمكين حتي وصل الي نخاع العظام في مفاصل الدوله وضرب ديوان الذكاه وهيئه الحج والعمره والسلك القضائي وجميع مناطق العفهغير ماذكرت من تجنيب للمال العام في الحسابات الخاصه باهل الحسبه وهم لهم رب يراقبهم وما محتاجين للمراجع العام ولا النائب العام ما هم البدريين الموكلين بامر هذه الامه وغرهم في دينهم الغرور وغرهم بالله الغرور وهم السلطه والثروه تؤم لا ينفصلا ابدا بحسب توصيه منظرهم الدكتور حسن الترابي في بدايه عهدهم اما مساءله الفساد الذي وصل نخاع العظام هذه فقد اقتبستها منه اما مساءله الفساد الذي ضرب مواطن العفه وهو ديليل علي انهيار اي نظام فقد اقتبستها من احد الكتاب المصريين المخضرمين وبحسب تحليلي ان الانقاذ وصلت مرحله الشيخوخه وعناد وصلف وتكبر وعنجهيه اهلها وتماديهم في حمايه الفساد والمفسدين والظلم الذي يقع علي العامه من ابناء الشعب وطاحنونه الحرب الاهليه التي اشعلوها لتحرق شباب الوطن عبر اقتتالهم مع بعضهم بعضا كلها سوف تعجل برحيلهم واعتقد جازما حتي لو افقاق اهل الانقاذ من سكرتهم ( سكره السلطه والثروه والبطش الامني وتكميم الافواه ) لن تفيدهم فهم وصلوا مرحله لارجعه فيها عن الانتحار الذي جروه لانفسهم بايديهم ولو انهم مع بدايه الربيع العربي بدؤ من حيث انتهي الربيع العربي ( اطلاق الحريات - استقلال القضاء - التوظيف بالكفاءه - بتر الفساد وليس مكافحه الفساد والاهتما بالمشاريع الانتاجيه وتوظيف الخريجيين بها ) ولكن انظر ماذا فعلوا العكس تماما فالربيع قادم اليهم لا محاله


#402357 [مدحت عروة]
4.50/5 (4 صوت)

06-23-2012 05:29 PM
لكن يا الفاتح جبرا القروش البيتصرفوا فيها ناس الانقاذ ويخموها ويتعالجوا بيها ويعملوا بيها اى حاجة انتو قايلنها قروش الشعب السودانى؟؟؟القروش دى هم جايبنها من دهب حبوباتهم واطيان اجدادهم!!! ما كتر خيرهم البيدوكم مواهى وبيصرفوا شوية قروش على التعليم والصحة وعملوا ليكم الطرق والكبارى؟؟؟ اتقوا الله فى الناس ديل يا اخى!!!!!!!!!!!!! انتوا كنتوا شحادين قبل الانقاذ التى انقذتكم من شرب الشاهى بدون سكر وصف الرغيف والبنزين!!!!! ما ممكن القى لى طريقة فى وزارة كده انشاء الله وزير اعلام؟؟؟!!!!بالمناسبة اخبار المؤتمر القومى الدستورى شنو وكذلك اخبار خط هيثرو شنو؟؟؟؟؟؟؟؟؟؟


#402350 [الشنق الفيل]
5.00/5 (2 صوت)

06-23-2012 05:24 PM
نفسي اعرف البت العرسها عمر البشير دي من وين؟ التلت بيها دي؟ وملبدها وين؟ ووداد عارف ه الكلام ده ولا ما عارفه؟ ولو عارفة رضوها بشنو؟ وكم؟ ومن حق منو؟ واسئلة اخري؟ ناس همها تدبل وتتلت وناس؟؟؟؟؟؟؟؟


#402281 [زازووق]
5.00/5 (2 صوت)

06-23-2012 04:16 PM
الصالح العام
التمكين بلا مؤهلات
المحسوبية
اكل البلح والفول فى الاجتماعات
العنصرية
الجهل
البلادة
كتر الافتتاحات والرقص والحفلات
الكضب
وتدبيل الزيجات
وكتر السفر والبدلات
من بعض اسباب الفلسة
حسبى الله


#402276 [Heron]
5.00/5 (1 صوت)

06-23-2012 04:13 PM
بعدين ازهري التجاني البتتكلم عنو دا بدا اللبع من سنة 93 لمن كان امين الصندوق القومي لدعم الطلاب في ولاية الجزيرة اسال الدفة 15 في جامة الجزيرة بيعوفو هو شنو.ديل اكل الحرام كملوهو و دخلو في السحت واللبع ابو تقيل.


#402267 [Heron]
5.00/5 (3 صوت)

06-23-2012 04:07 PM
بعد مية سنة لي قدام السودان دا تاني ما حيقوم على حيلو .الكيزان الحرامية ضربوا البلد في المفاصل والركب كيف بس يقوم تاني.


#402197 [معتز]
5.00/5 (1 صوت)

06-23-2012 03:26 PM
والله لو لحس كوعو ما بنصدقوا


#402183 [nader]
3.00/5 (1 صوت)

06-23-2012 03:15 PM
ياخى عليك الله تضيف قناة الضحى بتاعة ديوان الزكاه دى مع الكسره الثابته بتاعة خط هيثروووو امكن النائب العام انتبه واحقق فيها ال 50 الف دولار ،،،،،،،،،،،،،،،،،،،،،،،،،،،،،،،،،، اخبار قناة الضحى الاسلاميه شنووووو


#402169 [M. Ayyoub]
3.75/5 (5 صوت)

06-23-2012 03:09 PM
لا يهمنا إن كان راتب النائب الأول مليار جنيها أو دولارا أو دانقا أو سحتوتا ولا يهمنا إن كان يشتغل حتى بالمجان.. ما يهمنا أننا لم نعد نطيقهم في الحكم .. ولا نريد انقاذهم لنا .. ولا نريد فشلهم المستمر لفوق الثلاثة والعشرين عاما ولا نريد حروبهم المستمرة كحروب داحس والغبراء .. ولا نريد عنصريتهم البغيضة المنتنة .. سئمنا أشكالهم الغبراء .. وهتافاتهم المنافقة.. وخطبهم الجوفاء وألسنتهم الكذوبة .. لا يهمنا إن كانوا يعملون لنا أو علينا .. لا نريدهم جميعا ولا نريد دينهم المزعوم .. نحن نريد فقط اسقاطهم ونريدهم في مزابل التاريخ ولاهاي حيث يستحقون التواجد.. نحن نريد اسقاط هذا النظام .. انتهى


#402114 [3Atel]
3.75/5 (6 صوت)

06-23-2012 02:31 PM
90 مليون بدل عيد ضحية ؟؟؟؟؟ يا جماعة انتو بتتكلموا كيف ؟ 90 مليون دى اكان ممكن توظف ليها 90خريج 90 مليون دى بتعيش ليها 90 اسرة ... انا لو لقيتا قبل 3 سنين اكنت اشتريت بيها بيت وحلحلت مشاكلى كلها .... يجى الحرامى دة يصرفا بدل يوم واحد ؟ ليه ؟ عمل لينا شنو ؟ قدم لينا شنو؟ اللهم احعل ثأرنا على من ظلمنا , اللهم انتقم من تجار الدين الباعو الدين .


#402103 [radona-d]
1.00/5 (1 صوت)

06-23-2012 02:23 PM
يااستاذ جبرة
النائب الاول مظلوم ظلم الحسن والحسين لذلك من العدل تعديل راتبه وبدلاته
واضيف
ان النائب البرلماني ذكر بان هنالك متنفذ يشغل 14 وظيفة
سوبرمان
وهذا يدل انه اكثر عبقرية من اينشتاين
لكن ما كان له وقد ضيعت مثل هذه المواهب لامن فلسوا الحكومة
انت قايل الاونطة دي يقت تمشي
المواطن بقى فاهم لكن خوفه من البطش يحول دون احتجاجه
والمعارضة مافي
المعركة بقت المؤتمر الوطني طرف والشعب الطرف الثاني
والله يستر


#402102 [سوداني متقاعد]
0.00/5 (0 صوت)

06-23-2012 02:22 PM
نصيحة لكل منسوبي النظام، البلد دي فلست بالجد. بالثورة ولابدونهاامتيازاتكم حتقيف، بس بالثورة البدات دي في احتمال بسيط نلقى طريقة دعم من المجتمع الدولي ونشغل خط انابيب البترول مع الجنوب ونوقف الحروب.


#402060 [امين الشريف]
5.00/5 (1 صوت)

06-23-2012 01:54 PM
والله مش تجيب كشف الراتب بتاعك

لو تجيب كشف لحساباتك في البنوك وتثبت ان رصيدك زيرو

كل ده ما بحلك لانك ان لم تكن مفسد في حقيقة الامر فقد شاركت في الفساد

بطريقة او بأخرى وسكوتك عن كل جرائم نظامك من قتل وتعذيب وتنكيل

وابادات جماعية كل ذلك يعتبر جريمة فلم تنهى ولم تستنكر كل هذه الجرائم

لذا البتعمل فيهو ده كلو ما بحلك


ردود على امين الشريف
United States [alx] 06-23-2012 05:56 PM
علا يا امين قول لي ,,, النائب الاول دا دحين بقدر علي العود


#402005 [زول]
0.00/5 (0 صوت)

06-23-2012 01:19 PM
القصة ما انك تجيب جدول مخصصات السؤال هو من اين لك هذا دا السؤال وكل كوز يجيب لينا العندو ويورينا جابو من وين الناس ديل خبيثين جدا عايزين يغرقونا فى شبر موية كل واحد يجيب تفاصيل مرتبو ويخلينا نحك فى راسنا يا ربى نثبت انو حرام كيف ؟ كان ليكم نحن ما بنتوة ساهل كدة سؤالنا واحد يا على عثمان خلينا من تفاصيل مرتبك بيوتك وقصورك من وين


#401998 [ابويحيى]
4.50/5 (7 صوت)

06-23-2012 01:13 PM
والله والله العظيم اسكن جوار منزل على عثمان محمد طه واصلى بالمسجدالمجاور لمنزله فالذين يصلون معنا بالمسجد من حراس امن وموظفين وعمال حدائق من دون الطباخين والخدم من اناث وذكور يصبون الى نصف عدد المصلين بالله عليك كم رواتبهم هذا من غير أن اعرج لوزراء اخرين يجاوروننا تعال شوف البذخ والله هذا شىء حيرنا مع العلم اننى مغترب ولمدة ثلاث عقود اعجز عن اغطى مصاريف عطلتى بالسودان رقم أننى ولافخر من الفئه أ فى درجات سلم المغتربين اعانكم الله يا اهلنا ولك الله يا بلادى قال ايه عشره مليون ولاحتى عشرين مليون لاتمكنك من العيش بهذا البذخ اليس الجز المنور من شارع الجزار الجزئيه الشماليه من الشارع الى بيتك ولم تستمر اعمدة الاناره الى شارع المشتل وانت تدرى السيد عبالرحمن سوار الدهب فى الجزء المظلم من الشارع وكذلك رجل الاعمال سعود البرير واخرين من الاشراف كان وزراء سابقين ايام الازهرى او النميرى اتق الله فيما تقول واعلم ان الله يراك ويسمعك فاخدع السامعين من الشعب ولكن لا الدستوريين ولابلطجية الانقاذ لان يعرفون كذبك .


ردود على ابويحيى
United States [خالد فارس] 06-23-2012 05:26 PM
الاخ ابويحيي رجال الامن والطباخين والخدم كل هؤلاء رواتبهم من خزينة الدولة حتي الاكل البيدخل البيت من خزينة الدولة هذا راتب صافي علي البنك علي طول


#401994 [إبن السودان البار ==--***]
5.00/5 (3 صوت)

06-23-2012 01:07 PM
فلست من هين؟ يا استاذ جبرة السؤال دا ما بقدر يجيبك عليه الريس ( ذو التلاتة أنوار) الا يستعين بخبير كارب ؟ زي الخبراء مستشاريه جوجو وعبودي !!! مالم حلاتهم مستشارين وخبراء مفتحين وأولاد أسياد تقدر تقول فيهم شنووو؟؟؟


#401993 [الزُول الكَانْ سَمِحْ]
4.25/5 (3 صوت)

06-23-2012 01:05 PM
يا أخوان

والله اليومين ديل الراكوبة فاقدة عضوين أساسيين هما:

عبد الواحد المستغرب أد الإستغراب

سليمان قش

وأهدى ليهم مقطع من أغنية الرائع الراحل محمد حسنين

يا ناس إنتو وين إنتو ولييه غبتو


ردود على الزُول الكَانْ سَمِحْ
United States [سليمان قش] 06-23-2012 09:46 PM
الزول الكان سمح تحياتنا وشكرا علي سوالك عنا ... ياحبيبنا نحن في الشارع اسال الله لنا التوفيق وربنا يجمعنا في ساعة خير


#401990 [ثائر ضد الفساد]
0.00/5 (0 صوت)

06-23-2012 01:02 PM
سؤال للاسلامين وهيئة علماء السودان المحترمة حتى الان

ليه بتكون في اموال خارج وزارة المالية

وليه السكوت


#401985 [صالح عام]
0.00/5 (0 صوت)

06-23-2012 01:00 PM
يا حبره الليله دى جبت الشجاعه دى من وين ما قالو الحلفاويين جبانين


#401981 [tarig]
0.00/5 (0 صوت)

06-23-2012 12:57 PM
اخبار قضية المستشار مدحت شنو ووووووووووووو


#401966 [شحاته]
0.00/5 (0 صوت)

06-23-2012 12:49 PM
الاستاذ الفاتح لك التجله طبعا المخصصات غير الهبرات وديل الهبروا ملو وافرغوا خزينه البلاد عذبوا العباد وللحساب ميعاد وقد اقنربت الساعه فليس للشعب من راد وثوره ثوره حتى كنس الحثاله


#401964 [wafi]
0.00/5 (0 صوت)

06-23-2012 12:48 PM
يا جبرا تحيلتي وتحيات خاصة للشعب السودانب البطل، الذي يجبرنا علي احترامه كلما ضاقت علينا
وعزرا،،،،، اليوم لا ينفع الكلام ( المغتغت ) الكلام بكل وضوح _ انتو يا حكومة حرامية ولصوص و ليس لديكم حلول _ سياسية واقتصادية واجتماعية .... الخ يعني العام الدراسي انتهاء ونتيجتكم العامة رسوب في كل المواد . وعليه النتيجة الاجمالية الوحيدة الطلعنا بيها من الانقاذ [ فشل الدين بصورته الحالية في ادارة دولة. ] وعليه نقترح دستور علماني مش مدني [ بوضوح ] وناس الدين يرجعوا لمساجدتهم وكفاية فشل - عشان الاسلام الفضل في نفوس الناس .

عصينا عصينا وشلنا عصينا وعلي الحرية منو بوصينا

لن يحكمنا تجار الدين

وشكرا للجيل الشاب امل الامة ولا تنتظرونا [ نحن الجيل السابق - سبب دمار السودان ] وربنا يحميكم
ودمتم لهذا الوطن


#401938 [الصابري]
0.00/5 (0 صوت)

06-23-2012 12:36 PM
جداول المرتبات حتى لو كانت صحيحة لا تثبت النزاهة والبراءة من الفساد وكلنا نعلم انهم لا يعتمدون على المرتبات وكل انسان بسيط يعرف انهم سيحتاطون لهذا الأمر ويضعون جداول مرتبات عادية .
السؤال هو كيف كانت ادارتهم لمقدرات البلد كلها وما هي تفاصيل الصرف الحقيقية لكل بنود موازنة الدولة؟
وأين ذهبت أموال البترول؟
وما هي حقيقة الشركات الحكومية وشبه الحكومية؟
وكيف تمت إدارة عملية الخصخصة؟


#401904 [ابن السودان حافى]
0.00/5 (0 صوت)

06-23-2012 12:18 PM
انطلقت ثورتنا ولن تقف مش لو ورانا كل ظروف القصر الجمهورى اكان كانت مختومه بالشمع الاحمر ولا الاخضر ولا ما مختومه هذه مسرحيه مكشوفه وساذجه لن تنطلى على شعب السودان العظيم العب غيرها هانت وفات الوقت بل تخطاكم وناظره قريب


#401902 [ود ام بده]
0.00/5 (0 صوت)

06-23-2012 12:17 PM
اسلوب عصابات المافيه
شيلنى واشيلك


#401885 [Omar Tomsah]
5.00/5 (1 صوت)

06-23-2012 12:08 PM
معقول إعفاء من الزكاة...!!! يكون بدفع جزية ياربي؟


#401868 [ود فارس]
0.00/5 (0 صوت)

06-23-2012 11:55 AM
المعنا ياود جبره انو المواطنين ديل نايميت عري ( بكسر العاء )
والكلمة ده لااولاد المصارين البيوض تعني ركوب الحمار من غير لبده اوسرج


#401853 [أقداوي]
0.00/5 (0 صوت)

06-23-2012 11:48 AM
ياأستاذ الفاتح:
يا أخي خط ههيثرو أبدأ ليه :
واوات جديدة ..
الست شهور ديك أقصد الستة ووات ديك خلاااااس أدت غرضها أو قرضها على كيفك..


#401847 [الزُول الكَانْ سَمِحْ]
3.00/5 (1 صوت)

06-23-2012 11:45 AM
يا أستاذ جبرا

يا أخى هو إسمو (المال العام) يعنى بالدارجى كدا...مال سايب أى واحد يلقى فيهو خمشة يهبرا

التسمية من أساسا غير صحيحة والناس ديل إستغلوا العمومية دى وفسروها زى كتير من تفسيراتهم وبقوا يجنبوه.. ويعوموهوا.. ويغسلوهوا.. ويكوهوا.. ويصبنوهوا..ويقسموهواويتبرعوا بيهوا زى ال50 الف دولار بتاعت الفضائية..واللإسعاف بتاع مستشفى الصداقة أم درمان الكانوا وادنوا غزة والصومال واخيراً إنقطع أترو..وما معروف شيخ طنون غلو خط مواصلات ولا باعو تشليح

يا طنون ( رجع الإسعاف ) الناس محتاجين ليهو

أخبار المظاهرات فى أب روف ( شنووووووووووووووووووو)؟


#401823 [تاج]
0.00/5 (0 صوت)

06-23-2012 11:28 AM
الكلام دا كلو قلناهو لييييييييييييييييييييييييييييييه عشان نعرف قيمة الكيزان.


#401813 [Hamed]
3.00/5 (1 صوت)

06-23-2012 11:25 AM
والله يا جبرة الانقاذ دي حتخش موسوعة غينيس لافسد دولة فى التاريخ منذ ان عرف الانسان حاجة اسمها دولة! افسد الحكومات تراعى بعض مصالح شعبها لتبقى على الاقل فى الحكم، لكن ناس زى ديل زى الجراد ياكلو اى شئ، اصلا ما فى فى تارخ الدنيا دى. لكن صراحة الجماعة ديل حقروا بينا ولو حاولت ترفع صوتك هم جاهزين بكواريك الله اكبر وهى لله لغاية ما صوتك يروح فى زحمة التهليل والتكبير (الفى فاضى ساكت)
غايتو ليهم يوم. وربنا ما بيترك حق مظلوم. والشعب السودانى الناس ديل ظلموه ظلم الحسن والحسين.


#401805 [ود شندي]
0.00/5 (0 صوت)

06-23-2012 11:21 AM
الحل في الالتفاف حول الثورة التي انطلقت شرارتها ويجب عدم تمليك بلاطجة وشبيحة وبلطجية وجرذان النظام من اسكاتها وققمعها وإلا لن تقوم لنا قائمة بعد ذلك
كسرة :
كثر خيرك ياجبرا


#401788 [hamid]
0.00/5 (0 صوت)

06-23-2012 11:12 AM
أستاذ الفاتح يا أخي الزول ده ما بيتكلم عن لحافاتنا أنحنا ده بتكلم عن لحاااااااااااافتهم هم


#401775 [خالد فارس]
5.00/5 (2 صوت)

06-23-2012 11:06 AM
10886ده رقم موبايل وله شنو (ده كل ما بهمنا في حاجة اسمها ابرا زمة عملتو وله ماعملتو عشان نحدد مين فيكم الحرامي)


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة