المقالات
السياسة
ارشيف مقالات سياسية
عثمان الشريف همبول فى بلاط ملك ملوك السودان البشير!
عثمان الشريف همبول فى بلاط ملك ملوك السودان البشير!
07-18-2012 03:10 PM

عثمان الشريف همبول فى بلاط ملك ملوك السودان البشير!

تاج السر حسين
[email protected]

(الهمبول) .. لمن لا يعرفونه هو هيكل خشبى بسيط يصنعه المزارع السودانى على شكل انسان ويضع عليه (قميص) بلدى ويوضع فى قلب (الحواشه) حتى يخيف الطير ويمنعه من النزول للأضرار بالزرع وتضاف اليه كلمة طير، فيصبح (همبول الطير)، وفى مصر أظن يطلقون خياله عبارة (خيال المآته)!
ولأجيال اليوم الذين لا يعرفون من هو وزير التجارة الحالى (عثمان عمر الشريف)، أقول .. كان رجلا وطنيا وقانويا ضليعا ومتحدثا بارعا، وكنت احرص على حضور ندواته السياسيه بانتظام رغم عدم انتمائى للحزب الأتحادى الديمقراطى .. حينما التقيته فى دار مؤسسة الأهرام المصريه خلال ندوه تحدث فيها قبل أن يشارك فى نظام الفساد والأستبداد استجابه لرغبة زعيمه (محمد عثمان الميرغنى)، قلت له : لقد كنت يا سيدى رمزا لأهل شمال السودان وكانت مواقفك تشبه مواقف الراحل (قرنق) وما يمثله لأهل الجنوب، قبل أن يصبح أملا لأهل السودان فى تحقيق وطن يحلم به كل سودانى حر وشريف منزه من الغرض والمصالح الشخصيه والنظره العنصريه أو القبليه، لكنك اصبتهم بالأحباط وأفقدتهم ذلك الأمل فى القيادات القديمه التى ساهمت فى تحقيق استقلال السودان، فأخرجت المستعمر لكنها حلت مكانه (مستعمرا) وطنيا، تارة تخدع المواطن باسم الدين وتارة أخرى بالأستعلاء العرقى والثقافى الذى لا يعترف بالآخر ثم يغلف كل ذلك بشعارات (وطنيه) زائفه.
وعثمان الشريف .. كان مصادما شرسا وخصما عنيدا لقوى (تيار الأسلام السياسى) المتمثل وقتها فى (الجبهة القوميه الأسلاميه)، فهل كانوا افضل يا ترى يوم ان كان يصادمهم ويعريهم ام الان بعد أن قننوا الفساد والمحسوبيه ونهب المال العام، وبعد أن فصلوا الجنوب وذبحوا الذبائح وهللوا وكبروا لذلك الفعل الخائب الذى لا يمكن أن يجروء عليه وطنى شريف؟
وعثمان الشريف .. كان احد أثنين حاكمهما نظام الأنقاذ محاكمه سياسيه، بعد أن اغتصبوا السلطه وتأمروا على الديمقراطيه بليل.
حيث كان هو من الأتحادى الديمقراطى ورفيقه الآخر السيد (أدريس البنا) من حزب الأمه، الذى كان حزبا واحدا فجعلته الأنقاذ 4 أحزاب.
ومن يصدق بأن الجريمه التى حوكم بموجبها عثمان الشريف بست سنوات سجن، بانه حينما كان يتبوأ منصب وزير الأسكان خلال فترة الديمقراطيه التى اعقبت انتفاضة ابريل 1985 صدق عدد 9 قطع اسكانيه لمواطنين سودانيين خارج اطار الخطه الأسكانيه!
تلك هى الديمقراطيه التى يرفضها البعض عن جهالة وعدم معرفه، ويدعون بانها لم تحقق للسودان شيئا وهى لم تجد الفرصه فى الحكم مثل ما وجدت الأنظمه العسكريه والديكتاتوريه والشموليه.
اذكر يومها كيف فند القانونى عثمان عمر الشريف تلك التهم ودحضها، ولو لم تكن العقوبه جاهزه مسبقا لما أستطاع القاضى ان يحكم عليه بيوم واحد سجنا.
وزير اسكان يحاكم بسبب تصرفه فى 9 قطع اراض فقط، منحها لمواطنين خارج اطار الخطه الأسكانيه، من بينهم كما ذكر عثمان الشريف، لواء فى الجيش لم يكن له ابناء، ولذلك ما كان بمقدوره أن يحصل على قطعة أرض عن طريق الخطه الأسكانيه التى تعتمد اسلوب النقاط، والتى تجمع من خلال نقاط الزوج والزوجه وعدد الأبناء .. والآن السودان يحتكر لشخص واحد ويسرق وينهب نهارا جهارا وتباع ملايين الأفدنه دون اتباع وسائل قانونيه، ولا أحد يعلم التفاصيل التى يتم بها البيع ولا يقام مزاد علنى أو مناقصات دوليه لبيع تلك الأراضى، وعثمان الشريف يقبل أن يكون وزيرا فى نظام ادانه فى بداياته بالفساد وحكم عليه بالسجن، والنظام يمارس الآن الفساد بصوره لم تحدث فى اى بلد متخلف.
وهذا كله هين ومبلوع، لكن هل يستمر عثمان الشريف وزيرا بعد الأهانه التى الحقه بها (عمر البشير) وجعله (همبولا) فى بلاطه؟
فعمر الشريف الآن، وزير (فقدط) من أجل الترضيه و(صمة الخشم) ولكى يخرج احد ازلام النظام على الفضائيات كما فعل (ربيع عبد العاطى) ليدعى بأن النظام تشارك فيه أكبر الأحزاب السودانيه (الأتحادى الديمقراطى)، ممثلا فى ابن الميرغنى وعمر الشريف ورفاقه فى بعض الوزارات التى جعلتهم مثل (همبول) الطير، بجانب الحزب الآخر (الأمه) الذى يمثله (ابن الصادق المهدى) وحده!
ومن عجب أن عثمان الشريف القيادى فى الأتحادى الديمقراطى يشارك معه بأسم الأتحادى الديمقراطى – فرع القاهره - أقصد فرع (المؤتمر الوطنى) الدكتور( أحمد بلال) والدكتور (جلال الدقير) وآخرين، فيا للمهانه ويا للمهزله!
يلتقى من باعوا الشعب وأحزابهم مبكرا، بمن لحقوا بهم أخيرا أى يذهبون للحج فى الوقت الذى يعود فيه الناس من (الحج)!!
الشاهد فى الأمر اصدر (عثمان الشريف) قرارا نتفق أو نختلف معه، بالسماح لدخول السيارات المستعمله، فاذا (بعمر البشير) يلغى القرار فى اليوم الثانى وبذات الطريقه التى الغى بها اتفاق (نافع على نافع) مع الحركه الشعبيه قطاع الشمال فى اثيوبيا، وتسبب فى اندلاع الحرب فى النيل الأزرق وأنضمت بذلك الى جنوب كردفان التى كان سبب اشتعال الحرب فيها تزوير الأنتخابات لصالح (أحمد هارون) واسقاط ابن السودان البار (عبد العزيز الحلو) الرجل المؤدب المهذب المنضبط، الذى اصبح قائدا للقوات المشتركه لتحالف (كاودا) الذى يحاول النظام تشويه صورته لدى ابناء الشعب السودانى بسبب الضعف الأعلامى، وفى كل يوم تاسر قوات تحالف (كاودا) من مختلف الفصائل، قوات تابعه (لمليشيات النظام) فيتعاملون معهم أفضل معامله، ثم يتصلون بالمنظمات الدوليه، مثل الصيلب الأحمر ويقولون لهم (أذهبوا فأنتم الطلقاء) .. بينما (عثمان عمر الشريف)) اسير داخل القصر الجمهورى مع انه يشغل منصب (وزير)!
آخر كلام:-
• عثمان الشريف (وزير) أفضل منه جندى الشطرنج الذى يترقى ويصبح وزيرا ويؤدى دورا ويحسم المعركه.

• ذكرنى حال عثمان الشريف بكلمات شاعر الشعب محجوب شريف (نغنى ونحنا فى اسرك وترجف وأنت فى قصرك).


تعليقات 6 | إهداء 1 | زيارات 3025

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#431743 [مدحت عروة]
0.00/5 (0 صوت)

07-19-2012 03:13 PM
يا اخ تاج السر حسين انت ما جايب خبر مشاركة الاتحادى الديمقراطى تمت بعد ما الانقاذ وافقت على اجندة الاتحاديين وهى التحول الممنهج للديمقراطية من خلال لقاء وطنى جامع وتكوين حكومة قومية الخ الخ وهو ما حاصل الآن وكلها كم يوم كده ويتم التحول الديمقراطى!! مش كده يا ناس الاتحادى الديمقرطى الاصل ولا ما عارف شنو؟؟؟؟ يالله اضححكوا كلكم!!!! السودان منكوب فى قياداته والناس المفروض تحكم البلد قاعدين فى الضل لا حول لهم ولا قوة والطالعين فى الكفر ناس ساكت ما يعرفوا يديروا انداية او خمارة!!!!!! بس حقوا الناس تفهم حاجة واحدة وبسيطة ان الشعب السودانى البسيط ده المزارع والراعى والتاجر والصانع والعامل والمهنى البياكلوا من عرق جبينهم اشرف من اى سياسى يهتم لمصلحته الذاتية فقط ومين يكون!!! فعلا يا اخ تاج السر انه استعمار داخلى وهو اوسخ واعفن من الاستعمار الخارجى الاشرف منه!!!!!بالله شوفوا الحكومات الوطنية الما يختشوا هم اجراء عند الشعب الذى هو ولى نعمتهم ويجوا عايزين الشعب يكون خادمهم حسب المقولة الوسخة انت حكومة والناس اهالى مع ان الاهالى هم اسياد الحكومة وليس العكس!!!!


#431614 [أبو أحمد]
0.00/5 (0 صوت)

07-19-2012 12:48 PM
عثمان عمر الشريف إسم ذو درله فعثمان رضى الله عنه عرف بالحياء والتقوى والورع ومخافة الله والفاروق عمر إسم يقترن بالعدل والقوة والتقوى والزهد والشريف هو طاهر اليد واللسان جميل الطباع أصيل السجايا طيب الخصال والأفعال ولكنى لا أرى الآن ما تنعتونه بهذا الإسم شيئا من هذه الخصال فقد لعق فى ماعون الإنقاذ الآسن حتى أذنيه فأختفت تلك المعانى من إسمه فلم يبقى منها شئ .


#431402 [khalid m ali]
0.00/5 (0 صوت)

07-19-2012 07:24 AM
الجاى للبلد دى سنامى جارف الطالع ناجى , اما المتشعبط فوق كرور هالك لامحال , السودان فوق .


#431048 [كشندكي]
5.00/5 (1 صوت)

07-18-2012 05:05 PM
ناس عثمان الشريف عملو ليهم غسيل مخ الراجل ده ماكان كده ولكن من الصعوبه تبيع ضميرك بالجنيه .
غايتو ماعارف لو كان دولار ماعارف ماجربنا ولا في زول عرض لينا علي حال لو في واحد من اولاد الحرام ديل اتكرم نجرب في الاول والله مااخبي عليكم النتيجه .
مانظلم الراجل ساكت.


#430997 [ثائر ضد الفساد]
5.00/5 (1 صوت)

07-18-2012 04:23 PM
حاكموه على حد زعمهم لانه تصرف في اراضي الشعب يعني حرامي

الان هم زملاء في الحرامية عشان كده بقى وزير

من وين ليه كلمة انه حرامي يا دوب 9 اراضي


لازم يسمع كلام المعلمين


#430993 [ركابي]
5.00/5 (1 صوت)

07-18-2012 04:19 PM
عايزين نطبق قانون العزل لاي زول شارك في الانقاذ من 89 الي يومنا هذا...الزول ده معقول بيحمل نفس الشريط الوراثي بتاع صاحب مقولة ابقوا عشرة علي المبادئ وعضوا عليها بالنواجز!!!!!
شكرا يااستاذ تاج السر علي شرح معني همبول لانو انا كنته قايلها زي بهلول كده وطلعته خيال مآتة في النهاية هههههههههههه


تاج السر حسين
تاج السر حسين

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة