أموت وأعرف
09-22-2012 10:01 AM

أموت وأعرف

الفاتح جبرا
[email protected]


• أعرف كثيراً من الأسر بناتهن تجاوزن الأربعين ولم يتزوجوا؟ أموت وأعرف النسبة الحقيقية التى بلغتها العنوسة؟ (عشان نعرف مدى إستطاعتنا لمباهاة الأمم وكده) ؟
• كل ما تسأل عن مسئول يقولو ليك مشي (ألمانيا يتعالج) أموت وأعرف المسئولين ديل بيمشوا يتعالجوا في ألمانيا بالذات ليه؟ (سويسرا مالها؟)
• أموت وأعرف اللعيبة بتاعين الكورة بيحتجوا على قرار الحكم عندما يقرر ضربه جزاء؟ (شفتوا ليكم حكم غير رأيو )؟
• كلف خزينة الدولة حوالى ستة ملايين (دولار) .. أموت وأعرف هل تحرك (اليخت الرئاسى) وللا قاعد في بكانو؟
• العلماء بيتكلموا طوالي عن حشمة وزي المرأة أموت وأعرف ليه ما بيتكلموا عن حشمة زي الرجل؟ (يلبس على كيفو يعني؟)
• الختان الفرعوني ، ايقاف بث برنامج اغاني واغاني ، سحب صور النساء من الشوارع الرئيسة ، نصح الشباب بالتعدد في الزيجات، منع دخول المغنية المصرية شيرين للبلاد ، شورت لعيبة الكورة ، شفط الأجنة وأخيراً الكوندوم ... هذه بعض القضايا التي أثارها النائب البرلماني دفع الله حسب الرسول والذي علمت أنه (أستاذ جامعي) .. أموت وأعرف (تخصصو) شنو؟
• أولادنا الفنانين بيهتموا بالشكل بتاعهم .. يوم مشاط .. يوم سلاسل .. يوم شنو ما بعرف أموت وأعرف دخل الحاجات دي في الغناء شنو؟
• لا توجد كراسي للإنتظار في مكاتب بلاغات كل أقسام الشرطة السودانية ؟ أموت وأعرف الحكمة من القصة دي شنو؟ (أفرضوا جات عشرة بلاغات في وكت واحد مثلاً)
• الكهرباء بتاعتنا ما عاوزة تستقر ليها أربعين سنة؟ أموت وأعرف الخلل وين؟
• مويتنا تقطع وكان جات تجي مغبشة وعكرانة؟ أموت وأعرف الدول الما عندها أنهار دي بتعمل شنو؟
• المواطن بيتعالج بقروشو .. يعلم أولادو بقروشو .. يسكن بقروشو .. ياكل بقروشو .. يلبس بقروشو .. يشيل نفاياتو بقروشو .. يشرب بقروشو .. يتنقل بقروشو .. يتقاضى بقروشو .. أموت وأعرف الحكومة دي بتعمل في شنو؟ تنظم في الحركة؟
• أصغر (حلة ملاح) بقت عاوزه ليها 50 ألف .. أموت وأعرف مع الغلاء ده الناس المعرسين ليهم أربعة نسوان وفاتحين ليهم أربعة بيوت ديل قاعدين يصرفو عليهم كيف؟
• تفتح أي صحيفة تلاقي صفحة لأخبار الحوادث والجرائم .. وهنالك صحف متخصصة (في الحاجة دى) أموت وأعرف ما فوائد ومغزى نشر الصحف للجرائم .. يعني شنو (القبض على لص تسور حائط منزل؟)
• ذهبت لتجديد (لاحظ تجديد) رخصة قيادتي منتهية الصلاحية فوجدت أن الرسوم 150 ألف أموت وأعرف إرتفاع قيمة الرسوم دي سببها شنو؟ (المواد غالية مثلاً) !!
• مذيعاتنا الفضائيات بالذات غير مقنعات على الإطلاق (شاهد الجزيرة وإنتا تعرف) .. أموت وأعرف على أى أساس يتم إختيارهن (طبعن لو في أساس من أساسو)
• سائقو (الحافلات بالذات) لمن يشوفوك عاوز تدخل الشارع بيزيدو من سرعتهم .. أموت وأعرف القصة دي بتحصل ليه؟ وهل كووولهم متفقين مثلاً السلوك (الردئ ده؟)
• شوارعنا تعاني كثيراً من الحفر ورداءة الأسفلت .. أموت وأعرف بترولنا ده (الزفت بتاعو) بيروح فين؟
• الـ 50 ألف دولار الذي منحها ديوان الزكاة (تبرعاً) قبل أكثر من ست سنوات (لقناة الضحي) الفضائية (الما قامت) .. أموت وأعرف الحصل فيها شنو؟ هل تمت إستعادتها وللا خلاس (نحتسبها) وكده ؟ !!
• ما أن تظهر فضيحة فساد (بالصدفة طبعن) حتى يبادر المسئولون بحظر النشر عن ملابساتها .. أموت وأعرف شنو الحصل في كل (الفضائح) التي تم حظر النشر فيها؟ لا أعتقد أنه لا توجد في كل (الأقطان) أقصد الأقطارحاجة زى دي !
• الخريف تقريباً إنتهى .. أموت أعرف هل الخريف الجاي ح يجي برضو (فجأتن) !
• الحد الأدني للأجور الآن حوالي (ستة كيلو لحمة) .. أموت وأعرف ح يحصل (نص كيلو) متين؟
• لا يوجد إبن مسئول واحد غير ناجح أو عاطل .. أموت وأعرف الذكاء (الجماعي) و(التوفيق) ده بيحصل كيف؟
• جاء في قانون مكافحة التبغ الذي نشر مؤخراً أنه قد تم رصد حافز مالي لكل من يبلغ عن المخالفين .. أموت وأعرف الحافز ده (كم) عشان دي (شغلانه) مش بطالة !

كسرة :
• أموت وأعرف ما هو شعور النائب العام وهو يطالع كسرتنا الثابتة و (واواتها) تقترب من الرقم (عشرة) !!

كسرة ثابتة :
أخبار ملف خط هيثرو العند النائب العام شنو(ووو ووو ووو)؟



تعليقات 42 | إهداء 1 | زيارات 8313

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#476661 [ود الجد]
1.00/5 (1 صوت)

09-24-2012 10:49 AM
اموت وأعرف ليش لون الأسفلت في كل مدن السودان احمر بلا من الأسود المعروف
وأموت ,أعرف ليش الشوارع في مدينة ود مدني مظلمة مع انو الكهرباء في خزان سنار قام بتوليدها الأنجليز وليس اوباش المؤتمر الوطني ...
وأموت وأعرف متي نرجع للسودان سالمين و... فقد طالت بنا الغربة والبلد حالها في الواطي
وأموت وأعرف (والله البموت وعايز المعرفة كتير ) وخايف من وجع القلب


#476309 [موسى الدكوم]
0.00/5 (0 صوت)

09-23-2012 10:09 PM
انا اموت واعرف انت عندك مع خط هيثرو شنو وليه هو بس من كل قضايا الفسادوالاخفاق السياسى وين وين المشاريع الزراعيه (الجزيرة -سندس )مثلا من كتاباتك لانو نحنا بناكل رغيف وبنلبس دموريه (اكتفاء زاتى )ومابنسافر اوروبا (رفاهية)@


#476129 [أسامة عباس]
4.63/5 (4 صوت)

09-23-2012 05:37 PM
أموت أعرف الصنف القوى ده يجيك من وين ؟؟؟


#476065 [زاهر]
2.82/5 (5 صوت)

09-23-2012 04:18 PM
انت حتموت وماحتعلاف اي حاجة


#476037 [زاهر]
0.00/5 (0 صوت)

09-23-2012 03:37 PM
انا اموت واعرف لو انت عرفت حاجة يا الفاتح


#475789 [الهادي النعيم]
0.00/5 (0 صوت)

09-23-2012 11:48 AM
اموت واعرف ...انت الكلام الجامد دا بتجيبوا من وين ..؟


#475766 [النون الساكن]
0.00/5 (0 صوت)

09-23-2012 11:27 AM
المثل التونسي يقول "اتحب تعرف ادوخ"...وعشان ما تدوخ كفاية العرفتو..


#475589 [العينو عورا]
0.00/5 (0 صوت)

09-23-2012 07:58 AM
رد على عبدالله
خبير شنو ياسين الحاج قاطعين؟!
ده ما يفهم حاجة
والدليل قالولو!


#475584 [انصار قرنق]
5.00/5 (1 صوت)

09-23-2012 07:48 AM
أموت واعرف ماذا يجمع بين الصادق المهدي وحسن الترابي غير كراهيتهم للشعب السوداني وحبهم لذاتهم


#475449 [Al-Shaygi]
5.00/5 (1 صوت)

09-22-2012 11:25 PM
[[[ كسرة :
• أموت وأعرف ما هو شعور النائب العام وهو يطالع كسرتنا الثابتة و (واواتها) تقترب من الرقم (عشرة) !!]]]

النائب العام بيقول: جبره ده ودوهو الضل...!!!!!
.


#475363 [wedhamid]
5.00/5 (1 صوت)

09-22-2012 09:02 PM
يا الـفـاتـح ... تحيه على رأس مقالتك لاحظت شئ لم نألفه

(((المقالات

مكتبة كتاب المقالات
الفاتح يوسف جبرا
أموت وأعرف

أموت وأعرف
09-22-2012 09:01 AM))

ظهور إسم( يوسف ) أموت و أعرف السبب!!!!


#475349 [المتجهجه]
0.00/5 (0 صوت)

09-22-2012 08:36 PM
اموت واعرف الفاتح جبرا البكتب فى المواضيع دى كلها تخصصو شنو


#475311 [ubedalla]
0.00/5 (0 صوت)

09-22-2012 07:01 PM
وانا برضو اموت واعرف علاج الملاريا في الخرطوم داخل التامين وفي ولاية سنار بالذات خااااااااااااااااااارج التامين؟


#475309 [the merchant of venice]
5.00/5 (1 صوت)

09-22-2012 06:59 PM
you will never know!!!
كل ما تسأل عن مسئول يقولو ليك مشي (ألمانيا يتعالج) أموت وأعرف المسئولين ديل بيمشوا يتعالجوا في ألمانيا بالذات ليه؟ (سويسرا مالها؟why not in kharoum hospital!!!cause they know its easy way to hell!!1


#475288 [wudoof]
5.00/5 (1 صوت)

09-22-2012 06:25 PM
انت بعد ما تموت تاني عارف ليها شنو .؟؟
دوسه وزير العدل اعلن قبل ايام انه لم يثبت تورط اي من المسئولين في سوق المواسير .؟؟!!..يعني طلعم منها زي الشقرة من العجين .؟؟!! تبرع البشير ب 10 مليار والبنك المركزي ب 10 وهذا غير التسويات والاموال التي تم حجزها .؟؟!..وبرضو لم يتورط احد..!! برضو داير تعرف .؟؟


#475278 [ود الحاجة]
5.00/5 (1 صوت)

09-22-2012 05:57 PM
يا استاذ جبرةاسمعني كويس: لمن الجماعة إياهم" اللي كل الناس عافنهم" يموتوا اقصد يفوتوا كتعرف كل شئ و بالتفصيل الممل كمان ...لكن طالما ما هم مكنكنشين و الله تلحس كوعك وتموت أو تعلف و ما تعرف شي!!!


#475277 [البرجوازي النبيل]
5.00/5 (1 صوت)

09-22-2012 05:56 PM
أو كما غنى أحمد المصطفى :
أموووت وتعزوا ناس أمى.


#475246 [ابوالعريف]
5.00/5 (1 صوت)

09-22-2012 05:05 PM
ياعمك نحن فى امريكا عارفين عايز تعيش ملك وتبدل مثنى وثلاث ورباع وتغير سيارتك الكانون دى وتعيش سامى ملك ذى حماده نافع تبقى كوز تاكل تلعب وتخبط أى قرش وماتعيف تغش امك وأبوك وأى زول يعنى بالمختصر تدفن قلبك واصلك ودينك وضميرك وانتمى الى المؤتمر الوطى


#475237 [عبدالواحد المستغرب أيما إستغراب!!]
0.00/5 (0 صوت)

09-22-2012 04:51 PM
ياجبرا أموت وأعرف (حتلغى الكسره بتاعة هيثروا متين؟!!) و هذا ليس زهدا منى فى معرفةالسبب فقط اريد أن أذكرك بمقولة (كسرة الطله تمسخ خلائق الله!!) وإن شئت (كترة السلام يقل المعرفه!!) وهذا ليس رأى أنا لكنه رأى (المسعولين) فى هذه الدوله (العايره الما ليها سيد!!) وربما لاحظةانهم يعتمدون سياسة (المكاجره) ولا يحبون أن ينبههم أحد او يشير الى عوراتهم،وطبعا أنت تذكر قصة فرعون الملك العريان وهو يسير بين قومه بملابسه الوهميه و(كل شىء باين) كما كان يردد الراحل عبدالمنعم مدبولى فى مسرحية ريا وسكينه،بمعنى (البلابيط وغيرها) جميعها للريح وعلى البحرى ورهطه الذين اوهموا فرعون بأنه فى أحلى وأغلى حله(يعنى حاجه كده آخر موضه) وارد أسواق شارع الشانزليزيه بفرنسا اوأحدث الموديلات الايطاليه يمشون حوله وما أنفكوا يبدون له إعجابهم لهذا (الزى الفرعونى الفخيم!!) الى أن فضح الامر طفل غرير وأشار بأصبعه اليه قائلا لقرنائه (أنظروا الى ملكنا العريان)..وبالعوده لموضوع (هيثرو) هناك الكثير من الاشياء التى تحتاج أن نلح فيها،وهل تعلم يا صديقى حتى مصلحتهم إذا جات من (غريب) ليس لديهم الاستعداد للاستماع اليه..ليه والله ما عارف والعلم علمك !!وحاولت أن اخوض التجربه معاهم وتبنيت موضوع تعيين مرشد جديد ظنا منى إنهم ربما يحتاجون اليه فى هذه اللحظات الفارقه لضبط الايقاع وكما تعلم أن مرشدهم السابق (التلم) رغم كل سؤاته كان متحكما بالرسن بشكل لا بأس به وقلت انه من فوائد وجود مرشد كبح جماح الخال الرئاسى وغيره من (العشر القام ليه الشوك)وما أكثرهم، وكما يقول المثل (غيب يا قط العب يا فار) وما أكثرالفيران هذه الايام !! والبشير إذا عندو راس كان يجب أن يعلم بأنه سيكون أول وآخر المستفيدين من وجود مرشد على الاقل كان شال الشيله بدلا عنه وضمن له خروج آمن من السلطه تاركا الشعب يتصرف فى المرشد الجديد بمعرفته فيما بعد وكان عليه ان يلاحظ بأن لعنات الشعب ما زالت وستظل تطارد المرشد (الخرده) رغم كون أنه أصبح (خرده) وفى بعض الروايات صار(كهنه)ومع ذلك لم يشفع له ما آل اليه.


#475212 [النون الساكن]
5.00/5 (1 صوت)

09-22-2012 04:26 PM
اموت و اعرف الT الفي كضم نافع دي معناها شنو هل هي
Top secret and confidential ام هي tomsah ab kabalo ام هي tofoo alaik؟


ردود على النون الساكن
Saudi Arabia [نوبي] 09-23-2012 02:07 PM
Terrorist

United Arab Emirates [بت أمدرمان] 09-23-2012 01:06 AM
يعنى (تموت تخلى) و فعلا كلنا حنموت و نخلى نافع مكنكش فى الكراسى، مش الكرسى

Sudan [عاشق] 09-23-2012 12:18 AM
ال تى ل تتعبون

Japan [mak] 09-22-2012 08:40 PM
Trade mark


#475167 [الكليس]
0.00/5 (0 صوت)

09-22-2012 03:21 PM
انت عارف ياجبره عندي اقتراح وهو أن يصبح عدد الواوات مقارنه بطول الفتره التي
يأخذها الخط عند النائب العام .. واقترح واو كل شهر عشان نحن نعرف أن اخبار الخط
طنشها النائب العام كم شهر ؟


#475153 [ابو مبارك]
5.00/5 (1 صوت)

09-22-2012 03:09 PM
انحنا عارفين انك عارف انهم عارفين
اننا انحنا عارفين اللي هم عارفينو

ولو ما عارفين احسن ...عنناوالله ما عرفنا
ولو عارفين مااا نعرف يعني شنو لو عرفنا

لوانت عارف قول اللي عارفوا عشان تعرف
بس تعرف ... يا فردا اقصد يا جبرا
اعمل رايح عشان ما تبقي عرفتك دقسا


#475150 [حسن]
0.00/5 (0 صوت)

09-22-2012 03:02 PM
الاستاذ جبره
يموت الشعب كلو ولن تجد إجابة
وهم عايزين كده .. ليخلو لهم الجو
بس نعرف خبر واحد عن الخط .. ونموت بعد كده
موتو جميعا ..يرحمكم الله


#475127 [عاشق]
0.00/5 (0 صوت)

09-22-2012 02:36 PM
اموت واعرف ثقلاء الانقاذ ماشين بتين؟؟؟؟؟؟؟؟؟؟؟؟؟؟؟


#475102 [صديق الشيخ حمد النيل]
0.00/5 (0 صوت)

09-22-2012 02:10 PM
بسم الشرذمه الحاكمه: موتوا كمدياشذاذ الآفاق


#475099 [الزول الكان سَمِحْ]
5.00/5 (1 صوت)

09-22-2012 02:07 PM
يا أستاذ جبرا

أموت وأعرف..عمر البشير كتب الشعب السودانى عند ياتو شيخ؟؟

أموت وأعرف خط هيثرو الباعو منو؟؟

أموت وأعرف إنتا الشديدة دى بتجيبا من وين؟؟


ردود على الزول الكان سَمِحْ
Sudan [عاشق] 09-23-2012 12:15 AM
الشديده دى وارد كايا ودى بتكون نص كرت و كان بقت كرت كامل كان فكه اخرو

United States [امدرماني الركابية] 09-22-2012 05:38 PM
(انت الشديدة دي بتجيبا من وين) يعني ياود جبرا لازم تحرجناكده؟؟؟؟؟؟؟؟؟؟؟؟


#475092 [حسكنيت]
5.00/5 (1 صوت)

09-22-2012 02:03 PM
- العنوسة سببها الميرى
- العندهم أربعة نسوان بصرفوا عليهم من جيب الزاوية
- مزيعاتنا بختاروهن بالتلفون وشرطاً بياض اللون وكبر العيون
-وفرت عليك تلاتة موتات


#475090 [توفيق الصديق عمر]
0.00/5 (0 صوت)

09-22-2012 02:02 PM
عزيزي جبرة
اهو بي كدا انا اصحت ومن زمان كان مؤيد لكل الذي قلته وما زلت تقوله
وبي كدا انا اصبحت معارض زيك بالضبط لكل الذي يحصل من تصرفات معيقة لمسيرة التقدم
في بلادناطيب
اهو دا رد علي من يسال هي المعارضة دي وينا
السؤال دا قرات انو ساله نافع بي لغة الحساب يعني
نافع/نافع ( او للتبسيط نافع علي نافع)= صفر


#475089 [القرم تفاحة ابل]
5.00/5 (1 صوت)

09-22-2012 02:00 PM
احسن ليك ما تعرف الما بتعرفو ما بضرك


#475087 [خالد فارس]
0.00/5 (0 صوت)

09-22-2012 01:58 PM
طلما الشمار كاتلك كده اطلع من محل الكتمة واطلع ماذنة احدي الجوامع واطلب الرئيس شخصياًقبال ماتموت بشمارك.واعرف الحاصل شنو منو هو شخصياً.


#475049 [هجم النمر]
4.63/5 (4 صوت)

09-22-2012 01:17 PM
أموت وأعرف يا أستاذ مواضيعك الرائعة دي بتجيبها من وين؟


#475043 [mustafa]
5.00/5 (1 صوت)

09-22-2012 01:05 PM
عندي قطعة ارض زراعية عايز اوصل ليها الكهربة سمعت حكاية النهضة الزراعية وكدا استبشرت وقلت خير وصدقت مع انو انا مغفل ولا حاجة وعارف الناس ديل ليهم 23 سنة ما قاعدين اعملوا في حاجة غير الكضب .اها يازول لملم لملم لملمت اوراقي ومشيت لي ناس الكهرباء وابتسامتي ل اضنيني .حق الله بق الله يا ناس الكهرباء انا داير اوصل لي كهرباء لمزرعة الموظف عاين لي من تحت لي فوق شاف البشتنة العلي وابتسم ابتسامة غامضة انا قلت اكيد الزول دا ابتسم عشان فرحان بي حماسي الشديد للمساهمة في النهضة الزراعية انبسطت لكن دسيت ابتسامتي عشان قلت الموظف دا ما يقول الزول دا جاتو ام فريحانة وكدا . مشيت يا زول حشيت البرسيم وقلت للجماعة يلقطوا الليمون وينضفوا البرتكان وجداول البصل و............. ما صحاني الا صوت الموظف الما عارف اوصفوا كيف (تعال بكرة ). بعد عشرة شهور طلعت الميزانية , العمود بي 4 اضعاف سعرو وتؤول ملكيتة لشركة الكهرباء (الشقية دي ما كانت هيئة بتين بقت شركة)المحول بي 6 اضعاف سعرو ورضو حا يبقى حق ناس الشركة اياها ... اموت و اعرف النهضة الزراعية دي الناس ديل عايزين يعملوها وين


#474982 [كوكو]
4.00/5 (1 صوت)

09-22-2012 12:11 PM
يا استاذ جبرا ...انت عارف ... والله عارف ... واهل الجنوب المشو عارفين ...وناس دارفور عارفين... وناس جنوب كردفان عارفين...وناس النيل الازرق عارفين ... وناس الشرق يا اب كوكة ... وناس الغرب يا اب كوكة... وناس الشمال يا كوكة ... وناس الجنوب يا اب كوكة... المشكلة انو اب كوكة عامل ما عارف.


ردود على كوكو
United Arab Emirates [الممغوص من الكيزان] 09-22-2012 02:09 PM
ههههههههههههههههههههههههههههههههههههههههههههههههههه دى قوية يا اخ كوكو


#474974 [عبد ألله]
0.00/5 (0 صوت)

09-22-2012 12:03 PM
بالنسبة للعنوسة في السودان أظنها بسبب الفقر ليس إلا لأن في آخر تعداد سكاني عم 2005 الذي جرى تحت إدارة الخبير ياسين الحاج عابدين كان عدد الذكور في السودان يزيد على عدد الإناث بما يقارب 900 ألف نسمة كما ورد في نتائج التعداد ويمكن البحث عنها والتأكد من الرقم.
الشئ الثاني مقارنة بالدول التي حولنا في مسألة العنوسة فان موقف مصر أحسن من السودان لكن موقف السودان أفضل بكثير من ليبيا والسعودية, ويبدو أن ارتفاع الدخل زيادة على التقاليد والثقافة السائدة قد شكلا عامل سلبي بالنسة للسعودية وليبيا حيث يستطيع الرجال السفر الى الخارج وتفريغ شهواتهم وبالتالي يقل حماسهم للزواج هذا إضافة لقدرتهم على الزواج من أجنبيات.


#474971 [اسعد]
0.00/5 (0 صوت)

09-22-2012 12:02 PM
والله العظيم والله والله موت ساى بلا ووووووووووووووووووووووووووووووو


#474942 [Heron]
0.00/5 (0 صوت)

09-22-2012 11:26 AM
الحكومة عاملة طناش كعادتها دائما"


#474921 [حسين]
0.00/5 (0 صوت)

09-22-2012 11:07 AM
فى أى يوم ممكن تشاهد مذيعة الاخبار فى الفضائية السودانية لابسة توب سهرة شفاف ومشغول بخرز و ... وتعال شوف صباع أحمر شفايف , ولون شبيه للون التوب فوق العيون ولا أقول مناسب للون التوب . منتهى القبح . وربما نوعا قناة الخرطوم . وكل هذا لا يتاسب مع المقام وقبلا لايتناسب مع لون وشكل السودانية . لماذا لايفرض توب ابيض أو قل ملون سادة بدون أى اضافات. أو احضار خبيرة تجميل ومكياج هادى غير الموجودة بقناتنا الفضائية إن كانت هنالك خبيرة .


#474901 [awad]
0.00/5 (0 صوت)

09-22-2012 10:52 AM
أخى الفاتح جبرا أسعد الله صباحك أسألتك دى كلها ولو زدت عليها الاف من الأسأله وملايين من الأستفهامات والواوات التى لا تعد وتحصى فتأكد أنه الناس مطنشنك ومطنشبن كل سؤال يخطر على بالنا بل يمدوا لسانهم لك ولنا وماهاميهم شئ طالما محميين من كبار جماعة على بابا والأربعمائة ألف حرامى. حسبى الله عليهم بس بوصيك وأوصى نفسى بالأكثار من قراءة الفاتحة على المرحوم السودان.


#474884 [سيد البشير]
5.00/5 (1 صوت)

09-22-2012 10:39 AM
والله يا أبو "الجبر" إلا عمرك يبقي زي عمر النبي نوح "عشان تعرف" كل دأ!!!


#474877 [خالد فارس]
0.00/5 (0 صوت)

09-22-2012 10:33 AM
العم الفاتح جبرا والله نصيحة قبال ماتموت واوات خط هثرو خليهم 18واو اتقدم علي النائب العام حتي يتحرك ويحاول يحصلك في سباق الواوات وانت زي ما(عارف)الواو دائره مغلقة مع زيادة بسيطة نعتبر هذه الزادة مثل حبل الصبر.


#474876 [كرتوب]
5.00/5 (2 صوت)

09-22-2012 10:33 AM
لو داير تعرف ده كلو موت ساي ما نعطلك


#474865 [محمد أبوالخير ـ الواعظ]
0.00/5 (0 صوت)

09-22-2012 10:22 AM
يا حبيبنا موت موتك ما حتعرف إلأ تموت وتعرف إنك ما حتعرف .


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة