المقالات
السياسة
ارشيف مقالات سياسية
ليه تتقشّفوا ونحن قاعدين ؟!!
ليه تتقشّفوا ونحن قاعدين ؟!!
07-19-2012 12:25 PM

ليه تتقشّفوا ونحن قاعدين ؟!!

سيد محمود الحاج
[email protected]

حلفنا حرام دي ما تبقى... تبقى كيف ياريّس ونحن قاعدين !! نحن الله خلقنا لي زول غيركم ياخي!!
معقولة بس تعلن سياسة التقشف علي الجماعة وتخفض الرواتب والحوافز..طيب جاري المسكين دا ذنبه شنو..الرجل كان قدام بيتو تلاتة عربيات تقوموا تشيلوا منه واحدة وتخلوا ليه إتنين بس..طيب بنته دي تمشي الجامعة بي شنو !؟..خليك من دا.. المسكين إضطر كمان يسرّح إتنين من خدامينه الأربعة..ياريس لو ماحنيت عليه هو كان تحن على العمال المساكين ديل..تاني زي الراتب الكان بصرفوه دا يلقوه وين!!.. نحن ذاتنا والله راسنا إنقطع...ريحة السمك المقلي والمشوي دي تاني نشمها وين ؟!!..أوعى تفتكر إنو الزول دا محرشني عشان أتوسّط وأقول الكلام دا نيابة عنه... نعم هو أقرب الجيران ليْ لكن ما ببالغ لو قلت ليك إنو الزول دا سبعة سنين بي عيني دي ماشفته إلا مرة واحدة لامن فتح قزاز العربية عشان يتف..طالع مظلل نازل مظلل...سمين ومرزّي لابسالم ولا بعزّي لكن حق الجار علي الجار هو الخلاني أترجّاك عشانه.

دا كوم وحكاية ضراعك اليمين كوم تاني...مش حرام ياريس ماهيته من خمسة وعشرين مليون تركز علي خمستاشر بس !! المسكين ياكل بليلة تاني والا شنو..يعني لو ما عندو عمارتين بس وشوية ملاليم مشغلن في السوق المسكين كان أكل نيم... البركة في ود الوالي و الحمدلله كمان إنو بتعالج على حساب الدولة وإلا كان راسه إنقطع في السبعة وعشرين ألف دولار تمن الحبوب والأدوية البتجيه من أميريكا من وقت لي آخر.

الله يكون كمان في عون عمنا ماسك دفاتر الجاز والأمباز.. ياربي السنة دي ح يقدر يقضي عطلة العيد في حدائق الدندر زي ما كل مرة هو وأفراد الأسرة والعائلة الكبيرة والا بكون متقشف !!... ماشرط يستأجر طيارة مشوار رائح جاي.. ممكن (طرحة) واهو كله تقشف !

والله ياريّس الظروف لو كان بتسمح ماكان بنخليهم يقاسوا مرارة التقشف لكن ربنا عالم بي الحال لا في الجراب لا في التراب..الكان عنده دلقان ركشة باعها والعنده كارو باعها والعنده جرف باعه .. وحياتك ياريس ساعة اليد بعناها خليك من البقرات والنعاج والموبايل الجخ ..دي تلاتة وعشرين سنة ونحن تحت المنشار..طالع نازل فينا
شي مدارس وشي علاج وشي ضرائب وشي زكاة وشي عوائد وشي نفايات وشي جمارك وشي رسوم وشي مالاقين ليه مُسمى...تلاتة وعشرين سنة ياريّس نقطع من لحمنا ونجدع لامن بقينا علي عجل الحديد.. والمثل بقول الحي أفضل من الميّت ونحن زي ماك شائف الميتين أخير مننا عشان عرفوا طريقهم.. ومثل تاني يا ريّس بقول البقاء للأقوى.. يعني القوي أجدر بالبقاء ونحن قوتنا فرتكت مع جيتكم وهدانا وصلنا مرحلة ناكل وجبة واحدة في اليوم وأريتها وجبة عدوك اللافيها لحم لا فيها طماطم ...دحين يا سيدنا الرئيس بدل البلد تعدم طافي النار أولى تقعدوا إنتو وجماعتكم عشان تكونوا روّاب وتحفظوا النسل بس إن شاءالله ما يطلع زيّكم . وعشان إنتو تعيشوا إتفقنا نحن الجنائز ديل بكامل أهليتنا المعتبرة شرعاً , ولخبرتنا الطويلة والعريضة بمرارة التقشف ,ان تقوموا نيابة عنّا بمايلي لتفادي هذه المرائر التى لم ير جماعتكم مثلها خلال 23 سنة..كيف يعانوا ونحن قاعدين !!... ولتفادي كل ذلك ولإنعدام أي مخرج آخر لكم بعد رفع الدعم عن كل شيء وعدم إمكانية حلب قطرة واحدة من أثداء المواطن بعد ان تساقطت الأثداء من تلقاء نفسها إذ جفّت تماماً , نقترح مايلي :-





* يكون إلزاماً على كل من تجاوز الخمسين شراء كفن دمورية بالسعر الذي يحدده المصنع التابع لشركات النظام بحيث لا تتم أي إجراءات لأفراد هذه الفئة دون إتمام عملية الشراء المنوّه عنها بأعلاه .

* فرض رسوم على حالات الوفاة بحيث لا يتم دفن أي متوفي مالم يتم تسديد هذه الرسوم بموجب
إيصال رسمي ويستثنى من ذلك المتوفين في الحوادث بإعتبار أن هذه الحوادث تستوفى عليها رسوم في أقسام
الحوادث بالمستشفيات الحكومية .

* إستيفاء رسم (عطالة) عند تحصيل العوائد ورسوم النفايات وذلك على كل عاطل في الأسرة من الجنسين
ويستثنى من ذلك الخريج الذي لم يكمل أكثر من 5 أعوام من تاريخ تخرجه.
.
* تحصيل رسوم على مناسبات الزواج والختان من خلال تصاريح تصدرها اللجنة الشعبية المكلفة ولهذه اللجنة
الحق في إيقاف أي زيجة او عملية ختان في غياب هذا التصريح .

* تحصيل رسوم طلاق من الطرف المتقدم بطلب الطلاق وتستثنى من ذلك الطلبات المقدمة من
قبل زوجات بسبب هروب الأزواج ويكون إصدار قسيمة الطلاق مربوطاً بتسديد هذه الرسوم .

* على كل من بلغ الستين عاماً من العمر تسديد رسوم (حياة إضافية) تقدّر من قبل لجنة تقوم بدراسة هذه الفئة
علي أن تتضاعف قيمة الرسم عند كل خمسة أعوام تعقب السن المحددة بأعلاه .

* تقنين عملية ممارسة الشحاتة وإصدار تراخيص لكل من يرغب في ممارسة هذا النشاط مقابل نسبة 20% من
من العائد اليومي لكل ممتهن .

* تشكيل لجنة مكونة من كل من اللجان الشعبية و وزارتي الداخلية والمالية تقوم بمراقبة اللصوص أثناء عمليات
السطو ومن ثم إقتسام الحصيلة مناصفة ويستثنى من ذلك لصوص المال العام مع إمكانية فرض غرامة على أصحاب
المنازل التى يوجد بها كلاب تعيق عمل هؤلاء اللصوص أثناء تأدية واجبهم .

* تأجير المساجد مقابل رسوم رمزية يدفعها المصلي عند كل وقت صلاة بحيث تكون كالآتي:_
• مبلغ نصف جنيه لكل من صلاة الظهر والعصر والمغرب
• مبلغ ربع جنيه لكل من صلاتي الفجر والعشاء
• مبلغ 5 جنيهات لصلاة عيد الفطر
• مبلغ 3 جنيهات لصلاة عيد الأضحى
• يستثنى من ذلك صلاة الجنازة بإعتبار ان هنالك رسوم وفاة يتم تحصيلها.

• إصدار تصاديق يسمح بموجبها بقيام مظاهرات سلمية صامتة مقابل رسوم تحددها الجهات الأمنية ذات العلاقة تستوفى من كل متظاهر بموجب إيصال رسمي موضح عليه إسم المشارك والمدة المسموح بها
للتظاهر وفي حالة أي مخالفات بالهتاف او رفع لافتات او تجاوز المدة المسموح بها يتم تحصيل غرامات إضافية من المخالفين بواسطة مراقبين محائدين مرافقين لهذه المظاهرات .


كافة الرسوم المنوه عنها بأعلاه تحصّل من قبل جهة محائدة (كمجموعة كارتر التي أشرفت على الإنتخابات) مثلا ويتم إيداعها في حساب ( ليه تتقشفوا ونحن قاعدين ) !!.



تعليقات 3 | إهداء 0 | زيارات 1046

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#431767 [وطن حدادى مدادى]
0.00/5 (0 صوت)

07-19-2012 03:53 PM
يامنتقم ياجباربك نستعين


#431661 [اوهاج]
5.00/5 (1 صوت)

07-19-2012 01:38 PM
الله يجازيك ياابوسيد يا اخى احنا ناقصين صدقنى اذاكان ما75% من افكارك الجهنمية 50% منها حتكون موضع التنفيذ انت بتهزر لكن ديل بعرفوا الهزار يا اخى مالك علينا الشىء المحزن انك ماحتنال حق الاختراع والابداع اقول ليك حاجة اناامبارح سمعت واحد قال صحفى سالوه عن حكاية اسعار الطماطم افضل حل عنده قال الناس تحجم عن شراء الطماطم وليه الناس تشترى الطماطم بالسعر ده ودى فى تقديره احسن طريقة الناس تحارب بيهاالغلاء يعنى عديل كده اضراب مفتوح عن الطعام وبعدين جاى تقول كفن دمورية ده الموضوع على كده مقابر جماعية وهم عندهم خبرة فى الحته دى


سيد محمود الحاج
مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة