المقالات
الشعر
أسماء الجنيد
المنافقون في الأرض .. ربيع عبد العاطي !!!
المنافقون في الأرض .. ربيع عبد العاطي !!!
07-12-2012 03:56 PM

المنافقون في الأرض

أسماء الجنيد
[email protected]

سلام وتحية لكم جميعا قرآء الراكوبة الأكارم


الكذاب الأشر ربيع عبد العاطي نموذج حي لنفاق الطغمة الحاكمة.
إتماديتوا ومسختوها بالجد يا بنو جكة وطلعتوا للناس في ضهورهم ودلدلتوا كرعيكم!
كل واحد يجى يفك قنابلو زى كانوا بتكلم مع الحيط مش مع ناس عندهم عقل بميزوا وبفهموا!!!
ربيع عبد العاطي وإستهتاره امس في قناة الجزيرة دق اول مسمار في نعش حكومته لو هو بفهم!
منتهى الإستهتار والإستخفاف بعقول الناس عبر فضائية الجزيرة،وبرا خجلةهائج ومزبد زيو زي اي تور قايدنو للضبح ! فقدت المنطق تماما يا سي ربيع.
إفلاسك كان بائن في تعابير وشك وزوغانك من المواجهة ضد خصمك الرجل الرصين دكتور القراي الكان بناقشك بإسلوب أكتر من هاديء وبي حقائق مثبتة وواضحة وصادقة !
العجبني في كلام دكتور القراي ،الأدلة الجابها كلها معترفين بيها هم غصبا عنهم ، عبارات دارت فيما بينهم على الملأ ، واثبت كذب شيخهم الضلالي العلمهم السحر ، وكذب البشير من نقطة البداية !
اي دكتوراة ياربيع إنت ملصقها في سيرتك الذاتية ؟ ومن اي جامعة ؟
شهادتك السمعناها وشاهدناها امس تدل على جهلك ونفاقك وعدم إحترامك لشعب صبر عليكم 23 خريف! معقول ياراجل متوسط دخل الفرد 1800 ؟؟؟؟؟ يا زول إنت الكلام دا مقتنع بيه !!! معقول السودان ما عنده ديون ؟؟؟ يا عالم نحن محتاجين تاني 23 سنة ضوئية عشان البلد تقيف على حيلها من المديونية السقطت إقتصاد البلد والله يعلم يرجع الوضع لربع الحالة القديمة !!!ياخى اخجلوا شوية ! خلوا قليل من إحترام الذات.
عجبني في البرنامج امس المقدمة الكانت قوية جدا من د.القاسمي مقدم البرنامج, مقدمته زي الرصاص والقنابل ، إسلوب صاروخي خلى ربيع يفرفر ويرجف في كرسيه قبال يسألوه ! بقى يفكر في سلاح يخارجوا من الزنقة زنقة الجاياهو قبال ما ينفضح, لكن برضو انفضح وسقطت كل اوراق التوت الكانت تضاري عوراتكم, سقطت امام الملأ وحالك امس يرثى لها يا مرسال الكيزان.
تبريرك لإعتقال الأستاذ كمال عمر قبل يومين من سفره للدوحة لنفس البرنامج ،كان إدعاء سمج!وترددك وتلعثمك في الكلام كان مخجل ومدعاة للشفقه عليك!!
نكرانك للمظاهرات زي اسيادك ضحكت مقدم البرنامج قبل خصمك القراي, الكان هاديء وثابت وعارف بقول في شنو، رغم هدوء القراي وردوده بي إثباتات وادلة واضحة وصريحة للملأ، إلا أنها جلجلتك وزلزلتك .وشمتت فيك خلق الله عقبال ناسك المعاك ، كان ما قبلوا عليك وتموا الناقصة فيك, لأنك شعللت النيران لو بتفهم ! وألبت عليك الشعب الجيعان واتهمتوا زورا وبهتانا إنه عايش في بحبوحة ! وشد حيلك مع بحبوحة الشعب البفتش على السخينة .!!

النجيضة في حوار امس . ربيع حاول إستدرار عطف الشعب بخبث بائن حينما كان يزوغ زي ود الموية من مواجهة الأسئلة ويلخبت في الكلام ويحاول يخرج الحوار عن مساره الاساسى ويقش ضعفه في الفكر الجمهوري !!! النقاش كان عن الوضع الراهن في البلد وتفكيكم للكلام الفارغ ونكرانكم لحال البلد المائل .فلستوب ,,, الجاب الفكر الجمهوري ولا الشيوعي ولا غيره شنو ؟
دكتور القراي رص ليك الكلام رص بدون تردد ولا لعثمة وبإسلوب سوداني قح ، وصل رسالته لكل المستويات من شعبه الجسور ( بصريح العبارة حتى اماتنا وحبوباتنا الكبار فهموا فحوى خطابه السهل الممتنع ) نشف ريق ربيع نشاف وخلى ليك يلف زي السورو ولحسو كوعو بي مزاج.

فيصل القاسمي قرررررب يقوم يلفخ ربيع من نقطة البداية لما نكر المظاهرات!
اجمل كلام قالوا القراي لما أكد لفيصل القاسمي إنه شعب السودان مختلف عن كل الشعوب لا بهابوا لا بخافوا القمع , وإنه كمال عمر المعتقل الآن لو طلع برضو بقول الفي قلبه وهو زاتو ( أي القراي ) إنه لورجع السودان حا يعتقل ، لكن برضو ما بغير كلامه ولا بخاف.

شماتتنا فيك لا توصف بعدما نكروك ناسك وياها المحرية فيهم وما غريبة عليهم والدليل هذا الخبر التحفة.
تداولت الأوساط الصحفية خبرا مفادهالآتي :
قال الناطق الرسمي باسم المؤتمر الوطني بروفيسور بدر الدين أحمد أن ربيع عبدالعاطي لايمثل الحزب!!!!
واشماتت خلق الله فيك يا النكروك الرسلوك !!! انا لو منك اقع في رقبتي اقصها كع.
يا ربي اجعل كيدهم في نحرهم اللهم آمين ...
يمهل ولا يهمل...

متاوقة
ــــــــ
ياربى ناس قطر قطعوا حبل الود ولا شنو ؟؟؟ غريييبة !!!


تعليقات 21 | إهداء 2 | زيارات 4573

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#426904 [ابو وعد]
2.00/5 (1 صوت)

07-14-2012 12:27 PM
بما ان المدعو ربيع عبد العاطي ذكر بان دخل المواطن 1800$ . يجب رفع دعوة لمنظمة العمل الدولية بجنيف مع ارفاق المستندات من حديثه للجزيره و اقراره بدخل الفرد + كشوفات الرواتب التي يقبضها المسكين محمد احمد شهريا و نطالب بدفع فرق الراتب بما ذكره المدعو ، و صدقوني ناس الدولية ما يصدقوا يلقوا ليهم دعوة ضد حكومة السودان ، ارجو ما نضيع الفرصة دي.


#426611 [most7]
4.00/5 (1 صوت)

07-14-2012 04:45 AM
والله انا بقيت ما بفرز بين ربيع عبد العاطى و ربيع طه كلهم بضحكونا


#426471 [مريود]
1.00/5 (1 صوت)

07-13-2012 10:38 PM
ما قادرين نقرا العامية بصورة مركزة وسريعة.

العامية تطريز ومصطلحات تكون حلوة ورائعة .

أما لحمة وسداة . مزعجة حسب رأيي .

أبكيتيني يا بنت الجنيد في الموضوعات الاجتماعية.

وأبكيتيني في السياسة . ولكن فرق أحمد من حاج أحمد.


#426378 [Salem]
3.00/5 (1 صوت)

07-13-2012 07:58 PM
حقو موضوع ربيع عبد العاطي ما يمر بسهولة وعلى جميع الصحفيين ان يتناولوا 1800 دولار دي كل واحد باسلوبوا
عشان ما يتكرر مرة ثانية بالله حسي 1800 دولار دي تتبلع كيف وحتى لو اتبلعت حتتهضم كيف
بالله رجاءً على كل الصحفيين ان يدلي بدلوه في الدولارات دي ويقول لينا راي فيها
مع التحية للاستاذة اسماء الجنيد


#426329 [الصلاحبي]
5.00/5 (1 صوت)

07-13-2012 06:48 PM
الله يفتح عليك
كلام في الصميم


#426053 [Adam]
1.00/5 (1 صوت)

07-13-2012 01:35 PM
واشماتت خلق الله فيك يا النكروك الرسلوك


#425777 [المراقب]
2.00/5 (1 صوت)

07-13-2012 03:00 AM
يا جماعة أنا أري إن الدكتور واحدمن كلاب الأنقاذ السعرانة لأنه بدافع عن مصالحها و مصالحه الفانية،ولكن في المقابلة الأخيرة غير التكتيك ليدافع عن مصالحه فقط ( وتولاة) !!! فالدكتور شاف أن المركب علي وشك الغرغ ،وكعادة المصحلنجيهفإنهم يشتمون الخطر باكرا وقبل الآخرين فأراد مغادرة المركب في الوقت المناسب وتوريط جماعته الذين سبق لهم أن همشوه وركنوهو ولا يستعينون به إلا عندما يريدون النباح مدفوع الأجر ولذلك أدلي بإفاداته المغلوطة وبياناته الكاذبه وإعطائه الفرصة لدكتور عمر ليقول كلما أراد قوله ولم يقاطعة كثيرا حسب ما رأيت أو يطلع له المسدس أويجر المناظرة الي شتائم ولكمات كما كانوا يشتهون ويخططون وهو بهذا يريد ضرب عصفورين بحجر واحد: 1/ الإنتقام من رفقاء الدرب الذين همشوهو وما سوهو وزير وجندوهوللنبيح فقط للدفاع عنهم2/جاض الموضوع حتي ينتبه الآخرون غلي أمل أن يشفع له ذلك عندما تحين ساعة الحساب من الشعب. والله أعلم.


#425735 [jo]
1.00/5 (1 صوت)

07-13-2012 01:28 AM
وخلى ليك يلف زي السورو

وانتي عرفتي السورو من وين يا بنيه..

الكلمه دي ضاعت من القاموس زمان مع جيل الاتاري دا...

مقال في الصميم ورأي ان هذا الشخص لا يستاهل ثانيه من التفكير خليك من الكتابه عنو ..
فهو من سواقط الذمان التي ابتلى بها هذا البلد الطيب اهله ....


#425687 [عدلان يوسف]
5.00/5 (1 صوت)

07-13-2012 12:18 AM
يا أسماء بت الجنيد ...

يا بت يانيل ...

بت كلامها زي الرصاص ... والحق الساطع بطلع من قلمها دخاخين دخاخين

وتكريما لها ولأمثالها اللائي وقفن في صف واحد أمام العسكر أمام مسجد

السيد عبد الرحمن ود نوباوي وصرخن في وجوهنا اركزوا ...

تكريما لها ولأمثالها .. ستكون جمعة الكنداكة ....


#425628 [fatmon]
2.00/5 (1 صوت)

07-12-2012 11:22 PM
إنتي عارفه حسبو الحكايه بجاي وبجاي لقوا إنه لابد مما ليس منه بد زي حكاية أمريكا مع حسني مبارك في البدايه كانت واقفه معاهو في الآخر فكتو عكس الهواء فناس قطر حيفكوهم عكس الهواء شويه شويه والحكايه زي ما شايفين بدأت
لانو بعدها في تعليق على خطاب العمبلوق عن أنه يريد ان يشوي المعارضين
سألته إنو البشير حنشوي طلبة جامعة الخرطوم

ولكن للأسف قد بدأ بالفعل القتل بالعربات في الشارع وعلى عينك يا تاجر
ولعت ولعت ثورة جتى النصر


#425568 [salah a taha]
1.00/5 (1 صوت)

07-12-2012 10:31 PM
أعطيتيهو لامن قال كفى وإنكفى هذا الشخص المسمى بعبد العاطى تم غسله سوف نغسل باقى السودان من الوسخ


#425499 [حسان]
3.50/5 (2 صوت)

07-12-2012 09:23 PM
في منتصف التسعينيات و الانقاذ في قمة بطشها بالشعب السوداني -- سالت واحد جارنا في حي الصحافة كوز متنفذ و متكبر - سالته لماذا تعاملون الشعب السوداني بهذه المعاملة القاسية -اقسي من معاملة اسرائيل للفلسطينين وهم تحت الاحتلال ؟ ( وكان مناسبة السؤال ضرب مظاهرات في الخرطوم بالرصاص الحي )وكان رده بالنص (و الله علي ماقوله شهيد ) - قال : ( الشعب السوداني شعب كرور ما يمشي الا بالجزمة -كانوا بيفرتقوا ليالينا السياسية بعد الانتفاضة و بيفلقونا بالحجار و سمونا سدنة مايو و تامروا علي شيخ الترابي و سقطو في دائرة الصحافة الانتخابية و انحنا حانعرف نربيكم كيف حا نخلي الواحد يمشي في الشارع و يخاف من ضلو ) انتهي كلام الكوز -- الان دارت الدائرة عليهم و العداد قلب -- و السوال البيفرض نفسه انحنا حانعمل فيهم شنو ؟


#425484 [عابد مختار المختار]
3.00/5 (1 صوت)

07-12-2012 09:07 PM
رد الى حلمى شيخ ادريس
يا استاذ انا اعرف الطرفين تماما فقد كنت عند اعدام محمود محمد طه طالبا بجامعة الخرطوم وكنا نستمع لدالى والقراى واسماء وغيرهم ونستمع للطرف الاخر فهؤلاء يمكن ان يتهموك باى جريمة وينفذون القانون بايديهم فما زلت اتذكر محاكم البركس ولكن الموضوع
لايمكن الحمائم ان تواجه الصقور فالحق يضيع ومن يتمسك بالمثالية لا ينتصر


ردود على عابد مختار المختار
United States [Zingar] 07-13-2012 01:44 AM
الأستاذ عابد

أراك تتحدث بأسم الشعب وتحدد له من يحب ومن يكره...الشيوعيين والجمهوريين أفراده من هذا الشعب الذى تحدثت بأسمه وكأنك خير الفاهمين.....يا أخى يجب أن تفهم شئ واحد الجمهوريين ليس حزب سياسى هل ابدا رأيت أى واحد منهم فى الجمعيه التأسيسيه أو المجلس الوطنى أو حتى نزلوا بأى مرشح منهم فى أى دائره إنتخابيه.

عبدالعاطى أللى بستشهد به فى تعرية القراى لا يفهم مثقال خردله عن تنظيم الأخوان المسلمين فما بالك أن تكون له معرفه عن الجمهورين غير إنه كان فى محاوله بائسه لأرضاء أسياده خوفا من قطع عيشه.

يا أستاذى أرجوا أن تكون قدر الجامعه أللى تخرجت فيها وذلك بأن يكون كلامك موزون ومقبول...الحق مكفول لك بأن تتدلى برأيك ولكن لا تقحم كل العب معك فى هذا الرأى وهذه هى الديموقراطيه إن كنا حقا ننشدها.


#425460 [الزول الكان سَمِحْ]
2.50/5 (3 صوت)

07-12-2012 08:44 PM
المنافقون فى الأرض..تم إضافة آخر لربيع الواطى..ويدعى مصطفى أبو العزائموهو لايقل وقاحة وصفاقة عنه..

لقد تمت إستضافت على الهواء فى قناة سكاى نيوز عربية قبل عدة دقائق.وعند سؤاله عن المظاهرات وتأثيرها أجاب : هذه التظاهرات لا تأثير لها حيث أنهم بضعة طلاب يثيرون الشغب


#425450 [زول مسافر]
2.00/5 (1 صوت)

07-12-2012 08:27 PM
كلامك منقة ياسموية


#425438 [wudoof]
5.00/5 (1 صوت)

07-12-2012 08:16 PM
اكثر ما اعجبني في حديث القراي هو اسلوب اللهجة السودانية السهل الممتنع بدون تكلف او (لوي خشم) واحسب واخواتها ...؟؟!! فقد كانت ابلغ اثرا وفهما الجميع بلا استثناء .
ناس الانقاذ تخلصو من كمال عمر بالضربة القاضية (الغبية ) ووقعو مع القراي واصبحو كالمستجير من الرمضاء بالنار ...؟؟!!
جزعو من كمال عمر لانه يعرف نقاط الضعف فيهم وكالمثل الدارفوري (أبنقدح بعرفِي محل بعضِي أخيه)
فلا تحزن اخي عمر فقد عرف القراي اين يعض ..!!


#425401 [الصليحابي]
4.00/5 (1 صوت)

07-12-2012 07:42 PM
شكرا لك ياأسماء ، كلام جميل وساهل ومفهوم ، آمل أن تستمري في الكتابة بنفس الأسلوب واللغة الدارجي .


#425392 [TIGERSHARK]
2.00/5 (1 صوت)

07-12-2012 07:30 PM
The regime guy was send by his hypocrite masters for the purposes of, deception, lies and talk nonsense, tasteless, colourless, meaningless arguments, he has done severe damage to the regime and gave the revolution a free push and more fuel and energy, we should thank him very much for that


#425360 [Shah]
4.50/5 (3 صوت)

07-12-2012 06:47 PM
لا يوجد جمهورى واحد يأكل مالا حراما بينما الآلاف المؤلفة من الكيزان يفعلون.


#425319 [السودانى الاصلى]
5.00/5 (1 صوت)

07-12-2012 06:01 PM
الراجل ضرب الراتب فى ثلاثه وهم الذينه رضى عنهم المؤتمر الوطنى الذين راضى عنهم هم راتبهم 600ناس الامن وهم مجموعه بسيط بنسبه للسودانين العطاله 1800دولار لو حسبنا بالسعر الجمركى او بسعر البك المركزى او بالسعر القديم 1800بضرب 75=1350000 ما معقوله ياودعبد العاطى اليوم ب 60 دولار اليوم ب 420جنيه والله كبرتا كبر شديد يمكن هم حرامية المؤتمر الوطنى اليوم فقير وبكره يصبح غنى وله عماره مافى راتب فى السودان يبنى له عماره


#425254 [ود النعمة بنت وراق]
4.50/5 (5 صوت)

07-12-2012 04:18 PM
يا بنت الجنيد زولك ربيع ده حالة ما تعب وجقلب نسى بسم الله البتاجرو بيها صدقتنيني
والقراي ما نسى بسم الله عرفتي السبب في انتصار القراي
والشعب مسلم اكتر منهم وما حرامي والله معاه
علي النعمة بنت وراق الثورة قايمة قايمة


أسماء الجنيد
أسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة