عندما يتأخر المرتب
08-08-2012 10:41 AM


عندما يتأخر المرتب

الفاح جبرا
[email protected]

المرتب أو الماهية طالها التدهور ونقصت خلال الشهور الماضية (النص بالنص) يعني الزول الكان بيصرف ألف جنيه (مليون بالقديم) مرتبو أصبح 500 جنيه وده يا جماعة لأنو الأسعار زادت بنسبة مية في المية (أو كمان أكتر في بعض السلع) وذلك نسبة لتدهور السعر الموازي للجنيه السوداني أمام السعر (المزازي) للين الياباني أمام السعر (التركوازي) للدولار الأمريكاني ..
وإنخفاض قيمة الجنيه خلت الناس يا جماعة بقت مزنوقة شديد والمرتب الكان بيخلص يوم خمسة في الشهر هسه بعد الزيادات دي بقي يخلص قبل ما تستلمو لأنو بيكون (في أحسن الحالات) كلو عبارة عن ديون وإلتزامات يستوي في ذلك الزول المرتبو 500 جنية أو الزول المرتبو 5000 جنيه .. لكن مع هذا الرهق تعالو نقرأ بل نشاهد ماذا يمكن أن يفعلة هذا المرتب (بى تفاهتو) لو إتأخر شوية يعني فات يوم 8 في الشهر .. طبعاً لو كنتا عندك (سنام) تاكل منو مفيش مشكلة لكن المشكلة تكون من الجماعة (أبو من غير سنام ) .. يعني الرزق اليوم باليوم !
• قبل أن تخرج من المنزل تبدأ في رسم خارطة طريق لتكتشف أن هنالك شارع واحد (آمن) هو الشارع الذى توجد فيه (الجزارة) وذلك بعد أن قفلت حسابك مع الجزار واصبحت إنت والأولاد (نباتيين) رغم أن للثروة الحيوانية وزارة ووزير وشنو ما بعرف !
• تبدأ في ترديد الإسطوانة الثابتة التي سمعها البقال والخضرجي وبتاع اللبن وسيد البيت لسنوات طويلة :
- والله يا جماعة لحدت هسه ما صرفوا لينا
- والله أول ما أصرف أجيب ليكم القروش
- يا جماعة لو صرفنا مش كنتا جيتكم؟

• عندما يتأخر المرتب تكون حبوب الضغط خلصت وإنتهت فتبدأ في تناول البدائل العشبية التي من المفترض أن تخفض من ضغط الدم ، شئ (قرفة) شئ (كركدي) وشئ شنو ما بعرف إلا أنها تفشل تماماً في تخفيض الضغط العالي لأنو (الفلس) ما معاهو كلام !
• كما تنتهى حبوب السكري (وسكر السكرين) فتبدأ في شراب الشاي بالسكر العادي (إذا توفر) وإذا لم يتوفر فما عليك إلا شراب الشاي مسيخ والدعاء بأن يحفظ الله أمنا الحكومة التي لا زالت تجتهد في أن تجعل حياتنا ماسخة أكتر من موية (الترمس) !
• تبدأ في ترشيد (الترشيد) الكهربائي الكنتا عاملو في البيت (حتي لا تحرم من الكهرباء وكده) فتقوم بإستخدام لمبه 50 شمعه لقراءة العناوين الرئيسية عندما تقرأ الصحف مساء ثم تطفيها وتولع أخري ذات 100 شمعة لقراءة التفاصيل .
• تبدأ في التعامل مع الفكة الحديد بكثرة .. زيت بي جنيه ونص .. فول بجنيهين ونص (طبعن لازم تشتري بالكاش لأنك زائغ من سيد البقالة)!
• تقوم بركن العربية (لو عندك عربية) وتبدأ في ركوب الحافلات لتكتشف أن هنالك شئ أسمو (كرسي النص) وما أدراك ما كرسي النص ينزل راكب من الكنبة الأخيرة الحافلة كوووولها تنزل !
• تزوغ من حضور المناسبات الفيها (كشف) حتى لا ينكشف حالك المكشوف أصلاً.
• تتنامى وتزدهر لديك ملكة (فن الإقناع) : يا أولاد والله الكسرة بالموية والشطة وزيت السمسم دي أحسن منها مافي ولذيذة وصحية وبتنهضم بسهولة ! وعندما يتم الإقناع وتبدأ في خطوات التنفيذ تجد إنو (4 طماطميات بعشرة ألف) غير الكسرة ذاااتا والبصل والزيت (لو فضل فينا زيت) !
• تتوقف عن شراء اللبن بعد أن (يفطك) سيد اللبن فتبدأ في إقناع أولادك بأن هذه الأيام ينتشر فيروس (جنون اللبن) ولازم ناخد هدنة منو لحدت ما (المرتب) أقصد الفيروس يمشى !
• تتوقف عن إستخدام (مكوة الكهرباء) لكي الملابس وتلجأ (للفحم) لتكتشف أن (الفحم) لا يقل سواداً عن الكهرباء !
• تبدأ في (قرص) السيجارة إذا كنت من المدخنين لإعادة إستخدامها أكثر من مرة مما يجعل نسبة التدخين لديك تنخفض وهنا تتجلى الحكمة وراء المثل الذي يقول (رب ضارة نافعة) !
• عندما يتأخر مرتبك تنخفض لديك الرغبة في الإستماع إلي الموسيقى والغناء (مع الفلس ده المستمع ليها شنو)

كسرة :

عندما يتأخر مرتبك تبتسم عندما يتقدم نحوك متسول طالباً (حاجة لله) لأنك محتاج لنفس (الحاجة) لكن بس هو ما عارف سااااكت !!


كسرة ثابتة :
أخبار ملف خط هيثرو العند النائب العام شنو(ووو وو ووو)؟


تعليقات 12 | إهداء 1 | زيارات 5387

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#445779 [ابو الكجمجم]
5.00/5 (1 صوت)

08-09-2012 01:47 PM
ا. اس..است...استا....استاذ.....جبرا
أنت ذاتك من اساسو رهيب وكده متعنا بكتابتك ياظريف


#445672 [ام الحسن]
0.00/5 (0 صوت)

08-09-2012 10:38 AM
رمضان كريم يا استااااذ


#445460 [عبدالاله]
0.00/5 (0 صوت)

08-08-2012 11:30 PM
المرتب مرتب المنشار ( الطيب بتاع الاوقاف ) المؤتمن على اموال المساكين ولا بلاش - وليت المنشار يقرأ مقالك هذا ليعرف كيف هى الرواتب - مش 60 بره و40 جوه ومع هذا معاها كوميشنات وعفن اخر ؟؟؟؟؟؟؟؟؟؟؟؟؟


#445410 [هجم النمر]
4.00/5 (1 صوت)

08-08-2012 09:49 PM
ما تقول يا أستاذ ده حالك إنت براك والله الشعب السوداني الفضل كولو زيك كده (طبعا إلا الجماعة) .. مقال رائع كالعادة شكراً ليك


#445281 [jinja]
0.00/5 (0 صوت)

08-08-2012 04:57 PM
الله يجازي محنك يا دكتور.. تشخيص دقيق لمحنة شعبنا المغلوب علي أمره , وما خليت للجماعة صفحة يرقدوا عليها .. أديهم الله ياخدهم أكان شربوا دمناولسه كايسين الزيادة..بس سؤال برئ يا دكتور: انت الجماعة ديل ما بعتقلوك لايه رغم انه كلامك ما أقل من المظاهرات المدوخاهم دي؟


#445217 [أقداوي]
0.00/5 (0 صوت)

08-08-2012 03:35 PM
ملف هيثرو قرب يكمل السنة الدراسية..
نشوفك بتنجح ولا تسقط في امتحان نهاية السنة..


#445204 [gameel]
0.00/5 (0 صوت)

08-08-2012 03:21 PM
دا ماتخيض الصرف القالت عليهو الحكومة ذاتو ياجبرا

كسرة ثابتة:

إخبار تخفيص الصرف الحكومي شنو(وووووووووووووووو)؟


#445163 [علي]
0.00/5 (0 صوت)

08-08-2012 02:37 PM
مقال في منتهى الحلاوة والواقعية ونرجو المزيد من الكتابة في مثل هذه الأمور وخلينا ياجبرا من قصـص فساد نظام الكيزان التي لاتحصى ولاتعد واتركها لكتاب آخرين جردوا أنفسهم للتصدي لها وتحمل العواقب في سبيلها.. النظام يتاجر في كل شئ والدين عنده بضاعة جعل لها موظفين مثل معتصم البشير والكاروري غشيتهم اللعنة وغيرهم كثير من أصحاب اللحى التي ليتها كانت حشيشا أما خط هيثرو فجريمة بسيطة إذا قيست بغيرها من الجرائم والسرقات المرتكبة في حق الوطن والمواطن والتي ليس بإمكانك ياجبرا التعرض لها لامن قريب ولامن بعيد وأنت كاتب مقبول عند القراء ولا أحد يطالبك بمظهر غير مظهرك الحقيقي المعروف.


#445111 [حليم-براغ]
0.00/5 (0 صوت)

08-08-2012 01:32 PM
الأستاذ جبرا تقبل تحياتي ورمضان كريم..
إنت لا سمعت ولا قريت محاضرة النائب الأول لرئيس البلاد الإسموه علي عثمان في مسجد كادوقلي للغلابة والمساكين .. بأن كل هذا الذي يحصل في السودان من تدهور في الإقتصادالسوداني وإنخفاض سعر الجنية السوداني مقابل الدولار وأرتفاع أسعار السلع الضرورية وعدم توفر الأدوية وأرتفاع أسعارها إذا وجدت ..كل هذه المشاكل أأرجعها لله سبحانة وتعالي لأنو ربنا عاوز كدي عشان كدي الناس لأزم تصبر علي إرادة الله سبحانة وتعالي ..غير كدي بتبقي خائن وعدو وطن ودين.. والكسرة بالبصل وزيت السمسم أحسن وصحية أكتر من البيفتيك والبلطي..ربنا يديك الصحة وطولت العمر..


#445070 [huwidah]
5.00/5 (4 صوت)

08-08-2012 12:43 PM
استاذ...استاذ....استاذ.... والناس اللي ما عندها مرتب من اساسو !!!!!!!!!!!!!!!!!!!


#445067 [بدر النهار]
0.00/5 (0 صوت)

08-08-2012 12:37 PM
ياود جبرا ياخي ماجننتنا بخط هيثرو ده العند النائب العام ياخي شيليك علبة حلاوة ماكنتوش اصلية لانو التقليد مابيكلو ناس المصراين البيض ديل وامش بيه للنائب العام بس ياكل الحلاوة ويقول ليك الحصل شنو يعني خط هيثرو ده أغلي من مدحت عبد القادر ياخي ماتروق المنقة وما تغلل الزول ده ماسمعت بفقه السترة ولاشنو.



كسرة : بعد مابقي من الحركة الإسلامية ومن المؤتمر الما وطني بقي من أصحاب المصراين البيض ولله درك ياوطن .


#445063 [إحباط]
0.00/5 (0 صوت)

08-08-2012 12:28 PM
انت بقيت اكعب من عصام إحباط

الله يكون في عون الناس الماعندها زول مغترب هميم

السودان ده كله في عهد الانقاذ عائش بالمغتربين

والله تشوف برنامج في قناة الشروق قبل الافطار وحالة الناس المستضيفنهم تموت بالحسرة والألم


الفاح جبرا
الفاح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة