(ما عدا الزكاة)...عقد عمل حكومي ..!!
07-01-2012 03:05 PM

إليكم

الطاهر ساتي
[email protected]

(ما عدا الزكاة)...عقد عمل حكومي ..!!

** رحم الله عم حسين،عاش عصامياً وعفيفاً ولم يمنعه العمى عن الكد والكسب الحلال..كان يفتل الحبال ويبعها لأهل الحي لينسجوا بها عناقريبهم، ولايزال بعض الأهل يحتفظ بعناقريب نسجتها حبال - وخيال - عم حسين..يضعونها تحت أشجار نخيلهم المقابلة النيل ويتخذونها مكاناً لنوم القيلولة وأسمار المساء، وتلك أمكنة وأزمنة يتحدون بها الملل وكدر الحياة وبؤس المدائن..عصام، أكبر الأبناء، ظل يساعد عم حسين في تلك المهنة طوال ساعات الليل، الى أن تفوق في إمتحان الشهادة السودانية وفرحت به القرية وجاراتها..كان ذاك يوماً رائعاً في حياة عم حسين وإبنه عصام وكل الأهل، وسأله في خضم الفرح : (ياعصام الناس بيسألوني ولد ح يقرأ شنو؟، أقوليهم شنو؟)، فأجابه ضاحكاً : ( قول ليهم جيلوجيا يا أبوي)، فلم يعجبه الرد، فزجره : ( جيلوجيا بتاع شنو؟، يعني ح تشتغل شنو بالنهار؟)، فنضحك جميعاً ونداعب عصام : ( بجيلوجيتك دي أبوك ما ح يعفيك من فتل الحبل بالليل، شوف ليك تخصص مقنع)..ولايزال حبل الود يعيد روعة تلك الأيام الى الذاكرة،عندما يهاتفني المهندس عصام من وراء البحار : ( ياود ساتي، أيمن ولدي رغبتو يقرأ علم النفس، تفتكر ح يشتغل شنو بالنهار؟)..!!

** تلك دنيانا، وهي باسمة بفضل الله، فلندخل الي دنيا النكد المسماة بالحكومة..وكما يجهل عم حسين مهام الجيلوجي بالنهار، أجهل أيضا مهام بعض شركات الحكومة، بالليل والنهار..لقد راجع المراجع عقود بعض الذين يديرون هذه الشركات، فخرج بما لم يخطر على قلب (شذاذ الآفاق)..على سبيل المثال : شركة إعادة التأمين الوطنية.. فيكم زول سمع بيها قبل كدة؟..أنا ذاتي ما سمعت بيها، ولذلك نطرح السؤال : الشركة دي بتشتغل شنو بالنهار؟.. ما خرج به المراجع العام - بعد مراجعة عقد عمل مديرها - يؤكد بأن تلك الشركة إن لم تكن تدير هذا الوطن فانها تدير كل القارة..فلنقرأ العقد، وهو موقع بتاريخ 27 فبراير 1999، أي قبل عقد وثلاث سنوات، ويتم تجديده كل خمس سنوات، تلقائياً.. الراتب الشهري (23.899.05 جنيه)، أي بالبلدي القديم ( أربعة وعشرين مليون إلا شوية)، أي تقريبا : حاصل جمع رواتب الرئيس والنائب الأول المعلنة، أو حاصل جمع مرتبات (24 إخصائي)..يمنح تذاكر سفر له - ولأسرته - الى لندن سنوياً أو يصرف له قيمة تلك التذاكر..وغرابة النص السابق تتجلى في لندن هذه، فالأخرون يكتفون بصيغة مفادها (تذاكر سفر للخارج)، ولكن عقد مديرنا يلزم المواطن ب: ( أنا عايز لندن دي تحديداً) ..!!

** وله الحق في ذاك الطلب، فالبجراوية تفتقر الى الخدمات السياحية، ولذلك يقصدها بعض شذاذ الآفاق، أما هذا المدير فمكان سياحته ( لندن بس).. يمنح بدل ضيافة (500 جنيه شهرياً)، ليس بمبلغ خرافي، إذ يعادل - تقريبا - ضعف الحد الأدنى لأجور العاملين بالدولة..يمنح بدل سكن (1.500 شهرياً)، وإفتكر معقولة مع ذاك الراتب الضعيف (24 مليون إلا فكة)..عربة وسائق وصيانة ووقود، حاجة عادية .. إجازة سنوية لمدة شهرين وبراتب شهرين، وكذلك ببدلات سكن وضيافة شهرين، (ضربوها براكم)..يمنح بدل علاج له ولأسرته داخل وخارج السودان،ونسأل الله لهم العافية..يمنح كل عام خدمة : راتب ثلاثة أشهر، وبدلات سكن وضيافة ثلاثة أشهر.. بمناسبة ثلاثة أشهر ضيافة : يمكن بيستضيف الحلة كلها في مكتبو..لم نأت الى الأدهى والأمر، تابع بصبر..أنهى خدمته قبل عقد من الزمان، وإستلم كامل فوائد ما بعد الخدمة عن العشرة سنوات، ثم جدد العقد و واصل (الشغل الصاح )..!!

** نأتي للأدهى والأمر، يقول العقد بالنص : ( تتحمل الشركة كل ضرائب المرتب والبدل والحافز وأي مخصص، ما عدا الزكاة )..حلوة ما عدا الزكاة دي، لا بالله ادفعوها ليهو، راتب تلاتة شهور مثلاً.. فلنتأمل كل هذا الصرف، ومع ذلك : مدير شركة حكومية لا يدفع الضرائبا، بل يدفعها شذاذ الآفاق إنابة عنه.. ولذلك نسأل القارئ والحكومة : ( تفتكر المدير ده بيشتغل شنو بالنهار؟)..ما لم يكن حاكماً لأفريقيا، فأفصلوه ثم تخلصوا من هذه الشركة، دعماً للتقشف وكدة ..هذا ما لم يكن المستهدف بشعار التقشف هو المواطن فقط، وليس الحكومة أيضاً..!!

السوداني


تعليقات 22 | إهداء 1 | زيارات 4265

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#415061 [ابوغره]
0.00/5 (0 صوت)

07-02-2012 10:17 PM
يا راجل انته متفائل شديد يعني هسه انته مقتنع بانو الجماعه دبل ممكن يتصلحوا بعد ما ضاقوا المال الحرام ده؟


#414664 [حسين]
0.00/5 (0 صوت)

07-02-2012 03:26 PM
يجب أن يكون هنالك سلم لرواتب كل الوظائف الرسمية وشبه الرسمية/ لا للعقود الخاصة وتمييز بعض الموظفين / كفاية تمكين / اذا ارادت الدولة أن تتصالح مع شعبهاعليها محاسبة كل الفاسدين . كل العائدات الاخيرة والرسوم الظالمة ستصرف لقمع المظاهرات والصرف على الامن والشرطة / يعنى الدولة لن تستفيد منها وبعدين !!!!!!


#414217 [zahi]
0.00/5 (0 صوت)

07-02-2012 11:12 AM
وبعد الكلام ده كلو يجيك شيخ علي ( حرق الله وجهه ) في البرلمان و يحلف ( لا .. يجب ان اقراها ) يقصد المرتب وليس المخصصات وكمان عايزنا نحن نصدق !!!!!!!!!!!!!!!!!!!


#414160 [الزُول الكَان سَمِحْ]
0.00/5 (0 صوت)

07-02-2012 10:33 AM
يا طاااهر

طنـــــــــــــون!!!!! رجع إسعاف طوارئ مستشفى الصداقة أم درمان؟؟؟؟


ردود على الزُول الكَان سَمِحْ
United States [zahi] 07-02-2012 11:40 AM
لا لا بكونو ودوهو الصومال .... و حريقه في ناس ام بده ....


#414085 [المتجهجه بسبب الانفصال]
0.00/5 (0 صوت)

07-02-2012 09:54 AM
الفساد المالي الذي امتاز به هؤلاء اللصوص يجعلنا نصدق كل الارقام الخاصة بمخصصاتهم،،،،

كما أرجوا استاذ الطاهر إلقاء الضوء وبعض الشمشمة الصحفية على شركة شيكان للتأمين وإعادة التأمين،،، إنني أشك شكاً يصل الى درجة اليقين ان شركة شيكان هذه فيها دواهي تحير أساليب اليمين المتطرف اليهودي في لغف المال وتقنين اللغف ،،، كما أن إدارتها تغشاها وتحيطها سرية مريبة ،،، هل شركة شيكان للتأمين واعادة التأمين هي التي تدير المال الخاص للتنظيم بينا جمال الوالي مجرد سبسيداري لإدرارة أموال المؤتمر الوطني المنهوبة من أموال الشعب،،، الموضوع محل بحث وتحري،،،،


#414055 [دش]
0.00/5 (0 صوت)

07-02-2012 09:36 AM
ياأخى انحنا لوماشذاذ افاق الراجل ده يحكمنا 23 سنه يمكن حيذيد كمان مايعرف ابسط مقومات الاداره الدنياء مصيوطه اهو بقول الخير جاى ياخى انحنا شذاذ افاق؟ انحنا الافاق زاته . سياره الاسعاف مامنو جديد.


#413891 [سوداني متقاعد]
0.00/5 (0 صوت)

07-02-2012 02:32 AM
طبعا الا الزكاة دي لانو الواحد من الاسلاميين بيفتكر انو الضرايب من المكوس وهو حرام شرعا في نظرهم، وعلى فكرة الفساد وسرقة المال العام نفسو حسب تعريف حد السرقة لايعتبر سرقة لانو مال عام أي غير محرز..يعني لو قطبي سرق مال الشعب وجاء سواقو سرقه يحاسب السواق لكن لايحاسب قطبي. اما محاسبة المسؤول في تقصير فلاتجوز لانو في يوم حساب وكده، يعني لو عبدالرحيم بنى عمارة وقعت لايجوز لعمر البشير ان يحاسبو. واذا ارتكب واحد خطأ في حق اي انسان كان خاصة لوكان بتاع امن زي نافع فهو له على الاقل اجر الاجتهاد ان كان الانسان الذي عذبه بريء.. باختصار الانقاذ ومايحدث في السودان هو شرح عملي بالجد للدولة الدينية وبدعة دولة الشريعة. نحن خلاص اخدنا الدرس ولازم نقلب الصفحة.


#413632 [omer]
0.00/5 (0 صوت)

07-01-2012 07:42 PM
هسي نعلق نقول شنو؟ (المغسة كتلتناااااااااااااااااا)


#413628 [اللاحس كوعه فرع الصعيد]
0.00/5 (0 صوت)

07-01-2012 07:31 PM
باسم جمعية شذاذا الافاق (شباب وشابات )نتقدم بمعروضنا هذا لبرلمان ماما سعاد
وذلك لعمل قانون ولا فتوة ولا فتة تسمح بزواج شواذ الأفاق او نهاجر لاي ولاية اخرى تسنح لنا بالزواج


#413602 [ابو دياب]
0.00/5 (0 صوت)

07-01-2012 06:55 PM
استاذ الطاهر تحياتي ...
والله بننتظر عمودك علي أحر من الجمر وبعد ان نقرأ نتقلب علي الجمر ممايحتويه... الله يصلح حال البلاد والعباد ويريحنا ممن هم علي شاكلة هذا المدير وهم كثيرين جداً.. وربما كلام الأخ الكناني صحيح (هذا المدير هو مسئول التنظيم للخدمة المدنية يعني بالعربي كدا دا يا سيدي الكريم هو بتاع التمكين )... بس الظاهر ان التمكين حيكون علي رقاب الناس ... يا رب ألطف بعبادك المستضعفين .... وحسبنا الله علي كل من كان كهذا المدير وزمرته من الفاسدين المفسدين إنه القادر علي كل شيئ .....
بالمناسبة ... الجديد في موضوع سيارة الاسعاف شنو ؟؟؟؟


#413564 [زوله كده]
5.00/5 (1 صوت)

07-01-2012 06:13 PM
الرميه الاولى دى يا ود ساتى كنت تخليها فى النهايه كانت بردت قلبنا شويه ,عايزين قرووووووووووووووووووشنا دى كلا ولو ما لمينا فيها بنخلصه خنق ساى بس انت يا ود ساتى متك معانا جي لينا الاسماء والعناوين وخلى الباقى لينا


لك الله يا سودان...


#413536 [ام ميار]
0.00/5 (0 صوت)

07-01-2012 05:44 PM
استاذ الطاهر اسم الشركه من الاساس يدل على الغرابه (اعاده التامين الطبيه)؟؟؟
وياريت كانت الاموال (المنهوبه) دي صرفت بدل غلاء للمعلمين .
ياترى كيف كان حيكون حالنا لو اتصرف على التعليم كل المليارات المنهوبه؟؟


#413491 [زول اغبش]
5.00/5 (1 صوت)

07-01-2012 04:40 PM
فعلا نحنا (شذاذ آفاق) عشان ناس زي ديل لسة بيحكمونا وكمان يسرقونا...وامغصاتي و واذلي


#413485 [الحقيقة]
5.00/5 (1 صوت)

07-01-2012 04:35 PM
الرجاء الاسم والسكن للاضاقة في سجل الغير شذاذ الافاق


#413447 [رجب]
0.00/5 (0 صوت)

07-01-2012 03:53 PM
bardo kooooooooooooooooooooooooooooooooooooz
برضو كووووووووووووووووووووووووووووووووووووز


#413435 [الكناني]
0.00/5 (0 صوت)

07-01-2012 03:43 PM
هذا المدير هو مسئول التنظيم للخدمة المدنية يعني بالعربي كدا دا يا سيدي الكريم هو بتاع التمكين


#413421 [Abu Hadi]
5.00/5 (2 صوت)

07-01-2012 03:31 PM
انت جاد في استعمالك لـ (شذاذ الافاق)؟؟؟ يعني بالعربي ما خايف؟؟

طيب هنالك من تخرج قبل سنتين فقط ويملك فلتين وبيوت و(زوجات اثنين) وعربات يملكها واخرى حكومية وووووو!! فهذا من ثلاثة عشر سنة اعتقد انه لم يوفق في لم المال - مع انه معظمهم فاقد تربوي.. يا سبحان الله ..


الطاهر ساتي
الطاهر ساتي

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة