المقالات
السياسة
ارشيف مقالات سياسية
بعوض ولاية الخرطوم لا ينقل الملاريا.. !!!
بعوض ولاية الخرطوم لا ينقل الملاريا.. !!!
09-04-2012 09:37 PM

وزير الصحة : البعوض الموجود حالياً في ولاية الخرطوم ليس ناقلاً للملاريا !!!

حاتم الجميعابي ::
[email protected]

غايتو الواحد بقا تجيهو لفة راس لما يسمع تصريح مسئول حكومي، وشو يتقلب وينضم براهو زي الزول المجنون ومرات يهضرب بالليل، ويخاطب نفسو يا ربي الراجل ده قاصد شنو بي كلاموا ده، الكلام كلو بقا في الفاضي الحاجة الوحيدة الفي المليان انك تقوم مباشرة بعكس الكلام البقولوهو الوزراء ديل، الواحد ترياااان ومندي ولابس بدلتو كرفتتو وقاعد يصرح، وبعد ده اريتو لو بقول كلام نافع، كلام الطير في الباقير، مامون حميدة وزير الصحة بولاية الخرطوم، الأسم ده ما غريب عليكم!! رجل فاضل .. ومن الناس الورعيين والبخافوا الله في خلقوا وبصلي في الجامع .. وزول فقير جداً بس بمتلك مستشفى الزيتونة " الما خمج" وجامعة طالب الطب فيها بدفع أكتر من 18 مليون تقريباً كل سنة، يعني من عامة الشعب غايتو ده البعرفوا عنو لكن الراجل بقولوا بطنوا غريقه، اريتا بطنكم .. يعني بكون عندو كم مستوصف وكم صيدلية وكم مستشفى وحاجات تانية حامياني..
نرجع لي كلام الراجل في تصريح لصحيفة السوداني قال "مبيدات رش الذباب والباعوض لا تسبب السرطان" وتحت لا دي ختو خطيين متوازيين لانو لا، بتفتح باب الشك في كلامواا، الراجل من دون سبب قال انو ما بتسبب السرطان، في حين انو مافي زول قال كده " انها بتسبب السرطان"، لكن كل إناء بما فيه ينضح، فقد ذكرت تقارير انو المبيدات الرش تسببت في حساسية جلدية أنتشرت في ولاية الخرطوم، وده على حسب منظمة الصحة العالمية يشكل خطورة على حياة الناس ، و أنو المبيدات والرش بالطائرات أثبتت خطورتها وشبهات بالإصابة بمرض السرطان، يعني الموضوع حسب المنظمة بقا شبه محظور لكن الراجل المحترم مامون قال ده كلام ساكت، ويمضي في الكلام ، حيث أقر حميدة بأن المبيدات التي استخدمتها وزارته لم تظهر النتائج المتوقعة لها في القضاء على البعوض والذباب لافتاً إلى أن البعوض ما زال ينتج كميات كبيرة جداً رغم الرش الرذاذي والطائر والمباشر. وأوضح بأن البعوض الموجود حالياً ليس ناقلاً للملاريا وأنه توجد بالولاية (670) حالة إصابة بالملاريا فقط.
يعني المبيدات طلعت فشنك ساي، حتى الباعوض عرف قيمة الحكومة، ومبيداتا الضاربة، يا ربي بتكاثر مالوا الباعوض ده وداير يسبب ازعاج للحكومة والوزير يعني القصة بقت خارج السيطرة، سؤال بسيط ليه الباعوض ما يتكاثر، والبلد كلها عبارة عن ترع واحواض للباعوض، ليه الباعوض ما يتكاثر والصرف الصحي في البلد زي الزفت، ليه ما يتكاثر والميادين العامة مليانة موية ولغاية اسي ما نشفت، وليه ما يتكاثر الحكومة بس شغالة بي جمع القروش من الناس، وصحة المواطن دي في نهاية أولوياتها.. غايتو الإختشوا ماتوا، لكن صحي كلام مامون ما منو خوف أنو الباعوض الموجود ده ما ناقل للملاريا، ياربي بنقل البترول مثلاً، ولا ناقل لي شنو بالضبط، كلامك ده تقولوا لي زول ما قراء أحياء قبل كده !!!. غايتو عندكم مبررات أبليس السادي خدمة ما بقولا، وكمان بتكلم عن أنو في الولاية في 670 حالة بس دي طبعاً تصريحاته هو أو المسجلة في حالات ما مسجلة لغاية اسي، أستغربت لما لقيت ناساً لينا وعددهم (3)ضارباهم الملاريا، ما مشوا فحصوا عرفوها بالخبرة وضربوا حبوب " الفانسدار" أتخيل أنو في كم اسرة مضروبة ملاريا يا مامون، زينا ناسنا ديل، حالات غير مسجلة، الملاريا في البلد دي بقت صديقة الأسرة يا "معلم" يعني الزول يحس بالملاريا يمشي طوالي الصيدلية يشتري الحبوب ويجي يتندل ينوم، بالله نحنا لغاية اسي شعب بتنهكوا الملاريا، يعني الإلتهابات الظهرت حديثاً دي لسا ما جاتنا وأمراض دول العالم المتقدمة لو جاءت السودان إلا تبقى طفرة ساي.
غايتو أنا لو في محلك يا سعادة الوزير كان سكتا وصميت خشمي ده علي بدل اجي اقول الباعوض دي ما بتنقل الملاريا، ياربي قلم حبر ولا شنو تجي تمص دم الإنسان وتمشي تكتب بيهو في المدرسة زي المحبرة الزمان ديك !! احتمال يا "معلم" غايتو نحنا راسنا ده ما فيهو قنبور، و جنس حركاتكم الجبانة دي بنعرفا ومبرراتكم الشافع الصغير في البلد دي نقشا خلاص، يا اما تقولوا كلام يخش العقل ولا احسن ما تصرحوا، وبعدين خليك عميييق يا مامون، انت زول دكتور ومقامك محفوظ جنس التصريحات بتاعة الكيزان دي شينة في حقك، والدكتور سمعة ومواقف ولما سمعتك تنتهي وتظهر للناس كزول بتصرح ساي وكلامك ما بخش العقل، يبقى حكمتا على نفسك بالفشل الذريع.
آخر الكلام :
غايتو كلام مامون ده ما تدهو الواطة أحسن تخلو بالكم منو خلوا الكلام كلوووو وابقوا في " لا" تسبب السرطان... يعني الحساسية الجات للناس دي بتكون أشاعة ساكت فاكنها اولاد الفيس بوك، بعدين الراجل ده اسي كان هناك ومافي اي حساسية ولا ملاريا، فالمؤمن مصاب، وبعدين الملاريا دي كفارة للذنوب الكتيرة القاعد يعملا المواطن السوداني..
يا حليل زمن أبواتنا الزمان.. لما الزول يقول زي كلام مامون ديل يلموا فيهو "بالمطرق" بتاعة الخيزران ويدهوا (3) جلدات طوووووووووالي كلاموا بستعدل !!!


تعليقات 3 | إهداء 0 | زيارات 1307

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#461443 [محمد]
3.00/5 (2 صوت)

09-05-2012 10:31 AM
تسلم يا جميعابي...
انت عارف انتو (أنثى الأنوفليس) هي التي تنقل الملاريا ... وبما انو المبيد مضروب فالذكور بيكنوا ما أثر فيهم (يعني بيقاموا) بس الأناتي لانو بيكون جسمهم مجلبط بالكريمات وبتكون جاتن حساسية وجمسم الأنوفليساية دي بقى أحماااار (من الدم والحساسية)والأناتي كلهن ماتن وبقو بس ذكور الأنوفليس وذكور الما أنوفليس وديل طبعا ما بينقلوا ملاريا ديل بس بيعضونا ويمصوا ليهم شوية دم كدا وخلاس ما مضرين شديد (يعني بس شوية سهر وحكة وفقر دم)...... غايتو كلام الدكتور البروفيسور زول عنقالي ما بقولو.!!


#461399 [قفة]
3.00/5 (3 صوت)

09-05-2012 09:47 AM
أقول ليك حاجة عشان تستغرب مسؤول كبير قال ما بصرف مليارات على تصريف موية مطرة بتنشفا الشمس وبعد كدة أحكم، نستنى الشمس تقوم بالتصريف والتنشيف بدل الولاية وننتظر البعوضة تلقى دمنا باااااااااااااارد وخالي من الدسم تعتذر لينا براها وتمشي مننا ومن بلدنا تشوف ليها بلد تاني ناسه دمهم أجود من دمنا بمقاييس الناموسة الفاهمة دي، أو نداعي الناموسة في صلاة الجمعة وصلاة الليل لمن ربنا يقصف أجلها أو يصيبها بالعقم عشان ما تتكاثر وتكتل ناسنا المساكين، عندنا خيارات كتيرة خلاص عشان ننجى من المحن. وملخص كدة ديل ما شايفين من حقنا نعيش المعيشنا شنو ما نتكل ويخصلوا مننا ويتفرغوا لحاجات أهم من الشعب السوداني الفض البطل الرحل .......... لآخر ال......


#461374 [Hamid]
3.00/5 (2 صوت)

09-05-2012 09:29 AM
انت امبارح بالليل ماحضرت برنامج المحطة الوسطى ولا شنو - طبعا جابوا صحبك بتاع الخرطوم خالية من الملاريا لمن سالوه عن هذا العنوان (الخرطوم خالية من الملاريا) قال دا كلام ساكت هم ما قاصدين انو تكون خالية تماما يعني العنوان ما بعني دمار البعوض كله - غايتو جنس كلامات الله يصبرنا بس


حاتم الجميعابي
مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة