المقالات
السياسة
ارشيف مقالات سياسية
نصيحة بالسمن البلدي لسعادة المشير
نصيحة بالسمن البلدي لسعادة المشير
07-12-2012 11:18 AM


نصيحة بالسمن البلدي لسعادة المشير

سيد محمود الحاج
[email protected]

سعادة المشير البشير
رغما عن انوفنا وانوف الخلفونا انت القائد وانت الرئيس.. يرضي من يرضي ويشرب من البحر الماعاجبو كدا... جيتنا رافع في وشوشنا البنادق وقعدت حارساك البنادق.. لا دسيت ولا غشيت قلتها عديل : "جينا بالبندقية والما دايرنا اليشيل بندقيته "!! ..
يا سعادتك نحنا لا بنشيل بنادق ولا عندنا بنادق ولا فضّل فينا حيل لي شيل بنادق..قدر الفينا تب انهدت والبركة فيكم.. والحمد لي الله الفضل فينا شتا ً قعدنابو لي هسع.. جنس سواتكم دي عليك الله يا المشير اخوي ما بتهد الجبال !!؟؟
الليلة ليكم 23 سنة وكم يوم والسويتوه في البلد يشهد الله ماسوّن الفئران متله في البروش..لخيتو الحكاية لامن بقت خبوب لا بنشال ولا بندار.
اها ياسيدنا الرئيس نحن وحاتك غير لسانّا دا مابقي فينا شتن حي..شرّطتوا الورق وجدعتوا الأقلام وكسرتو الرقاب..ياهو اللسان الفضّل فينا ان قدرتوا تقطعوه ايدكم والبركة بس لكن خت في بالك إنو اللسان البنقطع بيقوم في محلو ألف لسان..اها تقعدوا تقطّعو لسنات البلد كلها؟!!
سعادة المشير..أكان لي الكتل شبعتوا كتل تحمدوا سيدكم وكان للتعذيب عذبتوا لامن إيدكم لانت وكان للسجن البلد كلها بقت سجن محل ما نقبّل سجن وكان للتشريد والله ماخليتو الا العضير والا المكسّر.. في اكتر من انو الناس تلجأ لآسرائيل؟!!.. تحمدوا الله في دي ماقصرتوا تب.. تكوركوا من ماجيتو وتلعلعوا وترقصوا براكم مااديتوا فرصة لي زول غيركم يقول الداير يقولو..دحين ياالبشير اخوي اسمعنا في دي بس و عليك الرسول لا تقفل اضنيك ولاتقفل مننا الميكرفون وكلها كلمات بالحساب .
" غربلتوا جيش الوطن غربلة بت كلب.. الما عرفتوا منو حاجة رفيتوه والخفتوا منو قضيتوه وما خليتوا الا ناسكم.. الواحد تقابلو ملازم الحول دا والحول البعدو تلقاه عميد والا لواء.. شفع اول امس والله.. واللواءات والعمد الجد جد شوف عيني سائقين امجاد وواحدين في زريبة العيش..دا كلام شنو ياالبشير اخوي؟..دا ماخطر علي الوطن .. والا القعاد علي السلطة اهم من الوطن؟!!..اها تراك شفت بي عينيك شفع صغار درافين دخلوا ام درمان نص النهار وكتلوا منكم المئات في قلب المدينة.. اها مابالك لو جاتنا كتيبة صغيرة من جيش نظامي..دا معناه انو البلد بي صمّتو ممكن يسقط في ساعتين !!وانا مستغرب القرود الكشفت ليكم الألغام في الجنوب مالها قصّرت هنا وما وقفت معاكم ولا جاكم هُدهُد طائر يقول ليكم خليل وجنوده جائين عليكم !؟ الحكاية شنو.. الله خلاكم والا خليتوه انتو!؟

قبلتوا علي الخدمة المدنية لحقتوها امات طه..ضيقتوها علي الخلق كلها لا قلتوا ديل اهلنا لا قلتوا عندهم اطفال لا راعيتوا لظروفهم.. شلتوا الكفاءات والخبرات بي جرة قلم وقلتوا الصالح العام.. كدي ورينا الصالح دا وينو.. الدكاترة الكبار.. المهندسين.. الخبراء .. الفنيين.. كبار الموظفين..المدرسين العمال اصحاب الخبرة.. كلهم مرقوا بي جلودهم فاتوا البلد وجبتوا ناسكم يمسكوا محلهم وبقيتوهم كبار قبّال يومهم والنتيجة ندفع التمن نحن المغلوبين علي امرنا..آلآف ماتوا نتيجة الأخطاء الطبية وزول قال يجيركم الله مافي ..مستوي التعليم بقي في الواطة لان التعليم السمح بقي بي القروش والماعندو قروش ياكل الكروش..المصالح والإدارات كلها مابتلقي فيها زول فاهم شغلو شنو والا يقدر يفهمك حاجة..والله الوزير ذاته ما عارف شغل غير اللهف والخمج.. تمش للمدير تلقي الدقن اكبر من وشو لايحل لا يربط ..مختوت هواب .. مافي شي فلحتوا فيه غير ادفع..ادفع والله الدفعنا في زمنكم دا كان يعيشنا لي جنا الجنا.. عليك الله ما ياحليل زمن عبود !!

جبتوا الناس الغلط ختيتوهم في مواقع ماها حقتهم ولا بيقدروا عليها نكاية في الناس التانين الما لابسين توبكم... تجيبوا الزول الخسران تختوه في مشروع اصلا خسران..اها بتدوروه ينجح كيف !...تجيبوا الحرامي وتقولوا عليه )الشريف ( والمو نافع تقولوا عليه نافع والوسخان تقولوا دا النضيف والمرضان تقولوا عليه متعافي ..نعم انتوا ماخسرانين شيء لاكين عاينوا للوطن وللمواطن ولو مرة واحدة في السنة ..كفاهم خسائر!!
أكلتوا البلد أكلة أرضة ..يا كافي البلاء لا خليتوا جلد لا عضم ..على عينك يا تاجر...أبراج وعمارات ومزارع ومصانع وشركات..كدا ورينا لامن جيتوا كان عندكم شنو وهسع عندكم شنو...؟ والله ماخاتين كان قعدتوا ترقصوا وتبشروا!!

أها يا البشير أخوي الحكاية دي الوقت دخلت في اللحم الحيّ..الناس ضاقت وجاعت والجوع كافر... الصبر خلاص وصل حده والناس الليلة دافرة دايرة حقها في بيت أبوها الإتشلّع والحساب ولد.. باقي درّابك البتجدّع فيه دا لمه عليك لانه ماهو ماشي ينفعكم...جنس كلامك دا بقى دقة قديمة..مؤامرات..أجانب..صيف يشوي..شذاذ آفاق..لحسة كوع...وحات ابوك لا في مؤامرات ولا في زول ماش يلحس كوعه والصيف البشوي البتقول عليه دا..دا نفس الشعب الغاضب وكان في شية ياها المحمّداكم وكان في شذاذ آفاق ما معقول تكون الملايين شذاذ آفاق والمية هم أهل البلد ..دا يا البشير كلام زولاً حائر بيه الدليل..ورقيصك البتسوي فيه في ظروف زي دي ما أكتر من فرفرة مذبوح..دحين أركز للبطان وواجه الواقع بشجاعة. والله خربتولكم جلد كان يبقى سقو..الجنوب ومرق بي جلده والباقي يكوس في طريق المخارجة والبلد كلها فوق حافة الهاوية وانتوا برضو في مكابراتكم ومعاندتكم...بإختصار شديد شوف ليكم طريق مخارجة قبّال الشمس تطلع فوق رممكم.

دي نصيحة لي الله يا البشير أخوي


تعليقات 7 | إهداء 0 | زيارات 1613

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#425837 [أبو الغيث]
0.00/5 (0 صوت)

07-13-2012 08:45 AM
والله يا اخوى سيد كملت النضم تب ما خليت شيتا نقولوا ولا خليت لي الجماعة جنبا ينوموا عليها الله ينصر دينك
ملحوظة:
دحين الظلم بجيبلو نضما زي دا؟؟؟؟؟؟؟؟؟؟؟؟؟؟؟؟؟؟؟


#425324 [بدر]
0.00/5 (0 صوت)

07-12-2012 06:07 PM
الاكرم سيد . انت زول راقى لكن لو سألونى انا ( بالناشف عدييييل ) !!!!!!!!!!!!!!!!!!!!!!!!!


#425157 [امدرماني-الركابية]
0.00/5 (0 صوت)

07-12-2012 02:28 PM
يا اخ سيد اخوك البشير ده يتخارج كيف؟؟؟ احنا بالذات المفصولين للصالح العام ماذا كان ذنبنا لكي نتجهجه في في بلاد الغربة تاركين ورانا اولادنا وديارنا احبابنا واصدقاؤنا لكي نبحث عن لقمة العيش في بلاد المهجر . فاخوك الاهبل الحرامي مصيره ما حدث لشاوسيسكو والقذافي.......لااود ان اسرد جرائمه لان الكل يعلم ومازال في غيه وعنتريته وقتله لشعبه بل واسائته لكل حر مناضل من اجل الحرية والكرامة .............قال يتخارج ........مافي مخارجة بل محاكمة سريعة واعدام في وسط البلد ويكون عبرة لكل حمار منافق باسم الدين


#425065 [اللاحس كوعه فرع الصعيد]
0.00/5 (0 صوت)

07-12-2012 01:08 PM
الاساتذة المحامين أنا شخصياً عندي قضية عايز أرفها ضد رئاسة الجمهورية وهي كالتالي :
انا بإختصار غير موافق وضد إكرامية الرئيس للمنتخب المصري كيفن يعطيهم سيارات
أولاً فلوس السيارات دي مش من مال البترول والبترول ده أنا مالي فيه حق واولادي مليهم حق طيب
أنا عايز حقي وحق عيالي حتى لو عجل حديد أومسمار
وإذا كان البشير حق السيارات من ماله الخاص يوضح ده في المحكمة


#424992 [Kambalawi]
0.00/5 (0 صوت)

07-12-2012 12:25 PM
ده يستاهل نصيحة غير بلدي بالرشوشة. عشان يعرف وصلنا وين في ال 24 سنة دي


ردود على Kambalawi
United States [وداحمرعين] 07-12-2012 01:06 PM
المكتولة ما بتسمع الصائح يا كمبلاوي لكن برضو بنعمل العلينا

يديك العافية وشكراً على المرور الطيب.


#424929 [اسماعيل صلاح]
5.00/5 (1 صوت)

07-12-2012 11:33 AM
التحية لك اخ سيد ، كلام دارجى بسيط فى كلماته كبير جدا فى معانيه بليغ فى ايصال المضمون وتأكد انهم زائلون اقرب مما تظنون


ردود على اسماعيل صلاح
United States [وداحمرعين] 07-12-2012 01:12 PM
أشكر مرورك الطيب واطراءك الأطيب أخي إسماعيل

تسلم مع العافية


#424922 [MUSTAF]
0.00/5 (0 صوت)

07-12-2012 11:30 AM
والله ما قصرت يا سيد محمود الحاج العليك سويتو ......... ونسال الله الهداية للجماعة ديل.


سيد محمود الحاج
مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة