09-03-2012 09:45 AM

طلعنا أي كلام

الفاتح جبرا
elfatih.gabra@gmail.com

الكثير من القراء (خاصة أبنائي على موقعي بالفيسبوك) يطلبون من العبدلله أن يرفق (بي نفسو شوية) وما (يحرق دمو ساااكت) خاصة وهو زول بتاع (قلب) و(تصلب شرايين) وينسى حكاية (خط هيثرو دى) بإعتبار إنو (المسألة عايرة) وما بقت (على دى) وهنالك الكثير من ملفات الفساد التي تمتلئ بها أدراج الجهات العدلية والتي لم نسمع يوماً واحداً أن أصحابها قد قدموا للعدالة .
غير أن العبدلله عندو (فهم تاني) فقصة سرقة هذا الخط الجوي تختلف تماماً عن اي قصة فساد آخر ويكمن الإختلاف الجوهري في إنها وااااضخة وثااابتة وما عاوزه ليها دليل .. يعني مش ذى (التقاوى) واحد يقول ليك (نسبة الإنبات) عالية وواحد يقول ليك (لا منخفضة) والتالت يقول ليك
فيها (فطريات) والرابع يقول ليك ما عارف شنو داك !
خط وإتسرق وإتباع .. والجهة التي قامت بشرائه (معروفة) .. قضية ما عاوزة (المحقق كونان) وممكن لأصغر (متحري) أن يكمل تحرياته فيها في أقل من (شهر) بالكتير .. يعني هى كيمياء .. الحكومة (إتنشلت) ووجدت الحاجه النشلوها منها (قاشر بيها زول تانى) .. خلاس تخاطب (الزول التانى) ده بصورة رسمية وقانونية وتطلب منو إنو يوريها (الخط المسروق) ده جابو ليهو (ياتو حرامى)؟
لكن يبدو أن الجهات الممسكة بملف القضية عندها فهم تاني إذ مرت على الموضوع سنين عددا ولم يبت في الأمر ولم يقدم شذاذ (الأجواء) هؤلاء الذين قاموا (بتنفيذ هذه السرقة) إلى القضاء .. لجان تحقيق تقوم ولجان تحقيق تقعد (تحقيقات برج التجارة العالمي ما أخدت وكت قدر ده) ، هسه الموضوع ده عاوز ليهو سنين عشان (ينعرف؟) هو فى (كم زول) فى السودان ممكن يبيعوا ليهم (خط طيران) ؟ وكم زول ممكن يكون عندو أوراق ومستندات (تقنع المشترى) بإنو هو شخص مخول ليهو يبيع الخط ؟
والظريف في الموضوع كل خمسة ستة شهور يقوم مسئول يصرح بأنو (التحقيق لسه ما إنتهى)
حتي جاء ذلك اليوم الذي صرح فيه السيد وزير الدولة بالنقل (فيصل حماد) بأن التحقيق قد إكتمل وذلك في خبر نشر بصحيفة الصحافة بتاريخ 17 يونيو الماضي (يعني قبل شهرين ونص) بعنوان (وزير الدولة بوزارة النقل : إكتمال التحقيقات في بيع خط هيثرو) والخبر يقول :
(اعلنت وزارة النقل عن اكتمال التحقيقات في بيع خط هيثرو، وتحويل الضالعين الي القضاء ،وقال وزير الدولة بوزارة النقل فيصل حماد في اجتماع مع لجنة النقل بالبرلمان ، ان قضية بيع خط هيثرو ستحول الي قضية جنائية للنائب العام بعد ان تم تحديد الضالعين في بيعه)
بعد تصريح السيد وزير الدولة بالنقل تنفس العبد لله الصعداء كما شاركة التنفس أفراد الشعب (الفضل) ولسان حال الجميع يقول (أخيراً سوف نسترد خط ناقلنا الوطني)
تنبيه : أيها القارئ الكريم (قوم أخد حبوبك وخليك ريلاكس) وتعال (واصل) عشان تقرأ معاي آخر التصريحات وهو للسيد أوشيك محمد أحمد رئيس لجنة النقل بالبرلمان بعدد الأمس (2 سبتمبر)من صحيفة ألوان (يعني بعد شهرين ونص من تصريح الوزير بأنو التحقيقات إنتهت) والذي جاء بعنوان (توقعات بإنتهاء التحقيق حول خط هيثرو خلال أيام) حيث جاء في الخبر ما يلي : ( كشف رئيس لجنة النقل بالبرلمان أوشيك محمد أحمد عن إقتراب الفراغ من التحقيق حول خط هيثرو المفقود ورفض أوشيك الخوض في الحديث حول هذا الخط وقال أن عمل لجنة التحقيق شارف على الإنتهاء وأنه خلال اليومين القادمين ستظهر نتائج التحقيق حول هذا الأمر) !
يعني وزير الدولة بالنقل كان مفتكر التحقيق إنتهي .. والعبدلله إفتكر التحقيق إنتهى .. وإنتو إفتكرتو التحقيق إنتهي .. وأتاريهو التحقيق لسه ما إنتهى ... ده نحنا طلعنا أي كلام يا جدع !!

كسرة :
سؤال لعلمائنا الأماجد : هل هذه سرقة (حدية) أم أن (ثمن) الخط (أقل من النصاب)؟

كسرة ثابتة :
أخبار ملف خط هبثرو العند النائب العام شنو(ووو ووو ووو)؟




تعليقات 41 | إهداء 0 | زيارات 7804

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#461203 [بنياس]
5.00/5 (1 صوت)

09-04-2012 10:57 PM
حسع المشكلة ما في الخط!!!!
المشكلة بقت في (القصاص) المباري الأتر.


#461174 [محمد جمال]
0.00/5 (0 صوت)

09-04-2012 09:21 PM
الحاصل يا أبو الجعافر يا أخوى إنو الناس دى محتاجة للمفتش كرومبو وبعدين فى جايزة مالية مقدرة للإجابة الصحيحة زايدا وظيفة فوق للمحترمة اصبر شوى


#461027 [أنا أمدرمان]
0.00/5 (0 صوت)

09-04-2012 03:44 PM
هي سرقة غير حديّه وذلك لأنها وقعت علي المال العام وهو مملوك لعامة الشعب بما فيهم السادة الحراميه وذلك درءاً للحدبشبهة المِلك إذ أن الشخص لاُيتصوّر أن يسرق ِملكهُ,ولهذا نقول للشعب الفضل بل راسك ساكت والعندو حبوب ضغط ولا سُكري ولا قلب أخير يبلعها من سكات , هذا طبعاً إذا إستثنينا أخذ الحكومة بالأحوط وإعمال فقه السترة مراعاةً لعرض وسمعة السادة الحراميه ففي هذه الحاله ننصح أصحاب الأمراض المزمنة والقلوب الرهيفه وكل من تهمة مصلحة الوطن والمواطن أن يبادر ويواظب علي الشهادتين لأن الأجل مامعروف وأخير نحاول نضمن الآخره لأن العاجلةِ سيكون أمرها قد إنقضي...وربنا يكضب الشينه!!!


#460997 [سوداني وبس]
0.00/5 (0 صوت)

09-04-2012 02:55 PM
سبحان الله فلانة ديك بتنيع الخطوط للمواطنين (حزب البهجة) يكشوها ويصادروا خطوطا ويسجنوها ويغرموها وفلان داك (حزب الجبهة) يسرق الخط ويبيعو يكرموهو ويرقوهو ويحفزوهو هو واخوهو.سبحان الله مع انو نفس الحروف .وزي ما قال المسنوح ناس بالسمنة وناس بالزيت والغريبة السعر واحد


#460987 [سوداني وبس]
0.00/5 (0 صوت)

09-04-2012 02:38 PM
السرقة دي حدية ونص وخمسة هسة الخط ده لو شربتو ما بدوك اربعين سوط؟


#460792 [خالد فارس]
0.00/5 (0 صوت)

09-04-2012 10:37 AM
العم الفاتح خط هثرو ملولو وما سمح عشان كده الحكومة باعتودايرة تشتري خط الرقعةهاهههههههههههههههههههههه0


#460701 [ود الجد]
0.00/5 (0 صوت)

09-04-2012 09:22 AM
انت ماسمعت يا أستاذ جبرة انو في واحدة منقبة قبضوها في مطار الخرطوم عشان باعت اراضي الدولة والظاهر انو بتاعين خط هيثرو ديل لوما اتنقبو ماحيقبضو عليهم وطبعا ماحيتنقبو وبالتالي لن يقبض عليهم والموضوع كلو حيكون نقاب في نقاب


#460563 [سوداني سوداني]
5.00/5 (2 صوت)

09-04-2012 03:46 AM
سلام ورحمة وبركة ،، خط هيثرو سرقوا محمد عبد العزيز ذات نفسه ، يعني الحكومة بتسرق البلد بنفسها ، والكبار شخصيا ساندين محمد عبد العزيز والكبار ديل أولهم المدعو شيخ علي عثمان محمد طه ، دايرين شنو تاني ؟ أها عرفنا منو الحرامي ، كدي وروني حتعملوا شنو ؟ !


#460544 [الطاهر حسب الرسول]
0.00/5 (0 صوت)

09-04-2012 01:42 AM
اسمعت اذ ناديت حيا ............ تنفخ في قرب مقدودة


#460542 [ابو]
0.00/5 (0 صوت)

09-04-2012 01:22 AM
عمك جبره والله خط هيثرو ده احسن تختاهو أنا سمعته الجماعه اتفقوا مع واحد قناص من كينيا عشان يقنص ليك يا عمك والكيني وصل الخرطوم بس المشكله قال ليهم جيبو لي صورتو قبال الصلعه والجماعه كايسين للسوره ومالاقنها غايتو انته وحظك!!!!


#460523 [ابو علاء]
0.00/5 (0 صوت)

09-04-2012 12:14 AM
اشكرك الاخ الاستاذ الفاتح السلام عليكم .لكن والله ماعارف كان الناس ديل سووا فينا شنو لولا عين امريكا المسلطة على الحكومة وبعض التاب امثالكم يجزيكم الله خير


#460460 [انتفاضه]
0.00/5 (0 صوت)

09-03-2012 09:40 PM
يا جبرا على طارى اوشيك ذكرتنا بقصة ادروب مع حارس المخزن انت حقه تشيف قندرانات ما تشيف امكن اوشيك لسع ما شيف


#460452 [جبورة]
5.00/5 (1 صوت)

09-03-2012 09:27 PM
أقرأ النكتة دي يا (شيخ الفاتح)..
قالوا واحد من أهلي البقارة جا من البادية للمدينة (أول فشة)، ونزل عند واحد قريبو عمدة القبيلة.. ولما وكت الغدا جا، العمدة جاب صينية مكلفة.. الباري ما ضاق أكل زي دا قبل كدا.. الناس كلهم قاموا إلا هو، نسف الصينية كلها، ولما غسل إيدينو لقى شايي (صاموطي) قدامو.. شرب تلاتة كبابي حتة واحدة.. قام سأل العمدة: إتا يا العمدة الأكل دا سوتو مرتك؟!! أجاب العمدة بنعم.. قال: والشاهي كمان: قال العمدة نعم.. قال الأعرابي: عليك الله يا العمدة المرة دي كن قنع منها سلمني ليها صرة في خيط من إيدك لي إيدي..
وباقي لي يا استاذ جبرة الخط دا سلموه صرة في خيط لرئيس لجنة النقل بالبرلمان.


#460406 [سند]
5.00/5 (4 صوت)

09-03-2012 07:26 PM
(وزير الدولة بوزارة النقل : إكتمال التحقيقات في بيع خط هيثرو) تصريح اخر بعد اكثر من شهرين ؛( كشف رئيس لجنة النقل بالبرلمان أوشيك محمد أحمد عن إقتراب الفراغ من التحقيق حول خط هيثرو المفقود).هسة عليكم الله القرف من الحكومة و لا من الشعب الخانع ده.الدلاقين ناس الحكومة ولا الشعب المهود ده.الفاسدين ناس الحكومة ولا الشعب الخلي حق اولادة و اسرته وفرط في حق الاجيال القادمة وترك البلد لهؤلاء السفهاء عديمي الاصل . اخيرا سؤال مباشر جداً ايهما الوضيع والغير محترم:- المفرط في ماله و عرضه و كرامته ام الذي سلبه تلك الحقوق في وضح النهار ؟؟؟؟؟؟؟؟؟؟؟؟


#460385 [ودالنيل]
0.00/5 (0 صوت)

09-03-2012 06:45 PM
انت ياعمنا جبره الخط ده داير تركب فيهو طياره وشنو


ردود على ودالنيل
Saudi Arabia [الزوُل الكَان سَمِحْ] 09-04-2012 12:07 PM
ياود النيل

(سافات)!!!هههه


#460368 [همد]
0.00/5 (0 صوت)

09-03-2012 06:00 PM
الخط خلي قروش الزكاة بتاعت القناة مامشت فينا لحدي التحقيق وصل اخروا وقالوا انتظروا يوم القيامة


عشان كدا كل الحاجات منتظرا يوم القيامة يايوم القيامة ماتسرع تسخن لي نار عذابهم


#460327 [khalid m ali]
5.00/5 (1 صوت)

09-03-2012 04:38 PM
يأستاذ خط هيثرو دى معاه هنغر مملوك لسودان اير داخل مطار هثرو ولا مو كدى .


#460323 [ubedalla]
0.00/5 (0 صوت)

09-03-2012 04:24 PM
ي جبرا هو الفساد العلي الارض الناس ماعارفين احققوو فيهو وانت داير ليك تحقيق وتكوين لجان في فساد علي الهوا
واللة انحنا مع المفسدين ديل نكون في الهوااااااااااااا


#460318 [3Atel]
0.00/5 (0 صوت)

09-03-2012 04:11 PM
يا عمنا جبرة ياخى الناس ديل احسن ما يفتحو التحقيق فى الخط دة انتا عارف براك انو لجان التحقيق واللجان المنبثقة منها حا تستهلك نص ميزانية البلد فى المخصصات ونثريات الغدا والعشا وتعمل لينا بند بتاع مأكلة وبعد شوية يجى الوزير يقول فى عجز فى الميزانية دايرين نزيد البنزين والمواصلات ..نحنا ذنبنا شنو الشغلة تقع لينا فى راسنا بى سبب واواتك ديل ؟ خليها ماشة كدة واكان على لندن هينة نحنا بنصل ليها بالمصرية ولا الكينية مالنا ومال الطيران "البطاقش " الجبال.


ردود على 3Atel
United States [ابو] 09-04-2012 01:09 AM
هاهاهاهاهاهاهاهاهاهاه والله اجمل تعليق حقيقه إحنا مالنا ومال الطيارات البطاقش في الجبال عارفين المسؤل بتاع الطيران حقنا ده لو في اصلو طيران قال شنو قال( السبب في الطيارين الروس ما عندهم خبره بالمنطقه) عليك الله ده ما بخجل وين الطيارين السودانين طبعا كلهم هاجروا وتركو البلد غايتو البركب طياره سودانيه تاني اشيل معاه كفنو .....هي لله *


#460304 [abbas9999]
2.00/5 (1 صوت)

09-03-2012 03:52 PM
ولا اقول ليك والله الناس ديل اكونو ادو الخط دي لي الناس ديل شده وقبضو القروش وجرجرت التحقيق دي شكلو عشان المده تتم وبعد داك اقبلو عليك


#460302 [abbas9999]
1.00/5 (1 صوت)

09-03-2012 03:50 PM
في موجود انتو القال ليكم اتسرق منو ماتستبعد ارجعو بي باقي قروش البترول واقول ليكم من سرقو


#460275 [قرفان خالص]
4.75/5 (6 صوت)

09-03-2012 03:02 PM
يا جبرة يا جمرة يا حمرة

قول خلاص استردينا الخط واتنفسنا الصعداء .من وين نجيب طيارات تمشي هنااااااااااااك

ونحن طياراتنا بعد اتنين كيلو من المطار نفسها بقوم ( دا لو ما دقت الدلجة قبل داك )؟؟؟

أخخخخخخخخخخخ


ردود على قرفان خالص
[3Atel] 09-03-2012 05:38 PM
مرحب يا قرفان وينك من زمان ياخى ....طولتا.


#460274 [ده الكلام]
0.00/5 (0 صوت)

09-03-2012 03:01 PM
اولاً السرقة في الحكومة دي مقننة لفهم واحد للمنهج الترابي بوجود شبهة الاشتراك في المال العام لذلك افتوا بجواز عدم اقامة الحد لمن سرق المال العام طبعاً ده رغم ان من يسرق المال العام يكون اضر بالشعب السوداني كله وليس بفرد بعينه ولكنهم نسوا أو تناسوا (نحن لا ننسى وان طال الامد) بأن هناك عقوبات تعزيرية يمكن أن تقوم مقام الحد الشرعي مثل القطع بالخلاف لمن سرق المال العام.


#460271 [مهاب الفاتح]
0.00/5 (0 صوت)

09-03-2012 02:58 PM
عمك جبرا خلى الامورلله وربنا يلزمنا الصبر معاك كلها سنة سنتين وتتباع واى حد ياخد نصيبوا


#460253 [سلمان]
0.00/5 (0 صوت)

09-03-2012 02:29 PM
كلام صاح


#460238 [fax]
0.00/5 (0 صوت)

09-03-2012 01:54 PM
الموضوع ماشي كويس يا جماعة الأستاذ جبرة أضاف جملة العند النائب العام خلوا عندكم صبر


#460209 [سوداني موجوع على الوطن]
0.00/5 (0 صوت)

09-03-2012 01:21 PM
لسان حال هؤلاء يقول الفساد بحر و نحن كيزان له ...إنه فساد فريد فهو فساد أرض - جو مزق الوطن بشكل غير مسبوق يجعل الحليم حيرانا ...


#460206 [يحيي يعقوب]
0.00/5 (0 صوت)

09-03-2012 01:19 PM
جبرا الله يصبرك علي البلاء والابتلاء ويديك العافيةوطول العمر حتي تنتهي التحقيقات وطول بالك كلها 3 واوات والسنة تنتهي وماعارف بعد تكتمل ال12 واو حتبدا باي حرف تاني نصيحتي ليك بعد اكتمال العام الواوي تكون كالاتي ووو ووو ووو ووواي واي واي واي الحقونا ورونا الخط وين بس


ردود على يحيي يعقوب
United States [شاز افاق رقم 1] 09-03-2012 06:41 PM
اها بعد ما يتويوي ويقول وووب واحي ندخل في (استغفر الله )

United States [3Atel] 09-03-2012 03:59 PM
أهههههههههههههه


#460204 [abdu]
5.00/5 (2 صوت)

09-03-2012 01:18 PM
الاخ جبرة اولا لدى اقتراح بان تكون كل شهر فى واو زيادة يعنى الواوات بعدد الشهور وذا المسالة ماشة مدغمسة لسه اعمل كل ثلاثة شهور واو وكده.
ثانيا الباع الخط تفتكر قاعد مربع يديه منتظر الجماعة يجوا يسالوه انت بعت والا لا ؟
المؤكد انو حرك كل ملفات الفساد العنده كوسيلة ضغط وحبجيبوا واحد من امبدة ويلبسوا بدلة ويقولوا اهو الباع الخط ويحكموا عليه بعشرة سنة سجن ويقنعونا انوا لقى الخط فى الشارع والا جنب الكوشة بتاعة السبيل وماشى باعوا من غير ما يكلمهم ( وطبعا هو منو والصفة البتخولوا يبع الخط ممكن بعض الاوراق تفى بالغرض .
صاحبنا طبعا حيقنعنا انو فعلا باع الخط واشترى بثمنه بيت فى دار السلام وواحد فى الحارة 41 واتنين امجاد و3 ركشات وعرس بالباقى .
والسناريوا الحقيقى لازم يكون فى زول كبش فداء بعيدا عن الحوش الذكره اسحاق احمد فضل الله ويقبض الثمن ويقبل الاتهام وبعد سنة اواتنين القضية تتنسى والرئيس يعفى المسجونين فى العيد.

( نسوا الله فانساهم انفسهم ) اين تذهبون من عذاب الله
قال الرسول صلى الله عليه وسلم فيما معناه ( من ولى من امر امتى شيئا فبات وهو غاش لهم لم يرح رائحة الجنة )


#460194 [Nasser]
0.00/5 (0 صوت)

09-03-2012 01:08 PM
الاستاذ الفاضل الفاتح جبرا

التحية و الانحناء لك ومحاولات فضح الفساد باسلوبك الساخر المتهكم على عصابة الانقاذ

سؤالك للعلماء الاماجد بنتوقع الاجابة عليو من الاماجد بأن النصاب قطعا مستوفى و لكن فى قوانين الشريعة موديل 83 مافى حد فى المال العام


#460183 [عادل نقد]
0.00/5 (0 صوت)

09-03-2012 12:44 PM
التحقيق ستظهر نتائجه وستفراء بين سطوره شليل وين راح


#460172 [اوهاج]
0.00/5 (0 صوت)

09-03-2012 12:20 PM
يا اخى ماتسمع كلام اولادك فى الفيسبوك وتروق الحكاية وبلاش من الكسرات دى على فكرة سمعت بكسرات ابوعلى؟كان ما سمعت عنها اسال اخوانا الهلالاب والكسرةدى عشان نطلعك شوية من دافورى حماد واوشيك لانه لو الله لو قعدت تبارى (من مبارة)الجماعة الديل بعدين لاتنفع فيك قسطرة ولا مسطرة


#460164 [hamid]
0.00/5 (0 صوت)

09-03-2012 12:07 PM
أستاذ الفاتح لسلامتك أبعد بعيد من الطيارات


#460161 [ابوخالد]
0.00/5 (0 صوت)

09-03-2012 12:05 PM
أنا قلت ليك ياودجبرة كل يوم ضيف واو زيادةعشان أولادنا اشوفو ناية الخط شنو للاننا ماحانحضر النهاية


#460144 [hamid]
0.00/5 (0 صوت)

09-03-2012 11:49 AM
يا استاذ موضوع خط هيثرو دا موضوع بسيط بتعالج - لكن حقو تتاكد لينا من خط انابيب البترول اوع يكون (اتسرق) كمان ونحن ما عارفين لانو اتفاقية النفط شبه تمت ونحن خايفين لو فتحو فيه البترول يلقو ( المواسير ) مافي و الخام يجري في السهلة ساكت ( والاتفاقية تتلغي )- غايتو الله يصبرنا بس


#460139 [بتاع جرجرة]
0.00/5 (0 صوت)

09-03-2012 11:39 AM
يا أستاذ بعض خبثاء المدينة، قالوا اصرارك على حكاية (كسرة) خط هيثرو دي، أنك ما عايز تسكت (ساكت !!)


#460130 [مفجوع]
3.00/5 (2 صوت)

09-03-2012 11:26 AM
الأخ / الفاتح جبرا
عايز النجيضة ...!!
كان الزول الباعو واصل وضهرو قوي قطع شك لن ينتهي التحقيق إلا بعد زوال الإنقاذ .. وكان زول ضعيف سيكتمل .. ياخي الدغمسة ماعندهم ناس الإنقاذ ...
خليك من خط هيثرو الماباعتو الإنقاذ شنو ...ياأخي دي باعت أرض السودان بي ناس ...
ماتستبعد يجي يوم واحد شايل أوراق رسمية ويطردنا من السودان دا ...
طبعاً المؤتمرجية أمنو نفسن هاك يافلل وعمارت في ماليزيا ودبي واالقاهرة ..
بس الغبي المتعافي شايف نشاطو في لندن ...


ردود على مفجوع
Sudan [بت الخرطوم] 09-03-2012 04:07 PM
منو القال ليك اسال منو فى ماليزيا تلقى العجب ما عجب نجمة المسالمة عجب عجايب الدنيا البيقت اضعاف مضاعفة بسبب المتعافى واخوانه فى الله

Ukraine [alx] 09-03-2012 04:02 PM
و ابعو العدة ..... كمان


#460104 [ابو كلوة]
0.00/5 (0 صوت)

09-03-2012 10:55 AM
تنبيه...
ارجو يا استذ جبرا العودة الى الكسرة الثابتة السابقةباعتبار ان التحقيق لم ينته بعد وان القضية لم تصل الى النائب العام و....محلك سر.


#460085 [الزوُل الكَان سَمِحْ]
0.00/5 (0 صوت)

09-03-2012 10:41 AM
يا أستاذ جبرا

شايف واواتك بقن 9 والتحقيق له ما انتهى..أنا خايف الواوات تصل تزيد كل فترة حتى يصل عمر الإنقاذ لما تنبأ به بلة الصائم ( يعنى زى 35 سنة كدا) ويكون التحقيق لسه مستمر


#460062 [جقلبة]
0.00/5 (0 صوت)

09-03-2012 10:16 AM
ههههههههههههههااااااي والله ياود جبرة عافي منك بتعرف تنجض الفارااات ديل كويس , بس ان شاءالله مايقوموا عليك ويشنفروك ويلحقوك أمات طه .....


#460049 [أدريس حسن سليمان]
0.00/5 (0 صوت)

09-03-2012 10:02 AM
لسه يا أستاذ الفاتح ما عارفين السارق منو والقصاص متابع الأثر لقاه منتهي عند القصر


ردود على أدريس حسن سليمان
United States [ابو] 09-04-2012 01:14 AM
رايكم شنو يا ناس نعمل مسابقه لكل الناس والسؤال تفتكر منو الباع خط هيثرو ؟ يلا كل واحد يخمن


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |الصوتيات |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة