برضو ما لافقة
07-16-2012 11:15 AM

برضو ما لافقة !

الفاتح جبرا
[email protected]


لا حديث للمواطنين الاسبوع الماضي إلا ما قاله الأستاذ ربيع عبدالعاطي في برنامج (الإتجاه المعاكس) عن أن متوسط دخل الفرد في السودان يبلغ 1800 دولار .. (أي ما يساوى عشرة مليون بالقديم أو أكثر قليلا) .. وعلى الرغم من أن الكثيرين قد ظنوا بأن الأستاذ ربيع يقصد (الدخل الشهري) نسبة لضآلة المبلغ (ونحنا بلد بترولي وكده) وقربه من أن يكون (في الشهر) أكثر مما أن يكون (في السنة) إلا أن الأستاذ ربيع قد صرح (بعد الحلقة) بأنه بقصد متوسط دخل الفرد السنوي .
وهنا قد يتساءل أحد العاطلين عن العمل (هو وينو الدخل من أساسو؟) أو يتساءل أحد باعة مناديل الورق في أحدي شارات المرور (1800 دولار؟ يعني أكون بعتا ليا كم علبة مناديل في السنة؟) .. وحتى نجيب على مثل هذه التساؤلات المشروعة تعالو نشوف إلى اي مدي يمكننا أن نقول بأن متوسط دخل الفرد في البلد الفلاني هو كذا وهل ينطبق ذلك على ما قاله الأستاذ ربيع؟
لنبدأ أولاً بإيضاح كيف يتم إستخراج (متوسط دخل الفرد السنوي) وهنالك عدة طرق لذلك إلا أن أكثرها شيوعاً طريقة GDP وفيها نقوم بحساب قيمة كافة السلع والخدمات الأنتجناها وأستهلكناها محلياً ونضيف عليها صادرات الدولة من الإنتاج المحلي وده بسموهو إجمالي الناتج المحلي GDP – gross domestic product وبعد ين نقوم نقسموا على عدد السكان يطلع لينا (متوسط دخل الفرد السنوي) .
مثال للتوضيح :
لو قلنا أن عدد سكان بلدة 10000 نسمة وأن قيمة ناتجها المحلي (صناعة ،زراعة، رعي، نفط ، غاز،….الخ) بقيمة إجمالية 50000000000 جنيه فإن متوسط دخل الفرد (السنوي) هو 5000000 جنيه (50000000000 / 10000)
طيب لو قلنا أن ما ذكره (الأستاذ ربيع) صحيحاً وأن متوسط دخل الفرد (في السنة) هو 1800 دولار فهذا يعني أن الدخل السنوي لأسرة مكونة من 5 أشخاص هو 9000 دولار وهذا يعني بأن دخل هذه الأسرة الشهري هو (بعد قسمته على 12 شهر) 750 دولار يعني حوالى 4500 جنيه (يعني اربعة مليون ونص بالقديم)
وهذا بالطبع (إفتراء) على الواقع الذي نعيشه إذ أننا جميعاً نعلم (وربيع ذاااتو يعلم) أن متوسط دخل الفرد الفعلي أقل من الكلام ده بكثير وأن الرقم الذي ذكره لا يعكس الواقع لأن الواقع يقول بان العجزة والأطفال والطلاب و(العطالة) ليس لهم دخول كما أن المعاشيين وصغار الأطباء والمهندسين والموظفين والمعلمين والجنود والباعة المتجولين وأصحاب المهن الهامشية وغيرهم .. إلخ دخولهم وراوتبهم أقل من ذلك بكثير.
إن الطريقة الوحيدة (في حالتنا دي) إذا أردنا التوصل إلى حساب المتوسط الفعلي لدخل الفرد هي أن نقوم بحساب متوسط دخل الفرد (المكتسب) فعلياً عن طريق إحصاءآت (دقيقة) إذ إن إستخراج متوسط دخل الفرد السنوي عن طريق قسمة إجمالي الناتج السنوي GDP على عدد السكان رغم أنها طريقة شائعة الإستخدام إلا أن هذا (المتوسط) لا يكون حقيقياً ومطابقاً للواقع إلا إذا صدقت البيانات والأرقام الرسمية (التي لا تصدق دائماً) ، وبغير ذلك تكون المسألة دغمسة ساااكت) .
كسرة :
يعني بالعربي كده الـ (1800 دولار دي) لا في (الشهر) لافقة ..ولا في (السنة) لافقة .. يا ربي تكون في (القرن) !

