المقالات
ثقافة وآداب، وفنون
استيلا قايتانو
آلية خالتي فوزية في الرد على الجنوبية
آلية خالتي فوزية في الرد على الجنوبية
10-08-2010 04:42 PM

آلية خالتي فوزية في الرد على الجنوبية

استيلا قايتانو

خالتي فوزية هي أم بنت \"العرب الدقتني\".. عندما دخلت ابنتها وشعرها أشعث وفي جسمها غباش أثر المعركة التي خرجت منها منتصرة طبعاً.. ماكان من أمها الا أن صرخت
: دا شنو يا بت البشتنة دي والعولاق دا؟
ردت البت:اتشاكلنا مع استيلا.. دقيتها..
فما كان من أمها الا أن لفحت توبها وولت: سجمي.. سجمي.. دقيتي بت الجنوبيين؟
مالك دايرة ترحلينا من الحلة يا بت اللذين.. وخرجت تطلب الصلح، قبل أن يهجم عليها الجنوبيون.. شر هجمة.

خرجت تعوعل.. ووب عليّ.. ووب عليّ.. الليلة نعمل شنو كان جونا؟ وتوصي أولادها بقفل كل الأبواب والشبابيك، وألا يفتحوا لأحد، وتلعن ابنتها الشقية.. أتت إلى أمي تفدي أولادها من الهجوم الكاسر للجنوبيين.. اذا بقت علقة.. تأخذها قبلها وتخمد النار في مكمنها.. واذا بقى صلح كمان الحمد لله..

وكان بيتنا في ذاك الوقت مكتظاً بالسكان، عندما زادت موجات النزوح. ثلاث خالات وأولادهم، وأولاد أعمام، وأولاد لايمتون لنا بصلة، بس جنوبيين.. قاعدين في أوضة وبرندة وحوشين كبار، وشوال فترتية تاكلنه في الحيطة.
فخيشت أن يهجم هذا الجيش العرمرم عليها، جات ودقت الباب، فتحت إحدي الأخوات.. سألت من أمي وأتتها.. وتَبَادلْن السلام.. ردت أمي بابتسامة طمأنتها.. ثم قالت: معليش البنات اتشاكلوا.. وبتي دي هسي دقيتها دقة الكلبة.. هديك تبكي.. قلت: أجيك أعتذر ليك..
ما كان من أمي ألا أن ضحكت!!
لا أدري هل هو من تلطيف الاعتذار للجو؛ أم هو انتصار خفي لها، لأن (العرب الحقارين ديل راسهم جا).

ثم قالت: هسي أنت جاي من هناك عشان دشمان بتاع شفع؟ ما شفع أصلهم بتشاكلوا الليلة وبكرة بيلعبوا تاني ما بعض. ما في داعي نحن الكبار نخش فوقو.

كسرت الدش في يدها.. مش؟. ثم فضلتها الى الداخل وشفتن الشاي سوا ومنذ ذلك اليوم لم يفرقهن شيء سوى الرحول، وبت العرب الدقتني أصبحت من أقرب صديقاتي.

فآلية خالتي فوزية في التعامل مع الجنوبيين في ذاك الزمان مبني على الخوف؛ لأنهم طوالي بدقوا من طرف.. بكسروا كسرة نضيفة.. فكان ذلك حاجزاً منع الاقتراب سوى بحذر شديد.. وكان تعامل أمي مع العرب مبني على أنهم حقارين، فصنعت حاجزاً منعت الاقتراب لأن اقتراب الحرب يا اما لمصلحة أو للحقارة.. صنعت شخيط كي يقف العرب بعيد منها. وكانت خالاتي يثرن مشكلة كبيرة فقط اذا سألهم أحد: انتو جنوبيات.. طوالي الشرارة تتطاير حتى عيونهن : جنوبيين مالهم.. تعالي هنا.. انت قاصد شنو آه.. وكفتك.. كفتك.. الشكلة تقوم في مجرد سؤال؟

في ذاك الزمان كانت كلمة جنوبي نبذة!! ولا أدري لم يعتبرونه نبذة؟ أظنو لأن العرب (حقارين) ما بقولوا جنوبي ساكت، بكونوا قاصدين حاجة تانية أو لأنه لم يكن هناك شئ يفخرن به كأنسان جنوبي يحمل كل سلبيات الحرب.. الفقر.. والجهل.. والمرض والمزاج الموحش، وكمية من العقد التي ليس لها أول ولا آخر.

فيا أمي وخالاتي وخالتي فوزية آلياتكن لن تجد مساحة في هذا الزمان؛ لأن جنوبي اليوم ليس جنوبي الأمس وعرب اليوم ليس عرب الأمس، فهناك جيل جديد آليته الحوار.. كسر كل الأسوار للتعريف بذاته. ومستعد للتعرف على الآخر دون خوف أو علقة لأنو الجداد خلي الشكل.

عندما نسمع من يسأل: هل انت جنوبي؟ نرد بكل فخر وابتسامة للضرس الآخير بنعم، لأن هناك ما نفخر به.. علم.. ومعرفة.. نفرض على الآخر أن يحترمنا.. يستمد ذلك من احترامنا له ليس بالقوة ولكن بقوة الأداء ولفت الانتباه يا بيجاجية..
والتفكير في العرب أنهم حقارين بس لمجرد أنهم عرب هذا تفكير سودان قديم.. والتفكير في الجنوبيين أو كل المهمشين على أنهم قاعدين على الهبشة وبدقوا أيضاً تفكير سودان قديم يقود الى الانغلاق وبالتالي نعود الى الصفر.

نحن جيل اليوم نفتح قلوبنا للحوار والتعارف والتعايش.

تحذير:

أوع يكون كلامي دا أثر وتمشي تتفاصح قدام جنوبين في زقلونا وطردونا وتقول ليهم جنوبين..!!.. (مخير).. كان أخدت علقة ما علي.. لأنو السودان دا لسه ما اتجدد كله ولسه في عرب حقارين.ز ولسه في جنوبيين بردوا على الاستفزاز بالدق.ز وأعمل حسابك من المطرة.



تعليقات 36 | إهداء 2 | زيارات 4412

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#60985 [ Mohammed Alkhalil]
0.00/5 (0 صوت)

12-18-2010 08:56 PM
الاستاذه استيلاء
لكى منى كل التقدير والاحترام وتقبلى اعتذارى عن المدعو عمر وامثاله
فهم معذورين , لا اظنهم يدركون ما ترمين اليه بكتاباتك الموفقة,,,
واصلى وفقك الله ,,,,



#38442 [محمد الدخري]
0.00/5 (0 صوت)

10-24-2010 12:40 PM
استيلا قايتانو اجبرتنى على حفظ اسمك الذى صار تعويذه فأنت أروع من رائعه وأجمل من جميله وأعمق من عميقه فبالجد ما عارف أوصفك ولا اشكرك ولا اشكر الأم الولدتك ولا الظروف الربتك وغرست فيكي كل هذه المفاهيم الجميلة للأنسان الحقيقي ، لكن أرجع وأقول شكراً لله اولاً وأخيراً ..... اختلطت لدي الأحاسيس والمشاعر فما عارف هل أنت نسمه في عز الصيف أم رصاصة رحمه في قمة العزاب والألم.
بس خايف عليك لأن الأشياء الحلوه دائما ما بتستمر .


#37925 [NJFA]
0.00/5 (0 صوت)

10-23-2010 04:12 AM
VERY GOOD WORDS BUT STILL THE PROBLEM IS THIER BTWEEN ARB AND JNOPIA(؟) (؟)


#37341 [ود الشيخ]
0.00/5 (0 صوت)

10-21-2010 02:28 PM
استيلا لك كل الاحترام والتقدير وليت كل من يتحدث عن السودان يسلك تلك السماحه التي نفتقدها كثيرا هذه الايام ;) ;) ;)


#35410 [موسى اسماعيل حاج احمد]
0.00/5 (0 صوت)

10-17-2010 10:25 AM
انت امراة نخلة


#33748 [واحد]
0.00/5 (0 صوت)

10-13-2010 12:32 AM
رائعه تذكرت الرائع المبدع الذى نهل من واقع السودان وسكبه قصصآ كما الشهد الاديب الطيب صالح كلاكما يغرف من ذات النبع
استيلا قايتانو اجبرتنى على حفظ اسمك الذى صار تعويذه


#33007 [تميم]
0.00/5 (0 صوت)

10-11-2010 12:42 PM
الظاهر انو يا استيلا كان تكتبى \"للسودانيين فقط\" ما \"للجنوبيين\" او \"للشماليين\" لانو مقالك بعبر عن و موجه لى ناس اخريين ما ذى عمر ..
الذى عمر وزول كسلا بيقرءوا المقال وفى اذهانهم الصوره اللى رسموها ليهم عن الجنوبى ده ما بخليهم يفهموا المغذى التصالحى للمقال ...
صاح يا ود كسلا الجنوبيين عندهم عقد نفسيه بس العملها ليهم منو؟ ما الشماليين لكن الحكومات الحكمت باسم الشماليين - انت والى ذيك محتاجين تفرقو بين الاتنين ديل- دى حقيقة ما بدركها من الجنوبيين الا العاشو فى الشمال والاتداخلو مع شماليين ما ذى عمر وود كسلا.. السؤال التانى العقدة العند الجنوبيين دى جاتم كيف؟ الاجابة موجودة فى العنف الفائت للحد ضد المدنيين فى مناطق الحرب فى الجنوب او جبال النوبة او النيل الازرق والان فى دارفور.
لكم ان تتخيلوا صبيا فى العاشره او دون يشاهد امامه قتل اقربائه من قبل افراد اثنيه واحدة انظلمه ان حمل حقد الدنيا كلها ضد اولئك القوم ؟ او نستوعب حالته ونساعده فى ان يتخطاها؟


#32948 [العمده]
0.00/5 (0 صوت)

10-11-2010 10:50 AM
أولاأهنيك علي كتاباتك الجميله وثانيا انت ما شفتي حقاره بتاع عرب يا استيلا قبل فترة ليست بالقريبة كنت مغترب في بلاد العراق والعراقيين مشهورين باستهتارهم للسودانيين عشان لون بشرتهم والشنه وكده... والكلام ده بينطبق علي جميع البلاد العربية،،، ما علينا كان لدي صديق عراقي وبحسبه من الطبقة المثقفة وقال يا زول أسالك ما بتزعل قلت ليه إتفضل قال لي السودانيات حلوات قلت ليه فيهم كدا وفيهم كدا..ضحك وباستهتار قال لي(شاكو بعد السواد)يقصد أين اللمحه الجمالية بعد اللون الأسود...رأيك شنو في هقاره بتاع عرب ده


#32739 [كسلا]
0.00/5 (0 صوت)

10-10-2010 06:24 PM
الاخوة الجنوبين ديل عقدة الدنيوية ومشكلتهم نفسية قبل ان تكون عنصرية ومحتاجين الى اطباء نفسانين قبل سياسين وانظرى الى اى جنوبى امامك تجدى المشكله نفسية حتى لو اى كلمة طلعت بعفوية لاى سودانىعند الجنوبى تفسر عكس وتبقى مشكلة حتى لو فى اقله شىء


#32666 [الشفيع علي احمد]
0.00/5 (0 صوت)

10-10-2010 03:42 PM
انتي رائعه في السرد القصصي يااستيلالو كنت امنح شهادة نوبل للاداب لقلدتها هزه الفتاة الابنوسيه


#32526 [اشرف عدلان العمدة]
0.00/5 (0 صوت)

10-10-2010 09:57 AM
استيلا الظريفة الرقيقة ، لا تعدمينا من مقالاتك الرائعة التي تاتي بردا وسلاما في هذه الاجواء المشحونة غموما


#32510 [عثمان ميرغني عثمان مكاوي]
0.00/5 (0 صوت)

10-10-2010 09:32 AM
أختي استيلا سلام أيتها الرائعة وأنتي تجسدين روعة هذا الوطن الواحد .....سعيد أن أقرأ لقلم بهذا الوعي ....ودعيني أقول كل المتداخلين لنكتب بوعي في كل ما من شأنه وحدة هذا الوطن حتى لا نبكي بعد شهور قلائل كالنساء على وطن لم نستطع أن نحافظ عليه كالرجال ...ما يتحدث عنه البعض لا يوجد إلا في مخيلتهم المريضة تربينافي إشلاقات بحكم عمل والدنا عليه رحمة الله لم نحس يوماً بتمييز عنصري تجاه أي من أبناء الحي الذي يجمع كل قبائل السودان كنا إخوة نتساكن بود نتلاقى بمودةنلعب في ملعب كرة واحد تقاسمنا فصول الدراسة نفسها تقاسمنا النبقة والفولةتماسكنا في الفرح والكره نحزن لحزن بعضنا ونبارك لبعضنا كل الأفراح من عيد وطهور وزواج
قولوا لي كيف يكون حالي حال الانفصال مع من اسميه ابني : الشاب بلانتينو داو والذي أحضره شقيقي الضابط عصام من الجنوب حيث وجده يتيماً بائساً تعصف الجراح بطفولته فاحتضناه في بيتنا وتدرج في مراحل التعليم من الأول الابتدائي وهوالآن طالب دراسات عليا بجامعة الخرطوم بكلية مرموقةينادي أمي ( يمة) لانراه بل هو حقيقة أخونا الذي لم تلده أمنا وبل يبزنا في بره بوالدتنا دون رياء أو نفاق ...
لم ننظر إليه يوماً بلونه لأننا نعرف أن كلنا لآدم وآدم خلق من تراب وهكذا ربانا وتالدنا عليه رحمة الله ونشأ بلانتينو فتى فيه كل التزام الدينكا وأصالتهم أديب أريب طموح واثق من نفسه لم نحس يوماً إلا إنه أحدنا .....
هل يستطيع باقان أموم أو علي عثمان أو سافاكير أو عرمان أو نافع على نافع أن يدركوا أن مابيننا أكبر من استيعاب كل ساسة الدنيا؟
عثمان ميرغني عثمان /المستشار القانوني لوزارة الصحة السعودية
ووسأكون سعيداً أختي استيلا بتواصلك عبر البريد الالكتروني osman333444@gmail.com


#32433 [ام الحسن ]
0.00/5 (0 صوت)

10-09-2010 10:11 PM
الجنوبيين لم يتغيروا بعد إتفاقية السلام فقط انت كشمالي لم تحس بالآمهم ومعاناتهم من العنصرية في التعامل مع الشماليين وما لحق بالجنوب من جراء الحروب ،،هم ظلوا يحملون الامهم وصبروا إلى ان حقق له قرنق حلمهم وجعل الكل يحس بهم وهذا الذي تغير فأصبحنا نتغير نحن في طريقة تفكيرنا بهم ،،، ولهذا يا أخ عمر ارجو ان تعيد النظر في ودك لهم
وتعيد محبتك لهم فغالبية الجنوبيين اناس بسطاء طيبين وابقى بعيداً عن التسيس


#32377 [seeka]
0.00/5 (0 صوت)

10-09-2010 06:35 PM
الرائعه استيلالك مقادير من الاحترام.... نحن وفى اخطر سيناريو للوطن في تاريخه الحديث فعلا نحتاج الى مثل هذه الكلمات والوصفات العلاجيه وان اختلف معك بعضهم جنوبيين كانوا ام شماليين فوق كل ذلك فان حديثك هو السراط المستقيم وعين الصواب....... لانه لامجال للعنصريه بعد الان..ذلك لان الوعى اصبح ينمو وينضج فى ذهن الانسان السودانى...لك التحية


#32361 [موجوع حتي يخسف الله بالانقاذ]
0.00/5 (0 صوت)

10-09-2010 06:00 PM
شكرا كتير اختنا واستاذتنا بت جنوبنا الحبيب,,,,


#32344 [سودانى]
0.00/5 (0 صوت)

10-09-2010 05:17 PM
مافى يوم شعرته انه ده شمالى او ده جنوبى والله العظيم الابعد 1989 ومشروع الجهاد وقدوم كثر الجنوبين نحوى الشمال بسبب الحرب وامورنا كانت ماشىء سمن على عسل وفى مشاكل بس ليس سياسية وعادية لكن السياسة وخبث الحركة والكيزان هم من عمق الجراح والجنوبى كواطن والشمالى كمواطن طيبين ومسالمين لكن المثقفاتية والمتعلمين من الجنوبين بعض منهم ذى مابقولون بقو مسيرين من الاعلام الخارجى لكن الزول العادى ماعنده مشكله مع الشمالى ولهم مصالح مشتركه


#32326 [صلاح السوداني]
0.00/5 (0 صوت)

10-09-2010 04:16 PM
الاخ عمر اتمنى ان تراجع تاريخ تكويين السودان
والقبائل السودانية
وعن كيفية دخول العرب واستقرارهم على النيل وشمال افريقيا
وقبائل غرب افريقيا واستقرارهم في الغرب وجزء من الجنوب وتحول الباقي على النيل
مما جعلهم يختلطون مع القبائل العربية التي تكون منها الشعب السوداني
يعني لو رجعنا للعهد البعيد تجد ان اصل السوداني اما الام عربية والاب من غرب افريقيا
او العكس
يعني اصلنا واحد ودمنا واحد
ولست ادري من جعل المقبول مرفوض
بمعنى المقبول في بداية تكوين سكان السودان اصبح مرفوض بعد التكوين

تحياتي ,,,,,,,,,,


#32322 [صلاح السوداني]
0.00/5 (0 صوت)

10-09-2010 04:09 PM
استيلا قايتانو انحني امامك واقبل يدكي التي اتمنى ان لا تقف عن الكتابة


#32248 [omer]
0.00/5 (0 صوت)

10-09-2010 02:05 PM
\"خالص التحايا للاخوة الذين ردوا على
حقيقة اود ان اؤكد للاخ الفخور بانه جعلى وخرطومى انك انت لو مشيت جوبا هل بتقدر تقول دى بلدك وانت شمالى ما جنوبى زى ما بتقول انو الخرطوم بلدهم زى ما هى بلدنا بالله امشى وقارن كيف هم بيعاملوا الشمالين وكيف نحن بنعامل الجنوبيين وياريت الاستاذة هى نفسها تمشى هناك لانو شكلها طولت من هناك ولو شافت الحاصل اكيد حتكتب عن حقارة الجنوبيين بالشماليين هناك ودى ما حاجة بفعل الحكومة لكن دى حاجة جواهم هم وانو ما تحكيه الاستاذة يتحدث فى فترة موجات النزوح بعد حرب 83 يعنى ما ليه علاقة بجدك الجانا من الشمالية من زمان وانا بتكلم فى الفترة دى وانت ما رديت على وانما انصرفت لانك اقدم منى فى الخرطوم ولسه بسال يا الجيت قبلينا زمان قبل ما نجى الخرطوم صحى كنتو بتخافوا من الجنوبيين ولو ما عارف اسال امك احتمال يكون مر بيها موقف زى خالتك فوزية يا ود الدفتردار
وبالنسبة للقال لى انت عندك شذوذ فى نفسك وبتتكلم بالانا اتربيت عليه اقول ليه لو انا عندى شذوذ فى نفسى وعقد البتكتبو الاستاذة دا شنو؟ دا ما قمة التراكمات النفسية والشذوذ وبعدين دا زمن تتكلم فيه عن الشى الكان حاصل زمان من مشاكل ما كان اولى تشوف مواضيع افيد يا اخونا القال لينا انها من الناس العملت وحدة وطنية ومتزوجة شايقى حسى دا كلام تقولوا عشان تدعم الوحدة الوطنية
وبالنسبةللقال انو انا نظرى اتقاصر انت الما عندك نظر لانو انا ما بتكلم عن مقال الاستاذة بس انا بتكلم عن حاجة اكبر عن الوضع عموما وسع رؤيتك وتعال انتقد
وشكرا للاخ ابنوس اللى قال انو اى واحد من حقو يقول رايو
وكذلك تحيه للاخ ابن الشرق المهمش البين الحاجة البتكون فى نفس الغريب لمن يجى الخرطوم ودى النقطة الكنت قاصدها بالله افهموا يا المنظراتيه قبل ما تهاجمونى ساى
وبالمناسبة انا ما عندى راى فى الاخوة الجنوبيين وانا كنت بحبهم خالص لكن بعد ما شفت تقلبهم بعد ما كانوا بحبوا الشماليين وفجاة بعد اتفاقية السلام انقلب الحال وظهر المستور وانهم فى نفسهم فى احقاد ووالله انا نفسى ما ينفصلوا لكن واحد يلقى فرصة يطلع من بلد بيحكموها الكيزان وما يسيبها يكون بالغ وربنا يهون والانقاذيين يطيروا ونرتاح منهم الكرهوا فينا الناس وكرهونا فى نفسنا


ردود على omer
Saudi Arabia [ودحمودات] 10-10-2010 12:52 PM
والله كلامك صاح وواقعي جدا ، واولاد العرب ناس متحضرين ومابحبوا المشاكل ، لكن لوسخنت بيعرفونا كوييييس ، ومماقمنا في العاصمة الناس معروف تصنيفها ، جنوبي وغرابي وودعرب وحلبي ... بنقول الكلام ده مش عشان احتقار الاخر ولكن للتمييز وافتكر الزول البتعقد من الحكاية دي هو الغلط وحقوا يراجع نفسو .... تحياتي للجميع


#32229 [ام الحسن ]
0.00/5 (0 صوت)

10-09-2010 01:46 PM
الأخ عمر لماذا قصدت الإساءة ؟؟ هل هي نفس عقلية الشمالي المريضة ؟

إستيلا تحاول إذابة الحاجز الموجود عند البعض وانت منهم بقصصها من الواقع ،،، نعم توجد هذه الصورة وعشاناها في الخرطوم خوف الشماليين من إعتداء الجنوبيين في المشاحنات الصغيرة في الحلة كانت موجوده وجعلتنا نتجنبهم ونعتقد انهم مصدر عنف،،
والجنوبيين عندما اتوا إلى الخرطوم لاجئين كان ذلك بسبب حكومات قررت ان تشردهم من الجنوب بسبب الهجمات العسكرية التى قاموا بها ضد القرى بجحة إنهاء التمرد
هل لديك فكرة يا اخ عمر عن بشاعة حرب الجنوب التى طالت قرى بأكملها حيث حرقت وقتل اى شخص جاء خارجاً من القرية حتى الأطفال ؟؟
كان الإجدر بك ان تسأل العفو وتشكر إستيلا لانها تناست كل ذلك وتطمع في مستقبل جديد مع الشماليين وفي علاقة مميزة مع الجنوبيين

ارجو الا تخدعك روح اهل الإنقاذ والمؤتمر فهم يخلقون المشاكل ليغطوا ما إرتكبوه من جرائم في حق الوطن والمواطن


#32181 [waheed]
0.00/5 (0 صوت)

10-09-2010 11:43 AM
رائعة رائعة بحق يا ايستيلا وانا اعلم هنالك الكثير من الجنوبيات امثالك وافضل منك وهنالك من الشماليات امثالك فى البراءة والطيبة وعدم النظرة الدونيةللآخرين لكن مشكلتنا يا استاذة استيلا ليست فى ان هذا جنوب وهذا شمالى لنا صدلقات مع جنوبيين نعتز بها والبغض الكرياهية ظاهرة متفشية بكل اسف فى مجتمعنا السودانى بين معظم القبائل وليس بين الجنوبى والشمالى فقط - مشكلتنا فى السياسة
والسياسيين عهم من خلقوا وزرعوا هذه الفجوة بين الجنوبى والشمالى ولا سيما فى عصر الانقاذ - انظرى واقرئى تصريحات الاخوان الشياطين التى يقولولون فيها ان الجنوبى بعد الانفصال يصبح غير مواطن ولا نعطيه حقنة الدواء ! ! ! مثل هؤلاء الحثالات
من المسؤلين هم من يزرعوا فينا وفى الاخرين روح الكراهية والحقد تجاه الجنوبى
والشمالى ولكن المواطنين جنوبيين وشماليين ما عندهم مشكلة لعن الله ساسة الانقاذ وازالهم عن حكم هذا البلد المعطاء


#32149 [حامدابوعبدالمجيد]
0.00/5 (0 صوت)

10-09-2010 10:09 AM
سلام يابت من ابنوس وصندل
للاسف التنوع والاختلاف فى السودان بدل ان يكون مصدر قوة ومنعه بالانصهار والاندماج فى وطن واحد بقى مصدر تخلف بسبب سياسة الحكومات
لعلمك استيلا حتى نحن الشماليين (جغرافيا )داخل نفس القبيلة يوجد تمييز اخر عرقى كما فى كثير من القبائل عندكم فى الجنوب وفى الغرب اولاد فلان واولاد علان والعنصرية بالسودان على الاقل فى الوقت الحالى مستعصى علاجها بالاتفاقيات السياسية لابد من حراك اجتماعى كبير ووقت اطول عشنا فى مدينة ودمدنى كثير من القبائل فى حى واحد ابوابه مفتوحة للجميع ونشات علاقات نسب من الصعب تصديقها ومدنى كما امدرمان نموذج لمدينتين تجاوزتا الحاجز الوهمى المسمى نضاف العرق واللون حليلك مصطفى الجمس ذلك الفتى الابنوسى من اب شمالى وام جنوبية يعزف الجيتار مع البعيو كنا نمازحه كثيرا وافتقدته مدنى يوم سافر للخرطوم بسبب المعيشة هل سنعطيه الحقنة اذا مرض لان امه جنوبية ولونه وسمته جنوبية قحة تحسبون الانفصال هين وبسيط بذلك الصندوق الشفاف اكبر جراح عالمى مايفصل بيننا ببساطة نحن توأمان سياميان نشترك برئة واحدة وقلبين
بالمناسبة مصطفى مع الوحدة وفى احد لجانها موفق خير يارب
..............تصبحوا على وطن


#32143 [ياسر موسى]
0.00/5 (0 صوت)

10-09-2010 09:50 AM
,والله يا اختى استيلا قايتانو لقد اصبت كبد الحقيقة


#32138 [سوداني مخلص]
0.00/5 (0 صوت)

10-09-2010 09:32 AM
والله يا استيلا لو كان الامر بيدي كنت اديتك جايزه افضل عمود حقيقه انا احترمك واقدرك جدا لكن اعذريني اسالك سؤال هل انت مع فكر الدكتور القائد الراحل المقيم جون قرنق في الوحده ام مع الانفصال.
ولا اخفي عليك ان قلت الانفصال ما اعيبك لاننا كلنا خدعنا من الانقاذيين اخذو سنوات الاعداد لهوا وجاءو بعد فوات الاوان يعملون .
وان قلت الاتحاد اراك تنظرين لمستقبل ما بعد الانقاذ الى سوداننا دولة متحضره مثل امريكا

كل الاحترام والتقدير;)


#32127 [حمدى مرسى]
0.00/5 (0 صوت)

10-09-2010 08:22 AM
استيلا يا رائعة اكتبى وواصلى فقلمك بلسم لجراحات غائرة ومتضخمة فى الظلام ولا هوائيا فلنعالجها سويا وفى الهواء الطلق وحتما واصلون


#32116 [abanoos]
0.00/5 (0 صوت)

10-09-2010 02:29 AM
مساكم الله بالخير شباب
اولا اناسعيد كوني القي الناس بتتكلم بحرية في الوقت الفية انو الكلام ممنوع
بس للاسف انو الناس بتتكلم عنا ما بداخلها بكل ما فية من رواسب و املات و دفائن بعيدة
استيلا كان احسن مما تتكلمي عن بت العرب و الجنوبية كان تتلكمي عن الجنوب و خيراته لو متذكرة فية شئ
احسن الناس تتكلم عن المستقبل المفروض علينا و عليك
الوحدة او الانفصال دي اجندة مفروض علي الساسة والساسة فارضنها علينا
اولا لفظ جنوبي و بت عرب مرفوض الا اذا كان ورا الكلام كلام تاني
انت قبل الحكومة السجمانة دي كان ح يكون ليك صوت
ما اظن
الان الحصل حصل
اذا بقي في وحدة الله غالب
و اذا في انفاصل و دة الي ح يحصل انت ح تقعدي وييييييييييييييييين
و تانياالمثقفاتية العاملين بردوا علي التعليقات
اولا عمر ما اظنه غلطان قدر ردكم و خاصة رد القال جعلي قال
انتو بتطبلو علي الفارغة
يا استيلا ياريت تكتبي شئ مفيد عشان ما نضيع زمن في مسرح الصم و البكم ده
اسف علي اللهجة بس اظنه اقل من المكتوب



ردود على abanoos
Sudan [جنوبي شمالي)سوداني(] 10-16-2010 02:58 AM

إنت شكلك من الناس تبع السودان القديم الذكرتهم الاستاذة استيلا ربنا يحفظها
زول غريب خلاص هسي عليك ذمتك الكلام دة في اجمل منه

Saudi Arabia [ود الزومة] 10-09-2010 02:56 PM
باين عليك يا (أبنوس) إنت من ناس زقلونا وطردونا النبهتنا عليهم الأستاذة استيلا


#32099 [mahadi]
0.00/5 (0 صوت)

10-09-2010 12:33 AM
استيلا / هل طيلة حياتك فى الشمال شعرتى بان الشماليين ما بحترموا الاخوة الجنوبيون


#32094 [قـرينات]
0.00/5 (0 صوت)

10-09-2010 12:14 AM
أنا إقليمي من مهمشي الشرق .. في بداية تدفقنا علي الخرطوم .. كنا نتوجس خيفة وشرا من ناس الخرطوم .. وكنا نفسر أي حركه منهم تجاهنا ، بأنها اإستفذاذ وحقارة ، وبمرور الوقت والعشرة ، اكتشفنا أن هذه الهواجس والأوهام لاتوجد علي ارض الواقع ، إنما هي أشياء بداخلنا نحن ، ربما صنعتها ظروف تباعدنا عن بعض ، ناس الخرطوم وناس الشمال بصورة عامه ، هم غبش ومهمشين وغلبانين بصورة مفزعه ، وهم غير مسؤلين عن أخطاء الساسة في الشمال ، هذا ما أدركته أخيرا أختي استيلا ، وأسال الله أن لايكون إدراكا بعد فوات الأوان . استيلا .. اسمك جميل ، وروحك حلوه ، وقلمك متميز ، وطعم كتابتك ونكهتها فاخر ، واصلي الحفر بالأظفار وسوف تصلين . ودمتي .


#32088 [HAIDER]
0.00/5 (0 صوت)

10-08-2010 11:40 PM
A respectable writer. Open minded, logic and logic. May our politicians learn from you? Kamal Obied and the other racist are not belonging to this land or this mentality. Thanks, you are great


#32078 [انا سوداني]
0.00/5 (0 صوت)

10-08-2010 10:40 PM
ياجماعه باركوها
وبلاش مناقره
والله كلامكم دا حيرني
كلام جنوبي يخاف من عربي وعربي يخاف من جنوبي
انا عشت في بيت خالي في النيل الأبيض وخالي دا متزوج جنوبيه دينكاويه من رمبيك علما بانني (حمدي) من جهة الاب و(دنقلاوي) (حسناوي) من جهة الام لكن ماحصل حسيت بالكلام الفارغ البقولوا فيه الناس دا
دا اسود ودا اصفر ودا بنفسجي
والله الزول ب اصالته ومواقفه بيتقاس ما باللون والكل خلقوا الله لكن دي مخلفات الاستعمار والفتنه الزرعها الغرب
وبقول لكل السودانيين زرق وبيض والالوان الاخري ,النار لو ولعت مابتفرز ابيض واسود بتاكل من طرف
وكل المساله في السياسين والغرب اللعين الله ينتقم منهم ويكفينا شر الناوينها لينا.
(؟)


#32073 [mazin]
0.00/5 (0 صوت)

10-08-2010 10:01 PM
مازن
ايتها الجميلة استيلا كل ما اقراء لكى لا اجد كلمات تعبر عن مدى اعجابى وتقديرى لفهمك العالى وانسانيتك غير هذا الصور ;) ;) ;) ;) ;)


#32031 [منتصر جعفر]
0.00/5 (0 صوت)

10-08-2010 06:14 PM
الاخ عمر : لقد تقاصر بك الفهم ولم تعي مضمون الرسالة...
.............................................................................................
شكراّ لاستيلا ..
شكراّ للبنت الجنوبيه...


#32030 [Shah]
0.00/5 (0 صوت)

10-08-2010 06:11 PM
أختى العزيزة إستيلا: لا يهمك ما يكتبه من يسمى نفسه عمر أدناه. هو يتكلم بما تربى به من شذوذ. نحن نقول لكم جنوبيون من المعنى الجغرافى و لكن نعلم أنكم من أسر و عوائل كريمة و لكم مثل و أخلاق من أسلافكم لا تقل أصالة عما فى أى مجتمع أصيل.
إن المخدوعين بأن لونهم \"فاتح\" و لذا هم أعلى شأنا إنما هم مخدوعين بنرجسية خادعة و زائفة ففى الزاندى لون بشرة لا يحلم به هذا ال \"عمر\" كاتب التعليق إن كان ذلك من علامات الجودة النوعية حسب فهمه. و ليته يعلم بأنه هو اليوم العائش من خيرات الجنوب و ليس العكس.
و لندعه يذهب إلى لبنان ليرى ما هو مقداره هناك حيث قال أحد السودانيين الموهومين للبنانى إلتقى به خارج السودان إن السودانيين عرب من سلالة العباس فأجابه اللبنانى بسخرية لاذعة: لو إنتوا عرب نحن أيه؟ ملائكة؟
حتى لو إنفصل الجنوب بفعل السياسيين الجهلاء فلن يزيد ذلك إلا محبتنا لكم أضعافا و أضعافا.
وفى الوقت الحالى لا أتمنى للإخوة الجنوبيين العيش تحت نير هذه السلطة الغاشمة فى الشمال. فهم حقا يستحقون أفضل من ذلك.


#32028 [محمد احمد فضل]
0.00/5 (0 صوت)

10-08-2010 06:08 PM
استيلا قلم جميل واسلوب رائع .... للاسف معظم الشعب السوداني قاعد يتفرج بس ولكن البطل ببموت هذة المره برغم حبنا الشديد لجون وشول واستيلا !


#32024 [خالد ابواحمد]
0.00/5 (0 صوت)

10-08-2010 05:34 PM
اختي العزيزة استيلا..
سلامي ومحبتي وتقديري..
مقالك..أضحكتني كثيراً.. ثم وأبكاني..وأرجو ان يكونكلامك حقيقة ان العرب والجنوبيين قد وعوا الدرس وتعلموا..واختاروا (الحوار) وسيلة للتعايش السلمي بينهما..نحن أقصد كل السودان جنوبه وشماله وغربه وشرق في حاجة ماسة جدا لمثل هذه الكتابات لما فيها من اكسير يدواعي جروحنا النتنة التي فرقت بيننا وجعلتنا مترشدين في الآفاق..
سلامي لاخي العزيز عادل وأبناءكم الحلوين..
وللذين لا يعرفون أن الكاتبة الاخت العزيزة استيلا (الجنوبية) متزوجة من (شايقي) أمدرماني ما يعني انها حققت (الوحدة) عملياً وليس تنظيراً..ثم يجي قادة المؤتمر الوطني يطعنوا في هذه الوحدة وقد تلذذوا بعذابات الآخرين..


#32021 [omer]
0.00/5 (0 صوت)

10-08-2010 05:18 PM
تحياتى يا استاذة اولا انتى تضعين صورة للجنوبيين كانهم شمسون الجبار حقيقة انا منذ ان ولدت عشت فى الخرطوم ولم ارى ما تتحدثين عنه ان العرب يخافون من هجمات الجنوبيين فهذة حقيقة عارية تماما من الصحة
وثانيا انتم توجد لديكم العقد من اننا نحاول الاساة اليكم لدرجة ان لفظ جنوبى تسبب لوالدتك الضيق لا سيدتى العيب ليس فينا انما العيب فى فهمكم انتم لهذذه الامور واتيتم الى الخرطوم حيث نقطن نحن وتريدوننا ان نحل مشاكلكم النفسية ونعالج ازماتكم
سيدتى انتم عشتم فى نعيم الشمال وخيراته واليوم تجحدون ذلك كله
سيدتى انتم اتيتمونا بدون اذن وتريدون ان تتركونا كذلك فاتركونا لا محزون عليكم ولكن بدون خراب ودمار ولكن احفظوا لنا جميلنا وضيافتنا وتقاسمكم معنا لخيرات هذا البلد ولا تعضوا اليد التى ساعدتكم كثيرا


ردود على omer
China [MUNZIR] 10-08-2010 06:04 PM
الاخ عمر سلامات
والله انت حددت ان الخرطوم دى بتاعتك براك فقط للشماليين .... علما باننى خرطومى حتى النخاع وجعلى ... وللاسف اقحم القبلية هنا لاوضح لك مكامن الضعف فى نفسك ونفسياتك ، يا اخى احمد جدى لوالدى ولد هنا فى الخرطوم حين كانت السجانة دى عشر بضم العين والراجل بقطعها بعد المغرب عشان يصل لقشلاق الجيش حين يسكن ، هذه العقلية هى سبب مشاكلنا والله الجنوبى والشرقى والغربى لهم مالك فى الخرطوم وغيرها ولكن لايفقهه الا ذوى الالباب ......... وبعدين لو حكومات الشمال الفاشلة المتعاقبة على الحكم وعيت الدرس منذ الاستقلال لما صارت المشاكل كم الحال الان . وحكومة الجن الاتقاذ \" ينغذونا من شنو\" دى ما همشت كل مدن وقرى السودان واختزلت السودان فى الخرطوم ما كان فى واحد بيجى الخرطوم الا لشغل او غيره بس سكن فخارج الخرطوم افضل من منها الف مرة ...... وانت بتكون من الناس الدخلوا الخرطوم فى التسعينات او نهاية الثنمانينات وكلامك دة دليل
وتصبحوا على وطن واحد ... زيادة على مقولة ابو عبد الحميد


استيلا قايتانو
استيلا قايتانو

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة