ياها ذاااتا
09-29-2012 01:49 PM

ياها ذاااتا

الفاتح جبرا
[email protected]

بينما كنت جالساً ممداً رجلي تحت المكتب الخشبي أحسست بلمسات خفيفة على قدمي فضربتها لا شعوريا على الأرض فإذا به (صرصور) عسلي اللون ذو شوارب طويلة يحركهما يمنة ويساراً كما (منشات العربة) .. حملت المسطرة الحديدية التي على المكتب لأقضي عليه .. لدهشتى صاح في قائلاً :
- مالك عاوز تكتلني ؟ أنا هسه عملتا ليكا شنو؟
ألجمتني الدهشة فواصل قائلاً :
- يا أستاذ إنتو الظلم ده ما بتقولو كعب !
قبل أن أرد عليه قلت في نفسي (الصرصور) ده الظاهر عليهو ناشط حقوقي من شنباتو دي !
- (وأنا أهرشه رغم المفاجأة) : طالع ليا فى كراعي وكمان ما عملتا حاجة؟ ده هسه مش أعتداء على حرياتي؟
هنا ضحك الصرصور ضحكة مجلجلة (بالنسبة ليهو طبعن) وقال لي :
- بالله هو حرياتكم دي بتدافعوا عنها للدرجة دي؟ يعني هسه عشان إتسلقت في كراعك دي عاوز تنهيني من الوجود؟
- (في صرامة) : شوف هنا للدرجة دي للدرجة ديكا ده شئ ما بخصك إنتا غلطتا ولازم تتحاسب
- يعني هسه إنتو البغلط عندكم طوااالي بتحاسبوهو؟
- والله مش بالضبط كده .. يعني بنعمل ليهو لجنة تقصي حقائق تنبثق عنها كم لجنة كده وبنحقق معاهو والموضوع بعد داك بيمشي النيابة يقعد ليهو مسافة لمن يفحصوهو ويمحصوهو وبعد النيابة بيمشي القضاء كمان يقعد ليهو شوية كده و..
- شوف العدل يا أستاذ عندكم نفسو طويل كيف؟ سنين حتين الزول يتحاسب وإنتا يا أستاذ بعد ثانية واحده عاوز تزهق ليك روح بريئة !
- والله كلامك برضو فيهو منطق !
- أيوة بدل ما تضربني تودينى الآخرة ساااكت كده كان تسألنى ليه أنا كنتا بجري وإنعكلتا في كراعك ؟ (يشيل نفسو) إنتا هسه يا أستاذ ما شامي ليك بمبان ؟
- بمبان شنو إنتو كمان عندكم بنمبان ؟
- ومظاهرات كمان !!
- (في تعجب): شنووو؟ مظاهرات؟ يعني زادو ليكم البنزين وللا رفعوا ليكم الكهرباء؟
- الأكل يا استاذ .. الأكل يا أستاذ.. ما قادرين ناكل .. زماااانك أي مواطن منكم حتى لو كان موظف صغير ممكن ياكل لحمة منقة تفاح برتكان ويمشي (الحفرة) ونمشي وراهو .. هسه البياكلو تفاح ولحمة ومنقة وبرتكان هم ناس (السيراميك) و (السايفونات) ويضغطوا الزر و(أكلنا) كووولو يروح شمار في مرقة ..هسه يا أستاذ ناس (الحفرة) ديل خلاس (نشفوا) وأكلنا كووولو منهم بقى بواقي (بوش) وطعمية لمن الصراصير دى جاتا أنيميا ..
- وهسه إنتو بتشتكو لي منو يعني؟ أكيد عندكم حكومة ومسئولين؟
- والله من ناحية عندنا حكومة عندنا ما شايف البمبان ده ! لكن مسئولين لا
- كيفن يعني ما عندكم مسئولين ؟
- طيب يا أستاذ ممكن تمشي معاي وتشيل ليا الغطاء بتاع البلاعة بتاعتكم دى
عشان أوريك المسئولين ؟
بالفعل قمت من مقعدي متجهاً إلى البلاعة (في الحوش) وهو يسير خلفي بسرعة (صفر/ الثانية) ..
- أفتح يا أستاذ غطاء البلاعة ده
قمت بفتح غطاء البلاعة فإذا بي أفاجأ بمجموعات من الصراصير .. كل مجموعة تتكون من خمسة صراصير ..
-
- ديل أكيد المسئولين بتاعنكم وكل خمسة مسئولين قاعدين في إجتماع يخططوا ليكم في المستقبل
- مستقبل شنو يا استاذ؟
- طيب يكون ده الميز بتاع المسئولين العزابه .. كل خمسة في شقة؟
- عزابة شنو يا أستاذ .. الشايفو ده كل مسئول ومعاهو حريمو !!
ثم إلتفت نحوي قائلاً :
- يا أستاذ عليك الله هسه تفتكر الصراصير دي متطلباتا كتيرة ! لا عاوزين تعليم ولا عاوزين علاج ولا كهرباء .. عاوزين ناكل بس أكل ما نلقاهو؟
- والله أخير نحنا الأكل رااااقد لكن قروش مافي .. بي مناسبة القروش دي مش إحتمال الدولة بتاعتكم تكون عاملة تقشف وكده؟
- (يضحك) .. يا أستاذ نتقشف أكتر من كده ... إنتا قايلنا بناكل تفاح !!
- بالمناسبة دي عندك أولاد؟
- هسه ولا قبل شوية ؟
- ما فاهم ..
- كان عندى أربعة أولاد قبل شوية ماتو في المظاهرة دي !!
- وإنتو غير المظاهرات دي ما عندكم وسيلة تعبير ورفض تاني؟
- والله يا أستاذ قاعدين نتكلم لكن مافيش حد سامعنا وللا مهببوا لينا
- والقصة دي طولت؟
- والله بيقولوا من جدي الـ 1286 كان عايش !!
- والحكومة ياها الحكومة ..؟
- تتصور يا أستاذ .. الحكومة ياها الحكومة ........... ذاااتا !!

كسرة :
نطالب حكومتنا بتخفيض أسعار المواد الغذائية لتكون في متناول عامة الناس .. حتي لا تستمر مظاهرات الصراصير الإحتجاجية !!
كسرة :
أخبار ملف خط هيثرو العند النائب العام شنو(ووو ووو ووو)؟


تعليقات 25 | إهداء 0 | زيارات 7475

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#482206 [سودانى]
0.00/5 (0 صوت)

09-30-2012 09:15 PM
دخلها انها انجبت صريصير والمثل بقول الخير يخص والشر يعم وولدكم العملو انت رأيكم شنو


#482132 [محمد جمال]
0.00/5 (0 صوت)

09-30-2012 06:57 PM
خط هيثرو شنو يا حاج البيع بقى فينا نحنا ذاتنا ووالى الخرطوم يهيب بالمواطنين الخروج لإستقبال البطل عمر البشير بمطار الخرطوم
حتى يواصل فى إهدار دم وممتلكات ووقت الشعب السودانى وسير سير يا البشير بس ما يقوم يعرس تانى


#482125 [ابو مصطفي]
0.00/5 (0 صوت)

09-30-2012 06:51 PM
مع الكسرة الأخيرة دي يا إستاذ .. اخبار بيع بيوت السودان في لندن شنوووووووووو ؟


#481560 [ابو نصيحة]
0.00/5 (0 صوت)

09-30-2012 08:14 AM
الغريبة صراصير ودبانقا بقت مع إخوانها وحريمهم رائحتهم بقت كريهه من اكل حق الناس


ردود على ابو نصيحة
Sudan [aburizga] 09-30-2012 03:53 PM
رجاء للذين يعلقون علي ما يكتب الا يسيؤن للغير ما دخل ودبانقا (حوش بانقا) في ما كتب؟ واضح جدا من اي بيئة اتي الاخ المعلق


#481433 [الفوال]
0.00/5 (0 صوت)

09-29-2012 11:39 PM
واللة احسن مننا


#481413 [الزول الكان سَمِحْ]
0.00/5 (0 صوت)

09-29-2012 11:13 PM
يا أستاذ

ياتا؟؟؟


#481405 [منبطح عادل وكبير]
5.00/5 (1 صوت)

09-29-2012 11:01 PM
والله الصراصير احرجتنا ايما احراج حتي كيزانهم متزوجين اربعه!! ونحنه الواحد يعافر ليهو في واحدة قدت جيبو وراسو وبقي الواحد الفياقرا المضروبه دايرليهو معها منفلة !!!


#481367 [جنوبي 2011م]
5.00/5 (1 صوت)

09-29-2012 10:21 PM
غايتو الصراصير دي كان ما علمتنا كيف نعمل مظاهرات بجي اليوم البدل نهشو نشرّك ليهو !!
هسع بدل شنباتو الكبيرة دي كان عمل ليهو دقن مش كان نفعتو !؟
نطالب الحكومة بزيادة اسعار المواد الغذائية عشان نعرف برودنا ده حدو وين !!!!


#481329 [عبدالواحد المستغرب أيما إستغراب!!]
5.00/5 (2 صوت)

09-29-2012 09:25 PM
ياجبره (صرصارك) ده أنا ما شايف ليه اى عذر!! وما المفروض يستنجد (بكرعينك) قولى ليه؟..ليه؟!! سؤال فى غاية الوجاهه!! والاجابه بعون الله ستكون فى غاية الوضوح والوجاهه! يبدو إن صرصارك العجيب ده لم يسمع بأن حريته تنتهى حيث يبداء حرية الاخرين وما كان المفروض يطلع فى كرعينك (بلا إحم ولا دستور) ونفرض إنك ما حسيت بيه وقام سرح لفوق لغاية ما حصل (الحساسه فى البساسه) شعورك قدام الجماعه كان وضعوا حيكون كيف ؟ وبالمناسبه (صراصير) الزمن ده ليها (عضه) الله لا وراك ليها وخاصة إذا صادفت وجات فى الحساسه!! ثم ثانيا: صرصارك ده العايش ليها شنو وهو فاقد أولادو بكل بساطه حتى ما فكر ياخد بتارهم وجرى يلبد فى كرعينك !! بأمانه صرصار ذى ده عايز ضرب (المركوب) وسط جمع (طيب) من الصراصير عشان يكون عبره لغيروا من أبناء جنسو!!ثالثا: بصراحه دنيا الصراصير الجد جد ما ذى ماانت صورتهم فى مقالتك وكلنا فهمنا المغزى وفهمنا إنها فاتت على الجماعه إياهم العاملين (سبعه بقرش) وفى إنتظار المزيد من (الباصات) الملعوبه التى ستؤدى قطع شك فى النهايه لإحراز (هدف) الترجيح فى مرمى فريق (صراصر) الحله !!وتخرج (الصراصير) المنتشيه بهدف الفوز الى الشوارع وهى تهتف (عاشت الصراصير)أبد الدهر حره مستقله!! ...(مضى أسبوع كامل على دعوة مولانا/ سيف الدوله ولم يتحرك أحد !! ارجو أن يكون المانع خيرا؟!!).


#481253 [البعاتى]
0.00/5 (0 صوت)

09-29-2012 07:03 PM
دا الجن الكلكى و لابس مالكى والله حيرتنا ما وريتنا الصراصير دى جات من وين؟؟؟؟؟؟؟؟؟؟؟؟؟؟؟؟؟؟؟؟؟؟


#481246 [طاهر محمد]
0.00/5 (0 صوت)

09-29-2012 06:52 PM
فنااااااااااااااان يا ود جبررررررررررررررررررررة والله ضحكتنا في هذا الزمن الاغبر


#481209 [awad]
0.00/5 (0 صوت)

09-29-2012 05:56 PM
دى قوبة شديد ياود جبرة ياربى دى واوية أم من سمسم على حدود الحبشة. لكن الحق يقال الحال وصل لدرجة بعض الناس البوش مالاقنه وناس كافورى ياكلوا جميع اللحوم بكل أصنافها مع قوة الدفع الرباعى (طبعن) ماأصلوا هم بلدوزرات.لكن قول لصرصورك ده الفرج قريب وترجع تاكل أكل ممتاز بعد حين.


#481177 [ود الرواس]
0.00/5 (0 صوت)

09-29-2012 05:03 PM
ما شاء الله ..كأنك (بيدبا) مؤلف (كَلِيلَة ودِمْنَة)


#481152 [مهند]
0.00/5 (0 صوت)

09-29-2012 04:13 PM
;;J;J;J;;J;J;J;J;J;J;J;J;J;J;


#481148 [حسين]
0.00/5 (0 صوت)

09-29-2012 04:04 PM
قرأت فى صحبفة يومية قبل سنتين أو أكثر قصة جميلة وفيها اشارات عديدة ودالة لمعانات الشعب السودانى اليومية والقصة بقلم المهندس أو الاستاذ الفاتح جبرا / وموضوعها كان عن صراصروصراصير وبيوت كبريت والخيال الجميل للاستاذ الفاتح جبرا ومن وقتها أصبحت متابع جيد لما يكتب . أرجو أن يذكرنا أحدهم بالعنوان الصحيحة للقصة وأن يحاول الموقع اظهارها .


ردود على حسين
Saudi Arabia [حسين] 09-30-2012 11:51 AM
شكرا جزيلا للأخ هجم النمر .

Sudan [هجم النمر] 09-29-2012 11:14 PM
الأخ حسين نحن من محبي الأستاذ الرائع الفاتح جبرا منذ أن كان يكتب في صحيفة الخرطوم عام 1996 .. وكل مقالاته تقريباً حافظنها حفظ .. المقال الإنت بتتكلم عنه تجده في هذا الرابط وأرجو لك ولزوار لراكوبة الإستمتاع بهذا الخيال العجيب
http://www.sudanforum.net/showthread.php?t=72284

رجاء:
لإدارة راكوبتنا الظليلة أن تنزل السيناريو في بوست منفصل حتى بستمتع الجميع


#481146 [وحيد]
5.00/5 (3 صوت)

09-29-2012 04:03 PM
طيب عرفنا الخمسة ديل مسئول و معاهم حريمو، طيب الاربعة البراهم ديل شنو؟ و الله يا استاذ ديل جكس مستني بلدوزر!


#481141 [الحســـــــــــــــــــــــــــــــــرة]
5.00/5 (4 صوت)

09-29-2012 03:58 PM
عندى اقتراح ان الوزراء بتاعين الحكومة دى اتوزعو على كم اسرة فى العاصمة والاقاليم فترة الاقامة
تكون من السابعة صباحا وحتى العاشرة مساء مع حضور الوجبات الثلاثة والشعور بالحال المائل
الذى وصلنا اليه والظروف الصعبة التى تعيشها الاسر .. معاناة بمعنى الكلمة ولا حياة لمن تنادى
والبفقع المرارة ضحك الوالى والجمع فى مطار الخرطوم وتهليل وتكبير والبشير وقع الاتفاق اتفاق بتاع
مين ولى مين ؟؟ نفاق وكذب وكروش ودقون وكضوم وناس محمد احمد كبايه شاى مامتوفرة
ارحلو فكو دربنا
وجعتو قلبنا
حتى صرصورنا اكل النيم


ردود على الحســـــــــــــــــــــــــــــــــرة
[جنوبي 2011م] 09-29-2012 10:52 PM
ههههههههه الحسرة يعني داير تنقل العدوي لباقي الشعب الفضل ياخوي الوزراء وبتاعين الحكومة ديل مفروض يعزلوهم في الكرنتينة خوفا من العدوي لحدي ما نلقي علاج للوبا الاسمو السرطان الوطني !!


#481129 [القرم تفاحة ابل]
4.88/5 (9 صوت)

09-29-2012 03:46 PM
اسالو لو عرفو خط المجاري \البلاعة \الحفرة\ لوعرفو الباعو منو


#481122 [الجعلي]
0.00/5 (0 صوت)

09-29-2012 03:44 PM
ههههههههههههههههههههههههههههههههههههههههههههه
الواحد ليهو زمان ما ضحك الضحكة دي


#481105 [عبدالعظيم]
5.00/5 (2 صوت)

09-29-2012 03:23 PM
استاذ جبرا أظنك بالع ليك حبة صراصير القالو موجوده فى مصر.


#481101 [ابراهيم]
0.00/5 (0 صوت)

09-29-2012 03:07 PM
هههههههههههههههههههههههههههههههه


#481077 [مصعب عبدالواحد]
5.00/5 (2 صوت)

09-29-2012 02:30 PM
ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه والله دي بالغتا فيها عدييييييييييييييييييل يااستاذ ربنا يديك الصحه والعافيه علي البسمه والضحكه البترسما علي وجوهنا رغم المعاناه والعنت والشقاوه


#481070 [green]
5.00/5 (2 صوت)

09-29-2012 02:18 PM
اسسسستتتتاذ دي بي كم دفتر


#481055 [العمارة الرواج]
0.00/5 (0 صوت)

09-29-2012 02:01 PM
الصرصور دة عندنا صاحبنا بيخاف منو خوف شديد وهو منتهك للحريات حتي لو جابو اسمو خليك هوذاتوووووووووو؟
هولاءكالصراصير يعتدون علي الحقوق وكذلك الحريات؟


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة