قال أيه؟ أقل جودة
10-06-2012 11:54 AM

قال أيه؟ أقل جودة

الفاتح جبرا
[email protected]

بعد أن (إنفقعت) المرارة وتورم (الفشفاش) وتليف (الكبد) .. وإنفجرت شعيرات المخ الدموية وتمت إصابتنا بالكساح الذهني جراء تصريحات بعض المسئولين المستفزة والغريبة والعجيبة زى تصريحات وزير ماليتنا التالية :
• لا توجد ضائقة مالية ومافي مواطن ما لاقي ياكل
• ح نقوم بتصدير النبق والدكاترة لسد العجز
• أرجعوا للكسرة والعواسة
• نسيتوا موية البراميل والحفاظات (مذكراً الشعب الفضل بأنه الآن يشرب موية صحة)
خرج علينا ذات الوزير قبل يومين وعلى صفحات الزميلة (السوداني) مطلقاً تصريحاً (يقول للفوق ديل إنتو شنو) .. تصريحا لا يمكن أن يصرح به مسئول .. لا في الأمم الغابرة ولا الحاضرة ولا القادمة ولا (القلتهم ديل كوووولهم) .. تصريح ينطوي على (إهانة) لم يتعرض لها شعب من شعوب العالم قاطبةً في الجهات الأربع .. ماذا قال السيد وزير ماليتنا ذو (الدفع الرباعي) لشعب يسير أغلب مواطنيه على (عجل الحديد) ؟
قال لا فض فوه (إن الدولة تتجه لتوفير خبز مدعوم بأسعار وجودة أقل يطرح إلى جانب الخبز الحالي) !!
الخبز .. أيوه (الرغيف) الذي هو المكون الأساسي للوجبة الغذائية لمعظم أهل السودان (لما كانت في وجبات) قبل أن تتضاعف أسعار مكونات الغموس (حتى موية الفول) وتصبح بعيده المنال .... هذا الخبز يا سادتي الأماجد نحن موعودون بتقليل جودته ، أما كيف سوف تتم تقليل جودته فأسألوا السيد الوزير؟ (يعني مايكروعيش وكمان دون قيمة غذائية) ! بالله ده إسمو كلام؟
• عزيزي القارئ قم بتركيب الفهامة حتى تساعدنا في الإجابه على هذا السؤال :
• هل الخبز الذي نتناوله (نحنا ديل طبعن) الآن مطابق للمواصفات القياسية؟ بمعنى هل هو خبز صحى وذو جوده عادية ؟ (نخلي قصة عالي الجودة دى) ؟ هل يستطيع أحد تحديد نسبة (العجين) إلى نسبة الأتربة، والحصى، والشوائب المعدنية، و الزجاجية و(الحشراتية) وقطع المسامير والأمواس والطين والتنباك والخشب هذا غير (عرق العمال) والمكروبات والجراثيم والشكل البائس (للرغيفة) والذي (يسد النفس) ؟
طيب والحال هكذا تري ما هو شكل ومكونات الرغيف (الأقل جوده) والذي يعدنا ويبشرنا به السيد الوزير من الرغيف (التعبان) القاعدين ناكلو هسه ده ؟ يا ربي ح يكون رغيف بالحصاص (مثلاً) ، حصاص بالرغيف رغيف بالزبالة ؟ رغيف بالزفت؟ زفت بالطين ؟ طين بالخرسانة ؟ ثم ماذا يا تري سوف تكون التأثيرات الصحية لهذا الرغيف (الأقل جودة) على أجساد الشعب السوداني الفضل ؟ و ما هي يا تري الأمراض التى سوف تصيبه جراء تناوله له؟ بعد أن أصابه الرغيف (عالي الجودة الحالي) بفقر الدم والشحوب والهزال والضعف والكساح والرجفة والطشاش؟
هل سيصاب بتيبس الفقرات العنقيه بعد أن تيبست فقرات (جيوبه) أم سيصاب بتمزق في الإمعاء بعد أن تمزقت (ميزانيته) أم سيصاب بطفح بالجلد بعذ أن طفح به الكيل !
القراء الأكارم : هل رأيتم مسئولاً واحداً على كوكب الأرض والمجرات المجاورة يعد مواطنيه بإنتاج سلعة غذائية (أياً كانت) أقل جودة خليك من إنها (أساسية) !!؟
لا أظن ذلك حتي وإن كانت تلك السلعة (عالية الجوده) وعاوز يخليها (عادية الجوده) فما بال وزيرنا وهو يعلم أن رغيفنا (نحنا ديل) خالي الجوده وهو يريد أن يجعلة (أقل جوده من الخليان ذاتووو) !
• يا سعادة الوزير إن البلدان التي تهمها صحة مواطنيها تحاول تحسين جودة الخبز وقيمته الغذائية حيث يفحصون القمح للتأكد من إحتوائه على الفايتمينات والألياف الغذائية التي تضمن تخلص الجسم من الدهون والكوليسترول كما إنهم يضيفون إلى عجينته البروتنينات النباتية مثل الصويا وكما يضعون على عجينته عنصر (الحديد) حتي لا تصاب شعوبهم بالأنيمياء !
فما بالك يا أخي عاوز تجيب لينا أنيميا ونحنا أصلاً عندنا أنيمياء بعد أن تركنا أكل اللحوم الحمراء والبيضاء والطماطم والفواكه والبيض .........................ليكم !!

كسرة :
قال أيه رغيف (أقل جودة) .. ياخي عادي بقي الزول يلاقي ليهو (كلبين) بيتشاكلو ليهم في (عجورة) تقول ليا شنو وشنو وشنوووو.. !!

كسرة ثابتة :
أخبار ملف خط هيثرو العند النائب العام شنو(ووو وووو ووو)؟



تعليقات 28 | إهداء 0 | زيارات 5120

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#484933 [هههه]
0.00/5 (0 صوت)

10-08-2012 08:46 AM
انتو الدلع ليكم شنو اصلآ لاقين تاكلو مادم السيد الوزير قلبو حن وداير يحسن ليكم المستوي المعيش
دايرين تجننو . انتو احمدو اللة انو قال ليكم اقل جودة . لانو عندهم نواع تاني بيعرفو المتعافي
لانو بتاع مزارع وكدة والباقي تمو خيال


#484785 [musa]
5.00/5 (2 صوت)

10-07-2012 10:10 PM
وزير الصحة رايو اية فى الكلام دا ~ لوعندنا وزير صحة ~مجرد سوال اة يابلد


#484745 [ابو علي]
5.00/5 (2 صوت)

10-07-2012 08:55 PM
السبب معروف انو المسؤليين من الحركة الاسلامية السودانية الحرامية في حكومة الانقاذ كلهم اقل جودة - بالتالي عايزيين يخلو اي حاجة في السودان اقل جودة حسب مستواهم ( و كل اناء بما فيه ينضح )


#484522 [بدر النهار]
0.00/5 (0 صوت)

10-07-2012 03:06 PM
علي محمود شتان بين الإسم والفعل لوكان يعرف معني إسمه لما أساء إليه بفعله حسبنا الله ونعم الوكيل .


#484512 [mohamad]
0.00/5 (0 صوت)

10-07-2012 02:50 PM
أنظر ياأخى لصور المخابز والخبز فى كل دول الربيع العربى
ستتأكد أننا دون دون . أرجو من كاتب المقال أن يهدى تلك الصور
للمسئول هذا .


#484508 [mohamad]
0.00/5 (0 صوت)

10-07-2012 02:45 PM
والله هذا قمة الفشل الفشل الفشل ولكن لا حسيب
سيبرطعون حتى يقضى الله أمرهم.


#484488 [ابوالزفت]
5.00/5 (2 صوت)

10-07-2012 02:27 PM
انا اسع دى كنت بكلم فى الوزير اياه
وقال ليكم العاوز ياكل من الرغيف دا ياكل
والما عاوز يضرب راسو بالحيطة يعنى حتعملوا شنو
يعنى شنو الفاتح جبرا يكتب مقال تانى وتالت مايهمنى
طظ فيى الشعب السودانى كله .. بكرة نأكلكم اى حاجة
ومافى واحد حيقدر يقول بغم
ودى نصيحة منى انا : خلوا رغيف الوزير التعبان دا ..
اكلوا تورته .. عشان رغيفو يبور !!!


#484454 [ابو ابراهيم]
0.00/5 (0 صوت)

10-07-2012 01:47 PM
يا استاذ حبرا ديل وصلوامرحلة فرعون الذي حكي الله لنا عنه في القران قال تعالي (قال فرعون ما أريكم إلا ما أرى وما أهديكم إلا سبيل الرشاد ) وطبعا معروف مصيرهذا الطاغيه فرعون


#484427 [ود الخضر]
0.00/5 (0 صوت)

10-07-2012 01:26 PM
عشان نصلح وضع الاقتصاد المتهالك دا نشوف مسئولين أقل جودة قياساً بالرقيف اقل جودة
والله الناس ديل افتروا عديل على الشعب السودانى
الهدندوى انكسر بيه اللورى فقال قولة مشهورة (هسع كيف )
نحن بنقول للسيد الوزير (هسع كيف )


#484260 [maher abdeen]
4.50/5 (3 صوت)

10-07-2012 08:51 AM
اذا كانت جامعاتنا اصبحت تخرج متعلم اقل جودة, وطبيب اقل جودة ومسؤول اقل جودة ومواطن اقل جودة....ماياكل سيادته رغيف اقل جودة


#484177 [ابوغره]
4.00/5 (2 صوت)

10-07-2012 12:03 AM
يأستاذ الفاتح جبره الوزير كلامو واضح وقصدو شريف وهو بقصد الرغيف الاقل جوده مما يأكله هو واهل بيته لأنو داك اكتر من جيد ويمكن الراجل قلبو حن وحاول يرقيكم شويه . بختكم حاتاكلوا رغيف اقل جوده بقليل مما تأكله الصفوه مش الجرايه البيناكلها دي .


#484172 [almor]
5.00/5 (1 صوت)

10-06-2012 11:46 PM
مادام‏ ‏الناس‏ ‏مرارتا‏ ‏مفقوعه‏ ‏كدا‏ ‏مارايكم‏ ‏في‏ ‏تكوين‏ ‏الجبهة‏ ‏المعاديه‏ ‏للكيزان‏ ‏وكل‏ ‏واحد‏ ‏يعتبر‏ ‏نفسو‏ ‏فايد‏ ‏فيها‏ ‏ونبدا‏ ‏كان‏ ‏جوه‏ ‏ولا‏ ‏بره‏ ‏السودان‏ ‏من‏ ‏هسه‏ ‏في‏ ‏تكوين‏ ‏المجموعات‏ ‏


#484142 [الفاتح]
0.00/5 (0 صوت)

10-06-2012 10:56 PM
ليس دفاعا عن وزير المالية ليقيني التام بسياساته الخاطئة التي ساهمت في تدهور اقتصادنا لكن الزول دا حسب اعتقادي بيكون قاصد أسعار أقل لأنو احتمال يكون قادي لغة عربية ولا شنو يا أخوانا.
علي فكرة أنا من المعجبين جدا بكتاباتك يا أستاذ جبرا.


#484093 [koko2]
4.50/5 (5 صوت)

10-06-2012 07:47 PM
الناس راضية بالحاصل ده
عشان كده الحكومة تشيل وتعصر



واتو لسة شفتو حاجة
يا الشعب السوداني يا المنبطح
صدق من قال عليكم شعب الله الكسلان


#484092 [كوكو]
4.00/5 (4 صوت)

10-06-2012 07:46 PM
قال الشاعر ( فكّو دربنا وجعتو قلبنا.... حتى كلبنا أكل جرجير)


#484052 [ود الخليفة]
5.00/5 (3 صوت)

10-06-2012 06:23 PM
كل يوم ازداد يقينا بما قاله الاستاذ الشهيد محمود محمد طه أن الشعب السوداني عملاق يتصدره أقزام, و أزداد يقينا لا يخالجه شك كلما انبري امثال وزير المالية بمثل هذة التصريحات و العجلئب التي تكشف عن سوءاتهم.
الشعب السوداني في مجمله عملاق بسموه الي العلياء و ترفعه عن الصغائر حتي وان كانت لقمة العيش التي تمثل عصب الحياة


#484035 [عبدالواحد المستغرب أيما إستغراب!!]
4.32/5 (5 صوت)

10-06-2012 05:57 PM
ياجبره انت شخص غير منصف !! ياسيدى كان الواجب عليك التفكير فى الدفاع عن (حقوق الرغيف) قبل التفكير فى حقوقنا المهدره أصلا !!وليس من الوزير وحده ،وخاصة أن الوزير المعنى ظل معاديا للرغيف منذ أن شرف الوزاره وسبق له وفى احدى تصريحاته لصحيفه عالميه طالب الشعب بإقصاء الرغيف من مائدته واللجوء الى الكسره بشكل ينم عن تمييز عنصرى صارخ !!وهو عندما يتعرض للرغيف وتخفيض درجته الى الحد الادنى يقصد قطع شك تشويه سمعة الرغيف والاساءة اليه وخاصة بعد أن فشلة دعوته السابقه لهجر الرغيف والاستعاضة عنه (بالكسره) وبصراحه انت شخصيا سببت ليه عقده نفسيه بحكاية (الكسره الثابته) التى تزيل بها مقالتك والوزير بذكائه الخارق قرر أن يأكل الشعب (الكسره) ويخلصوا السوق منها والى الابد ويخلص من (كسرة) الفاتح جبره وطبعا كدا الغرض بدا ليك وللقراء واضح جدا، وسبب الهجمه الشرسه التى يقودها الوزير تجاه الرغيف وربما يغم على بعض أبنائنا من الجيل الجديد (لفظ كسره) التى تكتب فى ذيل مقالات أستاذنا جبره فهى مقتبسه من اغانى زمان الذى كان فيه الفنان يختم بعض أغنياته بلحن مخالف بعض الشىء من لحن الاغنيه الاساسيه وأحسب أن وزيرنا الهمام من الجيل الجديد او ليس له فى الاغانى ولذا جاء فهمه لكلمة(كسره) وأقصد كسرة جبرا على إنها إساءه له وللنظام واراد أن يجفف الكلمه من المقالات بطريقه عبقريه وتعمد الاعتداء على الرغيف الذى لا ذنب له فى هذه المعركه لمجرد سؤ فهم من فخامة الوزير ..المعركه التى سوف يروح فى نهايتهاالشعب ضحية لها..والله يجازيك ياجبرا جيبت لينا الهوا !!.


#484019 [برانتوود]
4.00/5 (3 صوت)

10-06-2012 05:44 PM
يمكن قليل الملح و باكينج باودر.. الوزير عايز صحتكم (باااااا)


#484001 [zoul]
5.00/5 (5 صوت)

10-06-2012 05:15 PM
الوزير دا اظنوا ما قاعد في البلد نرجع للكسرة والعواسه هو نحن لاقين اظنو ماعارف ثمن العيش بتاع الكسرة بي كم ؟ دا ياهو زي القالت للشعب مادام مالاقين عيش اكلوا باسطة . واظن الوزير دا ياهو السفر ولده عشان يتعالج في امريكا لي عملية كان اي طبيب امتياز هنا يعملها لكن لا طبعا هو وزير المالية والعندو الحنة يحنن ضنب جوادو . وداير الناس تأكل خبز اقل جودة عشان يوفر حق العلاج لاسر الوزراء الباقين لأنه زي ما هو ودا ولده هم كمان عندهم اولاد .


#483993 [الحســــــــــــــــــــــــــــــــــره]
5.00/5 (5 صوت)

10-06-2012 05:04 PM
وزير جزمه مستفز للشعب والشعب فى حالة صدمه لم يفق منها بعد ؟؟؟؟ظ


#483986 [okan]
4.25/5 (7 صوت)

10-06-2012 04:58 PM
نستاهل نحن عشان ساكتين علي واحد جربوع زي وزير المالية يتعلم فينا وفي بلدنا ادارة الاقتصاد وهو الذي جاء للمنصب ليس بعلمه ولا تأهليه ولا خبرته وانما جاءت به خلفيته القبلية مثله مثل سائر أهل الانقاذ قاتلهم الله أجمعين


#483981 [ديوكو]
4.25/5 (6 صوت)

10-06-2012 04:54 PM
لم أجد في حياتي وزيراً مثل وزير المالية علي محمود.. ترضيات قبائلية وجهوية تأتي لنا بشرور ما بعدها وإذلال ومهانة..

حاجة تقرف .. بلا يخمكم


ديوكو


#483967 [Abu Areej]
5.00/5 (4 صوت)

10-06-2012 04:26 PM
قول وفر العيش الاقل جودة يأكلوه بشنووووووووووو؟؟؟


#483962 [أبو ناهد]
5.00/5 (3 صوت)

10-06-2012 04:21 PM
كلبين في عجورة؟؟؟؟؟ لا حول ولا قوة إلا بالله، أعوذ بالله من مخانيس الكيزان، الذي جعلوا آكلات اللحوم عشبية


#483957 [ahmed]
5.00/5 (1 صوت)

10-06-2012 04:09 PM
هو شنو الفضل في بلدنا دي ما أقل جودة ؟
الصحة أقل جودة ، التعليم أقل جودة ، النقل أفل جودة ، حتى للأسف المواطن أصبح أقل جودة .
و لكن كما تعلم أستاذ الفاتح أن حكومتنا لها تعريف أخر للجودة !!!!!!!!


#483949 [حسكنيت]
5.00/5 (5 صوت)

10-06-2012 12:42 PM
دى سياسة ( كحينة ) الشعب ، يعنى تبقى كحيان زى تيس عبدالخالق ..وأول حاجة تعملها تقوم تدفن حفرة الدخان


#483948 [وحيد]
5.00/5 (2 صوت)

10-06-2012 12:30 PM
نحن لسنا في حاجة لرغيف اقل جودة ... نحن في حاجة الى مسئولين مسؤولين!


#483944 [الزوُل الكَان سَمِحْ]
4.50/5 (4 صوت)

10-06-2012 12:10 PM
يا استاذ جبرا

مع مواساتى الكاملة لك فيما تحسه أنت والشرفاء من الشعب الفضل.وإحترامانى لكم..أقول بأن كل الذين يؤيدون هذا النظام ويستقبلونالإهانات من كافة مسؤلى الدولة فلو أطعموهم زق عدم المؤاخذة فهم مستحقوه..نحنا مرارتنا ما أنفقعت بس ديل طلعوا دينا


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة