مش كده وبس
09-26-2012 10:45 AM

مش كده وبس

الفاتح جبرا
[email protected]

• إذا أردت توصيل الكهرباء لمنزلك فلابد أن تقوم بدفع قيمة أعمدة الكهرباء والأسلاك والعداد ومش كده وبس الحاجات دي كووولها تصبح ملك لشركة الكهرباء
• كثير من الفنانين يتغنون بأغاني الغير بأصواتهم الضعيفة ويغيرون في لحنها وموسيقاها ومش كده وبس كمان يخطئون في نطق مفرداتها .
• كثير من أفراد القوات النظامية يتحدثون بالموبايل وهم يقودون عرباتهم ومش كده وبس مرات كتيرة العربات بتكون بدون لوحات (المواتر ما تديك الدرب) !
• إذا ذهبت مستشفياً إلى أى مستشفى حكومى طالبوك بالقطن والحقن والشاش مش كده وبس ممكن بعد إنقطاع الكهرباء الأخير في مستشفى الخرطوم بسبب نفاذ الجمرة يطالبوك تجيب معاك كهرباء .
• المتسولون في الشوارع أصبحوا يلحو في السؤال حتى بعد أن تقول لهم (الله كريم) مش كده وبس القصة بقت فيها (جرجير هدوم) ولياقه شديدة
• جارنا (صلاح) سطا على منزله لص أخذ كل الموبايلات بالمنزل والرسيفر والتحويشة مش كده وبس وكمان قام بضرب (صينية الفراخ) التى كانت بالثلاجة !
• معظم لاعبينا المعتزلين ليسو خبراء تدريب ويفقعون مرارتنا (المفقوعة أصلاً ) بتحليلاتهم الكروية مش كده وبس ممكن يقولوا ليك مفروض (ريكاردو) يقوم بتغيير اللاعب الفلاني !!
• معظم كليات الطب لدينا ذات أمكانات متواضعه .. لا معامل لا مكتبات لا شنو ما بعرف .. مش كده وبس بعضها لا يوجد بها مشرحة .. (طب نظري وكده) !
• أعطاه جده خمسة جنيهات وطلب منو يجيب ليهو رطل لبن ونص كيلو باسطة وكيس تمباك مش كده وبس وقال ليهو جيب معاك الباقي !
• وأنت في الحافلة تقرأ في جريدة يطل جارك في الكرسي برقبته ليقرأ معك في رزالة غريبة ومش كده وبس ممكن تجي تقلب الصفحة يقول ليك (دقيقة بالله) !
• إنعدم الضبط والربط .. ممكن البت تطلع من الصباح وتجي المساء مش كده وبس وكمان تجيب معاها العشاء لى ناس البيت !
• تحت قبة البرلمان تلاسن العضو المثير للجدل مع وزير الصحة ورفع صوته ومش كده وبس هجم عليه ولو ما حجزوهو كان عاوز يضاربو
• الأفكار الإعلانية لدينا قمة في الركاكة والسذاجة مش كده وبس كمان القصة جابت ليها
(صعايدة)
• بعض شباب الزمن ده يمحن عديل .. دخلت إلى صالون الحلاقة لأحلق فوجدت شاباُ أمامي يضع على وجهه ماسك من الكريمات .. مش كده وبس وكمان (بيواسوا) ليهو في حواجبينو بالموس !!

كسرة :
إثناء مروري بالقرب من أحد أقسام الشرطة لاحظت أن هنالك جندياً (مفلفل شعرو) ومش كده وبس كمان لابس ليهو بنطلون سيستم (لغير العارفين به ده إسم البنطلون الناصل)

كسرة ثابتة :

أخبار ملف خط هيثرو العند النائب العام شنو(ووو ووو ووو)؟



تعليقات 38 | إهداء 2 | زيارات 6607

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#479792 [صلاح سلك]
0.00/5 (0 صوت)

09-27-2012 06:51 PM
البت تطلع من الصباح وتجى المساء مش كدى وبس وتجيب معاها العشاء مش كدى وبس قالت ليهم بكرة مافى عشاء لانى بايتة بر؟؟


#479676 [فادي الوطن بروحه]
0.00/5 (0 صوت)

09-27-2012 03:23 PM
الأخ الزول الكان سمح تحباتي لك،

أعتقد أن بريد أخونا (( قش )) الاليكتروني هو كالتالي: [email protected] يعني ال dot أو النقطة يجب أن تكون ملاصقة تماماً لكلمة hotmail أي لا انقصام بينهما كما هو معلوم لديك و الظاهر انك عملت كوبي و بيست لإميل الأخ قش.

جرب مرة أخرى وسوف يتم تواصلكما معاً ان شاء الله.


#479496 [مهموم]
0.00/5 (0 صوت)

09-27-2012 12:26 PM
الزول بتاع بورسودان داك جلدوه 40 جلده بس بدل 160 جلده .مش لقوهوه مع 4 بنات ؟. مش كده وبس دا المفروض يرجموه لان اسلامي.


#479308 [ابو الفرذدق]
0.00/5 (0 صوت)

09-27-2012 10:28 AM
كل ما تم ذكره محصلة طبيعية للوضع السياسى الراهن ومش كده وبس ياما حنشوف اكثر


#479181 [العينو عورا]
5.00/5 (1 صوت)

09-27-2012 08:00 AM
الشعب السودانى المسحوق راضى بى الذلة مش كدة وبس لكن يدعو لمناصرة الاخوة فى سوريا!!!


#479104 [مدحت عروة]
3.50/5 (2 صوت)

09-27-2012 12:53 AM
معليش يا قراء الراكوبة ومعلقيها ما تزعلوا من كلامى ده لكن لو حصل لاى شعب فى العالم زى الحصل للشعب السودانى من الانقاذ كان الشعب ثار ورمى بالحكومة فى الزبالة يعنى يا كاتل او مكتول حتى مبارك وبن على ما عملوا فى المصريين والتونسيين مثل ما فعلت الانقاذ فى السودانيين!!!لو الحكاية بس حريات والشعب عايش فى نغنغة نقول معليش يمكن الشعب ما عايز حريات و وجع دماغ لكن لا نغنغة ولا حريات وسرقة وفساد ونغنغة لناس الحكومة فقط فاسمحوا لى اقول اننا شعب خايس وجبان وحكاية انحنا اشجع ناس وما بنرضى الحقارة والكلام الما واقعى هذا كله كلام فارغ اتاوات وجبايات فى الداخل والخارج ويعملوا اى حاجة فى الوطن والمواطن والناس ساكتة هذا جبن وخور الشعب المصرى والتونسى والليبى والله ارجل مننا وماتوا منهم آلاف بس انحنا فالحين فى الكلام والرغى وانا ذاتى زيكم ما كلنا سودانيين جبناء وما عندنا اى رجالة غير الحديث والرغى!!!! ناس الانقاذ ديل ما اولاد ناس اولاد الناس بيجوا بالكلام الحكيم والمضبوط من كبارهم وعقلائهم لكنهم اولاد كناس ما بيجوا او يفاوضوا او يتنازلوا الا بالضرب والعصاية والشلوت واسالوا الحركات المسلحة والامريكان عنهم!!!الناس قاعدين يكلموهم 23 سنة وهم لا يحترموا الا حاملى السلاح فقط!!!! مع انه مفروض يحترموا ويسمعوا كلام الحكماء والعقلاء ويعملوا تحول ديمقراطى وبعد داك اى زول شايل سلاح ياخد على راسه وبدون رحمة!!!!


ردود على مدحت عروة
Saudi Arabia [جنوبي] 09-27-2012 02:12 PM
مدحت عروة .. والله كلامك حااار لكن صاح . نحنا من اتعلمنا نقول نحنا ونحنا خلينا الفعل واكتفينا بالنضم ..


#479051 [wedhamid]
0.00/5 (0 صوت)

09-26-2012 10:55 PM
الأخ أستاذ الفاتح.... سلامات .....
لقطة
((• تحت قبة البرلمان تلاسن العضو المثير للجدل مع وزير الصحة ورفع صوته ومش كده وبس هجم عليه ولو ما حجزوهو كان عاوز يضاربو))

أرجو أن أضيف ...مش كده و بس ... قالوا دا أستاذ جامعى ...تصوّر !!!!!

و نسبة للشهرة التى صادفها هذا المعتوه المغمور بتنطعاته العبيطه و الذى ذكرته من آخر إخراجاته و إنجازاته من التصرفات الرعناء ......أقترح أن نطلق عليه لقب ...( حسب الله كلاى )على وزن حوا كلاى ست الإنداية التى إشتهرت بضرب زبائنها المتهربين من دفع حق المريسه......


ردود على wedhamid
Sudan [مهموم] 09-27-2012 12:29 PM
انا اقترح يسمى (حسبو ابكندوم).


#479044 [هجم النمر]
0.00/5 (0 صوت)

09-26-2012 10:46 PM
ممكن يا أستاذ تسمح لينا نطلق عليك فاكهة الصحافة السودانية؟ مقالاتك كلها بنفس القوة ونفس النكهة وذات الأسلوب والتاكتيك الذكى .. تضحكنا وتبكينا على حالنا المائل وترسل رسائلك للمجتمع وللمسئولين النائمين في العسل ديل .. لله درك يا فاتح يا جبرا يا عجيب


#479015 [awad]
5.00/5 (1 صوت)

09-26-2012 10:01 PM
ياود جبره البنطلون السستم ده ظهركظاهره فى بعض دول الخليج وحكاية الماسك وحلق الحواجب نسال الله اللطف,لكن العسكرى أبوسستم ده تم تعيينه ياربى بسستتم الكيزان لأنهم مشهورون بهذه الأشياء.أما عن حكاية خروج البنت صباحا ورجوعهامساءا وأمكن تجيب معاها عشاء البيت للأسف دى ظواهر الأنحلال التى تفشت فى زمن هذه الحكومة المنحطة.ياجبرة المتسولون ليهم مليون عذر لكن قول وين دور الدولة الرسالية. ألم يسمعوا بأبن الخطاب عمر رضى الله عنه كيف يتفقد رعيته والناس نيام حتى يسد رمق جائع لأنه الله يحاسبه لكن الظاهر ناس الدولة الرسالية غير مبالين بحساب ربهم.حسبى الله عليهم.


#479010 [ناجى]
5.00/5 (1 صوت)

09-26-2012 09:48 PM
جدنا رحمة الله عليهو
كان يمشى السوق يجينا راجع يقول والله اشتريت المركوب ده بخمسه جنيه
كلنا نرد عليه ما حمسة خمسين الف
تانى كمان ما عارف يقول اشتريت الحاجه ديك بخمسه قروش كلنا نصححو قول خمسه الف
لما الحكايه كترت عليهو
جانا يوم قال والله انا مليت الحقه دى فى شارع الجلود بخمسين الف


#478996 [abu modi joda]
0.00/5 (0 صوت)

09-26-2012 09:12 PM
خط مطار هيثرو راح في حق الله والبقية في حياتك والشعب السوداني الفضل


#478923 [makondo]
0.00/5 (0 صوت)

09-26-2012 07:15 PM
شحات قلت لية ما عندى فكة قالى داير تدينى بفكة بالدكان تخيل انا سائق واقف فى اشارة مرورية غايتو اللة يسامحك يا مشير


ردود على makondo
Saudi Arabia [جار عودو] 09-26-2012 09:58 PM
الفاتح جبرا مشى الحلاق ! ومش كدا وبس ، عايز يحلق راسو مش دقنو !!!!!!


#478863 [جبخانة]
5.00/5 (1 صوت)

09-26-2012 05:59 PM
بعض المعارضة وناس حركات السطو المسلح فى اسرائيل ومش كدا وبس ,كمان وراءهم علم اسرائيل


#478857 [ود بحرى]
5.00/5 (2 صوت)

09-26-2012 05:50 PM
• إنعدم الضبط والربط .. ممكن البت تطلع من الصباح وتجي المساء مش كده وبس وكمان تجيب معاها العشاء لى ناس البيت !


• بعض شباب الزمن ده يمحن عديل .. دخلت إلى صالون الحلاقة لأحلق فوجدت شاباُ أمامي يضع على وجهه ماسك من الكريمات .. مش كده وبس وكمان (بيواسوا) ليهو في حواجبينو بالموس !!


إثناء مروري بالقرب من أحد أقسام الشرطة لاحظت أن هنالك جندياً (مفلفل شعرو) ومش كده وبس كمان لابس ليهو بنطلون سيستم (لغير العارفين به ده إسم البنطلون الناصل)


انا لله وانا اليه راجعون (هيثرو شنو يا قريبى )هيثرو قال ..........................


#478829 [jac]
5.00/5 (1 صوت)

09-26-2012 05:08 PM
والاغرب من كده حضر مفتش من مكتب الكهرباء لاكمال اجراء توصيل الكهرباء ومنزلي والحمد لله طابق واحد ورسوم توصيل الطابق حوالي 2 مليون بس الرسوم واصر صاحبنا انو ده عمارة وقلت ليهو ياشيخنا انا صاحب البيت ويمكن يكون نظري ضعيف عليك الله كدي تعال نطلع الطابق التاني او الثالث عشان بس اقنع قال لي له ولكن في المستقبل انا عارف انو حاتكمل باقي العمارة قلت ليهو البيقولو ليهو سمين يقول امين وكده .


#478824 [خالد على]
4.50/5 (2 صوت)

09-26-2012 04:59 PM
إنت صحي ياجبرا مشاريع الحكومة دي كلها دين ؟

هاهاهاهاهاهاها

لا حولاااااااااا وين قروش البترول ؟؟؟


#478734 [Abu Faisal]
4.50/5 (3 صوت)

09-26-2012 02:54 PM
وكمان جابت لناس البيت العشاء .. بالغت يا جبرة في الحتة دي رغم أن المسألة دي حاصلة


ردود على Abu Faisal
United Arab Emirates [المتفائلة جدا] 09-27-2012 03:27 PM
والأمر والأفظع من جيبة العشاء قالوا يقولوا ليها.. ليه ماجبتى معاه شطة؟؟ نسأل الله السلامة ونقول يا ساتر من زمنا عمله مشاتر..


#478732 [the merchant of venice]
4.50/5 (2 صوت)

09-26-2012 02:53 PM
i wander why they are fighting about this condom!!!they dont see our hungry belly before they look to our wet......1


ردود على the merchant of venice
Greece [azoz] 09-26-2012 06:19 PM
my ....... it not wet


#478720 [ود الجد]
4.75/5 (3 صوت)

09-26-2012 02:45 PM
تصدق يا استاذ جبرة دفعت تسع ملايين عشان اوصل الكهرباء لبيتي الجديد حسب قانون النهب المعمول به لدي هيئة الكهرباء والمصيبه (حلوة المصيبة دي وحقو تعملها موضوع مقالك القادم ) انو الكهرباء دائما قاطعة وكمان دفعوا جيراني نفس المبلغ والمفروض (برضو حلوة المفروض دي) انو المبالغ دي تعود لنا في شكل اسهم باعتبارنا مشاركين في شركة الكهرباء دي العملوها الانجليز


#478700 [ابوكرنك]
4.97/5 (6 صوت)

09-26-2012 02:18 PM
مش كده وبس الرئيس البشير يصدر اوامر بتسير غافلة اغاثة عاجلة الي مسلمي ميانمار (بورما سابقا)


ردود على ابوكرنك
Saudi Arabia [الباشا] 09-26-2012 10:34 PM
و قرى الدندر يجتاحها الفيضان و كل الاهالى فى العراء - وأحد نواب البرلمان يطلق نداء أستغاثة عاجلة - و رئيسنا المدغمس يأمر بتسيير قافلة أغاثة عاجلة الى بورما !!! و لاتعليق0


#478696 [mustafa]
3.50/5 (3 صوت)

09-26-2012 02:13 PM
اهل الانقاذ ما عيزين يخلو في السودان غير مثلث حمدي مش كدا وبس كمان عايزنو خالي من الموانع


#478667 [Kudu]
4.75/5 (11 صوت)

09-26-2012 01:43 PM
- تفتح التلفزيون تلقى رئيس الجمهورية يرقص مش كده وبس كمان يتلفت لوراء عشان يشوف الهز موزون ولا لا.
- تمشي جهاز شئون المغتربين عشان تدفع الضرائب وبعد ما تدفع تسألك الموظفة عما اذا كنت تحمل درجة جامعية فوق البكالريوس ولما تجيب بالنفي لا تصدقك مش كده وبس وكمان تلز ليك القرآن لتحلف طبعامستخدمة القلم.
- حلف الرئيس بالطلاق انو لن يدخل جندي من الامم المتحدة للسودان ودخلوا ومش كده وبس وكمان حتى المارينز الكفار يبرطعوا في الخرطوم..
- رانكر البنك المركزي عشمهم في المغتربين كبير لرفد الخزينة بدولاراتهم مش كده وبس وكمان لسه مصدقين ان للمغتربين قنابير..
- الفاتح جبرا مصدق انو كتاباته ونقده للسلطات يمكن تجد اذنا صاغية و اخترع واوات كنوع من الصراخ الكتابي مش كده وبس وكمان لو وصلتها واو ما ح تعرف حاجة..


#478660 [عمر الدرديرى]
4.75/5 (3 صوت)

09-26-2012 01:33 PM
شكراً لك الفاتح .. كتاباتك رائعة..


#478649 [amar]
1.50/5 (2 صوت)

09-26-2012 01:22 PM
الصعايدة

الصعايدة

الصعايدة

رقصني يا جدع و دقققققييييي يا مزيكا


#478640 [محمد سليم]
4.63/5 (4 صوت)

09-26-2012 01:12 PM
أنت بتأذن فى مالطا مش كدا وبس مالطا صار فيها مساجدكتييير


#478639 [ابو اخنساء]
5.00/5 (1 صوت)

09-26-2012 01:12 PM
بعد الانفصال قالوا شنو قالوا السرقات الليلية قلت وشبه انعدمت مش كده وبس بقوا ينوموا في الحوش ويجدعوا الموبايلات تحت السراير وعلى الترابيز وهاك يا شخير ولمن يتسرقوا قعدوا يبكوا ويغنوا يا..... الفارقونا وراحوا .....مش كده وبس عملوا حزب جديد سموه الوحده عائدة وو.....


#478637 [القرم تفاحة ابل]
4.75/5 (4 صوت)

09-26-2012 01:09 PM
الايام دي في سخانة في الجيب وسرحان وسرعة في المشي ومش كدا وبس كمان جابت ليها دقة قلب


#478628 [المرتاح بره بلدو]
5.00/5 (1 صوت)

09-26-2012 01:03 PM
انت عارف معنى بنطلون نه ناصل يعنى شنو فى امريكا هنا يعنى بالدراجات كده يابنات أنا مستعد للجنس وجاهز ده الحاصل يعنى أنا جاهز موية ونور


ردود على المرتاح بره بلدو
Saudi Arabia [T-shirt] 09-26-2012 04:16 PM
لكن في السودان ممكن يكون معناها بالعكس ....مش كدة و بس و ممكن يعرض نفسه لل......


#478605 [صالح عام]
5.00/5 (1 صوت)

09-26-2012 12:34 PM
وذى ما قال المرحوم ابوك ( وبعدين )


#478603 [صلاح الحلفاوي]
5.00/5 (1 صوت)

09-26-2012 12:33 PM
كلام مليااااااااااااااااان يا استاذ الكل مفروووووض يا استاذ صحيفة الراكوبة يكون صحيفة الفاتح جبرا


#478600 [أبوأسامة المهاجر]
3.00/5 (2 صوت)

09-26-2012 12:30 PM
1. الحكومة تفقع في مرارتنا 23 عاماً مش كده وبس كمان عايزة تفصل ليها دستور جديد عشان تفقع قلبنا وتستريح
2. على عثمان تنازل في نيفاشا عن كل شئ مش كده وبس عمر البشير في أديس للتنازل عن ابي والميل 14 وجنوب كردفان وجنوب النيل الأزرق
3. مشروع الحكومة الحضاري أفسد أخلاق الشباب مش كده وبس كمان قررت توزع الواقي الذكري مجاناً للشباب والفتيات وتدعوهم للمتعة الحرام بدون عناء
4. الحكومة تغلق الصحف وتكمم الأفواه مش كده وبس كمان بتحجب موقع الراكوبة
5. تلفزيون الحكومة بيفقع مرارتنا كل يوم بالأخبار والتحليلات المضللة مش كده وبس كمان إستنسخت محطات أخرى لنفس الغرض


#478588 [abubakr]
5.00/5 (3 صوت)

09-26-2012 12:17 PM
يعني يا جبرا عايز البنت تاكل براها وناس البيت يبيتوا القوى؟ ما هو برضو عمل خير ولا مش؟


ردود على abubakr
United Arab Emirates [ابو عبد الله] 09-26-2012 04:47 PM
تاكل مما تصنع


#478563 [المغترب المورم]
4.75/5 (4 صوت)

09-26-2012 11:53 AM
نهبوا تحويشة المغتربين فى سندس وأراضى الوادى الأخضر وضرائب وزكاة ودمغة جريح ودمغة شهيد وقناة فضائية وخدمات وجامعة مغتربين وووووووو.. مش كدة وبس وطالبوهم بفتح حساب بالعملة الحرة عن طريق بنك السودان .


ردود على المغترب المورم
Sudan [ataiep] 09-26-2012 03:21 PM
ماتنس التبرع لشهدا الطائرة المنكوبة ودعم النفرة ومنظمات الشهدا


#478562 [المشتهى الحنيطير]
5.00/5 (1 صوت)

09-26-2012 11:53 AM
لو باريت الحاجات دى حتنفقع مرارتك مش كده و بس ممكن تجيك إنتكاريا..!!


#478528 [saad]
4.50/5 (3 صوت)

09-26-2012 11:34 AM
يا عمك دا العسكري داقي السستم و البنات كيف


ردود على saad
Sudan [مهموم] 09-27-2012 12:43 PM
البنات ماشات (انفكو) يعني سسسسساي يعني ميطي . ودي كلها تسهيلات حسب فقه الجماعة


#478527 [ممغوووووووووص]
5.00/5 (4 صوت)

09-26-2012 11:32 AM
السلام عليكم الاستاذ جبرا
والله فى ظل الظلم والظلمات والكذب والنفاق يمكن حدوث اى شئ
لكن تصل الى ان الشابه تخرج من الصباح وترجع بالليل ومعاها العشا
والشاب يشيل حواجبين فالله المستعان
ضـــــيـــعــــوك ياوطــــــنى
حسبى الله ونعمه الوكيل


#478500 [الزوُل الكَان سَمِحْ]
5.00/5 (5 صوت)

09-26-2012 11:02 AM
يا أستاذ..دقيقة بس

ده بقولوا عليهو داقى سيستم وكاسر بستم

والله الواحد لما يلاقى مقالاتك بكون زى القاعد(يَجَبِدْ) معاك

الله يديك العافية


ردود على الزوُل الكَان سَمِحْ
Qatar [كوكو] 09-26-2012 08:05 PM
يا الزول الكان سمح وسليمان قش انتو قريتو في مصر ولا شنو؟؟؟؟

[الزول الكان سَمِحْ] 09-26-2012 07:00 PM
أخوى سليمان قش

شكراً على عنوانك الإلكترونى..لكن قدر ما أرسل يجينى راجع ..زى جبادة جبرا دى...

شوف الحكاية شنو....تحياتى

Sudan [سليمان قش] 09-26-2012 05:10 PM
الزول السمح سلام(يجبد) دي مبالغة......([email protected] .com)


#478491 [لمتين يلازمك]
5.00/5 (1 صوت)

09-26-2012 10:53 AM
يا جبرا مت جبرنا نضحك ساى بمحنك دى.لكن بمناسبة الصعايدة الجماعة يا اخوى جايييييييييييييين البلد يزرعوا ويعرسوا ويشتغلو (مش كدا وبس )ممكن يكونو نازلين فى (حلايب)بخط هيثرو


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة