الإُثبات بالشم
08-29-2012 10:07 AM

الإُثبات بالشم

الفاتح جبرا
[email protected]

وصلتني هذه الرسالة من إحدي بناتنا الطبيبات أنشرها كما هي :

إزيك يا أستاذى و كل عام وانت بألف خير.. ربنا يحقق أمانيك :
القصه المرسلة ليك دى يا أستاذ حصلت لزميلتي في مستشفى أثناء النبطشية.. يعنى نحنا عادى فى المستشفى قاعدين نملأ أورنيك 8 للسكرانين "لامؤاخذه" لكن ما فى يوم (شرطي) واحد طول ولا قصر معانا بشيلو أورنيكهم و بيمشوا.. لكن المرة دي زي بالغوا وكده وزودوها حبتين .. أخليكم مع الحصل مع زميلتي أثناء النبطشية :
جلست زميلتي خلف ذلك المكان المعروف ب"مكتب الطبيب".. داخل ما يسمى بـ"غرفة الطوارئ".. تحاول أن تؤدى ما نسمع أنه "الطب"..فدخل عليها "المفروض أنو عيان".. ولكن من سياق و مشهد الدخول إتضح أنه متهم بتناول الكحول.. و بكل "ظرافة" طلب الشرطي من الطبيبة إجراء اللازم و تعبئة الأورنيك المعنون بـ"أورنيك 8".. "عااااااادى" زى كل مره قامت الطبيبة بعمل اللازم و كتابة التقرير.. الذى أفادت فيه و حسب علمها"لا تفوح منه رائحة السُكر".. عاد لكن "تتكتب للعدو" ما أن قرأهاالشرطي حتى "إنفصم فيها" و إتهمها بالتلاعب و التقصير فى أداء عملها.. وطالبها بإعادة الكشف مستخدمة الطريقة" الشُرَطِيه".. و قبل ما نطش كلنا شبكة إليكم شرح مبسط لطريقة الكشف التى يطالب بها الشرطي :
(ان يتم تناول قطعة ورقية.. يتم لفها على شكل قرطاس.. ومطالبة المتهم بالنفخ فيها بقوة "يعنى يجيب النفس دا من لاغاليغو".. من ثم يقوم الطبيب بأخذ "شمة" طويلة أو قصيرة المدى على حسب نفاذ الرائحة..و عليه يقرر الطبيب وحسب حاسته الشمية.. مصير المتهم إما مذنب بجرم"السكر" أو لا.. و فى حال عدم توفر ورق يمكن إستخدام الأورنيك نفسه.. وفى حال إستحييت إنك "تكرفس" الأورنيك.. فطاقية الشرطى خير وعاء لإحتواءأنفاس المتهم) !
إذن و بناء على الطريقة أعلاه نجد أن مقومات الكشف تتطلب:
أولا: توفر ما ينفخ داخله
ثانيا: مهاره شميه عالية
ثالثا: معرفه بروائح الخمور!!
طيب يا أستاذ وكت الحكاية "شم" ما خلاص ناس "الشرطة" يشموهو ويودوهو المحكمة جايبنو لينا ليه ؟ طبعاً ما قامت الطبيبة بعمله هو أنها إستبعدت جانب "الشمه" الفريدة من نوعها.. و إكتفت بملاحظة الرائحه التى قد تفوح فى المكان بحكم حاسة شمها (والحتة دي فيها ذاتو كلام).. و سجلت بناءعلى ذلك تقريرها الذى لم يأت على "مزاج" الشرطي.. فإتهمها بالتزوير وطالب بسحبها و مدير طبى الحوادث إلى مقر الشرطه للتحقيق معهم فى هذا الجرم المشهود.. لولا تدخل إدارة المستشفى "الخجول" بالإعتذار و الإعتراف بالخطأ الذى وقعت فيه الطبيبة.. حيث وافقوا على إحضار وفد التحقيق إلى المستشفى..
وجدت الطبيبة مع إنتصاف نهار النبطشيه نفسها متهمه بـ:
• إساءة الأدب مع السلطات الشرطية..
• التلاعب في وثيقه رسمية..
• الإستهتار في أداء واجبها.. و بذلك تعطيل سير العدالة..
وعليه يجب عليهاالإعتذار عن سلوكها و التراجع عن موقفها.. و إلا سيتم رفعها فى"البوكسي".. وللرفع فى البوكسى قصص مؤثره.. ليس هنا مقامها حتى لا أتهم بتطاير الأفكار.. نرجع للطبيبة التى ثبتت عند موقفها و أوضحت لقائد فرقة التحقيق.. أن الكشف عن السكر يكون بمعرفة نسبة الكحول فى جسم المتهم " لابشمشمته" .. يعني هسى الزول دا كان رشوهو بي حبة عرقى كدا قبل ما يدخل المستشفى ما بكون الشمة إستوفت شروطها!!"..
و بعد مناورات جاده من إدارة المستشفى "فى تحنيس" الشرطى وورديته الذين أكثروا من الإساءة إلى الطبيبة و المستشفى إقتنعوا بترك الموضوع مع خلفية الوعيد و التهديد فى حال تكررت الحادثه..
لم تجد الطبيبة إلا دموعها لتمسح الإهانة التي لحقت بها . و لم تجد من المواسين إلا كلمات "الحمد لله ما داقاك و لا حبسك .. قدر أخف من قدر".. و مازالت تسأل نفسها عن الخطأ الذى إرتكبته حتى يتم إهانتها و تعريضها لهذه المهزلة.. و ما أشد حيرتها من موقف إدارة المستشفي القائم على "لملمة المواضيع"!! .
أما عن الخطأ فهو أن الطبيبه تغاملت وفق ما تقتضيه مهنيتها بناء على ما هو ماثل أمامها أما عن إداره المستشفى فما تعودنا من الإدارات إلا التلميحات الخجوله والمواقف المائعه إلا ما ندر "عشان ما نظلم لينا إداره بجاى ولا بجاى"..
غايتو يا أستاذ بعد المناقشات و جدت الطبيبة فى نفسها الجرأه الكافيه للمطالبه بحقها فى معاقبة من أساءوا إليها وذلك بتقديم شكوى نأمل أن تجد طريقها إلى التحقيق ومن ثم المحاسبة !!

الرد :
هذا حد من حدود الله ينبغى تحري الدقة في إثباته .. وعشان ما نبقى على جنس الكلام الزي ده نأمل من الإخوة في الشرطة توفير اجهزة فحص الكحول الحديثة التي تحدد نسبة الكحول في الدم بدل قصة (الشمشمة) دى !!

كسرة :
لو مافي قروش ما مشكلة ممكن نعمل ليكم (ص د أ ف ك) .. صندوق دعم أجهزة فحص الكحول !!

كسرة ثابتة :
أخبار ملف خط هيثرو العند النائب العام شنو(ووو وو ووو)؟



تعليقات 28 | إهداء 0 | زيارات 6596

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#458269 [nagatabuzaid]
0.00/5 (0 صوت)

08-31-2012 11:16 PM
اخبار خط هيثروا دايرة ليها شمشمة طوييييييييييلة


#457874 [ali]
0.00/5 (0 صوت)

08-31-2012 07:58 AM
شوفوا وصلنا وين نحن

في عهد السفاح البشير فاقد الغيرة والوطنية وعديم الرجولة وعدو شعبه


سودانيون للبيع.. أسرار رحلة العبيد من الخرطوم إلى القاهرة وطرابلس


كشفت مجلة "الأهرام العربي" عن تفاصيل وأسرار رحلة الجحيم التي يخوضها السودانيون الذين يهاجرون للخارج على أمل تحقيق حلم الثراء، حيث تنشط حركة سوق هجرة السودانيين ورحلتهم عبر الجحيم من السودان مرورًا بالقاهرة وحي العتبة، إلى ليبيا، بينما يهرب آخرون إلى أوروبا وإسرائيل.

ويتضمن التقرير تفاصيل خطيرة عن عصابات مسلحة تقف وراء بيع السودانيين في سوق أشبه ما يكون بـ "سوق العبيد"، حيث يقوم رجال تلك العصابات باحتجاز السودانيين واعتقالهم وتعذيبهم، وتبيع الفرد منهم بـ 150 دينارًا ليبيًا.

تسرد "الأهرام العربي" تفاصيل رحلة الجحيم والعذاب التي يقطعها السودانيون وتذكرنا بعصور الرقيق قبل مئات السنين، وتبدأ بالتعرف على السماسرة في الخرطوم، والذين يحصلون على "تحويشة العمر" من الشاب السوداني الذي قد يضطر للاقتراض على أمل الوصول إلى "أرض الأحلام"، وبعدها تبدأ رحلة العذاب، فبدلًا من الوصول إلى ليبيا والحصول على عمل مربح، يقعون فريسة سهلة في يد عصابات الاتجار بالبشر، ويتم احتجازهم وجلدهم حتى يأتي المشتري ويختار من بينهم.

وتتضمن تفاصيل اختيار "الزبون" لمن يريده بعض الفحوصات التي تذكرنا بمشاهد الأفلام التي ترصد قصص العبيد، حيث يبدأ "الزبون" في فحص الشباب السوداني وتحسسهم، ثم بعد ذلك يختار من سيشتريه، أما الثمن فهو معروف ولا يتجاوز 150 دينارًا ليبيًا.

المثير أن أجر العامل السوداني الذي يظل يعمل طوال اليوم، لا يحصل عليه، والأكثر من ذلك، أن السوداني بعد الانتهاء من عمله لا يكون حرًا ويستطيع أن يذهب لنيل قسط من الراحة، ولكنه يعمل في وظيفة أخرى، وهي تسلية الأولاد وإضحاكهم، حيث يبدأ الأطفال في التجمع حوله وقذفه بالحجارة وهم يمرحون ويلعبون ويسخرون منه.

وتوضح المجلة تفاصيل رحلة السودانيين من السوق العربي بالخرطوم إلى العتبة بقلب القاهرة، ثم إلى السلوم على الحدود مع ليبيا، مرورًا عبر حقول الألغام، أما العائدون منهم والذين نجحوا في الهروب بأرواحهم، فيهربون عبر الجبال في رحلة تسلل عسكية من ليبيا إلى مصر.

http://maktoob.news.yahoo.com/%D8%B3%D9%88%D8%AF%D8%A7%D9%86%D9%8A%D9%88%D9%86-%D9%84%D9%84%D8%A8%D9%8A%D8%B9---%D8%A3%D8%B3%D8%B1%D8%A7%D8%B1-%D8%B1%D8%AD%D9%84%D8%A9-%D8%A7%D9%84%D8%B9%D8%A8%D9%8A%D8%AF-%D9%85%D9%86-%D8%A7%D9%84%D8%AE%D8%B1%D8%B7%D9%88%D9%85-%D8%A5%D9%84%D9%89-%D8%A7%D9%84%D9%82%D8%A7%D9%87%D8%B1%D8%A9-%D9%88%D8%B7%D8%B1%D8%A7%D8%A8%D9%84%D8%B3.html


#457813 [ابوبكر خليل]
0.00/5 (0 صوت)

08-31-2012 03:09 AM
بالله شوف جنس المهزلة دي .. شرطي فاقد تربوي يتطاول على طبيبة .. هسي الشرطي ده كان بقى عيان البعالجو منو .. لمتين هذا السلوك من افراد الشرطة .. قال ايه المشروع الحضاري قال .. عجب


#457280 [ده الكلام]
5.00/5 (1 صوت)

08-30-2012 11:38 AM
بالمناسبة النص بقى بكم الايام دي مه الزيادات عشام الواحد جاي عيد الضحية وكده؟؟؟؟
بعدين ما يخلوا الناس يسكروا عشان ينسوا الواقع الهم عاشين فيهوا. ولا أحسن يصحوا يقلبوها عليهم؟


#457038 [ود الحاجة]
0.00/5 (0 صوت)

08-29-2012 11:41 PM
بدلا من بهدلة الطبيبات الشابات النواعم كان الافضل لناس الشرطة أن يعينوا واحدا منهم ممن كان من"الشفوت" قبل الالتحاق بالشرطة للقيام بهذه المهمة !

بلد العجائب


#456994 [ابو علي]
0.00/5 (0 صوت)

08-29-2012 10:09 PM
السودان دولة بوليسية و بليدة - اول درس للمستجدين في معسكرات التدريب للجيش او الشرطة او الامن بيفهموهم انهم اهم ناس في البلد و غيرهم ملكية ساكت و لازم يكونوا تحت الجزمة - الاغبياء منهم بيصدقوا الكلام دا - الواحد فيهم بينزل الشارع و بيفتكر انو هو اهم زول -هو حكومة و الناس اهالي - و الحكومة ما بتقصر معاهم بتحمي كل الذين بيرتكبوا الموبقات في حق الشعب - و الدلائل كثيرة و اخرها الضابط الذي اغتال عوضية عجبنا لازال حرا طليقا و لم يقدم الي محاكمة -- هي للله لا للسلطة ولا للجاه .


#456976 [المغبون]
0.00/5 (0 صوت)

08-29-2012 09:45 PM
مرات ريحة ابط البوليس تدي الدكتورة احساس انو في فار فطيس جنبها؛؛؛لذلك لا تستطيع التمييز حتي ولو وافقت علي الطريقة الشمية دي.... بالمناسبة الموضوع دا اثار في نفسي ان احضر ماجستير في جامعة الجزيرة يكون عنوانه (الشمة واثرها في اثبات جنحة السكر ...ازمة الشمة ام شمة الازمة,


#456975 [همد]
0.00/5 (0 صوت)

08-29-2012 09:44 PM
تشموا هي الجرايم الواضح عاقبتوا فيها ولا حاسبتوا الوزراء الهبروا كبروا لمن تجوا تحاكموا لينا


واحد سكران وتبهدلوا الدكتور المسكينة الفكرة تعمل براتب ضعيف وتساعد المواطنين الماقادرين


يمشوا مصتوصفاتكم الغالية حاولت تخفف علي المواطن المريض بدون انيتوفر له علاج ولا اجهزة


تشخص حالتوا دوبك كدا لميس بليد في الراس والصدر والرقبة ويفتح خشموا وتكتب ليهوالدواء


الفي النصيب وما عليك تمشي ديوان الزكاة وما تشوف عينك الي الظلام وتبقا كويس من شدة الياس



من الحكومة وتكره ابو دي بلد


#456946 [عبد الرحمن]
4.00/5 (1 صوت)

08-29-2012 09:04 PM
أنا مافي حاجة بتغيظني غير الدفاع الذي نقرأه عن الشرطة من وقت لآخر. هذا الجهاز فاسد فاسد فاسد من أعلى قمة فيه إلى أصغر واحد، و لا يقول بغير ذلك إلا المتفائلون باكانية إصلاح هذه المؤسسة.


#456930 [ودالنيل]
0.00/5 (0 صوت)

08-29-2012 08:30 PM
ياجماعه الناس البتشرب الحاجات دي متخليها انحن مابنقدر علي زيادة المصاريف دي والاختراحات بتاعة الاستاذ جبره .حسي الناس ديل يكون كونو اللجان بتاعت (ص دا ف ك)


#456870 [بابكر موسى]
5.00/5 (1 صوت)

08-29-2012 06:25 PM
هو السودان الضيعو منو غير العساكر بكل الوانهم


#456865 [عطبراوي آخر]
0.00/5 (0 صوت)

08-29-2012 06:18 PM
يا استاذ جبرا ( الشبه والشلاقــــه) حقتك حاتقوم تسلط علينا الناس ديل ما صدقنا خلصنا من
دمغــة الجريح والترعـــة والفضائية وووووالخ تقوم تحرش الناس على صندووقك دا ) ويلقوا ليهم فرصة
الناس اللي ما لحقوا الخمـــــــــة الفاتت يخموا من دي ( ما ديل ناس المؤتمر الخمـــي )

عجائب ،،، برضو أخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخين

ودحينك خــم وصـــــر


#456848 [عبدالعظيم]
0.00/5 (0 صوت)

08-29-2012 05:53 PM
دكتوره دى ولا كلب بوليسى

طيب فالنفرض البوليس ابو (كيس الحلوانى) دا عندو نزله حيشم كييييف؟؟؟
يا اخوانا زمان ما قالوا ليكم السكران فى ذمة الواعى.
باركووووووها


#456844 [صادميم]
5.00/5 (2 صوت)

08-29-2012 05:47 PM
مفروض الشرطة تستجلب اجهزة لفحص الكحول و ذلك لسبب بسيط فقد كنا في الماضي الجميل نعرف من الشم اذا كان الواحد شارب عرقي عيش او تمر او شارب شري ابوبنت او ابوتراكتر اوشارب ليبل بمختلف الوانه هسع المشروبات دي كلها مضروبة و اختلط الحابل بالنابل و الجيل الجديد من الاطباء ما بقدر يفرز بين العرقي المخلوط بحجارة البطارية و موية هيئة مياه الخرطوم


#456825 [Abu Areej]
5.00/5 (1 صوت)

08-29-2012 05:20 PM
مش كان احسن الواحد يشرب الما بنشم!!


#456801 [علي جاد كريم اليعقوبابي]
4.25/5 (3 صوت)

08-29-2012 04:48 PM
والمؤسف يا استاذنا الفاتح إنه المحاكم بتتعامل مع هذه الوسيلة من الإثبات كما أنها مبراة من العيوب برغم أن الراسخ هو أن كل مايرد بيومية التحري من اقوال ومستندات ليعد دليل او بينة ولكن بعض قضاة الغفلة يأخذون وبالذات عندما يكون مظهر المتهم متماشيا مع التهمة , حدثني صديق محامي ذات مرة بأن كان متواجدا بقاعة إحدى المحاكم منتظرا لدورة فإذا بشرطة المحكمة تحضر متهما بسرقة عربة كارو ( في إحدى أطراف العاصمة ) , القاضي ودون أن يطلع على الأوراق سأل الشرطي (( وده جايبنو مالو ؟ فرد الشرطي و يا مولانا ده حرامي سرق كارو وهو متعود يسرق ويمشي يبيع والمرة دي لقيناهو شغال على الكارو المسروق وصاحبو إتعرف عليهو بعد كم شهر ))

القاضي حتى تلك اللحظة لم يفتح ملف الدعوى وبداء فبادر المتهم يازول هوي أحسن ليك تعترف أنا عارف من شنبك الكبير ده بتكون سرقت أخير ليك تعترف قبل ما نجلدك ونسجنك .

يقول المحامي ، كنت مبتدئا في المهنة و تعوزني بعض الحصافة وشىء من أدبيات المهنة فلم أجد نفسي إلا متضامنا مع المتهم ووقفت و سألت القاضي / يا مولانا التجريم بقى بالشكل وألا شنو ؟ يعني عايزين ترجعوتا لما درسناه في الجامعة للنظرية البايولوجية كأساس للتجريم ( نظرية لمبروزو التي عفا عليها الدهر؟ !! ! .

رد عليه القاضي بحيلة , يا إبني ديل إنت ما بتعرفم إنت شكلك لسه جديد , الخبرة مهمة و خلينا من نظريات وكلام نظري أنا ما عندي حكم بيرجع , أحكامي كلها بتتأيد بعدين دي منطقتي وبعرف الناس كلهم من أشكالهم .
يقول صديقي ذكر له المحامي بأنه غادر قاعة المحكمة وترك قضيته التي أتى من أجلها و حرم على نفسه الظهور أمام المحاكم الطرفية وأشباه القضاة .


قلبي على بلدي يا استاذ الكل ما عايز يكتفي بواجبه ودوره المرسوم له وفق القوانين الشرطي عايز يعمل قاضي والعسكري بدل يحرس عايز يحكم وعايرة وأدوها صوت .


#456751 [كرجو]
0.00/5 (0 صوت)

08-29-2012 03:53 PM
الشمه بتصلح المشي................ مثل جديد


ردود على كرجو
Sudan [سليمان قش] 08-30-2012 09:44 AM
الله يديك العافية يا كرجو والله بضحك في المثل الجديد اكتر من 10 دقابق


#456690 [ودشريفي]
4.50/5 (2 صوت)

08-29-2012 02:49 PM
يا استاذ جبره لو طلعت الشارع وعملت احصائية للسكارى ح تلقاهم معظمهم او كلهم من القوات النظامية ومعظم بلاغات السُكر كيدية . ومعظم بيوت الشراب يحموها النظاميين لأنو ده مشروعنا الحضاري.


#456682 [ود الجد]
0.00/5 (0 صوت)

08-29-2012 02:40 PM
الماعاجبو اللقول يسقط النظام ياجبانين


#456656 [aaa]
0.00/5 (0 صوت)

08-29-2012 02:09 PM
بعد السلام
فى ملحوظة ماتنساها اجهزة فحص الكحول بتتعرف على الكحول العاليمة وانت عارف مسمياتها وانواعها وطرق تناولها كمان بس ناسنا بيتعاطو عرقى وهو صناعة محلية وليست له تاريخ صلاحية المهم بعد نلم حق الجهاز ونخلص ماتجى تقول لينا عايزين جهاز حق البنقو كمان .


#456646 [بدر النهار]
4.97/5 (6 صوت)

08-29-2012 02:00 PM
والله ياود جبرا إنت بتجيب المشاكل هسع كلامك زول بيعاين ليه مافي حيمسكوا ليك في (ص.د.أ.ف.ك) صندوق دعم أجهزة فحص الكحول وسيتم إصدار قرار جمهوري بإنشاء الصندوق وتعيين أمين له وتحديد إختصاصتة وموظفيه ومصادر تمويله من المحررات الشرطية والقضائية والمرورية وفرض رسوم علي المركبات العامة والخاصة والمرور بالطرقات والحج والعمرة والمغتربين والكهرباء والمياه بالإضافة للإجور والمرتبات وفجأة يكتشف المراجع العام أن الصندوق لا يخضع لرقابته وإيراداته لا تورد للمالية ولا يلتزم بأورنيك 15 ولا باللائحة المالية للدولة ، ومال الصندوق مجنب في حساب خاص بأسم الأمين والذي صار من أصحاب المثني وثلاث ورباع وعمارة في الرياض وأخري في كافوري وثالثة في المنشية ورابعة في الطائف ومزراع ممتدة من الكاملين للباقير وسوبا والسليت هذا بخلاف إستثمارات دبي وماليزيا من أصول ثابتة وسائله ، وتتحدث الصحف وصحفي عن هذا الفساد وبإيعاز من مراكز قرار بعينها وتفتح التحقيقات وتحال القضية لوزارة العدل والنائب العام ويتبين أن أطراف كبار ذوي مراكز حساسة طرف في هذا الفساد ويتم إستحضار فقه السترة ويبرئ الأمين المؤمن ويتم توزيع الحلوي والشكولاتة الفاخرة من مصاف أرقي من الماكنتوش للرئاسة ويقدمها وزير العدل لزائريه بعد حفظ ملف التحقيق والفساد بادارج مكتبه .


#456640 [aaa]
5.00/5 (1 صوت)

08-29-2012 01:53 PM
اولاً التحية للدكتورة التى عملت وفق ماتقتضيه المهنة.
ثانياًبخصوص الصندوق نحنا ياالفاتح لسع ماخلصنا من صندوق الرادار بتاع بوتسودان فضل شوية اصبر علينا كمان شهر بس . بعدين نشوف صندوق الشمة وبعدها نغنى (من كل شمةيابلادى).


#456638 [عاشق الهلال]
0.00/5 (0 صوت)

08-29-2012 01:52 PM
بالرغم من ان الاسلوب المتبع يمثل منتهى التخلف و يضر بحقوق المتهم ومع تسليمنا التام بسوء تعامل الشرطة السودانية و عدم احترامها لما كفله القانون للمواطن من حقوق ،الا ان السؤال هو لماذا قبلت هذه الطبيبة ابتداءا بممارسة هذه الوسيلة للكشف !!!


#456517 [yasso]
4.50/5 (5 صوت)

08-29-2012 11:53 AM
* الكشف عن تعاطى الكحول بيتم بواسطة فحص دم المتعاطى لمعرفة نسبة الكحول دي طريقة والطريقة التانية ودى بيستخدمها رجل المرور في حالة الشك في احد السائقين بان ينفخ السائق في بالون فاذا تغير لون البالون للون الازرق يحول لجهات طبية لفحص الدم لمعرفة نسبة الكحول في الدم - الكلام ده في البلدان البتحترم انسانية البني ادم.
* هنا المسالة بتخضع لمزاج الشرطة لانو الشرطة عندها صلاحيات اهانة المواطن بكل الوسائل ممنوع تدافع عن حقك كمواطن وتقبل بي اي تصرف من شرطى جاهل واليكم ما قد حدث لنا في احد الايام الغبراء:-
* في احد الاحياء وسط ام درمان كنا جلوسا في بيت قيد الانشاء في نقاش الخطوة التالية من البناء الاسطوات وصديق وانا (وفجأتن) تدخل علينا قوة بقيادة ظابط ويهجم علينا احد رجال الشرطة بطاقيته المهترئة والمضمخة برائحة عرقه طالبا من كل واحد من الجالسين ان يقول (هه) مع دهشتى الشديدة قلت هه بصوت منخفض فانتهرنى قول شديد فقلت (شديد) فما كان منه الاان ارغي وازبد معتقدا بانى استهزأ به ورفع يده هاما بصفعى انا من في عمر ابيه - حال بينى وبينه حضور صديقى الذى كان يؤدى فريضة الظهر وقد راته القوة وهى تدخل الدار وما شفع له ذلك من ان يطلب منه ان يقول هه في طاقية الشرطى كل ذلك تحت نظر الضابط


#456495 [الزوُل الكَان سَمِحْ]
4.88/5 (6 صوت)

08-29-2012 11:35 AM
يا أستاذ

قول (أه)...


ردود على الزوُل الكَان سَمِحْ
[الزول الكان سَمِحْ] 08-30-2012 05:24 PM
أخوى سليمان...كل سنة وإنت طيب..ونسمع عنك كل خير

مشكور على التواصل ويمكنك الكتابة لى عن طرق ابريد المرفق

[email protected]

Sudan [سليمان قش] 08-30-2012 09:51 AM
الزول الكان سمح سلام طبعا نحن لسع بنرزح تحت رحمة الانقاذيين عشان نتواصل معكم .لانهم بعد كل فترة كده بيحجبو عننا الراكوبة وطبعا دا قليل من كتير والله المستعان . اما بخصوص اختبار اخونا جبرا انت عارف مافي اي طريقة الا الثابتة ولك السلام .... (امل ان اجد وسيلة للتواصل معك)


#456448 [المستغرب جداً جداً]
4.00/5 (4 صوت)

08-29-2012 10:52 AM
يا استاذ الفاتح ، تحيه وكدا في اي مكان توج مهن متخصصه يعني في ذواقين للخمور وفي شرابين للشاي وفي شمامين للسكر .. ليه ما عندنا بدل تعمل ليك صندوق وتطلع روح المواطن الوصلت مناخيره وتخليه يدفع دي فرصة لفتح باب توظيفلا وزيادة التمكين يعينوا لينا شمامين من القوي الامين ... وشوف كان شموا قبل ما يقبضوا بدلات ... بدل فرز انفاس بدل شم مخدرات .. بدل ...تطول وطول يا ليل


#456427 [nasreen]
4.00/5 (4 صوت)

08-29-2012 10:38 AM
هذا يحدث ونحن في اي قرن الله اكبر عليك يا الشعب السوداني


#456417 [شقيق التاية]
4.72/5 (6 صوت)

08-29-2012 10:27 AM
لا عجب ابدا ولكن الدكتورة غلطانة الف مرة
كان يفترض تعمل فحص السكر بالشم ذاتو للشرطي
اكيد كان حاتعمل تقريرين سكر
* نحن في زمان الكيزان (لامؤاخذة)
زمان المشي على اربعة
زمان الشم لاثبات واقامة حد من حدود الله


ردود على شقيق التاية
Sudan [hashsho] 08-29-2012 02:08 PM
ولما تشم الدكتورة , الكلاب البوليسية تعمل شنو ؟؟؟؟ بس معليش لأنو أجهل من يمشي علي الأرض هم البوايس , الله يكون في عونا وفي هذا الزمن تف يا دنيا تف


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة