ده البرلمان وللا بلاش
07-28-2012 11:39 AM

ده البرلمان وللا بلاش

الفاتح جبرا
[email protected]

غني عن القول أن البرلمان هو السلطة التشريعية التي تتولى كثيراً من الإختصاصات المختلفة وفقا لما حدده دستور البلاد فهو يتولى سلطة التشريع وإقرار السياسة العامة للدولة والخطة العامة للتنمية الاقتصادية والاجتماعية والموازنة العامة للدولة كما إنه يمارس الرقابة على أعمال السلطة التنفيذية كما أن للبرلمان دوراً هاماً فى التأثير على السياسة العامة، نظرا لما يتمتع به من قدرة على التعبير عن المطالب الشعبية وأولويات الرأي العام.
في كل بلدان العالم يقوم (البرلمان) بمسألة التشريع ووضع القوانين (عشان كده سموهو السلطة التشريعية) لأنو (القانون) دائماً يأتي تعبيراً عن إرادة المجتمع الذي يمثله نواب البرلمان الذين إختارهم الشعب ! يعني بالعربي كده (قانوناً ودستوراً) مافي اي قانون بيكون ساري المفعول إلا بعد ما يقوم البرلمان بمناقشته والموافقة عليه .
للأسف الأسيف أن الحكومة لا شغالة بي دستور ولا بى غيرو والبرلمان بتاعنا المفترض يدافع عن حقوقنا واضح إنو (خاتي راسو مع الحكومة) وفاكينا عكس الهواء .. الحكومة ممثلة في جهازها التنفيذي أصبحت من (يشرع ويجيز) وما على هذا الشعب (الطيب الغلبان) إلا أن ينفذ صاغراً ما تطلبه الحكومة والبرلمان (قاعد يتفرج) !
قرار بحجم رفع الدعم (الما موجود أساساً) عن المحروقات يتم تنفيذه دون أن يمر على البرلمان ليجيزه ! ويسمع به (نواب الشعب الفضل) كما يسمع به (العامة) وعندما يطالب البعض بسحب الثقة من (وزير المالية) لهذه السابقة الخطيرة التي تنتقص من كرامة وهيبة (البرلمان) يقوم رئيس البرلمان (القانوني الضليع ) بتبرئة الوزير قائلاً أنه قد شاوره في الأمر (شفتو كيف؟) ! يعني (شاورو وخلاص) !! غايتو أمشوا فتشوا في الدستور أو اللوائح البرلمانية إحتمال تلاقوا ليكم بند بيقول : (يجوزلرئيس البرلمان إجازة القوانين بمفرده) !
يعني قامت السلطة التنفيذية بإحراز هدف في مرمي (الشعب) من حالة تسلل واضحة وسط سكوت مدرجات المتفرجين (نواب الشعب طبعن) !
لم تمض ايام قليلة على هذه (المهزلة) وهذه الزيادات المؤثرة في حياة ومعاش الناس والتي تم تنفيذها قبل أن تمر بالبرلمان في مخالفة واضحة للقانون ومرت المسألة (مرور الكرام) ونواب الشعب (سكتوا) عن هذا التجاوز (المهين) والشعب (سكت) على (سكوت) نواب الشعب والقصة مشت وأصبحت واقع !
لم تمض أيام قليلة حتى تكرر ذات السيناريو (بي ضبانتو) وقامت السلطة التنفيذية بإحراز هدف آخر وبنفس الطريقة في مرمي (الشعب) من حالة تسلل واضحة وسط سكوت مدرجات المتفرجين (الجابوهم يتفرجوا) !
حيث فوجئ المواطنون كما فوجئ نواب الشعب (ذاااتم) بزيادة فاتورة الكهرباء زيادة (فاحشة) .. و(برضو) دون أن يمر الأمر على البرلمان (ما خلاس القصة مشت وكده) ولكن هذا المرة لم يصرح السيد رئيس البرلمان بأن (وزير الكهرباء شاورو في الموضوع) إنما ترك مهمة التصريح للسيد رئيس اللجنة البرلمانية الذي قال بالنص : ( البرلمان لايقبل الزيادة ولايرفضها، بل يود معرفة المنطق الذي تمت بموجبه الزيادة)..
عليكم الله شفتو ليكم برلمان (قاعد ساااي) زي برلماننا ده؟ في أقل من شهر يتم تنفيذ أهم قرارين يمسان حياة المواطن في الصميم دون أن تمر عليه لمناقشتهما في خرق واضح للقانون وتهميش متعمد لصلاحياته و(الفاجعة بل الكارثة) إنو بدلاً من أن يثور أعضائه ويغضبون لهذا التجاوز المهين يصرح أحد أعضائه بأن غاية مطلبهم من السيد وزير الكهرباء إنو يوريهم (المنطق) التمت بيهو الزيادة .. ده بدل ما يسألو عن (القانون) التمت بيهو الزيادة ..

كسرة :يعني مافيش مشكلة لو السيد الوزير إتجاوز البرلمان بس السادة النواب عاوزين يعرفوا المنطق .. ده البرلمان وللا بلاش !!


كسرة ثابتة :
ملف خط هيثرو العند النائب العام أخبارو شنو(ووو و ووو)؟



تعليقات 42 | إهداء 2 | زيارات 7710

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#439159 [mustafa]
0.00/5 (0 صوت)

07-29-2012 10:46 PM
انا ماعارف انت بتتكلم عن ياتو برلمان ... ياخى عمرك سمعت ببرلمان فى الدنيا كل اعضائة من الحزب الحاكم ؟؟؟ برلمان شنو البيوضع القوانين والتشريعات ؟!؟! خليها على الله ...


#439156 [عبدالله]
0.00/5 (0 صوت)

07-29-2012 10:42 PM
برلمان شنو ؟ ديل بتاعين نثريات وبدلات وكافتيريات ولا امل فيهم ولا خير فيهم ( وي حليلك يالشريف الهندى وياحليلك ياهاشم بامكار ) اححححححححححححححححححح ؟ خليها على الله اضرسونا هولاء البشر ?


#439104 [wedhamid]
5.00/5 (2 صوت)

07-29-2012 08:15 PM
الأستاذ جبره ..تحية و ..عذرا ....كنت كتبت التعليق التالى عن موضوعك السابق حول قصة المدعوه هبه محمود و لكن عاندنى تعليق ( عذرا لم تقم بكتابة التعليق بالشكل المطلوب ...عسى أن يتم الآن)
أقتطف الجزء التالى من حديث المرأة (الخارقه)الأمين العام لصندوق تشغيل الخرجين هبه محمود- الذى تم إعفاء المسئول الأول منه قرشى بخارى بقرار جمهورى!!! لأسباب تبديد و نهب وإختلاس 3 مليار جنيه من مال ذلك الصندوق و بدون أى مساألة قانونيه ... و هذه الهبة جزء منه ....حيث قالت فى ضمن أجاباتها...بعد ظهور تقرير المراجع العام و أثبت المخالفات الماليه الفادحه و تورط المسئولين فيها
((هو ليس تقرير المراجع العام، لأنه لا زال في المرحلة الإدارية.. المراجعة التي أجريت تمت من قبل شخص اسمه عثمان، وتم نشر التقرير قبل أن يتم اعتماده، وقد سأل رئيس لجنة الحسبة بالبرلمان الفاتح عز الدين المراجع العام عن هذا التقرير فقال له "لم نر التقرير ولم نعتمده".. المسألة الأخرى التي أود توضيحها إني غادرت شهر يوليو2007 إلى ماليزيا ورجعت في يوليو 2009، وفي عام 2008 تم إجراء نهاية الخدمة، فأنا بدأت عملي في المشروع كخبير غير مفرغ وعلى المدى الثالث بنص اللائحة لا يجوز لأي خبير أن يمارس أي مهام تنفيذية أو هيكلية في الدولة إلا استثناءً، وفي أقل من ستة أشهر تم تكليفي بمهام كأمين عام، أي أربع سنوات ونصف كنت أميناً عاماً بنفس مخصصات الخبير الوطني غير المفرغ وستة أشهر كخبير وطني.. ولم أكن أتقاضى مرتب الأمين العام.. أقنعتني الأستاذ سامية أحمد محمد أن أتفرغ للمشروع وكان لي عمل خاص وقتها واقتنعت وتفرغت للمشروع الذي كان في ذلك الوقت مكتب تابع لوزارة الرعاية الاجتماعية، التقرير يتحدث أنه بعد مغادرتي استمرت مخصصاتي كخبير غير مفرغ.. تكونت لجنة وأشارت إلى أن الوضع يجب أن يصحح ويكون لي وضع مثل باقي الأمناء... وكان ذلك بعد أن سافرت حيث كونت الوزيرة لجنة لتخرج لي مكافأة نهاية الخدمة واللجنة كان فيها مصطفى حولي وعبد الرحمن حسن وعثمان قرشي و.))
يــا جبرا تقرير المراجع العام قال المبلغ المختلس حوالى 3 مليار جنيه ....و المتهمين قرشى بخارى و الذى تم إعفائه بقرار جمهورى و الخبيره الوطنيه ست الـفـلـم ......
نان مـا عثمان دا هو المراجع العام ذاتو .. و الذى كلف بمراجعة مالية الصندوق يا مدام و تقريره يسمى بتقرير المراجع العام و لو كان إسمو أى إسم تانى كان حيفرق بى شنو ؟؟؟!!! و غريبه وصف التقرير إنه فى المراحل الإداريه ؟؟!! يا ستى دا تقرير وصل لمجلس الوزراء - للـ د. محمد مختار و الذى يحاول التدخل فى إجراآت النيابه .... و تدخل الفاتح عز الدين لتحليل الموضوع وتمييع القضيه بالتأثير على سير التحقيقات ... برضو تقرير إدارى ما معتمد ؟؟ و بعدين ما فى سبب يدخل مجلس الوزراء و البرلمان فى أى أمر دخل مرحلة التحرى فى النيابه العامه ....و بعدين كيف تم تعيينها أساسا كمستشاره و خبير وطنى ( برضو ؟؟) و غير متفرقه.... الوظيفه الهلاميه و الغطاء للعطاء الغير محدود للعطالة و المتبطلين و الفاقد التربوى من الكيزان ؟؟..... ثم الوزيره ساميه تحنسها و تقنعها تمسك ليها أمينه عامه ؟؟؟؟ و بعدين تعيين دون أى إجراء قانونى بدليل إنه لما سابت سيادتها الشغل ( نفس طريقة خدم المنازل ...لا إستقاله و لا إحاله للمعاش و لا بقرار مجلس محاسبه )تم تكوين لجنه من قامات مثل مصطفى حولى و عبد الرحمن حسن و عثمان قرشى لتحديد إستحقاقات فوائد ما بعد الخدمه و التى أصلا إستمرت فقط ....خــمـــســة ســنــوات 2003 الى 2008 منها كانت سائحه فى ماليزيا سنتين لأنو ما ممكن تكون فى الخدمه المدنيه ماموريه لسنتين!!!!و بعدين هى تم تعيينها كمستشاره بــ 2 مليون تقوم الوزيره بترفيعها لأمينه عامه دون أى إجراأت رسميه و تقاولها على راتب 5 مليون و بعدين لأن تكلفة الإقامه فى ماليزيا دى عاليه الست دخلت فى ديون كما ذكرت فى حديثها ... لذا راجعوا الفروقات على أساس إنها بتستحق 7 مليون راتب شهرى بتاع الأمين العام....
بعدين يا جبرا لا بندول ولا حاجه كل الفلم دا حينتهى بالنهايه السعيده زى الأفلام المصريه فى زمنكم لما الجريمه تثبت بــ ( فقه الستره) .... و ما هى كلو لله يا حركه إسلاميه !!!


#439067 [عبد الواحد المستغرب اشد الاستغراب!!]
4.00/5 (3 صوت)

07-29-2012 06:14 PM
ياجبرا بطل الافتراء الانت فيهو!! يعنى عاوز المجلس يخت راسو مع راس الشعب؟ طيب خت نفسك فى كرسى من كراسى المجلس 00وكده فكر برواقه00الماهيه الكنت حتهبرا والامتيازات وخليك من (صدقة تجتوج) اقصد منحة العيدين والاجازات المدفوعة الاجر !!كانت حتجيك من وين يا ظريف؟00وإذا فكرة مجرد تفكير وإعترضة الا تخشى ان يقال لك (هلا جلست فى بيت أمك وإنتظرت كل هذه النعم تأتيك وهى تلولح ضقلا!!)00يا أخوانا ما تبطلبوا إفتراء!!ثم ثانيا:إنت عاوز رئيس المجلس يقعد يشاور (كل من هب ودب) داخل المجلس هو إنت صدقت انو مجلس بلدك بيشبه مجالس خلائق الله ؟ الا تتفق معى صديقى جبرا على ان ما اسميته (مجازا ربما) مجلسا هو (بالمقارز)المنتشره فى مدينة القاهره أقرب وبالتالى فهى ليست لها علاقه لا من بعيد او قريب بالمؤسسات التشريعيه الموجوده بالدول المحترمه حيث أن مجالس (الغرز) يتحكم فيها (الكيف)والقرارات فيها تكون وفقا (للصنف) المتداول لحظتها!! وهنا لا فرق كما ترى بين مجلسنا (الموكر) ومجلس (الغرزه)0


#438978 [سوداني جداً جداً]
5.00/5 (1 صوت)

07-29-2012 03:29 PM
عمك الشغلة دي أظنها بالنية ساكت '' وما تنتظرو من برلمان جائو بالتزوير وفي ظل حكومة زي حكومة الجسم والرماد دي ما تنتظرو اي خير


#438952 [اسعد]
5.00/5 (1 صوت)

07-29-2012 02:59 PM
ده الشايفه عينك دى اسمو برطمان الحكومه ولا عجب


#438648 [جقلبة]
5.00/5 (2 صوت)

07-29-2012 06:59 AM
الدوسااان ياعمك ديل ماقاعدين يشوفو البرلمانات بتاعت الصين واليابان الناس دي بتدور كااافوتي عديل جوا البرلمان عشان مصالح المواطن عشان كده أنا كنت متمني في ظل العلاقة الطيبة مع الصين يجيبوا لينا كم زول برلماني من عندهم اعارة يكونو متدربين كاراتيه عشان يفجغو لينا ناس (ماموافقين ومارافضين) ديل .


#438541 [Heron]
5.00/5 (1 صوت)

07-29-2012 12:56 AM
صدقني فااافي ولا حتى بصيص امل في بلدنا طالما انو هؤلاء اللصوص يديرون البلد بي مزاجم.


#438524 [بيترو]
5.00/5 (2 صوت)

07-29-2012 12:35 AM
يااااااا ود جيرة اشرح لينا الكلام دة ( البرلمان لا يقبل الزيادة ولا يرفضها) البشير بتاعكم ده عادة الجماعة كلهم ولا شنو !!!!!!!!! زي ما قال ابو ريالة ( كل يوم من الفشل الي الفشل)


#438501 [Heron]
5.00/5 (1 صوت)

07-28-2012 11:57 PM
شوف بالله حكومة التدمير في الشهر الفضيل قاعدة تسوي شنو في الناس . غلبتكم ارحلو وريحونا


#438473 [طاهر محمد]
5.00/5 (1 صوت)

07-28-2012 11:00 PM
الفاتح سيبك من خط هيثرو هو سودانطيييير ذاته وينه هههههههههههه اكلة الدودو هههههههههههههه


#438431 [الامين حسين]
5.00/5 (1 صوت)

07-28-2012 08:58 PM
برلمان و حكومة الخج ماذا ننتظر منهم فهذه هى اخلاقهم وتربيتهم قاتلهم الله


#438381 [د.عبد العليم]
5.00/5 (1 صوت)

07-28-2012 06:18 PM
والله الراجي من برلمان بهذا الشكل فائدة تكون مشكلتو أعوص من البرلمان ذاتو، أنا بقترح إنو البرلمان الديكوري الذي هو لزوم المحاكاة لما يجري في العالم - نسرحو ونرتاح منو، وتمشي ميزانيتو للتعليم أو الصحة أو الزراعة، أو تاخذها وزارة الكهرباء وتلغي الزيادة، فأول خطوة تقشفية هي التخلص من كل الصرف غير الضروري، وميزانية البرلمان صرف غير ضروري، لأن الدستور ماشي يبقي إسلامي مية مية؛ فالتشريعات لزومها شنو، ماهي موجودة في الكتاب والسنة؟؟؟؟؟؟؟ كمان تاني حاجة : نموذج الدولة السودانية ما محتاج ليهو لي برلمان؛ محتاج لي إنت وحظك وقت اتخاذ القرار والتوتر الذي يصاحب متخذ القرار، والضغوط التي هو فيها


#438370 [ودالبلد]
5.00/5 (1 صوت)

07-28-2012 05:53 PM
برلمان حسب الرسول اوالواقي الذكري دى لو راجين منو فايده تلحسوا كوعكم.


#438358 [كاسترو عبدالحميد]
5.00/5 (1 صوت)

07-28-2012 05:30 PM
أولا : اقول لهولاء النواب آكلى السحت وهو هذه الرواتب التى يستلمونها آخر كل شهر انها حرام ووالله حرام لأنها جاءت من تزوير . الا يعرف هؤلاء النواب انهم اتوا بالتزوير ؟ كون انهم لم يشاركوا فى عملية التزوير بل قامت به جماعات تم تكليفها من حزب المؤتمر فهذا لا يعفيهم من المسؤلية. ومن يؤد أن يتحرى عن راتبه اذا كان حلالا أو حراما فيسأل اى شيخ أو مفتى عن ذلك . اللهم انى قد بلغت وكل نائب معلق من رقبته يوم القيامة وسوف يسأل عن ذلك . ثانيا : هل نتوقع من آكلى السحـت هؤلاء ان يقفوا بجانب الشعب ؟


#438354 [ثائر ضد الفساد]
4.00/5 (2 صوت)

07-28-2012 05:20 PM
برلمان فااااااااااااااااااااااسد
سيجيز زيادة الكهرباء ويصفق كمان يا الفاتح
انت فاكر نفسك عندك برلمان ده مخجوج لصالح الحكومة تباً لهم


#438336 [ماعارف]
5.00/5 (1 صوت)

07-28-2012 04:51 PM
الفاتح علي بالطلاق انت مسطووول سطلة

يازول البلد سايبة فاكة مافيها قانون انت بتقول في شنو ياخ


#438317 [كشندكي]
0.00/5 (0 صوت)

07-28-2012 04:24 PM
عرفنا اي حاجه وعرفنا اخبار خط هيثرو .الدايرين نعرفو ياجماعة الخير كسرة خط الثوره وصل وين .
ورونا الثوره بألشنقيطي .


#438314 [سيف النصر]
5.00/5 (1 صوت)

07-28-2012 04:20 PM
سلام أستاذنا جبرا
كلامك دا يا استاذ معناها انك مقتنع ولو "رقراق" انو السودان فيهو برلمان!!!!!


#438305 [محمد محمدين]
5.00/5 (2 صوت)

07-28-2012 04:02 PM
يا أخ الفاتح نحن من زمان قلنا نكته لكن طلعت على مقاس ناس البشير تماماً وسوف أذكرها مرة أخرى مع سمعتها من استاذ جبارة الله يطول عمره في مدرسة سنجة ا لثانوية سنة 1976م في أولى ثانوي عالي (أن رجلاً يخاف من الحرامية خوف شديد ، وكان نائم وزوجته بجانبه صحت المدام ورأت الحرامي يتاوق فقالت لرجلها راجل السرور أصح في حرامي في الحيطة ، ولم يكشف وجهه وقال لها ما تخافي قدامك أسد ... الحرامي تلّب الحيطة ووقف أمامهم .. فقال لرجلها البطل أصح الحرامي واقف في راسنا .. فقال كما قال ما تخافي قدامك أسد .. ولم يكشف الغطاء م رأسه ، الحرامي أخذ المدام وطلع الحيطة فصاحت يا راجل الحرامي شالني .. فقال لها وهو مغطي بالغطاء ما تخافي خليتي وراكي أسددددددددددددددد أسد البرانكة عاجبني طول ايده .. والله هذه تنبطق على برلمان وجماعة البشير تماماً جاؤووووووووووا لينقذونا فأغرقوووونا ولا يزالوا أسوووووود


#438297 [كروري]
3.50/5 (2 صوت)

07-28-2012 03:52 PM
أوقفوا الكتابة و التعليق و أحملوا السلاح.


#438292 [أبو الغيث]
0.00/5 (0 صوت)

07-28-2012 03:48 PM
الله يقويك ..زانت راجل لذيذ


#438283 [حاتم /شرق النيل]
5.00/5 (1 صوت)

07-28-2012 03:34 PM
نواب برلمان امدرمان ( نايم ديمة ) او ( كمل نومك ) كما يحلوا للبعض تسميته استلموا سكر رمضان و حوافز رمضان و حق العيد في الطريق -- قبل كدا عروضوا عليه زيادات في الاسعار يناير 2011 واجازها البرلمان بتصفيق و تهليل و تكبير لبيشوفهم و بيقول الناس ديل حرروا فلسطين عديل كدا - يا عمو ما تورم فشفاشك و تفقع مرارتك مع الناس ديل - اصلو هم حرامية و كضابيين و بتاعيين تلات ورقات - وماعندهم اي قضية بشعب او الدين اوالاخلاق عشان كدا ربنا فضحهم علي روؤس الاشهاد ساكن كافوري مطلوب برا فلس و فشل و فساد و كمان معها غتاتة .


#438278 [مدحت عروة]
5.00/5 (1 صوت)

07-28-2012 03:26 PM
ده برلمان ناس دخلوها وصقيرها حام!!!! الانقاذ كلها اناتيك!!! وبما انهم قاعدين فى الحكم 23 سنة ولسه حاكمننا نبقى انحنا ذاتو شعب انتيكة!!!!


#438271 [زول مسافر بسكة ياي]
5.00/5 (2 صوت)

07-28-2012 03:12 PM
التحية والتجلة لك ايها الاستاذ الفاتح جبرا،،،،

برلمان السجم والرماد، برلمان دلدول فسية ديك، يميل حيثما مال الرئيس.
برلمان بوباي (البوباية فزاعة في شكل انسان يضعها المزارعون في مزارعهم لتخيف الطيور والهوام)
فكذلك هم اعضاء البرلمان فزاعات وضعهاالرئيس، ليوهم بها الشعب ان هؤلاء بشر يمثلونهم وماهم ببشر فزاعات وسراب ليس إلا. (كسراب بقيعة يحسبه الظمان ماء).

لك الله ياشعبي، وان الصبح قريب.


#438266 [ود الحاجة]
5.00/5 (1 صوت)

07-28-2012 02:58 PM
هذا اسمه" بر أمان" الحكومة و" برجلان " الشعب


#438264 [رشا]
0.00/5 (0 صوت)

07-28-2012 02:57 PM
انت ناسي يا أستاذ جبرا حكاية (شوالات السكر ) التي وزعت على النواب وقالوا انها بالسعر الأساسي باعتبار المساكين لن يستطيعوا كعامة الشعب من شراب الموية زي الناس في رمضان ..طيب الا يحق لنا أن نطلق على سرب نوابتا ونائباتنا ، انهم حمام مستأنس بموية السكر ، يعني وين حايركوا غير في قفص الحكومة ..مالهم وما شباك الشعب البجيب الهواء ..


#438255 [Bady]
0.00/5 (0 صوت)

07-28-2012 02:44 PM
نحن متخلفيييين "


ردود على Bady
United States [واحد تانى] 07-28-2012 06:53 PM
العلاج شنو ...........؟؟


#438239 [إسماعيل العباسي]
0.00/5 (0 صوت)

07-28-2012 02:30 PM
لقد انصهرت السلطة التشريعية في السلطة التنفيذية تماماً
ولطالما العداد رامي والامتيازات متدفقة لا مشكلة
فقط لا تمس السلطة التنفيذية مخصصاتهم وبدل سكوتهم فسيدوم الانصهار ولسان حالهم يقول حريقة في الشعب الفضل.... حقيقة والله أعمالهم وتصرفاتهم لا تليق بمسمى برلمان أو مجلس نواب ...إلخ فهم حاجة تانية - فصيل من السلطة التنفيذية
والله المستعان


#438233 [عبدالله]
0.00/5 (0 صوت)

07-28-2012 02:26 PM
أقترح على الأستاذ جبرا أن يكتب لنا عن السبب الذي دعا وزارة مالية جمهورية السودان أن تكون ضامنة في قـرض مالي حصل عليه مواطنون عاديون وليسوا جهة رسـمية أو حكومية وذلك للأسـتفادة منه في إقامة مشروع خاص بهم وأعني (آل المرحوم حسن أحمد البشير)؟؟؟ أرجو أن يتحفنا الأستاذ بمقال في هذا الصـدد ليضـحكنا قليلا على هذه المهازل وينفس عناالغـبن وشـكرا.


#438226 [عوض محمد احمد]
0.00/5 (0 صوت)

07-28-2012 02:20 PM
الاخ الفاتح رمضان كريم لك ولشعبنا المغلوب على امره - برلنا شنو انت الجايى تتكلم عليه ديل كل مهمتهم قبض رواتبهم اخر الشهر ويعنى شنو زيادة المحروقات او زيادة الكهرباء فهم غير الراتب لهم مصادر اخرى للدخل - اما شعبنا التائه فى بحر الزيادات فالمساله لم تكن مفاجئه عليه - والمتوقع وليس المستبعد ان تكون هنالك ضرائب على الاموات وتصدر المحليات لوائح ورسوم لصوان العزاء- وتزيد اسعره تصاعديا خاصة بعد زيادة اعداد الوفيات بسبب الجوع والمرض الذى تفشى ولا يستطيع المريض شراء الدواء. اما الساده نواب البرلمان فصاروا كانواب الالمان فى عهد هتلر يستمعون ويصفقون لخطابات الزعيم وربما يكون الزعيم يخطب وبعض النواب يغط فى نوم عميق- يصحى مع التصفيق والزعيم مغادرا-
مجلس بتاع شنو ياعم الفاتح لاتوجع راسك ، ديل جماعه لاتهمهم مصالح الشعب ولو كانت تهمهم ماكانت جاءت زيادات ولا عينوا شفع وشافعات وزراء ياعمى خليها على الله


#438204 [فقعو مرارتو]
0.00/5 (0 صوت)

07-28-2012 02:04 PM
ماهم اصلا ديكور ساكت بيقبضو بالملايين وكهربة مجانا ولو واحد راسو ماجه نافع بيرميهو بره الشارع ذي صاحبك ابو حنك بتاع القضارف!!!! وبعدين يجبره منو القاليك نحنه انتخبناهم!!! لو نحنه من الناس البتنتخب كان بقينه بس من النوع البينتحب بس ومشينا جم القبه ونزلنا عياط بس مش احنجاج عشان البمبان وكده!!! اما لو كنا انتخبناهم ايضا كان شلنا صاروخ او قنبله ورميناها علي البرلمان لتكون عبره لكل برلمانات العالم التي تجوع شعبها!!قال مابيرفض ولا بيوافق عايز يعرف السبب !!! الله لايكسبك يالترابي خليتم كلهم مخانييث !!!


#438191 [asd]
0.00/5 (0 صوت)

07-28-2012 01:55 PM
بسم الله الرحمن الرحيم ...
السلام عليكم ورحمة الله وبركاتو..استاذ الفاتح وجميع متابعى استاذ الفاتح لكم التحية
اما بعد..
زى ما قلتا ليك مسبقا يا استاذ الفاتح..الناس ديل بيتصرفو كداا عشان عندهم وهم وخيال معشعش فى راسهم بيقول ليهم انو البلد دى الله خلقا مخصوص عشانهم وان الشعب عبارة عن عبيد ليهم يامرنهم فيطيعون يفعلون ما يشاءون بالشعب والوطن واى شئ يقع داخل حدود السودان(اعادة الله علينا سالما غانما)من اجل بقاء وطول عمر ورفاهية ومتعة الكيزان وما يبنضوى تحتهم من اشخاص بالجد عبارة عن (قرادة)اعزكم الله يمصو فى دم الشعب السودانى الغلبان وستغلون جهل 75%من الشعب + النعرة العنصرية والقبلية والدينية..بهذة الاسباب هم يتحكمون بالشعب (ماسكين الشعب من لغليغو) ربنا يرينا الحق حقا وارزقنا اتباعة يا رب العاليمن...

ودمتم..


#438177 [ابو العازة]
0.00/5 (0 صوت)

07-28-2012 01:37 PM
تسلم اسناذ الفاتح/
لقدج عرفنا احمد ابراهيم الطاهر منذ ايام نميري والبيعة المليونية واختتم مهرجان كبواته في رسم خطة التآمر في انتخابات المحامين وتزويرها عام 1997م، ولم يكتفي ولن يكتفي الاّ اذا لم يجد له حيلة تبرر افعاله وافعال حزبه.
ربنا ما يحرمنا من ابداعاتك


#438168 [ود هارون]
0.00/5 (0 صوت)

07-28-2012 01:24 PM
استاذ جبرا هل تعتقد ان هناك برلمان انه تمومة جرتق لا سلطة له واعضاؤه يدركون ذلك وانه جئي بهم ولم ياتو بسبب شعبيتهم واكيد سوف ينفذون توجيهات من جاء يهم وحريقة في الشعب الذي لا يودي ولا بجيب عمرك يا استاذ سمعت ليك ببرلمان 99% من اعضائه من حزب واحديا اخوانا انسوا حاجة اسمها برلمان زي ما الحكومة ناسيةلانها تعلم حفيفته ولا تعطيه تقديرا ولو صوريا0


#438161 [إبن السودان البار ==--]
5.00/5 (3 صوت)

07-28-2012 01:17 PM
زمان كان النميري بشلت أعضاء البرلمان المارقين ! لأنه كان لاعب كورة وشوات ؟؟؟ أما اخوك البشير فالفياقرا ونسوانه الكتار ديل ضيعوا لياقته ورجوله ما شالينه وغالبه المشي عدل ؟؟؟ فحا يودي الخارج عن الملة بيت الأشباح ليتكفل بيه نافع ؟؟؟ وما أدراكما بيت الأشباح ؟؟؟ كله قلة أدب ؟؟؟ فخلي الناس تعيش وتحافظ علي شرفها وتشوف مصالحها ؟؟؟ البرلمانيين العظام معظمهم نايمين في الجلسة وما جابين خبر؟ ومتين الجلسة تنتهي ويجري الواحد منهم علي سوق الفواكه في نمرة 2 ويشتري ما لذ وطاب ويشحن اللأندكروزر المكندش وينطلق الي منزله العامر ويلبد جنب الحجة ويشوف أحوال عياله ؟؟؟ وسيبك من كلام الشيوعيين والعلمانيين ديل ( شعب ودستور وقانون وكلام فارغ ) وشوف مصلحتك وربي عيالك والناس ديل لو قبلوا عليك ! عينك ما تشوف الا النور في بيت الأشباح ؟؟؟ وأخبار حلم الأمام شنووووووو ؟


#438140 [ود البلد]
0.00/5 (0 صوت)

07-28-2012 12:58 PM
ود جبرة يا استاذ البرلمان زاتو حق منو ما حق اللاوطنيين


#438113 [ودالبلد الأصلى-كان أسمو السودان]
0.00/5 (0 صوت)

07-28-2012 12:37 PM
أهلنا زمان قالوا (أرجى سفيه، ما ترجى باطل!) وتعميمآ للفائدة نطلب من الأستاذ الفاتح التمسك بكلام جدودنا (زمان وصونا على الوطن ).وهؤلاء الذين تخاطبهم قد فقدوا حتى الأحساس بأن لديهم وطن.أرحمنا من نوعية رجائتك الما فى محلها .


#438112 [أبو عبد الله]
0.00/5 (0 صوت)

07-28-2012 12:37 PM
هل يوجد داعي لوجود مثل هذا البرلمان يخوانا سرحوهم واستفيدوا من رواتبهم ومخصصاتهم في دعم الوقود والكهرباء


ردود على أبو عبد الله
United States [حسين] 07-29-2012 01:51 PM
والاغرب !! مولانا رئيس هذا البرلمان قال حايتوسعوا فى المبانى العام القادم علشان عددهم 200+ موظف لكل نائب محترم.
أعتقد لا داعى لهذا البرلمان وليستفيدوا من رواتبهم ومخصصاتهم فى دعم السادة الوزراء ومدراء البنوك
وعوائلهم .


#438107 [Awadahmed]
0.00/5 (0 صوت)

07-28-2012 12:32 PM
أستاذالفاتح جبرة ده برل منهمان الهناء والسرور ديل ياجبرة برلمان الخج بترجى منه عمار ديل جايين يتكندشوا ويرطبوا من الناحيتين وكده قالواليهم أبصموا ببصموا مغمضين طالما فى دفع وأمتيازات وظروف مدكنلة وكده مالهم ومال التشرييع والأعتراض على القرارات الودتنا فى مليون داهية.شوف ياجبرة حلناالوحيدهوالثورة ثم الثورة ثم الثورة ونكنس كل هذا العفن والحساب ولد.


#438093 [ازرق اليمامة]
5.00/5 (2 صوت)

07-28-2012 12:17 PM
يا سيدي الفاضل
برلمان ... (ايه اللتنا جاي تاول عليه ) زي بي ما بقولو اخوانا في مصر الشقيقة
الحكومة شغالة بي المثل ( ليس ليس يطلع كويس )
وسبحان الله عمرو ما طلع كويس
غايتو.. انكربو... ساي ... الغريق قدام


#438078 [برلمانى سابق]
4.50/5 (2 صوت)

07-28-2012 11:59 AM
برلمان اس ابراهيم الطاهر وسامية احمد ده لا برلمان ولا حاجة ديل مجموعة عاطلين عن العمل بياخدوا مرتبات وحوافز وسيارات وهيبة لكن دون خدمة المواطن فى شيئ ، كان الله فى عون المواطن ، هذا الكلام ينطبق على المقولة
أقول للحرامى انا لست مستاءا لسرقتك لمنزلى ولكن ما هو المنطق الذى جعلك تفعل ذلك .


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة