ربع عامود
07-18-2012 07:19 PM

ربع عامود

حاتم الجميعابي
[email protected]

مثل إنقاذي " الأرزاق بيد الله لا بيد الحكومة "
تعليق سوداني أصيل: ولما قلبتوها وقلتو بسبب تدهور الإقتصاد كان نازل عليكم وحي كاركتير : حُجِب بواسطة الرقابة من عدد " الجريدة " ..
حكمة الأربعاء: الحرية لا يمكن أن تعطى على جرعات؛ فالمرء إما أن يكون حراً أو لا يكون حراً " نيلسون مانديلا .. بمناسبة الإحتفال بميلاده ..
(1)
طه: السودان تجاوز مرحلة الدستور الإسلامي إلى مرحلة التطبيق!!
اسي نصدق منو أنت والريس ..
الريس : قال دايرين دستور إسلامي ..
طه : اتجاوزتو المرحلة ..
الشعب السوداني : ياخي ما تتفقوا في حاجة ما تشرطوا عينا .. نحنا اسي محكومين بي دستور إسلامي ولا دستور " باب" كدي أتفقوا عليكم الله وريحونا .. عشان نبدأ معاكم من حيث أنتهيتم !!!
(2)
تحذيرات من توقف كل الصحف بعد عطلة رمضان.. ورؤساء التحرير ينعون الصحف!
وحااااااااات الله في جنس صحف حتقفل !!!
وفي كترت صحفيين حيشتغلوا كماسرة وبتاعين رقشات ..
الحمد لله التسالي بقا في اكياس ... عوضية شغالة بورق الأسمنت
والمرارة تاني إلا تجدعوها .. حتلقوا جرائد وين عشان تظبطوا بيها المرارة والتسالي والسمك والذي منو ..
ده كلو هييييين النسوان ينضفوا القزاز بي شنو تاني ..
(3)
عصام البشير : سنعين الحركات الإسلامية التي وصلت لسدة الحكم!!
أها يا السيد عصام دي الفلهمة العوراء ذاااتا ... دلوكتا شغالة وتمشي تنقز في دلوكة الجيراااان . كدي عيييين الناس القاعدة في كراسي السلطة العندك دي طلع ليهو فتوة عن أن الفساد ما حرام .. يعني شنو تفسد وتفسد الناس المعاك ... ما عادي بتحصل في السعودية بتحصل !!!
(4)
الخضر «95 %» من المتسولين بالخرطوم أجانب!!!
حكمة والله وحكاية ... الناس دي شغالة في موضة أجانب.. أجانب .. جو من وين .. والأجنبي ده تعريفوا شنو .. عشان نفهم معاك ذاااتو .. يعني الزول الجاي من الجزيرة ده أجنبي.. ولا كيف .. القصة شنو المتظاهرين أجانب .. والمتسولين أجانب .. وشارع النيل أجانب .. طيب أولاد البلد دي وين .. سفرتوهم العمرة ولا شنوووو ...
(5)
لجنة برلمانية تتقصى حول شركات الأدوية المهددة بالإفلاس!!
السودان مهدد كلو بالإفلاس نتيجة للإجراءات الإقتصادية أسم الدلع للفشل الإقتصادي للإنقاذ .. في كم حته أفلست .. الناس ذاااتا أفلست وبقت تقول كلام خارم بااارم
(6)
اوصي مؤتمر اقتصاديات الهجرة بإنشاء بنك خاص للمغتربين وتخفيض رسوم الدارسين من ابنائهم بنسبة 25 % ، بينما بلغ عدد السودانيين الذين هاجروا الي الخارج خلال هذا العام حوالي 67 الفا من مختلف التخصصات .
خلاص قبلو على المغتربين زي ما نشفو ريق الناس الجوة دايرين ينشفوا ريق الناس البره، أنت زمان مش كانت في حاجة أسمها مشروع سندس الزراعي أتعمل بقروش المغتربين ولموا فيهو الجماعة لهطوهو كلو، اسي دايرين يعملوا بنك عشان يلهطوا الباقي .. دولة بتصدر للعالم 67 ألف حسب الرسمي غير الناس المشت تهريب وعمرة وزوقه وغير الناس النطت من مصر لي اسرائيل ووووو .. يعني ده يسموهو شنو .. قيادة دولة ما قادرة تستفيد من مواردا البشرية .. وبعد ده جاية تعمل بنك عشان ينهبوا الباقي ..
(7)
الخضر:«5.5» مليون جنيه لدعم الأسر الفقيرة بالخرطوم!!
نحنا لغاية اسي ما قمنا من قصة السكر المدعوم الوالي عايز يدعمنا تاني ياخي ده كلام جميل يشيلوا منك القروش بالنفايات والعتب والضرائب والرسوم المباشرة وغير المباشرة ويلففوك "سورو" وبعد شوية يجوا يقول ليك هاك ده دعم الوالي .. الغريبة الناس كلها بتعرف جنس الأستهبال ده .. وباقي السودان البدعموا منو يا الخدر ..
العاصمة ما فيها الخدر .. من وين نجيب ليهو الوقار شان يبقى نبي الله الخدر !!
(8)
شعبة السيارات المستعملة: إلغاء قرار التجارة بفك الحظر جزئيا بعد ساعات من إعلانه خيبة أمل، والخسائر لا تقدر بثمن...
أنتو غير ما تخسروا في سوق النخاسة ده حتعملوا شنو .. البلد ماشا بي حركة ( ورا ورا) .. الجوطة كلها في شنو ... البشير قائم .. والوزير قام من بدري بنمرة خمسة وفتح التصدير .. بعد شوية أمير المؤمنين قال أقفلوا الشغلة دي .. يا ربي دي حكومة ولا ورابطة ثقافية .. الله يكون في عونك أيها الشعب السوداني ..
ثمن عامود :
إعفاء مدير سوق الخرطوم للأوراق المالية..
ياخي كان تخلوا شوية كده .. يلقا ليهو لحسه لحستين .. الراجل ده بكون شبع خلاص .. ياخي ده أكتر زول بالوثائق بيأخد قروش في الحكومة دي شغال شنو الله أعلم .. الناس كلها عارفة قضيتو السابقة .. يا داب شكلو أكتشفوهو أنو فاسد والله أعلم .
آخر العامود:
الحكومة دي أصلاً مقلوبة .. بس نفتش لينا طريقة نطلع من تحتها !!
عليك الله ده مش فهم .. يلاء فتشوا معاي ..


تعليقات 1 | إهداء 0 | زيارات 794

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#431667 [wad KANDAKA]
0.00/5 (0 صوت)

07-19-2012 01:45 PM
حاتم الجميعابي معليش انا كنت متهمك بالكوزنة عشان جماعة كدة قاعد تلاقيهم .. لكن من كلامك عرفت نفسي غلطان .. بالذات الجماعة الفي الرياض.. :)


حاتم الجميعابي
مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة