المقالات
السياسة
ارشيف مقالات سياسية
يا وزير المالية ما نسينا موية البراميل لكن انت نسيت ماريل
يا وزير المالية ما نسينا موية البراميل لكن انت نسيت ماريل
09-28-2012 07:37 PM

وزير المالية : نسيتو موية الحفاظات والبراميل .. لا لا ما نسينا لكن راقديلنا فوق رأي
أنت شكلك نسيت انتفاضة مارس أبريل !!

حاتم الجميعابي
[email protected]

خلاص قام السيد الوزير على الإفتراء على خلق الله أمام برلمان الإجماع السكوتي، وبعد التصريحات الكتيرة المالي بيها الواطة، مرة يقول أرجعوا لي الكسرة، ونحنا نقول كيفن زول يصل للرغيف ويرجع تاني لي سنة أولى (الكسرة) الراجل ده في زول قال ليهو الشعب السوداني يطالب الحكومة بتوفير البيتزا والفطائر والجاتوهات ولا في ناس السلام روتانا اشكتوا من الزحمة !! ، ومرة يقول نصدر النبق ومرة الدكاترة ومرة ساي يعاين للمراية ، اسي الراجل طلع ليهو بي تقليعة جديدة .. وقال أمام أبان عمم "نسيتو موية الحفاظات والبراميل التي تبرد بالثلج"، الراجل من كترت موية الصحة لما قاعد يذكر الناس بموية البراميل والحفاظات، هو يا ربي بشرب بي شنو " ما قصدي حينما يأتي المساء" ؟؟؟ هو نحنا فارقناها يعني ولا قصدك شنو يا سعادة الوزير، لكن ما ليك حق ما دام ناسك وجماعتك بسرفوا ويصرفوا في أموال البلد دي، ما خلو شي بنو عمارات وركبوا عربات وفتحوا حسابات في البنوك،والواحد قبل الإنقاذ كان ما عندو غير عراقي وسروال وسخاااااااااااااااان التقول راعي بهائم مع كامل الإحترام لهذا الراعي الذي يكد من عمل يده ويشقى عشان يعيش وكفاية عليهو ما بسرق زي ناسك ، أسي لبسوا البدل والقمصان ركبوا الكليك والتوسان، وخلوا الغالبية العظمى من سواد الشعب المسكين ده ماشي راكب الـ (11)، الواحد من 89 نقص 15 كيلو، القمح في غضب الله والعيش في غضب الله والقطن لحق أمات طه، مشروع الجزيرة بقا زي حجوة أم ضببينه، أي حاجة ماشة انها تنتهي، وزير المالية يقول ليك ارجعوا للحفاظات، والبراميل، يا راجل الإختشوا ماتوا.
انا ما عارف السيد الوزير كلاموا ده موجهوا لي منو إذا كان للشعب، فالشعب طول عمروا صابر على النفاق والإستهتار بتاعكم ده، 23 سنة يمني نفسه بالحياة الحرة الكريمة بالحق في العيش الكريم في الصحة والتعليم والمواصلات، طول عمروا بكوس في السترة وما أكتر منها يوم ساي شفتوا زول سوداني بسيط عندو طموح يبقا رئيس جمهورية ولا زولاً كدا ليهو شنه ورنه ، وأنتو ما شاعرين بأن المسكين قاعد يضحي حتى بقوت يومه، أما أذا كان الكلام ده لعضويتكم في المؤتمر الوطني الإكتنزت المال والذهب والفضة فعليك بكشف الحسابات وأن تبدأ أنت وهرم الدولة بجرد حساب لقروش البلد النضفتوها حتى من الشماسة بدعاوى الوجه الحضاري للعاصمة، فرضتوا رسوم على أي زول بتاع الورنيش والباعة المتجولين والمحال التجارية وطلاب المدارس والجامعات واي حاجة في البلد دي لو ما دفعتا ما بتمشي، حتى الجنازة عشان ما يستروها لا زم تدفع رسوم مغادرة ..
لا يغرنك يا سعادة الوزير أسطورة القوة البصدروها ليك الجماعة، فالشعب السوداني ليس غافلاً عن عمائلكم دي، وراصد القصة دي بالتفاصيل، يعني ما داعي للإستفزاز ده، انت أكتر واحد تعلم شنو الظروف الماري بيها الشعب ده كرهتوا عيشتوا ما خليتوا ليهو جمبه يرقد عليها، وشغال ليهو ارجع للكسرة وأرجع لموية الحفاظات وارجعوا للبراميل، طيب براميل النفط دي حلال عليكم انتو لي شنو يعني عندكم 3 اضنين ولا عيونكم عيون المها يا ربي !! ما نحنا برضوا شركاء فيها، لكن أنتو دائماً ما حاسين بينا والوجعه أكبر من إحتمالات الصبر الفات الحدود، غير ما تستغفر ربك وتربطا لي السيد الوزير ده ما عندك حل تاني .. ايوااا نربطا ليهو من أسي والفقير لله تعالي ده رابطا ليهو وش كلب غايتو الله يلاقني بيك في زقاق ضيق عشان أعمل فيك أكتر من العملوا " بوشي" في نافع.
القصة يا جماعة الخير مش في وزير المالية، يعني ده الله اداهو عدم الإختشاء وسلاطة اللسان وقائل راسنا ده فيهو قنبور ، لكن القصة كلها في الحكومة من راسها لي ساسا يعني القصة سياسات ينفذها فلان ولا علان، فالوزير زي ما بذكرنا بي الحفاظات والبراميل التي تبرد بالثلج، لازم نزكروا نميري مشا كيف وعبود وكل الطغاة الكانوا بقولوا كلام أقل من كلام الراجل ده، لكن قدرة الشعب على الإنتصار على الدكتاتورية والفاشية أكبر من تصريحاتو دي، رغماً أنوا في ناس بتفتكر أن الشعب ده قلبوا مات لكن نفس الكلام ده بالحذافير قالوا الناس ايام نميري ومع ذلك مشى بالمزيكا..
آخر حاجة :
الرأي القاعدين فوقوا يا سعادة الوزير دايرين نوديك زي عبود نميري، رائك شنو بالله ، ما لقيتنا شفوت !!


تعليقات 4 | إهداء 0 | زيارات 1973

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#481005 [ابو ابراهيم]
0.00/5 (0 صوت)

09-29-2012 12:59 PM
وزير الماليه دا مستجد نعمه زي بقية اقرانه وفي حكمه صينيه بتقول ما معناه عامل الذين تلقاهم في صعودك بالحسني لانهم نفس الذين ستلقاهم في هبوطك وصاحبنا طلع في الكفر فاكر الدنيا دايمه ليه


#480902 [khalid m ali]
0.00/5 (0 صوت)

09-29-2012 11:16 AM
من شدة ما نشفت ريقنا اكان شربنا براميل زمان كلها ما بتروينا وبعدين جمعة لحس الكوع ماك سمعتهاولاوصلتك إن درت ليك واحده نسميها جمعة براميل موية التلج ونلزق لسانك فوق التلج مستعدين ليها تب .


#480661 [Khalid Prague]
0.00/5 (0 صوت)

09-29-2012 12:47 AM
مع خالص احترامي لكاتب المقال لكني لاوافق علي النهايه ديل ماحنميشيهن زي عبود والنميري لكن زي القذافي وصدام حسين....


#480624 [ali alkshamry]
0.00/5 (0 صوت)

09-28-2012 11:24 PM
ههههههههههه امات طه


حاتم الجميعابي
مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة