المقالات
السياسة
ارشيف مقالات سياسية
مثل إنقاذي : عملنا كباري وسدود وشوارع زلط "!!"
مثل إنقاذي : عملنا كباري وسدود وشوارع زلط "!!"
07-09-2012 10:12 PM

ربع عامود

حاتم الجميعابي

مثل إنقاذي : عملنا كباري وسدود وشوارع زلط "!!"

حكمة الأحد : الشعارات الرنانة .. حينما تخرج من أفواه الكاذبين تصبح نفايات قذرة .
(1)
سألت ذات مرة نفسي في ظل رفع الدعم عن المحروقات .. لماذا لم يتم رفع الدعم عن " البنقو" فهو أيضاً من المحروقات . فلم أجد إجابة كافية وشافية ..
نسبة التعاطي أصبحت كبيرة جداً ومرات ومرات . دقينا ناقوس الخطر والحال في حالوا طالما إعتبر السيد وزير الداخلية أن "البنقو" ليس من المخدرات بالتالي فإن الرسالة واضح .. أشربوا ساي يا شباب نحنا عايزنكم ما واعين لانو لو وعيتو حتقلبوا الحكومة ..
(2)
تعيين «6» وزراء و«11» وزير دولة واحتفاظ «20» وزيراً بمواقعهم !!
عاد الرشاقة ما عندكم يا ناس الإنقاذ .. مشى فلان وجاء علان .. غايتو البلد دي أصلوا ما تتصلح .... انا لم أفهم ماهو سر الإتحفاظ بمنصب وزير الدولة .. يمكن عشان كلمة الدولة بس في إطار بسط هيبتها .. ولا كيف يا أخوانا ..
(3)
كنت أمني نفسي بأن يتم تعين المتعافي وزيراً للمالية، لأرى إبداعات هذا الرجل في هذا المنصب، فقراره الأول " تحوير الجنيه وراثياً" زي قصة القطن القادينا بيها دي .. لكي يوازي سعره الدولار وما أظن دي بتغلبوااا ..
غايتو في ناس في الحكومة دي تكتيك ما بعرفهوا ..
(4)
تواجه مدينة الدامر حاضرة ولاية نهر النيل ،أزمة خبز حادة في جميع احيائها منذ ثلاثة ايام وعادت الصفوف امام المخابز بحثا عن الخبز.
صفوف العيش بدأت من الدامر وجاية على الخرطوم ...
(5)
الجاز : هناك من يريد للشعب السودانى الخروج للشارع واعمال التخريب والتكسير!!
يا أخوانا حيرتونا معاكم ... اركزوا على رأي محدد، عشان نفهم معاكم ... هي المظاهرات دي محدودة والقائمين بيها شذاذ افاق ولا شماسة والشعب كلوا طالع.. وبعدين خلونا من الأسطوانة المشروحة دي .. تخريب وكسير ..
اها ... اسي في مظاهرات واسعة وشملت كل المدن ولا لا ..
(6)
شمباااااااااااااات ... تتحدى الملل ...وتخرج للشارع وبرفقتها طلاب جامعتي الخرطوم والسودان ..غايتو قال ليك ناس الشرطة اتعصروا عصرة لما بقوا يستخدموا الحجار .. ضد الطلبة وجماهير المدنية .. وبرضو يقول ليك شماسة ...
(7)
وزير الصناعة: 2014 عام الاكتفاء من السكر ؟؟
عليك الله يا سعادة الوزير الكلام ده شبعنا منو .. بإعتبار أنو في 4 مصانع شغالة ما إكتفينا من السكر الإكتفاء ده حيجبوا لينا مصنع النيل الأبيض مثلاً ...
23 سنة ما كنتوا صادقين معانا دايرنا نصدقك لغاية 2014م ... أسي ده حنك ليك مع الناس .. واطتنا للوكت داك بتكون أصبحت ..
(8)
الحكومة شغالة بالمثل البقول " دار أبوك كان خرب شيل ليك عود " ...
ألحسوا كوعكم !!
موقف بايخ جداً :
ندرة في الدقيق ... وغالبا ما يحصل زيادة في أسعارالخبز .. يعني بعد ده إلا تطلعوا الشارع ..
موقف بائخ .. اكتر من الفات:
البشير : طلعتا الشارع وما لقيت أي مظاهرات .. ديل شماسة ساي ..
عيونك هي الخانتك شافت بعيد عنك ..
تعال .. في شمبات – الديم – ودنوباوي عشان تشوف كويس !!
ملحوظة : هذه المدن على سبيل المثال!!!


تعليقات 5 | إهداء 0 | زيارات 1642

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#422245 [الواسوق]
5.00/5 (1 صوت)

07-10-2012 12:15 AM
والله يالجميعابي بالغت في نمرة واحد اما قصة الطرق والجسور دي واي مشروع شافته عينك في البلد فما هو الا "سبوبة" كبيييييرة لللبع والكبع وكلو ضرب ميزانيات ومناقصات صورية وتلاعب بالمواصفات... حسي دي شوارع ولا كرفتات الشارع شريحة الموبايل اعرض منه... الشارع السفري لا نور لا لوحات لا خطوط تحزيرية لا حواجز خرسانية ولا التكتح زاتو من شدة ما رهيف كان اتسابقو فيهو اتنين كارو بيتفرتك... دي سرقة وحرمنة ما اكتر وكله على قفا الشعب السوداني والدين الخارجي ما يديك الدرب وانت تدفع وانا ادفع... الناس ديل لما يتطردوا من البلد خليهم يلفو ظلطهم الرهيف دا زي البرش ويتخارجو بيه عشان بالمرة يدفعوا حقه من حسابات ماليزيا واحنا بنعرف سمح نبني البلد بالصح


#422215 [اااخ يا بلد]
5.00/5 (1 صوت)

07-09-2012 11:27 PM
ويقول ليك (الرد الرد كبارى وسد) كله طلع(دينْ فى دين)8


#422173 [خالد]
5.00/5 (1 صوت)

07-09-2012 10:36 PM
انه ديدن الحكومات الديكتاتورية والانظمة الفاسدة ..زمان نميري فلق الناس بحكاية سلة غذاء العالم لغاية ما جات مجاعة 83 واتفضحنا فضيحة اللحمة في السوق وظهرت الحقيقة اننا قرعة شحدة العالم
ديل بقي اسوأ من السوء قعدوا 23سنة واهم انجاز ليهم هو تدمير اخلاق الناس قال سد مروي قال وكوبري كاب الجداد وشارع زلط امبرمبيطة قوموا لفوا كده


#422171 [كوجاك]
5.00/5 (1 صوت)

07-09-2012 10:32 PM
بس عليك الله وبصراحة لو قالوا تعال ابقى وزير كنت حترفض؟؟


#422168 [إبن السودان البار ==--]
5.00/5 (2 صوت)

07-09-2012 10:28 PM
مثل إنقاذي : عملنا كباري وسدود وشوارع زلط "!!"

مش المفروض قروش البترول دي نعمل بها التنمية في السودان؟؟ دا ما حصل!!!
عارفين الحصل شنو؟؟؟شوفوا..

1-سد مروي قرض مشترك من عدة دول
2-مطار مروي تابع لقرض سد مروي
3-خطوط نقل الكهرباء من سد مروي تابع لقرض سد مروي
4-مشروع امري الزراعي تابع لقرض سد مروي
5-طريق مروي الملتقى قرض تابع لقرض سد مروي
6-مشروع مياه القضارف قرض البنك الاسلامي للتنمية+قرض صيني
7-مشروع تعلية خزان الرصيرص قرض مشترك من عدة ممولين
8-مشروع سكر النيل الابيض قرض مشترك من عدة ممولين
9-مشروع مجمع سدي اعالي عطبرة و استيت قرض مشترك من عدة ممولين
10-كوبري الصداقة "كريمة" منحة صينية
11-طريق عطبرة بورتسودان هيا قرض "الصندوق العربي للإنماء الاقتصادي"
12-مشروع مطار الخرطوم الجديد قرض مشترك من عدة ممولين
13-طريق القضارف دوكة القلابات قرض "الصندوق العربي للإنماء الاقتصادي"
14-مشروع كهرباء الخط الدائري(الخرطوم) قرض هندي
15-خط الكهرباء الناقل سنجة القضارف قرض هندي
16-مشروع كهرباء كوستي قرض هندي
17- خط الكهرباء الناقل القضارف القلابات قرض هندي
18-مياه عطبرة والدامر قرض ايراني
19-مشروع سندس الزراعي قرض صيني
20-كهرباء الجيلي قرض صيني
21-كهرباء الجيلي شندي عطبرة قرض صيني
22- محطة كهرباء قري 2 قرض صيني
23-مياه نيالا قرض صيني
24-مياه الدالي والمزموم قرض صيني
25-مشروع صومعة ربك قرض صيني
26-كوبري رفاعة قرض صيني
27-كوبري الدويم قرض صيني
28-توسعة كهرباء الخرطوم بحري الحرارية قرض صيني
29-مياه الفاشر قرض صيني
30-مياه بورتسودان قرض صيني
31-مياه دنقلا قرض صيني
32-مياه المتمة قرض صيني
33-مياه مدني قرض صيني
34-مياه كوستي قرض صيني
35-كهرباء دنقلا قرض صيني
36-كهرباء وادي حلفا قرض صيني
37-مشروع كهرباء الفولة قرض صيني
38-مشروع طريق النهود ام كدادة قرض صيني
39- مشروع طريق زالنجي الجنينة قرض صيني
40-طريق الدبيبات ابو زبد الفاولة قرض صيني
41-مشروع كوبري سنار قرض صيني
42-مشروع كوبري توتي بحري قرض ايراني
43-مشروع محطة مياه ابو سعد قرض ايراني
44-طريق طوكر قرورة قرض"الصندوق العربي للانماء الاقتصادي"
45-طريق سمسم القضارف ام الخير قرض"الصندوق العربي للانماء الاقتصادي"
46-طريق كسلا كركون مامان قرض"الصندوق العربي للانماء الاقتصادي"
47- مشروع كهرباء الشرق قرض"الصندوق الكويتي"
48-عدد 4 محطات تحلية مياه "ولاية البحر الاحمر" قرض"الصندوق العربي للانماء الاقتصادي"
49-جسر سيدون على نهر عطبرة قرض"الصندوق العربي للانماء الاقتصادي"

.
.
.
وغيرها الكثير الكثير من المشاريع المعمولة بالدين!!!بالديييييييين !!!!

الكلام دا انا ماجبتو من راسي امشو ارجعوا لموقع وزارة التعاون الدولي وموقع وحدة تنفيذ السدود"سد مروي" معظم الارقام السابقة من الموقعين ديل وباقي الارقام من المواقع الاخبارية المختلفة
سدود وشوارع زلط "!!" بالدين وعلي حسابنا ؟؟؟ مع الشكر والتقدير والتحية للذي جمع هذه المعلومات القييمة ...


ردود على إبن السودان البار ==--
United States [غلطة سراي] 07-10-2012 08:54 AM
الحاجات الكويسة من كباري وشوارع وبترول عملها عمر البشير والحاجات الكعبة زي الفساد والازمة الاقتصادية وفقدان البترول عملها الله في شكل ابتلاءات، الحكومة تعمل ليكم شنو؟؟

United States [الواسوق] 07-10-2012 12:19 AM
ياخي الله يبارك فيك على المعلومات دي. المصيبة بعد بيمنوا على الناس وهو الشي بقروشهم اصلا!!!!!!!!! قوة عين غريبة


حاتم الجميعابي
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة