بعض النصائح وكده
09-15-2012 12:20 PM

بعض النصائح وكده

الفاتح جبرا
[email protected]


عزيزي القارئ هذه بعض النصائح التى أخترتها لك من كتاب بعنوان 100 نصيحة من أجل أن تعيش حياة أفضل

• تقبل أخطاءك :
كلنا بشر اكيد قاعدين نغلط .. تقبل خطأك بإدخال إبنك كلية طب بأحدي الجامعات الخاصة (السنة بالشئ الفلاني) وأهو هسه أتخرج وقاعد ليك عاطل في البيت .. كان أحسن توديهو (المنطقة) كان وفرتا قروشك والواد إتعلم ليهو صنعة .. تقبل خطأك يا عم .
• اكتسب عادة جديدة :
كالإبتسام في وجه متحصل رسوم النفايات !
• تعرف على اصدقاء جدد :
• طبعن يحبذ أن يكون من ضمنهم (ست الشاي) وبتاع البقالة وسيد اللبن والخدرجي !
• إبتدي حمية غذائية جديدة :
غير نظام اكلك ... قلل من اللحوم الحمراء والبيضاء والطماطم والفواكه (يا مفتري) وكمان الفول الصحنو بقى بخمسة جنيه .. أكل (في خاطرك وبس) .
• استيقظ كل يوم وقول لى روحك بانو اليوم ده ح يكون يوم جميل :
ده طبعاً قبل ما تفتح محفظتك علشان تشوف فيها كم جنيه ح تستقبل بيهو اليوم ؟
• أتعلم انك تخاطر :
غلشان تطلع من حالة الفلس المزمن دي أمشي خد ليك مرابحة من بنك و ح تتأكد بعدين (في السجن طبعن) إنو دي أكبر مخاطرة عملتها في حياتك .
• إتعلم لغة جديدة :
تجربة رائعة انك تتعلم لغة جديدة .. ألعبدلله ينصحك بتعلم اللغة (الحبشية) علشان مش ممكن تكون قاعد في بلد ومش عارف لغة غالبية سكانها .
• اصحي بدري بطل سهر :
نوم من بدري وبطل تساهر وإنتا بتفكر تتخارج من مصاريف يوم بكرة كيف .. السهر مضر بالصحة ولا تنسى أن الصحة على مسئولية صاحبها في البلد دى
• خليك دايماً مركز :
ركز .. ركز .. ركز لأنو لو تركيزك ضعيف الكمساري ح ينوم بالباقي .. وبتاع طلمبة البنزين ح يأكلك في كم لتر .. وح تنسى إنو الليلة عازم ليك ضيوف والبيت ما فيهو نفاخ
النار !
• بطل تأذي نفسك :
مفيش لزوم تتفرج على (محطاتنا التلفزيونية) علشان ح تصاب بالبلاهة أو ممثلينا (القاعدين يمثلو) .. أو لعيبتا القاعدين (يبرطعو) أو مذيعاتنا القاعدات (يتحننو) أو مسئولينا القاعدين (يصرحو) والأخيرة دى مفروض يعملوا ليها (أورنيك ) !
• جرب حاجة جديدة :
مش معقول من يوم خمسة في الشهر وإنتا تطلب (سلفة) من أصحابك ومعارفك عشان تمشي الأمور .. جرب حاجه جديده .. شيل ليك روشته و أقيف ليك في إشارة (مثلاً) !
• بطل تبدد طاقتك :
الموت بقى كتير وكذلك المرض .. وأساساً (الفول ما خلى ليك طاقة) فأنصحك إنك توفر شويتين الطاقة العندك وتحتفظ برسالتين في موبايلك .. رسالة عزاء .. ورسالة كفارة ولا تنسي أن ترسلهما رسالة (جماعية) علشان (توفير طاقة الجيب وكده) !!
• اتعلم انك تتجاهل :
حتي لا يرنفع ضغطك وتضيع في شربه مويه ويفقد أبناءك (الحاوي الوحيد) لديهم تجاهل كل ما يعكنن مزاجك كعدم إقتصاد الإقتصاديين في تصريحاتهم عن الإقتصاد !
• أتعلم انك تشكر الاخر :
العرفان والشكر ... مهم جدا في حياتنا .. لابد أن تشكر مثلاً (شركة الكهرباء) على إنقطاع التيار لأنها وفرت ليك شوية قروش وكده !
• نمي مهارات مختلفة لديك :
لا تتوقف عن التعلم .. اتعلم ..كل يوم شيئاً جديداً .. كالدخول عبر نافذة الحافلة عند الزحام !!
• اقطع علاقتك بشخص ما :
في بعض الاحيان تشعر ان انسب حل انك تقطع علاقتك بشخص ما لأنه يسبب لك إزعاجاً في حياتك .. .. أقطع علاقتك (بالجزار) وقارن بين (صحتك والأولاد) قبل قرار المقاطعة وبعده .
• تعلم لعب رياضية :
أقترح عليك تعلم (رفع الأثقال) فبعد أن قررت السلطات عدم دخول الأمجاد إلى داخل مطار الخرطوم وترك المسافرين وأمتعتهم بعيداً فى الشارع العام سوف تفيدك هذه الرياضة فيما إذا قررت السفر أو كنت مرافقاً لمسافر .
• توقف عن التذمر والشكوى :
تتذمر ليه من أساسو؟ ما المواصلات فاضية والرغيف كبير وكل شوية يقولو لينا فكوا الحزام ..فكوا الحزام - على قول (عادل إمام)
• إبتدي هواية مختلفة :
إبتكر ليك هواية مختلفة في حياتك .. تخرج بيها من تفكيرك في مشاكلك .. (مثلاً) قم بعد العربات التى تمر أمام منزلك وللا أقول ليك .. قم بعد الملفات التى تدخل إلى مكتب النائب العام !
• تأمل يوميا :
ما تقول ليا ما عندي وكت عشان أتأمل فيهو .. التأمل بيقوي يبعث على الأمان ويقوي السكينة بداخلك .. تأمل كيف أن الله لطيف بعباده .. ماهيتك جنيه والإيجار جنيه وأهو إنتا وأولادك عايشين !
• ابتسم عشر مرات (قبل الاكل) :
لا أنصحك بتنفيذ هذه النصيحة عند تناول الغداء في بيوت (البكيات) لأنك بعد الإبتسامة العاشرة سوف تجد (صحن اللحمة) فاضي !


كسرة :
النصيحة الأخيرة : توقع الغير متوقع :
إستعادة (خط هيثرو) مثلاً!

كسرة ثابتة :
أخبار ملف خط هيثرو العند النائب العام شنو(ووو ووو ووو)؟


تعليقات 16 | إهداء 1 | زيارات 5937

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#476042 [adil]
0.00/5 (0 صوت)

09-23-2012 03:45 PM
اضافة, ماتخاف من الشيطان صاحبو احسن ليك من بنى ادم لكن كل زول فى دربو انا رحلت فى بيت قالو لى مسكون ماتتخيل انا الان مرتاح كيف... والله جد ياجبرة حت الجيران محتارين فى,,صلى براك للانى اكتشفت امامنا عامل كبرى للكهرباء قال امام قال.

اخيرا شوف جمعية خاصة( اقران الكريم مثلا) وابقى عضو اصيل فيها ماشرط تكون حافظ الا حقت الصلاة..
ثم اخيرا خلى علاقتك تمام مع الحيوانات خاصة الشرسة منها ( انا صاحب د/ حساس)والعناكب والضببة والسلاحف وهلم جرا


#470654 [Boga]
0.00/5 (0 صوت)

09-17-2012 09:55 AM
بالمناسبة
حكاية خط هيثرو دا ( الفورة كم ) لانك وصلت تسعة لحدي هسه :)


#470520 [منتصر]
0.00/5 (0 صوت)

09-17-2012 04:12 AM
الله يجازيك ياود جبرا وانت يرسم البسمة فى فى وجوهنا
وربنا يرجع خط هيثرو


#470460 [الزائط ما بنقدر]
0.00/5 (0 صوت)

09-17-2012 12:17 AM
هههههههههه والله يا جبرا كلام ما بعرفوا الا زول مفلس جد جد انت بتتكلم بلسان حال %90من الشعب السودانى بالمناسبة الكتابة دى ما بتلقى منها عائد مادى


#470266 [النون الساكنة]
0.00/5 (0 صوت)

09-16-2012 06:06 PM
معقولة؟خط هيثرو دا يعني واحد من ال ENGLISH FONTS ...بالغت يا جبرا معقولة ما عارف احسن طريقة للحفاظ علي الصحة (تسكن مع مامون حميدة)...


#469811 [الهادى كلين]
0.00/5 (0 صوت)

09-16-2012 10:34 AM
اضحكتنا استاذنا جبرة - واخونا طارق عثمان ، اضحكك الله ( بالغت عديل كده)


#469258 [عبدالواحد المستغرب أشد الاستغراب!!]
3.00/5 (2 صوت)

09-15-2012 04:50 PM
الاستاذ(المبجل جبرا)بين القوسين لزوم التدرب على مسح (الاجواخ) جمع جوخ !!التى سنحتاجها قطع شك شئنا امابينا للمراحل المقبله وخاصة وقد غلبة (حميرنا) فى ظل وجود المجاهد السابق الصادق المهدى بين ظهرانينا كمعارض لين العريكه لايقوى على شىء بسبب الوهن الناتج عن كبر السن وهذه سنة حياة ولا إعتراض لنا عليها ولكن من يتجراء ويقنع الامام بذلك وأنا أستطيع ان أقول الجهاد الذى خاضه والمجاهدات التى بذلها الامام الصادق فى حياته منذ بلوغه سن الرشد وحتى اليوم لم يحظى بها جده الاكبر محمد احمد المهدى صاحب الاسم ربما لان الحياة كانت أسهل بكثير بالمقارنه للحياة البسيطه السهله التى كانت من نصيب جده الاكبر ثم السيد الامام/عبدالرحمن المهدى كما أن الذين كانوا يفاوضونهم ويقارعونهم كانوا أكثر وعيا وفهما وتعقلا وعالمون بقوانين اللعبه وأقل طمعا لمباهج الدنيا وترفها من هؤلاء العلوج ،والتاريخ يقول ان الجميع كانوا وقتها يلعب سياسه وحتى ممارستهم للعنف كانت تحكمها قوانين صارمه التزم بها الجميع لدرجة ان (أسياف العشر) كانت تتحدى (المدافع)كده عينى عينك!! والجنود كانوا يواجهون بعضهم بعضا وجها لوجه والمهزوم كان يتقبل الهزيمه بصدر رحب ويقول المهزوم للذى هزمه (قوودلك) فتأتى الاجابه من الذى هزم للمهزوم(هارد لك) مع تمنياته له التوفيق فى المره القادمه!! لكن هذا النظام (أعجز الامام) فهو لايدرى ماذا يفعل معه وكذلك اخانا( جبرا) فطفق الاخير يقدم لجمهوره النصائح !! وعجيب أن نلجاء للاصعب بينما الاسهل يقول (أنا00 ها00 هنا)نعم الحل الاسهل يمشى بيننا!!والحل يا جبرا كامن فى تجميد نشاط الامام الصادق ومولانا المرغنى من الخدمه ولو مؤقتا (على قرار شركات الاتصالات!!) ثم إطلاق طاقات وقدرات الشباب حتى يقوموا بإجتثاث هذا النظام من أصل جذوره ليعود كتابنا لكتابة المقالات الخاليه من الوصفات الاشبه بوصفات (الشيف الشربينى واسامه السيد وذلك العربجى الذى يصر على تعكير صفو مزاج المشاهدين على قلتهم فى قناةالنيل الازرق وكأن المشاهد ناقص عكننه!!0


#469256 [بتـاع درداقـــــة]
5.00/5 (2 صوت)

09-15-2012 04:48 PM
وتكون زول لحوح يعنى لو مشيت تشترى فول اول ما بتاع الدكان يفتح قدرة الفول تحكى ليهو كضبة كبيرة عشان تلخمو وبعد داك تشبكو كدى زيد كمشة فى كمشة وفى النهاية تقول ليهو طالما بيعك كعب كدة تمها موية فول وتكون جازفت فطور الاولاد


#469191 [tarigosman]
5.00/5 (1 صوت)

09-15-2012 04:07 PM
حاول جرب أن تحب الحكومة ولو مرة .!!!!!!!!!!!!!!!!!!!!!!!!!


ردود على tarigosman
Sudan [أسمعنا مرة] 09-16-2012 11:15 AM
يا طارق خلي الحكومة تحبنا مرة ياااااخ وبعبن نحبهاوللا شنو؟


#469144 [أنا كوز إذن أنا حماربضنب]
4.38/5 (4 صوت)

09-15-2012 03:07 PM
اظهر كده المواطن بقى مواطن شم على حسب مقالك والغريبة قالو نحن سكان السودان ثلاثون مليون وياريت كانو يقولون عدد سكان السودان مائتين الف لانه العائشين هم المائتين الف ديل وهم الرئيس ووزرائه والولاية ووزرائهم وأعضاء المؤتمر الوطني والصادق المهدى وأسرته والميرغنى براهو لأننا ما عارفين له اسره منما قمنا ما شفنا لهم حرمة قالت او استقبلت وما عارفهم حريم تكل وعواسة ام نحن شعب ماقدر المقام


#469108 [ودالنيل]
0.00/5 (0 صوت)

09-15-2012 02:34 PM
شفتي انت بتقول كلام وبتعمل غير .كدي انس الخط بتاعك ده اشان صحتك وصحتنا والله والله والله قرفنا منو ومن الزول الزمان سواهو


#469096 [brantood]
3.00/5 (2 صوت)

09-15-2012 02:25 PM
سؤال... فى السودان ليه واحد يوعدك الساعة 9 صباحا ويجيك الساعة 12 ظهرا؟؟
وليه الواحد بكون نشيط جدا الصباح وعايز يقضى مشاوير واول ما يفطر عايز يرقد ينوم؟؟


#469069 [حسكنيت]
5.00/5 (6 صوت)

09-15-2012 01:56 PM
أنا بديك نصيحة تحل مشاكلك كلها:-
أعمل ليك مصيبة تدخل بيها السجن كم سنة وشيل معاك جوز كتشينة ( وأنسى الدنيا) ..بس ما تكون من نوع ( شقة وأربعة بنات)


#469065 [no comment]
0.00/5 (0 صوت)

09-15-2012 01:49 PM
no comment


#469021 [هجم النمر]
5.00/5 (1 صوت)

09-15-2012 01:02 PM
رائع ودبدع كالعادة يا أستاذ .. حكاية اللغة الحبشية دي وارد حسن كابوس شكلها كده ههههههه


#469020 [صالحة جماع]
0.00/5 (0 صوت)

09-15-2012 01:02 PM
يا اخوانا تكفة ورونى خط هيثرو ده شنو


ردود على صالحة جماع
Saudi Arabia [الزول الكان سَمِحْ] 09-15-2012 08:14 PM
خط هيثرو دا..زى ا(لشَخِيت) بتاع عثمان ميرغنى..ممنوع طيارات سودانطير الإقتراب منو؟؟

Canada [بتـاع درداقـــــة] 09-15-2012 04:32 PM
خط هيثرو دة مترو انفاق ماشى من حلفا القديمة لحدى نيروبى وناس الحكومة باعوه علشان طيارات سودانير تشتغل وقع ليك كدة

Saudi Arabia [حسكنيت] 09-15-2012 04:01 PM
خط هيثروا دا خط أحمر..زى خط الصحافة زلط ، بس بى فوق
الخط المعنى يسمح لطائرات الخطوط الجوية السودانية للقيام برحلات جوية لإنجلترا والنزول فى مطار هيثرو..
الجماعة التماسيح باعوه لشركة تانية وقبضوا التمن ( لا من شاف ولا من درى)
وبى كدا خطوطنا الجوية بقت زى البشير ما بتقدر تمشى إنجلترا

Malaysia [سمبلة] 09-15-2012 03:56 PM
ده خط ! خط ؟ خط طيران مش خط عربي ,,, طلع مشي مشوار بس بكل اسف راح في سكة اللي يروح وما يرجعش ،،،ونعاه الناعي ولكن واسفاه لم نستطيع ان نقيم له المأتم لان الناعي معروف عنه انه كضاب كبير ،،، ومتوقعين ان الخط يجي راجع في يوم من الايام ، ادعي معانا يا صالحة ربنا يرد غربته او يؤكد لنا موته علشان نرتاح وتخف همومنا هم ، اللهم اميييييييييييييييييين


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة