قال أيه : بريد سريع
08-01-2012 10:52 AM


قال أيه : بريد سريع

الفاتح جبرا
[email protected]


الأستاذ الجليل : الفاتح جبرا
سلام عليكم ورحمة الله ورمضان كريم وكل سنه وانت بصحة وعافيه مرفق ليك رساله مني موجهة لما يسمى بالبريد السريع وما وجدته من معاناة في استلام طرد عبارة عن (كرتونه) وليس (كونتينر) كان من المفترض استلامه خلال 5 او 6 يوم بالكتييير من تاريخ إرساله والان 15 يوم ويمطوحوا فينا

إلى السادة البريد السريع
السلام عليكم ورحمة الله

اولا ارجو ان توقفوا اعلاناتكم في وسائل الاعلام المختلفه لانها تعطي فكره عن خدماتكم وسرعة ادائكم التي للأسف الشديد لا تنتمي للواقع نهائي كما ارجو ان تدربوا موظفات خدمات العملاء علي تقديم المعلومه الصحيحة بدلا عن الكذب واللف والدوران فقد عانيت الكثير منكم بسبب طردين مرسلين من الرياض تم ارسالهم في يوم 15 يوليو واكد لنا موظف البريد السعودي أننا سوف نستلمهما خلال 5 الي 6 يوم بالكتير وبعد مرور اسبوع اتصلنا علي (سودابوست) يقولوا لسه ما عندنا اي معلومه عنها لازم تعطونا رقم السفريه لكي نتاكد واتصلنا علي البريد السعودي واكد لينا انه الطرود وصلت من يوم 16 الي السودان ومشينا تاني وثالت لمقر الشركة بشارع الستين ابسط شي يسالك الموظف نحن اتصلنا عليك؟ اذا ما اتصلنا عليك ما تجي طيب؟ ويوم 28 اخيرا اتصلوا قالوا في طرد واحد وصل تعالوا استلموه وجيبوا قروش معاكم ولما سالنا عن التاني قالوا لسه في (الجمارك )جمارك شنو هو اصلوا كونتينر ولا كرتونه عشان تقعد في الجمارك اكتر من 10 يوم قلنا خلاص نستني يومين عشان نجي نستلم الطردين مع بعض بدلا من تكلفه مواصلات وزمن ، وفي يوم 30 يوليو مشينا لسيادتهم طلعنا لخدمات العملاء الموظفه قالت لينا الطردين جاهزين مفروض تكونوا استلمتوا واحد يوم 28 والتاني اليوم طيب. قلنا جميل مشينا للموظف في الكاونتر ولكن الساده في الكاونتر ببساطه يقولوا ليك ما في اي طرد وصل .. كيف يا ناس وانتوا قبل يومين قلتوا تعالوا استلموا واحد يعني لو كنا جينا بعد اتصالكم طوالي ما كان حا نلقي اي شي وتاني يوم وتالت يوم في الاخر يقولوا ليك الموظفه غلطانه اتصلت علي اساس انها استلمت اوراق الطرد بس ما اتاكدت انه وصل قدامها شنو .. يا ناس الاستهتار والاستخفاف علي الناس كاننا مابنفهم الاجراءات بتمشي كيف . وبعد حجه طويله معاهم قام موظف طلع ليهو لسته فيها اسماء اصحاب الطرود وفيها اسم من الطردين سلمه للمسئول وقال انهم بيتصلوا من الصباح علي مخازنهم في (جبره) عشان يجيبوا الطرود دي (بدون تعليق ) ولما قلنا عايزين نقابل المدير قالوا (مسافر) ده كلام ده يا ناس البريد السريع معقوله بس اسبوعين واعزاركم نحن ما لينا دخل فيها (شغل كتير) دي مشكلتكم ما عندكم (مخازن) تستوعب البضائع بروضو (مشكلتكم) نحن علينا نستلم في الوقت المحدد لاننا دفعنا اجرة بريد (ممتاز ومستعجل) والعجيب بعد ده كله تدفعونا مبالغ قال ايه خدمات بريديه شنو الخدمات القدمتوها لينا المفروض تدونا تعويض عن التاخير وتعويض اذا حصل أي تلف في الاشياء المرسله .
ياريت مشكلتي دي تجد الاهتمام منكم والحل الجزري للحاصل في مكاتبكم ..
مواطنة

تعليق :
هذه الرسالة وصلتني من إحدي القارئات (نحتفظ بالإسم والبيانات) نرجو أن يصلنا من ناس (البريد السريع) ما يبرر الحاصل ده .. وطبعا إحتمال كبير يصهينوا وما يهببوهو لينا زي ما جهات كتير بتعمل فيها رايحة !!

كسرة :
بتنا في الرسالة قالت مفروض يدوها تعويض على التأخير .. هو يا بتي مش بركة الكراتين الوصلت !.. قال أيه : بريد سريع !

كسرة ثابتة:
أخبار ملف خط هيثرو العند النائب العام شنو(ووو وو ووو) ؟ بقت 3-2-3


تعليقات 18 | إهداء 0 | زيارات 8136

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#444224 [والبلد]
0.00/5 (0 صوت)

08-06-2012 08:43 PM
بريدك يابريدى بريدك قال بريد والله يامؤمنين بالله اى حاجه ماشه فى البلد دى بالبركه ساااكت مافى رقيب ولاحسيب.


#443340 [وداليلد]
5.00/5 (1 صوت)

08-05-2012 01:42 PM
والله الاخت اشفت غليلى من الناس ديل لانى حصل معاى نفس المشكل وده كان ادويه وملابس للايتام وندمونى على فعل الخير نسال الله انوا يلقوا جزاهم بركه هذا الشهر الكريم شى جمارك وشى مخلص الله يخلصنا منكم يااارب بعد شهرين استلمت. هو شنو الماشى صااح فى البلد الفوضى دى.قال بريد سريع قال


#442787 [adooraq]
0.00/5 (0 صوت)

08-04-2012 02:25 PM
ياناس خوفتونا عديل كده نحن قلنا البلد بقى فيها بريد !!!!!!!!!!!!!!


#441701 [ادروب]
0.00/5 (0 صوت)

08-02-2012 04:24 PM
يا احباب انتوا تبالغوا خدمت مين وطين ومين وسريع مين البلد كلها ماشا مجاملات ومحسوبيات


وغيابات وفارقات ورواتب العاملين زي الزفت لان الكبار والمدراء رواتب عالية وبدون محاسبة


مخصصات ومعلاجات واشياء ما انزل الله بها من سلطان


بعدين داير المدير يهتم وهو عارف المال مجنب لجهتا ما لذا لك لايهمه الموظف حضر ولا غاب


انتا استلمت طردك ولا لا ما مهم لانك ماتفهم وتخدم في ناس حولوا الخدمة كلها للتجنيب


#441366 [karlos]
0.00/5 (0 صوت)

08-02-2012 07:48 AM
اوراق ثبوتية اصلية وصلت من الامارات فى 28 يوم لو كنت رسلت بالبريد العادى كانت تصل فى اسبوع؟؟؟؟؟؟ حتى البريد عنكم بقى يكذب سير سير يا البشير


#441353 [post]
0.00/5 (0 صوت)

08-02-2012 06:08 AM
تستاهل.... ما سمعت بي DHL...ARAMIX عشان الناس البتثق لسة في البريد و سودانير وباقي الخارم بارم المحلي.


ردود على post
United States [ودالبلد] 08-06-2012 08:49 PM
يا اخ بوست الدى اتش ال ده مش موجود فى السودان يعنى شغالين انت فايل فىيه انجليز والله المان ماهو قشرانيين وتعال بعدين والموظف المسئول لسه ماجاء انا شخصيا حصل لى ده ماترسل حاجه وباى طريقه مانافعه كووول المغتربين برسلوا مع بعض يعنى شيل لى واشيل ليك لحدى ربنا مايفرجه .


#441294 [mohy]
0.00/5 (0 صوت)

08-02-2012 02:11 AM
أستحلفك بالله ماسمعت بمجزرة نيالا؟ لوسمعت رأيك شنو ؟ لوخفت من حقك


#441208 [عبدالاله]
0.00/5 (0 صوت)

08-01-2012 11:28 PM
بريد شنو ؟؟؟؟؟؟؟؟؟ هههههههههههه


#441193 [د.أحمد]
0.00/5 (0 صوت)

08-01-2012 11:07 PM
الله يديك العافية استاذ الفاتح جبرة .. والله كتاباتك الساخره ده هي المديانا شوية صبر
أصلو أهلنا قالو : شــر البلية ما يضحك .. وأهم شيئ نحن مستنين أخبار خط هيثرو العند النائب العام
ان شاءالله ما يكون (نام)


ردود على د.أحمد
United States [mohy] 08-02-2012 02:12 AM
ودا ما القصد منها


#441170 [عبد الرحمن]
0.00/5 (0 صوت)

08-01-2012 10:12 PM
نحن أرسلنا كرتونة يوم 12 يوليو بالبريد العادي، و وصلت تاني يوم طوالي لتبدأ المطاولات من ناس البريد، و لم تسلم إلا يوم 31 يوليو الساعة العاشرة ليلاً، يعني بعد 19 يوم، و وصلت مفتوحة، و ادعوا أن ناس الجمارك هم اللي فتحوا الكرتونة، وهذا كلام مشكوك فيه لأن الجمارك يجب ألا تفتح الكرتونة إلا في وجود المستلم، و أمامه.


#441086 [واحد تانى]
3.50/5 (2 صوت)

08-01-2012 05:58 PM
ارسلت قبل سنة سماعة اذن لامراة فقيرة ولكن رفض البريد السودانى تسليمها السماعة الا بعد دفع جمارك عليها ....وبعد عدة ايام طلبت من البريد السعودى اعادة السماعة وبعد ذلك قمت بارسالها مع معتمر راجع للسودان ....


#441031 [ود عويضة]
0.00/5 (0 صوت)

08-01-2012 04:11 PM
شكا لى رجل كبير جلس في الغربة اكثر من (30) سنة في السعودية وكان من اشد المناصير لنظام الانقاذ - وطلب تاشيرة خروج نهائي ثم شحن شنطة ملابسه القديمة بالبريد السعودي السريع ودفع ثمن الوزن بالكامل للسعوديين - وهو سعيد بالعودة وعندما وصل الخرطوم ليستلم هذه الملابس قالوا ليه لابد ان تدفع (50) جنيه - وقبلها ارسل طردين لاولاده طلبوا منهم (330) جنيه ساعتها ادرك ان (سودابوست) واحدة من مؤسسات التجنيب - التي يذهب تحصيلها لاحد افراد العصابة الحاكمة
فالبريد في السودان مهمته التسليم ليس الا - اما ناس الضرائب ديل شحادين شغلهم كلو كجم x كجم


#440955 [omer]
5.00/5 (2 صوت)

08-01-2012 02:15 PM
بريد السودان الكحيان
لسان حال الدكتور مدير بريد السودان وهو يجوس خلال المكاتب :" أليس لي بريد السودان؟؟ وتحت يدي كل طرود رمضان"
موظفو العلاقات العامة دائما على لسانهم السؤال " اتصلنا عليك؟؟؟ لو ما اتصلنا عليك ما تجي " وهذه ترجمتها يعني ما تورينا وشك""!!!
واصبح القاصي و الداني يعلم ان الطرود توجد في جبرة و الإمبراطورية في شارع الستين وعلى المواطن أن يساسق بينهما ليجد من يساعده في البحث عن طرده الضائع بين طرود الذي يقال عنه إنه "البريد السريع"،
وسيناريو العمل كما يبدو:
علوية ما جات الشغل لأنو الترحيل فاتها اليوم و المواصلات صعبة
عوض الله سافر للجزيرة للبلد لأنو جدو تعبان في المستشفى
و الود صابر أهو شغال براهو زي ما شايفين
لأنو عم محمد أحمد البرفع الطرود الليلة غائب
وبعدين الشغل كتير و علينا ضغط عمل
نعمل ليكم شنو؟؟؟
و القال ليكم رسلوا طرود منو؟؟
كان ترسلوها من بدري يعني لازم في الوقت دا؟؟؟؟


#440949 [عوض محمد احمد]
0.00/5 (0 صوت)

08-01-2012 02:00 PM
اخى الفاتح كل عام وانتم بخير ورمضان كريم ونسال الله عز وجل ان يكون العام القادم افضل حالا من العام الكبيس الحالى - اتمنى وصادقا ان يتذكر الفادنى ويرجع الخمسين الف دولار وناس الاقطان يرجعوا المبالغ اللهفوها وناس والحج والاوقاف والعمره يرجعوا المبالغ اللهفوها ويتذكر من نهبوا وحولوا ارصدتهم للخارج وبنوها عمارات وفلل بالنهب انهم غدا سيرقدون فى قبر مساحته اقل من سرير خدامه مظلم وسيسالون من اين لكم هذا وفى هذه الحاله ان فقه الستره سيكون معلقا وليس مفعلا - ليتهم يتذكرون ان غالبية الاموال التى نهبوها فان اصحابها يعانون الجوع والمرض وغلاء ياكل الاخضر واليابس - هذا اذا كان هنالك بقيه من اخضر.
قرات بالامس ان محكمه ايرانيه حكمت بالاعدام على مسئولين اختلسوا اموالا من الدوله وطبعا العدد ده اقل بكثير من العدد المستهدف - فخطر بخاطرى خاطر اذا طبقت هذه المحاكم عندنا ويكون حكمها بالاعدام على كل من نهب واختلس اموال الشعب المغلوب على امره . هل تفتكر انه سيكون لدينا مسئول عائش من اعلى مستوى الى ادنى مسئول ا؟؟؟ طبعا لا وسيزيد الطلب على حفارى القبور - لكن المؤكد انه لن تكون هنالك محاكم ولا محاكمات ولا يحزنون - اذا كان فى محاكمات بالنهب والاختلاس المصلح كان واحد مستشار لقف مالقف ومافى زول قال ليه تلت التلاته كم - واخونا وزير العدل حول مكتبه ليكون قريبا من قضايا المختلسين والنهابين ماهى الخلاصه هل طلع بى شى طبعا لالالالا - اخوتنا صاحبة الطردين اقوليك ربنا يخلف عليك - المساله بسيطه اخونا الدكتور اتلهف منو برادو ولا حس لاخبر واتلهف خط هيثرو وعرفوا الحراميه حصل شنو ولا حاجه طالما ان فقه الستره مفعل - لك الله ياوطنى ونساله عز وجل ان يكون فى عون شعبنا المغلوب على امره


#440894 [خالد فارس]
3.00/5 (1 صوت)

08-01-2012 12:41 PM
الاخت الكريمة طرودك جات في وقت غير مناسب لانهم كانوا مشغولين بالكراتين الخفية اقصد الكميرا الخفية وهم راعيين للكميرا الخفية في رمضان ومافاضيين لكراتين حاجات رمضان وانتو خلوهاكده وكل تاخيره وفيهاخيره بتنفعكم في عيد الاضحي (قال بريد سريع قال)0


#440885 [6 شهـور لفتح حساب من 8 أرقام]
0.00/5 (0 صوت)

08-01-2012 12:31 PM
رسالة أيضا إلى الاستاذ جبرا
وإلى رواد الراكوبة

فتح حساب في 6 شهور

الموضوع/ بيروغراطية فتح حساب في بنك الخرطوم- قسم السفارة السعودية الرياض

مدخل أول:
في وقت وزمن الدولة تحتاج فيه لاي نوع من انواع العملة الصعبة ( دولار ريال شيك سياحي حتى ) والمفترض تفتح عده افرع لها في معظم الدول التي توجد فيه كثافة عالية من المغتربين علشان في لمحة بصر وجزء من الثانية ( فراكشن) يصل ابو صلعـة لخزينة البنك ولا ازمة ولا شح في العملة الصعبة ، لكن تعودنا على شغل ( المحركة والبيروغراطية)..

مدخل ثاني:
قصتي اتوجهت للسفارة وكان عندي احدى إجراءاتها إياها وللتعترني عيني وقعت على شباك ( زجاجي ) ويظهر بالداخل موظفين واحد فيهم التلفون ملصق في (أضانه) الظاهر لما عملته المغتربين كلها ( شغل نضيف وتفاني في العمل ) بختك يا( بنك الخرتوم) ما يحتاج اعلانات مدفوعة في التلفزيون لانه الشغل تمام ماشي ... المهم فضولا مني ( ابحثوا عن فضولي ) اقصد ابحث عن فرصة لفتح حساب لاحدى البنوك و (بنك الخرتوم) هدا قريب مني سالت وشرحوا لي الطريقة وكنت جاهز في الحال مليت الفورمة ما خليت كبيرة وصغيره عني وعن الشارع البقعد فيه وتلفون اقرب الاقربين ما اديتهم فرصة رجعت الفورة وقال لي ح نرسل ليك رسالة ....... اسبوع اسبوعين شهر ما جات الرسالة ،،، اتصلت اسئلة تعارف من البداية كم كان صندوق البريد واسم المنطقة شنو .. قلت ليه قبل شهر كلها ثمانيه ارقام ما تاخد دقائق ، قال في ناس 3 شهور ولس ما اعطيناهم رقم حسابهم .. احبطت وقبل ما اعذب نفسي انتظرت وكملت 3 شهور بالتمام والكمال والهلال تلو الهلال 90 يوم وقلت كدي نجرب اتصل تااااااااااااااني رجع لنفس الاسئلة الاولى صندوق بريدك و اقرب فرع ليكم ......
المهم حس شوية كدا الموظف بعد شهر اداني الرقم يعني 120 يوم وبرضو البلد في امس الحاجة للريالات اللي معاي ومع غيري ..

قلت ليه البطاقة علشان ابدا اتعامل بيها قال :" لازم تودع مبلغ من المال على تنشط الحساب .. قبل ان يرتد إليه طرفه اودعت مبلغ من المال .... قال خلاص كم يوم والبطاقة تجي من الخرطوم
ويم ورا يوم مرت الايام واصبحت شهور من تاريخ تقديم للطلب إلى الان 6 أشهر وما استلمت بطاقة الصراف الآلي ,,,,,, في حين أنه قدمت لفتح حساب في احدى البنوك السعودية ارفقت الاوراق المطلوبة وكام قالو لي نديك بطاقة ( فيزا كارد) وفيها ضعف راتبي قادر الله واحدين يطلبو منك تودع قروش وما تستلمها ،،، واحدين يدوك بطاقتين واحده فيها ( مجيهة بي قريشاتها جاهزة ) استلمت واحده في نفس الوقت والتانية جات بعد اسبوع عبر البريد ....

تقول لي 6 شهور وما تستلم ليك بطاقة من بنك الخرطوم ..

طيب وقت كسالى كدا ليه فاتحين فرع في السفارة ...

عارفك عزيزي القارئ ح تقول لي انت ذاتك غلطان مالك ومالهم تفتح حساب خليهم ينزنقوا وما يشمو مننا هللة ...

اقول: عندي امل قريب يغوروا مننا ويبقى تعاملي مع حسابي عاجل وآجل .

لكن بنك الخرطوم بالغ معانا وشذ أفقيا .. ولا شكلة ما محتاج للريال في الوقت الراهن .


#440836 [صبر ايوب]
0.00/5 (0 صوت)

08-01-2012 11:28 AM
اسم الدلع البريد السريع السم الصلى السلحفائى
يااخونا لو انت عارف عن خط هيثرو بلعوا منو ورينا
زمان عتمان ميرغنى كان عارف حاجات عمل نايم الطاهر ساتى وكمان عادل الباز يعنى ياجبرة انت ساكى الموضوع عايز هبرة وبعدين تعمل نايم اتعودنا على الاقلام الماجورة وعاش الميكافيلى ترلللى ترلللى ترللللللللللللللللللللللللللللى


#440824 [هشام]
4.00/5 (1 صوت)

08-01-2012 11:04 AM
بتَّنا شقية الوقعت بين البريد السعودي و البريد السودني س .. اسواء بريدين في العالم كلو كلو كلو


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة