محنه سودانية .. ربيع عبد العاطي
07-17-2012 09:22 PM


محنه سودانية .. ربيع عبد العاطي

شوقي بدري
[email protected]

الواحد ممكن يفهم ان الدكتور ربيع عبد العاطى ربط الكرفته وركب الطياره ونزل فى الهوتيل ، واتى لكى يملك المساكين من امثالنا معلومات لا نعرفها . صرة الوش فى شنو ؟ . بعدين الله ما فتح عليهو بى كشيمه خليك من بسمه او ضحكه . المسؤولين ديل فى كل العالم بيجيبوا ليهم ناس العلاقات العامه يوروهم يبتسموا كيف ، ويكسبوا المشاهدين . اعدائهم قبل اصدقائهم . بعدين ده حوار . يعنى لو كان عيتنوبه ولا بطان كان عمل شنو .
حسب ما اورد الاخ صديق الموج الذى نحسده على روعته ووطنيته ، والذى زامل الدكتور ربيع عبد العاطى فى السعوديه ( ربيع كان شغال مخزنجى باربعه الف ريال فى السعوديه . ) وامثال صديق الموج لا يكذبون . طيب ربنا فتح على ربيع بفيلا ضخمه واراضى ومال وعقار . كاجى الناس ليه . انحنا ما عملنا ليه حاجه . الكج ده زمان لمن الزول يجى يضارب زول بدى اشاره انو انا جاى لدواس عشان التانى يكون مستعد . والا يعتبر الامر غدر . والكج هو ان يصر الانسان عين واحده ويصر وشو ، دى كانت حاله ربيع .
المقرر كان نقاش محدد . الدخل الاستاذ محمود محمد طه والجمهوريين فى الموضوع شنو . ودى المحن السودانيه اقحام اشياء لا دخل لها بالموضوع . اخونا القراى كعادة الجمهوريين كان متزناً ومعقولاً . وتحدث عن المال المجنب . المشكله ما المال المجنب . المحنه السودانيه المال المهرب . لان المال المجنب ديه بلف ويخش الاقتصاد السودانى . الضرر فيه انو بيصرف فى وجوه بذخيه . ولا يمكن اعادة استثماره بصوره جيده فى شكل مدخلات صناعيه وزراعه ... الخ . المال المهرب ده السودان يفارقوا فراق الطريفى لى جملو . الناس ديل خاتينوا لليوم الاسود .
الناس ركزت على ال 1800 دولار دخل الفرد السودانى . فى دى ربيع ما كذب . وافتكر ان دخل الفرد السودانى اكثر من 2000 دولار من الناتج القومى فى السنه . ولسؤ الحظ بعض اهل المعارضه دخلوا فى لولوه واستهزاء. اذا ناس الانقاذ كذبوا ولولوا نحن ما مفروض نجاريهم . يجن ان نكون امينين . اذا قال سمين نقول آمين .السؤال وينا ؟؟ . الفيلسوف برنادشو الذى كان اصلعاً وله لحيه كثه ويغطى جسمه شعر كثيف ، كان يقول ان حاله مثل النظام الرأسمالى غزاره فى الانتاج وسؤ فى التوزيع . ثروة السودان لمن تتوزع على عدد سكان السودان بطلع نصيب الانسان حوال 2000 دولار فى السنه . لكن ادروب الحائم فى الخلا ولا كوشى البتسرح بغنم فى فنقر او حتى سكان العشوائى خارج امدرمان ال2000 دولار دى ما بشموها . لكن هم داخلين فى الحسبه . ولهذا قال الكاتب الامريكى الساخر مارك توين ، هنالك كذب وكذب لعين واحصائيات . والاحصائيات احسن ما يكذب . ولا تعبر عن الواقع .
اذكر انه عند الثوره الكوبيه كان دخل الفرد فى كوبا هو 319 فى السنه . وبعد معركة خليج الخنازير وهزيمة التدخل الامريكى ،كان الرأسماليون يسخرونه من ان دخل كوبا لم يزد لعدة سنين . وكنا نرد وقتها . بأن كل المال المنتج فى عهد الجنرال باتستا كان يذهب الى اصحاب الكازينوهات و رجال المافيه ومصانع السكر التى كان يحتكرها الامريكان . ولكن المزارع الكوبى لم يكن يجد العلاج والتعليم الذى صار مجانياً . وصار الدخل يقسم على الجميع . وكان المناضل تشي جيفارا وهو وزير الماليه يتحصل على دخل المواطن العادى . ال 319 دولار فى ايام الاشتراكيه كانت تقسم على الجميع .
الدخل القومى ينتج فى الزراعه والرعى ومصائد الاسماك . الصناعه والتعدين ، التجاره المباشره بمعنى اخذ بضاعه من مكان الى مكان آخر . وهذا لا يعنى التخزين والمضاربه . بمعنى ان الحلاق او فنان المسرح او طبيب الاسنان . لا يشارك فى انتاج الدخل القومي مباشرةً . ولكنه يشارك بطريقة غير مباشرة . لانه هو الذى يساعد المنتج من عامل او زارع فى ايجاد حياة كريمه ومريحه . لكى ينتج .
فى آخر تشنجات البشير ذكر ان السودان ينتج 50 طن من الذهب . والحقيقة ان السودان ينتج اكثر من هذا . لان الشركات المنتجه لا تكشف عن كل الفلوس . وهنالك تنقيب عشوائى قد ينتج حوالى ال 15 طن . ولكن هذه الفلوس لا تدخل الاقتصاد السودانى . وهذه الاموال تتلف وتصرف فى اشياء فارغه . فالبشير هو ابن مغترب أتى من حوش بانقا وعمل فى الخرطوم بحرى مع عزيز كافورى كحلاب . وهذا يعنى انه قد اتى لتحسين وضعه المالى . وانه قد ترك اهله فى حوش بانقا اللذين وضعهم اقل جوده . اليس من المحن السودانيه ان البشير يصرف ملايين الدولارات فى شراء يخت او يخوت ، توقف بسببها الحركه فى طريق بورتسودان تقطع اسلاك الكهرباء ، وتهدم بعض المبانى . اليس فى جسم هذا الرجل ذره من الحياء ؟ . فحتى اذا سرق مال الشعب ،اليس فى اهله من يحتاج لراكوبه او متره . الا يزال فى ود بانقا اطفال يحتاجون لاحذيه . اليست هذه بالمحن السودانيه
من المحن السودانيه ان هنالك وظيفه اسمها خبير وطنى . عشنا فى الدول الناميه ، المتخلفه ، المتطوره ، ودول نص كم . ودول نص رباط . يطرشنا ما سمعنا بخبير وطنى . الزعيم السوفيتى خروتشوف الذى خلف استالين ، قال عندما قدموا له البرنس اوف ويلز ، ده شغال شنو . فقالوا ليهو ده راجل الملكه . قال انا عارفوا بعمل شنو بالليل . لكن بالنهار بسوى شنو؟ . انا ما عبقرى وما عندى دكتوراه ذى حقت ربيع ، لكن قريت شويه وشفتا ، خبير وطنى دى ما قدرته افهمها . اخونا كمال سينه الله يرحمو كان شغال فى شئون الموظفين . ناس مدنى جابوا ثمانيه وظائف جديده اربعه غطاسين واربعه مساعدين غطاسين . صدق بالغطاسين . لمن ناس مدنى احتجوا . قال ليهم غطاس دى المهنه الوحيده الما عاوزه ليها مساعد ، يا بتغطس يا ما بتغطس . يعنى مساعد غطاس ده يعنى بغطس فى وش المويه . قولوا عندكم لعيبين كوره عاوزين تشغلوهم ، بنشغلهم ليكم . ربيع ده كان لاعب كوره ولا شنو .
محنه جديده نائب الرئيس قال ، انخفاض او طلوع الدولار لا ينقص ارزاق الناس . لان الارزاق من الله . طيب الاعمار دى من الطوخى ؟ الاعمار دى ما بيد الله سبحانه وتعالى ما فيها لعب . الجيوش دى مودينها المتحركات والجبهات . ليه صارفين عليها فلوس تسليح وطيارات وانتنوف وذخيره ودبابات وعربات . ما يمشوا محقبين ايدينهم . فى زول بقدر يقصر اجل زول يومه ما تما . ليه صارفين 77 فى المئه من الدخل القومي على الامن والتأمين . بكره دى خلى على ولا البشير ولا اى واحد منهم يمشى يتضرع فى دارفور او يخلف كراعو فى كاودا ، او النيل الازرق . وماشين بعيد ليه . خلى يمشوا بس كجبار دى . ليه امن وتأمين ، الامين هو الله سبحانه وتعالى .
المحن انو الانقاذ الكذب ما بتعرف ليهو كويس . الهلكوبتر الوقعت قبل كم يوم دى فى دارفور ، وقال مقاتلى دارفور انهم قد اسقطوها ، بكل غباء تقول الانقاذ ده سبب فنى . معنى كده التقصير من الحكومه والجيش . وانهم بيركبوا اولاد الناس المساكين توابيت طائره . مفروض سلاح الطيران يقول الطياره بحاله جيده لكن ضربت بصاروخ . وده شئ طبيعى لاننا فى حالة حرب .
البشير ده بعد ما نبذ سلفاكير ووصفه برئيس الحشره الشعبيه وانه حيقد عين الحشره . وانو اى زول يمد ايدوا حيقطعوها ، ويرفع عينو حيقدوها . والله رباطين خور ابو عنجه ما كان بيتكلوا بالطريقه دى . شعور البشير والناس الحوالينو شنو . لمن يشوفوهو واقف مع سلفاكير ويبدو منكسراً لانه محتاج .
زمان كتلوا ولدنا مجدى والطيار جرجس وولدنا الطالب اركنانجلو . وهذا لحيازه العمله الصعبه . وبعد داك بقت العمله الصعبه متواجده فى كل بيت ذى المحريب والجردقه . وفى بيت قطبى المهدى ذى السنمكه . تانى جو رجعوا والنائب الاول بكل لؤم يطالب بقتل اى انسان يحاول ان يهرب مواد غذائيه لجنوب السودان . زمان فى واحد مجنون حايم بخرطوش فى الخرطوم بدق بنات الناس ، المالابسين محتشم حسب فهمه . قال مجذوب الخليفه انه قد اعطاه تصريحا . ما محل هذا فى القانون الوضعى او الشريعه الاسلاميه . واى شريعه تسمح لانسان ان يطالب الآخرين بقتل المسلمين بسبب الشبهه . يعنى واحد عندو غبينه مع زول يشوفو دايس ابنص لسفنجه يملاهوا دخان ويقول النائب الاول قال .
طيب ، حكوا على جماعه بخمستاشر سنه سجن بسبب سكر ، وجد في حوزتهم وبعيدا عن الحدود . اها ديل حيرجعوا ليهم عمرهم الضاع ده بأثر رجعى . طيب البشير القاعد حسى يناقش فى الجنوبيين . لو قام دقه سدرو وقال للجنوبيين تعالوا خموا . مايو ود عكر ، مقد ، قصابى ، فتريته اى حاجه . برضوا يطبق عليهو كلام النائب الاول ( شوت تو كيل ) . ولا دى حيطلعوا ليها فتوه جديده .
التحيه .
شوقى بدرى .




تعليقات 13 | إهداء 1 | زيارات 6233


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


التعليقات
#436335 [هشام]
2.00/5 (1 صوت)

07-25-2012 04:41 PM
ربيع عبد العاطي ... واحد وخلاص ... زيو وزي بقية المتسلقين والمتطفلين


#431986 [ali]
0.00/5 (0 صوت)

07-19-2012 09:54 PM
طيب ما دام الارزاق بيد الله


قالبنها لشنو ؟ ومطلعين بيان في 89 ؟؟؟ ما الحال الكان زمان داك برضو من الله ولو انه كان افضل 1000000 مرة من الحال النحن فيهو هسع

الله يقلبكم في جهنم امين يارب العالمي


#431101 [علي عثمان باع السودان رخيص]
0.00/5 (0 صوت)

07-18-2012 04:56 PM
العجيب والمحنة الجد:
انو الشعب يدفع رواتب وسرقات

من يكذب عليه

ويعتقله
ويحطم بلده

محنه عجيبة


#431056 [جربندى]
0.00/5 (0 صوت)

07-18-2012 04:08 PM
كل الموضوع انو الخبير الوطنى قريب على عثمان اذا اخوان البشير خموها خم البمنعو شنو هو كمان يهوهو .ربيع السواهومن فساد فى استثمار وزارة الاعلام ما ساهل خم ولم غير وكالة السودان الانباء.


#430600 [حاجة هدية البتلقف ام عمر الدلاهة الحرامى]
0.00/5 (0 صوت)

07-18-2012 10:27 AM
ربيع دا كيف سموهو ربيع ؟ سؤال مشروع وبعدين خبير ولا خابور وطنى ربيع جدعات او سماهو د. حيدر القومابى


#430484 [fadeil]
0.00/5 (0 صوت)

07-18-2012 09:13 AM
أخي شوقي بدرى لك التحيه فقد أوجزت وأنجزت وهؤلاء البلهاء لهم يوم ان شاء الله قريبا .


#430425 [Shah]
5.00/5 (1 صوت)

07-18-2012 08:08 AM
المصيبة بيقول إنه عنده 3 شهادات ماجستير ( وأنا لدي ماجستير في العلاقات الدولية ولدي ماجستير في فض النزاعات وآخر في الترجمة الفورية وأدرس في عدد من الجامعات السودانية)
ومن تاريخه إنه غش فى الإمتحان فى الجامعة و عوقب لذلك شهاداته دى فيها علامة إستفهام أكبر من صرة وشه السنيح ده.


#430321 [سنمكه]
0.00/5 (0 صوت)

07-18-2012 01:06 AM
فى بيت قطبى المهدى ذى السنمكه
الدب القطبي عندو إمساك ؟
حسي الثورة تنجح و يتحلا
و نتحلا منهم
امين


#430303 [شلعوهو الكيزان]
5.00/5 (1 صوت)

07-18-2012 12:14 AM
تصبحو تلقو حكومة الانقاذ مافي


#430263 [الخازوق]
2.00/5 (3 صوت)

07-17-2012 10:57 PM
مع احترامى لك يا عزيزى لكن ما عيب الواحد يشتغل مخزنجى ، عموما حاول ناقش ربيع فى فكرته دون الدخول فى اشياء لا تعنينا


ردود على الخازوق
United States [ما خازوق] 07-18-2012 03:06 PM
حسا يا الخازوق الكلام دا كللللللللو ما خوزقتا فيهو الا كلمة مخزنجي؟ ما تخوزقنا معاك الله يرضى عليك ياخ!!!

United States [Alkabashi Ahmed] 07-18-2012 08:33 AM
مع احترامنا ليك يا خازوق ..... الاستاذ بدري ما بقصد يستهتر أو يزدري بمهنة المخزنجي .... الاستاذ نفسو اشتغل في موانيء اوروبا لمن زيتو طلع لمعلوميتك يا الخازوق ... الاستاذ يقصد من اين للمخزنجي بالفلل وفارهات الدواب - ان كان نزيها - وواضح انتفاء هذه الصفة في ( الخازوق ) ربيع عبدالعاطي .... والله صحي خازوق ... خوازيق البلد زادت

United States [شاذ أفق] 07-18-2012 07:44 AM
مع إحترامى لك أيضاً ياأخى ( خازوق) .. الراجل ماقال لينا ( مخزنجى ) عيب ولكن حاول أن يشرح لنا الأنتقالة السريعة من وظيفة يسترزق منها الرزق الحلال مثله ومثل كتير من السودانيين فى السعودية الى صاحب أملاك وأراضى وتفسح له الفضائيات المجال لكى يتحدث فقط لآنه عضو فى (تنظيم الأخوان المسلمين الرهيب) فرع السودان وواضح ضحالة الثقافة التى يملكها !( ملحوظة) : يعنى إنت مالقيت فى المقالة دى كلها غير كلمة ( مخزنجى) وكمان فسرتخا بطريقتك ؟ وأقول لك بطريقة القذافى .. من أنتم ؟

United States [OSAMA] 07-18-2012 06:46 AM
ماتزعل ياسيدي بس حسب الفهمتو كان الموضوع المقارنة في المسميات الوظيفية ووظيفة (خبير وطني)

United States [amir] 07-18-2012 05:47 AM
اعد قراءة الفقرة


#430258 [التوم محمد احمد]
4.00/5 (1 صوت)

07-17-2012 10:47 PM
الله يديك العافية يا شوقى بدرى با ود امدرمان الاصيل كتاباتك بتريحنا وبتخفف علينا زيد زيد وكثر من معرفتك الغزيرة ومن الموسوعة المعرفية التى حباك بها الله ودمتم.


#430245 [ام ميار]
5.00/5 (1 صوت)

07-17-2012 10:20 PM
اقتربت نهايه بشار (باذن الله) , ياترى هل يصدق علي عثمان كذبته ام يتعظ بما يجري في العالم من حوله ويسلم السلطه لحكومه انتقاليه؟؟
ام البشير فهو للاسف حقا (عوير) ولا امل في ان يعي الدرس يوما حتى في لاهاي لن يقول ( لقد فهمتكم الان) لان (الفهم قسم)


#430233 [الفقير]
5.00/5 (1 صوت)

07-17-2012 09:47 PM
البشير دا ماسووووووورة وكمان مصدية


شوقي بدري
شوقي بدري

مساحة اعلانية

تقييم
9.25/10 (7 صوت)




الرئيسة |المقالات |الأخبار |الصور |الفيديو |راسلنا | للأعلى


صحيفة الراكوبة السودانية... راكوبة الأغاني السودانية، في رحاب الراكوبه ستجد السودان بمختلف مناطقه وعاداته وموروثاته خلال أقسام منتدياته المتعددة مثل المنتدى العام، العنقريب، المدائح ومنتدى التلاوة الذي يحتوي على تلاوة للشيوخ: صديق أحمد حمدون , عوض عمر , الفاتح محمد عثمان الزبير , محمد عبدالكريم , نورين محمد صديق , عبداللطيف العوض , صلاح الدين الطاهر سعد , الزين محمد أحمد الزين , وأحمد محمد طاهر. إلى جانب هذا هنالك منتدى مخصص للمدائح النبوية، هنالك المادح: الامين احمد قرشى وعلى الشاعر , الشيخ مصطفي محي الدين ابوكساوي , أولاد حاج الماحي , عبدالله محمد عثمان الحبر , اسماعيل محمد علي , السماني أحمد عالم , الجيلي الصافي , خالد محجوب (الصحافة) , علي المبارك , حاج التوم من الله , عبدالعزيز قورتي , ثنائي الصحوة , فيحاء محمد علي , الجيلى الشيخ , نبوية الملاك , عبدالعظيم الفاضل , عاصم الطيب , فرقة عقد الجلاد , سيف الجامعة , عثمان محمد علي , المدائح النبوية , فرقة الكوثر. علماً بأن المشاركات والآراء المنشورة في منتديات الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2014 alrakoba.net - All rights reserved

صحيفة الراكوبة