كسرة ثابتة :
أخبار ملف خط هيثرو العند النائب العام شنو(ووو و ووو)؟




تعليقات 20 | إهداء 0 | زيارات 7501

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#430194 [خرخرة]
0.00/5 (0 صوت)

07-17-2012 09:39 PM
ياجبرا ياخى زغللت عيونى الاصفار الكييييييييييييييييييييرة دى ما قدرت اقراها لكن العرفتها جلجقومية تريليون وكم وكين كده


يديك العافية


#430084 [naser abirh]
0.00/5 (0 صوت)

07-17-2012 06:14 PM
والله لا ادري هذا دكتور بيطري ولا ايه ...دخل الفرد 1800والله شاطر البيسرق مال الدوله شنو بتقلوا

شاطر شاطر ياالله ألحس كوعك الدوله أفلست ..؟؟؟


#429787 [ود عويضة]
5.00/5 (1 صوت)

07-17-2012 01:46 PM
ما تكبرو الحكاية الراجل بقصد ان متوسط دخل المواطن السوداني (180) دولار - كدا لافقه
لكن في حاجات تصدقوها وحاجات ما تصدقوها مثلا وزير المالية قال البلد مفلسة - والناس ترجع للعواسة والكسرة - صدقتوه - على عثمان قال الرزاق هو الله - ماتربطوا حياتكم بالدولار - واحد قال مشكلة السودان الاقتصادية سببها ندى القلعة -
ايه رايكم انا مصدق ربيع عبد العاطي - دخل الفرد (1800) دولار يعني هناك اموال دخلت البلد في شكل قروض ربوية زول جاب ليها خبر مافي - اموال الاسلاميين - اموال التى دخلت عن طري الامم المتحدة لقواتها او المنظمات الاحنبية - والاموال التي جاءت عن طريق دفن نفايات ذرية - اموال السلاح المهربة للفسلطينين - اموال السلاح التي حرر بها الثوار طرابلس - اموال اسامة بن لادن - والفلوس الجاية من السي اي اي نظير ملفات الاسلاميين بلحاج وامثاله - اموال الاراضي - اموال المؤسسات التي بيعت في صمت - اموال الذهب - اموال البترول - الجمارك - والضرائب المفروضة على السكر والجاز والدقيق - والاموال المجنبة وغير الاموال المسروقة من بترول الجنوبيين - والحكومة لا بتصرف على التعليم ولا على الصحة - فقط بتصرف على الفلل الرئاسية واليخت الرئاسي
- وكونكم تكونوا فقراء وما قادرين تاكلوا دي قضيتكم انتو - المال ما موزع ممكن - لكن متوسط دخل السوداني (1800) دولار - حتى ولو كان مشرد في جبال النوبة او في معسكر كلمة او حتى في العاصمة وما لاقي وجبة سخينة واحدة في اليوم
كسرة : البشير ابتلاء من الله كما قال شيخه - عليكم بالدعاء عليه


#429701 [mathew]
0.00/5 (0 صوت)

07-17-2012 12:35 PM
نرجع لطريقة جساب الناتج القومى و نقول فعلا دخل الفرد 1800 دولار سنويا وهو الناتج القومى مقسوم على عدد السكانز و بالطريقة دى طالما ما تبقى من أهل السودان الجديد... أصحاب الجمهورية الثانية الآن حوالى 32 مليون نسمة حسب آخر احصائية ناقصا نحن فى الجنوب. حاصل ضرب عدد السكان فى دخل الفرد(المجع ربيع) 1800 دولار يصبحاالناتج السنوى هو 54 مليار دولار. طيب ياسيد ربيع اذا كانكل السودانيين مقتنعين بأن دخلهم لايعادل 200 دولار ورينا المليارات دى راحت وين يا ربيع و يا وزير مالية ويا دوسة.


#429249 [الطاهر أحمد]
0.00/5 (0 صوت)

07-17-2012 12:13 AM
سلام

يا جبرا ما تحكها شديد، شديد شنو ما تحكها خالص، ديل ناس يقولو أي كلام والسلام

اذا كان الرئيس ذاتو كلامو ما لافق وغيرو كتير، هي بس بقت على كلام ربيع ده

العملية كلها من أولها لي خط هيثرو ما لافقة


#429230 [wedhamid]
5.00/5 (1 صوت)

07-16-2012 11:43 PM
الأخ الفاتح جبره...تحيه ...طبعا تكون إستمعت فى الفيديو لكلام من سمىّ بالخبير الوطنى ...و بتكون فهمت المضمون لأنك فاهم الزول كويس...و عليه دشيت لينا بمقالة اليوم .... لكن كنت أتمنى من الكثيرين الذين إستمعوا لهذا الكائن يكونوا فهموا حاجه ...والله أنا شخصيا ما فهمت شئ... غايتو تجشمت عناء أن أكتب ما قاله فى وريقه لأقراه مرات برضو ما فهمت هو عايز يقول شنو !! و إليكم ماقاله حرقيا لتصدقوا كلامى.......

(( طبعا دا كلام ماصاح..دا كلام مفهوم..يعنى مغلوط و بيحتاج لتفسير و بيحتاج لتدريب...لتدريس.. وطبعا أنا فى فتره وجيزه و بسيطه شديد بسيطه لا يمكن أن أصل..يعنى أشرح و أوضح...و أضرب أمثله و نماذج لأنى مامدرس فى فصل يعنى...و لكن أنا بفتكر إنو الإشو دا ذاتو يطرح دا كويس جدا لأنو الناس بيبقوا على بصيرة فى أمرهم و يتعلموا يعنى كيف ينظروا لمثل هذه الصطلحات...... نحن تجاوزنا النظرة الإقتصاديه من 500 دولار فى العام كمتوسط دخل للفرد الى 1800 دولار...دا ما كلامى أنا ...دا ما كلامى أنا...دا كلام المؤسسات الإقتصاديه العالميه...يعنى حسع لو دخلت و شفت المؤسسات الضالعه قالت 1800 دولار و بعد داك ينظر دخل الفرد كم؟؟ 20 مليون... مليون...600 ألف دى مسأله بتاعت توزيع ثروه و سلطه و صلة مراتب و ما مراتب وسياسات إقتصاديه و و و الى آخره.....دا ما الإشو بتاعنا ...دا الإشو بتاع حكاية الــ avarage of income على حسب المعايير الدوليه ....نحن تجاوزناهذه من الـ 500 دولار الى 1800.....))

كلام الطير فى الباقير ...و دا بيذكرنى خطب سئ الذكر أبو القاسم محمد إبراهيم بتاع مايو داك .....


ردود على wedhamid
United States [بت أمدرمان] 07-17-2012 03:34 PM
هههههههه والله عمك دة بكون شارب شاى قبل الحلقة دى


#429158 [حسن موسي]
5.00/5 (1 صوت)

07-16-2012 09:23 PM
امر عادى و غير مزعج


#429132 [شحاته]
3.50/5 (3 صوت)

07-16-2012 08:17 PM
الاستاذ جبره رائع دوما كما عودتنا بس مشكلتك المره دى ابت تلفق معاك لانك ما حسبتها صاح طبعا الاستاذ ربع خابور الواطى مرجعيته فى حساب متسوط دخل الفرد كان من واقع الاتفاقيه الجماعيه لاصحاب العمل واتحاد العمال ووزاره العمل والتى قررت ان الحد الادنى للاجور هو 200 جنيه يلا لو قمنا قسمنا متوسط دخل الفرد 1800 دولار على ال200 جنيه بطلع الجنيه يساوى 9 دولارات وقبل يومين فى واحد من الشباب علق فى راكوبتنا دى قال لما الحكومه دى تقول حاجه انا بفهم عكسها يبقى بمعادله هذا المعلق حبقى سعر الدولار 9 جنيهات حسب نبوءات اهل الانقاذ دايما مفروض نحن نفهم العكس مش قالو ناكل مما نزرع وغطسوا حجر المشاريع الزراعيه والزراعه نلبس مما نصنع الليله ولا مصنع نسيج مدور جاءت الانقاذ من اجل الحفاظ على تراب الوطن ووحده ارضيه وعند الضروره حلف البشكير طلاق بانه مافى جندى اجنبى بدخل البلد هسه بقينا دولتين والامم المتحده جنودها والياتها ماليه البلد جئنا من اجل الحفاظ على القوات المسلحه والحفاظ على قوميتها هسه بقت ملشيات حزب المؤتمر الواطى جئنا من اجل الحفاظ على وجه السودان المشرق فى المحيط الدولى والاقليمى واليوم مطلوبين للعداله وجينا وجينا وجينا وحكمه الله بقولوا نحكم بالشريعه وقادونا للهلاك ودى ما من عندى ( انما هلك الذين من قبلكم كان اذا سرق فيهم الشريف تركوه واذا سرق الضعيف اقاموا عليه الحد .........) فجاءونا بفقه الستره يعنى باختصار ربك يستر الدولار ماشى للتسعه وقريييييب ده يبقى ياجبره يا حبيبى اصحى عشان تحسب صاح


#428989 [Heron]
5.00/5 (1 صوت)

07-16-2012 04:10 PM
عمرها ما حتلفق في البلد دي وذلك للاتي:

1- السياسات الخاطئة
2- نوم الضمير
3- ضعف القانون وكثرة الثغرات
4- غياب الحرية
5- المحسوبية


#428975 [إبن السودان البار ==--]
5.00/5 (2 صوت)

07-16-2012 03:45 PM
إقتباس :- يعني بالعربي كده الـ (1800 دولار دي) لا في (الشهر) لافقة ..ولا في (السنة) لافقة .. يا ربي تكون في (القرن) !
يا استاذ جبرة اسمع كلام شيخك؟؟؟

نائب الرئيس علي عثمان علي وتر رئيسه البشير حيث قال في خطابه بكادقلي ( أن ارتفاع الدولار أو انخفاضه ليس له ارتباط بأرزاق الناس، وقال«لا يستطيع أحد منع رزق ساقه الله للناس».
الأستاذ الأقتصادي الضليع ربيع عبدالعاطي يقصد 1800 دولار في الشهر لدكتور خريج جديد ؟؟؟ أو مرتب خادمة حبشية مدنكلة لأسرة كوز مستفيد من الوضع المريح ؟؟؟ او 1800 دولار في الشهر كمرتب أو مصاريف شهرية لأبن كوز صغنن خريج جديد ؟؟؟ او 1800 دولار في اليوم لكوز متنفذ له قرة مقاس XL ودقن محننة بطول 15 سنتم ؟؟؟ او في الدقيقة لكوز قيادي له اصبع تكبير بالحجم الكبير ؟؟؟ او خريج حوش بانقا( كافوري حالياً) وبطلوا الحسادة والنقة ؟؟؟ فالارزاق بيد الله ؟؟؟ وكما قال شيخك الجليل «لا يستطيع أحد منع رزق ساقه الله للناس ( للكيزان )». وسعر كوز موية الفول حالياً في البورصة بكم ؟؟؟


#428963 [الهادي هباني]
5.00/5 (1 صوت)

07-16-2012 03:27 PM
تحياتي ساخر سبيل علي الموضوع الجميل و مضحك و حبيبنا ربيع أصبح مسخرة ،،، و هو لا يستطيع التفريق بين مايعرف بمتوسط نصيب الفرد من الناتج المحلي الإجمالي و بين متوسط دخل الفرد أو ما يعرف بالدخل الشخصي ،،، و كما تفضلت أنت فهنالك عدة طرق لحسابه و من أهمها و أبسطها هو خصم ما يعرف بالإستهلاك الوسيط من نصيب الفرد من الناتج المحلي الإجمالي و يتمثل الإستهلاك الوسيط في (ضريبة الدخل الشخصي + الزكاة + التأمين الإجتماعي + أي إستقطاعات أخري تتسم بصفة الإستمرارية) من راتب الفرد الشهري و هي تقدر مجتمعة بحوالي 30% من الراتب الشهري ،،، و بالتالي و بما أن نصيب الفرد من الناتج المحلي الإجمالي نهاية عام 2011 حسب تقارير البنك الدولي بلغ 1,236 دولار (و هو يعتبر من أدني الأنصبة في العالم مقارنة مثلا ب 93 الف دولار للفرد في قطر) فإذا طرحت منها 30% و قسمتها علي 12 شهر ((1,236 - 30%)/ 12)) لأصبح متوسط دخل الفرد الشخصي الفعلي يقدر بحوالي 72 دولار أي ما يعادل تقريبا 425 جنيه بسعر 5.9 جنيه للدولار الواحد في حين أن راتب علي عثمان المعلن هو 10,000 جنيه (و ما خفي كان أعظم) ،،،
مع كامل التقدير


#428946 [أبو عبد الله]
5.00/5 (2 صوت)

07-16-2012 03:03 PM
يأستاذ عدد السكان الذين يتم قسمة الدخل عليهم هم الكيزان فقط أفهمو ياجماعة الخير لأنه الجماعة ديل المامعاهم ماحاسبنو


#428879 [عادل]
5.00/5 (2 صوت)

07-16-2012 02:07 PM
جبرا عايز يخلق من الحبة قبة لأن ربيع عبدالعاطي حرق نفسه ومات وشبع موت حتى جماعته تبرؤا منه عشان كده المفروض ياجبرا أن تكتب عن شـخص آخر من الكذابين اللصوص وهم كثيرون وخلينا من قصة عبدالعاطي وملف هيثروا وكن رجلا جادا واترك الهزل لأن هذا أوان الجد وليس اللعب.


ردود على عادل
United States [ود بربر] 07-17-2012 01:55 AM
والله يا عادل كلامك جد الجد ..
ونحن دايرييين من الاستاذ كتابات نضالية تستطيع ان تحرك الشارع العام ضد الفساد وضد المؤتمرجية المستفيدين من ثروات السودان دون بقية خلق الله في ارض السودان ويا جبرا مقالاتك جميلة وسمحة بس دايرا ليها زول فايق وقاعد في ضل العصر مع الوليدات ويشرب ليهو في شاي سادة بي محريب لكن والله كتاباتك دي وفي الوكت ده ما بتنقص ليها سعر انبوبة غاز ولا بتجيب ليها رغيف يكفي البيت ؛؛؛ فيا حبيبنا انت صاحب القلم الادبي الرائع اجعله قصاد مطالب الشعب السوداني الفضل ولك كل محبتنا .


#428860 [AAMAR]
3.00/5 (2 صوت)

07-16-2012 01:51 PM
استاذنا الجليل جبره لك التحيه
الاستاذ ربيع لسه مصر على كلامو وقال لو فى عدم مساواه فى التوزيع هو ما مسؤول .هل بيقصد تقسيم الناتج المحلى (الكان بترول بس ) بعد ما انتهت الزراعه وكل الحاجات التانيه لحقت امات طه ؟؟يكده نحنا عايزين حقنا نااااااشف .لكن يا جبره الزول ده بكون قاصد مصاريف المدرسه بتاعت اولاد الكيزان ...لكن برضو ما لافقه...


#428831 [zahi]
5.00/5 (1 صوت)

07-16-2012 01:18 PM
هو قال المتوسط 1800$ اما عدم عدالة توزيعها ده ما مسؤوليتي ........... يعني نسال منو ؟؟ العنبه الراميه في بيت قطبي ولا بيت كرتي ولا بيت جمال الوالي ولا المتعافن ولا الجاز ولا عبد الباسط منو داك ؟؟؟؟


#428813 [ربش]
5.00/5 (1 صوت)

07-16-2012 12:59 PM
أبالسة الغطاس كذب و نفاق لدرجة الإدمان ...


#428808 [abcdefg]
3.00/5 (4 صوت)

07-16-2012 12:52 PM
الزول دا قاصد في العمر كلو


#428781 [الزُول الكَان سَمِحْ]
3.00/5 (2 صوت)

07-16-2012 12:25 PM
يا أستاذ جبرا يا خطييير

بالله البتاعة الوصلتك للGDP – gross domestic product عملتها بى كم ورقة؟؟

أخبار ملف خط هيثرو العند النائب العام شنو(ووو و ووو)؟

الجواب (ماعارف)


#428769 [Abu Areej]
3.50/5 (2 صوت)

07-16-2012 12:15 PM
طبعاً يا استاذ جبرا اذا (لفقت) تكون القيامة قامت!!

في حالتنا هذه لا يمكن معرف متوسط دخل الفرد الا بعمل دراسة (ليست عينات عشوائية) بل يتم حساب دخل اي فرد في الشهر فعلياً (يعني بالعربي المرور على كل سكان السودان- صعبة دي) وبعد كدة نعرف متوسط دخل كل فرد على حده - المشكلة شنو ؟؟ هنالك عطالة يمكن توظيفهم في هذه اللجان التي ستجوب كل مدن وقرى وصحاري السودان لمعرفة دخل الفرد في الشهر ..يعني يكون وجدت وظائف لعطالى ومنها التأكد من دخل الفرد الفعلي وبالتالي المعلومة تكون صحيحة مائة في المائة !!

ما اطلقه هذا الربيع يا استاذ لا تلفق في الشهر ولا في السنة ولا حتى في القرن لان الذي اطلقها لا يعلم ايضاً..


#428768 [وحيد]
3.50/5 (2 صوت)

07-16-2012 12:14 PM
المحيرني ربيع دا الدكتوراه بتاعتو في شنو و من وين؟ السؤال ينطبق على نائب الرقيص - اقصد الرئيس- الحاج ادم و بقية حماة الدكتوراه من جماعة الانقاذ .... اذا كانت شهادات الدكتوراه دي حقيقية يكون المثل السوداني " القلم ما بزيل بلم " صحيح جزئيا، و نعدل فيه ليصبح " القلم بزيد بلم".


ردود على وحيد
United States [Abu Areej] 07-17-2012 01:16 PM
يعني يا عبدالرحيم الراجل ما طبيب؟؟ دة انا كنت فاكرو (دم) طبيب .. يعني انا طلعت اي كلام؟؟ وانت برضو كنت فاكرو (دم) طبيب يعني طلعت اي كلام!! يعني طلع (بوهية ما دم).. يعن الراجل هندسة زراعية بالانجليزي يا رجالة..دة مرسي والا ايه..

United States [ود الخضر] 07-16-2012 02:13 PM
انتا يا استاذ جبره حاكيها كدا مالك 1800 او الف و عشرميه اواي رقم يقبل القسمه او لايقبل القسمه يكفي المواطن او لايكفي صاح و لاغلط انتا مالك الارقام من الله كما قال احدهم الاسعار من الله ولادخل للحكومه فيها زادت نقصت طلعت عين الناس لاتسألو الحكومه و الحكومه مافاضيه مشغوله بي سباق بناء العمارات لمنسوبيها في شارع علي عينك ياتاجر في ماليزيا

United States [abdelrahim] 07-16-2012 01:07 PM
ليس دفاعا عن نائب الرئيس الحاج ادم ولكنه حقيقة يحمل دكتوراة فى الهندسة الزراعية وكان استاذا بكلية الهندسة جامعة الخرطوم.


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة