المقالات
مكتبة كتاب المقالات والأعمدة
الفاتح يوسف جبرا
وكمان مستشفيات
وكمان مستشفيات
06-25-2012 08:51 AM

وكمان مستشفيات

الفاتح جبرا
[email protected]

تنبية :

هذا المقال ضار بالصحة ننصحك بعدم قراءته أو إتخاذ التدابير الصحية اللازمة لو (ركبت راسك وقريتو) ..
عزيزي القارئ .. لا تندهش إن وجدت إعلاناً بإحدي الصحف تطلب فيه وزارة (الخارجية) من بيوتات الخبرة العالمية التقدم لتنفيذ (دورات مياه عامة) بالمدينة (الفلانية) ، أو إن قرأت إعلاناً بصحيفة ما تطلب فيه وزارة (التربية) مقاولون أكفاء لتشييد (مراكز للشرطة) بالمدينة العلانية ، أو إن طالعت بصحيفة أخري عطاء لوزارة (الري) تطلب فيه من أصحاب (المطابع) التقدم من أجل طباعة (الكتاب المدرسي) لهذا العام الدراسي .
لا تصيبنك الدهشة يا صديقي فكل شئ ممكن في السودان فالقصة (جايطة) والإختصاصات (ملخبطة) وأي وزارة أو هيئة أو وحدة ممكن تعمل أي حاجة في أى حتة دون أن تلقى بالاً إن كانت هذه (الحاجة) تخصها أم لا .. والكلام ده على مسئولية العبد لله وهاكم الدليل بعد أن أنبهك عزيزي القارئ للتنبيه الذي ورد في صدر المقال .
جاء هذا الإعلان على صحيفة الشرق الأوسط (اللندنية) الصادرة في يوم السبت الموافق 23 يونيو 2012م وهو بعنوان (مشروع مدينة الأبيض الطبية – مستشفى الأبيض التخصصي ومركز علاج الأورام والسرطانات )
يقول الإعلان (في إطار التعاون المشترك بين وزارة الصحة الإتحادية ووحدة تنفيذ السدود ترغب وحدة تنفيذ السدود في تأهيل بيوت خبرة متخصصة في دراسة وتصميم مستشفيات ووضع منهجيات التشغيل والإدارة لمشروع مدينة الأبيض الطبية بعاصمة ولاية شمال كردفان بجمهورية السودان.
يتكون المشروع من مستشفى تخصصي بسعة (300) سرير ومركز لعلاج الأورام والسرطانات بسعة (100) سرير بكافة ملحقاتها الخدمية والسكنية .
بيوتات الخبرة المحلية والعالمية التي تأنس في نفسها الكفاءة الفنية يمكنها التقدم للحصول على مستندات التأهيل في الفترة من 27 يونيو حتى 12 يوليو 2012م على أن تعاد مستوفية للمطلوبات في تاريخ لا يتعدى 12 أغسطس 2012م !
إنتهي الإعلان وبالطبع لم تنته دهشتكم يا سادتي .. (قبل أن تستمر في القراءة أخير ليك راجع التنبيه الفوق داك تااااني )
بالرجوع إلى (قوقل) لمعرفة المزيد عن هذه الوحدة التي تنفذ سدود وكمان (مستشفيات) فقد إتضح لنا أن هذه الوحدة قد إنشئت بالقرار الجمهوري رقم 217 بتاريخ 18/9/2005م وقد نص القرار على تبعيتها مباشرة لرئاسة الجمهورية وقد تم منحها هذه الصلاحيات (البسيطة) :
• إدارة عملها بطريقة مستقلة ماليا واداريا
• لا تخضع لقوانين الخدمة العامة ولا قانون محاسبة العاملين
• لا تخضع للائحة الإجراءات المالية والمحاسبية الخ .
ولعلمك فقط أيها القارئ فإن صلاحيات وحدة تنفيذ السدود (وكمان مستشفيات)هي :
• إستقطاب التمويل اللازم (لعملها)مع إلزام وزارة المالية أو بنك السودان بضمانها .
• الدخول في مشاريع مشتركة مع دول الجوار لإنتاج الكهرباء وإنشاء شبكات وخطوط نقل الكهرباء
• التصرف في عائدات المشروعات التي تنفذها الوحدة (يعني ما تدخل الخزينة العامة)
• تعيين العاملين في كل الدرجات (لا لجنة إختيار ولا منافسات ولا يحزنون)
• وضع التصور اللازم لطريقة قيام المشاريع وصيغة التمويل والترويج لها
• وضع شروط الخدمة واللوائح والنظم الإدارية والمالية والتقنية
• مراجعة الأداء العام للوحدة .
طيب ده كوووولو عرفناهو .. كمان جابت ليها (مستشفيات) يعني (وزارة الصحة) دي تحفر (خيران) الخريف الجانا (فجأتن) ده !!

كسرة :
العبدلله يعتقد إنو عاوزين لينا عطاء لإستيراد كميات من (الدم) للمسئولين وعطاء تاااني لإستيراد (فهامات) لينا نحنا وكده !

كسرة ثابتة :
أخبار ملف خط هيثرو العند النائب العام شنو(ووو ووو)؟


تعليقات 37 | إهداء 1 | زيارات 7962

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#406633 [غلطة تساراي]
0.00/5 (0 صوت)

06-26-2012 08:04 AM
ركز معانا يا جبرة البلد فيها ثورة

بقيت تجلي الكورة واقفة

ارعوي


#406382 [نجم الدين عبد السلام]
0.00/5 (0 صوت)

06-25-2012 09:58 PM
الناس فى شنو و انت فى شنو غيتو جنس أكل عيش


#406248 [اوهاج محمد ابوفاطمه]
0.00/5 (0 صوت)

06-25-2012 06:52 PM
يا جبرا لا تفقع مرارتك نحن عندنا هيئه الموانى بورتسودان رئيس اللجنه الطبيه براد صيانه تم تعينه عامل صيانه غى ورشه الحوض
وزير الصحه كان بوليس - وزير الماليه سواق - قاضى العوائد وقوانين المجلس التشريعى المجازه فى هذا العهد عسكرى مركب مكنه قاضى مدريه برتبه مساعد


#406135 [Peter]
0.00/5 (0 صوت)

06-25-2012 05:24 PM
مع احترامي للاستاذ/ جبرا
لكن عمودك دة بيساعد الجماعة ديل و عامل ذي بلف الفايض بتاع الأوستن( الوري) تس..تس .. تس
فهمتها و لا تركب ليك فهامة
بالواضح كدة خلينا نتملي لامن نتفجر يا أستاذ جبرا .


#406073 [fatmon]
0.00/5 (0 صوت)

06-25-2012 04:44 PM
إنت معقول يكون فات عليك إنو رقاصنا ما بسيط عشان كده بكل بساطه لما الناس عرفت الفساد الضارب بأضنابة في كل مفاصل الدولة قام فصل ليهو فصيل بالجنبة عشان ينفذ بيهو حاجات فعلا الناس محتاجة ليها ويقوموا الناس يهتفوا بحياتو ويقولوا هو ما فاسد الجماعة المهاهو زي لما قالوا مرتوا فاسده وحرامية
عرس غيرها زيها بالضبط بالضبــــــــــــــــــــــــــــــــــــــــــــــــط. طبعا ده قدر فهموا الإتفقنا إنو ما بسيط وطبعا النواحي القانونية والدستورية والما بعرفوا داك دي أمور ثانوية
كده بكون ركبت ليك الفهامة يا إستأاااااااااااااااااااااااااااااذنــــــــــــــــــــــــــــــــــــا
كسرة:
أخبار المظاهرات عندكم شنو؟؟؟؟؟؟؟؟؟؟؟؟؟؟؟؟؟؟؟؟؟


#406022 [wafi]
5.00/5 (1 صوت)

06-25-2012 03:59 PM
تحياتي يا جبرا
انا شايفك الايام دي حقيقي بقيت بتبحث كثير - بحث بيعطيك شهادة الدكتوراه البقت كتير الايام دي.

والله انا بقرا كل يوم عن البرلمان والبحوث الزراعية وانت وغيرك من الصحفيين والمختصين والله انا حتي يوم امس مفتكر انو دكتور المتعافي - المسكوه مشروع الجزيرة -انا مفتكروا عندوا دكتزراه في القطن بالاخص
لكن في واحد بثق فيهوا قال لي ده دكتور عمومي بشري يعني طبيب وعليه ح اتعبك شويه واطلب منك تدينا تخصص كل الناس المشاركين في الحكومة - بدايه من الرئيس عمر البشير- عسكري الرتيه - عميد ( بدون اركان حرب ) انت تم الباقي وبنديك الدكتوراه الفخرية في موسوعة السودان البحثية


#405905 [استاذ]
0.00/5 (0 صوت)

06-25-2012 02:20 PM
هل تعلم انو وزير الكهرباء تخصصه هندسه زراعيه....محاريث


ردود على استاذ
United States [مواطنه] 06-25-2012 09:51 PM
وهل تعلم انه الرئيس تخصصه رقيص؟


#405887 [ابوالجعران]
5.00/5 (1 صوت)

06-25-2012 02:12 PM
خط هيثرو ده وصل النائب العام بعد عشره سنوات والنائب العام امامه 120 ملف فساد وخط هيثرو رقم 121 النائب العام محتاج نقول كده عشره سنوات اخري حتي يفتح لنا اول ملف فساد يعن يا ابو الفهامه خط هيثرو امامه 1200 سنه بالتمام والكمال حتي يري النور انت مش عارف النشر والتحدث عن الفساد ممنوع بامر نيابه امن الدوله


#405794 [مرضان مكهرب]
5.00/5 (3 صوت)

06-25-2012 01:25 PM
يا عمى فهامتك الليلة ما شغالة .. دى تكون من بركات وزيرة الكهرباء السستر د. تابيتا ..
الحكاية صارت لبن زيت فى تمرهندى ..


#405742 [ubedallawd]
5.00/5 (2 صوت)

06-25-2012 01:03 PM
لا سدود ولافتوح ياجبرة خلاص الثورة جات والاذدواجيات راحت والثورة
ياخرطوم ثوري لم ولن يحطكمنا الراقص ودكافوري


#405728 [tarig]
4.00/5 (3 صوت)

06-25-2012 12:56 PM
اخبار قضية المستشار مدحت شنو؟؟؟؟؟؟؟؟؟


#405712 [إبن السودان البار ==--///]
5.00/5 (3 صوت)

06-25-2012 12:49 PM
وعاملين لينا امتحان شهادة ورعب وهيلمان لطلبتنا وأحتفال بالأوائل ووزارة تعليم عالي وجامعات في كل ركن بها رعب الفصل والتنكيل بالطلاب ؟؟؟ والذي يتمعن في هذا الهيلمان والتفاخر بتعليمنا يعتقد ان حكومتنا تخطط للوصول الي القمر عن طريق خبرائنا الذين تحصلوا علي شهاداتهم بعد المرور من كل هذا الرعب والتعسف ؟؟؟ ليتخرجوا منها أغبياء ومعاقين لا يستطيعوا علاج كلاب حتي ومهندسين لا يستطيعوا عمل تصريف لمياه الأمطار سيبك من تصميم مستشفي 300 سرير وهذا حسب تقدير وتوجه هذه الحكومة الفاسدة وفاشلة؟؟؟ اذاً لماذا ندفع مبالغ طائلة ونضيع وقت في تعليم فاشل يخرج معوقين فاشلين يسوقو رقشات ويغسلوا العربات في امريكا ؟؟؟ من الأفيد ان نقفل هذه الجامعات والمعاهد ونعتمد كلياً في علاجنا علي الأردن ومصر وغيرها وفي الهندسة علي المصريين والأردنيين والهنود وغيرهم ونوفر أموالنا وقتنا ومجهودناالذي قد نستفيد به فيما هو انفع ؟؟؟ وأخبار سودانير ذاتها شنووو خلي خط هيثرو ؟؟؟ يا جبرا قول ليهم شيلوا شيلتكم الثورة اشتعلت وخلي الرقاص يطفيها ؟؟؟


#405707 [.]
5.00/5 (4 صوت)

06-25-2012 12:47 PM
في الواقع وحدة تنفيذ السدود هي وزارة مالية السودان الحقيقية. وزير المالية الحالي علي محمود حارسلو جراب فاضي ساكت (يعني ماسك ضنب الككو و شايل وش القباحة). كل اموال السودان موجودة لدي وحدة تنفيذ السدود


#405691 [مروان]
5.00/5 (1 صوت)

06-25-2012 12:36 PM
جبرا لا يخوض في كلام مباشر عن نظام البشير الفاسـد ويتواري بالقصص المضحكة والنقد الناعم الذي يضحك القارئ سـواء كان كوزا من اللصوص أو كان ثائرا ضـدهم.. كفى هروبا وتحايلا ياجبرا واترك الحركات الـ (نص كم) وتكلم كلاما مباشرا لأن وقت الجد قد حان (هذا أوان الشـد فاشـتدي زيم) واتركنا من هذه الخزعبلات والكلام الذي لا يودي ولا يجيب.


ردود على مروان
United States [اسامه] 06-25-2012 09:11 PM
عفارم عليك .... ده ما وقت ضحك !!


#405636 [عوض محمد احمد]
5.00/5 (1 صوت)

06-25-2012 12:05 PM
الاخ الفاتح الغريب شنو فى الموضوع ده ماشى عادى جدا جدا جدا - يعنى الناس دى تسرق عديل والا تكسر ليها بنك - ماالله اداهم قروش سايبه ، امال حايبنوا فلل ويركبوا احدث عربات ويشتروا شقق فى مليزيا ودبى من وين عيزهم يسرقوا - يعنى شنو لو سرقوا السرقوا قبالهم حصل ليهم شنو طالما بند الستره شغال ومفعل - الوصل البلد دى للمرحله دى شنو غير الحاجات دى - يعنى شنو اذا كان المواطن ماقدر ياكل غير وجبه واحده وهى اصلها غير كافيه نقول معليش يتدرب لى رمضان وبعدين يواصل لغاية مايلحق الرفيق الاعلى- وعدين بعنى شنو لما مصلحه تنوب عن مصلحه فى تقديم عطاءات او تنفيذ مشروعات فى النهايه الجيب واحد - اما موضوع التعيينات دى بتكون محسومه من قبل صدور القرار يعنى مافيها طريقه ( يعنى هم عوره عشان يعملوا اعلان فالجماعه جاهزين ومعينين) اما سى الذكر خط هيثرو فقد ادفن مع اللجنه ياخى هى بقت على خط هيثرو والا 50 الف دولار الفادنى والا الحج الا الاقطان ياعمى انسى - اما موضوع السكر الحايتقسم بالسعر الرسمى - ده باب اكل افتتح حديثا ولن ينجح حتى لو قعد الوالى امام كل ميزان- بالمناسبه قبل اقل من اسبوع كان السعر 3و5 واليوم 7 جنيه يعنى الفرق ماكبير ل الله يكون فى الفضل من بقايا الشعب واتمن الاتفرض ضرائب على المقابر والايرفع الدعم عن المقابر والاتفرض رسوم على المشيعين


#405635 [زازووق]
5.00/5 (1 صوت)

06-25-2012 12:05 PM
افهمك انا يا جبرة
قروش ناس السدود فاقت الحدود
وبدل ما يدوها المالية
قالوا يعملوا بيها المدينة الطبية دى
والباقى يسفسفوهو
فهمت ولا اعيد تانى؟؟!!!!
أخبار المستشار شنووووووووو؟؟؟!!!


#405598 [سوداني فضل]
5.00/5 (1 صوت)

06-25-2012 11:53 AM
[وقد نص القرار على تبعيتها مباشرة لرئاسة الجمهورية]. يدار بمديره أسامة بن الرجل الطيب عبدالله.

جهاز الأمن والمخابرات يتبع أيضاً لرئاسة الجمهورية - وبرضو زي السدود محصن تماماً فلا تمسه أجهزة الدولةالأخري، وميزانيته الرسمية يبلعا ومعاهاعائد شركاته مسأل أمام رئاسة الجمهورية فقط.

المجلس الوطني التشريعي يتبع أيضاً لرئاسة الجمهورية ويصفق ويبصم علي قراراتها منذ أن هي نية قرارات، ويدار بمديره العام أحمد إبراهيم (ما بنقدر نقول الطاهر)..

يوجد لزوم الفنكهة 90 (هيئة حزبية) تتبع لرئيس الجمهورية وتصرف عليها الرئاسةومعها أخرين عبر المظاريف المغلقة لشوية العضوية الفيهاوالراجل يسأل رئاسة الجمهورية لصاحبها البشير.

المؤكد إنو رئاسة الجمهورية دي ملكية مطلقة بلا جمهورية بلا ديقراطية بلا مؤسسات أكنسوا الوسخ..عشان تبنوا من جديد..........


#405585 [wudoof]
5.00/5 (1 صوت)

06-25-2012 11:48 AM
هذه هي الطريقة الحلال لاكل المال ال(.......) وكما هو معروف الزول عديلو عشان كده (فتح ليه عديييييييل)..؟؟! وما خفي اعظم، وهو ديدن اغلب الادارات، وهو مكمن الداء. تقول لي تقشف ورفع دعم والقربه مقدوده...؟؟!
ده العديل فما بالك في علاقات القربى الاخرى ؟؟؟
لقد شكا احد وزراء المالية السابقين، ان ما يدخل الخزينة العامة من الايرادات لايتجاو 17% من الايرادات (العديل) من غير ايرادات البترول سيئة الذكر.
اعلنت السلطات الماليزية ان استثمارات السودان لديها بلغت 13 مليال دولار، بينما يستجدي عثمان طه المغتربين، لارسال مدخراتهم الى السودان، عشان يلحقوهم امات طه..؟؟!!
وبرضو تقول لّي تقليص وتقشق ........!!
....كسره.....
اخبار التقليص والتقشف كيف ؟؟؟


#405543 [خالد فارس]
5.00/5 (1 صوت)

06-25-2012 11:32 AM
الاخ الفاتح جبرا يعني هي السدود لازم تكون سدود موية (هذا الاعلان يتبع لسدود الشرايين والاورده )يعني انت الان تعاني من الضغط والسكري والمراره والقولون يعني شرايينك مسدوده وهذا هو المقصود من الاعلان ده حسب فهمتي من الحجم العائلي.


#405475 [سر الختم]
5.00/5 (3 صوت)

06-25-2012 11:08 AM
طيب ده كوووولو عرفناهو ..كيف تقوم وحدة تنفيذ السدود ب(مراجعة الأداء العام للوحدة).ياجماعة الخير فى الدنيا كلها من يقوم بمراجعة اداء اى جهة يجب ان يكون جهة اخرى مفوضة بذلك. من كان البشير عديله فلن يراجع ولن يحاسب.


#405472 [سوداني مقهور]
4.00/5 (2 صوت)

06-25-2012 11:07 AM
الصحفيين والكتاب يا اما تكتبو عن الثورة والمظاهرات الحاصله وتدعموهم يا اما كل واحد يقفل حنكو ويبطل جعجه على الفاضي دا ما وقت مواضيع زي دي الشعب ينتفض ومنتظركلمة ودعم من الشرفاء اذا أنتو خايفيين فاصمتو على الاقل صمتكم يعبر عن شي أخير من الجعجا الفارغه ابرزو دوركم ومواقفكم الوطنية التحية لك جعفر عباس


#405434 [المشتهي الكمونية]
5.00/5 (2 صوت)

06-25-2012 10:57 AM
الى الأمام يا شــباب الى الأمــام الى الأمام
وحدوا الصفوف نظموا الصفوف وهيا نحقق آمالنا العظام
وحدوا الصفوف نظموا الصفوف هيا نحقق الأحلام
النصـر قادم رددوا الشعار وارفعوا الأعـلام
النصر قادم دكوا الحصون وحطموا الأصـنام
النصر قادم حاربوا القتلة واللصـوص وادحروا الأزلام
النصر قادم قاتلوا تجار الدين وارفــعوا راية الإسلام
النصر قادم لعزة السودان النصر قادم لدحر اللئام
هيا نوحد الصفوف هيا ننظم الصفوف هيا نودع الظلام
هيا نوحد الصـفوف وندق الدفوف وننتصـر لأهلنا الكرام
إلى الأمام لا تخاذل لا تهاون لا تراجع لا يأس واستسلام
إلى الأمام إلى النضال إلى الأمام حتى يسقط النظام


#405424 [بس موجوع]
5.00/5 (1 صوت)

06-25-2012 10:53 AM
وين البتاع خلاص قمنا ؟؟


#405409 [jaaah]
5.00/5 (1 صوت)

06-25-2012 10:50 AM
عارف يا جبرا الاعلان نزل في الشرق الاوسط (اللندنيه)
ليه؟
عشان قروشو مضمونه!!!!!!
ما من قروش الخط


#405406 [الشنق الفيل]
5.00/5 (2 صوت)

06-25-2012 10:50 AM
ايوة يا ابوالفتوح شوت ضفاري
ده الكلام


#405392 [الاقرع النزهى]
5.00/5 (3 صوت)

06-25-2012 10:47 AM
بمثل هذه الجرأة التى يحسد عليها اسامة عبدالله فى انه يمكن ان يعمل اى شيئ ،قام بتشييد مستشفى ضخم فى مدينة مروى[كذلك فى جانب كبير منه لعلاج السرطانات !!!!] صارفا فيه المليارات من الدولارات ......اليوم ترقد تلك المبانى منذ مايقارب العشر سنوات من غير تشغيل وقد بنى عليها العنكبوت بيوتا وعلا الصدا اجهزتها.....نرجو ان لا يكون مصير متتشفى الابيض هو مصير مستشفى مروى.......!!!!


#405379 [بس موجوع]
5.00/5 (1 صوت)

06-25-2012 10:44 AM
ملينا سخرية التنفيس ... امشي للغريق يا جبرا وكفاية تطيب خاطر نحن في ثورة حتي النصر اخير تعمل ليك سيرة جميلة في الفترة دي ويا وجعي كفاية ... كفاية


#405376 [محمد الريح]
5.00/5 (1 صوت)

06-25-2012 10:43 AM
بلد العجائب فعلاً

كل وزير وكل مسئول تنفيذي من المقربين أو الحزبيين المخضرمين يطلب صلاحيات إستثنائية وإلا ماحيقبل المنصب الرفيع
والرئيس يوافق
وهااااك يا نصب ... وبالصلاحيات الممنوحة له دستورياً

قال دستور قال


#405337 [كديس]
5.00/5 (1 صوت)

06-25-2012 10:28 AM
السبب شنو تفتكر أو الحكمه من (الدوله)دى ،الاجابه الكامله عندهم


#405304 [مشكلة]
5.00/5 (1 صوت)

06-25-2012 10:16 AM
المال السايب يعلم السرقة
غلطانين نحنا من البداية


كسرة : وجع بطن ولفة رأس

كسرة تانية: لفة رأس دي (دوشة)مانفهموني غلط


#405276 [Heron]
5.00/5 (2 صوت)

06-25-2012 10:06 AM
يا استاذ جبرا اين المواكبة ؟ كلمنا عن الثورة وصلت وين ما خلاص عرفنا الانقاذ وفسادهم.


#405260 [نورالدين ابو العينة]
5.00/5 (1 صوت)

06-25-2012 10:00 AM
كلها امور مأكلة للجماعة الما طيبين ديل... بالجد محتاجين للفهامات ... فهامة لكل مواطن حسب نص الدستور... بس المشكلة انو تبقى عليها قصة الكانودومات و الجماعة يجازفوها


#405223 [zahi]
5.00/5 (1 صوت)

06-25-2012 09:50 AM
لا فهامات ولا حاجه .. كل الموضوع بس ( حكومه في بطن حكومه )


#405220 [الصابري]
5.00/5 (1 صوت)

06-25-2012 09:49 AM
ومستغرب ليه؟ هذا أسامة عبد ألله الذي ليس كمثله احد من البشر ولا يرأسه أحد حتى عمر البشير لا يرأسه وعشان خاطر عيونه تتم لخبطة كل المؤسسات .
هل سمعت بوزارة ري لا تتبع لها الخزانات؟! هذا ما كان حاصلاً بعد أخذ السدود وانشاء وزارة اسمها (وزارة الكهرباء والسدود) وتركوا وزارة الري بلا خزانات! لكنهم استدركوا ولغوا وزارة الري واستبدلوها بشئ اسمه (وزارة المياه والبنى التحتية) التي أصدرت زيادة تعريفة المواصلات!! أطلب هذه التعريفة من أي كمساري حافلة وانظر اسم الجهة التي أصدرتها.
أسامة عبد ألله خرب البلد كلها ليظهر سطوته وسيطرته وهو انسان متعجرف ومترفع وأتمنى من الأخوة اقتراح عقوبة له بعد نجاح الثورة ان شاء ألله.


#405183 [بلدنا]
0.00/5 (0 صوت)

06-25-2012 09:37 AM
قصص الفساد تزكم الانوف ولا يخطئها اعمى، اكتب عن طابة الخرطوم في حوادث الخرطوم، معتقلين الثورة الشرفاء في بيوت الاشباح، عن الرباطة، عن عن كباسي الوطاويط غاذفات الشرر الجديدة...
وكان عندك البمنع احترم قلمك واسكت لما الناس تفج ليك الطريق


#405153 [كتاوت بتاع الاورنيش]
5.00/5 (1 صوت)

06-25-2012 09:28 AM
تعلن رئاسة الجمهورية عن حاجتها لمواطنين غير شذاذ الافاق و لايجيدون الا كلمة نعم ياريس
وعن حاجتها لنوام اقص نواب يجيدون التصفيق والتطبيل.
هل تعلم عزيزى القارى بان هنالك بنك متخصص في مجال الزراعة يبيع افران بوتجاز و ادوات عمل البتي فرود والخبيز.......""""
عشان كده كلو مكمل بعضو طالما نافع يتكلم عن الاقتصاد و المتعافي عن المالية والزبير عن الصحة فلا تستغرب اذا وجدت اعلان من وزارة الزراعة لمحاليل ودربات
كسرة شذاذ الافاق قالها رئيسكم الهمام عن القائمين بالمظهرات


#405152 [خرافي]
5.00/5 (1 صوت)

06-25-2012 09:27 AM
اللهم لطفك وعفوك ورضاك يااااااااارب .. وده كلللللللللللللو بمرسوم جمهوري يعني طالع من إمام المسلمين عمر بن البشير .. لاحولااااااااااااااا والله الناس ديل كان إنقلعوا تظهر كترت مصايب أعوذ بالله من شياطين الإنس والجن .. والبفقع الفشفاش يمرق ويقول ليك (وينو الفساد) .


ردود على خرافي
United States [لواي سلسلن] 06-25-2012 12:23 PM
البلد ده أصلاً ما فيه تخصص , آلاف الخريجين من الزراعة والوزير طبيب لم ينجح في طبه ولا في زراعتهّ!! اسامة عبدالله ده الولد المدلل وخارع العادات .. والله الزول ده أنا مكجنة خلقة .. مما أشوفوا بجيني دوران وضيق خلق هو القبيح الشيوعي أمين حسن عمر تفففففففففف؟؟؟


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة