التيس ..!!!
07-21-2012 03:18 PM

بالمنطق

التيس ..!!!

صلاح الدين عووضة

*و(نونسكم)اليوم عن ذكرى رمضانية بطلها (تيس!!) ..
*وأقسم بالله إنه تيس حقيقي حتى لا تذهبن بـ( ظان !!) الظنون ..
*والذكرى هذه كان مسرحها حي موظفي المصنع - بكريمة - ونحن نخطو أولى خطوات مرحلة دراستنا الإبتدائية ..
*فقد كانت هوايتنا المححببة إلى نفوسنا - في أمسيات رمضان - اللهو على الرمال التي تتراكم بجوار الحوائط بفعل الرياح..
*كنا نلعب (شليل) و(شدت) و(دافوري) و..........(حسونية!!) ..
*وكي لا يُجهد أحدكم ذهنه في تذكر لعبة اسمها الـ(حسونية)، أقول إنها لعبة خاصة بشلتنا - آنذاك - يعود فضل استمتاعنا بها إلى زميلنا حسن ..
*ومن اسم زميلنا هذا تم تحوير اسم اللعبة المذكورة ..
*فقد كان ابن حينا حسن - وهو يكبرنا بقليل - متيماً بابنة (الداية) التي تقيم قريباً منا ، بجوار البوستة ، وقد كانت ذات ( عافية!!) رغم صغر سنها ..
*وما أن تأتي البنت هذه برفقة والدتها بغرض الأُنس الرمضاني مع نسوة حينا حتى تعتري (حسوني) حالة لا أظن أن هناك مثيلاً لها إلا ما كان يعتري قيس حين مرور ليلى بجواره حتى لُقب بـ(المجنون) ..
*وقد كانت هي تشعر بذلك - الفتاة - فتتبسم في (غنج) لا يتناسب وعمرها مستعينةً في ذلك بـ(غمازتين) ورثتهما عن أمها ..
*وفور أن تختفيا - البنت وأمها - داخل أحد بيوت الحي حتى نبدأ نحن في التسلى بلعبة (الحسونية) تحلقاً حول حسن المسكين ..
*أو ربما كنا نحن المساكين وهو السعيد ..
*وفي ليلة من ليالي رمضان تلك تبدل مشهدنا الأُنسي ذاك تبدلاً دراماتيكياً ..
*فقد ظهر في حياتنا (التيس !!) ...
*ونسميه هنا تيساً من باب المجاز اللغوي بما إن التيوس التي نعرفها هي - قياساً إليه - أشبه بحسناء زميلنا حسن مقارنةً بـ(عيسى الغُراب) بائع الفحم ..
*كان تيساً عجيباً ، غريباً ، ضخماً ، ذا عينين (مشعتين !!) ..
*عينان أكاد أجد توصيفاً لهما في مقطع قصيدة قال برتراند رسل أنه أوشك أن يهوي من أعلى سلم في جامعة كمبردج حين سمع زميلاً يترنم بها ..
*مقطع يقول فيه الشاعر - وأظنه وليم بليك - (أيُهذا النمر يا زاهي البريق) ..
*ثم ما كان يحدث من تلقاء التيس هذا تجاهنا هو أشد غرابةً من مظهره ..
*كان يهجم علينا حتى يُدخل كلاً منا إلى داره ..
*فإذا ما فرغ من مهمته هذه - التيس - لا نجد له أثراً، حين ننظر من وراء الأبواب المواربة ، إلا أن نخرج إلى الشارع مرة أخرى ..
*فمن أين كان يجئ - إذاً - وإلى أين يذهب ؟ لست أدري ...
* كما لست أدري كذلك المغزى من اصراره على إدخال كل منا إلى بيته في اللحظات تلك من ليالي رمضان ..
* ولكن الذي أعلمه تماماً أن التيس ذاك كان - في نظرنا - (شيئاً !!) غير مرغوب فيه ..
*فقد كان (يفرض نفسه !!) علينا فرضاً ...
* ثم (يُصادرحريتنا !!) في اللعب .


الجريدة


تعليقات 33 | إهداء 0 | زيارات 6114

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#434852 [جزماتو الدلع جزمة]
0.00/5 (0 صوت)

07-23-2012 09:55 PM
ياخي لية ما صديتوه ووقفتو وقفة رجل واحد=الوحدة ليهو حق يصادر حرياتكم ما لقاكم ناس سفنجات ساكت


#434102 [حمد]
0.00/5 (0 صوت)

07-23-2012 01:29 AM
طيب ممكن نعرف حكيت القصة دي ليه عشان نعرف قيمة التيس ؟


ردود على حمد
United States [كسلاوي] 07-24-2012 07:30 AM
لك مستقبل باهر مع هذه الحكومة فانك تحمل كامل المؤهلات

United States [انا فهمت اذن انا ما تيس] 07-24-2012 07:28 AM
بعتذر وبيقول في تيوس مانعنه من الكتابة زي التيس المنعه من اللعب .. فهو يقول اعذروني لا استطيع الكتابة كما احب وتحبون ودعوني اعيش ... دنا غلبان

United States [الرقيب] 07-23-2012 09:27 AM
مش لمن نعرف أولا ناسكم ما دايرين الصحفيين يكتبوا عديل ليه ؟


#434006 [محمد]
0.00/5 (0 صوت)

07-23-2012 12:04 AM
لعمرك انى اعرف تيسا مثله وحوله عددا من التيوس


#433470 [ابن آدم]
5.00/5 (1 صوت)

07-22-2012 10:04 AM
استاذ/ عووضه بصراحة الناس ديل لو قالوا (حرفه ) انت ( منقطه ) . يا اخي تيس الرقابة القبلية دا ما طلع كيشه سااااااااااى . تيسك الحقيقي احسن منو .
الله يكفينا شر تيوس الانقاذ كلهم . قل آميييييييين
ولد ده


#433333 [سوداني ويس]
5.00/5 (1 صوت)

07-22-2012 03:08 AM
ياخوانا صلوا على الني الراجل في بداية كلامو اقسم بالله انو(تيس ) حقيقي بالله سيبكم من الاجتهادت دي ماتودوش الراجل في داهية .بعدين قالوا ايه الي قاللو تيس يمسك دقنو اقصد قرونو . هو مش التيس بردك ايندو دقن والا ايه؟


#433324 [Citizen]
0.00/5 (0 صوت)

07-22-2012 02:48 AM
ما شاء الله يا عوضة بقيت تقرا لبرتراند رسل ووليم بليك! الفراعى ده جاب الإنقليزى ده كلو من وين يا ربى؟؟!!


ردود على Citizen
United States [Zingar] 07-22-2012 12:21 PM
الفراعى ده جاب الإنقليزى ده كلو من وين يا ربى؟؟

أقول لك ماتزعلش.....

United States [كاره للظلم] 07-22-2012 09:03 AM
انت مشكلتك شنو مع عووضه يا سيتيزن ؟ بعدين لعلمك هو عندو ماجستير في الفلسفة ودارس فرنساوي كمن


#433318 [سامي]
5.00/5 (1 صوت)

07-22-2012 02:28 AM
هههههههههههههههههههههههههههه برضو تيس ياودعوضه اه تيس مقبوله منك بس ماوريتنه لايس شنو شبط وله بود الله ايديك العافيه يا ود القبايل


#433295 [aaa]
5.00/5 (1 صوت)

07-22-2012 01:27 AM
لك التحية الاخ / صلاح عووضه
اول مره اعرف انك من ابناء كريمة العريقة وفعلاً كلامك صحيح واسمو كان تيس عبدالمعروف والبنيه نقشناها.


#433290 [محي]
5.00/5 (2 صوت)

07-22-2012 01:18 AM
من أين أتى هذا التيس ؟
على تسآل الطيب صالح من أين أتى هؤلاء؟


#433277 [Shah]
5.00/5 (1 صوت)

07-22-2012 12:47 AM
ولما يذهب كنتوا بتقولوا ليهو "ما بدرى يا خليفة"؟


#433251 [زوله كده]
5.00/5 (1 صوت)

07-22-2012 12:05 AM
ود عووضه..
ما عندك مشكله ونسنا ونحنا بنفهمه,بس شكله رئيس التحرير الفعلى صدق الحليفه الفى بداية المقال...


شفت والله


#433213 [الصادق علي موسي]
5.00/5 (1 صوت)

07-21-2012 10:59 PM
الحكايه صحيحه تيس يصادر الحريات هههههههههههههههههههههههههههههههه بالغت يازين


#433188 [بدر]
5.00/5 (1 صوت)

07-21-2012 10:21 PM
انت متأكد انو ( تيس ) يعنى ما تويس ؟؟؟؟


#433158 [ابورزان]
3.00/5 (1 صوت)

07-21-2012 07:57 PM
استاذ عووضة لما قراءت العنوان افتكرتك حتحكي لينا حكاية التيسس الجابوه يعشر الغنم رضعهم لكن تيسك برضو سسلوكه ما بعيد من تيسنا0


#433157 [Sudani Ana]
5.00/5 (1 صوت)

07-21-2012 07:55 PM
ريسو وتيّسو...الله ينعم عليك ويباركلك فى رمضان...أنت رائع كروعة النيل والنخيل والخليل كروعة بلادى فى ذاك الزمن الجميل...ليت يعود لنا وطناً معافى دون المشانق والمقاصل والعويل! قصيدة بدأت فى كتابتها وأنشاءالله تنتم والوطن معافى!


#433151 [جربندى]
3.00/5 (1 صوت)

07-21-2012 07:36 PM
التيوس ديل تيسونافى بلدناوبشنو. باسم الدين لاحول ولاقوة الا بالله العلى العظيم.


#433147 [ادم عبدالعزيز ودالرهد]
4.00/5 (1 صوت)

07-21-2012 07:05 PM
ههههههههه لك التحية استاذنا عووضة ربنا يخليك اها تفتكر التيس ده بطاردكم ل شنو احتمال يكون كنتوا بتهتفوا ب سقوطوا سرا , اما نحنا تيسنا ده حنسلخوا سلخ باذن الكريم ودعواتكم معانا يا احباب ياااااااااااااارب يا حنان يا منان رمضان السنة الجاية يكون بدون كيزان


#433146 [الزول الكان سَمِحْ]
5.00/5 (1 صوت)

07-21-2012 07:04 PM
يا ود عووضة

إنتو تحسبوا لعب..والتيس ماخد الموضوع هزار...ولا إيييييييييه

ولد ددده


#433104 [عبد المغيث ابو شيخة]
5.00/5 (1 صوت)

07-21-2012 06:07 PM
والله يا عووضة لا ارى تيسا يطاردنا حتى ندخل البيوت غير هدا التيس ابو ريالة ويا ما اكثر التيوس في زماننا هدا !!!!!!!!!!!!


#433089 [جقلبة]
5.00/5 (1 صوت)

07-21-2012 05:43 PM
برافو صلاح عوضة , ياصلاح عوضة برافوووو !!!!


#433086 [win]
5.00/5 (1 صوت)

07-21-2012 05:40 PM
Mugor بلغة النوبيين

و ليس بشكيرنا هذا المنشفنا ده ب Mugor

انما هو Mug فقط هو و بقية العقد الفريد


ردود على win
United States [hakeem] 07-21-2012 09:46 PM
la ma mug
3shan al kalb(mug) ameen w ho la


#433078 [ود الريس]
1.00/5 (1 صوت)

07-21-2012 05:18 PM
آكيد التيس دا في سخلات داخل بيوتكم بتججس عليكم له ، عشان كده ياود عووضة لازم كل واحد يعرف آي سخلة جاسوس في بيتو يقوم يتدبر آمرها
وإلا فإن التيس وراكم وراكم

ولدددددده


#433074 [لاحس كوعي]
1.00/5 (1 صوت)

07-21-2012 05:08 PM
رقاصنا ده غنماية ولا تامي تيس ذاتو


#433058 [بريقع]
1.00/5 (1 صوت)

07-21-2012 04:41 PM
سيخرح اللا عبون جد لمواجهة التيس لاتهم كبروا عن وصاية الدجل والخنوع الطويل ، طالما أن غمازات المعشوقة تنادي حسونة غصبا عن تمنع أمها الداية ، فلا أحد من شبابنا وبناتنا سيخاف من الآن فصاعدا من التيوس الجبانة ، وقد أمسكوا بقرونها في انتظار من يأتي بسكين الذبح ، مع أن لحمها النتن والمصنح لا يصلح حتى لأكل الكلاب والنسور !


#433047 [امدرماني-الركابية]
0.00/5 (0 صوت)

07-21-2012 04:14 PM
تيسنا تيس تيسكم يقدر تيسكم يتيس تيسنا؟؟؟؟؟؟؟؟؟؟؟؟؟؟؟؟؟؟؟


#433044 [الضحك عطشني ياخ]
5.00/5 (1 صوت)

07-21-2012 04:08 PM
وحات الله إته حريف حرفنه
ختيت للتيس بتاع الرقابة شرك:
*وأقسم بالله إنه تيس حقيقي حتى لا تذهبن بـ( ظان !!) الظنون ..
وصاحبنا إتيس فيهو هههههه
الليلة بحلقو ليهو صلعه
تاني يا عووضه أحلف ليهو أول بعدين دق سيدو
لكن بعد الصلعه
ما أظن تاني ينشر ليك حاجه
جداده تاني ما بنشره ليك


#433034 [نوفي]
5.00/5 (1 صوت)

07-21-2012 03:57 PM
التيس داء يشبة التعامل بين الشعب والنظام ولكن القريب في الامر رغم انتصار التيس في عداد من الجولات الاءانه مرتعب رعب غير طبعي تتفتكرو الرعب داء من شنو من وحدة الشعب لانه وحيد وليس له منزال ان حدث العكس يدخل الية ونطلب من عوضه ان يوضح لناء رائحة التيس حتي نتاكد وذلك لان لي الرائحة تاثير كبير ................... اكثر مايعجبني في كاتب هذه السطوار هي الثقة المبنية علا الخوف من يوم لقاء رب الكون لذلك ظلاء يكنب دون خوف من بشر لانه قد خاف من العطيم


#433033 [وليد]
5.00/5 (1 صوت)

07-21-2012 03:55 PM
تيسكم داك أرحم من التيس العاقر حقنا
دا ياخي صادر حرية شعب كامل..
تيسكم كان بدخل الناس بيوتها، لكن التيس العاقر دا بعتقل ويعذب، ويغتصب، ويقتل.
تيسنا ياخي سرق أموال شعب، وآماله، وحريته...
تيسكم ملاك مقارنة بهذا التيس العاقر الذي جثم على صدورنا أكثر من عقدين من الزمن.


#433025 [baraka]
5.00/5 (1 صوت)

07-21-2012 03:44 PM
الان فهمت ياعوضة


#433023 [ام ميار]
5.00/5 (1 صوت)

07-21-2012 03:42 PM
قلت لي تيس وكده


#433018 [والله تعبان]
5.00/5 (3 صوت)

07-21-2012 03:36 PM
اكيد التيس ده البشكير بتاعنا لان فارض نفسه علينا فرضا


#433012 [مروان]
5.00/5 (2 صوت)

07-21-2012 03:29 PM
التيس ده جهاز الأمن ولا شنو؟


ردود على مروان
United States [خرخرة] 07-21-2012 05:13 PM
تيس أم الحسن


#433008 [Mustafa]
5.00/5 (4 صوت)

07-21-2012 03:28 PM
شفت لكن .. كل سنة وانت بخير والشعب السوداني بخير .. والتيس دة يختفي نهائياً من حياتنا إن شاء الله إلى لاهاي بردك خير وبركة..


صلاح الدين عووضة
 صلاح الدين عووضة

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة