المقالات
السياسة
ارشيف مقالات سياسية
رسائل إلى الرئيس .. بالدارجي المُريح 8
رسائل إلى الرئيس .. بالدارجي المُريح 8
06-23-2012 09:00 PM

رسائل إلى الرئيس .. بالدارجي المُريح 8

طارق عبدالرحيم
[email protected]

يا ريس الموضوع دا دخل الحوش .. ما حوش بانقا لا لا .. حوش الكروش الخاوية و الجلد المغبش و ناشف .. الناس الشينين و مغبشين لكنهم أولاد حلال سِلمت البطن الجابتهم .. البطن الا أكلت مال حرام و لا شبعت بى سرقة حقوق الغير .. يا ريس أضانك مافي ياريتك لو تهبش جيب أفعص مسؤل عندك حتلقاهو متندل بى مال الناس الشقيانة و روحها طالعا بتكدح من شان لقيمة كسرة وهديمة تستر الجسد الأصبح باقي عضام .. أهبش أفعص وزير و تلقاهو عندو مزرعة و عمارة في أرقى أحياء الخرطوم .. و شركات بس من أين لهم هذا و نحن عارفنهم لآمن جوا السلطة ما كان عندهم التكتحوا .. الليلة راكب ليهو عربية بى ميات الملاين في الوقت الأهلوا رواعية و مزارعية ركاب حمير ما بيعرفوا عن العربية غير إنها الداهية أم حديد و ترتارات لساتك .. ما عيب إنو يكون جاي من ضهر الفقارى لأنهم الغبش الإيدينهم ناشفة و كرعينهم مشققة ديل ربوهو بالحلال و تعبوا عليهو بالحلال لكن هو جاء مشى عكسهم سلب و نهب و ناطحات سحاب و عماير و بعدها يقوم يمشي عمرة علشان يكفر بيها عمايلو .. لكن حقوق الناس ما بيمحيها بحر و بتكون معلقة في الرقاب لآمن يقابل بيها خالقوا يوميها حيشوف الحور العين رهاب رهاب ..
ياريس أهبش مرة بى كراعينك شوارع مايو و لا جبرونا و لا دار السلام و لا أي هامش في الخرطوم حتعرف إنو كلام واليك في وادي و ناس الهامش في وادي حتعرف إنو في ناس بتعرف الموت أكتر من معرفتها بالعلاج .. بيموتوا مش علشان مافي حق الحقنة بس بيموتوا علشان مافي حق اللقمة كمان
ياريس البغلة ما في الإبريق .. البغلة في البرلمان ماسكين في السُلطة و في رقابنا يصرفوا مخصصات و مرتبات مليونية .. بالطريقة دي حتعمل ليها مليونية في أبوجنزير و تبدأ قصة الشعب الجيعان و النظام الشبعان و يومها الحناجر حتجتاز حاجز الخوف بالصراخ ..‏‎ ‎
قبل كم يوم في والي كبيييير قال إنو بلد فيها إنت ما بتجوع .. يا ريس الوالي دا كضاب لأنو هسي في اللحظة الأنا بكتب فيها الرسالة دي حاسي إني جيعان .. و قبل فترة جات عربية النفايات زيارة لى حلتنا (طبعاً عربية النفايات بتجي حلتنا زي عيد الفطر مرة في السنة لكن بيدفعونا قروش النفايات شهرياً) أها يا ريس عندنا جارتنا جابت ليها كيس بتاع (قرقوش-عيش ناشف) و أدتو لى الولد الراكب وراء في عربية النفايات .. الولد شدة ما فرح بالقرقوش الناشف لآمن قام سلم عليها في راسها .. يا ريس ما جيعانين كيف إذا الناس مالآقية (عيش ناشف) ؟ .. و نفس الوالي دا قبل فترة كان عقد زواج إبنته في مسجد النور الآتكم و كان في كمية عربات حوال المسجد بالميات أقل عربية فيهم بين مية مليون لى تمنمية مليون .. سعرهم في مجموعهم بالميت كدة يحل مشكلة الجوع في كم ولاية ..
يا ريس في عمنا كبييييير كدة قال عن الفساد (عرش بيتك كان ما مقدود الموية ما بتنقط في راسك) يعني خربانة من فوق .. فيا ريس أريتك تسد لينا عرشنا دا لأنو الموية كابة في راسنا شوووووووووو .. و زي ما قال القدال (إن بليتا أختا الرملة ما تقع البكان الهش .. دي الممطورة ما بتبالي من الرش) و نحن إنبلينا بالحيل و الوطن لساتو هش و الناس ما حتبالي تاني بالخوف .. و خوفك من تلحق رفيقك ..


جريدة الجريدة




تعليقات 7 | إهداء 0 | زيارات 3713

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#404481 [الحق لا يضيع]
0.00/5 (0 صوت)

06-24-2012 10:29 PM
كلامك صاح ياناااااااااااس احزرو الفتنه البلد حقتنا ماحقت عمر البشير وحراميتو الناس ديل سرقوا تعبنا وانحنا لازم نكون واعين عشان مانخرب بلدنا ونعتبر من ليبيا وتونس ومصر وسوريا في مصر الناس بقت تكتل بعض عشان الكوره وليبيا الله يعينك وتونس كلها بقت عصابات وبالطريقه دي انحنا ماشين حسب السياسات الاسرائيليه ولو ماعارفين اقرو برتوكولات حكماء صهيون النسخه الاصليه لنه 1948م الناس ديل مخططين لي ده كلو ودايرين يدوسونا وبعدين الندم مابينفع الغلط في الحاجات دي مافيه رجعهوالرسول (ص)وصانا عشان مانقع في الغلط ده اعمل العليك وحقك اطلبو من الله ما من زول والحراميه ديل عندهم رب بيحاسبم بالقرش الحساب يوم القيامه ما باليوم بالقرش والطراده انشاء الله تكون متزكرنها (الطراده)كان مصرفي في المدرسه الكلام ده مابعيد قبل كم سنه لاكن انتو عارفين الدمر الاتحاد السوفيتي منو اليهود اي والله اليهود عارفين كيف كانو بشتغلو في الاسواق ويشترو الدولار ويسجلو رقمو ويرسلو لي امريكا بالكود وبعدين يحرقو فجاء الرئيس الروسي لقه خزنتو فاضيه والبلد في تضخم وماقدر يستحمل المسؤليه بتاعت كم دوله اعلن الانفصال واي دوله تاكل نارا اسي الحاصل عندنا التجار دسو الدولار واحتكرو السوق الله منزل ليهم ايات في القران بعدين حنشوف الكلام ده يوم القيامه انتو عارفين لو حرقتو الدولار في السودان ورسلتا رقمو لي ................بدوك بالنسبه يعني بالعربي كدا الدولار بي اتنين دولار ولو حقته مئه بتزيد بتبقه 250 دولار وده الحاصل الما عارف يعرف البلد في الهاويه واذا الخراب ما نفع الحرب بتنفع معانا لانو البتعمل فيهو اسرائيل في بورتسودان ده ما تخريب بحاولو يعرفو دفاعاتنا ويخترقوها كيف اعملو حسابكم والرسول وصاكم انا ما حاكون افهم من نبينا عليه الصلاه والسلام لاكن اي زول يعرف الحاصل حوليه شنو بعدين يتصرف والبتعملو اسي حيكون مسجل في التاريخ لانو دي ما حياتك ده مصير جنس وعرق وديانه واستعدددددددددددددددددددددددددددو للحرب


#404435 [اعوذ بالله من اولاد باقان]
0.00/5 (0 صوت)

06-24-2012 09:56 PM
جرب بالفصحى كمان... عشان يكون عندك مستقبل


#403927 [ابوعرب]
0.00/5 (0 صوت)

06-24-2012 04:34 PM
آ زول انت ماك نصيح تكتب رسالة للبشير . هو اكان بعرف يقرأ كان بقينا كدي ؟ البشير يا اخوي قاعد وسط الحرامية وهو ذاتو بقي حرامي كلامك دا بشوفوا شوك شوك .. ما سمعت بالابتلاءات .. تري اهو المؤمن مصاب .. قال رسالة بالدارجي حيجي زولو داك يقول ليك الحس كوعك ....


#403615 [خالد احمد مختار]
0.00/5 (0 صوت)

06-24-2012 02:08 PM
اخونا انت قاعد تنفخ في قربه مقدوده


#403029 [زول ممغوص]
0.00/5 (0 صوت)

06-24-2012 08:50 AM
باخ هم كان عايزين يحلوا المشكلة ماساهلة
ما كل واحد كوز يتبرع بكم الف دولار ولا كم مليون كل حسب استطاعته!! يعنى هو صاحبهم مابستاهل ولاشنو يعنى ... ما هو الربا كروشهم دى يعنى مايساعدوا ولا هم بعرفوا يبلعوا بس


#402987 [حسن لكمة]
0.00/5 (0 صوت)

06-24-2012 07:25 AM
يا وليدى انت سافى صعوط؟؟


#402698 [نوبى]
5.00/5 (2 صوت)

06-23-2012 11:20 PM
لقد اسمعت لو ناديت حيا ولكن لا حياة لمن تنادى.


طارق عبدالرحيم
طارق عبدالرحيم

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة