المقالات
مكتبة كتاب المقالات والأعمدة
الطاهر ساتي
عربة الإسعاف..نهاية بطل ..!!
عربة الإسعاف..نهاية بطل ..!!
07-05-2012 12:56 PM

إليكم

الطاهر ساتي
[email protected]

عربة الإسعاف..نهاية بطل ..!!

** عذراً، فلنكمل الحديث عما يحدث في عالم الدواء غداً إن شاء الله..ثمة تعقيب - وصلنا اليوم - على قضية تناولتها في زاوية سابقة، وليس من العدل تأخير نشر أي تعقيب على أية زاوية، وخاصة أن تراكم الأحداث والقضايا - وتكاثفها - يكاد أن يحول ذاكرة الناس في بلادي الي (ذاكرة سحلية)، بحيث تنسى تفاصيل الحدث الذي يحدث أمام ناظريها، ناهيك عما حدث بالبارحة..ثم يكتسب تعقيب اليوم أهميته بأنه قد يكون الحلقة الأخيرة من المسلسل المكسيكي (عربة الإسعاف رقم خ/5271) ..وتلك عربة كانت تنقل المرضى والموتى بمستشفى الصداقة بأم درمان، قبل أن يسحبها إتحاد عمال السودان - بتوجيه الوكيل السابق لوزارة الصحة - ويسلمها لجمعية أنصار الخيرية بغرض التبرع لأهل غزة..وعجزت أنصار الخيرية عن ترحيل العربة الى قطاع غزة وأبقتها بالخرطوم عاماً وآخر وثالث.. وعندما علمت إدارة مستشفى الصداقة- بعد ثلاث سنوات من السحب - بأن انصار الخيرية لم ترحل العربة الى غزة، طالبتها بارجاعها الى المستشفى، ولكن شيوخ أنصار الخيرية قابلوا الطلب برفض فحواه ( صاح ما قدرنا نوديها غزة، لكن ح نوديها الصومال).. ولذلك، ناشدت - في زاوية سابقة - أنصار الخيرية بارجاع العربية الى مستشفى الصداقة بأم درمان، إذ حاجة أهل أمبدة إليها ماسة، وكانت المناشدة تحت عنوان : (يا شيخ طنون ياخ رجع العربية )، علماَ بأن شيخ طنون هذا هو الأمين العام لأنصار الخيرية ..!!
** ذاك ملخص الحلقات الفائتة لهذا المسلسل المكسيكي..واليوم (الحلقة الأخيرة)، ما لم يطالبني أصدقائي الأفاضل بالسفر الى الصومال وغزة لتأكيد وقائع هذه الحلقة الغريبة..ومن اللطائف، منذ يوم كتابة هذه المادة والى يوم البارحة، لم تتوقف إستفهامات أعزائي عن مصير هذه العربة وما حدث لها، وكلها إستفهامات من شاكلة ( ياود ساتي / شيخ طنون رجع العربية؟)..بل حتى في زخم أحداث الخرطوم الأخيرة وثورة شوراعها، هناك من إتصل سائلاً عن حجم الحدث الراهن وآثاره على الشارع، ثم ختم سيل الأسئلة السياسية والإقتصادية قائلاً بالنص : ( غايتو نسأل الله السلامة / وبالمناسبة، موضوع الإسعاف حصل فيهو شنو؟).. ضحكت، ثم توجست بأن تلتحق قضية هذه العربة بركب قضية (خط هيثرو)..وتلك قضية - كما تعلمون - تشغل بال زاوية حبيبنا الفاتح جبرة يومياً..وعليه، فليبقى جبرة مؤرقاً بمصير خط هيثرو الى أجل غير مسمى، أما أنا فلقد عرفت مصير عربة إسعاف مستشفى الصداقة.. وبالمناسبة، حتى مصير خط هيثرو لم يعد مجهولاً، لقد أكملت لجنة التحقيق عملها وتتلكأ في الإعلان عن محتوى تقريرها، ونشر الصحف لمحتوى التقرير بحاجة الى وثائق تقاوم شكاوى المحاكم ومجلس الصحافة، ووضع اليد على الوثائق مسألة زمن ليس إلا..بمعنى : قريب جداً - إن شاء الله - كل شئ (ح يبان)، بصحيفتنا هذه أو بإحدى زميلاتها..المهم، نحكي عن مصير عربة مستشفى الصداقة ..!!
** لقد تلقيت إتصالاً ووثائقاً من الشيخ طنون، الأمين العام لجمعية أنصار الخيرية، فحواها باختصار : ( نعم إستلمنا العربة من إتحاد عمال السودان، وكان يجب ترحيلها الى قطاع غزة، ولكن لم نفلح في ذلك..أبت تدخل في الطيارة وهم قالوا ما محتاجين ليها..فبعناها للمؤسسة الإفريقية للتنمية والتعليم بعد أن إلتزمت المؤسسة بترحيلها الى أهل الصومال..بعناها بمبلغ قدره (63 مليون جنيه).. وتم تحويل هذا المبلغ الى أهل غزة ..وبعد ذلك، أوفت المؤسسة الإفريقية بالتزامها، وتبرعت بالعربة لأهل الصومال، ثم رحلتها إليهم ..ونرفق مع التوضيح : شكر إدارة مستشفى السلام بالصومال، عقد ترحيل العربة الى الصومال، ترخيص ولوحة سيارة الإسعاف بالصومال، شهادة بحث العربة بالصومال )، هكذا توضيح أنصار الخيرية..وهكذا - سيداتي آنساتي سادتى - نهاية عربة مستشفى الصداقة (سابقاً طبعاً)..لقد باعتها أنصار الخيرية لتلك المؤسسة، وتلك رحلتها الى الصومال، وحولت أنصار الخيرية قيمتها الى فلسطين..يعني ممكن نقول : الشيوخ ضربوا عصفورين بحجر إسعاف مستشفى الصداقة،(غزة ومقديشو)، ثم ضربوا بأوجاع أهل أم درمان عرض الحائط ..وعليه، بلا أي تعليق، أناشد أهل الخير - بالداخل والخارج - بالتبرع بعربة إسعاف لمستشفى الصداقة بأم درمان.. نعم، لايزال يتم ترحيل مرضى الأهل بأمبدة - وموتاهم - بالبكاسي والركشات...!!



تعليقات 32 | إهداء 0 | زيارات 4567

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#419531 [ابو ابراهيم]
5.00/5 (1 صوت)

07-07-2012 07:00 AM
والضمان شنو ما يبيعوا العربه الجديده ويدعوا انها ذهبت الي افغنستان ؟


#419200 [مجنون]
0.00/5 (0 صوت)

07-06-2012 07:19 PM
والله يا الطاهر ساتي انت ما عندك موضوع ساي الناس في شنوانت في شنو , الناس باعوا تلت البلد وباعوا الشعب سموهوا شذاذ افاق والنسوان عاهرات وانت تقول لي اسعاف حريقة فيكم وفي رجالتكم عالم وشعب وهم والله الواحد ندمان انو سوداني لكن حكم الله فينا نسوي شنو , وبالمناسبة في ولد من ام درمان اعتقلوهوا ناس الامن وقالوا اغتصبوهوا ياريت تتكلم لينا عن زي دة


#419013 [ماجد حسن]
0.00/5 (0 صوت)

07-06-2012 04:03 PM
القضيه اكبر من عربة اسعاف يالطاهر،متي تعوا ان السودان فى طريقه للإنهيار فى ظل البشير وعصابته كونوا صحفيين مهنيين ،في اى شارع في أى مكان هنالك مظالم أما كفاكم الارواح التي تزهق في دارفور وجنوب كردفان وجنوب النيل الازرق!!!!!!!!!!!! اصحوا ياناس


#418637 [مكاوي مضوي]
0.00/5 (0 صوت)

07-06-2012 08:53 AM
فقدوا الحياة ،، إنهم في غيهم يعمهون


#418355 [ala ahmed]
0.00/5 (0 صوت)

07-05-2012 08:42 PM
موضوع انصرافي لايخدم قضية الساعة ... اكتبوا عن الواقع الاليم الذى نعيشه او اصمتوا رحمنا الله واياكم ...


#418298 [سوداني متقاعد]
5.00/5 (1 صوت)

07-05-2012 06:57 PM
بالله شوفوا المساخر دي:
وكيل الوزارة بتاعت الصحة يتبرع بعربة اسعاف من المال العام تخدم المواطن لجمعية خيرية لانو رئيسها كوز ليه يد ولانو امر بذلك من غندور والحزب.
الجمعية الخيرية "الوهمية" تبيع العربة بدون اي اجراءات قانونية معروفة وبدون اعلان بل حتى بدون علم ادارة المنظمات الطوعية لجمعية وهمية تانية.
الجمعية الوهمية الاولى حسب ذمة طنون الحرامي ترسل قروش لغزة دون بيان كيف تم تسليم القروش لناس غزة.
الجمعية الوهمية التانية حسب ذمة طنون الحرامي ترسل العربة للصومال والتي تخرج من ميناء بورتسودان بدون اي اعتراض من المالية أو من الداخلية اوحتى الجن الاحمر ذااتو.

الله يلعنكم دنيا واخرة
الله يلعنكم دنيا واخرة
الله يلعنكم دنيا واخرة


#418290 [huwidah]
2.00/5 (2 صوت)

07-05-2012 06:35 PM
مواضيع انصرافية لا تودي لا تجيب..هم عارفين انهم حرامية انت عاوز تثبت شنو....
اطلبوا من الشعب ان يخرج ليهزم الحرامية..


ردود على huwidah
United States [زول واعي] 07-06-2012 03:27 AM
ياسيدي الكريم العربية قبل ما تدورة لازم تسخنة وتديها ابنصات عشان تمشي معاك منقي ,فخليهو يسخن العربية ياشيخنا.


#418281 [صلاح فضل السيد حامد]
5.00/5 (1 صوت)

07-05-2012 06:21 PM
أتمنى من مشايخنا الكرام أن يفتونا في ذلك وهل هذا يجوز مع العلم بأن أفقر حي في غزه يعادل إمتداد بيت المال ومع العلم كذلك بأن أهالي غزه وما جاورها من مدن وبلدان بينظروا لينا كقرود وعبيد وعيب على العربي الأصيل أن يتلقى مساعدات من عبيد كالسودانين وتبياناً لذلك ما حدث لأبنائنا في المنتخب من قبل زملائهم الشوام


#418280 [zizoo]
0.00/5 (0 صوت)

07-05-2012 06:19 PM
لا حول ولا قوه الا بالله... و الله لقد بلغ السيل الزبي... يا شيخ طنون انت مجنون؟؟؟


#418253 [اوطان]
0.00/5 (0 صوت)

07-05-2012 05:41 PM
يبقى السؤال لاهل غزة هل استلمو هذا المبلغ ,وكيف وصلت السياره الصومال ومن هو طنون ولايحزنون ده ,من هنا نطالب هذه الطنون باقتلاع عربة اساف من اى مكان وتسليما لمستشفى الصداقه والا سوف نتدفعها مقيما باحد السجون


#418233 [سوداني]
0.00/5 (0 صوت)

07-05-2012 05:03 PM
ياشيخ طنون مابالغت ..............................


#418220 [تاج]
5.00/5 (1 صوت)

07-05-2012 04:39 PM
الصومال بلد مافيها حكومه فكيف قدر شيخ طنون يجيب للعربية شهادة بحث والليلة دى لو داير ورق دبابة ممكن تجيبو من الصومال لانو اخوانا الصومالين معروفين شديد فى فن التزوير. الريحه العفنه مازالت موجوده رغم بخور شيخ طنون الضارب. ماشاء الله كلهم شيوخ طنون فى السودان وشريف فى الصومال غايتو الله كريم لكم الله ياهل امبده.


#418211 [حمدالنيل]
5.00/5 (1 صوت)

07-05-2012 04:27 PM
يا ود ساتي أفهم ياخي أفهم..
ناس ام درمان ومستشفى الصداقة ولا مستشفى تندلتي (هي فيها مستشفى؟) مامحتاجين للاسعاف، وقد انعم الله عليهم بالشيخ طنون وأمثاله، ويمكن للمريض المؤمن يمشي ياخد فاتحة بس من الشيخ أو احد تلامذته، ويتعافى ويقوم سداري ولا يحتاج لإسعاف ولا نقالة، إنت ما مؤمن وللا شنو يا الطاهر؟
ولو ما مصدق كلامي أسال شيخ طنون بتاعك ده.

والله لن ينصلح حال السودان إذا ذهبت الانقاذ وبقي واحد من ناس طونو وامثاله. ي ويجب أن يكون شعار الثور ليس "الشعب يريد اسقاط النظام" وحسب. بل يجب ان يكون اول اجندة الثوار وتحالف الاحزاب، هو "الشعب يريد سحل الشيوخ"
ولكم الله يا ناس ابمدة وبقية أهل بلادي فكلاب غزة افضل منكم عند شيوخكم .
بالله يا الطهار مسحت دموعك بكم منديل وانت تكتب هذا التوضيح من الشيخ طنين.


#418207 [واحد تانى]
0.00/5 (0 صوت)

07-05-2012 04:18 PM
ياود ساتى من الخطا ان تطلق على هذا الشخص صفة الشيخ ....!!


#418200 [fatmon]
1.00/5 (1 صوت)

07-05-2012 04:07 PM
الكلام ده ما فيهو أي شئ يا ود ساتي الإنقاذ تعودت دائما على عمل الخير يؤثرون على أنفسهم ولو كانت بهم خصاصة فهم عارفين نحنا حالتنا ومرضانا أصعب بكثير جدا جدا من غزه والصومال مجتمعتين اي والله العظيم والله العظيم حالتنا أصعب والكل يعرف ذلك في اي وقت سيرة السودان الفشل الفساد المرض الفقر ولا أحد يتفوق علينا دائما الصداره لنا في هذه المجالات مجتمعه حتى من كان لا يعرف إسم السودان ولا يعرف مكانه في الخريطه أصبح يتحدث عن فقرنا وجوعنا ومرضنا وموضوع الدواء أخيرا كمل الناقصه لا دواء بالدين للصيدليات هذا يعني مافي داعي لعربية إسعاف أصلها تشيل منو وتخلي منو ما دام أصلها ما عاملها حاجه أحسن تنفع غيرنا ولا شنو الناس ديل ناس شريعه ودين ومافي حد بعرف الأخلاق النبيله والكرم زيهم حتى لو كان على حساب شعب الصبر هو غذاءه اليومي لا ضير يا ود ساتي مافي مشكله والرقشات متوفره أي نعم بدون ترخيص ومكاتب الترخيص ققلوها كل الضباط القائمين عليها أحيلوا للتحقيق عشان بنوا ليهم كم عماره وما أشركوهم تقول شنو؟ القسمة إختلفوا فيها الحرامية عشان كده الريحه مرقت بره كل سواقين الرقشه عارفين الكلام ده
وكل ما يلاقوا الواحد يخالفوه ويلموهم ومره مره يطلعوها للواحد بميه قبل 6 شهور كان مية ما عارفه حسه بكم والبنزين زادوه لكن مافي مشكله الحبش راقدين كلهم إشتروها بعد أولاد السودان خلوها ليهم ما قلت ليكم نحنا ناس طيبين بعد ما جووعنا علمونا نخلي حقنا ونخت الخمسة في الإثنين.
إنشالله ده ما يكون مصير خط هيثرو يا ود جبره
ولكن للصبر حدووووووووووووووووووووووووووووووووووووووووووووووووووووووود الثورة لكنس الفشله الثورة على نظام القتله الثورة على الرقاص واجب على كل من له قلب ينبض
ثوروو ثوروو النصر لنـــــــــــــــــــــــــــــــــــــا وقريبا قريبا جدا حنصير أحرار أحرار بأذن الله.


#418183 [وحيد]
1.00/5 (1 صوت)

07-05-2012 03:31 PM
سفاهة النظام و اهله و منسوبيه سواء كانوا في وظائف حكومية او وظائف ارتزاق في مسميات المنظمات المختلفة التي لا يعلم عدده احد و لم يسمع عن ميزانياتها احد و لم يراجعها المراجع العام!
السفاهة التي تجعل حكومة مسئولة عن البلد و عن شعب لتقتلع من لحم الشعب ثم تكسي الاخرين ... و كثير من هؤلاء الاخرين حالهم احسن كثيرا من حال شعبنا... مواطننا المريض ذو الحالة الحرجة يترحل بالحمير و هو في قلب العاصمة " الحضارية" بينما حكومة ود اب زهانة تستولى على عربة اسعافه للتبرع بها لاهل غزة، و اهل غزة انفسهم الذي استولت حكومتنا غير الرشيدة على اسعاف المواطن للتبرع لهم بها، اتضح انهم غير محتاجين لاسعاف اصلا!
حكومة ود اب زهانة و منظماتها التي على شاكلتها تابى الا ان تتبرع بتلك العربة او بقيمتها رغما عن انف المواطن و رغما عن انف اهل غزة الذين ابدوا عدم حاجتهم للاسعاف.....
لا ادري هل مولانا امير المؤمنين المجاهد المشير هو حاكم بلاد السودان ام هو ولي امر غزة و الصومال؟
حقا كمسلمين مطالبين بالايثار و التصدق لكن حتى الاسلام يحدثنا بان ذوي القربى اولى بالمعروف، سلاطين السودان اذا ارادوا ممارسة زكاة الفضل و الايثار فليفعلوا مما اكتنزوا و لكن لا يمكن ان يجيعوا الشعب ليطعموا آخرين - اقل جوعا -!
ود اب زهانة اشتهر في الحكايات الشعبية بالفشخرة الفارغة و هو يدفع آخر مليم عنده لياكل في اللكوندة - او الفنادق- في حين انه لا يجد مكانا لمبيته و لا يملك ثمنه فينام تحت حائط الجامع!


#418163 [Abdel Rahman]
0.00/5 (0 صوت)

07-05-2012 02:58 PM
ِيخ طنون وما ادراك ما شيخ طنون ربيب فتات القصور في الكويت,ما لنا وانصار , ما لنا وحماس من باب اولي ناس ام بده.
لكن هكل اموال الشعب الغلبان بالباطلز


#418162 [واحد مفلس]
5.00/5 (1 صوت)

07-05-2012 02:58 PM
بس ياهو زاتو حشاش بي دقنو


#418144 [mohy]
4.00/5 (2 صوت)

07-05-2012 02:38 PM
ياخي ما ترحم نفسك شوية وترحمنا معاك رموز النظام إعترفوا إنو يوجد فساد ودي ما بتغالطو فيها عنزين أكتب ليك حاجة يذكروك بيها الدنيا ثورة إنت لسه في عربية إسعاف البلد بي حالها بتضيع
إرتقي شوية لمستوى المسئولية إنت قايل قراء الراكوبة ديل جهلة عشان يمسكوا معاك الشطر الميت ولا اللهاية الأدوك ليها دي؟؟؟؟؟؟؟؟؟؟؟؟؟؟؟


#418140 [ام ميار]
0.00/5 (0 صوت)

07-05-2012 02:33 PM
لك الله يا وطني


#418137 [ســناريست]
0.00/5 (0 صوت)

07-05-2012 02:27 PM
شـــحاد وبتصدق؟؟؟؟


#418133 [الجمبقلى]
0.00/5 (0 صوت)

07-05-2012 02:18 PM
بالله ده كلام ،شيخ طنون بعد سقوط النظام أن شاء الله نقدمك لمحاكمه بتهمة الأعتداء على حقوق المواطن

وأهدار المال العام ،وان شاء الله تدخل السجن ،طيب يا ود ساتى الأسعاف موضوعه بسيط لكن كيف نضمن

عدم الأعتداء عليه مرة أخرى من قبل شيخ طنون،والله حكايه تفقع المراره


ردود على الجمبقلى
United States [الزول الكان سَمِحْ] 07-05-2012 02:39 PM
الجمبقلى

لالالالالالا..إستنا يا أخوى بالهداوة كدا

شيخ طنون دا أنا حا أبَرْبِحْ ليهو...مسواك أراك من سنكات ..ولا محاكمة ولا يحزنون


#418132 [zahi]
0.00/5 (0 صوت)

07-05-2012 02:17 PM
و الضمان شنو يا ساتي التبرعات دي تمشي محلها و اذا اشترينا بيها اسعاف يجيك واحد ( سفيه ) يقلعها و يقول عايز يوديها للمجاهدين في افغانستان ؟؟؟ ....... جبانه هايصه ...


#418130 [wudoof]
0.00/5 (0 صوت)

07-05-2012 02:16 PM
هذه سخافة واستهبال ولعب عيال...!!.. هل هذه حال دولة ترعى حقوق شعبها ومواطنيها ؟؟؟!!
هذا احتيال، وتواطؤ من كل الجهات التي يعنيها الامر، ابتداء من المستشفى نفسه حتى طنون وما يقوله ما هي الا فبركات. ومالنا ومال غزة والصومال ونحن احوج منهم .
هذا هو الفساد بعينه .


#418116 [صالح عام]
0.00/5 (0 صوت)

07-05-2012 01:55 PM
هل هؤلاء شيوخ ام عصابة حراميه وزلنطحيه


#418110 [الزول الكان سَمِحْ]
3.00/5 (2 صوت)

07-05-2012 01:50 PM
ههااااااهههههاى

با عوها!!!والله أريتم كان رخصوها زى ماخمنت أنا فى تعليقى أول مرة فى خط من خطوط الثورات

يا أخوانا كيف عربية تابعة لوزارة الصحة وتعمل بأحد أقسامها وهو مستشفى الصداقة يتم بيعها.

وياريت بيعها وبس ..دي حتى قروشا إتبرعوا بيها!!

يا على عثمان..ويا بايظ...ويا دوسة...وياعبد الحى..هل هذا هو الإسلام ...يوصى ببيع من لا يملك

يا على عثمان هذا هو ترسيخ الشريعة؟؟؟ ويابايظ قل لنا هل هذا فعل من يفرق بين الخطأ والصواب وسرقة من لايملك ليتبرع بها لمن لا يستحق؟؟

يا فاسدين بإسم الدين...يا طاهر سوف لن أتوقف عن خبر الإسعاف وسأغير صيغة سؤالى:

طــــــنون...جاب إيصال 15 حق التبرع بالمبلغ لغزة؟؟؟


#418099 [زوله كده]
5.00/5 (1 صوت)

07-05-2012 01:41 PM
اها يا ود ساتى وانت الكلام ده صدقتو ولا شنو ؟؟؟ العربيه دى ساعة ما دخلت فى الطياره البتوديها غزه مشت الصومال كييييييييييييف ؟؟؟؟ وبعدين فى عربيه اسعاف قيمته 63 مليون بس ؟؟؟

والله يا الكيزان الله يمرضكم فقعتو مرارتناوغليتو الدواء يعنى نموت فطايس ,الله لا كسبكم...


#418090 [Ahmed Mohammed]
1.00/5 (1 صوت)

07-05-2012 01:35 PM
The ambulance is sold for less than 12500 US Dollars!!!!!!!


#418084 [ابن السودان حافى]
2.00/5 (1 صوت)

07-05-2012 01:31 PM
لا حولة ولا قوة الا بالله عليكم الله شوفوا المصيبه دى نحنا اهلنا محتاجين لعربة الاسعاف اكتر من اهل غزة والصومال يعنى ناس ام بده ناس شواطين ما بستحقوا القصاص القصاص الكنس الكنس لهؤلاء الهمج والدقون التى لاتخاف الله فى اهلها ايه دخلنا نحن بناس الصومال وغزة والله غزة فيها عمارات وبنيات احسن من الخرطوم وفيها سيارات اسعاف ومستشفيات احسن من مستشفيات الخرطوم قوموا بلا لمه معاكم يا وسخ ويا عفن من شيخ طنون ده؟؟؟؟؟؟ ده واحد **** .


#418072 [عثمان سليمان]
3.00/5 (1 صوت)

07-05-2012 01:19 PM
أفتتح باب التبرعات 100 ج


#418070 [الحقيقة]
2.00/5 (1 صوت)

07-05-2012 01:18 PM
البطل ما انتهى يا ود ساتي

1- من هم اخواننا في غزة ديل ؟
2- من هم اخواننا في الصومال ديل ؟
3- من قيم شعر السيارة وباعها ؟
4- كيف استطاعة المنظمة الافريقية ترحيلها الى الصومال ؟ ما قتو ما بتخش
5- هو الصومال فيهو بوليس ؟
6- خطاب الشكر دا وينو ؟
7- حولتوا القروش سوداني ولا دولار وبي ياتو سعر؟
8- ممكن صورة للعربية واقفة في الصومال ؟
9- ممكن تكون العربية الان حايمة في شوارع الخرطوم ولا ارتريا؟

الف الف سؤال لان البطل ما يموت دا يادوبو بداء الفلم الاصلي


ردود على الحقيقة
United States [ســناريست] 07-05-2012 02:30 PM
كلامك عين العقل،، لكن لن تجد إجابة واحدة ،، في دولة تحكمها الفوضة وعدم المؤسسية. ســـــــؤال : لماذا لا يريد الحزب الحاكم تطبق الحكومة الإلكترونية؟؟؟؟؟؟؟؟؟


#418068 [ود شندي]
5.00/5 (1 صوت)

07-05-2012 01:13 PM
إنا لله وانا اليه راجعون افتحوا لنا حساب للتبرعات مع اعطائنا ضمانات ان هذه التبرعات لن تدخل في كروش حرامية الانقاذ عليهم لعنة الله


ردود على ود شندي
United States [عادل] 07-05-2012 01:34 PM
يا ودشندي القلع بقى عينك عينك والاناقيذ(الانقاذيين) بقو ولا بخجلوا ولا بدسوهو يعني يموتو ناس ام بده في ستين المهم نعمل حركه ما مفهومه نلخبط الموضوع الاسعاف يمشي محل مايمشي مين سائل المهم تطلع طاقية يلبسها القوي .. ضمانات مين ياعم والله يشيلوها وعينك فيها ياخ ديل لو بيتك عجبهم بكره بقلعوهو منك ... ياخ ديل لو مرتك عجبتهم بكتلوك وبعرسوها بعدك ولو ولدك عجبهم بجيبو ليهو ناس الامن وبدخلوهو جوه و..... انت عارف .. يا اخوي اطلع الشارع بس


الطاهر ساتي
الطاهر ساتي

مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2016 www.alrakoba.net - All rights reserved

صحيفة الراكوبة