ص د م
09-27-2010 12:08 PM

ساخر سبيل

ص د م

الفاتح جبرا

لو سألتنى عن من هو أكثر مواطن متعذب فى هذا الزمان الأغبر لقلت لك دون تردد إنه (المغترب) وبالطبع لو أننى قلت لك هذا الكلام (زمااان) لربما نعتنى حينها (بالخبل) أو الجنون فزمان كان للإغتراب ألق ورونق وللمغترب (شنة ورنة) وكمان (لمعة) ، كان من العادى جداً أن يقضى المغترب إجازته فى إحدى البلدان السياحية ثم يعرج (على البلد) ، شئ لبنان وشئ المغرب ومرات أديس ومرات القاهرة ، وعندما يعود المغترب فى إجازته كان كل الحى يقف منتظراً (فتح الشنط) والهدايا .. تياب .. قمصان .. بلوزات .. فتايل ريحة .. أحذية .. قطع جلاليب .. عمم توتال .. بناطلين جينز .. ومرات (مسجلات) .

أما مغترب اليوم فتكاتفت عليه المحن والمصائب إبتداءاً من المرتبات (الضعيفة) وتخفيضها المستمر مروراً باسعار السلع الضرورية المرتفعة فى موطن إغترابه إنتهاءاً برسوم (السفارات) الباهظة لإستخراج أو تجديد أو تعديل وثائق وجوازات السفر أو توثيق الشهادات إضافة لبعض الرسوم الأخرى التى تفرضها بعض هذه السفارات والتى لا تندرج تحت أى مسمى كرسوم (تصليح قاعة الزوار) ،ورسوم (صيانة أيه كده ما عارف) .

وإذا ما عاد (المغترب) فى إجازته السنوية (عينك ما تشوف إلا النور) حيث تبدأ مرحلة أخرى من مراحل (الحلب) إبتداءا من (رسوم القدوم) وإنتهاءاً برسوم (المغادرة) وما بينهما من مساهمات إلزامية (أنا ما عارف مساهمة وإلزامية دى تجى كيف) وضرائب وزكاة (على شنو !) وكنانة والرهد والقناة الفضائية ولستة طويلة من (الدمغات) وصناديق الدعم !! بعدها يصبح (المغترب) عاوز ليهو زول يدعمو لى ذاااتو!!

مناسبة هذا المقال رسالة جأتنى من أحد القراء على بريدى الأليكترونى لشاعر لا أدرى ما هو إسمه (وأحييه من هنا وأستـاذنه فى نشرها) ، أخونا الشاعر المغترب قام بتلخيص (القصة كووولها) فى هذه القصيدة الساخرة :



يا غربة .. يا غشاشة .. يا بكاية .. يا مستهبلة

تغرينا بي درهم قروش وراه قنطار بهدله

جيناك سنة ..

أو قول سنين بنكمله

نبني البيوت في العاصمة وبي كوم أثاث بنجمله

وكرولا حاره نرسله أصلو التنقل مشكله

ونكمل الدين بي مهل والسمحة جاهزة نحصله

غير القروش اللي للأهل عبر الشهور حا نرسلا

والباقي يدخل في البنوك ونشوف دباره نشغله

ناس فكرت تجني العلم تبدأ الدراسة تواصلا

أحلام كتيره وشيقه وآمال كبيرة نأملا

لكن حساباتنا الغلط في كل عام بنرحله

مرت سنين من العمر بنعزها وبنفضله

والحسبة وصلت طاشرات يمكن نعيش وندبلا

وتعال نحاسبك يا وهم من غير رقم أو أمثله

كان للقروش نجري ونحوش لكن تقول بنشاكلا

ما راضية تقعد في الجيوب وتقول حرامي بينشلا

لكن بترقد في الضهور بديون تقيله متلتلا

ممحوقة ما بتقضي الغرض وأقل حاجة تكملا

كملانه سفرة وحق وزن ومجاملات مستفحله

ضرائب أبعاج المشي وإلزامي حمدي نحولا

وأحلامنا صبحت زي سراب نمشي ونجري ما نحصلا

يا ريت يكون هم القروش يا غربة فيك هو المعضله

لكن تعال شوف الهموم الما إفتكرنا نقابلا

ذلة ومهانة واحتقار خلو النفوس متململة

سجنا كبير فيهو الكفيل سجان قيوده مكبله

أشغالو شاقة ومؤلمه ودايما تكون مستعجله

ما عاد يكفيها النهار تحتاج ليالي مليله

أمراض كتيره بدت معاك عايزه الفحوص مستعجله

ناس الضغط والسكري ومرض القلب مع الكلى

ومصران وقرحة وإكتئاب ونفوسنا ما متحمله

وبنينا فيك كيمان لحم تحت الهدوم متندله

وأكيد يكون أكل المعلب والمجمد عاملا

عدم الرياضة والكونديشن لابد يكون ليهم صــــــلا

وكمان تعال لمعادلة ما قدرنا أصلا نعدلا

سجن العيال جوه الشقق وفراق الأهل والعائله

جيب العيال بي جيبنا مال وجيوبنا غيرو مميله

وصغارنا صبحت بالزهج متوحشة ومتجفله

لا قادرة تلعب في خلا ولا ضل شديره يضللا

لا قادرة تدرس بي نفس من الدروس المترهله

تلقي الولد غالبو الكلام والبت كبيرة ومريله

كل الضغوط سوا ما قدرنا حتى نقللا

في كل طرف تلقي القرف تلقي الخيوط مداخله

يا غربة أديناك كتير أدينا خاطرك يسهلا

خلينا نرجع بالفضل نلحق حياتنا نعدلا

آمالنا فيك بدري إتنست إلاّ الرجول متوحله

وبقينا زي أهل القبور لا البره عارف يدخلا

لا الجوه يرجع لي ورا يحكي الحقيقة يوصلا

لكن خلاص هان الخلاص عندك نزل مهما علا

وإن شاء الله نحيا نودعك وتكوني ذكرى نغازلا

يا غربة .. يا بكاية .. يا غشاشة .. يا مستهبله


كسرة :

أخواننا المغتربين أيام الإغتراب كان إغتراب والله تب ما قصرو ... عشان كده حقو هسه نقيف معاهم ومن هنا أقترح إنشاء (ص د م ) .... صندوق دعم المغتربين


تعليقات 9 | إهداء 6 | زيارات 4531

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#27984 [محمد المهدي هاشم]
0.00/5 (0 صوت)

09-28-2010 03:01 PM
عزيزي الأستاذ الفاتح جبرا، القصيدة لشاعر الطنبور المخصرم عبد الله محمد خير الذي اكتوى بنار الغربة فترة طويلة في الرياض وأنت تدرك حنية أهلنا الشوايقة، أظنه عاد إلى أرض الوطن بعد هذه القصيدة العصماء في ذم التغرب عن الأوطان وكما قال الشاعر \"أريت رزقا يغرب سيدو طاير\"
مع شكري/


#27785 [جنوب الخليج]
0.00/5 (0 صوت)

09-28-2010 08:41 AM
يا جعفر انت من ناس الحكومة وله شنو وكمان عايز الصرفة الاولى عشان تمسكنا الماسورة الظاهر عليك مدربك كبر زعيم سوق المواسير.
ياخونا مافي طريقة للمواسير في العالم الحر خارج السودان


#27705 [زول]
0.00/5 (0 صوت)

09-27-2010 10:32 PM
كفاية اكلى بالحلال وماشغالين جوكية وغربة بكرامة ولاعمارةبالخرطوم بمزلةوسرقة ( البجبرنه على المر الامره منو ياجبرة قدر اخف من قدر ) وتاكد المغترب ده خسارة للبلد مهما دخل من قرش لان البشر اهمه من اى دولار للحكومة البتفهم مش حكومة البوت


#27649 [جنوب الخليج]
0.00/5 (0 صوت)

09-27-2010 07:03 PM
ياجبرة صاح القصيدة معبرة ومبكية لكن نحن لانتعامل مع العاطفة خلينا ناس منطقين الغرب خارج السودان افضل من اهانة الكيزان نحن مقيمين في الخليج بكرامتنا ولا ضريبة ونقطة تفتيش ولا ولا زكاة ولا دمغة جريح صحيح السفارات تذكرنا المواجع وهناك الحكومة مرسلة كلابها الجائعة الجاهلة لكي تاتيها بالاخبارعن المعارضين
ورتحنا من مخالفات المرور اليومية ورتحنا من تهديد الشرطة والامن اليومي في الخليج اكبر ضابط في الشرطة مايقدر يقول ليك بقم بدون سبب
يا جبرة نحن نعول اسر وطلاب ونعالج مرضى ومساعدات كل هذا نحن لا نرجو في الغربة اي فائدة

لكن احب اقول شي واحد بالرغم من المتاعب الحين كثير من السودانين يبحثون عن فرصة للاقتراب من اجل الهروب من جيوش التتار والمغول والضيق من اجل ان يجدو ا متنفس


يا جبر لماذا استجار السودانين من الدولة الاسلامية اي حكومة امام المسلمين هولاكو واستجاروا بالعدو الاسرائيلي هل تريد دليل اكبر من ذلك بان الغرب افضل من السودان في ظل هذا النظام.

ياجبرا نحن لا نريد (ص د م ) لكننا نعتمد على انفسنا وكسبنا الكثير من الخبرات ونحن مستعدون لرفع مستوى الخدمة المدنية المتدنية الفاسدة لان كل المغتربين مأهلين والعمل في الخارج عمل مؤسس .

يادجبرة لماذا اختارة الجنوبين الانفصال من دولة المغول والتتار
لماذا كره السودانين المشاريع الحضارية

لماذاان الله ياجبرا لاينصر دولة الاسلام مع ظلمها وان الله ينصر دولة الكفر مع عدلها
لماذا

هل الاعمال التي تمارسها حكومة التتار والمغول بقيادة هولاكو ومسيلمة الكذاب والاسود العنزي وسجاح الكاهنة هل اعمال دولة مسلة ام مسلمين


#27639 [بنانكو]
0.00/5 (0 صوت)

09-27-2010 06:38 PM
1 - ص د م ص د ا = ص د (م ا )

2 - السؤال أ - ماذا يعني ص د م & ص د ا ؟

3 - لماذا كان ال ص د عاملاً مشتركاً؟

4 - ما بداخل القوسين : م أ ماذا تعتقد ان يساوى ؟


#27617 [د. محمد الهادي محمد]
0.00/5 (0 صوت)

09-27-2010 05:19 PM


قصيدة مؤلمة

لكن لو جا البلد دي حيكتب قصيدة مؤلمة أكتر منا


#27584 [عبدو]
0.00/5 (0 صوت)

09-27-2010 03:19 PM
الكفيل ارحم من ناس هات والنهب المصلح


#27550 [بت الخرطوم]
0.00/5 (0 صوت)

09-27-2010 02:18 PM
والله انا شايفة(ص د الص)اولا لسبب بسيط هؤلاءالمغتربين على الاقل شافوا بلاد جميلة وعاشوا ايام حلوة ومعاها ترطيبة ولكن الصابرين على البلاوى التى تحاصرهم من ساعة طلوع الشمس والى مغيبها فى هذا البلدالمغلوب على امره شى التمرد فى الجنوب وشى الجنجويد والتمرد فى دارفور وشى البجا فى الشرق وشى قتل وشى اغتصاب وشى موت جماعى وماتنس الاختطاف والكلاب المتوحشة لهذاارى قيام صندوق الصابرين الاهم


#27532 [جعفر]
0.00/5 (0 صوت)

09-27-2010 01:21 PM
غايتو انا معاك في قصة الصناديق دي (ص د م) و (ص د ا) ومشترك بسهمين بس علي شرط اخد الصرفة الاولي (؟)


الفاتح جبرا
الفاتح جبرا

مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة