المرارة قنعنا منها
08-27-2012 10:15 AM

المرارة قنعنا منها

الفاتح جبرا
[email protected]

لأن العبد لله مصاب بالقلب فهو لا يشاهد محطاتنا المحلية .. غير أنه وجد نفسه أول أمس مشاهداً لحلقة من حلقات برنامج (حتى تكتمل الصورة) الذي يقدمه الأخ الطاهر حسن التوم والتي إستضاف فيها الباشمهندس محمد عبد العزيز مدير هيئة الطيران المدني وقد كان موضوع الحلقة عن حوادث السقوط المتكررة للطائرات السودانية والطائرة التي سقطت مؤخراً بمدينة تلودي على وجه الخصوص .
أكثر ما لفت إنتباهي في الحلقة هو محاولة الأخ الباشمهندس محمد عبدالعزيز إقناع المشاهدين بإنو الأمور عال العال وإنو (وقيع الطيارات) ده حاجة عادية بتحدث في (أرقى الدول) وقد إستخدم (الباشمهندس) في ذلك شاهدين ، الشاهد الأول إحصائية قامت بها مواقع متخصصة (كما قال) هذه الإحصائية تشمل الفترة الزمنية من 1945م وحتى الآن (2012م) – يعني خلال الـ 67 عاماً الماضية - تقول الإحصائية أن هنالك 25 دولة تعتبر الأسواء في حوادث الطيران في الفترة المشار إليها (طبعن نحنا ما فيهم) هذه الدول حصل فيها 2600 حادث بمتوسط 100 حادث لكل دولة ، وبلغ عدد الضحايا 48062 تقريباً بمتوسط 1000 ضحية لكل دولة .
طيب ونحنا حوادثنا كم؟ وضحايانا كم خلال نفس الفترة؟ هنا يفيدنا الباشمهندس بانه حوادثنا في الفترة موضوع الإحصائية هي 33 حادث (مقارنة بـ 100 حادث للدول الأسوأ) وأن ضحايانا 258 ضحية (مقارنة بـ 1000 ضحية في الدول الأسوأ) !!
ويختتم الباشمهندس حديثه بالنتيجة (العجيبة) قائلاً (من هذه الإحصائية يتضح بأننا لسنا الأسوأ) !!
قد يسألني سائل : وأين العجب في الكلام ده .. والإجابه ما عايزه ليها أي (فهم) فهذه الإحصائية التى أوردها الباشمهندس قد أغفلت تماما أهم عنصر وهو (الحركة الجوية) والتي تتمثل في عدد الطائرات ومقدار المسافات التى قطعتها (ونحن أقل البلدان إمتلاكاً للطائرات) .. يعنى مثلاً لو أن بلداً (خلال الفترة المشار إليها) خدمت لديه 500 طائرة وقطعت ( مليار ميل) مثلاً وكانت عدد الحوادث التي تعرضت لها طائراته 100 حادث لا يمكن بالطبع أن تقارنه ببلد خدمت لديه 50 طأئرة قطعت جميعها خلال الفترة المعنية (مية مليون ميل) مثلاً ؟
وعشان الناس الما بتحب الحساب نقول إفترض دولة عندها طيارتين بس ودولة عندها عشرة طيارات (خليكم من المسافة) فلا يمكن أن نقول بان الدولة أم طياراتين (ووقعت منهم واحدة) أحسن من الدولة أم عشرة طيارات لأنو ام عشرة طيارات دي وقعت ليها طياراتين !! وهذا ما أراد الباشمهندس أن يقنع به المشاهدين ، ومش كده وبس فالباشمهندس أورد شاهداً آخر أراد أن يقنع المشاهدين به وهو (لدهشتي) أن حوادث (طيراننا) أقل كثيراً من حوادث (الطرق) لدينا !! (شفتو كيف؟) حيث قال بالنص مخاطباً مقدم البرنامج والمشاهدين (قارن بين ضحايا حوادث الطيران وبين ضحايا حوادث الطرق، نحنا في السبعة سنوات الماضية عدد الحوادث بتاعت الطيران عندنا حوالي 9 حوادث ضحاياها 72 مقارنة بحوادث السير والمرور اللي هيا في الربع الأول فقط من 2012م حسب الإحصائيات بتاعت الطرق والمرور 378 حالة وفاة و 1082 إصابة !!)
بعد أن إستمعت لهذه المقارنة التي عقدها الباشمهندس طفقت أشحذ ذهني.. وأسأل نفسي (وقربتا أركب الفهامة) تري ما هو وجه الشبه لهذه المقارنة التي قام بها الباشمهندس ؟ دى طيارات ودي عربات .. دي (ميه) طيارة بالكتير ودي (كم مليون عربية) .. الطيارات بتقطع (بضع آلاف) من الكيلومترات يومياً والعربات بتقطع (ملايين) الكيلومترات يومياً ، الطيارات (بتطير) في السماء والعربات (بتمشي) بالواطا !! غايتو الإحتمال الوحيد إنو وجه الشبه يكون إنو الطيارات بتلاقيها (مطبات هوائية) والعربات بتلاقيها (حفر) و(مطبات إصطناعية) !

كسرة :
يا مثبت العقول ثبت عقولنا ... (المرارة قنعنا منها ) !

كسرة ثابتة :
أخبار ملف خط هيثرو العند النائب العام شنو(ووو وو ووو)؟



تعليقات 38 | إهداء 0 | زيارات 6322

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#456142 [عبدالاله]
0.00/5 (0 صوت)

08-28-2012 11:24 PM
ملف هيثرو اسأل منه مهندسك بتاع المقارنات ده والذى اتضح انه اصلا لا علاقة له بالطيران لا من قريب ولا من بعيد ( لكنه قدرنا ) ده المفروض يعلقوه من لسانه فى وسط السوق العربى ويستدعوا قدو قدو الجلاد ويجلده حتى الموت - مستهتر 32 ميت بهذه البساطة هل نسيت يوما عبوسا قمطريرا - فهو المسئول فى الدنيا والاخرة عن هذه الارواح التى ازهقت - انه القتل العمد ؟؟؟؟؟؟؟


#455927 [محمد]
0.00/5 (0 صوت)

08-28-2012 04:52 PM
إتو القال ليكم في طيارة وقعت منو؟؟؟؟!!!!


#455879 [كرجو]
0.00/5 (0 صوت)

08-28-2012 03:42 PM
عزيزي جبرا...جبر الله كسركم و كسرتكم و وكسرتكم(الفتحه على الراء). مفروض يسموها هيئة الانتحار المدني. الباشمهندس ده برضو عشان يكون شفاف كن يجيب احصاءات ضحايا ركوب الحمير، ما هي برضو وسيله مواصلات.. قال سلامه جويه قال .. قوم لف بلاء يخمك . و الله مره الطياره نزلت بينا الخرطوم حوالي الساعه الثالثه صباحا، مشينا صالة الوصول الحاليه دي ليقنا الباب مقفول و رب الكعيه ، دقينا الباب بعد مسسسسسسسسسسسسسسسسافه فتح الباب واحد يدعك في عيونو من النوم وقال لينا بالحرف الواحد(ايوه يا .؟. جايين من وين يا؟) قاتل الله الخطل.....

ثم تانيا يا جبرا من محاسن الانقاذ ان عمليات المراره قلت الي مستويات قياسيه لانو كوول السودانيون مرارتهم فقعت من زمان ....قال كلكال الدفافره قال!!!!!


#455862 [سودانى حر]
0.00/5 (0 صوت)

08-28-2012 03:22 PM
أنا ركبت الفهامة و عرفت الحاصل شنو!!!!!!!!!! أنو خلال الفترة 1945 - 1965 كانت حوادث الطيران عندنا تساوى صفر و نحن محسودين فى انقاذناعشان كدى ناس جينس ما سجلونا

نحن يا جبرة قنعنا منهن الثلاثة العقل و القلب و المرارة و البقية تأتى الى أن يأخذ الله الإنقاذ و من عليها.


#455818 [بادى]
0.00/5 (0 صوت)

08-28-2012 02:26 PM
صدقني الملف ده لو كان عندي كان اديتك ليهو, لكن العندو الملف ده عند زول ما بحس و لا بشعر. العندو الملف ده منوووووووو! الظاهر انو ما عند النائب!


#455644 [عبدالعظيم]
3.00/5 (1 صوت)

08-28-2012 11:27 AM
زمااان الناس العايزين ينتحروا بركبو الكبارى وتلب جوه المويه والآن بقوا يمشو المطار ويركبو الأنتينوف - فسح وموته.
سلامة المراره وأم فتفت يا رائع


#455633 [هندسة]
5.00/5 (1 صوت)

08-28-2012 11:13 AM
الحمدولله تبقى القليل من الطائرات ...


#455561 [Ah.Salah]
0.00/5 (0 صوت)

08-28-2012 09:37 AM
حقيقه قمة العبط والهبل ان يتناسى زكر هذه الدول - التي اقحمها اقحاما ليدلل على سمو مكانة الطيران المدني السوداني ويمنحه صك البراءه - وهي تشمل جميع الدول الصناعيه الكبرى باستثناء اليابان (الولايات المتحده- روسيا- كندا- المملكه المتحده- فرنسا- ايطاليا - اسبانيا - استراليا - المانيا)
http://aviation-safety.net/statistics/geographical/worst_geo_loc.php

يعني بالعربي الفصيح نحن احسن من الدول دي كلها في مجال السلامه الجويه

والله دا موش لوى عنق الحقيقه , دا نحر عنقها واكل كبدتها زاتو

وسلامة مرارتك يا استاذ جبرا

ودمتم


#455515 [الله أكبر على الظالم]
0.00/5 (0 صوت)

08-28-2012 07:44 AM
والله معاك حق تقنع من المرارة الزول دا أصلا ما عندو اى علاقة بالطيران والطيارات والمطارات غير انه كوز وبس وكلامو كلو عبارة عن زر الرماد في العيون وناس الجبهة ديل لما يواجهوهن ناس الطاهر وايمان بركية (المذيعين الفذين الغيورين على مصلحة البلد) بحاولوا يتملصوا من المسئولية ليس الا الله يصبرنا على بلوتنا بس ... هذا زمانك يا مهازل فأمرحى قد عد كلب الصيد في الفرسان ههههه


#455382 [ابو سهير]
5.00/5 (1 صوت)

08-27-2012 11:23 PM
عشان احافظ علي المرارة و انا راجل كبير و عندي طلبة في الجامعات - مسحت قنوات السودان من برمجة الرسيفر و يقيت اشاهد قناة ( ناشونال جوقريفي ابو ظبي ) و حاجات تاني خفيفة خفيفة .


#455375 [النعيم]
0.00/5 (0 صوت)

08-27-2012 11:11 PM
يا جماعة عاوز واحد تفتيحة يعمل احصائية يورينا عدد حوادث الطيارات المدنية الوقعت في الفترة من 1956 الي 1988 و كم عدد الضحايا ؟ -- وفي الفترة من 1989 الي 2012 كم طيارة وقعت وكم عدد الضحايا ؟ يمكن الكيزان يطلعوا براءة .


#455332 [khalid ahmed]
0.00/5 (0 صوت)

08-27-2012 09:40 PM
مرة كنت مسافر إجازة وكالعادة تأخرت السودانية ، ولما وصلت وركب الركاب إتضح إنها مأجرة من جزر القمرلأن ورقة خارطة مخارج الطوارئ مكتوب عليها جزر القمر، فكتبت فيها هذه الأبيات المتواضعة:-
ناقلنا الوطني (3)
مأجرة من جزر القمر؟
ما مكن أظنها!! عارية
ما هم حبايبنا ، ورحلاتهم
شوية عشــان كدة
أدونا طيارة سلفية
أمرك عجيب يا ناقلنا الوطني
حيرتنا معاك تأخيرك،،
وقبلنابو ،، ويانا معاك،
بس بترولنا وطلع!!لمتين
نسافر بطريقة إيجارية
عايزنك تدق ســــدرك
وتقول أن أخوكم يالنيلين
حرّم تسافروا معاي
سودانية مية الميـــة
وتاني ما بتأخر في الزمن
واسبب ليكم بهدلة
ومعاها أذيــــــة
وفي المطارات الكبيرة
أنزل في الميعاد
وأبقى بأحسن شخصية
تتفاخروا بي تمام
وتكون دي أحسن سفريـــة
ولكن أعتقد كما جاء في بعض مقالات الأستاذ إسحق فضل الله إنه بعد يوم 15-11-2012 لا طيارة من برة بتنزل في السودان ولا طيارة سودانية بيسمحوا ليها بالنزول في73 من مطارات أوربا؟؟؟لأسباب يظهر فيها التقصير الشديد. وآخر الكلام أستأذن الأستاذ جبرا وأستلف الكسرة الثابتة :-- أخبار خط هيثروا شنووو وو ووو؟؟؟؟ وكمان أزيد عليها أخبار خطوطنا البحرية والسفن السودانية الما معروف مشت وين شنوووووووووووووووووووووو؟؟؟ لكن يا أستاذ جبرا إنت معاي إنه الكسرة الثابتة دي ما ليها لزوم تاني !!وللا رأيك شنو؟


#455318 [zoal min alnas]
5.00/5 (1 صوت)

08-27-2012 09:26 PM
ها ها ها ها ها ها
لو منك يا جبرا , طوالي تتصل وتتسالو : هل الطيارة فيها بوري ها ها ها ها
تقول لي مهندس وكمان مدير بتاع .... عجبي
كسرة عابرة للزلط والمطبات الجوية معا : ال 2600 حادث دي شاملة الضريبة وطيارة الاخوان رايت ولا لأ؟


#455264 [ودالنيل]
5.00/5 (1 صوت)

08-27-2012 07:54 PM
الله قلنا الزول ده كويس لانو شعر انو ماقدر المسوليه وقدم استقالتو والشغله كتيره عليهو لكن هذا هوحال المسول في بلادي يجيد كل شي حتي عندما يقدم الاستقالته ليخدع هذا الشعب


#455199 [LINA]
0.00/5 (0 صوت)

08-27-2012 06:04 PM
(1)YAKHI ALMUDEER DAH KHEREEG MASIR
(2)IN SHAA ALLAH TAKOON GARAIT ALFASAD BITAH AL OVERFLIGHT FEES (FI ALRAKOBA


#455139 [هشام]
4.88/5 (5 صوت)

08-27-2012 04:27 PM
و الادهي و الامَر ..كانت في مداخلة بالهاتف من الطاهر ساتي .. الطاهر نبهو انو مستحيل تعمل المقارنة دي . دي طيارات و دي عربات .. دي بتنقل يوميا ملايين و تقتل 300 و طياراتك بتنقل 100 و تقتل 50 ... صاحبنا مو راضي و زعلان من كلام الطاهر و مش كدة و بس طلَّع الطاهر غبي و ما بفهم امَّا قال ( انا ما عارف استاذ الطاهر ساتي ليه رافض مقارنتي دي .. الاتنين و سائل نقل كيف ما نقارن بيناتهم )) .. ساعتها بس عرفت ليه البشير رفض استقالتو . ..
من هنا انا بقول الحصان اسرع من طول الزرافة و الراجل فيكم اليجي يقنعني بغير الكلام دا .. و مديري في الشغل لما سمع بي الكلام دا زاد ماهيتي شوية ما انا ذكي ..


#455132 [هشام]
4.75/5 (4 صوت)

08-27-2012 04:18 PM
مثلي مثل الاستاذ الفاتح حضرتة الحلقة بي الصدفة و من قال مقارنة العربات بي الطيارات دي بطني طمَّت و بقيت اقول يا حمار .. دا شنو ..
و من يومها كل ما تذكر الزول دا لساني برااااااااهو يقول حمار .. مرات في الشغل و مرات في البيت و مرات في الحمام و مرات الجنبي يقولي شنو!!!!!؟ اقولو لا لا ما معاك
و مرات الولية تقول مالك بتتكلم براك ..و غايتو ..


#455082 [بلال]
5.00/5 (1 صوت)

08-27-2012 03:34 PM
دي كانت اخر طياره انتنوف ، ما باقي غير طيارتين للخطوط السودانية يعني تاني السودان ماف فيها طيارات والطيران يشوفو ليهم شغله تانية


#455031 [همد]
5.00/5 (2 صوت)

08-27-2012 02:50 PM
ركب فهامة اركب فيلة المهم دا السودان ودا التحليل الموجود وكل مسؤل يخرب ويدغمس ويتعامل ببلادة اكبر


علا طول يترقا ويزيدوا بدلاته ومصروفاته لاننا نستحق ذالك ساكتين علي هؤلاء


#454988 [بنياس]
5.00/5 (1 صوت)

08-27-2012 02:14 PM
اخخخخخخ يا عكاز!!!!

يا استاذ جبرا والله قربت اكسر التلفزيون بسبب الزول دا بتاع الطيران .

ياخي ديل تطير عيشتهم


#454974 [تختخ]
5.00/5 (3 صوت)

08-27-2012 02:05 PM
أعزائي الكرام أنا ركبت الفهامة وفهمت أنو (ود البشير )عندو ناس ناوي عليهم وحيركبوا الطيارة حيركبوهاعشان كدا عايز (زيزو)دا يقعقد لحدي مالجماعة يركبو ويلاقيهم جبل ويحطم طائرتهم.أها رأيكم شنو مش فهامة؟الله يثبت القلوب المرارة انفقعت بدررررررررررررررررررررررررررررررررررررررررررررري ياجبرة


#454963 [الزوُل الكَان سَمِحْ]
5.00/5 (2 صوت)

08-27-2012 01:54 PM
يا استاذ ..نسيت تذكر إنو الطيارات بتاعتكم ال2 (إذا وجدت) فعلاً تطير فى اليوم من الخرطوم لجدة ذهاب وإياب وبعدين تطير من الخرطوم للأبيض ذهاب وإياب وبعدين من الخرطوم للدوحة وتعدى على أبو ظبى وتجى الخرطوم وتطير لبورتسودان ومن هناك لجدة وبعد ماتجى الخرطوم تقوم تطير لأديس وترجع الخرطوموتطر للدوحةوتغشى عَمَان بدون صيانة..ودى بتذكرنى ببصات أبو رجيلة( القشاشة) فى السبعينيات من مدنى للخرطوم وبالعكس ..وما دايرا تقع؟؟

مرارتك دى شوف ليها (دَكْــــوة)


#454946 [خالد فارس]
5.00/5 (1 صوت)

08-27-2012 01:44 PM
العم الفاتح لو داير كل يوم يطق في عرق وتحصل سودانير او خط هيثرو احضر برنامج المحطة الوسطي في قناة الشروق الذي تقدمة المذيعة المتألقة دوماً (ايمان بركية) وشوف المسؤلين في الدولة بيتكلموا كيف وكأنو البلد خالية من الامراض والناس مرتاحة والمواصلات فاضيييييييييييييية .


#454936 [عبد الرحمن]
5.00/5 (1 صوت)

08-27-2012 01:33 PM
يا الفاتح أخوي نحن في بلد المسئول فيها لا يجد أي غرابة أو ما يدعو للندهاش في بيع الصلصة بي بالملعقة الصغيرة، تجي تقول لي الطيارة ام جاغومة ديك حتدهشه؟ بعدين نحن يهمنا شنو بي شركة ألفا و شركة بيتا؟ الشركات دي بتاعة منو؟ و اللي وراه منو؟ هنا يكمن السر


#454869 [wedhamid]
5.00/5 (2 صوت)

08-27-2012 11:57 AM
الأخ أستاذ جبره....تحيه و كل عام و أنت بمراره سليمه و تبرى من كل شرور و مكايد ناس التلفزيون المخصوص..... خاصة ذلك الشخص المتسلق النفعى مقدم ذلك البرنامج ... هم أصلا بيجيبو أمثال هذا الشخص الجاهل الجهلول ليؤذوا مرارات المتشالقين ( من الشلاقه) و المشاهدين عنوة ( لأنو ما عندهم برنامج تانى ) لتلفزيون جمهورية السودان رغم كامل علمهم بأضرار مشاهدتها .....إنت الودّاك تتشالق و تتفرّج البلا دا شنو؟؟؟,,,المهم أهو التلفزيون كان بقصد أو بدون قصد كشف جهالة مثل هذا الكائن و مقوّمات هندستو المدعيها دى ....صحيح ممكن يكون تخرّج من جامعه مصريه (بالمصارى على قول أخوانا السوريين) و لكن الرجل من الناحيه العـمليه يفتقد الخبره ....كما يفتقد أى قاعده للمقارنه إلا منطق مقارنة حوادث الطيران مع حوادث الطرق وكوارث الطيران فى بلاد تصنع الطائرات كما نصنع نحن الكسره مع بلد بيستوردها سكند هاند إسكراب!!!!و الله هذا الشخص لو سألتو عن عباس بن فرناس ممكن يقول ليك دا كان فى المهدية تكّاس !!!! و أكيد الأرقام التى إستند عليها مدّاهو بها الجماعه المرتزقه و المنافقين و الطبالين فى هيئة الطيران المدنى معاهو الذين دافعوا عنه بالتعليقات على خبر إستقالته و رفض الرئيس للإستقاله كما جاء فى الراكوبة أول أمس ....


#454847 [أفريقى وما عربى]
5.00/5 (3 صوت)

08-27-2012 11:30 AM
الرئيس يرفض إستقالة مدير الطيران الرئيس يرفض إستقالة عبد الرحيم الرئيس يرفض إستقالة المتعافى كأنو البلد دى ما فيها رجال مؤهلين لتولى مسئوليات هؤلاء الفاشلين هو زول ما داير يشتغل وقدم إستقالتو تصر عليهو ولا تقبلا طوالى لأنك الفاشل لا يرى فى نفسه إلا شخصاً ناجحا وبالتالى يرى كل من حوله ناجحا وهذا لسان حال البشير الفاشل ( يا أمة ضحكت من جهلها الأمم )


#454845 [مجنون]
3.50/5 (3 صوت)

08-27-2012 11:30 AM
وما تنسي يا جبرا الفترة التي حدثت فيها حوادث طائراتنا من سنة 89 الي 2012 كم من ال33 الاثبتت من السيد المدير , وثانيا كنت اتمني ان يسال عن عدد طائراتنا الان وعام 89 اين ذهبت


#454834 [tarig]
0.00/5 (0 صوت)

08-27-2012 11:21 AM
وكمان وجه الشبه بين الطائرات والسيارات انه نظام احتراق الوقود داخلى لانه فى نوع من الاحتراق يسمى بالاحتراق الخارجى وفى هذا نجد الطائرات والسيارات اجنمعن فى طريقة نوع احتراق الوقود لا ياجبرا ماليك حق بالباشمهندس عارف شغله كويس!!!!!!!!


#454827 [ابوصفية]
5.00/5 (2 صوت)

08-27-2012 11:13 AM
يا ود جبرة القلب ذاتو بقي طوبة وبعد دة حتي لبس الطرح ما بيفيدنا حاجة وبقينا مواشي في ايدي رعاة لا يخافو اللة. يعملو اي حاجة ويقنعونا بيها ثم يعودو ويقنعونا بالضد يعني سفسطائين الرحمة يا اللة الرحمة يا اللة الرحمة يا اللة


#454806 [النصيحة بتودر سيدا]
4.00/5 (3 صوت)

08-27-2012 11:01 AM
الزول ده شالوه قبل كده من إدارة جياد ... عارفين السبب شنو ... الذمة المالية ... ؟؟؟؟؟؟؟؟؟


#454801 [ود عويضة]
5.00/5 (5 صوت)

08-27-2012 10:58 AM
يكفينا طائراتنا شرفا انها (اية وعبرة لمن يعتبر) فهي لا تذهب للتقاعد ولا للمتحف ولا تذهب للصيانة ولا تحترق ولا تنتحر بعد عمر طويل الا وعليها مسؤول متنفذ فوق القانون - لديه (اقرار ذمة وهمي) من درجة نائب رئيس جمهورية ووزيراتحادي ووزير دولة وكدا
كسرة
نذكر الذين لا يعتبرون ان احدى طائراتنا المدنية احترقت داخل مطار الخرطوم في حضرة عربات المطافئ (التي تشبه عربات لعب الاطفال) وكبار ضباط المطافيء والمسؤولين في المطار الدولي وهم يكبرون ويهللون ويلعنون الشيطان الاكبر
كسرة
يا ود جبرا السودان يعمل بمنهج استمرار الرجل الفاشل في المشروع الفاشل (والجن اللي تعرفو ولا الجن الما تعرفو )


#454800 [omer]
5.00/5 (2 صوت)

08-27-2012 10:57 AM
يا أستاذ الفهامة ذاتا ما بتنفع مع م/ محمد عبدالعزيز.الله كريم علينا


#454798 [sudanese-online]
5.00/5 (3 صوت)

08-27-2012 10:56 AM
وبالاضافة لكل دا أتضح أنه مهندس (لم يوضح لنا نوع تخصصه)ولكن ماأكده هوعدم تخصصه فى مجال الطيران ورغم هذا أصر السيد الرئيس على بقائه فى وظيفته حتى يكمل طائرات الانتينوف والاليوشن الموجودة فى البلدباسقاطها..........ودقى يامزيكا


#454790 [khalid m ali]
0.00/5 (0 صوت)

08-27-2012 10:50 AM
هو مالوا يدينو بترجف طول الحلقه عندو الرعاش ولا خائف من المقابله المفبركه اصلا , هثرو دى المطار البتملك فيه سودانير اكبر هنقر بعد برتش ايرويس فى لندن دى مالو الحصل فيه شنو كمان ؟.


#454777 [zoal saii]
0.00/5 (0 صوت)

08-27-2012 10:38 AM
السؤال البفرض نفسه لماذا اقال البشير مدير الطيران ولماذا قدم مهندسنا استقالته


#454772 [بدر النهار]
5.00/5 (2 صوت)

08-27-2012 10:34 AM
إنه العبث بعينه والعبثية واللعب بعقول الناس هو جزء من منظومة الإنقاذ وفعلاً اللي أختشو ماتو وإن لم تستحي إفعل ماشئت فأوجه المقارنة معدومة حتي بين كوشة وقمامة السودان والدول الأخري خليك من الطيران والمطار ولانملك إلا وأن هذه زمانك يامهازل فامرحي في زمن الإنقاذ والإسلاميين المدعين .


#454770 [قفة بلا أضان]
5.00/5 (4 صوت)

08-27-2012 10:32 AM
ما بغيظني في الدنيا إلا البلادة وأسوأ منها الاستبلاد والضحك على العقول بالمناسبة السودان دي الأذكياء فيها كتار ومحاولة استبلادهم بلادة كان أحسن يسكت بدل يعمل نفسو عالم إحصاء لإقناع الناس بأفكار بليدة زي دي. أحييييييييييييييييي من زي ديل وأسفاييييييييييييييي ما مرارتك براك حسي المرارات كلها مفقعة


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة