المقالات
السياسة
ارشيف مقالات سياسية
السودانيون في إنتظار التأشيرة ... لمحتك.. وقلت بر آمن بديت أحلم
السودانيون في إنتظار التأشيرة ... لمحتك.. وقلت بر آمن بديت أحلم
09-02-2012 07:57 PM

السودانيون في إنتظار التأشيرة . لمحتك, وقلت بر آمن , بديت أحلم

حاتم الجميعابي
[email protected]

تنويه بسيط : رجاء للناس البتعمل (كوبي× بست) لكل ما اكتب .. الإشارة إلى أسم الكاتب فهذا حقي الأدبي فلا تحرموني منه!!
أستغرب جداً لتصريحات رئيس جهاز المغتربين في السودان والذي ذكر بأن عدد المواطنين السودانيين الذين يترددون على الجهاز للحصول على تأشيرة خروج للهجرة للعمل بالخارج بعد أن حصلوا على عقود عمل في دول أجنبية وصل إلى رقم غير مسبوق؛ إذ إنهم يستخرجون كل يوم ثلاثة آلاف تأشيرة خروج فيما يشبه الهجرة الجماعية.
انتو خليتو في البد دي شنو عشان الناس تقعد فيها، شغل مافي، أكل مافي ، شراب مافي، عرس مافي، مواصلات مافي، قراية مافي، تنمية مافي، علاج مافي، سكن وترحيل للطلبة مافي، مرتبات مافي . ده كوم والكوم التاني كشات ستات شاي في!!، سرقة المال العام في!! اكل أموال اليتامى في !! حروب في !! .
يعني الراجل ده من خلال التصريح الفات ما تقدر تعرفوا فرحان ولا زعلان، انا لو في محلو بقدم أستقالي حسرة سااااااااي كده على الناس والكفاءات البتطلع من البلد، يعني من حكم ربنا انو الإنقاذ أنجازا الوحيد أنها قدرت تهجر الناس من الريف إلى الخرطوم ولما غلبتا حيلة طلعتهم بره السودان عبر مطار الخرطوم،والله عالم متين يرجعوا للبلد تاني ، لانو نحنا في ظل حكومة مافيها كفاءات، عشان كده مافي زول بقدر الحجم الكبير للناس البتطلع تسافر من أجل حياة حرة كريمة، الناس زيتتاااا طالع من الوضع الكعب ده، والله كعب عاااالي عديل كده، مرات الواحد يخجل على المآسي البتلاقيهو في الشارع ناس جيعان وناس فاطه سطر وتتكلم في الشارع براها، وناس تشاكل من دون سبب لو راكب المواصلات وقلت لي زول زح كده . يلم فيك يديك محاضر في الأخلاق، ياخي معذور الراجل زهجان من الحكومة الفاشلة دي، حكومة ما بتخجل من نفسها والله صحي زي ما قال المثل" الجمل ما بعرف عوجة رقبتو" عاملة كرعينا الطواااال ديل.
أنا عندي فكرة جهنمية كده الـ 3000 نفر ديل الدايرين يسافروا كل يوم ديل أحسن يعكسوا الكورة بدل ما يسافر هم، نقوم نسفر الحكومة و نركب طياراتهم العاملة زي الزول السكران لما يضربوا الهمريب ونكون كده خلصنا منهم واحداً تلو الأخر، والله الفكرة ممتازة، وما صعبه في التنفيذ، زي ما ركبنا عبود ونميري، والحمد لله نحنا شعب عندو تجربة في السفر عن طريق شحذ الهمم وعدم الإتكالية والإضراب السياسي والعصيان المدني، يعني الموضوع ببساطة كده تشتري باقي عمرك الفاضل ليك في البلد دي، وتعيش ليك كم سنة كده مرتاح.
ياخي الحكومة دي اجبرت الناس تعمل اي حاجة منافية للأخلاق والقيم والدين، بقينا نسرق ولا بنقول فلان سارق يجيك قاشر ديك يا الجلابية الما خمج ، والعربية والحرس والذي منو و في المناسبات الإجتماعية الصيوان كلو يقوم عشان سيدي الحسن ده يلقى نظرة ولا يسلم عليهم مع العلم أنو " حرامي"، وكمان الناس معاها فلهمة فلان جانا في عزاء فلان ولا عرس فلان، يعني الموازين اتقلبت، البت عادي بتبيع شرفها عشان تاكل وتشرب وتركب موصلات، وفي ناس كده المزااااج سااااي بحكم، وشراب البنقو بقى دلالة على انو الولد شفت يعني الواحد يكون لابس بنطلون سيستم وحالق كيف ولابس ليهو سلسل وشئ كدي في يدو ومتجدع ويقول ليك بفخر كده أمبارح ضربتا لي حلات سجارة من أمها خلت راسي ده لي تحت وكراعي لي فوق الشكية لي الله " خروف ضخية" معلق، دي سجارة شنو ياربي، دي القصة كلها مقلوبة، حاجات بقت غريبة على جسدنا، وحياتنا ومبادئنا، زرعتا فينا الإنقاذ، يعني الواحد ما كان متوقع منها خير من ما جات في 89، الغريبة في ناس كتير عارفة أنو الوضع ممكن يحصل الحالة الأسي نحنا فيها دي وما شغالة بالموضوع الشغلة. خلاص المواطن وصل للحد الفاصل بين الحياة والموت مرمطتت الحكومة كرامة الشعب المسكين، خلتو من غير طموح، خلتو عايش على الشهوات زيو وزي اي حيوان تاني عطلت جزء مهم في راس البني أدم وهو العقل، بقت الناس ما بتفكر ذاااتو لانو التفكير داير مقومات داير أكل وشراب كويس وصحة كويس، بمناسبة الصحة دي الناس بعد العيد مباشرة لما ليك فيها إلتهاب طلع عينا |، الواحد تشوفوا كده تقول عندو نقص في الغذاء، روحوا طالعة، ده بس إلتهاب، يعني لو جاتم الأمراض الكبيرة ديل يعملوا شنو السودانين، ناس أنفلونزا الخنازير والطيور والإيدز، غايتو السودانين ديل راقدين سلطة، والدواء غالي جداً، والرئيس لو لقا ليهو كوم تراب ساكت يطلع فيهو ويعتبروا منبر يقول ليك العلاج مجاني، الكلمة دي في لسان المسؤلين أسهل من "سبحان الله وبحمده سبحان الله العظيم".. دي كلها اسباب بتخلي الناس تهاجر من البلد عشان ما تقع في الفساد، الحائم في اي حته، بلد سمتها الأساسية أنها فاسدة، الأكل فاسد بي بروميد البوتاسيوم، الشراب فاسد بي إختلاط الصرف الصحي بشبكة الموية، الشارع فاسد بالمناظر البتشوفا بناطلين أبليس النبطشي ما بقدر يلبسا، فساد في الإدارة بإنتشار المحسويبة والرشاوي، فساد في الحكم دي ما داير ليها كلام كتير، والكلام واضح من عمارات الرباط والسدود والكباري والمأكلات الكتيرة الفي البلد دي ..
أخر الكلام :
يا ربي ما تحرم زول من أنو يشوف التور وقع ... وتمكن اي زول يغز سكينو فيهو قاااااااااادر يا كريم ..


تعليقات 6 | إهداء 0 | زيارات 2269

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#460711 [سودان جديد]
1.00/5 (1 صوت)

09-04-2012 10:29 AM
نعم ياخوي


#460550 [sadigat22]
1.00/5 (1 صوت)

09-04-2012 03:33 AM
والله ياود شندي اظنك تونتي فايف خليك من ناتج ثورة تعليم عالي ولاثورة تعليق عالي الراجل دا متناول موضوع مؤرق كل سوداني واقلاها اقلاها كنت تناقش فكرة الموضوع وبعداك تجي تتكلم عن ركاكة ولا كراكرة يا الرغيب اللغوي انت وانا حقيقة متفق تمام مع مقترح حاتم انو الناس المارقة تقعد تاسس لي وطن خير ديمقراطي ونطرد منو ود شندي وعمر البشير الي مزبلة التاريخ غير ماسوف عليكم


#460512 [ود شندي]
1.00/5 (1 صوت)

09-04-2012 12:42 AM
والله ياقفة وأسامة أظنكم جميعا ً من افرازات ثورة الانقاذ حيث لا تفرقون بين ( حرف ز وحرف ذ ) ومن الذين يكتبون لكن وهؤلاء وذلك وغيرها كالآتي لاكن هاؤلاء وذالك كما أن الحنيق في القلب ليس بالغة الركيكة ونحن السودانيين معروف عنا نتكلم بالدارجي وعندما نكتب نكتب بالفصحي


#460165 [قفة]
1.00/5 (1 صوت)

09-03-2012 01:09 PM
كلامك جميل وفي الصميم استمر كدة أكتب كما بدا لك بالدارجي كويس بالفصحى كويس المهم الكلام يلمس القلوب ويأثر فيها ما مهم يكون حتى بالرسم


#460113 [محمد الامين]
0.00/5 (0 صوت)

09-03-2012 12:03 PM
كالم فيه شئ من الغرابة لكن ممكن نجربو سنة نشوف البحصل شنو نخلي السودان دا بدون حكومه انا متاكد الامور حتمش 100%


#459854 [ود شندي]
0.00/5 (0 صوت)

09-03-2012 12:12 AM
أنا معاك في مضمون الموضوع لكن كتابتك ركيكة جدا جدا لا أدري هل هذا من إفرازات ثورة التعليم العالي أم ماذا


ردود على ود شندي
Sudan [قفة] 09-03-2012 01:09 PM
لا ركيكة لا شي بالعكس دمها خفيف ومعبرة عننا

Saudi Arabia [OSAMA] 09-03-2012 07:13 AM
بالعكس كان عبارة عن ونسة باللهجه العامية وهو نمط اقربك اكتر من واخليك متجانس مع روح الانسان السوداني والبخليك تشعر بالحنين لي حلتك وبلدك ووطنك لو كان عندك احساس بالانتماء من اصلو والظاهر انت نتاج (توراة) الانغاز ما عرفت تقراء او مركلس في بلدا ماها هيلك ونفضت غبار الوطن دا لو قريت وفهمت كلامي لانو علي نفس النسق


حاتم الجميعابي
مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة