قدر عن قدر يفرق
06-27-2012 10:06 AM

قدر عن قدر يفرق

الفاتح جبرا
[email protected]


(قدرعن قدر يفرق)

27 يونيو 2012م

عندما تشتد الأزمات يبدأ المسئولون في الخروج بتصريحات (غريبة) و (عجيبة) هكذا علمنا التاريخ القريب ولعل الرئيس الهالك (معمر القذافي) يعد خير مثال لذلك َفقد أبدع (القائد الأممي) في نعت شعبه الذي صبر على (خطرفاته) أكثر من أربعة عقود بأقذع الألفاظ !
ونحن نعيش (عام رمادة) كما وصفه وزير ماليتنا مؤخراً والحال الإقتصادي قد آل إلى ما آل إليه من (دمار شامل) حتى إستحالت الحياة على المواطنين بسبب إرتفاع الأسعار في ظل ثبات الدخول والأجور .. في هذا الجو (الملغم) يجب أن يبقي (المسئولون) على ألسنتهم (عشرة) !!
فهم وحدهم لا شريك لهم من أوصلنا إلى ما نحن فيه من (سجم ورماد)إذ تركهم الشعب
(يهيصوا) داخل رقعة الشطرنج (برااااهم) ربع قرن من الزمان و(بدون ما يقول ليهم تلت التلاتة كم) .. لذا فإن كانت هنالك من تصريحات فلتكن متزنة ومنطقية و(تدخل الراس) والأهم من ذلك كله ألا تكون (مستفزة) !
لعل من التصريحات (غير المنطقية) التي صدرت مؤخراً ذلك التصريح (الفلتة) الذي صدر من السيد وزير المالية والذي قال فيه ( الفقر قدر من الله) ! يا له – عزيزي القارئ – من تصريح يوضح مدي إيمان وزير ماليتنا بالقضاء والقدر .. غير أن العبدلله يرى أن السيد الوزير قد ذكر (الفقر) وفاتته أشياء أخري هي أيضاً (قدر من الله) ! فالجوع (قدر من الله) وتردي الخدمات الاساسية البسيطة (قدر من الله) والازمة المالية الطاحنة (قدر من الله) وارتفاع اسعار السلع الضرورية (قدر من الله) واحتكار السلع عبر تجار الحكومة (قدر من الله) والسيطرة علي التجارة في الاسواق (قدر من الله) والتلاعب باقوات الناس (قدر من الله) ورهن الوظائف العامة للولاء الحزبي والقبلي والاسري الضيق (قدر من الله) والفساد والمحسوبية (قدر من الله) والبطالة والفساد المالي والاداري والاخلاقي (قدر من الله) والتدمير الممنهج للمشاريع الوطنية الهامة وخصخصتها (قدر من الله) والتخريب المتعمد لمؤسسات المجتمع المدني (قدر من الله) رفض بعض المؤسسات والشركات الحكومية للمراجعة (قدر من الله) ، تجنيب المسئولين لأموال الوزارات والمؤسسات ووضعها في حسابات خاصة (قدر من الله) الصرف البذخي على المسئولين والدستوريين (قدر من الله) وترك المفسدين دون محاسبة (قدر من الله) !! والتقاوى الفاسدة (قدر من الله) والأقطان (قدر من الله) .. وعمارة الرباط (قدر من الله) وأطفال المايقوما الكل يوم زايدين ديل (قدر من الله) ، كما أن بيع خط هيثرو (في سماهو) قدر من الله !
سعادة السيد الوزير عاوز يقول ليكم يا جماعة الخير إنو (كل شئ مقدر من الله) والحاصل لينا ده مافيش مسئول واحد عندو بيهو دخل .. (في زول عندو أى إعتراض) !
يا سعادة الوزير :
الناس يقبلون بأقدار الله ويؤمنون بها حين تكون الأسباب غير التي نعرفها وقد نفذ مداد قلمنا ونحن نشير إلى هذه الأسباب حتى تسارعوا للإصلاح لكن دون جدوى .
ألعبدلله يرى أن أسباب الأزمة الراهنة (أيها الوزير المؤمن بقضاء الله وقدره) هو الإبتعاد عن تعاليم ديننا الحنيف فيما يختص (الحكم) وتولي المسئولية والذي قادنا للأسف الشديد إلى ما نحن فيه الآن و ما كنا سنجد نفسنا في هذا الحال (البطال) لوكان فينا مثل الخليفة عمر بن عبدالعزيز حين جاءه البريد ذات ليلة فأشعل السراج ليقرأ الرسائل، ولمّا انتهى من القراءة أطفأ السراج، وسئل في ذلك فقال إنّ زيت السراج من بيت مال المسلمين، وقد أضاءه ليبحث في أحوال عامّة المسلمين ويسأل عن أمرهم ليعرف ما هم وأمراؤهم عليه، وأطفأه لأنّه الآن يبحث في أموره الخاصّة (وما عاوزين نجيب سيرة الطبلة)؟.
كان (رضي الله عنه) يعلم أنّ الله استأمنه واستخلفه على أمّة المسلمين، فقام بحفظ الأمانة وقام بأمر الخلافة ومسؤوليّة الحكم خير قيام (مافيش كده وللا كده) ، ولذا فقد كان عماله يبحثون عمّن يستحقّ الزكاة ليدفعوها له فلا يجدون أحدًا يأخذها ! (بالله شوف؟)

كسرة : (ما يستفاد من المقال) :

ما نحن فيه (قدر من الله) وما كان فيه المسلمون أيام الخليفة عمر بن عبدالعزيز (قدر من الله)بس (قدر عن قدر يفرق) وكده !!

كسرة ثابتة :
أخبار ملف خط هيثرو العند النائب العام شنو(ووو ووو) ؟




تعليقات 36 | إهداء 1 | زيارات 7152

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#410569 [moh]
1.00/5 (1 صوت)

06-29-2012 11:50 AM
وضع الامام ابن قيم الجوزيه قاعده ذهبيه قال فيها: (يحتج بالقدر فى المصائب ولا يحتج به فى المعايب)وهذا لكى لايخرج علينا احد ويقول هذا من قدر الله وهذا ليس من قدر الله- وشكرا


#410076 [الطيب]
1.00/5 (1 صوت)

06-28-2012 08:40 PM
هناك فرقة ضالة من المسلمين تسمي القدرية لعل وزيرنا هذا منهم --اسألوه يمكن قال الكلام دا بفهم لتكون المصيبة اكبر


#409966 [عبدالله]
1.00/5 (1 صوت)

06-28-2012 06:25 PM
نسأل الله ان يسهل ويبرد النزع ؟؟؟؟؟؟


#409925 [الي جمعة لحس الكوع]
1.00/5 (1 صوت)

06-28-2012 05:45 PM
يلا يا جماعه
الي جمعة لحس الكوع
الي جمعة لحس الكوع

الي جمعة لحس الكوع


الي جمعة لحس الكوع


#409733 [معاوية حامد بشير]
1.00/5 (1 صوت)

06-28-2012 02:26 PM
والانقلاب المشؤوم قدر من الله والمظاهرات قدر من الله


#409603 [ابوامين]
1.00/5 (1 صوت)

06-28-2012 12:51 PM
تؤتى الملك من تشاء وتنزع الملك ممن تشاء وتعز من تشاء وتزل من تشاء (دى كمان برضوا قدر من الله )ولا شنو يااستاذ


#409412 [أبوهبة]
0.00/5 (0 صوت)

06-28-2012 10:25 AM
أهو نوعية التصريحات دية البتجيب بعدها أقوال مثل ( الدين آفيون الشعوب ) . أيام نميرى الأخيرة والحكومة المحلية أكلت فى أموال السدودبمحلية كسلا وجاء فيضان القاش مدمرآ ليظهر بعدها الامام نميرى فى زيارة لكسلا ليفول لهم الفيضان دة إنتقام من الله لانى عرفتا أنكم بتجوا فى سهول القاش الجافة بالليل وتشربوا الخمر وتمارسوا الفاحشة .
وبنفس الايدلوجيات المراوغة ظهر الزبير محمد صالح لينعى فشل موسم القمح لانه إبتلاء لانو ربنا بمتحنا عشان نحن أعلنا الشريعة... طيب شركة فضيحة شركة الرازى للمبيدات الحشرية وصاحبها المجاهد على الحاج والمسؤلة عن رش المبيدات الحشرية ورشت بدالها جير أبيض عديل كدة كانت جزء من الإبتلاء .؟؟؟


#409201 [ابوهاشم]
1.00/5 (1 صوت)

06-28-2012 03:07 AM
قدري السبب لي ازايا ...والله اقدار يا زمااااان


#409159 [majnoon Nada Algalaa]
0.00/5 (0 صوت)

06-28-2012 01:47 AM
Al-ingaz is the (ominous kismet ) , Jabra you should have said so without fear . To take for granted poverty is divinely destiny upon Sudanese people , why Al-ingaz leaders haven't been affected by this fate ? we see them live in luxury , aren't they affiliated to Sudanese people who were suffering from poverty according to the minister ? or they live in other planet excluded from punishment of Almighty allah


#409127 [Ali osman]
1.00/5 (1 صوت)

06-28-2012 12:34 AM
مافى كلام يالفاتح أخوى ونعم بالله كله قدر الله.لكن بينى وبينك الناس ديل بعتقدوا بوجود الله جد جد.والله نفسى أعرف.


#408948 [لَتُسْأََلُنْ]
1.00/5 (1 صوت)

06-27-2012 09:20 PM
يا أستاذ جبرا الإنصاف يقتضي ألا يُحمًل وزير المالية إلا ما هو مسئول عنه و ليس كل فساد الحكومة الذي عددته - ما(داك الفيل)؛ أما إذا كان قلمك يتحاشي طعنه فخلك مع (الفراجة).


#408869 [ابوعمرو]
5.00/5 (3 صوت)

06-27-2012 07:42 PM
نفسى اشوف فى نافع يوم زى يوم القذافى


#408866 [ابوالجعران]
5.00/5 (1 صوت)

06-27-2012 07:38 PM
الوزير لا يفهم ما كتبت ياجبره الوزير بفهم كم ح يدخل اليوم في جيبه لانو عندو مسؤليات وعدد من الحريم والبيوت اللي فاتحها في الزمان الغابر ده خاصه وان بدل السفريات الدولاري والمخصصات ح تنزل شويه بعد ما تعود عليها ولكن العنكبوت بني في الخزنه بتاعت الدوله بعد ان تعبت من النهش والهبر وبعدين حرم عليهم حديثا تجنيب اموال الجبايات والاتاوات والرسوم التي ارهقت المواطن وكانت تمثل لهم نثريه اضافيه لزوم الوجاهه بتاعت السلطه وكده............... كسره اخيره موضوع المستشار حمدي حصل فيه شنو - خط هيثرو عاوز عشره سنه عند النائب العام وح يلقي ليه حل بالتعاون مع مفوضيه تقنين الفساد لان المفوضيه امامها اكثر من مائه وعشرون ملف فساد بداءت فعلا في تقنينها واصدار صكوك البراءه للمتهمين


#408611 [fatmon]
3.00/5 (3 صوت)

06-27-2012 04:01 PM
مقالك هذا يا أستاذ جبره يذكرني بموضوع كنكشة الرقاص في الحكم عشان هو عايز مصلحة السودان وخايف على ناس السودان والناس حتضيع بعده وطبعا هو عامل فيها بخاف من الله قوي وبشبه الخلفاء العادلين عشان كده هو كاتم على نفسنا ما حبا في السلطة لكن حبا في مصلحتنا. ولنسلم حدلا إنو نحنا الآن عابشين أحسن عيشة بفضل وجوده معانا لكن بس كجناهو وطبعا هو قال لو الناس قالت ما عايزاو حيتنازل
فقط سؤالي ليهو إيمانو بالله ما أرتقى لمرحلة إنو يعرف بعد هو يمشي الله عادل وما حينسانا يودعنا الله وما يخاف علينا وينسانا ولا عندو كلام ثاني ؟الأفاق الأفاك الما بعرف الله والا الرسول ومكنكش عشان خايف على روحه وناسي إنو سبب أي رضعة ناقصة من رضيع صغير ولا لقمة من طفل ولا فطور من طالب ولا دواء من مريض وضيـــــــــــــــــــــــــــــــــــــــــــــــــــاع حيش من الشباب لا تعليم لا عمل لا ترفيه لا حياة كله من تحت راسو وبسبب وحوده معانا ولانه خايف علينا وما عايز يمشي عشان حواء الجابته مافي غيرها ناسي عدل ورحمة ربنا
يورينا فيك يوم وقريبا فالأنقاذ دنا عذايها


#408549 [wafi]
3.00/5 (2 صوت)

06-27-2012 03:12 PM
يا جبرا
الجماعة شابكننا قدر الله قدر الله

لمن الناس بقت ماشة بي عجل الحديد
بقت ما فارقه معاهم الدنيا كلها.

الخروج للشارع الآن لملاقاه قدر الله بسرعة عشان الناس ترتاح وهم يحكموا ليهم ناس ما عرفه قدر الله


خلاص خليناها ليهم ، بس يورونا قدر الله نلقاهوا سريع كيف ؟
ولا شنووووووووووو


#408469 [nader]
1.75/5 (4 صوت)

06-27-2012 02:26 PM
دفع مبلغ 50 الف دولار من اموال الذكاه ( قدر من الله ) اخبار قناة الضحى الاسلاميه شنوووو ،،،،،،، بالله شيف


#408467 [غلطة ساراي]
3.00/5 (2 صوت)

06-27-2012 02:24 PM
ايوا كدة الكلام (تقول لي مستشفيات؟)


#408406 [محمد]
3.00/5 (4 صوت)

06-27-2012 01:46 PM
وبالنتيجة فان السودان وشعبه قدر من أقدار الله فلتريح الحكومة راسها وتتركنا لاقدار الله فهو سبحانه أحق وأجدر بالرأفة بنا وهو يقلبنا بين أقداره. ولكنا نسأل مجرد سوال بريء:هل نحن فقط بين شعوب الارض من يقلبنا الله بين أقداره هذه!!


#408391 [صايع و ضايع ذو 7 صنايع]
5.00/5 (3 صوت)

06-27-2012 01:33 PM
انتو الوزير دا مسك الوزارة دي من 3 سنوات اها ال20 سنة الفاتت كان ماسكها منو الذين جابوا (اليخت) و جابوا الضغط بس يا جبرا واقع لي في بتاع (الكسرة) بكسر الكاف يا بتاع (الكسرة (بفتحها) يا اخي انت ما عارف المسؤلين (الغير مسؤلين ديل) تفكيرهم شنو ديل حاقريننا و (حارقيين دم قلبنا) رغم انو ربنا قال (و ما اصابكم من مصيبة فمن انفسكم) لكن ديل اهل تاصيل التاصيل و اعادة الهيكلة التي جعلتنا هياكل عظمية و ينط ليك واحد متنفذ يقول ليك اصبروا كلها 4 سنوات و نكون دولة عظمى و يقصد (عظمة) العظام الخلونا مشتهينهن الله يشهيهم عود القذافي


#408373 [عوض محمد احمد]
2.25/5 (4 صوت)

06-27-2012 01:22 PM
الاستاذ الفاتح والقراء الكرام السيد الوزير عنه حق ذكر فى احدى الصحف بانه يملط اربعه عمارات وعنده حاجات كتيره ويعالج ولده فى امريكا على حساب الحكومه ويتفرغ له تيم من السفاره قدر من الله
وناس الحج والاوقاف يلطشوا الريالات قدر من االله وناس الاقطان يلهفوا الدولارات وتحول الى دبى قدر من الله ةالفادنى يتصرف فى اموال الزكاة كانه وارثها هذا قدر الله وواحد راكب بكسى وشايله عدت بناء يبنى عمارة الرباط وتقع فوق راس الناس قدر من الله واربعمائة سيارة تقطع الاف الاميال وتصل حتى كبرى امدرمان ولا حد يكتشفها وحتى يسالوا الازاعه بى وين هذا ايضا قدر الله وعدد الوزراء ونوابهم والمستشارين اكثر من عدد كل وزراء الصين والهند مجتمعبن برضو هذا قدر الله ووووووووووووووو وكل شى هذا قدر الله ولكن تعيينك وزيرا فهذا من غضب الله على الشعب السودانى


#408358 [هندسة]
3.00/5 (3 صوت)

06-27-2012 01:10 PM
يا جبرا انت مصطلح الناس بتشكي ل طوب الارض دا معناهو شنو؟ كل ما الف وادور يلاقيني. عندو علاقه بي شذاذ الافاق في قرابه بيناتم !!!؟


#408310 [زول ساي]
3.00/5 (5 صوت)

06-27-2012 12:41 PM
كان كده الاحتجاجات (الثورة) ذاتا قدر الله


#408261 [اوطان]
5.00/5 (2 صوت)

06-27-2012 11:58 AM
ده ضل الفيل ياجبرا بس ماشى كويس وقربت للفيل


#408243 [Amin]
4.50/5 (2 صوت)

06-27-2012 11:47 AM
نعم قدر من الله اي شي نحن فيه انت من شذاذ الفاق كما قال عمر البشير (لارضي الله عنه)


#408237 [البوب]
3.00/5 (2 صوت)

06-27-2012 11:42 AM
، ولذا فقد كان عماله يبحثون عمّن يستحقّ الزكاة ليدفعوها له فلا يجدون أحدًا يأخذها ! (بالله شوف؟)

... رايك شنو يا جبرا في ناس عمر بتاعنا دا ... هسع ناس الزكاه برضو فتشوا الناس ياخدو الزكاه ما لقوا واحد مستحق "لانهم لكهم اموات اكلنيكيا" عشان كده قامو قسموها علي نفسهم!!! كذلك بتاع لجنة الفساد في السودان مركب عدد 2 مولدات كبيره للعمارة 3 طوابق مع الحراسة لانو ما بستخدم كهربة الناس الغلابة الا في العمل وكدا


#408155 [ابو امجد]
3.00/5 (2 صوت)

06-27-2012 11:01 AM
ووصف البشير للمتظاهرين ب (شذاذ افاق) ايضا قدر من الله


#408139 [ali]
3.00/5 (2 صوت)

06-27-2012 10:54 AM
معقانا اقول قول بت حمدين
يوم لقت القش مسروق حوضين
قالوله قدر يا حاجة اراد
هاجت يا اولاد
نعم احنا عباد
لكن ده اثر
يبقى الله بشر


ردود على ali
United States [بدون] 06-27-2012 04:45 PM
بالمناسبة هذا كلام كبيرجدا جدا جدا
ارجو الفهم والتدبر


#408123 [ابو السباع]
5.00/5 (1 صوت)

06-27-2012 10:47 AM
لا حوله ولا قوة الا بالله


#408100 [ضرغام]
4.00/5 (3 صوت)

06-27-2012 10:38 AM
كلامك في المليان منذ ان عرفناك من سنوات طويله
بس عندي سؤال محيرني دائما؟ لم نسمع بأنك اتقبضت من كلاب البشير او اعتقلوك رغم انو الاقل منك كتابه وعطاء ضاقوا ويلات الكيزان (انت منهم ولا شنواو تكن في بلاد طير عجمي حالتنا كده-7 درجه تحت الصفر ويد الحيكومه صعب توصلك


ردود على ضرغام
United States [الزُول الكَان سَمِحْ] 06-27-2012 10:57 AM
يا ضرغام

الجماعة م عندهم جان بيكتشف الكنوز؟؟ الفاتح جبرا عندو جان ( صحفى)


#408096 [mathew]
4.00/5 (1 صوت)

06-27-2012 10:36 AM
السيد وزير المالية(المؤمن بالقدر) لا يدرى أن هناك فرق بين مراد الله القدرى و الذى يريده امتحانا للبشر وبين مراد الله الشرعى الذى يريدهم من خلاله أن يصارعوا أقدار السوء بأقدار الخير. و مثل هذا المراد الشرعى تعيين هذا الوزير شخصيا


#408092 [الزُول الكَان سَمِحْ]
3.50/5 (2 صوت)

06-27-2012 10:34 AM
فى قدر (ُمُقَدَرْ) على رايهم..وفى قدر من الله..ونحن نؤمن به


#408091 [مستاء]
5.00/5 (3 صوت)

06-27-2012 10:34 AM
يا ساتاذ جبرا هو قدر من الله ان تكون اول طلة لي امامك بعد الاصابة الاسبوع الفائت ولكن اترك هذا الذي التحف بقدر الله واطعن لينا في اللي وصفنا بشذاذ الافاق بالله بس قول لينا اذا كان بعد 23 سنة نحن في نظره اصبحنا شذاذ افاق بعد كم وعشرين تانية ايه ممكن نكون في عيون اسد افريقيا هذا . وانتم كتاب السودان تركنون دوما في طعن ظل الفيل والفيل يبطش بالشعب المغلوب علي امره . نعلم ان مستوي القمع والبطش ارتفع منذ ايام الي اقصي مستوي له فقد خبرناه في اساسيات اشتباك شرطة مكافحة الشغب والامن والرباطة يوم بيوم وهو يرتفع الي مستوي اعلي واعلي بصورة مدروسة امل ان لا تسبط هممنا من الخروج في الجمعة القادمة وبصورة اكبر من كل ما حدث في كل الايام هذا ان انحاذ لنا المتشككين في نجاح الحراك والمتخوفين من البطش . اليوم نري الحراك الخارجي للسودانيين في الدول الاخري اكبر من الحراك الداخلي واملنا شحذ هممنا وهمم اخوتنا بكاتاباتكم وهذا مرهون بتحرككم من الخط الفاصل الذي تنتهجوه في الطعن علي ظل الفيل وان تذكر يوما سألتك ان تكتب لنا عن حال الوجبة السودانية بين الانجليز والانقاذ .
وكان بالامكان ان تكرمت وكتبت عن هم الناس الاساسي للحرية والكرامة والعيش الكريم ان تحدث فارق كبير في داخلنا يشحذ هممنا في سابق الايام وانت لكلمتك حب كبير في قطاع واسع بين شعبنا الفضل وخصوصا واواتك وكسراتك الكتيرة
بالمناسبة كسرة كبييييييييييييييييييييييرة وزيرنا خمر لينا عجين للكسرة ولا نقلبها عصيدة ؟؟؟؟


#408087 [الغاضبة]
5.00/5 (2 صوت)

06-27-2012 10:32 AM
يا دوب فهمنا بعد ثلاثة وعشرين سنة هم كان قصدهم شنو لمن كانوا يرقصوا ويغنوا كل شيء لله ... كل شيء لله... تاريهو فهمنا تقيييييل خلاص


#408084 [ابو ابراهيم]
5.00/5 (1 صوت)

06-27-2012 10:30 AM
لله درك


#408059 [بس موجوع]
4.00/5 (1 صوت)

06-27-2012 10:21 AM
كنت احسب ان تتحدث عن (شذاذ الافاق) وهي تصريح الساعة.


#408041 [المحروق]
4.50/5 (3 صوت)

06-27-2012 10:13 AM
والله افحتم الراجل يا جبرا ، الكيزان ديل ما بفهموا وزير الكسرة بملاح الشرموط ده ، داير يرجعنا مائة سنة للخلف ، قوم لف بلا وزير بلا كلام فارغ ، والله والله والله ضيعتوا السودان ونحن نراه يضيع الله يضيعكم واحد ورا التانى .


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة