ليه ندفع ضرائبكم ..؟؟
07-09-2012 03:30 PM


إليكم

الطاهر ساتى
[email protected]

ليه ندفع ضرائبكم ..؟؟

** آخر تقرير للمراجع العام، صادر قبل شهرين، أبدى ملاحظة مهمة للغاية - ومعلومة في غاية الخطورة - بعد أن راجع العقود الخاصة بالسادة الذين يديرون البنوك والشركات والهيئات الحكومية.. إذ يقول محتوى الملاحظة : السواد الأعظم من هؤلاء السادة لايدفعون الضرائب كما يفعل أي مواطن صالح، بل تدفع ضرائبهم - انابة عنهم - تلك البنوك والشركات، يعني بالبلدي كدة : بتدفعها إنت يا المبروك..وهذا لايحدث إلا في السودان، إذ دفع الضريبة بمثابة فريضة على كل مواطن ومواطنة، مسؤولاً كان أو من العامة، أوهكذا الحال في الدول التي أنظمتها وقوانينها تقدس المساواة - بين الناس - في الحقوق والواجبات..ولكن في السودان، حيث الغنائم للولاة والغبائن للرعية،كل الذين يديرون بنوك العامة، تدفع لهم تلك البنوك ضرائبهم المفروضة على رواتبهم وبدلاتهم، وهذا موثق في عقوداتهم.. ثم الأدهى والأمر، حتى بعض الذين يديرون شركات العامة أيضاً يتهربون عن دفع الضرائب، وذلك بإلزام تلك الشركات بالدفع إنابة عنهم ..!!

**على سبيل المثال، شركة السكر السودانية .. وبالمناسبة، بعد إعلان تحرير سعر السكر، يجب أن تلحق هذه الشركة (أمات طه) عاجلاً غير آجل.. نعم، لم تعد ذات جدوى بعد تحرير السكر، بل هي - أصلاً - لم تكن ذات جدوى حتى قبل التحرير.. ومهمة جلب السكر من المصناع ثم توزيعه للتجار، يمكن أن يؤديها أي ( شركة نقل).. تخلصوا من شكر السكر، مالم يكن جدواها كفالة حتى الذين لايدفعون الضرائب..علما بأن دفع الضرائب أقل عطاء يمكن أن يقدمه أي مواطن صالح لبلده وشعبه، ( انا طبعا إتأثرت بالثقافة الغربية في دنقلا وكدة)، وهذا منعاً لهجوم التجار الذين ترهقهم (ضريبة الوطن)..المهم، نرجع لعقد مدير شركة السكر، وهو بتاريخ 28 يونيو 2009، ولايزال سارياً، ويستمد مشروعيته من مجلس الإدارة، وهذه ثغرة أخرى..مجلس الإدارة يجب ألا يكون طرفاً في أي عقد، فالجهة التي تعين مجلس الإدارة - وزارة كانت أو رئاسة - هي المسؤولة، وكذلك يجب توثيق أي عقد حكومي في إدارة العقودات بوزارة المالية، حسب قانون الخدمة..وهذا ما لم يحدث في العقودات التي راجعها المراجع العام، وكلها بطرفي، كل الشركات والبنوك والهيئات، وفيها من المزايا ما يشيب لها الولدان.. تابعوها بصبر..!!

**على كل حال، إنفراد مجالس الإدارات بتوقيع العقود مع المدراء، قد يحدث نوعاً من (المصالح المشتركة)، بين الإدارات ومجالس الإدارات، وستظهر تلك المصالح - وملياراتها - حين نعرض حوافز ومخصصات بعض (رؤساء وأعضاء مجالس الإدارات)، قريباً إن شاء الله.. ياخ نرجع لعقد المدير، إذ تقول نصوص العقد بأن راتبه (18.332.31 جنيه)، ومع ذلك : تدفع له الشركة فواتير الكهرباء والماء والتلفون.. بدل مأمورية بالداخل ( مرتب خمسة أشهر)..إحتمال بيمشي الجنيد وكنانة كداري، ولذلك يستحق ( مرتب 5 شهور)، وبدل مأمورية بالخارج (300 دولار يومياً)، إفتكر معقولة مع غلاء المعيشة في أمريكا مثلا..ويمنح علاج وتذاكر - له وللأسرة - وحافز سنوي وعربة ومكأفأة..ثم - فجأة كدة - تتحمل الشركة كل الضرائب المفروضة على الرواتب والبدلات..لنعم، سيادته يهنأ بكل تلك المزايا، وسيادتك - أيها المواطن المنكوب - تدفع ضرائبه مكرهاً.. لماذا..؟؟

** يعني بالواضح كدة يا سيدنا المدير : ليه ندفع ضرائبك؟ ، ذنبنا شنو؟، لاك مسكين ولاك فقير، ماشاء الله مرتبك يهز ويرز، وكهربتك مدفوعة من عرقنا ومويتك مدفوعة من تعبنا وتلفوناتك مدفوعة من كدنا وتذاكر سفرك مدفوعة من جوعنا، وعندك عربية بي سواقها خصما من مرضنا، وكمان بتمشي عسلاية وتجي راجع تأخد ( 5 شهور كاش)، أها : ليه بعد ده كلو ندفع ضرائبك ؟..علماً بأن أي عامل بالبلد ملزم بدفع ضريبة الدخل الشخصي خصماً من راتبه، حتى ولو كان راتبه (750 جنيها فقط لاغير)، بحيث يدفع (5%) في ال(500 جنيه)، ويدفع (10%) عما يتجاوز ال (500 جنيه)، أى من كان راتبه (750 جنيه) يدفع للدولة ضريبة دخل شخصي مقدارها (50 جنيها)..إن كان هذا حال المواطن ، فذاك السؤال - ليه نحن ندفع ضرائب دخلك الشخصي؟ - ليس لمدير شركة السكر فقط، بل هذا المدير محض نموذج من نماذج قادمة، ولكن السؤال لكل من حدثته نفسه بأن يصيغ عقداً كهذا.. وما أكثر التوقيعات غير العادلة والتي تلزم المواطن بدفع الضرائب إنابة عن أصحاب (العقودات الخاصة)..!!



تعليقات 27 | إهداء 0 | زيارات 5031

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#422502 [تاج]
0.00/5 (0 صوت)

07-10-2012 10:19 AM
بعد كل هذا الكرم من الشعب السودانى الفضل, السيد الرئيس يصفو (بشذاذ الافاق). اول مره اشوف ذول جعان يصوفو ب (شاذ افق) يعنى بدل الزول يقول انا جعان يقول انا (شاذ افاق). ما يقوم وزير المالية يسمعنا يرجعنا لعهد الصبارات و البراميل, الله لاكسبكم ولا غزه فيكم بركه.


#422161 [سودانى حر]
0.00/5 (0 صوت)

07-09-2012 10:16 PM
هو ما عندو ذنب ياناس الحمير الفاكين البلد تمشى ذى ماهى عايزة هم المسؤولين وربنا يسألهم هو أتفق معاهم وهم وافقةا لأنهم ما دافعين حاجة من جيب أبو واحد منهم دا كل الموضوع والبلد دى كلها ماشفة فوضة ذى دا


#422147 [ودعلي]
0.00/5 (0 صوت)

07-09-2012 10:02 PM
والله انسان راقي ومحترم يا الاستاذ الطاهر ساتي بس نحنا على ما اعتقد بلد غريب الاطوار حتي في اسلاميته كيف يصرف مدير 18 مليون بالقديم وما ياخدة منه ضرائب ولا كهرباء وكانه مخلوق من كوكب اخر يا اخي الرئيس الامريكي تؤخذ منه الضريبة ونحن في بلد مسلم؟؟؟؟ ورئيس مسلم؟؟؟ ومطبق الشريعة في جيبة؟؟؟؟ وكمان ما خفي اعظم وايه مقدمة كنانة للسودان غير حفلات ندى القلعة وتكريم الوفود السودان ده بصراحة ما عندة وجيع اي رئيس يجي يكون حرامى هو زمرته لا خايف من الناس ولا من الله بس ربنل يمهل ولا يهمل والشعب تعب وقرف وكفاية صبر وما عايزين احزاب بصراحة كرهنا ابوها لا شيوعي ولا حركة شعبية ولا امة ولا ديمقراطى ولا مؤتمر شعبي ولا وطني بطنا طمت من فعايلكم شوف بلاد الكفر كيف تدار السلطة يا انصاف المسلمين واشباه مسيلمة الكذاب يا خسارة تكونوا من امة محمد صلي الله عليه وسلم


#422126 [salman]
5.00/5 (1 صوت)

07-09-2012 09:40 PM
وزيره في الحكومه الكنديه اتعقد ليها مجلس تحقيق في البرلمان بسبب زياره رسميه لدوله اروبيه وكانت قد حولت اقامتها من الفندق المفترض ان تقيم فيه لفندق ارقي واغلي وكان الفرق بضع مئات من الدولارات والزمتها لجنة التحقيق بدفع الفرق لخزينة الدوله ونقلت اجهزة الاعلام الموضوع بتفاصيله علي الهواء. حدث ذلك قبل شهرين تقريباً فما رأي من يتخذون الاسلام ديدننا للوصول لمراميهم ؟


#422122 [شاذ افاقي]
0.00/5 (0 صوت)

07-09-2012 09:34 PM
صراحة ياودساتي اخاف ان يغدر بك هؤلاء المجرمون اللصوص بعد ان فضحتهم وكل يوم تفضح فسادهم وانصحك ان تعمل ليك حراسة شخصية وتنتبه او سيكون مصيرك زي مصير الراحل الصحفي محمد طه محمد احمد.. ارجو ولمصلحتك وحمايتك ان تخف شوية على اللصوص ديل وتغض الطرف عنهم لانني احس بانهم سيأذونك.. ولا تذكر لهم بانك غدا ستقوم بنشر تفاصيل عقد عمل مدير الشركة الفلانية او الفلانية.. هذه نصيحتى لوجه الله.


#422103 [ابوالجعران]
0.00/5 (0 صوت)

07-09-2012 09:02 PM
هذا ما يســـمي ب التــــمكين البلد بقت ممكونه مكنه شديده يفكها ربك ساكت ياود ســاتي كل التمكين للذين سوف يامرون بالمعروف وينهون عن المنكر واجب ديني ووطني ويجب علي المواطن ان يدفع فهذا واجب وطني الم تسمع بسياسه التمكين وتفصيل العطاءت وتفصيل الشركات المعفيه وكلو ممنوع من النشر ومافي في الانقاذ رجل واحد فاسد طيله 23 سنه رقم دخل مؤسوعه جينيس من اوسع الابواب وكل اللي بتسمعوا عن هيئه الحج والعمرة وديوان الذكاه وشركه الاقطان مكايد حاسدين زالاسواق الحره والتقاوي والمبيدات وحاصدات البنك الزراعي الفاسده قضاء وقدر والظلم اللي واقع علي الناس من اهل التمكين باسم التمكين قضاء وقدر وجلب الجوع ..................


#422074 [برانتود]
5.00/5 (1 صوت)

07-09-2012 07:59 PM
تعرف انا ما بمشى السودان كتير ولى 34 سنة مع اسرتى خارج البلد وعندى بيت بسيط وكل سنة يتصلوا ويطالبونى بمليون (عتبة)بالله عليك انا ما اتهنيت بالسكن وكمان ادفع مليون؟؟ وما تنسى النفايات..مرة انا واقف قدام البيت جانى واحد وقال لى نفايات.. وبعد كم يوم برضو جماعة جو بالعربية وقالوا نفايات...


ردود على برانتود
United States [الزول الكان سَمِحْ] 07-09-2012 08:38 PM
أخى برانتود

مع ذكر النفايات...يا أخى ديل وظفوا ليها فنان عديييل كدا وعندوعربية وبجيبوهوا فى واحدة من قنواتهم الفضائية

يا أخى ديل خلوا نظرية فى توجههم الحضارى ما طبقها فينا!!! جهجهونا الله يجهجهم..ودا الخلى أخونا الأغبش صاحب أول تعليق على هذا المقال يسأل عن خط هيثرو ..

اللهم أرفع عنا البلاء ..وأرسل عليهم آية من عندك تجعلهم عظة لمن لايعقلون


#422065 [سوداني متقاعد]
5.00/5 (1 صوت)

07-09-2012 07:43 PM
ماقلنا ليك الجماعة المتأسلمين كلهم مابدفعوا ضرايب لانها من المكوس وهي حرام شرعا في نظرهم والمال ا. قال تطبيق شريعة قال.


#422045 [غلبنى عدييييييل]
5.00/5 (1 صوت)

07-09-2012 07:18 PM
قمة الحقارة والنتانة, على بابا وجماعتو الأربعين تلاميذ بالنسبة لى جنس ديل, ويجو لعد اللغف ده كلو يقول ليك هى لله. إخ تفووووووه عليكم يا زبالة جاييكم يوم وحسابكم تقيييييييل الله يحلكم بس من المظلومين والمسحوقين ديل حياكلوكم وإنتو أحيااااء

المدارس بدت وانا لغاية اللحظة ما قادر ادفع الرسوم لى أولادى عشان ماعندى, اهم قاعدين فى البيت. لعنة الله عليكم وإنشاءالله ما تتهنو بقروش الحرام دى تقطع مصارينكم


#422042 [الزول الكان سَمِحْ]
0.00/5 (0 صوت)

07-09-2012 07:13 PM
يا طااااهر

المواطن يدفع بموجب الأركان التى بنى عليهاالإنقاذ والدفع دا يتبع للركنين التالت والرابع:

3/ عندك ماعندك..تدفع

4/ كان ماتدفع..تتلبع

أها كدى النرجع لى سؤالى:

طـــنون...جاب صورة من أورنيك 15 بالمبلغ الإتبرعو بيهو لى ناس غزة من بيعة الإسعاف؟؟؟


#422029 [ود البطانة]
5.00/5 (1 صوت)

07-09-2012 06:41 PM
إنه ليس شرعيا يا الأخ/مرتضي الطاهر ، ما هو الشرعية فيه إن كنت تفرض علي الفقراء دفع ضرائب مع قلة رواتبهم وتدفع الضرائب لكبار الموظين نيابة عنهم أو تعفيهم من الضرائب ؟ هل هذه هي شريعة الإسلام ؟ الشريعة هي أن تساوي بين الموطنين في مثل هذه الحالات وتميز بينهم في الجهد الذي يؤدونه والمؤهلات التي يحملونهوفي المرتبات بناءا علي ذلك الأنه بكل بساطة أن الضرائب التي تدفع نيابة عن كبار الموظفين هي خصم من الضرائب النهائية التي يجب أن تدخل خزينة الدولة للصرف منها علي الخدمات التي تخص كل الموطنين( ويمكن أن تحسبها طبعا) . أتقوا الله وقولوا الحقيقة فلن ينفعكم ملأ بطونكم بالخبيث والطيب فإنها نعمة زائلة وهناك يوم للحساب واقنعوا بالحلال الطيب وإن كان أقل وإلا كنتم تتشدقون بالإسلام زورا وبهتانالتأكلون حق الناس بالباطل وأنتم تدرون.


#422024 [wafi]
0.00/5 (0 صوت)

07-09-2012 06:21 PM
تحياتي يا الطاهر


انتوا بتنسوا ولا شنو؟

الجماعة ما زمان قالوا ان الرواتب الكبيره دي مش للموظفين الشغالين في السكر ولا التربيه ولا الاوقاف.

دي رواتب بتدفع للمؤتمر الوطني الحزب - وبعد ذلك الموظف المسكين يا دوب يعطوه منها الربع .

ما شايف ولد البروف احمد عمر ، وجمال الوالي و كده

وتاكيدا لي كلامي الشيخ علي عثمان ما قال ليكم راتبو 10 مليون ، يعني الشيخ الكبير كذاب؟



عشان كده يا الطاهر شوف ليك فساد عير فساد الرواتب ، ده ما فساد ،دي لله ،[ يعني لنصره الدين ،يعني جهاد مدني عديل ]


#422022 [ابو طارق]
5.00/5 (1 صوت)

07-09-2012 06:12 PM
مافيها حاجه ياساتى كان دفعنا ليهم الضرائب ماهم تعبانين كتير عشان نحن نسعد ونهناء ولا شنو, ربنا يزيدهم ويغرقنا نحنا قولو امين .


#421998 [hamdi]
5.00/5 (1 صوت)

07-09-2012 05:43 PM
عليك الله ياالطاهر خليه المدير دا شوف المدير السابق مهدي بشير بعد مانذل المعاش قالوليك ساب الشغل ابدا والله اكثر من عشره سنوات شغال بالتعاقد وباضعاف راتبه الذي كان يتقضاه في السابق وفوق دا كله بيطلع تصاديق من المصانع لمنسمع بها من قبل شيئ حديد شيئ مواسير شيئ براميل غايته الشركه دي فيها فساد ما عادي


#421972 [حسكنيت]
0.00/5 (0 صوت)

07-09-2012 05:11 PM
والمظاهرات المولعة دى قايمة فى شان شنو؟


#421963 [الأغبش]
0.00/5 (0 صوت)

07-09-2012 04:54 PM
cry the beloved country


#421959 [وحيد]
0.00/5 (0 صوت)

07-09-2012 04:50 PM
اخونا الاستاذ الطاهر ساتي: قلنا و نكرر ان السودان في عهد الانقاذ اصبح اقطاعية خاصة للتنظيم الحاكم يفعل فيها ما يشاء بنظام الاقطاع الذي كان ساريا في القرون الوسطى، و عليه اصبح السودان يضم طبقتين: طبقة السادة الملاك و هم يملكون كل شئ و يقتسمون الاقطاعات فيما بينهم و يستولون على كل الارباح، الطبقالشغيلة او العبيد و هؤلاء ليس لهم حقوق و لا من حقهم المشاركة في الحكم او الادارة و عليهم ان يعملوا بالمهن الدنيا و الوظائف الصغيرة و يدفعوا الاتاوات و الجبايات و يسلموا كامل انتاجهم لطبقة الملاك، فقط مسموح لهم العيش بالحد الادنى حتى لا يموتوا من الجوع، و اذا مات بعضهم جوعا او مرضا فهؤلاء اصلا مستغنى عنهم لانهم ضعاف و لا ينتجون لملء جيوب اسيادهم..... الم تسمع مقولة الانقاذ الاولى التي نسبت للزبير محمد صالح انهم يكفيهم فقط ان يبقى ثلث سكان السودان؟


#421957 [amir]
0.00/5 (0 صوت)

07-09-2012 04:45 PM
يا ايها الساتي ...اليس هولا هم قادة المشروع الحضاري !! كيف يدفعون الضريبة ؟ اين موقع الضريبة من الإسلام(اتحداكم)؟؟؟؟؟؟ فهم ماشاٌ الله والحمد لله يدفعون الزكاة من حر مالهم فالعقد لا يشمل دفع الزكاة(كما قلت انت في مقال سابق).
فالفساد هنا نظام يمشي علي رجلييه (قال محاربة فساد قال) لا تمثلو علينا فانتم غارقون في الفساد من اخمص قدميكم الي ما لا نهاية له.
اضحك تطلع الصورة مبراٌة من الفساد (نضييييفة) ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههو وشر البلية ما يضحك

في الختام ما هو الإسلام هل هو نطق الشهادتين والعمل بما سواه ,ام هو كما قال الرسول صلي الله عليه وسلم بعثت لاتمم مكارم الاخلاق وايهما افضل اخلاقا الغرب ام نحن.


#421945 [الحارث]
3.50/5 (2 صوت)

07-09-2012 04:36 PM
اااااااااخ
اى شريعة و اى دين ينبحون به هذه شريعة و دين ابليس منذ خلقه عجز ان يفرضه على الخلق و فرضته هذه العصابة الشيطانية على اهل السودان
هؤلاء فاقوا ابليس فى افساده
الحمد لله لم يجعلنا منهم
يا الله يا الله يا الله ارنا فيهم انتقامك ارنا فيهم قوتك


#421937 [مرتضي الطاهر]
4.50/5 (5 صوت)

07-09-2012 04:29 PM
العقد شريعة المتعاقدين وهذا من الدين.. يعني طالما الاتفاق جاء بالتراضي بين الموظف والمؤسسة ويلزم المؤسسة تدفع ضريبة الدخل نيابة عن الموظف يبقي عقد شرعي وحلال ومافي خلاف.

بس نقول شنو للناس الدايرة تصطاد في الماء العكرة أمثالك.


ردود على مرتضي الطاهر
United States [ود النوبة] 07-09-2012 07:01 PM
يا مرتضي ود الطاهر
عرفنا الموظف لكن مين المؤسسة يا ود الطاهر عشان يكون شرعي وحلال ومين قال ليك مافي خلاف

United States [انا السودان] 07-09-2012 06:47 PM
المشكلة يا سيدي العزيز انو المؤسسة الحكومية او شبه الحكومية من اموال الشعب ليست شركة خاصة من حر مال ابوهم عشان ادفعوا عنه ، وضريبة الدخل الشخصي من المسمي الوااااااااااااااضح انك لازم تدفع ضريبة عن دخلك العام ، فمنطقيا ما انفع يدفعها الشعب ، كأنك بتجبر ناس اصوموا رمضان بدلك عشان انت ما بتقدر تخلي اللهط


(ولا تزر وازرة وزر اخري )

United States [عبد ألله] 07-09-2012 06:45 PM
طيب رأيك شنو في عقد مدير الأوقاف الذي يعفيه من الزكاة؟ هل هذا من الدين؟ وهل خيل لك عقلك ان كل العقود يقبلها الدين أو تجيزها القوانين التي تحفظ المساواة بين الناس في الحقوق والواجبات؟ ثم أين هي الوطنية عندما يرفض انسان دفع الضريبة ويتهرب منها بالتواطؤ مع أشخاص يديرون مؤسسات حكومية؟ لماذا لا يعفى من الضريبة الفقراء والمزارعين المعسرين؟
أنت الذي تصطاد في الماء العكر يا عديم الوطنية

United States [الفساد فى الارض] 07-09-2012 06:22 PM
بمثل هذا المنطق ال(الحيله)غرقت بلادنا فى الفساد دون أن تهتز شعره للمفسدين..أنه عطاء من لا يملك لمن لا يستحق..هل من حق الدولة أن تعطى أناسها عطاء من لا يخش الفقر وآخرين الفتات الذى لا يسد رمق طفل يحبو؟؟وهل العقود الظالمه هذه تحل الظلم كيفما يريد الحاكم

United States [Mustafa] 07-09-2012 05:56 PM
دة عقد باطل .. بالعربي دة مخالف لقوانين الخدمة المدنية .. يعني لما تقول تعاقدت انا وانت على توزيع الخمرة هل يجوز ان نقول ان العقد شريعة المتعاقدين حتى لو احتجيت انا انو الدولة صادرت الخمرة تقول لي تجيبو ما دخلي؟
بعدين في موية نضيفة عشان تصطاد فيها في زمن الوسخ الانقاذي؟

وذي ما قال الحسكنيت: المظاهرات دي قايمة عشان شنو؟


#421931 [ود الصافي]
5.00/5 (1 صوت)

07-09-2012 04:19 PM
الاخ الطاهر ساتي بعد التحية : انا اختلف معك هذه المرة لان التخصصات النادرة كتخصصات الفيزياء النووية والفلك المتخصص ووالطب النووي وجراحة الاعصاب الدقيقة وادارة شركات السكر تخصصات نادرة وبالتالي يتطلب الأمر لاستبقاء الكوادر المميزة في هذه المجالات أن ندفع لها دم القلب لطالما الناس والشعب في أمس الحاجة لها ، لذلك من المنطقي أن ندفع لهم مرتبات عالية وكمان مافيها حاجة لو دفعنا ليهم ضرائبهم ، وانا في تقديري هذا العقد مجحف في حق هؤلاء المدراء لانه لم يتضمن الزكاة ومصاريف المدارس ومخصصات السياحة ، هوووووون يا عزيز هون على نفسك


#421927 [Abu Hadi]
5.00/5 (1 صوت)

07-09-2012 04:15 PM
اعتقد العيب يا استاذ الطاهر ليس في المدير وانما في الطرف الثاني الذي يوقع مع المدير !! فالمدير ليس له ذنب بتوجيه الاسئلة له .. لانه يعرض خدماته ان وافقت المفوض بالتوقيع قبلها والا رفضها!! عليك ان توجه اللوم الى المسئول الذي وافق على تعيين المدير .. هو طلب ان تدفع الضرائب نيابة عنه والكهرباء والماء وعربة وسواق وحوافز (هذه شروطه التي فرضها على مسئولينا) وسعادة المسئول وافق على كدة .. فما ذنب المدير ؟؟؟ يعني دائماً ما تترك المسئول الكبير سواء وزير او عضو امانة الحزب الحاكم وتمسك في الحيطة القصيرة (رغم تبعيتها)
هؤلاء يوافقون على كل شروط من يتم تعيينهم لانهم (ما ضاربهم فيها حجر دغش).. لماذا لا يحاكم الوزير او اعضاء مجالس الادارات التي من صلاحياتها تعيين المدراء او غيرهم.. وتصب جام غضبك على المدير (المسكين والفقير دة)

اكرر السؤال للمسئولين في الحزب الحاكم الذين تعرفهم جيداً يا استاذ


#421926 [hassan]
5.00/5 (2 صوت)

07-09-2012 04:14 PM
عليك الله يا الطاهر كدى انشر لينا عقد مدير السكة حديد عشان تشوف العجب وبالمناسبة ياخذ فى الماموريات الخارجيه 400 يورو مش زى زولك بالدولار والمحيرنى بيسافر دبى فى ماموريات عمل وعلاقة السكة حديد بدبى زى علاقتى باللغة الصينيه


#421925 [شمسهم]
5.00/5 (1 صوت)

07-09-2012 04:13 PM
اةةةةةةةةةة لو اةةةةةةةة تفيد مجروح لك اللة ياوطني فقد وطئتك حوافر مغول العصر الحديث قاتل اللة البشير وكل من شايع البشير


#421923 [حسين]
0.00/5 (0 صوت)

07-09-2012 04:12 PM
يجب أن يكون هنالك سلم للرواتب والمخصصات - تدرج وظيفى - من غير عقود خاصة أو تميز - وتحت ادارة ديوان شئون الخدمة والموظفين ( ان كانت هذه الدواوين موجودة لسع )وان يطبق هذا على كل الوظائف الحكومية العامة وشبه العامة - يعنى من العامل لرئيس الدولة - ولنبدأ بمعالجة الاخطاء من الآن .


#421908 [man2]
5.00/5 (3 صوت)

07-09-2012 03:52 PM
افففففففففففففففففففففففففففففففففففففففففففففففففففففففففففففففففف

من عفنك يا البشييييييييييييييييييييييييير

ولسه داير تعمل دستور اسلامى يافاسد

نستاهل نحن الشعب من يرضى بمثل هذا الصعلوق اسفيه رئيسا

ياجماهير السودان لن تذوقو العزة مالم تخلعو البشير وتشنقوه

حتى يتردد الف مرة اى عسكرى بليد جبان ان ينقلب على الدميقراطية الوليدة

اخلعوا البشير وحاسبوه على كل ماعمل وارعو الديمقراطية الناشئة كم ترعو اطفالكم الصغار

فهى الخيار ولاخيار غيرها


#421906 [زول اغبش]
5.00/5 (1 صوت)

07-09-2012 03:48 PM
ياسيدي نحنا بندفع عنهم لأننا( شذاذ آفاق) ومستحملين ناس زي ديل...دا حالتو لسة ماطبقوا الشريعة ..طيب لما يطبقوها حيسوا فينا شنو؟؟؟؟ احتمال يرجع عهد الرقيق وكدة...وكان واحد فيها ارتكب جريرة يقوم طوالي يعتق رقبة واحد فينا...الله يكسر رقابهم الظالمين ديل..قول آمين.
كسرة ياود جبرة:
الدفاع بالنظر حصل وين؟؟؟؟؟؟


الطاهر ساتى
الطاهر ساتى

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة